1-2. Ekakasano wɛkɔnge w’ekoka mpomana l’enkambi wɛ nkɔmano wɛ Ndjambe?

 EKAKASANO wɛ wolo nkoka ntshikitanyɛ lowiko lɔsɔ ngo mbala kɛmɔ. Ndjɔmbɔmba, wavundaka wɔnanyɔ ɔmɔtshi wɔ nkɔmano w’etawɔ Luis a la yopo imɔtshi yɛ kansɛrɛ ipaleke ndjewama efula. Dɔktɛrɛ oshimelaka ante ambotshikala ngo ngɔndɔ imangha toko yɛnde mvɔ. Monika nya womɛnde wayalaki l’elemo efula wɛ nangha lá nyuma. Ko lofu lɔmɔtshi, Monika ayɛka ndisola ante womɛnde w’oyalaki ikokolo, awikaki lowiko lɔ dongi mpe l’ilá k’ɛnɔnyi efula. Olivia, nkaana kɛmɔtshi k’epolo ayalaka ladjɛ ndota má mvulu kɛnde ladjikɛnde lofunge l’ekekete efula loyayɛki. Winá wɔ ndakalɔ, nde alotanaka lompopo lomboshiyɛ mvuta mvulu kɛnde. Ngo lá mayimo djɛ ntsho, mbiko y’anto yɛsɔ itshikitanaka lá lɛdji l’efula. Ombopomaná la nkambo mɔtshi djɛ yɛnyi efula mbotshikitanyɛ lowiko lɔko ngo mbala kɛmɔ?

² Kaanga oyɛso enkambi wɛ nkɔmano wɛ Yehova, tokindjɛ mpomana l’ekakasano ole l’elando etengo anto ankfumɔ. Tokoka mpomana lonkina l’onanyelo kana la lɔnyɔkɔ me anto watona enkambi wɛ Ndjambe. Kaanga Yehova ndopashimbe djɛ ekakasano wɛsɔ ntokomela, nde atolaka djɛ ntokotshɛ. (Iza. 41:10) Má okotshɔ wɔnde, tokoka nama osasa wɔso, ndɔsa akano wa wɔlɔ, la ntshikala la nkɔmano te nde kaanga l’anteyi k’ekakasano wɛ wolo. Lá djamba djɛnɛ, tongoshishima topo tɔnɛyi tɔ Yehova otokotshɛnde winá w’opomanaso l’ekakasano wɛ wolo lá lowiko. Tongoshishima lonkina kɛnɛ k’oyɛso  ladjɛ nangha djɛ mba wapɔ má okotshɔ w’ɔtɔpɛyɛnde.

YEHOVA ANGOKOLAMA

3. Winá w’opomanaso la nkambo djɛ wolo, kɛkɔnge k’okokaso ndjala l’okakasano djɛ nangha?

³ Okakasano. Winá w’opomanaso l’okakasano wɔ wolo, tokoka ndjala l’okakasano wɔ ntɔnɔla wɔlɔ la ndɔsa akano. Lamo? Ladjikɛnde tokoka ndjala la yɛnyi efula l’oloko. Yimba yɛso ikoka ndola kfu l’ekiyano. Tokoka ndawoka etengo onto wotakɛndɛ lá widjima wɔ pɔtɔɔ lá mboka kɛ ndopewe kɔɔ. Tokolenda wopo wɔ ankaana ipe yɛ sotepelaki má djiko yoke winá wɔ yapomana l’ekakasano. Olivia atepela ante: “M’ɔkɔngɔ wɔ lofunge mvuta mvulu kɛmi, ntewa kaanga kɛnɛ kɛ nangha la ntshimbaka yimba efula.” Monika atepela lá kɛnɛ kɛ womɛnde ndananghe ante: “Nsolomotɔka demba la yɛnyi. Lá nsɔsɔlɔ ndáwokaka etengo wambɔnkɔta mpota l’oloko. Ayalaka okakasano wɔ wolo le lemi djɛ nangha kaanga tokakambo tɔ daambi tɔ monanghaka lofu la lofu. Ntafɛnyɛka kaanga ndambo daambi ente nkambo djɛ nghɔsɔ nkoka nkomela lofu lɔmɔtshi.” Wopo wɔkɔnge Yehova otolakande djɛ ntokotshɛ́ winá w’otshimbaso yimba l’ekakasano?

