1. Kɛkɔnge kekoyela lá yimba winá w’okanelɛ Yehova?

 OMBOKANELAKÁ lofu lɔmɔtshi wopo wɔ Yehova oyɛnde? Winá w’osawolakɛ lande lá lɔlɔmbɔ, kɛkɔnge kekoyelaká lá yimba? Kaanga Yehova ndɔpɛnamá, Bible ntepelaka nkambo djɛnde lá topo totshikitanyi. Bible ndjetaka Yehova ante ‘winá la nguwa’ edjinge ‘iyɛ yetshumba.’ (Yee. 84:11; Heb. 12:29) Omfunyi wɔ Bible ɔmɔtshi atepelaka ante ɛnamelo kɛnde kelekɔ etengo lɔwɔkɔ lɔ safirɛ, lowolo lɔ mfɛsa, la etengo ngolo kenghayinghá. (Ezk. 1:26-28) Akambo w’alendana l’ɛnamelo kɛ Yehova wasɔ nkoka ntokamoyɛ kana ntokɛ wɔma.

2. Ladjikɛnge anto amɔtshi okokawɔ ndjala l’okakasano djɛ ndásukanyɛ la Yehova?

² Ladjikɛnde tɔpɛnáká Yehova, tokoka ndjala l’okakasano wɔ ndjawola ente nde ntɔkɔpaka. Amɔtshi mfɛnyɛka ambɔ Yehova apakokaki ndaakɔpa lotshinda m’ɔtɛ w’akambo wapomanisá lawɔ lá lowiko. Nkoka ndjala watawa papa k’akɔpaki. Yehova nsipisoyɛka wopo w’oyawokaso wɔsɔ edjinge nde ndjewaka eposelo welekɔ́ la nkambo djɛsɔ leso. Djɛ ntokotshɛ́, nde ntisolaka lonto lɔnde lɔ wɔlɔ lombombe l’Otepela wɔnde.

3. Lamo oyɛso ladjɛ nshishima ngandji kɛ Yehova la nkɔmɛ nkfumɔ?

³ Itepela imɔtshi ileká nyɛnyɛ wopo w’olekɔ́ Yehova nde ngandji. (1 Dj. 4:8) Ngandji nyɛnyɛká wopo w’oyɛnde. Ngandji ndeke lootshinda djɛ nangha kenkfumɔ k’onanghakande. Ngandji kɛ Ndjambe kelekɔ ekekete edjinge nkfulu efula ko kɛsɔ ndotshindaka djɛ nkɔpa kaanga anto wapɔkɔpɛ. (Mat. 5:44, 45) Lá djamba djɛnɛ, toshishima la nkɔmɛ nkfumɔ lonto lɔ Yehova la ngandji kɛnde.  Winá wɔ sotaleke ndjeka akambo walendana la Ndjambe, ndeke songotalekaka ndɔɔkɔpa.

YEHOVA NTƆKƆPAKA LOMBOMBE

4. Oyawokakɛ ngete mo lá nkambo djɛ ngandji k’efula kɛ Yehova? (Lenda edjinge ntshango.)

⁴ ‘Yehova alekɔ la ngandji k’efula.’ (Dja. 5:11) Lá Bible, nde ndáwɛdjɛka la nyɔ kɛ ngandji efula. (Iza. 66:12, 13) Kokanela wopo wɔ nyɔ ndolamaka wɔnande w’ɔlɔma. Nde ndɔwɛmbaka la ngandji k’enkfumɔ l’apɛlɔ wande la nsawolaka nya nde la djoyi dj’ɔkɔkɛ. Winá w’olelande kana w’oyɛnde la yɛnyi, nde nanghaka la wolo djɛ ndɔpɛyɛ kɛnɛ k’oyɛnde la djonyi. Winá w’oyɛso la yɛnyi, iso nkoka ndawɛkɛ tá ngandji kɛ Yehova. Ondjombe ɔmɔtshi afunaka ante: ‘Winá wɔ madjinde lá ekiyano, wɛ onkembɛka la omvumbɛka.’​—Yee. 94:19.

