1. Oye ndápɛla?

 WINÁ w’onanghaso nkambo djɛ nyɛtshi, alekɔ djonyi iso ndápɛla. Lá Bible, onto wolapɛla angotshikitanyɛke ikanyi yɛnde lá nkambo dj’enanghedji kɛmɔtshi, angotshikake enanghedji kɛkɔ, la angɔsake nkano dj’ipa nkalɔ nangha.—Lenda Elembetshielo wa tɔtɛkɛta ta lo Bible: “Ndjatshumoya.”

2. Ladjikɛnge oyɛso ladjɛ nangha la wolo djɛ ndjeka akambo walendana la lɔpɛdji? (Nɛhɛmiya 8:9-11)

² Onto onkfumɔ w’owika ladjɛ ndjeka nsakiso kɛ ndápɛla. Ladjikɛnge? Ladjikɛnde isankfumɔ nanghaka mpekanto lofu la lofu. Ete ngo oyɛso tonkanola tɔ Adama la Eva, isankfumɔ tosambelaka mpekanto la nyɔyi. (Ɔrɔ. 3:23; 5:12) Isankfumɔ tolekɔ ananghi wa mpekanto. Kaanga anto wa djawo dj’ekekete ete ngo ɔpɔstɔlɔ Poolo, wananaki la mpekanto. (Ɔrɔ. 7:21-24) Kɛsɔ nsakisolaka ente iso ladjɛ mpekɔ mande tolekɔ ananghi yɛ mpekanto? Lako, Yehova alekɔ la djandji ole nkombolaka iso ndjala l’osasa. Tokolenda ndjɔmbɔmba k’ase Juda w’etsho wɛ Nɛhɛmi. (Wala Nɛhɛmiya 8:​9-11.) Yehova atakɔpa iwɔ mvɔ la yɛnyi m’ɔtɛ wɔ mpekanto yɛ yananghe, koko akɔpaka iwɔ ndjala l’osasa winá w’ɔtɛmɔlawɔ. Yehova ewa ante ndápɛla ndjakalaka osasa. Djɛko ndeke otolakanyɛnde. Ntsha tombolapɛla má mpekanto yɛso, tokoka ndáshikikɛ ente Papa kɛso kɛ djandji angotimeyɛ.

3. Ɛnaso lá djamba djɛnɛ lɔ nge?

³ Nyontshɔ tokolenda akambo amɔtshi walendana la ndápɛla. Lá djamba djɛnɛ, tongɛna topo tosato tɔ lɔpɛdji. Ntondo  ntondo, tɔngɛna kɛnɛ kɛ Yehova ndalakanyɛ ase Isariyɛ lá nkambo djɛ ndápɛla. Makɔ, tongopika wiso lá wopo wɔ Yehova okotshɛ́nde ananghi wa mpekanto dj’iwɔ ndápɛla. L’ekomo, tongotepela kɛnɛ k’ambeki wa Yeso yeke lá nkambo djɛ ndápɛla.

YEHOVA ALAKANYƐKA ASE ISARIYƐLƐ NDÁPƐLA

4. Yehova ndalakanyɛ Isariyɛlɛ nge lá nkambo djɛ lɔpɛdji?

⁴ Winá wɔ Yehova ndalonghanyɛ ase Isariyɛlɛ ete ngo owila, apɛyɛka ɛlɛmbɛ, la w’olakaka djɛ nɛmɛyɛ. Ntsha wambolama ɛlɛmbɛ wɛnde, nde angalama la angasakola. Lá nkambo dj’ɛlɛmbɛ wɛsɔ, nde ashikikɛka ante: ‘Ɛlɛmbɛ w’ɔnyɔpɛyɛmi lɔɔko wɛnɛ wepalekɔ wolo efula le nyo, la wepelakɔ otale la nyo.’ (Mvu. 30:11, 16) Koko ntsha wambɔtɔmbɔkɛla, ndjɔmbɔmba má ntɛmɔla tondjandjambe, nde apangasakola, la wangɛna ndjolo. Koko, kaanga nghɔsɔ, Ndjambe akokaki ndawawola lonkina. Iwɔ wakokaki ‘nkalɔ le Yehova Ndjambe [kɛwɔ] má ndjoka djoyi djɛnde.’ (Mvu. 30:1-3, 17-20) Ntepela ente wakokaka ndápɛla. Ntsha wambonangha nghɔsɔ, Yehova angosukana la wɔ la angokalɔ ndasakola lonkina.

