DJAMBA DJƐ WEKELO 35
YEEMBO 123 Tɔlɔndake ɛlɔndjɛlɔ kɛ teokrasi la nkɔmano nkfumɔ (lá Otetela)
Wopo wɔ nkotshɛ́ anto wamboposá m’otshumano
‘Osasa wongoyala efula l’olongo lá nkambo dj’onanghi 1 wɔ mpekanto w’olapɛla, ndeka anto wa wɔlɔ 99 wapalekɔ la djonyi djɛ ndápɛla.’—LUKA 15:7.
IKANYI YƐ DJAMBA
Tɔnghɛna lamo anto amɔtshi oyɛwɔ ladjɛ mposa m’otshumano la wopo wɔ tokokolo okokawɔ ndakotshɛ́ dj’iwɔ ndápɛla la nkalɔ lonkina le Yehova.
1-2. a) Yehova ɔsakande ananghi wa mpekanto wapalapɛlɛ ngete mo? b) Yehova oyɛnde la nkongi djɛkɔnge lá nkambo dj’ananghi wa mpekanto?
YEHOVA apawolaka djalelo nkfumɔ, nde nkfupaka mpakanto. (Yee. 5:4-6) Nde ntɔlɔmbaka djɛ nɛmɛyɛ ɛlɛmbɛ wɛnde wɛ sii, wɛ ndatɔpɛyɛ l’Otepela wɔnde. Lá nsɔsɔlɔ, Yehova apakonge dj’iso anto wa ntshamba djɛ djɔ nkoma djɔ. (Yee. 130:3, 4) Winá ɛmɔtshi, nde apadjipaka wiso winá wɔ ‘anto wa nyɛtshi ɔsawɔ wɔlɔ w’ipa wɔsɔdjɔmba wɔ Ndjambe kɛso ete ngo elonga kɛ ndápɛyɛ lá eyalelo kɛ ntshamba nsɔnyi.’ (Yuda 4) Lá nsɔsɔlɔ, Bible ntepela nkambo djɛ ‘etshitanelo kɛ anto wa nyɛtshi’ lá mbandji k’Armagɛdɔ kɛ Ndjambe.—2 Pɛ. 3:7; Ndj. 16:16.
2 Koko, Yehova apakɔpɛ kaanga onto ɔmɔ mvɔ. Ete ngo sombotepelá l’ɔnɔnghɔ wɔ wamba wɔnɛ, Bible ntepela papoo ante nde ‘nkɔpaka djɛ anto ankfumɔ wawa mbamba kɛ ndápɛla.’ (2 Pɛ. 3:9) Tokokolo tɔ Akristo ndjokolaka Yehova winá w’onanghawɔ la wolo djɛ nkotshɛ́ anto wamonangha mpekanto dj’iwɔ ntshikitana la nkalɔ le Yehova. Koko ape anto ankfumɔ ndeke lelolaka lá lɛdji lɔ wɔlɔ. (Iza. 6:9) Amɔtshi nkindjɛka lá lowiko lɔwɔ lɔ mbindo kaanga tokokolo onanghawɔ la wolo mbala la mbala djɛ ndakotshɛ́ djɛ ndápɛla. Tokokolo oyɛwɔ ladjɛ nangha nge lá nkambo djɛ nghɔsɔ?
‘NYIMƐ ONTO WƆ NYƐNTSHI’
3. a) Bible ɛnyɛnde nge lá nkambo djɛ onto womonangha mpekanto ko apolapɛlɛ? b) Lamo okokaso ntepela ente, lá lɛdji lɔmɔtshi, onto womonangha mpekanto ndeke lɔmbɔsɔna djɛ mposa má otshumano?
3 Winá wɔ onto onanghande mpekanto ko apolapɛlɛ, tokokolo oyɛwɔ ngo ladjɛ ndɔnda ɛlɔndjɛlɔ kelekɔ́ lá 1 Kɔrɛtɔ 5:13: ‘Nyimɛ onto wɔ nyɛtshi wɔsɔ m’anteyi kɛnyo.’ Ntepela ente, onto womonangha mpekento ndeke lɔmbɔsɔna eposelo wɛsɔ; nde a ambovuka kɛnɛ kɛ ndakone. (Nga. 6:7) Lamo otepelaso nghɔsɔ? Ladjikɛnde ambotona welo enkfumɔ wilá tokokolo djɛ ndokomɛ lá ndápɛla. (2 Nk. 17:12-15) Nanghedji djɛnde djɛnyɛ ente apakɔpɛ nɛmɛyɛ ɛlɛmbɛ wɛ Yehova.—Mvu. 30:19, 20.