5. Kɛkɔnge kɛ ngandji kɛ nkɔmano kɛ Yehova osakisolawɔ lewɛ?

⁵ Yehova alekɔ nkɔmano. (Yee. 103:8) Nde apatokadjɛka winá w’onanghaso ovunga. Owila w’Isariyɛlɛ wokiyanyɛka Yehova mbala la mbala; koko, nde ɛnyɛka ngandji kɛnde k’ipa l’ekomo l’enkambi wɛnde má etepela wɛnɛ: ‘Oyalaka la ntshina lá wiso wami, ɔlɛmɛyamaka, la nkɔkɔpaka.’ (Iza. 43:4, 5) Ngandji kɛ Ndjambe ketatshikitana. Iso nkoka ndawɛka winá enkfumɔ t’eteyi. Kaanga ntsha tombonangha evunga wɛ nkekete, Yehova apangotokadjɛ. Ntsha tomboyapɛla la tombokalɔ le Yehova, tongotana ngandji kɛnde leso ngo wopo wɔ yayalaká. Nde ntolakaka ante ‘angimeyɛ nsɔsɔlɔ.’ (Iza. 55:7) Bible ndjetaka imeyelo kɛsɔ ante ‘deko dj’ekembelo . . . dj’ime Yehova nyɔmɛlɛ ngɛndjɔ.’​—Ele. 3:19.

6. Zakari 2:8 otolakanyɛnde nge lá nkambo djɛ Yehova?

⁶ Wala Zakari 2:8. Ladjikɛnde nde ntɔkɔpaka, Yehova nsipisoyɛka wopo w’oyawokaso la alekɔ entshupa djɛ ntolama. Nde ndjalaka la yɛnyi winá w’oyɛso la yɛnyi. Eposelo welekɔ́ la nkambo djɛsɔ nde, iso nkoka ndɔlɔmba ente: ‘Ombakele etengo wɔna-ntsho djɛko.’ (Yee. 17:8) Ntsho dekɔ ekete kɛ wɔdju la kɛ ntshina efula lá demba. Djɛkondeke winá wɔ Yehova ɔtɛdjɛnde la wɔna-ntsho djɛnde, alekɔ etengo otepelande nde ante, ‘Onto onkfumɔ wonyonanghela nyo, enkambi wɛmi nyɛtshi, onanghelande nde ekete kemi kɛ ntshina.’

7. Ladjikɛnge oyɛso ladjɛ nkembɛ wɛkamo wɔso tá ngandji kɛ Yehova?

⁷ Yehova nkɔpaka iso ndjala l’eshikikelo ente nde nkɔpaka onto l’onto wɔ l’anteyi kɛso. Koko nde ndjewaka ante m’ɔtɛ w’akambo wapomanisá  laso l’etsho wemboheta, tokoka ndawopola ntsha nde ntɔkɔpaka nsɔsɔlɔ. Kana mbala imɔtshi topomana winá wɔsɔ l’ekakasano wetokomɛ djɛ ndjila ehamo ente Yehova ntɔkɔpaka. Kɛkɔnge kekoka ntokotshɛ́ djɛ nkembɛ eshikikelo kɛso? Má ndjeka wopo wɔ Yehova ɛnyɛnde ngandji kɛnde te Yeso, te ankfutami w’avuta la te iso sankfumɔ.