4. Lá nkilika Filipɛ 4:6, 7, kɛkɔnge ketolaka Yehova?

⁴ Wopo wɔ Yehova otokotshɛ́nde. Nde atolaka djɛ ntɔpɛyɛ kɛnɛ kɛ Bible etande ante ‘vu djɛ Ndjambe.’ (Wala Filipɛ 4:6, 7.) Vu djɛsɔ nde vu djelá yimba la djel’oloko dj’oyalakaso la djɛkɔ winá w’oyalaso la djokanelo djɛ wɔlɔ la nde. Vu djɛsɔ ‘ndeka tokanyi tonkfumɔ’; djelekɔ wɔlɔ efula ndeka kenkfumɔ k’okokaso nkanela. Ombowaká vu mbala kɛmɔtshi m’ɔkɔngɔ wɔ ndɔmba Yehova l’entete? Vu djɛ ngoke djɛsɔ oyɛwɔ nde ‘vu djɛ Ndjambe.’

5. Wopo wɔkɔnge vu djɛ Ndjambe olamawɔ timba l’eloko wɛso?

⁵ Vɛrse djɛkɔ ntepela lonkina ante vu djɛ Ndjambe ‘ngolama’ kana ngowomba ‘eloko wɛnyɔ la timba tɔnyɔ.’ Má bango itepela ‘nama’ yakambemaki me angala djɛ ntepela nkambo djɛ angala walamá ngando kɛmɔtshi má onanyelo w’antonyi. Waawikaki lá ngando kɛsɔ wetamaki lá lotoyi pɔlɔ, ladjikɛnde wewaki ambɔ eloyi w’angala wepodje lá nkfuke yɛ ngando. Lá wopo wɔkɔ ɔmɔ, winá wɔ vu djɛ Ndjambe olamawɔ eloko la timba tɔso, tongoyalake la vu djɛ l’eteyi ladjikɛnde tewa ente tolekɔ l’elamelo. (Yee. 4:8) Ngo ngete Hana, kaanga ntsha ekakasano wɛso wepashilisa mbala kɛkɔ kɛmɔ, tokoka mba ndambo kɛ vu. (1 Sa. 1:16-18) Ko winá w’owaso ndambo kɛ vu, angoyala wɔdju ntɔnɔla wɔlɔ la ndɔsa akano wa balo.

6. Kɛkɔnge k’oyɛso la djɛ nangha djɛ mba wapɔ má vu djɛ Ndjambe? (Lenda edjinge ntshango.)

⁶ Kɛnɛ k’oyɛso ladjɛ nangha. Ngo ngete anto welá ngando okokawɔ ndjeta angala  djɛ ‘ndalama,’ tokoka ndɔmba Yehova djɛ ntolama ole iso winá w’otshimbaso yimba. Wopo wɔkɔnge? Lɔmba tii l’okɛ vu djɛ ndjambe. (Luka 11:9; 1 Te. 5:17) Luis, kanga sotepelaki madjiko, apakisola wopo wɔnde nya wadjɛnde Ana, yayale l’akoka wa nkfulumeyɛ winá wɔ yewe ambɔ ambotshikala ngo la ngɔndɔ imangha yɛnde mvɔ. Nde atepela ante: “Lá winá w’etengo wɛsɔ, alekɔ wolo efula ndɔsa akano walendana la boki ole l’akambo ankina. Koko lɔlɔmbɔ loyalaka ekete kɛ djonyi efula kɛtɔpɛyisá vu winá w’okakasano wɔsɔ.” Luis nya wadjɛnde watepela ambɔ wananaghaka ndɔmbɔ yɛ nkekete efula, la walɔmbaka Yehova mbala la mbala djɛ ndapɛyɛ vu djelá yimba, djɛ l’oloko, la balo djɛ ndɔsa akano wa wɔlɔ. Ko wɛnaka okotshɔ wɔnde. Ntsha ombopomana la mbalaka kɛmɔtshi, lɔmba l’entete, ko ongoka wopo wɔ vu djɛ Yehova olamawɔ oloko la yimba yɛko.​—Ɔrɔ. 12:12.

