Ampame efula wafulaka lá nkfumbo djɛpɔshi amato la ntshina. Ndjɔmbɔmba, Hans, olami ɔmɔtshi w’edjingadjinga welá Bolivie, atepela ante: “Ampame imɔtshi wafulaka lá djena dj’ɔsawɔ ampame l’onkfunda efula, ko kɛsɔ ndaatshindaka dj’iwɔ mfɛnyɛ ambɔ amato walekɔ l’anse k’ampame, djɛkondeke wapawɔsaka l’odjito.” Shengxian, ikokolo imɔtshi yelá Taïwan, atepela ante: “L’idjena yɛ mawikaka ampame efula wafɛnyɛki ambɔ amato wapakoke ndjingela l’akambo wawɔ w’opoto. Ntsha mpame kɛmɔtshi ambotepela ikanyi itepelisá omoto lá nkambo mɔtshi, mbala imɔtshi winande ampame wapangɔwɔsa lonkina l’onkfunda.” Ampame inkina wangɛnyɛke djɛ wapɔshi amato l’odjito lá topo tɔpɛnama papoo. Ndjɔmbɔmba, iwɔ nkoka mposɛ etepela w’atɔla wɔnyɔlá amato.

Mpeyi nde lako mpame kembokowama ɛkɔdji lá nkfumbo djɛ ndafule. Nde nkoka ndonga ikanyi y’ente mpame aleka omoto ntshina. (Ɛfɛ. 4:22-24) Tokoka nangha nghɔsɔ má ndjokola ndjɔmbɔmba kɛ Yehova. Lá djamba djɛnɛ, tɔngɛna wopo wɔ Yehova ɔsakande amato, wopo wɔ wananyɔ okokawɔ ndjeka djɛ ndɔsa amato etengo Yehova la wopo wɔ tokokolo okokawɔ ndjala anto wa ntondo w’ɛnyɛ ankaana dilɛmɛlɔ.

WOPO WƆKƆNGE YEHOVA ƆSAKANDE AMATO?

Yehova alekɔ ndjɔmbɔmba kɛ djɔ lá kɛnɛ kelendana la wopo wɔ nanghela amato akambo. Etengo oyɛnde Papa k’okana nkɛtshi, nde nkɔpaka nkfumbo kɛnde kɛ wana w’anto. (Dj. 3:16) Edjinge Ankaana yɛ nkɔmano oyɛwɔ ngo ngete wana wande wa ntsho efula. Tokolenda akambo amangha walɔnda wanɛ w’ɛnyɛ ente Yehova ndɔsaka amato l’onkfunda.

 Nde apɛngɛyɛ amato. Yehova atongaka mpame l’omoto lá ɛfɔ kɛnde. (Ewa. 1:27) Nde atatonga ampame la yimba kana l’akoka waleka w’amato; la koko apakɔpaka ngo ampame toko ko ntonaka amato. (2 Ɛk. 19:7) Nde atongaka ampame l’amato l’ekanedji kɛ yimba kɛ wop’ɔmɔ dj’iwɔ ndjoka nsɔsɔlɔ kɛ Bible la ntɔnɔla lá wekeka wande wa wɔlɔ. Yehova ndɔsaka lonkina djawo dj’ampame la dj’amato ngo wop’ɔmɔ, kaanga ntsha nkongi djɛwɔ oyɛwɔ nde djɛ ndowika lotshinda lá paradiso kelá looko kana djɛ ndokamba etengo ankfumi l’ankfundji l’olongo. (2 Pɛ. 1:1, nɔtɛ) Okama papoo ente, Yehova apɛngɛyɛ amato.

