DJAMBA DJƐ WEKELO 10
Wɛ nkoka ‘ndjoola lonto lɔ ntondo’
‘Nyodjoole lonto lɔ ntondo la nanghedji djɛnde.’—KƆL. 3:9.
YEEMBO 29 Tɔwɛmbɛ djiina djɛso wɔlɔ (lá Otetela)
LÁ YOPASƐ *
1. Lowiko lɔko iyayalaka ngetemo lá ntondo kɛ wɛ mbanga ndjeka Bible?
LOWIKO lɔko iyayalaka ngetemo lá ntondo kɛ wɛ mbanga ndjeka Bible l’Ewakɛ wɛ Yehova? Efula l’anteyi kɛso wapakɔpɛ kaanga mvungɔ nkambo djɛsɔ. Eyalelo kɛso la lonto lɔso lakfumbwamaki má kɛnɛ kɛ nkfumbo dj’akambo djɛnɛ ntepela ente má kɛnɛ k’andja wanɛ otepelande ante kelekɔ wɔlɔ kana nyɛtshi. Ntsha iyayalende nghɔsɔ, mbɔ koko ‘tótáyaláki la nkongi edjinge la Ndjambe l’andja wanɛ.’ (Ɛfɛ. 2:12) Koko wekelo wɔ Bible w’otshikitanyɛka akambo ankfumɔ wasɔ!
2. Kɛkɔnge kɛ ngisolá winá wɔ ngatateyɛ ndjeka Bible?
2 Winá wɔ ngawange ndjeka Bible, wɛ isolaka ente olekɔ la Papa kel’olongo kɛkɔkɔpa efula. Osipisoyɛka ente ntsha wɛ nkɔpaka nsasangɛ Yehova la ndɔsa opiko lá nkfumbo k’antɛmɔdji yɛndɛ, wɛ ladjɛ nangha etshikitano wɛ djonyi lá lowiko lɔko, lá eyalelo kɛko, edjinge lá nanghedji djɛko. Wɛ oyalaka ladjɛ ndjeka djɛ mbika má nkilika ɛlɛmbɛ wɛnde.—Ɛfɛ. 5:3-5.
3. Lá nkilika Kɔlɔsɛ 3:9, 10, kɛkɔnge kɛ Yehova ɔkɔpande iso nangha, ko kɛkɔnge kɛ songoshishima lá djamba djɛnɛ?
3 Ontongi wɔso edjinge Papa kɛso kɛ l’olongo Yehova, alekɔ la lotshungɔ lɔ nshikikɛ nanghedji djɛ ase nkfumbo kɛnde oyɛwɔ ladjɛ ndjala la djɛkɔ. Edjinge nde ndɔmbaka dj’iso ndjila welo djɛ ‘ndjoola lonto lɔ ntondo la nanghedji djɛnde’ lá ntondo k’iso ndongola batisimo. * (Wala Kɔlɔsɛ 3:9, 10.) Djamba djɛnɛ ngokotshɛ wanɛ wakɔpa ndongola batisimo djɛ nkadjimola lá weepó esato wɛnɛ: 1) ‘Lonto lɔ ntondo osakisolawɔ nge’? 2) Lamo Yehova ɔtɔlɔmbande djɛ ndjoola lonto lɔ ntondo? 3) Wopo wɔkɔnge w’okokaso nangha nkambo djɛsɔ? Le anto wa l’anteyi kɛso wamboshiyɛka ndongola batisimo, wekelo wɔnɛ wongotokotshɛ dj’ipa nkalɔ lonkina tá nanghedji djɛso djɛ lonto lɔ ntondo.
‘LONTO LƆ NTONDO’ OSAKISOLAWƆ NGE’?