YEHOVA ANGOKOSHIKIMADJƐ

7. Okokaso ndawoka ngete mo winá w’opomanaso l’ohemba ɔmɔtshi wɔ wolo?

⁷ Okakasano. Winá w’okfulumeyɛso okakasano ɔmɔtshi, tokoka ndáwoka kana nkanela la nangha akambo la lɛdji lotshikitanyi la wopo wɔ sonanghaka ntondo. Ngete anyɛnghu wa ndjale yɔhɛngɛhɛngɛka waato, akambo watotshimbɛ yimba nkoka ntɔlɛngalɛngɛ ole iso. Ana, kaanga sotepelaki má djiko atepela ante apomanaka l’ekakasano efula wotshimbisá yimba m’ɔkɔngɔ wɔ nyɔyi kɛ Luis. Nde atepelaka ante: “Winá wɔ moyawokaka olengedji, ndawokaki ole djandji mɔmɛlɛ kɛmi. Layalaki lonkina la nkɛlɛ má wopo wɔ ndatshike.” Ládjiko djɛ lasɔ, Ana alawokaki olengedji la atshimbaki yimba djɛ ndɔsa akano lá akambo wa womɛnde Luis ndewaka nangha. Lá winá ɛmɔtshi, ayawokaki ngo ngete alekɔ l’anteyi kɛ ndjale winá wɔ lompopo l’ekekete. Wopo wɔkɔnge Yehova otokotshɛkande winá w’ekakasano w’etotshimbɛ wɔɔngɔ owangawɔ ntɔmɛna?

8. Etengo Izaya 33:6 otepelande, kɛkɔnge ketoshikikɛ Yehova?

⁸ Wopo wɔ Yehova otokotshɛ́nde. Nde atoshikikɛ ante angotoshikimadjɛ. (Wala Izaya 33:6.) Winá wɔ masuwa ompomanawɔ la lompopo l’ekekete lá ndjale, w’okoka ndɛngalɛnga m’onkoko wɔnɛ t’onkoko onkina. Djɛ mpikama lá lompopo lɔ nghɔsɔ, masuwa imɔtshi ndjalaka la mbolo imɔtshi yoposɛkawɔ lá washi m’enkoko epe wɛkɔ. Mbolo yɛsɔ nkotshɛ́ka masuwa dj’ipa ndɛngalɛnga winá wɔ lompopo djɛ anto walekɔ́ l’eteyi ndawoka l’elamelo la ndjala vu. Koko, mbala efula mbolo yɛsɔ okambakawɔ wɔlɔwɔlɔ ngo winá wɔ masuwa yotakɛndɛ. Wopo wɔkɔ ɔmɔ ndeke, Yehova angotoshikimadjɛ winá wɔ sotakindjɛ ndokambela la nkɔmano lá deko djɛ ndjolo.