Nde ndawekamɛyɛka. Yehova ndjilaka yimba lá mposɛ l’ekiyano w’amato. Ndjɔmbɔmba, nde ekameyɛka l’akadjimolaka lɔlɔmbɔ lɔ Rashɛlɛ la Hana. (Ewa. 30:22; 1 Sa. 1:10, 11, 19, 20) Yehova atshindaka amfunyi yɛ Bible dj’iwɔ mfuna ɛkɛndɔ w’ampame wekameyisá amato. Ndjɔmbɔmba, Abrahama alɔndaka dako djɛ Yehova djɛ ndjekameyɛ ikanyi yɛ wadjɛnde Sara. (Ewa. 21:12-14) Nkfumi Davidɛ ekameyɛka ikanyi yɛ Abigayɛlɛ. Lá nsɔsɔlɔ, nde ɛnaka ante Yehova ndeke lombotoma djɛ ndotepela lande. (1 Sa. 25:32-35) Yeso kanga l’okolaki lá lɛdji lɔ djɔ wekeka wa Papa kɛnde, okaka etepela wɛ nyɛnghɛnde Mariya. (Dj. 2:3-10) Ndjɔmbɔmba yɛnɛ ipika nghɔmɔ ɛnsɔsɔ ente wopo ɔmɔtshi wɔ Yehova ɛnyɛnde amato dilɛmɛlɔ nde má ndawekameyɛ.

Nde ndawilelaka oloko. Ndjɔmbɔmba, Yehova ilelaka Eva oloko ante angokotshɛ́ djɛ mbɔngɛ looko l’otondo. (Ewa. 1:28) Má nangha nghɔsɔ, nde ɛnyɛka djɛ Eva apalekɔ l’anse kɛ womɛnde Adama, koko oyɛnde nde okotshɔ. Yehova ilelaka lonkina ɔprɔfɛtɛ Dɛbɔra la Huluda oloko dj’iwɔ ndaka enkambi wɛnde ole nkfundji la nkfumi. (Tos. 4:4-9; 2 Nk. 22:14-20) Lɔɔko kɛnɛ, Yehova angilelake Akristo w’amato oloko dj’iwɔ nkamba olemo wɔnde. Ankaana yɛ nkɔmano yɛsɔ wakamba ngete ansakodji, tat’ekalo, l’amisiɔnɛrɛ. Iwɔ nkotshɛ́ka djɛ nonghanyɛ, mpika la mbɔngɛ Amvulu y’Onkfumi la yɛ filiyalɛ. Amɔtshi wakamba lá Betɛlɛ; ankina l’abiro y’okadjimwelo. Ankaana yɛsɔ walekɔ etengo oloyi w’ekekete w’angala wa Yehova okambande djɛ nkotshɛ ɛkɔpa kɛnde. (Yee. 68:11) Ndjokamaka papoo ente, Yehova apɔsaka amato etengo anto walekɔ́ wɔdju kana wapalekɔ l’akoka.

WOPO WƆKƆNGE WANANYƆ OKOKAWƆ NDJEKA DJƐ NDƆSA AMATO ETENGO YEHOVA AWƆSANDE?

Wananyɔ, djɛ ndjewa ntsha tɔngɔsake ankaana y’Akristo l’odjito etengo Yehova, iso ladjɛ nshishima l’oloko ɔmɔ tokanyi la nanghedji djɛso. Djɛ nangha nghɔsɔ, tongoyala la djonyi dj’okotshɔ. Etengo mashinyi wɔ rɛyɔ-X welá mvulu kɛ widjima okokawɔ ndjisola elando welekɔ́ l’oloko w’onto, ilongo yɛ wɔlɔ edjinge Otepela wɔ Ndjambe nkoka ntokotshɛ́ djɛ ndjisola ikanyi inkfumɔ ipɔlɔ ilendana l’amato ikoka nkfundama l’eteyi kɛso. Kɛkɔnge k’okokaso nangha djɛ mba okotshɔ wɔsɔ?

Opola ilongo yɛko imɔtshi yɛ wɔlɔ. (Woo. 18:17) Angoyala wɔlɔ ndjopola ilongo imɔtshi yɛ silelaka oloko, y’ewaso ente alekɔ l’oloko wɔlɔ, l’ekanedji kɛ wɔlɔ weepó w’etengo wɛnɛ: “Lá wopo wɔ nghɔnyɛnaka, mɔsaka ankaana ngete mo? Iwɔ nkoka ntepela ambɔ lemi ndalɛmɛyɛka? Lemi nkoka ntshikitanyɛ lá lɛdji lɔmɔtshi yopo yɛmi yɛ nsawola lawɔ?” Ntsha ilongo yɛko ambɔkɛnyɛ akambo amɔtshi w’okokɛ ndɔngɔsɔla, tohonake djɛ ndáseela lonkina. Yala entshupa djɛ nangha etshikitano welekɔ́ djonyi.

