1. Wopo wɔkɔnge enkambi wɛ Ndjambe wɛ l’etsho wɛ ntondo yawaka wolo?

 MBALA efula Otepela wɔ Ndjambe ntepelaka djɛ ampame wayalaki la nkɔmano dj’efula ngo ngete anto wa nkfulu k’efula. Koko kaanga wanɛ wayalaki la nkfulu efula watayalaki winá enkfumɔ ngo la nkfulu. Ndjɔmbɔmba, lá mbamba imɔtshi Nkfumi Davidɛ ayawokaki la ‘nkfulu etengo onkókó,’ koko lá mbamba inkina nde ‘ayalaki la wɔma.’ (Yee. 30:7) Kaanga Samisɔnɛ ndayalaka okowo lá lɛdji l’indeko winá wɔ ndatshindamaka má nyuma kɛ Ndjambe, nde asuyɛka ante ntsha Ndjambe apɔpɛyisa nkfulu, ‘apangoyala la wolo lonkina edjinge angokoma ngo ngete ampame inkina inkfumɔ.’ (Tos. 14:5, 6; 16:17) Ampame yɛ nkɔmano yɛsɔ wayalaki la nkfulu ngo ladjikɛnde Yehova apɛyɛki.

2. Ladjikɛnge ɔpɔstɔlɔ Poolo ndatepela ante ayalaki wɔdju ole wolo? (2 Kɔrɛtɔ 12:9, 10)

² Ɔpɔstɔlɔ Poolo awolaka ante edjinge nde ayalaki la djonyi djɛ nkfulu keyɛ me Yehova. (Wala 2 Kɔrɛtɔ 12:9, 10.) Ngo ngete efula l’anteyi kɛso, Poolo atepelaka ante ayalaki l’olando. (Nga. 4:13, 14) Lá winá wɔk’ɔmɔ, nde ananghaki lá wolo lonkina djɛ nangha kɛnɛ kelekɔ́ wɔlɔ. (Ɔrɔ. 7:18, 19) Winá ɛmɔtshi nde ayalaki la yɛnyi ole la wɔma wɔ kɛnɛ kekoka ndokomela. (2 Kɔ. 1:8, 9) Koko, winá wɔ Poolo ndayalaka wɔdju ndeke ndayalaka la nkfulu. Lá wopo wɔkɔnge? Yehova apɛyɛka Poolo wolo wɔ ndasambaka. Nde akomɛka Poolo kanga nkfulu.

3. Weepó wɛkɔnge wɛ songokadjimola lá djamba djɛnɛ?

³ Yehova ntolakaka djɛ ntokembɛ edjinge iso. (1 Pɛ. 5:10) Koko, topangowa wolo wɔsɔ lɔkɔma ɛwɔ. Tɔkɔsa ndjɔmbɔmba kɛnɛ: Mɔtɛrɛ nkoka mpɛtshɛ otuka. Koko dj’otuka nkɛnda,  ngo kanga lɔkɛndjɛ nuka akseleratɛrɛ. Wopo wɔk’ɔmɔ ndeke, Yehova alekɔ entshupa djɛ ntɔpɛyɛ wolo w’oyɛso la djonyi, koko iso ladjɛ ntapola djina djɛ mba wapɔ má wolo wɔkɔ. Kɛkɔnge kɛ Yehova ɔtɔpɛyɛnde djɛ ntokembɛ? Edjinge kɛkɔnge k’oyɛso ladjɛ nangha djɛ mba wolo wɔkɔ? Tongowa ndjɔndɔ yɛ weepó wɛsɔ má nshishima wopo wɔ Yehova ndakembɛ anto asato welá Bible wanɛ: Ɔprɔfɛtɛ Yɔna, Mariya kɛ nyangho Yeso, la ɔpɔstɔlɔ Poolo. Tɔnghɛna lonkina lɔ wopo wɔ Yehova okindjɛnde nkembɛ enkambi wɛnde lɔɔko kɛnɛ lá lɛdji lɔkɔ lɔmɔ.