4. Lamo ndjewo oyɛwɔ ladjɛ mpɛyama winá wɔ onto womonangha mpekanto oposande má otshumano?
4 Winá wɔ onto womonangha mpekanto wopolapɛlɛ oposande má otshumano, ndjewo kɛngɔpɛyama djɛ ndjewoyɛ otshumano ente apalekɔ kankina Owakɛ wɔ Yehova. b Okoma wɔ ndjewo kɛsɔ ape wɔ ndɔpɛyɛ nsɔnyi. Koko oyɛwɔ nde djɛ otshumano nkilika ɔlɛmbɛ wolekɔ lá afunelo wɔ ‘ntshika mbembolana la onto wɔkɔ’ la ntshika ‘dj’ipa kaanga ndɛ la onto wɔsɔ.’ (1 Kɔ. 5:9-11) Yehova apɛyɛka ɔlɛmbɛ wɔsɔ la donga djɛ wɔlɔ efula. Ɔpɔstɔlɔ Poolo afunaka ante: ‘Ndambo kɛ okanga wɔ ifudjɛ́ nkoka mfudjɛ okfuna wɔ lɔsɔpa.’ (1 Kɔ. 5:6) Anto wamonangha mpekanto ko wapolapɛlɛ nkoka mpɔdjɛ nkano djɛ waanangha la wolo djɛ mbika lá nkilika ɛlɛmbɛ wɛ sii wɛ Yehova.—Woo. 13:20; 1 Kɔ. 15:33.
5. Wopo wɔkɔnge w’okokaso ndɔsa onto womboposa má otshumano, ko lamo?
5 Ko wopo wɔkɔnge w’okokaso ndɔsa winaso ondjawodji womboposa má otshumano? Kaanga sopawembolana lande, iso ladjɛ ndɔwɔsa ete ngo ɔnkɔkɔ wombovunga, koko ape ndaka onto wopakoke ntshikitana. Ɔnkɔkɔ wombovunga nkoka nkalɔ l’otonga. Tovungɔ ente, ɔnkɔkɔ wombovunga wɔsɔ ambolalambolá le Yehova. Yɛnyi nde apowika lá nkilika ɛlɔkɔ kɛnde kɛ ndálambola, ko kɛsɔ kowila lá mbalaka. (Ezk. 18:31) Koko l’ilá kenkfumɔ kɛ Yehova okokande ndowoka djandji, tolekɔ la nkongi ente angokalɔ. Wopo wɔkɔnge tokokolo okokawɔ nyɛnyɛ nkongi djɛ nghɔkɔsɔ kaanga te onto womboposa má otshumano?
WOPO WƆ TOKOKOLO OKOTSHƐ́WƆ ANTO WAMBOPOSÁ M’OTSHUMANO
6. Wina wakɔnge wangotapala tokokolo djɛ nkotshɛ́ onto womboposa má otshumano?
6 Winá w’onto oposande m’otshumano, tokokolo ladjɛ ndokadjɛ, la ntshika ndokotshɛ́ dj’ipa nde nkalɔ le Yehova? Lako, ape nghɔsɔ! Winá woshimelawɔ onto womonangha mpekanto wopalapɛlɛ ambɔ amboposa má otshumano, kɔmite kɛ tokokolo wangopakisola wina w’oyɛnde ladjɛ ntapola djɛ nde nkalɔ lá otshumano. Koko tokokolo ladjɛ nangha akambo efula, ape ngo nghɔsɔ toko. Lá akambo efula, wangoshimela onto womonangha mpekanto ambɔ wangoosawola la nde lonkina m’ɔkɔngɔ wɔ ngɔndɔ imangha djɛ ndolenda ntsha angotshikitana. Ntsha onto wɔkɔ alekɔ entshupa djɛ ndosawola lawɔ, mbala kenkina kɛ yongopomana, tokokolo wangookembɛ djɛ nde ndápɛla la nkalɔ l’otshumano. Kaanga ndotatshikitanyɛ eyalelo kɛnde lá winá wɔsɔ, tokokolo wangonangha la wolo djɛ nsawola la nde mbala la mbala.