Eka Otepela wɔ Ndjambe. Yopo ileka wɔlɔ y’okokaso ndjewa ntsha ntɔngɔsake amato l’odjito nde, má nshishima eyalelo la nanghedji djɛso má nkamba l’owaya w’Otepela wɔ Ndjambe. (Heb. 4:12) Winá w’ekaso Bible, tongowa elakanyelo me ampame y’ɔsaki amato l’onkfunda la itawɔsaki. Masɔ tokoka ndjɛdjɛ wopo wɔ yɔsaká amato la wopo w’awɔsaso. Lonkina, iso ladjɛ mbadjɛ dj’ipa nshishima ngo vɛrse mmɔ toko ko nkamba la versɛ djɛkɔ djɛ nsuka ikanyi ipɔlɔ ilekɔ́ laso lá nkambo djɛ amato, koko iso ladjɛ nshishima aversɛ efula wa Bible djɛ nyɛna wopo wɔ mpame oyɛnde ladjɛ ndɔsa amato. Lá lɛdji lɔsɔ tongosipisoyɛ ikanyi yɛ Yehova. Ndjɔmbɔmba, lá nkilika 1 Pɛtɛlɔ 3:7, wome ladjɛ mpɛyɛ ‘wadjɛnde onkfunda ngo ngete wɔ yɔpɛyɛka dɔnga djɛ bomba.’ b Kɛsɔ osakisolawɔ nde ente nde alekɔ l’anse kɛ womɛnde, apalekɔ la yimba kana l’akoka ngo ngete wa mpame? Lako, ape nghɔsɔ! Tɔkɛdjɛ etepela wɛ Pɛtɛlɔ la kɛnɛ kɛ Ngalatiya 3:​26-29 ɛnyɛnde, winá w’otepelande ante, Yehova asɔnaka  ampame l’amato djɛ ntɔlɔndjɛ́ esanga la Yeso l’olongo. Winá w’ekaso Otepela wɔ Ndjambe la w’opolaso ilongo yɛso imɔtshi ikanyi djɛ ndjewa wopo w’ɔsaso amato, tokoka ndjeka djɛ nyɛnyɛ ankaana dilɛmɛlɔ djɛ wɔlɔ.

WOPO WƆKƆNGE TOKOKOLO ƐNYƐWƆ ANKAANA DILƐMƐLƆ?

Wananyɔ w’otshumano nkoka ndjeka lonkina djɛ mpɛyɛ ankaana dilɛmɛlɔ, má nkilika ndjɔmbɔmba yɛ wɔlɔ yɛ tokokolo tɔ ngandji. Wopo wɔkɔnge tokokolo ɛnyɛkawɔ ndjɔmbɔmba lá kɛnɛ kelendana la mpɛyɛ ankaana dilɛmɛlɔ? Tokolenda topo tomangha tɔnɛ.

Iwɔ mbandjɛka ankaana. Ɔpɔstɔlɔ Poolo atshikaka ndjɔmbɔmba kɛ wɔlɔ efula kɛ tokokolo okokawɔ ndjokola. Nde awandjɛka ankaana efula lá ntshandjawala l’onkanda wɔ ndafunela otshumano w’Ɔrɔma. (Ɔrɔ. 16:12) Okoka nkanela osasa w’oyalisá l’ankaana yɛsɔ winá wɔ otshumano onkfumɔ yawalaka onkanda wɔ Poolo? Lá wopo wɔkɔ ɔmɔ, tokokolo mbandjɛka ankaana m’ɔtɛ wɔ w’ekeka wawɔ wa wɔlɔ la má olemo w’okambelawɔ Yehova. Nkambo djɛsɔ ngokotshɛ́ ankaana dj’iwɔ ndjewa ambɔ otshumano ndaalɛmɛyɛka la ndaawedjɛka lombombe. Etepela wekembɛ wime ikokolo nkoka ndjala kɛnɛ kɛ nkaana oyɛnde la djonyi djɛ nkindjɛ nkambela Yehova la nkɔmano nkfumɔ.​—Woo. 15:23.