9. Wopo wɔkɔnge mpeko djɛso djɛ wekelo okokawɔ ntokotshɛ́ djɛ nangha akambo la wɛdjimo? (Lenda edjinge ntshango.)

 ⁹ Kɛnɛ k’oyɛso ladjɛ nangha. Winá w’oyalɛ l’anteyi k’ekakasano wekotshimbɛ yimba nangha kenkfumɔ k’okokɛ nangha djɛ nama nkfumbo djɛko djɛ nyuma. Lá nsɔsɔlɔ, opangoyala l’akoka wa nangha akambo efula ngo ngete ngananghaka ntondo, koko vungɔ ente Yehova apakɔlɔmbɛ djɛ wɛ nangha kɛnɛ keleka akoka wako. (Ɛdjɛ la Luka 21:1-4.) Ladjikɛnde wekelo wɔ Bible oyɛwɔ nde ekfumbo kɛmɔtshi kelá nyuma, yawombela winá wɔ nangha wekelo w’onto nyɔmɛlɛ la wɔ ntɔnɔla. Ladjikɛnge? Má lotshimbo l’olonghanyelo wɔnde, Yehova ntɔpɛyɛka wamba la avideo wakoka ntokotshɛ́ djɛ nshikimala lá winá w’ekakasano. Djɛ ndjisola kɛnɛ k’oyɛ la djonyi, okoka nkamba la mpeko dj’ehonelo djelekɔ́ l’otepela wɔko, ndjɔmbɔmba aplikasiɔ wa JW Library^®, Index des publications des Témoins de Jéhovah, la Dibuku di’eyangelo di’Ɛmɛnyi wa Jehowa. Monika, kanga sotepelaki má djiko atepela ante, nde nkambaka la mpeko djɛsɔ djɛ mba alako lá winá wɔ ndokaka ante ekakasano wembowanga ndotshimbɛ yimba. Ndjɔmbɔmba, nde ahonaka itepela “nkɛlɛ.” Winá ɔmɔtshi, ahonaka “ndjimba” kana “nkɔmano.” Nde awalaki tii winá w’oyɛnde ndoka wɔlɔ. Nde atepela ante: “Winá w’owangami nangha ehonelo langoyalake la yɛnyi, koko winá wokindjɛmi mbala, langoyawokake etengo Yehova ambondjila lá mbonga. Winá w’owalami, langosipisoyɛke ente Yehova oka wɔlɔwɔlɔ mposɛ yɛmi itshikitanyi edjinge ankotshɛ.” Okotshɔ wɔ nghɔsɔ wime Yehova nkoka nkokotshɛ́ ngole wɛ djɛ nama vu djɛko winá w’otshimbɛ yimba l’ekakasano.​—Yee. 119:143, 144.

YEHOVA ANGOKOSUKA

10. Okokaso ndáwoka ngete mo m’ɔkɔngɔ wɔ nkambo mɔtshi djetotshimbɛ́ yimba?

¹⁰ Okakasano. M’ɔkɔngɔ w’okakasano ɔmɔtshi w’ototshimbɛ yimba, tokoka ndáwoka etsho ɛmɔtshi ente tɔmbɔlɛmba lá demba la lá yimba. Tokoka ndáwoka etengo ndotshi mbango kelotaki efula, koko winá wɔsɔ alotshumbela ladjikɛnde ambohotala. Tokoka ndjala l’okakasano wɔ nangha elemo ɛmɔtshi wɛ sananghaka ntondo ipa l’okakasano, kana tokoka nsamba ngandji kɛ nangha akambo wa salekaka nkɔpa. Ngo ngete Elidja, tokoka ndjala l’okakasano kaanga wɔ ngandjɔ. Ɔkɔpaso ngo ndjetama. (1 Nk. 19:5-7) Kɛkɔnge kɛ Yehova otolakande djɛ ntonanghela winá w’olawokaso wɔdju?

11. Wopo onkina wɔkɔnge Yehova otokotshɛnde? (Yeembo 94:18)

 ¹¹ Wopo wɔ Yehova otokotshɛnde. Nde ntolakaka djɛ ntosuka. (Wala Yeembo 94:18.) Ngo ngete ndotshi mbango oyɛnde la djonyi djɛ osukɔ djɛ nde nkindjɛ ndota, tokoka ndjala la djonyi djɛ okotshɔ djɛ nama osasa l’olemo wɔ Yehova. Lá wina wɛ nghɔsɔ, Yehova atoshikikɛ ante: ‘Lemi Yehova Ndjambe kɛko, nkokota lá womɛ-lɔwɔ lɔko, lemi ndeke lokoshimela ente: “Tokake wɔma. Lemi langokokotshɛ.”’ (Iza. 41:13) Nkfumi Davidɛ ɛnaka okotshɔ wɔsɔ. Winá wɔ ndapomana l’ehemba ole l’antonyi, ashimelaka Yehova ante: ‘Womɛ-lɔwɔ lɔko lonsukaka.’ (Yee. 18:35) Iya wopo wɔkɔnge Yehova otosukande?