4. Akambo wakɔnge onto wotadjoola ‘lonto lɔ ntondo’ onanghakande?
4 Mbala efula onto wotadjoola ‘lonto lɔ ntondo’ angokanelake edjinge angonanghake akambo lá yopo yɛ lolelemba. Nde nkoka ndjala kanga lolemba, kanga ɛnkɛnkɛlɛ, lako la djedjɛ, edjinge otako. Nde nkoka nsasanga ndenda asango wɛnyɛwɔ anto enghanghunya la filmɛ y’akambo wa mbindo, kana wa lopango. Ape l’ehamo nde nkoka ndjala la wekeka amɔtshi wa wɔlɔ, edjinge nkfum’oloko kɛnde nkoka ndɔwɛmbɛ lowo winá w’otepelande kana w’onanghande akambo wa nyɛtshi. Koko nde apalekɔ la mposɛ k’efula kɛ ntshikitanyɛ nanghedji la ekanedji kɛnde.—Nga. 5:19-21; 2 Ti. 3:2-5.
Winá w’odjoolaso lonto lɔ ntondo, topangɔlɔndjɛma lonkina má djalelo la nanghedji djɛso djɛ demba (Lenda itenyi 5) *
5. Iso nkoka ndjoola lonto lɔ ntondo lá lɛdji lɔ djɔ? Sipisoyɛ (Elemo 3:19)
5 Iso topalekɔ djɔ, djɛkondeke lako onto l’ateyi kɛso wokoka nyimɛ tokanyi la mposɛ inkfumɔ yɛ nyɛtshi m’oloko kana má wɔɔngɔ wɔnde lotshindalotshinda. Lá mbamba imɔtshi, iso ntepelaka kana nanghaka nkambo mɔtshi dj’okokaso ndokiyana l’ɔkɔngɔ. (Jɛr. 17:9; Dja. 3:2) Koko winá w’odjoolaso lonto lɔ ntondo, tokanyi la nkfumbo djɛ demba djepangotɔlɔndjɛ lonkina. Nanghedji djɛ nyɛtshi djɛsɔ djepɛnyɛka lonkina wopo w’anto w’oyɛso.—Iza. 55:7; wala Elemo 3:19.
6. Lamo Yehova otokembɛnde dj’iso nyimɛ tokanyi la nkfumbo djɛ nyɛtshi djɛ lonto lɔ ntondo?
6 Yehova ntokembɛka djɛ nyimɛ tokanyi la nkfumbo djɛ nyɛtshi ladjikɛnde nde ntɔkɔpaka efula la nkombolaka dj’iso nsasanga la lowiko. (Iza. 48:17, 18) Nde ndjewaka ante wanɛ wayapɛyɛ tá mposɛ yɛ nyɛtshi ndakiyanyɛka iyɔmɛlɛ edjinge nkiyanyɛka anto ankina wadjingi. Nde ndjalaka la yɛnyi efula l’oloko winá w’ɛnande tomboyananghela nyɛtshi la tombonanghela anto ankina nyɛtshi.
7. Lá nkilika Ɔrɔma 12:1, 2, ɔsɔnɛlɔ wɔkɔnge w’oyɛso ladjɛ nangha?
7 Má bango tolongo tɔso tɔmɔtshi l’ase nkfumbo kɛso nkoka ntɔnyɔla winá w’ilaso welo djɛ ntshikitanyɛ lonto lɔso. (1 Pɛ. 4:3, 4) Iwɔ nkoka ntoshimela ambɔ tolekɔ la lotshungɔ lɔ nangha kenkfumɔ k’ɔkɔpaso la topakoke ndjawola dj’onto onkina ntoshimela kɛnɛ k’okokaso nangha. Koko wanɛ watona ɛlɛmbɛ wɛ Yehova wapalekɔ nsɔsɔlɔ la lotshungɔ lɔ nangha kenkfumɔ k’ɔkɔpawɔ. Lá nsɔsɔlɔ, iwɔ ndjawolaka djɛ andja walɔndjɛma me Satana ndaawapamela. (Wala Ɔrɔma 12:1, 2.) Isankfumɔ ladjɛ nsɔna nkambo mɔtshi: Ntshikala la lonto lɔso lɔ ntondo lɔlɔndjɛma má mpekanto la má andja wa Satana, kana ndjawola djɛ Yehova ntokomɛ anto waleka wɔlɔ w’okokaso ndjala winá wɔnɛ.—Iza. 64:8.
