Lá mbamba imɔtshi, amfunyi wa Bible wahetolaki ngo etepela wɛkɔ ɛmɔ. Tokolenda donga ntshato dj’atshindaki dj’iwɔ nangha nghɔsɔ:

Etsho wefunamaki Bible. Lá Isariyɛlɛ yɛ ntondo, anto efula watayalaki la kɔpi yɛwɔ yɔmɛlɛ y’Ɛlɛmbɛ. Mbala efula, yekameyɛka badji dj’Ɛlɛmbɛ ngo winá wɔ yatshumanaka lá tabɛrnaklɛ. (Mvu. 31:10-12) Efula wakokaki ndjɛkɔla yimba winá wɔ yekameyɛka badji, mande wayalaki oloyi w’ekekete efula, la yemalaka ngo nyemale l’ilá kɛ winá wɛ ntango efula. (Nɛh. 8:2, 3, 7) Lá mbamba yɛ nghɔsɔ, nsɛpɔla etepela wɛ djonyi akokaki ndjala wɔdju dj’anto mvungɔka la nkambaka l’afunelo. Mpetola etepela ɛmɔtshi akokaki ndaakotshɛ́, pekapeka djɛ mbokfɔ tokakambo tɔ daambi, ndjɔmbɔmba Ɛlɛmbɛ la akano wa Ndjambe walendana la dombo.​—Lew. 18:4-22; Mvu. 5:1.

Wopo w’ofunamisá Bible. Ntenyi mɔtshi djɛ Bible djafunamaki ngo ngete teembo, ndjɔmbɔmba onkanda wɔ Yeembo, Yeembo yɛ Salɔmɔ la Delo djɛ Jɛrɛmi. Teembo tɔmɔtshi tayalaki l’etepela wɛ mpeto, wepikaki nghɔmɔ ɛnsɔsɔ l’ɔtɛ wɔ djoyi wɔ yeembo, ko kɛsɔ k’akotshɛ́ki weekamɛyɛki djɛ nkota etepela wɛkɔ. Ndjɔmbɔmba, tokolenda etepela welekɔ́ lá Yeembo 115:9-11: ‘Ee Isariyɛlɛ, yawɛkɛ le Yehova—Nde ndeke okotshɔ wɔwɔ la nguwa kɛwɔ. Ee mvulu kɛ Arɔ, yɛwɛkɛ le Yehova—Nde ndeke okotshɔ wɔwɔ la nguwa kɛwɔ. Nyo anto woka Yehova wɔma, nyoyawɛkɛ le Yehova—Nde ndeke okotshɔ wɔwɔ la nguwa kɛwɔ.’ Ɛna wopo wɔ ntshɔpɔla etepela wɛnɛ yakokaka nkotshɛ́ anto watshumbaki djɛ nkota akambo wa nsɔsɔlɔ wa ntsho lá timba la l’eloko wɛwɔ?

Djɛ nkɔkɔmɛ akambo wa djonyi. Mbala imɔtshi amfunyi wa Bible wahetolaki etepela wɛ djonyi. Ndjɔmbɔmba, winá wɔ Yehova ndapɛyɛ wana w’Isariyɛlɛ ɔlɛmbɛ w’ipa ndɛ ekila, nde ahetolaka le Mɔsɛ mbala efula elonga kɛ ndapɛyɛ ɔlɛmbɛ wɔsɔ. Ndjambe ndakɔpɛ nde nkɔkɔmɛ ante lowiko lɔ etongami kenkfumɔ nde ekila, ntepela ente, ekila oyɛwɔ nde lowiko. (Lew. 17:11, 14) M’ɔkɔngɔ, winá wɔ apɔstɔlɔ la nkokolo djɛ Jerusalɛmɛ yawale topo tɔ djonyi tɔ ndjewɔ ntshutshumadjɛ Ndjambe, iwɔ wakɔkɔmɛka lonkina djonyi djɛ ntona ekila.​—Ele. 15:20, 29.

Yehova atayala l’ikanyi yɛ nsɛpɔla Afunelo dj’iso ndoyala l’enkfumbo kɛ nsɛpɔlaka etepela ɛmɔtshi winá enkfumɔ. Ndjɔmbɔmba, Yeso atepelaka ante: ‘Winá w’ɔlɔmbanyo, nyotahetolake ngo akambo wakɔ amɔ.’ (Mat. 6:7) Makɔ, nde atowalelaka akambo wa ndɔmbaka wɛdje la w’okana l’ɛkɔpa kɛ Ndjambe. (Mat. 6:9-13) Djɛkondeke, kaanga sopakoke ntshɔpɔla mbala la mbala etepela wɛkɔ ɛmɔ lá ndɔmbɔ yɛso, iso nkoka ndɔmba tokanyi tɔkɔ tɔmɔ mbala la mbala.​—Mat. 7:7-11.

M’ɔtɛ wɔ donga djɛ wɔlɔ djɛsɔ, Otepela wɔ Ndjambe w’ofunamisá má wolo wɔ nyuma k’ekina, w’ohetola etepela ɛmɔtshi. Ɔsɔ oyɛwɔ nde yopo imɔtshi yɛ Wetsha wɔso w’Ekekete otolakanyɛnde, dj’iso mba wapɔ sɔmɛlɛ kɛso.​—Iza. 48:17, 18.