5. Wopo wɔkɔnge Yehova ndɛnyɛ ante atapekɔ enkambi wɛnde w’antɔmbɔki? (2 Nkfumi yɛ n’kanga 17:13, 14)

⁵ Owila wɔ Yehova ndasɔnɛ w’ɔtɔmbɔkɛlaki mbala la mbala. Lá djiko djɛ ntɛmɔla tondjandjambe, iwɔ walapɛyɛki lá nanghedji djɛ nyɛtshi. Eposelo weyalaki nde, iwɔ wɛnaki ndjolo. Koko Yehova atapekɔ antɔmbɔki wasɔ. Nde atomaki aprɔfɛtɛ wande mbala efula djɛ nkembɛ enkambi wɛnde dj’iwɔ ndápɛla la nkalɔ le nde.—Wala 2 Nkfumi yɛ n’kanga 17:​13, 14.

6. Wopo wɔkɔnge Yehova ndakambe l’aprɔfɛtɛ djɛ ndakanyɛ enkambi wɛnde djonyi djɛ lɔpɛdji? (Lenda edjinge ntshango.)

⁶ Yehova akambaka l’aprɔfɛtɛ djɛ ndjewola la nsembola enkambi wɛnde w’antɔmbɔki. Ndjɔmbɔmba, má mbamba kɛ Jɛrɛmi, Yehova atepelaka ante: ‘Wole Isariyɛlɛ y’antɔmbɔki, kalɔ . . . Lemi mpangokolenda la nkɛlɛ, mande lemi ndekɔ nkɔmano . . . Mpangokokotela onkomba etshinda etshinda. Nkambo nde awola ovunga wɔko, ladjikɛnde  wɛ ɔtɔmbɔkɛlaka Yehova.’ (Jɛr. 3:12, 13) Má mbamba kɛ Yɔwɛlɛ, Yehova atepelaka ante: ‘Nyokalɔ le lemi l’eloko wɛnyo enkfumɔ.’ (Yɔw. 2:12, 13) Áshimelaka má mbamba kɛ Izaya ante: ‘Nyoyawɛdjɛ; nyimɛ nanghedji djɛnyo djɛ nyɛtshi má wiso wami, nyotshike nangha nyɛtshi.’ (Iza. 1:16-19) Yehova opolaka má mbamba k’Ezekiyɛlɛ ante: ‘Lemi nsasangaka lá nsɔsɔlɔ nyɔyi k’onto wɔ pɔlɔ? . . . Ape lemi nkɔpaka nde nkalɔ má mboka yɛnde la nde ntshikala la lowiko? Lemi mpasasanga nyɔyi kaanga k’onto ɔmɔ, . . . nyokalɔ ndeke nyongotshikala la lowiko.’ (Ezk. 18:23, 32) Yehova nsasangaka winá wɛnande anto walapɛla mande nde nkɔpaka iwɔ ndjala la lowiko etshinda etshinda! Djɛko ndeke Yehova apakongaka lɔkɔma ɛwɔ djɛ anto ndápɛla lá ntondo kɛ nde ndakotshɛ́. Tokolenda ndjɔmbɔmba imɔtshi.

7. Má nkamba la djɔmbɔmba kɛ ɔprɔfɛtɛ Ozeya nya wadjɛnde, Yehova ndalakanyɛ enkambi wɛnde nge?

⁷ Tokolenda kɛnɛ kɛ Yehova ndalakanyɛ enkambi wɛnde má ndjɔmbɔmba kɛ Gɔmɛrɛ, wadjɛ ɔprɔfɛtɛ Ozeya. M’ɔkɔngɔ wɔ nde nangha loseka, nde atonaka Ozeya, apɛtshɛka la mpame kenkina. Nde atakoka ntshikitana lonkina? Yehova kanga lowala l’oloko, ashimelaka Ozeya ante: ‘Tshɔka lonkina, tɔkɔkɔpɛ omoto wɔ mpame kenkina ɔkɔpande la wonangha loseka, ete ngo Yehova ɔkɔpande ase Isariyɛlɛ kaanga okadjimɔwɔ te tondjandjambe tonkina.’ (Oze. 3:1; Woo. 16:2) Tɛna ente wadjɛ Ozeya ananghaki mpekanto yɛ nkekete. Koko, Yehova ashimelaka Ozeya djɛ ndɔwɔsa, ndowimeyɛ ole nkawoyɛ bala nya nde. a Lá wopo wɔkɔ ɔmɔ, Yehova atakadjɛ enkambi wɛnde w’ɛtɛ wolo. Kaanga yananghaka mpekanto yɛ nkekete, nde akindjɛki ndakɔpa, akindjɛki ndakawoyɛ le nde la akindjɛki ndakotshɛ́ dj’iwɔ ndápɛla la ntshikitanyɛ nanghedji djɛwɔ. Ndjɔmbɔmba yɛsɔ yɛnyɛ ente, Yehova ‘kanga loshishima eloko,’ angosepa onto w’onangha mpekanto yɛ nkekete la angokotshɛ́ djɛ nde ndápɛla? (Woo. 17:3) Nyontshɔ tokolenda.