4. Wopo wɔkɔnge w’okokaso mba nkfulu me Yehova?

⁴ Yopo imɔtshi y’okokaso mba lokembo loyɛ́ me Yehova nde má nsɛmɛla tende má lɔlɔmbɔ. Yehova angokadjimola ndɔmbɔ yɛso má ntɔpɛyɛ ‘wolo woleka wolo w’anto.’ (2 Kɔ. 4:7) Iso nkoka mba lokembo lonkina winá w’owalaso la w’ɔtɔnɔlaso l’Otepela wɔnde. (Yee. 86:11) Losango lɔ Yehova ɔtɔpɛyɛnde lá Bible ‘lolekɔ la nkfulu.’ (Heb. 4:12) Winá w’ɔlɔmbɛ Yehova la w’owalɛ Otepela wɔnde, ongowa lokembo loyalɛ la djonyi djɛ nkfulumeyɛ, djɛ nama osasa wɔko, kana djɛ nkotshɛ odjito ɔmɔtshi wɔ wolo. Tokolenda wopo wɔ Yehova ndakembɛ ɔprɔfɛtɛ Yɔna.

5. Lamo ɔprɔfɛtɛ Yɔna ndayale la djonyi djɛ lokembo?

⁵ Ɔprɔfɛtɛ Yɔna ayalaka la djonyi djɛ oloko wolo. Nde alotaka odjito wɔ wolo wɔ Yehova ndɔpɛyɛ. Eposelo weyalisá nde, asiyɛka ntshutshɛ lowiko lɔnde má lofunge l’ekekete edjinge ilaka mbiko yɛ anto watatshɔki lande lá masuwa lá mbalaka. Winá wɔ yowokela lá ndjale, nde akomaka l’idjena yɛ ndotasamba nkoma lotshinda, ntepela ente lá nkfundu djɛ nse k’ekekete. Okanelɛ ente Yɔna ndoke ngete mo? Ndakanelaka nde ante apongowika lonkina? Nde akokaka ndáwopola ntsha Yehova ambokadjɛ? Yɔna ayalaka ladjɛ ndjoka yɛnyi y’efula.

6. Lá nkilika Yɔna 2:1, 2, 7, kɛkɔnge kekotshisá Yɔna winá wɔ ndayalaka lá nkfundu djɛ nse?

⁶ Kɛkɔnge kɛ Yɔna ndananghe winá wɔ ndayalaka nyɔmɛlɛ lá nkfundu djɛ nse? Ntondontondo, nde alɔmbaka Yehova. (Wala Yɔna 2:1, 2, 7.) Kaanga ndapendola Yehova, Yɔna ayapɛlaka ole ayalaka la djawo ante Yehova angoka lɔlɔmbɔ lɔnde l’okitshakitshɛ. Yɔna atɔnɔlaka lonkina lá Afunelo. Lamo okokaso ntepela nghɔsɔ? Lɔlɔmbɔ lɔnde lofunamisá lá Yɔna 2, lokekɔ l’etepela ole ɛnɔnghɔ w’etepela ɛmɔtshi wetanemá lá Yeembo. (Ndjɔmbɔmba, ɛdjɛ Yɔna 2:2, 5 la Yeembo 69:1; 86:7.) Okama papoo ente Yɔna ewaki avɛrse wasɔ wɔlɔwɔlɔ. Edjinge má ntɔnɔla l’Afunelo winá wɔ ndayalaka lá ndjolo, ayɛka ndoyala l’eshikikelo ante Yehova angookotshɛ. Yehova awikɛka Yɔna, ko m’ɔkɔngɔ nde ayalaka entshupa djɛ ndjawola la djɛ nkotshɛ odjito onkina wɔ Yehova ndɔpɛyɛ.—Yɔna 2:10–3:4.

7-8. Wopo wɔkɔnge wɔnanyɔ ɔmɔtshi welá Taïwan ndawa lokembo winá wɔ ndayalaka l’ekakasano?