Winá w’owandjɛwɔ ankaana, tokokolo ladjɛ ntepela nsɔsɔlɔ ole ntepela nkambo kɔɔ dj’awandjɛwɔ. Lamo? Nkaana kɛmɔtshi k’etawɔ Jessica atepela ante: “Ndjalaka wɔlɔ efula winá wɔ wananyɔ oshimelawɔ nkaana ambɔ ‘olemo wɔ wɔlɔ.’ Koko tongolekake nkɔpa efula winá wɔ wananyɔ otowandjɛwɔ lá nkambo mɔtshi tshu, ndjɔmbɔmba wopo w’olakanyɛso wana waso dj’iwɔ ndjitansɛ vu lá losanghanyɛ, kana djɛ ntshɔ ntɔsa ombeki wɔ Bible djɛ ndjɛ lande lá losanghanyɛ.” Winá wɔ tokokolo owandjɛwɔ ankaana lá nkambo mɔtshi tshu, ankaana wangɛna ambɔ otshumano w’otondo ndawɔsaka la ntshina la wolekɔ la djonyi djɛwɔ.

 Iwɔ ndjekameyɛka ankaana. Tokokolo tolekɔ́ l’okitshakitshɛ ndjewaka ambɔ ape ngo iwɔ toko ndeke lolekɔ́ la tokanyi tɔ wɔlɔ. Tokokolo tɔ nghɔsɔ ndɔmbaka ankaana dj’iwɔ mpɛyɛ tokanyi tɔwɔ lá nkambo mɔtshi la wangekameyɛke la nkɔmɛ nkfumɔ winá w’ankaana otepelawɔ. Má nangha nghɔsɔ, tokokolo nkembɛka ankaana la mbaka wapɔ yɔmɛlɛ kɛwɔ. Wopo wɔkɔnge? Ikokolo imɔtshi y’etawɔ Gerardo, ikamba la Betɛlɛ atepela ante: “Langɛnake ente ndjopola ankaana tokanyi tɔwɔ nkotshɛ́ka djɛ nkamba olemo wɔmi wɔlɔwɔlɔ. Mbala efula wangoyalake l’otshilo l’olemo w’okambawɔ ndeka kaanga wananyɔ efula.” L’otshumano, ankaana efula nkambaka etengo tat’ekalo, djɛkondeke wangewake akambo efula walendana l’anto wawika lá djena dj’intasɛwɔ. Ikokolo imɔtshi y’etawɔ Bryan atepela ante: “Ankaana yɛso walekɔ la wekeka edjinge akoka wa wɔlɔ efula w’oyɛso la djonyi l’olonghanyelo. Djɛkondeke nyontshɔ towa wapɔ má balo djɛwɔ!”

Tokokolo t’awalo wapatonaka mbala kɛkɔ kɛmɔ tokanyi tɔpɛyɛ ankaana. Lamo? Ikokolo imɔtshi y’etawɔ Edward atepela ante: “Ikanyi kana djána djɛ nkaana nkoka nkotshɛ́ wɔnanyɔ djɛ ndjisola idjena ilekɔ́ okakasano djɛ nkandola djoyi mɔtshi, ko kɛsɔ nkoka ndokotshɛ́ djɛ nde ndjoka anto ankina djandji.” (Woo. 1:5) Kaanga ntsha ikokolo apangokamba la dako djɛ nkaana, nde nkoka ndokawoyɛ lokasa má dako djɛ ndɔmbɔpɛyɛ, la nsuyɛ ante nsɔsɔlɔ nde alekɔ la balo.

Iwɔ nkfumbaka ankaana. Tokokolo tolekɔ́ la ntɔnɔ mponaka mbamba yɛ nkfumba ankaana. Ndjɔmbɔmba, iwɔ nkoka ndakanyɛ ankaana wopo wɔ ndɔndjɛ losanghanyɛ l’olemo w’ipoposanyɛ, dj’iwɔ ndɔlɔndjɛ lofu lɔ kaanga wɔnanyɔ ɔmɔ w’ombolongola batisimo ndopangoyala. Iwɔ nkoka ndakfumba djɛ nkamba la mpeko kana la mashinyi dj’iwɔ ndjala l’akoka wa nkotshɛ́ djɛ ndɔngɔsɔla la mpika Mvulu y’Onkfumi. Lá Betɛlɛ, wananyɔ walɔndjɛ elemo wambokfumbaká ankaana dj’iwɔ ndjala l’akoka wa mbɛmba edjito w’etshikitanyi, etengo ndɔngɔsɔla nkete, nsomba, nama mfalanga, nkamba elemo welendaná l’ɛnfɔrmatikɛ, ole elemo enkina. Winá wɔ tokokolo okfumbawɔ ankaana, wangɛnyɛke ambɔ iwɔ ndawɔsaka etengo anto walekɔ́ l’akoka la w’okokawɔ ndjilela oloko.