7. Wopo wɔkɔnge tokokolo okolawɔ djandji djɛ Yehova winá w’osawolawɔ la onto womboposa má otshumano? (Jɛrɛmi 3:12)
7 Tokokolo wangonangha la wolo djɛ ndjokola djandji djɛ Yehova winá w’osawolawɔ la onto womboposa má otshumano. Ndjɔmbɔmba, Yehova atakongaki djɛ enkambi wɛnde w’antɔmbɔki w’ase Isariyɛlɛ yɛ ntondo ntapola djina djɛ ntondo. Koko, nde ɔsaki nonghanyi kɛ ndakawoyɛ le nde lá ntondo k’iwɔ nyɛnyɛ kaanga ilembetelo imɔ yɛ ndápɛla. Ete ngo sɛnyi lá djamba dj’ape djɛ ɔnɔnghɔ wɔ wamba wɔnɛ, Yehova ɛnyɛka ante alekɔ la djandji dj’efula má nshimela ɔprɔfɛtɛ Ozeya djɛ nkawoyɛ wadjɛnde, wokindjɛki nangha mpekanto. (Oze. 3:1; Mal. 3:7) Má ndjokola Yehova, tokokolo tɔ Akristo nkombolaka la oloko wɔlɔ onkfumɔ djɛ onto womonangha mpekanto nkalɔ, la iwɔ wapilaka akambo nkenya djɛnde nkalɔ.—Wala Jɛrɛmi 3:12.
8. Wopo wɔkɔnge ndjɔmbɔmba kɛ Yeso kɛ wɔna w’ovungisá ɛnyɛwɔ lá lɛdji l’efula nkɛtshi la djandji djɛ Yehova? (Luka 15:7)
8 Tokovungɔ ndjɔmbɔmba kɛ Yeso kɛ wɔna wovungisá, ete ngo sɛnyi lá djamba dj’ape djɛ ɔnɔnghɔ wɔ wamba wɔnɛ. Winá wɔ ndatangela wɔna má otale alakalɔ lá mvulu, isɛkɛnde ‘alotaka te nde, ovundaka la asomanaka nya nde efula.’ (Luka 15:20) Tokote ente papa atakonga djɛ wɔna ndɔlɔmba djɛ nde ndowimeyɛ. Koko, nde ndeke lɔsisá nkano, ete ngo papa kenkfumɔ kɛ ngandji ndotanangha. Tokokolo ladjɛ nangha la wolo djɛ ndjala l’ikanyi yɛ nghɔsɔ te anto wambovunga. Iwɔ nkɔpaka djɛ ɛnkɔkɔ wembovunga wɛsɔ ‘nkalɔ lá mvulu.’ (Luka 15:22-24, 32) Osasa wongoyalake l’olongo la lá looko winá wɔ onanghi wɔ mpekanto olapɛlande!—Wala Luka 15:7.
9. Wopo wɔkɔnge Yehova etande ananghi wa mpekanto?
9 Má akambo ankfumɔ wa sombotepela wanɛ, okama papoo ente Yehova apawolaka ananghi wa mpekanto wapalapɛlɛ. Koko, nde apapɛyɛka ɔkɔngɔ. Angɔkɔpake iwɔ nkalɔ. Ozeya 14:4 ɛnyɛ wopo wɔ Yehova ndokaka lá nkambo dj’anto wanangha mpekanto ante: ‘Lemi langasadjɛ ko wapangotshutshɛ nkɔmano lonkina. Lemi langakɔpa la ɛkɔpa kɛmi, ladjikɛnde mpawokaka nkɛlɛ lonkina.’ Ete ngo Yehova, tokokolo wangohonake ikakambo inkfumɔ yɛnyɛ ente onto ambotateyɛ ndápɛla. Etepela wɛsɔ wekembɛ waambokadjɛ Yehova dj’iwɔ ndjewa ambɔ nde akɔpa la akombola iwɔ nkalɔ le nde.
10-11. Wopo wɔkɔnge tokokolo okokawɔ nkotshɛ́ anto wamboposa má otshumano ilá efula?
10 Iya otepelaso mo lá nkambo dj’anto waposisá m’otshumano, amboheta ɛnɔnyi efula? Nkoka ndjala anto wasɔ waponangha mpekanto kɛ yapose má otshumano. Lá akambo wa nghɔsɔ, akoka ndjala kaanga wapovungɔka lamo yapose. Ayale nghɔsɔ kana lako, tokokolo wangonangha la wolo djɛ ndjewa idjena ilekɔ anto wasɔ la ndawembola. Lá mbembo yɛ nghɔsɔ, wakoka kaanga ndɔmba lawɔ la ndakembɛ djɛ nkalɔ lá otshumano. Lá nsɔsɔlɔ, ntsha onto amboposá má otshumano ilá efula, ape l’ehamo, ambokomá wɔdju efula lá nyuma. Djɛko ndeke, ntsha amɛnyɛ ante akɔpa nkalɔ lá otshumano, tokokolo wangolonganyɛ djɛ onto ɔmɔtshi ndjeka nya nde Bible, kaanga ndotakalɔ. Lá akambo ankfumɔ wasɔ, tokokolo ndeke lolonghanyɛ wekelo wɔ Bible.