⁷ Ndjɔmbɔmba kɛ Yɔna nkoka ntokotshɛ́ winá w’opomanaso l’ekakasano w’etshikitanyi. Ndjɔmbɔmba, Zhiming, wɔnanyɔ wowika lá Taïwan, ɛna ndjolo l’olando wɔ wolo efula. b Lá djiko djɛ lasɔ, ase nkfumbo kɛnde wɔwɛnyɛka ndjolo efula m’ɔtɛ wɔ djawo djɛnde te Yehova. Awaka lokembo me Yehova má mbamba kɛ lɔlɔmbɔ la wekelo. Nde awola ante: “Winá ɛmɔtshi, winá wɔ ekakasano oposawɔ langotshimbake yimba efula ko mpawaka kaanga wolo wɔ nangha wekelo w’onto nyɔmɛlɛ.” Koko nde atapekɔ. Atepela ante: “Ntondontondo, langɔlɔmbake Yehova. Makɔ,  langɔlɔtake ekutɛrɛ wɛmi ko langekameyɛke teembo t’Onkfumi. Winá ɛmɔtshi langotshumbake kaanga teembo tɔkɔ tii winá w’oyɛmi ndoka wɔlɔ. Ko masɔ, langowangake wekelo.”

⁸ Wekelo w’onto nyɔmɛlɛ wɔngɔpɛyɛke Zhiming lokembo lá lɛdji lɔ ndopakanela. Ndjɔmbɔmba, winá wɔ ndákɔnɔka má epaso k’ekekete efula kɛ ndaate, ifulume oshimelaka ante ladjikɛnde apalekɔ la globule rouge efula, alɔmbama ngo nde ndjila ekila. L’otsho wɔ lá ntondo kɛ nde ndjata epaso, Zhiming awalaka nkambo djelendana la nkaana kɛmɔtshi katisá epaso kɛ ngete kɛnde. Globule rouge yɛ nkaana kɛsɔ ikakitaka efula ndeka kaanga yɛnde, koko nde atawola ndjila ekila edjinge akɔnɔka. Nkambo djekomelisá nkaana kɛsɔ djekembɛka Zhiming djɛ ntshikala la nkɔmano.

9. Ntsha okakasano ɔmɔtshi wɔkɔlɛmbɛ, kɛkɔnge k’oyɛ ladjɛ nangha? (Lenda edjinge asango.)

⁹ Winá w’opomanɛ l’ohemba, ongoyalake la yɛnyi efula ko opoyewaka kɛnɛ kɛ nshimela Yehova lá lɔlɔmbɔ? Ndo koko ongoyawokake ente ɔmbɔlɛmba efula djɛ nangha wekelo? Vungɔ ente Yehova nsipisoyɛka wɔlɔwɔlɔ wopo w’oyawokɛ. Djɛkondeke kaanga winá w’onanghɛ lɔlɔmbɔ l’itenyi, yala l’eshikikelo ente nde angɔkɔpɛyɛ ngo kɛnɛ k’oyalɛ la djonyi. (Ɛfɛ. 3:20) Ntsha olekɔ l’okakasano wɔ mbala kana wɔ nangha wekelo m’ɔtɛ w’olando kana yɛnyi yelekɔ́ lawɛ, okoka ndjekameyɛ arɛnjistrɛma wa Bible kana wa enkanda wɛso. Mbala imɔtshi ongowa lokembo má ndjekameyɛ teembo tɔso kana ndenda video mɔtshi lá jw.org. Má ndɔmbaka Yehova la má mponaka nsakiso y’alɔmbɛlɔ wako lá Bible la má nkete nkina nkfumɔ dj’ɔtɔpɛyɛnde, nde angɔkɔpɛyɛ lokembo.

10. Wopo wɔkɔnge wananyɔ l’ankaana yɛso y’Akristo okokawɔ ntokembɛ?

¹⁰ Yehova nkoka nkamba la wananyɔ l’ankaana yɛso y’Akristo djɛ ntokembɛ. Iwɔ wakoka ndjala ‘ikɔkɔ yɛ lokembo l’efula’ winá w’opomanɛ l’ohemba kana w’onanɛ djɛ nkotshɛ odjito ɔmɔtshi wɔ wolo. (Kɔl. 4:10, 11) Tongoyalake la djonyi djɛ tolongo pekapeka lá ‘winá wɛ ndjolo.’ (Woo. 17:17) Winá w’okaso ente tɔmbɔlɛmba, winaso andjawodji nkoka ntokotshɛ́ lá demba, lá yimba la lá nyuma. Tokolenda  wopo wɔ Mariya, nyangho Yeso, ndawa lokembo me anto ankina.