WOPO WƆ YEHOVA ƐNYƐKANDE NGANDJI KƐNDE

8. Ladjikɛnge Yeso ndayalaka l’eshikikelo ante Yehova ndɔkɔpaka?

⁸ Yehova nya Wɔnande wayalaki ngo yape toko l’ilá k’ɛnɔnyi wepewamá mbala, lá ntondo kɛ kaanga andja ntongama. Ladjikɛnde wayalaka esanga ilá efula, wayalaka la djokanelo djɛ ma ma la wokanaka ngandji k’ipa wɔsɔdjɔmba. Yehova ɛnyɛki papoo ngandji kɛnde te Yeso, etengo owalaso lá Mateo 17:5. Yehova akokaka ntepela ngo ante: ‘Ɔnɛ ndeke onto wɔ momawola.’ Koko, nde akɔpaka iso ndjewa tii lá lɛdji lɔkɔnge lɔkɔpande Yeso, djɛkondeke ndowete ante ‘Wɔnami wɔ ngandji.’ Yehova ayalaka l’ofuno lá wopo w’onto wɔ Yeso ndayalaka la kɛnɛ kɛ ndananghaka. (Ɛfɛ. 1:7) Edjinge Yeso atayalá kaanga la ndambo daambi k’ehamo tá ngandji k’owokaki Papa kɛnde. Nde ayalaki l’eshikikelo ante Yehova ndɔkɔpaka nsɔsɔlɔ. Nde atepelaki mbala la mbala l’eshikikelo kenkfumɔ ante Papa kɛnde ndɔkɔpaka.​—Dj. 3:35; 10:17; 17:24.

9. Itepela yɛkɔnge yɛnyɛ ngandji kɛ Yehova te ankfutami w’avuta? Pakisola. (Ɔrɔma 5:5)

⁹ Yehova nyɛnyɛka ngandji kɛnde lonkina te ankfutami w’avuta. (Wala Ɔrɔma 5:5.) Tokolenda itepela ‘kembolola.’ Diksiɔnɛrɛ mɔtshi djesakisola Bible nkadjimolaka itepela yɛsɔ nghɔnɛ “kemboyala etengo ndjale l’eteyi kɛso.” Ɔsɔngo yopo yɛ nkfulu yɛ nyɛnyɛ ngandji k’efula kɛ Yehova okande ankfutami w’avuta! Ankfutami w’avuta ndjewaka ambɔ ‘Ndjambe ndakɔpaka.’ (Yuda 1) Ɔpɔstɔlɔ Djɔanɛ ɛnyɛka wopo w’oyawokawɔ winá wɔ ndafune ante: ‘Nyolende wopo wɔ ngandji ketɔkɔpisá Papa kɛso má wopo wɔ ndawola iso ndjetama wana wa Ndjambe!’ (1 Dj. 3:1) Yehova ɔkɔpakande ngo ankfutami? Lako, Yehova ɛnyɛka ngandji kɛnde le onto Onkfumɔ wɔ l’anteyi kɛso.

10. Ilembetelo yɛkɔnge yeleka ekekete yekoshikikɛ ngandji kɛ Yehova?

¹⁰ Ilembetelo yɛkɔnge ileka ekekete yetoshikikɛ ngandji kɛ Yehova? Ilembetelo yɛkɔ nde oshinga wɔ mbendo, enanghedji keleka ekekete kɛ ngandji l’andja w’otondo! (Dj. 3:16; Ɔrɔ. 5:8) Yehova alambolaka Wɔnande wɔ ntshina efula, awolaka djɛ nde mvɔ lá nkambo dj’anto ankfumɔ, dj’evunga wɛso nyimeyama la dj’iso nkoma tolongo tɔnde. (1 Dj. 4:10) Winá w’olekaso ntɔnɔla lá oshinga wɔ Yehova nya Yeso yafute, ndeke songoleka ndjala l’akoka wa nsipisoyɛ tii lá lɛdji lɔkɔnge l’ɔkɔpawɔ onto l’onto wɔ l’anteyi kɛso. (Nga. 2:20) Oshinga wɔ mbendo w’otafutama ngo ladjikɛnde sii kɛ Yehova kalɔmbaki djɛ nangha nkambo djɛsɔ. Oyɛwɔ nde opapɛyɛ wɔ ngandji. Yehova atɛnyɛka ngandji k’otokande má ndambola onto woleka ntshina lende, Yeso. Yehova awolaka djɛ Wɔnande nyɛna ndjolo edjinge mvɔ ngo lá wapɔ wɔso.