WOPO WƆ YEHOVA OKOTSHƐ́KANDE ANANGHI WA MPEKANTO DJ’IWƆ NDÁPƐLA

8. Wopo wɔkɔnge Yehova ndahone nkawoyɛ Kayina le nde má ndokotshɛ́ djɛ nde ndápɛla? (Ewangelo 4:3-7) (Lenda edjinge ntshango.)

⁸ Kayina ndeke wɔna Adama nya Eva wɔ ntondo. Ambotshi wande wosambeyɛka mposɛ kɛ nangha mpekanto. Lá djiko djɛ lasɔ, Bible ntepela lá nkambo djɛnde ante: ‘Nanghedji djɛnde djayalaki nyɛtshi.’ (1 Dj. 3:12) Kɛsɔ kɛnyɛ lamo Yehova ‘ndotawola Kayina l’olambo wɔnde’ winá wɔ ndalambola. L’edjena kɛ ntshikitanyɛ ɛkɔmɔ kɛnde, ‘Kayina akfulunghanaka la nkɛlɛ ole alɛmbaka.’ Iya Yehova ndananghe nge? Asawolaka nya Kayina. (Wala Ewangelo 4:​3-7.) Tɛna ente la ngandji kenkfumɔ, Yehova akotshɛ́ka Kayina djɛ ntɔnɔla, má ndɔpɛyɛ nkongi la má ndowewoyɛ eposelo wɛ mpekanto. Yɛnyi nde, Kayina atowoka. Nde atawola Yehova ndɔtɔla tá lɔpɛdji. M’ɔkɔngɔ wɔ Kayina ndjelola lá lɛdji lɔ nyɛtshi, Yehova atshikaka nkotshɛ́ anto ankina dj’iwɔ ndápɛla? Lako, ape nghɔsɔ!

9. Wopo wɔkɔnge Yehova ndakotshɛ́ Davidɛ djɛ nde ndápɛla?

⁹ Yehova akɔpaka Nkfumi Davidɛ lombombe. Owetaka ante ‘mpame kesasangɛ oloko wɔmi.’ (Ele. 13:22) Koko Davidɛ ananghaka mpekanto yɛ nkekete efula, loseka la ayakaka onto. Lá nkilika Ɛlɛmbɛ wɛ Mɔsɛ, Davidɛ ndakoke ngo ndjakema. (Lew. 20:10; Ew.  35:31) Koko, Yehova okotshɛ́ka djɛ nde ndápɛla. b Atomaka ɔprɔfɛtɛ wɔnde Nata djɛ ntowembola nkfumi, ayale nghɔsɔ Davidɛ atɛnyɛ kaanga ilembetelo imɔ yɛ lɔpɛdji. Nata akambaka la ndjɔmbɔmba djɛ mvunda oloko wɔ Davidɛ. Davidɛ okaka l’oloko, ko alapɛlaka. (2 Sa. 12:1-14) Afunaka yeembo yɛ yɛnyi efula djɛ nyɛnyɛ yimba yɛnde yɛ ndápɛla. (Yee. 51, etepela welá djiko djɛ shapitrɛ) Yeembo yɛsɔ ikembɛka ananghi wa nkekete yɛ mpekanto la yatshindaka djɛ ndápɛla. Ape tolekɔ la djedjɛ má ndjewa ente Yehova akotshɛ́ka la ngandji kenkfumɔ onkambi wɔnde Davidɛ djɛ ndápɛla?