11. Lamo Mariya ndayale la djonyi djɛ lokembo?

¹¹ Mariya ayalaka la djonyi djɛ lokembo. Kokanela wopo wɔ ndatshimbe yimba m’ɔkɔngɔ wɔ nde mba odjito wɔ wolo efula me ondjelo Gabriɛlɛ. Nde atátshukamá koko ayalaka ladjɛ ntshɔ djemi. Atawongolaka wɔna ntondo, koko ayalaka ladjɛ mbongola wɔna mpame wongokoma Mesiya. Edjinge masɔ, nde atewanaka la mpame ntondo, wopo wɔkɔnge Mariya ndakoke nshimela oshile wɔnde Yɔsɛfu akambo ankfumɔ wasɔ?—Luka 1:26-33.

12. Lá nkilika Luka 1:39-45, wopo wɔkɔnge Mariya ndawa lokembo lɔ ndayalaka la djonyi?

¹² Wopo wɔkɔnge Mariya ndawa lokembo lɔ ndayalaka la djonyi djɛ nkotshɛ odjito wɔ djonyi la wɔ ndotakambaka ntondo wɔsɔ? Nde ahonaka okotshɔ me anto ankina. Ndjɔmbɔmba, alɔmbaka Gabriɛlɛ djɛ ndoshimela akambo ankina efula walendanan l’odjito wɔkɔ. (Luka 1:34) Ndambo daambi masɔ, Mariya ananghaka lɔkɛndɔ l’otale efula tá ‘djeke dj’enkókó’ tá owila ɔmɔtshi wɔ Juda djɛ ntolenda ewoto kɛnde Elizabɛtɛ. Mbembo kɛsɔ keyalaka l’eposelo wɛ wɔlɔ efula. Elizabɛtɛ awandjɛka Mariya la atshindamaka me Yehova djɛ ntepela prɔfɛsi kɛmɔtshi kekembɛ kelendana la wɔna Mariya wɔkɔpa mbotshɔ. (Luka 1:39-45.) Mariya atepelaka ante: Yehova ‘ambonangha akambo wa nkfulu má lɔwɔ lɔnde.’ (Luka 1:46-51) Yehova akembɛka Mariya má lotshimbo lɔ Gabriɛlɛ la Elizabɛtɛ.

13. Kɛkɔnge keposisá winá wɔ nkaana kɛmɔtshi kelá Bolivie ndalɔmbɛ okotshɔ le wananyɔ l’ankaana yɛnde?

¹³ Etengo Mariya, ole wɛ okoka mba lokembo me winako andjawodji. Dasuri, nkaana kɛmɔtshi kelá Bolivie, ayalaka la djonyi djɛ wolo wɔ nghɔsɔ. Winá wɔ yavunde isɛkɛnde l’olando w’opashile la wɔ ndingela opitalɛ, Dasuri awolaka djɛ ntolama papa kɛnde la djɛ ndooseyɛ ehomba wɛnde. (1 Ti. 5:4) Koko atayalaki winá enkfumɔ wɔdju. Nde asuyɛ ante: “Mbala efula ndawokaki etengo mpangokoka nkindjɛ lonkina.” Nde alɔmbaka okotshɔ? Ee, koko ape má bango. Atepela ante: “Ntakɔpaki mfutanyɛ wananyɔ. Látepelaki ente, ‘Yehova ndeke lɔngɔpɛyɛ okotshɔ w’oyɛmi la djonyi.’ Koko masɔ ndjɛka ndosipisoyɛ ente má mbangɔ anto ankina, ɔsɛsami nde nkandola ekakasano wɛmi ngo mɔmɛlɛ.” (Woo. 18:1) Dasuri ɔsaka nkano djɛ mfunela tolongo tɔnde tɔmɔtshi ole ndapakisola okakasano wɔnde. Ko atepela ante: “Mpewe nsipisoyɛ lokembo lɔ mawa me winami Akristo wa ngandji. Iwɔ wandjakalaka wima la wambalelaka aversɛ wankembisá efula. Ɔsɔ ayalaka nkambo djɛ wɔlɔ efula djɛ ndjewa ente topalekɔ sɔmɛlɛ. Tolekɔ ase nkfumbo k’ekekete kɛ Yehova, ntepela ente nkfumbo kelekɔ́ entshupa djɛ nkokotshɛ́, ndela la nana esanga la wɛ.”