11 Má ndjokola djandji djɛ Yehova, tokokolo ladjɛ mpona anto ankfumɔ wambokadjɛ Yehova la ndaakembɛ dj’iwɔ nkalɔ le nde. Winá wɔ onto womonangha mpekanto ɛnyɛnde ante ambolapɛla la ambotshikitanyɛ eyalelo kɛnde, akoka nkalɔ l’otshumano ipa la ntshátshimba.—2 Kɔ. 2:6-8.
12. a) Tokokolo oyɛwɔ ladjɛ mbadjɛ pekapeka l’akambo wakɔngɔ? b) Lamo sopakoke ntepela ente Yehova apokaki anto amɔtshi wamonangha mpekanto djandji? (Lenda ole nɔtɛ.)
12 Lá akambo amɔtshi tokokolo ladjɛ mbadjɛ lá ntondo kɛ nkawoyɛ onto lá otshumano. Ndjɔmbɔmba, ntsha onto ndapose nde akesolaka wɔna w’ilɛngɛ, atshanghanyɛ apɔstazi la alonghanyɛka djɛ ndjaka bala, tokokolo ladjɛ ndáshikikɛ ambɔ ambolapɛla lá lɛdji lɔ nsɔsɔlɔ. (Mal. 2:14; 2 Ti. 3:6) Iwɔ ladjɛ nama ɛnkɔkɔ. Lá winá ɛmɔtshi, iso ladjɛ nsipisoyɛ ente Yehova angawola djɛ onto w’onanghisá mpekanto w’ombolapɛla lá lɛdji lɔ nsɔsɔlɔ la wombotshika eyalelo kɛ pɔlɔ nkalɔ. Kaanga tokokolo okokawɔ mbadjɛ djɛ ndáshikikɛ ambɔ anto wafungisá winawɔ wasɔ wambolapɛla lá lɛdji lɔ nsɔsɔlɔ, wapakoke ntepela ambɔ Yehova apokaki kawo ananghi amɔtshi wa mpekanto djandji. c—1 Pɛ. 2:10.
KƐNƐ K’OTSHUMANO OKOKAWƆ NANGHA
13. Otshikitano wɔkɔnge w’olekɔ́ l’anteyi kɛ wopo wɔsaso onto wɔ tokokolo yombokakola la wopo wɔsaso onto omboposá m’otshumano?
13 Ete ngo sɛnyi lá djamba mboheta, winá ɛmɔtshi ndjewo nkoka mpɛyama ente onto kapanda ambowa ikako. Lá akambo wa nghɔsɔ, tokoka nkindjɛ mbembwana la nde, má ndjewa ente ambolapɛla la ambotshika nanghedji djɛnde djɛ pɔlɔ. (1 Ti. 5:20) Nde alekɔ ngo ose otshumano la alekɔ la djonyi djɛ lokembo l’oyɛ má nsanghana la winande andjawodji. (Heb. 10:24, 25) Koko atshikitana otale efula l’onto womboposa má otshumano. Iso ladjɛ ‘ntshika mbembolana la onto wɔkɔ’, la ntshika ‘dj’ipa kaanga ndɛ la onto wɔsɔ.’—1 Kɔ. 5:11.
14. Wopo wɔkɔnge Akristo okokawɔ nkamba la nkfum’oloko kɛwɔ kembokfumbama má Bible winá w’onto w’omboposá m’otshumano oyɛnde lá losanghanyɛ? (Lenda edjinge ntshango.)
14 Akambo wa sɔmɛna wanɛ ɔkɔpawɔ nde nsakisola ente iso topakoke ndjila onto womboposa má otshumano yimba? Lako, ape nghɔsɔ. Lá nsɔsɔlɔ, topakoke mbembolana la nde. Koko tokoka nkamba la nkfum’oloko kɛso kembokfumbamá má Bible djɛ ndɔsá nkano ntsha tokoka ndjeta onto womboposa má otshumano wolekɔ́ ewoto kɛso kana woyalaki ilongo yɛso djɛ ndjɛ lá nsanghanyɛ. Iya ntsha amboyɛ lá losanghanyɛ? Ntondo, totakokaki nyemoyɛ onto wɔ nghɔsɔ. Lanɛ lonkina, Okristo onkfumɔ ladjɛ nkamba la nkfum’oloko kɛnde kembokfumbama má Bible lá nkambo djɛsɔ. Amɔtshi wakoka ndowemoyɛ kana ndoosangela lá losanghanyɛ. Koko, topakoke mfudjɛ ntshawo kana mbembolana l’onto wɔkɔ.