10. Oyawokɛ ngete mo djɛ bale ntshitshi la imeyelo kɛ Yehova te ananghi wa mpekanto?

¹⁰ Yehova mfulɔka mpekanto, la apadjipaka wiso lá wopo onkfumɔ wɔ mpekanto. (Yee. 5:4, 5) Koko nde ndjewaka ante isankfumɔ tolekɔ ananghi wa mpekanto, la má ngandji k’otokande, nde nkɔpaka ntokotshɛ́ djɛ nana la mpekanto. Nde angokotshɛ́ke winá enkfumɔ kaanga ananghi wa mɛlɛmɛlɛ wa mpekanto djɛ ndápɛla la nsukana la nde. Ɔsɔ ngɔ owaso lokembo má ndjewa nghɔsɔ! Winá w’okolaso bale ntshitshi la imeyelo kɛ Yehova, tɔshi nkano djɛ ndjala la nkɔmano le nde la ndápɛla mbala kɛkɔ kɛmɔ winá w’onanghaso mpekanto. Nyontshɔ tokolenda winá wɔsɔ wopo w’otshumano w’Akristo yeke akambo walendana la ndápɛla.

KƐNƐ K’AMBEKI WA YESO YEKE LÁ NKAMBO DJƐ NDÁPƐLA

11-12. Yeso ndalakanyɛ anto ante Papa kɛnde alekɔ entshupa djɛ nyimeyana ngete mo? (Lenda djɛ loposo.)

¹¹ Lá ɛtɛndɔ kɛ ntondo D.D., ikeke yɛ Mesiya ndjɛ ikokaka. Ete ngo isɛnyi lá djamba mboheta, Yehova akambaka la Djɔanɛ Ombatizanyi la Yeso Kristo djɛ ndakanyɛ anto djonyi djɛ ndápɛla.—Mat. 3:1, 2; 4:17.

¹² Winá wɔ Yeso ndayalaka lá looko, alakanyɛka anto ante Papa kɛnde alekɔ entshupa djɛ nyimeyɛ. Yeso alakanyɛka má ndapɛyɛ ndjɔmbɔmba kɛ wɔna w’ovungisá. Olangala wɔsɔ asɔnaka lowiko lɔ nyɛtshi l’ilá k’etsho  ɛmɔtshi. Koko, winá wɔ ‘ndɔtɔnɔlaka’ akalɔka lá kawɔ. Isɛkɛnde ndelola ngete mo? Yeso atepelaka ante winá wɔ wɔna ‘ndayalaka ngo m’otale, papa kɛnde ɔwɛnaka, owokaka nkɛtshi, alotaka te nde, ɔtɔka mpidji la ɔpɛyɛka bizɛ.’ Wɔna alɔmbaka isɛkɛnde ntsha akoka ndjala kaanga ose olemo lá kawɔ, koko isɛkɛnde owetaka ante ‘wɔnami’ la awolaka nde nkalɔ ndjala la mvulu kɛnde. Papa kɛnde atepelaka ante: ‘Nde avungaka ko ambisɔ.’ (Luka 15:11-32) Winá wɔ Yeso ndayalaka l’olongo lá ntondo kɛ nde ndjɛ lá looko, ɛnaki lá nsɔsɔlɔ Papa kɛnde ɛnyɛ ananghi wa mpekanto yɛ nkekete ilapɛlaki djandji. Ɔkɔndɔ wɔ Yeso wɔsɔ wɔtɛnyɛ ente Yehova Papa kɛso ndjokaka anto djandji dj’efula!

13-14. Ɔpɔstɔlɔ Pɛtɛlɔ ndawa olakanyelo wɔkɔnge lá nkambo djɛ ndápɛla, ko ndalakanyɛ anto ankina nge? (Lenda edjinge ntshango.)

¹³ Ɔpɔstɔlɔ Pɛtɛlɔ awaka olakanyelo w’ekekete efula wolendana la ndápɛla ole la imeyelo. Mbala efula Pɛtɛlɔ ayalaki la djonyi dj’imeyelo, ole Yeso owimeyɛki l’oloko ɔmɔ. Ndjɔmbɔmba, m’ɔkɔngɔ wɔ nde nyanghana Owandji wɔnde mbala isato, okaka yɛnyi efula mande nkfum’oloko kɛnde k’ɔwɛmbɛki lowo. (Mat. 26:34, 35, 69-75) Koko m’ɔkɔngɔ wɔ Yeso nkfundɔ, nde aposelaka le Pɛtɛlɔ, nkoka ndjala ndayalaka ngo nyɔmɛlɛ. (Luka 24:33, 34; 1 Kɔ. 15:3-5) Ape l’ehamo, Yeso imeyɛka ɔpɔstɔlɔ wɔnde lá mbamba kɛsɔ la oshikikɛka.—Lenda Marko 16:7 la nɔtɛ kɛ wekelo la Bible djɛ Falase “et à Pierre.”