Ankaana efula wangokambake l’okfumbelo w’owawɔ me tokokolo djɛ nkotshɛ́ anto ankina. Ndjɔmbɔmba, ankaana imɔtshi nkambaka l’okfumbelo wɔ opikelo w’amvulu wɔ yawa djɛ nkotshɛ́ anto ankina má ndapikela amvulu m’ɔkɔngɔ wɔ mbalaka kɛmɔtshi. Ankaana inkina nkambaka l’akoka wa yeke l’olemo w’ipoposanyɛ wɔ lá ntshandjawala djɛ nkfumba ankaana efula lá topo totshikitanyi t’olemo wɔsɔ. Ankaana y’okaka ngete mo te tokokolo takfumba? Nkaana kɛmɔtshi k’etawɔ Jennifer atepela ante: “Winá wɔ makambaka l’elemo wɛ opikelo wɔ Mvulu y’Onkfumi, wɔnanyɔ wɔlɔndjɛki olemo ɔsaka winá efula djɛ nkfumba lemi. Nde ɛnaka olemo wɔ mananghaka ko andjedjɛka efula. Lakɔpaki nkamba lande ladjikɛnde andɔsaki la ntsho la andjilelaki oloko.”

WAPƆ WEYƐKA MÁ NDƆSA ANKAANA YƐSO YƐ NYUMA ETENGO ANKAANA YƐ DEMBA

Iso nkɔpaka ankaana yɛso yɛ nkɔmano etengo Yehova! Djɛkondeke awɔsakaso etengo ase nkfumbo kɛso kelá demba. (1 Ti. 5:1, 2) Iso ndakɔpaka la tolekɔ l’ofuno lombombe wɔ nkamba esanga lawɔ. Edjinge winá w’ɛnawɔ ambɔ iso ndasukaka la ndakɔpaka, kɛsɔ ntɔpɛyɛka osasa efula. Nkaana kɛmɔtshi k’etawɔ Vanessa atepela ante: “Ndekɔ la djedjɛ efula te Yehova mande ndɔsa opiko l’olonghanyelo wɔnde w’ombolola kfu la wananyɔ wampɛyɛ lokembo l’efula.” Nkaana kɛmɔtshi kemá Taïwan atepela ante: “Ndekɔ la djedjɛ efula te Yehova la t’olonghanyelo wɔnde lá wopo w’ɔsakawɔ amato la ntshina efula la wopo w’ɔlɛmɛyɛkawɔ mposɛ yɛwɔ. Nkambo djɛsɔ nkembɛka djawo djɛmi, nkotshɛ́ka lemi djɛ ndeka ndjala la djedjɛ tá mpeyi k’okotshɛmi kɛ ndjala l’eteyi k’olonghanyelo wɔ Yehova.”

Ɔsɔngo ofuno w’olekɔ́ la Yehova winá w’ɛnande Akristo w’ampame wa nkɔmano wanangha la wolo djɛ ndɔsa la nɛmɛyɛ amato etengo nde! (Woo. 27:11) Ikokolo imɔtshi yelá Écosse y’etawɔ Benjamin atepela ante: “Ampame efula wel’andja wanɛ wapalekɔ kaanga la ndambo kɛ dilɛmɛlɔ te amato. Djɛkondeke, winá w’ankaana oyɛwɔ lá Mvulu k’Onkfumi, iso nkombolaka iwɔ nyɛna otshikitano la wopo w’awɔsawɔ l’andja wanɛ.” Nyontshɔ tonanghe kenkfumɔ k’okokaso nangha djɛ ndjokola Yehova má nkɔpa ankaana yɛso yɛ ngandji la má ndapɛyɛ dilɛmɛlɔ dj’ɛlama lawɔ.​—Ɔrɔ. 12:10.