11. Olakanyelo wɔkɔnge w’owaso má Jɛrɛmi 31:3?

¹¹ Etengo sɛnaki, Yehova atawomba ngandji k’otokande ngo l’oloko wɔnde, koko la wɔlɔ onkfumɔ, nde atɛnyɛka ngandji kɛnde. (Wala Jɛrɛmi 31:3.) Yehova atosepaka te nde ladjikɛnde nde ntɔkɔpaka. (Ɛdjɛ la Mvungo k’ɛlɛmbɛ 7:7, 8.) Lako kaanga ekete kana onto w’okoka ntatola la ngandji kɛsɔ. (Ɔrɔ. 8:38, 39) Wopo wɔkɔnge w’oyawokɛ má ngandji kɛsɔ? Wala Yeembo 23, ndeke lenda wopo wɔ Davidɛ ndoke lá nkambo djɛ ngandji la elamelo kɛ Yehova, l’eposelo w’ekoka ndjala edjinge leso isankfumɔ.

OYAWOKƐ NGETE MO MÁ NGANDJI KƐ YEHOVA?

12. Kotepela lá yopasɛ etepela wɛ Davidɛ welá Yeembo 23?

¹² Wala Yeembo 23:1-6. Lá Yeembo 23, Davidɛ ɛnyɛ eshikikelo keyalaki lande ante Yehova  ndɔɔkɔpaka la ndoolamaka. Nde atepela djɛ djokanelo djɛ wolo djeyalaki l’antenyɛ nde nya Yehova, kanga ndete ante Onami wɔnde. Davidɛ ayawokaki l’elamelo winá wɔ ndawolaka djɛ Yehova ndɔlɔndjɛ, nde alendaki ngo mende. Davidɛ ewaki ante ngandji kɛ Yehova kengoyalaka lande mfu inkfumɔ yɛ lowiko lɔnde. Lamo ndayalaka l’eshikikelo kɛ nghɔsɔ?

13. Ladjikɛnge Davidɛ ndayalaka l’eshikikelo ante Yehova angoseyɛ ehomba wɛnde?

¹³ ‘Mpangosamba kaanga ekete.’ Davidɛ ayawokaki l’elamelo ladjikɛnde Yehova ɔpɛyɛki kenkfumɔ kɛ ndayalaka la djonyi. Davidɛ ewaki lonkina ante Yehova alekɔ Ilongo yɛnde edjinge awolamaki me nde. Djɛkondeke ndayalaka l’eshikikelo ante ayale kɛkɔnge kengokomela l’etsho weyaye, Yehova angokindjɛ ndoseeyɛ ehomba wɛnde enkfumɔ. Ladjikɛnde Davidɛ ayalaki l’eshikikelo ante Yehova ndɔkɔpaka la angooseyɛ ehomba wɛnde, nde atayala kaanga la ndambo kɛ wɔma koko ayalaka l’osasa la asasangaki la nkete dj’okotshɛnde.​—Yee. 16:11.

14. Wopo wɔkɔnge Yehova okokande ntoseyɛ ehomba wɛso la ngandji kenkfumɔ?

¹⁴ Yehova ntoseyɛka ehomba wɛso la ngandji kenkfumɔ, pekapeka winá w’opomanaso l’akambo wa nyɛtshi lá lowiko lɔso. Claire, a kanga lokambisá lá Betɛlɛ ɛnɔnyi ndekana 20, ayawokaka djɛ ambosamba okotshɔ winá wɔ nkfumbo kɛnde yapomana l’ekakasano wɛ wolo efula. Papa kɛnde ɛnaka ndjolo la AVC, ankfunɛnde ɔmɔtshi w’omoto aposaka m’otshumano, edjinge nkfumbo kɛwɔ kɛkfɔka m’opoto la watshutshɛka mvulu kɛwɔ. Wopo wɔkɔnge Yehova ndawɛnyɛ ngandji kɛnde k’efula? Claire atepela ante: “Yehova ananghaka djɛ nkfumbo kɛmi mbaka kenkfumɔ kɛ yayalaka la djonyi lofu la lofu. Mbala la mbala, kɛnɛ kɛ Yehova  ndaapɛyɛka kalekaki kenkfumɔ kɛ makanelaka! Langɔtɔnɔlake mbala la mbala lá winá wɛ mɛnyi ngandji k’efula kɛ Yehova, ko langoyalake l’eshikikelo. Mvungɔ akambo wasɔ ankotshɛka djɛ nkindjɛ nkfulumeyɛ winá w’opomanami l’ekakasano enkina.”

