Ɔpɔstɔlɔ Poolo afunelaka Akristo wa Tesalɔnikɛ ante: ‘Ntsha onto ɔmɔtshi apalɛmɛyɛ etepela wɛso w’onkanda wɔnɛ, nyolembetele onto wɔsɔ.’ (2 Te. 3:14) Ntondo, tatepelaki ente oyɛwɔ nde ɛlɔndjɛlɔ kɛ tokokolo. Ntsha onto apile tɔkfɔ tɔ Bible yimba kaanga okindjɛwɔ ndɔpɛyɛ alako, tokokolo nkoka mpɛyɛ djamba djɛ ndjewo l’otshumano. Ko manyi, ansakodji wapangowembolana lonkina la nde.

Koko, tolekɔ la djonyi djɛ nangha otshikitano ɔmɔtshi. Dako djɛ Poolo djɛnyɛ lá nsɔsɔlɔ ente ɔsɔ alekɔ nkambo djɛ onto l’onto oyɛnde ladjɛ nangha má nkilika akambo wananghemisá. Djɛko ndeke, lako ntshina lonkina djɛ tokokolo mpɛyɛ djamba djɛ ndjewo. Sombonangha otshikitano wɔsɔ lamo? Tokolenda kɛnɛ kɛ Poolo ndatepelaka winá wɔ ndafunaka etepela wɛsɔ.

Poolo okaka ante anto amɔtshi l’otshumano ‘wayalaki la lowiko l’ovungusano.’ Iwɔ watonaki alako wa yapɛyɛka má wolo wɔ nyuma kɛ Ndjambe. Winá wɔ ndatshu ntawembola, ashimelaka ante: ‘Ntsha onto apakɔpɛ nkamba, ete koko atalɛke.’ Koko, anto amɔtshi wakindjɛki ntona nkamba djɛ nshiyɛ ehomba wɛwɔ, kaanga yayalaka l’akoka. Lonkina, iwɔ wingelaki lá akambo wankana. Wopo wɔkɔnge Akristo yotakoka ndɔsa ase ovungusano wasɔ?—2 Te. 3:​6, 10-12.

Poolo atepelaka ante: ‘Nyolembetele onto wɔsɔ.’ Itepela yɛ Grɛkɛ yɛsɔ isakisola mpika onto wɔkɔ ntsho. Poolo ndapɛyɛ ɛlɔndjɛlɔ kɛsɔ nde otshumano w’otondo, ape ngo tokokolo. (2 Te. 1:1; 3:6) Djɛko ndeke, Okristo l’Okristo wolembetela onto ɔmɔtshi w’ovungusano wopalɛmɛyɛ alako akokaki nsɔna ‘dj’ipa mbembolana’ la nde.

Kɛsɔ nsakisolaka ente onto wɔkɔ ladjɛ ndɔsama ete ngo onto w’omboposa m’otshumano? Lako, Poolo akfɛ ante: ‘Nyokindjɛ ndolaka ete ngo wɔnanyɔ.’ Akristo wakokaki nsawola la nde lá nsanghanyɛ la l’olemo w’ipoposanyɛ, koko wasɔnaki dj’ipa nsanghana la nde lá asawo kana lá asɛkɛlɔ. Lamo? Poolo ɔndɔla ante: ‘Djɛ nde ndjoka nsɔnyi.’ Eposelo weyalaki má ndolembetela nde, Okristo w’ovungusano wɔsɔ akokaki ndjoka nsɔnyi má eyalelo kɛnde, la ntshikitanyɛ nanghedji djɛnde.—2 Te. 3:​14, 15.

Iya Akristo okokawɔ nkamba la dako djɛsɔ lɔɔko kɛnɛ ngete nge? Ntondo ntondo, iso ladjɛ ndáshikikɛ ente eyalelo k’onto wɔkɔ kelekɔ kɛ ‘ovungusano,’ ete ngo Poolo ndafune. Nde atatepela djɛ anto wapasange tokanyi laso lá akambo walendena la nkfum’oloko, kana wa onto l’onto ɔkɔpande. La atatepela djɛ anto wambotokiyanyɛ. Koko, Poolo ndatepelaka pekapeka nde djɛ anto wapendola l’okonda alako wokama papoo wa Ndjambe.

Lɔɔko kɛnɛ, ntsha tombolembetela Okristo wolekɔ́ la yimba yɛ ntshamba dj’olotshi a yɛ nghɔsɔ, tokoka ndɔsa isɔmɛlɛ kɛso nkano dj’ipa nsanghana la nde lá asawo kana lá asɛkɛlɔ. Mande ɔsɔ oyɛwɔ nde nkano dj’onto nyɔmɛlɛ kɛnde, topakoke nsawola l’anto ankina wapalekɔ́ ase nkfumbo kɛso. La tongokindjɛka nsanghana la nde lá nsanghanyɛ la l’olomo wɔso w’ipoposanyɛ. Winá wɔ ndongotshikitanyɛ eyalelo kɛnde, tongokalɔ mbembolana la nde.