14. Ladjikɛnge oyɛso ladjɛ ndjawola okotshɔ wɔ tokokolo?

¹⁴ Yopo imɔtshi yɛ Yehova ɔtɔpɛyɛnde nkfulu nde má lotshimbo lɔ tokokolo. Iwɔ oyɛwɔ nde epapɛyɛ w’okambande la wɛkɔ djɛ ntɔpɛyɛ lokembo la djɛ ntotshitshimɛ. (Iza. 32:1, 2) Djɛkondeke shimela tokokolo ekiyano wɛko winá w’otshimbɛ wɔɔngɔ. Tokakandake djɛ ndjawola okotshɔ w’ɔkɔpɛyɛwɔ. Yehova nkoka nkokembɛ má lotshimbo lɔwɔ.

15. Nkongi djɛkɔnge Akristo ankfumɔ ɔsawɔ la ntshina?

¹⁵ Nkongi djɛso mbopikamá lá Bible nkoka ntolodjɛ kfu la lokembo. (Ɔrɔ. 4:3, 18-20) Etengo oyɛso Akristo, tolekɔ la nkongi dj’ipa wɔsɔdjɔmba djɛ mbika lotshinda lotshinda, lá looko longokadjimɔ paradiso kana l’Onkfumi wel’olongo. Nkongi djɛso ntɔpɛyɛka lokembo lɔ nkfulumeyɛ ekakasano,  mpoposanyɛ losango lɔ wɔlɔ, la mbɛmba edjito w’etshikitanyi l’otshumano. (1 Te. 1:3) Nkongi djɛkɔ mmɔ nkembɛka ɔpɔstɔlɔ Poolo.

16. Lamo ɔpɔstɔlɔ Poolo ndayale la djonyi djɛ lokembo?

¹⁶ Poolo ayalaki la djonyi djɛ lokembo. Lá onkanda wɔnde wɔ ndafunela ase Kɔrɛtɔ, nde ayawɛdjɛka la mpoke kɛ bomba. ‘Wonyameyɛki, ayalaka l’okakando, ɛnaki ndjolo edjinge wowokelaki lá nkando.’ Lowiko lɔnde lingelaka ole lá mbalaka. (2 Kɔ. 4:​8-10) Poolo afunaka ehemba wɛnde wɛsɔ lá lɔkɛndɔ lɔnde l’asato lɔ misiɔnɛrɛ. M’ɔkɔngɔ wɔnde mfuna etepela wɛsɔ, nde apomanaka l’ekakasano enkina wɛ wolo efula. Nde apomanaka l’eloyi w’anto wa lopango, avundamaka, avutshɛka lá ndjale, la ingelaka nkando.

17. Lá nkilika 2 Kɔrɛtɔ 4:16-18, kɛkɔnge kekotshisá ɔpɔstɔlɔ Poolo djɛ nde nkfulumeyɛ ekakasano?

¹⁷ Poolo awaka wolo wɔ nkfulumeyɛ má mpika wiso tá nkongi djɛnde. (Wala 2 Kɔrɛtɔ 4:​16-18.) Nde ashimelaka ase Kɔrɛtɔ ante kaanga demba djɛnde ‘yotetela ntshitana,’ apangawola nkambo djɛsɔ ndɔlɛmbɛ. Poolo apikaka wiso l’etsho weyaye. Nkongi djɛnde djɛ lowiko l’etshinda l’olongo ‘djetalekaki ngo mfula.’ Nkongi djɛnde djɛsɔ djayalaki la ntshina efula lende ko ayalaki entshupa djɛ nkfulumeyɛ ekakasano enkfumɔ djɛ nde mba lofuto lɔnde. Poolo atɔnɔlaka lá nkongi djɛnde, ko eposelo weyalisá nde, nde ‘atalɔngɔswamaki lofu la lofu.’