15. Ladjikɛnge Davidɛ ndakalɔ mba lokembo? (Lenda edjinge ntshango.)

¹⁵ ‘Nde nkembɛka lemi.’ Lá mbamba imɔtshi, Davidɛ alɛmbaki demba m’ɔtɛ w’ekakasano l’ehemba enkfumɔ wɛ ndapomanaka. (Yee. 18:4-6) Koko, Ngandji k’efula kɛ Yehova k’okembɛki. Yehova alɔndjɛki ilongo yɛnde yɛmbɔlɛmbá ‘tá wilo wamɔnghɔla’ la tá ‘djena djɛ mpomola djelekɔ́ la washi wa ntshitshi.’ Eposelo weyalisá nde, Davidɛ akalɔka mba lokembo lɔnde la ayalaka l’akoka wa nkindjɛ nkfulumeyɛ l’osasa.​—Yee. 18:28-32.

16. Wopo wɔkɔnge ngandji kɛ Yehova okokɛmbɛwɔ?

¹⁶ Wopo wɔk’ɔmɔ ndeke lɔɔko kɛnɛ, oyɛwɔ ngo ‘m’ɔtɛ wɔ ngandji kɛ nkɔmano kɛ Yehova ndeke sotashilá’ winá wɔ sapomaná l’ehemba edjinge l’ekakasano wɛ lowiko. (Del. 3:22; Kɔl. 1:11) Tokolenda ndjɔmbɔmba kɛ Rachel. Nde ayalaka la yɛnyi y’efula winá wɔ womɛnde ndokadjɛ la ndatshike Yehova lá winá w’opela wɔ COVID-19. Kɛkɔnge kɛ Yehova ndonanghela? Nde atepelaka ante: “Yehova ananghaka djɛ lemi ndjoka ente nkɔpama. Nde andjingaka la tolongo tohetshɛki winá esanga la lemi, tondjakalaki nkete djɛ ndɛ, tontomelaki mesajɛ la avɛrse wakembɛ, tɔndjɔdjɛki, la tokindjɛki mvungola ambɔ Yehova ndjilaka lemi yimba. Langokindjɛke mpɛyɛ Yehova lokasa má wopo wɔ ndampɛyɛ nkfumbo k’okana ngandji.”

17. Ladjikɛnge Davidɛ ndotokaki ‘mbalaka wɔma’?

¹⁷ ‘Mpangoka mbalaka wɔma, ladjikɛnde olekɔ esanga la lemi.’ Lowiko lɔ Davidɛ lingelaki mbala efula lá mbalaka, la ayalaki l’antonyi wa nkfulu efula. Koko, ngandji kɛ Yehova k’okotshɛki djɛ nde ndáwoka ante alamema la awakelama. Davidɛ akokaki ndawoka ante Yehova alekɔ esanga lande l’ikakambo inkfumɔ, edjinge nkambo djɛsɔ dj’ɔpɛyɛki oloko wolo. Djɛkondeke ndayale l’akoka wa ntshumba ante: ‘[Yehova] atshungolaka má wɔma wɛmi.’ (Yee. 34:4) Davidɛ ayalaki nsɔsɔlɔ la donga djɛ ndjoka wɔma, koko ngandji kɛ Yehova kalekaki wɔma wɔnde wolo.