¹⁴ Má kɛnɛ k’okomelisá, Pɛtɛlɔ alakanyɛka anto ankina lɔpɛdji la imeyelo. Winá emangha m’ɔkɔngɔ wɔ fɛtɛ kɛ Pantɛkotɛ, Pɛtɛlɔ apɛyɛka djamba lá ntondo k’oloyi w’ase Juda wotayalaki andjawodji, apakisolaka ante iwɔ wayakaka Mesiya. Koko ákembɛka la ngandji ante: ‘Djɛko ndeke, nyolapɛlɛ la nyokadjimole eloko djɛ mpekanto yɛnyo ndjimɔ, djɛ deko djekembɛ́ ndjɛ me Ndjambe.’ (Ele. 3:14, 15,  17, 19) Pɛtɛlɔ ɛnyɛka ante ndápɛla ntshindaka onto djɛ nkadjimɔ, djɛ ntshikitanyɛ ikanyi la nanghedji djɛnde, la djɛ ndjala la lowiko lɔ ntato losasangɛ Ndjambe. Ɔpɔstɔlɔ ɛnyɛka ante Yehova angodjimola mpekanto yɛwɔ, kana angodjipisanyɛ. Ole m’ɔkɔngɔ w’ɛnɔnyi, Pɛtɛlɔ ashikikɛka Akristo ante: ‘Yehova . . . apakɔpɛ kaanga onto ɔmɔ mvɔ, koko nde nkɔpaka djɛ anto ankfumɔ wawa mbamba kɛ ndápɛla.’ (2 Pɛ. 3:9) Ɔsɔ ngo Akristo yombowa nkongi djɛ wɔlɔ efula winá w’onanghawɔ mpekanto, kaanga yɛ nkekete!

15-16. a) Elakanyelo wɛkɔnge ɔpɔstɔlɔ Poolo ndawa welendana la imeyelo? (1 Timɔte 1:12-15) b) Isongotshimola lá djamba djeyaye nge?

¹⁵ Anto efula watayala la djonyi djɛ ndápɛla la imeyelo ndaka Saolo kɛ Tarsɛ. Nde anyɔkɔlaki ambeki wa Kristo wa ngandji l’onkonda. Akristo efula wɔwɔsaki ete ngo onto w’opakoke ntshikitana, wopakoke ndápɛla. Koko Yeso atayalaki l’ekanedji kɛ pɔlɔ kɛ wana w’anto kɛsɔ. Nde nya Papa kɛnde wɛnaka wekeka wa wɔlɔ le Saolo. Yeso atepelaka ante: ‘Mpame kɛsɔ alekɔ epeko kɛ mɔmɔsɔna.’ (Ele. 9:15) Yeso akambaka ole la nsese djɛ nkomɛ Saolo djɛ ndápɛla. (Ele. 7:58–8:3; 9:1-9, 17-20) M’ɔkɔngɔ wɔ nkoma Okristo, Saolo—kanga loyewamisá ete ngo Poolo—atepelaka mbala efula djedjɛ djɛnde lá wopo wɔ Yehova ndɔwɛnyɛ oloko wɔlɔ la djandji. (Wala 1 Timɔte 1:​12-15.) Alakanyɛka la djedjɛ nkfumɔ ante: ‘Ndjambe m’oloko wɔlɔ wɔnde akɔpa nkokomɛ lá ndápɛla.’—Ɔrɔ. 2:4.

¹⁶ Winá wɔ Poolo ndoke nkambo djɛ nsɔnyi djɛ loseka mposisa lá otshumano w’Akristo wɔ Kɔrɛtɔ, ndakandola ngete mo? Akandolaka lá wopo wɔ wɔlɔ efula wotolakanyɛ olakanyelo w’ekekete, lá wopo wɔ Yehova otokakolande la ngandji, ole djonyi djɛ ndjoka djandji. Tongotshimola ɔkɔndɔ wɔsɔ lá djamba djeyaye.