18. Wopo wɔkɔnge nkongi yakotshɛ́ Tihomir nya nkfumbo kɛnde?

¹⁸ Tihomir, wɔnanyɔ ɔmɔtshi welá Bulgarie, awaka lokembo má nkongi djɛnde. Ɛnɔnyi emangha lá ntondo, wankfunɛnde Zdravko avɔka l’aksida. Etsho emangha m’ɔkɔngɔ, Tihomir ananaki la yɛnyi y’efula. Djɛ nkfulumeyɛ, nde nya nkfumbo kɛnde wakanelaki wopo w’ongoyalá ekfundwelo. Apakisola ante: “Ndjɔmbɔmba, tatepelaki edjena kɛ songotopomana la Zdravko, dambo djɛ songolambela, anto wa ntondo wa songeta lá fɛtɛ winá wɔ ndongokfundɔ, la akambo wa songowambela lá kɛnɛ kelendana l’etsho w’ekomo.” Tihomir atepela ante mpika wiso lá nkongi  djɛwɔ akembɛka nkfumbo kɛnde djɛ nkindjɛ nkfulumeyɛ la nkindjɛ nkonga winá wɔ Yehova ndongokfundola wankfunɛnde.

19. Kɛkɔnge k’okokɛ nangha djɛ nkembɛ nkongi djɛko? (Lenda edjinge ntshango.)

¹⁹ Wopo wɔkɔnge w’okokɛ nkembɛ djawo djɛko? Ndjɔmbɔmba, ntsha olekɔ la nkongi djɛ mbika lá looko, wala la tɔnɔla lá kɛnɛ kɛ Bible otepelande lá nkambo djɛ Paradiso. (Iza. 25:8; 32:​16-18) Tɔnɔla lá wopo wɔ lowiko yongoyala l’andja wa bango. Koyawɛna l’eteyi. Ɛnɛ onto wɔkɔna? Okɛ oyoko wɔ nge? Oyawokɛ ngete mo? Djɛ nkokotshɛ́ djɛ nyɛna wopo wɔ paradiso yongoyala, lenda asango wa enkanda waso wɛnyɛ Paradiso kana lenda avideo wa teembo wanɛ: Andja w’oyoyo wayaye, Daka dia Paradiso diaya ka suke la soko, kana Imagine ce jour. Ntsha tombokindjɛ nama nkongi djɛ andja wa bango lá yimba, ekakasano wɛso wengoyala wɛ ‘itenyi yɛ winá la wɛ lako wolo.’ (2 Kɔ. 4:17) Nkongi djɛ Yehova ɔkɔpɛyɛnde nkoka nkokotshɛ́ djɛ nkfulumeyɛ ekakasano.

20. Kaanga winá w’okɛ ente ɔmbɔlɛmba efula, wopo wɔkɔnge w’okokɛ mba lokembo?

²⁰ Kaanga winá w’okaso ente tɔmbɔlɛmba efula, ‘Ndjambe angɔtɔpɛyɛ wolo.’ (Yee. 108:13) Yehova amboshiyɛ́ nkɔpɛyɛ kɛnɛ k’oyɛ la djonyi djɛ mba lokembo lɔnde. Djɛkondeke, winá w’oyɛ la djonyi djɛ okotshɔ djɛ nkotshɛ odjito ɔmɔtshi, djɛ nkfulumeyɛ ohemba, kana djɛ nama osasa wɔko, sɛmɛla te Yehova má ndɔlɔmba l’oloko ɔmɔ la hona ɛlɔndjɛlɔ kɛnde má lotshimbo lɔ wekelo w’onto nyɔmɛlɛ. Awola lokembo lɔkɔpɛyɛ́ wananyɔ l’ankaana yɛko y’Akristo. Ɔsaka winá wɔ ntɔnɔlaka mbala la mbala lá nkongi djɛko. Ko ongowa ‘lokembo la wolo w’efula má nkilika nkfulu kɛnde kɛ nkamɔ djɛ wɛ ndjala l’akoka wa nkfulumeyɛ lá lɛdji lonkfumɔ la balentshitshi ole l’osasa.’—Kɔl. 1:11.