12. Yehova okokande nkamba l’anto wakɔna djɛ ntokotshɛ́ winá w’ɔlɛmbaso?

¹² Mbala efula Yehova ntosukaka má ntshinda anto ankina djɛ ntokotshɛ́. Ndjɔmbɔmba, mbala kɛmɔtshi winá wɔ Davidɛ ndalɛmbɛ, ilongo yɛnde Yɔnata atshɔka ntowembola djɛ ndɔpɛyɛ osukɔ wɔ lá yimba edjinge Etepela w’ekembɛ. (1 Sa. 23:16, 17) Wopo wɔkɔ ɔmɔ, Yehova asɔnaka Elisha djɛ ntɔpɛyɛ Elidja okotshɔ wɛdje. (1 Nk. 19:16, 21; 2 Nk. 2:2) Lɔɔko kɛnɛ, Yehova nkoka nkamba la nkfumbo, tolongo, kana tokokolo djɛ ntosuka. Koko, winá w’oyalaso la yɛnyi y’efula, tokoka ndjala la mposɛ kɛ mbangɔ anto. Tɔngɔkɔpa ngo ndjala isɔmɛlɛ. Lako nyɛtshi iso ndáwoka nghɔsɔ. Ko kɛkɔnge k’okokaso nangha djɛ mba osukɔ wɔ Yehova?

13. Kɛkɔnge k’oyɛso ladjɛ nangha djɛ mba wapɔ má osukɔ wɔ Yehova? (Lenda edjinge ntshango.)

¹³ Kɛnɛ k’oyɛso ladjɛ nangha. Nana l’ikanyi yɛ ndáwangoyɛ l’anto. Winá w’owangɔso otale l’anto ankina, tongotateyɛ nkanela ngo djɛso sɔmɛlɛ kana akambo wapomana laso. Ekanedji kɛ nghɔsɔ nkoka ndjala l’eposelo wɛ nyɛtshi lá akano w’okokaso ndɔsa. (Woo. 18:1) Lá nsɔsɔlɔ, tongoyalake la djonyi djɛ ndjala iso sɔmɛlɛ, pekapeka winá w’opomanaso l’okakasano w’ekekete. Koko, ntsha tombowangɔ anto ilá efula, tokoka ntona mbamba yekamba la Yehova djɛ ntosuka. Ayale okakasano wɔ wolo w’opomana lawɛ, awola okotshɔ wɔ nkfumbo kɛko, tolongo la tokokolo. Ɔsawɔ etengo mbamba yekamba la Yehova djɛ nkosuka.​—Woo. 17:17; Iza. 32:1, 2.

YEHOVA ANGOKOKEMBƐ

14. Ekakasano wɛkɔnge wɛ wɔma w’okokaso mpomana?

¹⁴ Okakasano. Tokoka ndjoka wɔma etsho ɛmɔtshi. Lá Bible, enkambi wɛ Ndjambe wɛ nkɔmano watepelaka djɛ winá wɛ yayalaka lá ndjolo la yadjidjimaka lokomba m’ɔtɛ w’antonyi wawɔ kana w’akambo wa yatshindamaká  la wolo djɛ nangha. (Yee. 18:4; 55:1, 5) Lá wopo wɔkɔ ɔmɔ, tokoka mpomana l’onanyelo lá nkalasa, l’olemo, me nkfumbo kɛso kana me ewandji wɛ lɛɛta. Tokoka kaanga ndjoka wɔma ente tongovɔ m’ɔtɛ wɔ olando. Lá winá wɛ nghɔsɔ, tokoka ndáwoka ente topakotshi wolo wɔ nangha kaanga nkambo mmɔ etengo wɔna w’ilɛngɛ. Wopo wɔkɔnge Yehova otokotshɛnde lá winá wɛ nghɔsɔ?

