Koko, Yehova ntɔlɔmbaka dj’iso nkonga la balentshitshi, djɛ nde nangha akambo lá winá wɔ ndashikikɛ. Lamo okongelande nghɔsɔ meso? Kɛkɔnge kengotokotshɛ́ djɛ ndjala l’osasa winá w’okongaso?

LADJIKƐNGE YEHOVA ƆTƆLƆMBANDE DJ’ISO NKONGA?

Bible ntepela ante: ‘Yehova akonga la belentshitshi djɛ nyonanghela wɔlɔ, la nde angemala djɛ nyoka nkɛtshi. Ladjikɛnde Yehova alekɔ Ndjambe kɛ sii. Osasa le onto onkfumɔ w’okindjɛ nkongela me nde.’ (Iza. 30:18) Etepela wɛ Izaya wɛsɔ walendanaki ntondontondo l’ase Juda w’ɛtɛ wolo. (Iza. 30:1) Koko wapɛyɛki nkongi le ase Juda amɔtshi wa nkɔmano. Etepela wɛkɔ ɛmɔ wɛpɛyɛ enkambi wɛ Yehova wɛ nkɔmano wɛ lɔɔko nkongi.

Djɛkondeke iso ladjɛ nkonga la balentshitshi ladjikɛnde Yehova akonga la balentshitshi. Nde amboshikikɛ winá wɔ ndongila ekomo lá nkfumbo dj’akambo djɛnɛ, ko okongande ngo lofu lɔ inkeke yɛkɔ yongokoka. (Mat. 24:36) Lá winá wɔkɔ wɔsɔ, angɛnama papoo ente akambo wa Satana omamande Yehova l’enkambi wɛnde, oyɛwɔ ngo ongolo. Nde angimɛ Satana l’onto onkfumɔ wolekɔ́ lá djeke djɛnde koko ‘angotoka [iso] nkɛtshi.’

Lá winá w’owadjeyɛso, Yehova apangimɛ ekakasano wɛso enkfumɔ, koko atoshikikɛ ante tokoka ndjala l’osasa winá w’okongaso. Etengo Izaya otepelande, tokoka ndjala l’osasa winá w’owadjeyɛso kana w’okongelaso nkambo mɔtshi djɛ wɔlɔ nanghema. (Iza. 30:18) a Wopo wɔkɔnge w’okokaso mba osasa wɔsɔ? Akambo anɛyi wanɛ nkoka ntokotshɛ́.

WOPO WƆ NDJALA L’OSASA WINÁ W’OKONGASO

Topike wiso l’akambo wa wɔlɔ watokomela. Nkfumi Davidɛ ɛnaka akambo wa pɔlɔ efula lá lowiko lɔnde l’otondo. (Yee. 37:35) Koko nde afunaka ante: ‘Vumba lá ntondo kɛ Yehova edjinge konga la nkongi nkfumɔ me nde. Totshimbake yimba m’ɔtɛ w’onto w’olonga djɛ nkotshɛ ikanyi yɛnde.’ (Yee. 37:7) Davidɛ ɔsaka dako djɛsɔ la ntsho má ndjila yimba lá nkongi dj’ewiko kɛnde. Nde ilaka yimba lonkina l’osako onkfumɔ wɔ ndawaka  me Yehova. (Yee. 40:5) Ntsha tombila yimba ole iso l’akambo wa wɔlɔ watokomela, ipa ndjila yimba l’akambo wa nyɛtshi w’atodjingi, angoyala wɔdju le so djɛ nkonga Yehova.

Kamba la mbamba inkfumɔ djɛ numɛ Yehova. Omfunyi wɔ Yeembo 71, akoka ndjala Davidɛ, ashimelaka Yehova ante: ‘Lemi langokindjɛ nkonga; lemi langetela nkolumɛ.’ (Yee. 71:14) Wopo wɔkɔnge ndakoke numɛ Yehova? Nde akokaka nshimela anto ankina akambo walendana la Yehova, la ndotshumbela teembo tɔ lomo. (Yee. 71:16, 23) Etengo Davidɛ, tokoka ndjala l’osasa winá w’okongaso Yehova. Iso ndolumɛka má olemo wɔso w’ipoposanyɛ, má wamba waso wa lofu la lofu, la má teembo tɔsɔ. Mbala kenkfumɔ kɛ nghongotshumbaka yeembo t’Onkfumi, lamo ngopakoke ndjila yimba l’etepela w’ekembɛ wɛ l’eteyi?

Waka lokembo me wananyɔ l’ankaana yɛko. Winá wɔ Davidɛ ndapomana l’ekakasano, ashimelaka Yehova ante: ‘Lá ntondo k’anto wako wa nkɔmano, lemi langokongelaka má djiina djɛko.’ (Yee. 52:9) Ole iso tokoka mba lokembo me winaso enkambi wɛ nkɔmano, ape ngo lá nsanghanyɛ kana l’olemo w’ipoposanyɛ toko, koko ole winá w’ohetshɛso winá la wananyɔ l’ankaana.​—Ɔrɔ. 1:11, 12.

Kembɛ nkongi djɛko. Yeembo 62:5 itepela ante: ‘Lemi mvumbaká vu winá w’okongami Ndjambe, mande nkongi djɛmi ndjɛ mende.’ Alekɔ djonyi efula ndjala la nkongi djɛ wolo, pekapeka ntsha ekomo kɛ nkfumbo dj’akambo djɛnɛ ngo kepaye etengo safɛnyɛka. Iso ladjɛ ndjala l’eshikikelo ente alaka wa Yehova wangokotshama, ayale ilá kɛkɔnge k’okokaso nkonga. Tokoka nkembɛ nkongi djɛso má ndjeka Otepela wɔ Ndjambe, aprɔfɛsi, wopo wɔ tokanyi tɔ amfunyi wa Bible watshikitanyi osangawɔ, la tokakambo tɔmɔtshi tɔ Yehova otisolande lá nkambo djɛnde. (Yee. 1:2, 3) Lonkina, iso ladjɛ nkindjɛ ‘ndɔmba esanga la nyuma k’ekina’ djɛ mbomba djokanelo djɛ wɔlɔ la Yehova winá w’okongaso ekotshamelo kɛ daka djɛnde djɛ lowiko l’etshinda.​—Yuda 20, 21.

Etengo Nkfumi Davidɛ, yala l’eshikikelo ente Yehova nyɛnaka anto ankfumɔ w’okonga edjinge angawɛnyɛke ngandji kɛnde kɛ nkɔmano. (Yee. 33:18, 22) Kindjɛ nkonga Yehova la balentshitshi nkfumɔ má mpika wiso l’akambo wa wɔlɔ w’akokomela lá lowiko lɔko, má ndolumɛ, má mpona lokembo me winako Ewakɛ, la má nkindjɛ nkembɛ nkongi djɛko djɛ ntshina djɛsɔ.