Akristo nkoka nkamba la nkfum’oloko kɛwɔ kembokfumbama má Afunelo ntsha wakoka ndjeta onto womboposa má otshumano lá losanghanyɛ kana ndoosangela kana ndɔpɛyɛ djemo (Lenda itenyi 14)
15. Ananghi wa mpekanto wa ngete nge watepela 2 Djɔanɛ 9-11? (Lenda edjinge ipapango “ Djɔanɛ la Poolo yatepelaka ngo djɛ mpekanto yɛ wopo ɔmɔ?”)
15 Anto amɔtshi wakoka ndáwopola ambɔ: ‘Bible mpatepela ante Okristo wɔpɛyɛ onto wɔ nghɔsɔ djemo angɔsa opiko lá nangedji djɛnde djɛ nyɛtshi?’ (Wala 2 Djɔanɛ 9-11.) Nkambo dj’otepelawɔ la avɛrse wanɛ djɛnyɛ ente ɛlɔndjɛlɔ kɛsɔ olendanawɔ nde la w’apɔsta kana anto ankina wakotshɛ́ djɛ akambo wa nyɛtshi mfulanela. (Ndj. 2:20) Djɛko ndeke, ntsha onto anangha djɛ elakanyelo wɛ w’apɔsta la akambo wa nyɛtshi mfulanela, tokokolo wapakoke ndɔsa nonghanyi kɛ ndowembola. Lá nsɔsɔlɔ, nkongi dekɔ ente angoyala la ekanedji kɛ wɔlɔ. Ntsha ngo apatshikitanyɛ ekanedji la eyalelo kɛnde, topakoke ndowemoyɛ kana ndoweta lá losanghanyɛ l’otshumano.
NYOKOLE DJANDJI LA NKƐTSHI KƐ YEHOVA
16-17. a) Yehova ɔkɔpande ananghi wa mpekanto nangha nge? (Ezekiyɛlɛ 18:32) b) Wopo wɔkɔnge tokokolo ɛnyɛwɔ ambɔ wakamba esanga la Yehova djɛ nkotshɛ́ anto wamonangha mpekanto?
16 Isombeka nge lá ɔnɔnghɔ wɔ wamba atano wanɛ? Yehova apakɔpɛ kaanga onto ɔmɔ ndjakema! (Wala Ezekiyɛlɛ 18:32.) Nde nkɔpaka djɛ ananghi wa mpekanto nkalɔ le nde. (2 Kɔ. 5:20) Djɛko ndeke má ndɛlɛ la ndɛdji, Yehova nkembɛka enkambi wɛnde w’antɔmbɔki mbala la mbala, kana onto la onto djɛ ndápɛla la nkalɔ le nde. Tokokolo tɔ otshumano walekɔ la mpeyi kɛ nkamba la Yehova winá w’onanghawɔ la wolo djɛ nkomɛ onto womonangha mpekanto lá ndápɛla.—Ɔrɔ. 2:4; 1 Kɔ. 3:9.
17 Tokokanela osasa w’oyalaka l’olongo winá w’onanghi wɔ mpekanto olapɛlande! Papa kɛso kɛ l’olongo, Yehova angokake osasa wɔsɔ winá wɔ kaanga ɔnkɔkɔ wɔnde ɔmɔ w’ovungisá okalɔnde l’otshumano. Ngandji k’okaso Yehova kengetela mfula winá w’ɔtɔnɔlaso lá djandji, nkɛtshi, la wɔlɔ wɔnde w’ipa wɔsɔdjɔmba.—Luka 1:78.
YEEMBO 111 Donga djɛ ndjala l’osasa (lá Otetela)
a Lá djamba djɛnɛ, itepela onto womonangha mpekanto, osakisolawɔ nde wɔnanyɔ kana nkaana kembonangha mpekanto k’ekekete.
b Topangetaka anto wasɔ lonkina ente ɛskɔminie. Lá nkilika etepela wɛ Poolo welekɔ́ lá 1 Kɔrɛtɔ 5:13, má winá wɔsɔ tongawetaka ente anto wamboposa má otshumano.
c Lá nkilika Bible, anto amɔtshi wapakoke nyimeyama. Anto wasɔ wɔsaka nkano djɛ nangha mpekanto l’okonda onkfumɔ la djɛ nsamba ndjokana la Ndjambe etshinda etshinda. Ngo Yehova la Yeso ndeke lokoka ndjewa ntsha onto wɔ nghɔsɔ akoka nyimeyama.—Mar. 3:29; Heb. 10:26, 27.