15. Yeembo 94:19 ɔpɛyɛnde eshikikelo kɛkɔnge?

¹⁵ Wopo wɔ Yehova otokotshɛ́nde. Nde ntokembɛka la ntovumbɛka. (Wala Yeembo 94:19.) Yeembo yɛnɛ ikoka ntovungola wɔna wɔ daambi w’oka wɔma la w’opapange ndjetama m’ɔtɛ wɔ lompopo l’ekekete. Tokoka nkanela wopo wɔ isɛkɛnde ndomboyɛ, ndɔmbɔwɛmba, ndombowila mbonga tii nde ndjetama ilɔ. Kaanga lompopo okindjɛwɔ mpopa, nde angoyawoka l’elamelo la angowa lokembo lá wopo w’isɛkɛnde ndɔmbɔwɛmba. Winá w’opomanaso l’ehemba wɛtɔpɛyɛ wɔma, tokoka ndjala la djonyi djɛ Papa kɛso kɛ l’olongo tɔwɛmba lá mbonga kɛ djingingi tii winá wɔ songoka vu. Wopo wɔkɔnge w’okokaso mba lokemo lɔ nghɔsɔ me Yehova?

16. Kɛkɔnge k’oyɛso ladjɛ nangha djɛ mba lokembo lɔ Yehova? (Lenda edjinge ntshango.)

¹⁶ Kɛnɛ k’oyɛso ladjɛ nangha. Tohetshɛke winá mbala la mbala esanga la Yehova, má ndɔlɔmbaka la mbalaka Otepela wɔnde. (Yee. 77:1, 12-14) Manyi, winá w’opomanɛ la nkambo nkotshimbɛ yimba, ikanyi yɛko yɛ ntondo ingoyala yɛ nkadjimɔ te Papa kɛko kɛ l’olongo. Shimela Yehova wɔma l’ekiyano wɛko. Pɛyɛnde mbamba kɛ nde nsawola la wɛ la nkokembɛ má lotshimbo l’Afunelo. (Yee. 119:28) Okoka ndjisola avɛrse kɔɔ wa Bible wakoka nkɔpɛyɛ lokembo winá w’oyalɛ la wɔma. Ndjɔmbɔmba, okoka ntana akambo wakembɛ l’onkanda wɔ Djɔbɔ, Yeembo, Woongo la l’etepela wɛ Yeso wetanema l’onkanda wɔ Mateo shapitrɛ 6. Winá w’ɔlɔmbɛ Yehova la w’owalɛ Otepela wɔnde, ongowa lokembo l’ɔpɛyɛnde.

17. Okokaso ndjala l’eshikikelo kɛkɔnge?

¹⁷ Tokoka ndjala l’eshikikelo ente Yehova angoyala entshupa laso winá w’oyɛso lá deko djɛ ndjolo. Nde apangotokadjɛ. (Yee. 23:4; 94:14) Yehova atolaka djɛ ntolama, ntoshikimadjɛ, ntosuka, la ntokembɛ. Izaya 26:3 atepela nghɔnɛ lá nkambo djɛ Yehova: ‘Wɛ ongolama anto wayawɛkɛ le wɛ; wɛ ongapɛyɛ vu djepashile, ladjikɛnde iwɔ ndáwɛkɛka lewɛ.’ Djɛkondeke, lokawɛkɛ le Yehova, la nangha djɛ mba wapɔ má mbamba yekamba lande djɛ nkokotshɛ́. Ntsha ombonangha nghɔsɔ, ongowa lokembo kaanga lá deko dj’ekakasano.