18. Wopo wɔkɔnge eshikikelo k’ente Yehova nkɔkɔpaka okokembɛwɔ winá w’opomanɛ l’akambo wa wɔma?

¹⁸ Wopo wɔkɔnge eshikikelo k’ente Yehova ntɔkɔpaka otokembɛwɔ winá w’opomanaso l’akambo wa wɔma? Yat’ekalo imɔtshi y’etawɔ Susi atepela wopo wɔ nde nya womɛnde  yoke winá wɔ wɔnawɔ wɔ mpame ndoyashimbɛ ntshudji ante: “Winá wɔ nkambo mɔtshi djɛ nyɛtshi efula okokomelande, ongoyala la wɔma ente ngokokomela lonkina. Koko ngandji k’efula kɛ Yehova ketokotshɛka dj’iso ndáwoka l’elamelo kɛnde.” Rachel, kanga sotepelaki má djiko avungɔ ante: “Otsho ɔmɔtshi, winá wɔ oloko wɔmi yatshatshɛka la yɛnyi ole la wɔma, ndeelaka Yehova la djoyi djɛ wolo. Ngo masɔ ndjokaka ente nde ambotshitshimɛ oloko wɔmi edjinge ambomvumbɛ ngo ngete nyɔ ndonanghelaka wɔnande wɔ daambi, ko mvɔka ilɔ. Mpavungɛki lofu lɔsɔ lotshinda.” Ikokolo imɔtshi y’etawɔ Tasos ananghaka ɛnɔnyi ɛnɛyi lá lokando m’ɔtɛ wɔ ndatone ndjingela ongala. Wopo wɔkɔnge ndɛnyi ngandji la elamelo kɛ Yehova? Nde atepela ante: “Yehova anseyɛka ehomba wɛmi ndeka kaanga lɛdji lɔ mayalaka la djonyi. Nkambo djɛsɔ djekembɛka eshikikelo kɛmi ente lemi nkoka ndawɛkɛ otondo tende. Lonkina, má lotshimbo lɔ nyuma kɛnde, Yehova ampɛyɛka osasa kaanga mayalaka l’edjena ketshimbɛ yimba. Kɛsɔ kenshikikɛka ente winá wɔ motaleke ndáwɛkɛ tende, ndeke mongotalekaka nyɛna ngandji kɛnde. Djɛkondeke mbangaka ndokambela etengo yat’ekalo yɛ lotshinda lá lokando.”

YASUKANYƐ LA NDJAMBE KƐKO KƐ NGANDJI

19. a) Wopo wɔkɔnge ndjewa ente Yehova ntɔkɔpaka okokawɔ ndjala la ndjimbo lá kɛnɛ k’otepalaso lá ndɔmbɔ yɛso? b) Etepela wɛkɔnge w’epakisola ngandji kɛ Yehova wekovunda efula l’oloko? (Lenda ipapango: “ Etepela w’etokotshɛ́ djɛ nyɛna ente Yehova ntɔkɔpaka lombombe.”)

¹⁹ Ndjɔmbɔmba inkfumɔ yɛ somboshishima yɛnyɛ ente Yehova, ‘Ndjambe kɛ ngandji,’ alekɔ esanga laso! (2 Kɔ. 13:11) Nde ndjilaka onto l’onto wɔ l’anteyi kɛso yimba. Tolekɔ l’eshikikelo ente iso ‘ndjingama la ngandji kɛnde kɛ nkɔmano.’ (Yee. 32:10) Winá wɔ sotaleke ntɔnɔla lá wopo w’ɔtɛnyɛnde ngandji kɛnde, ndeke ndongotalekaka nkoma onto wɔ nsɔsɔlɔ leso la songoleka ndáwoka entshupa iso lande. Iso nkoka ndɔlɔmba ipa la ndjoka wɔma la ndoshimela wopo w’oyɛso la djonyi djɛ ngandji kɛnde k’efula. Iso nkoka ndoshimela wɛma wɛso enkfumɔ, l’eshikikelo ente nde atoka edjinge alekɔ entshupa djɛ ntokotshɛ́.​—Yee. 145:18, 19.

20. Wopo wɔkɔnge ngandji kɛ Yehova otosukanyɛwɔ lande?

²⁰ Ngo ngete ɔsɛmɛlakaso tá iyɛ lofu lɔ ntshitshi, iso nsɛmɛlaka tá ngandji kɛ Yehova. Kaanga ngandji kɛ Yehova oyɛwɔ nkfulu efula, kelekɔ́ lonkina ekekete. Djɛkondeke sasanga ladjikɛnde Yehova nkɔkɔpaka. Edjinge nyontshɔ isankfumɔ tokadjimole lá ngandji kɛnde má ntepela ente: ‘Lemi nkɔpaka Yehova’!​—Yee. 116:1.