WOPO WƆKƆNGE W’OKOKASO ‘NDJOOLA’ LONTO LƆ NTONDO?
8. Tá okotshɔ wɔkɔnge w’okokaso ndawɛkɛ djɛ ndjewɔ tokanyi la nanghedji djɛ pɔlɔ?
8 Yehova ndjewaka ante ndɔmbamaka ndambo k’etsho la welo efula dj’iso ndjewɔ tokanyi la nkfumbo djɛ pɔlɔ. (Yee. 103:13, 14) Koko, má lotshimbo l’Otepela wɔnde, nyuma kɛnde, la olonghanyelo wɔnde, Yehova ntɔpɛyɛka balo, wolo, la osukɔ w’oyɛso la djonyi dj’iso ndatshikitanyɛ. Ape l’ehamo nde amboshiyɛka nkokotshɛ. Nyontshɔ tokoshishima winá wɔsɔ akambo amɔtshi wa kɔɔ, w’okokɛ nangha djɛ nkokotshɛ djɛ wɛ nkindjɛ ndjoola lonto lɔ ntondo edjinge nkotshɛ kɛnɛ kɛlɔmbama djɛ wɛ ndongola batisimo.
9. Otepela wɔ Ndjambe okokawɔ nkokotshɛ djɛ nangha nge?
9 Kambaka la Bible djɛ wɛ ndashishima wɔlɔwɔlɔ. Otepela wɔ Ndjambe wolekɔ etengo ilendjeyɛ, wokoka nkokotshɛ djɛ wɛ nshishima yopo y’okanelɛ, y’otepelɛ la y’onanghɛ akambo. (Dja. 1:22-25) Wetsha wɔko wɔ Bible edjinge Akristo ankina wambotshunda lá nyuma nkoka nkɔpɛyɛ ɛlɔndjɛlɔ. Ndjɔmbɔmba, iwɔ nkoka nkamba la Bible djɛ nkokotshɛ djɛ wɛ ndjewa lá akambo wakɔnge w’oyɛ wɔdju la w’oyɛ wolo. Iwɔ nkoka nkolakanyɛ wopo wɔ ndjisola avɛrse w’imá Bible wapɛyɛ alako wa djonyi walendana la wopo wɔ ndongela nanghedji djɛ pɔlɔ. Edjinge Yehova alekɔ winá enkfumɔ entshupa djɛ nkokotshɛ. Nde ndjewaka yopo yeleka wɔlɔ yɛ nkokotshɛ; nde ndjewaka kɛnɛ kelekɔ l’oloko wɔko. (Woo. 14:10; 15:11) Djɛkondeke, yala l’ekfumbo kɛ ndɔmbaka la kɛ ndjekaka Otepela wɔnde mfu inkfumɔ.
10. Olakanyelo wɔkɔnge wɔ ngombowa má kɛnɛ kekomelisa Elie?
10 Yashikikɛ ente ɛlɛmbɛ wɛ Yehova welekɔ wɔlɔ. Iso nkoka mba wapɔ lá kenkfumɔ kɛ Yehova ɔtɔlɔmbande djɛ nangha. Wanɛ wawika lá nkilika ɛlɛmbɛ wɛnde ndawɔsaka l’odjito, ndjalaka la lowiko lolekɔ l’okoma, edjinge mbaka osasa wɔ nsɔsɔlɔ. (Yee. 19:7-11) Koko lá yopo yetshikitanyi, wanɛ watona ɛlɛmbɛ wɛ Yehova nyɛnaka ndjolo l’eposelo wɛ nyɛtshi weyɛ má nanghedji dj’elemo wɛwɔ wɛ demba. Tokolenda kɛnɛ kɛ mpame kɛmɔtshi ketawɔ Elie ndatepela lá kɛnɛ kelendana la ntona ɛlɛmbɛ wɛ Ndjambe. Nde awongwamaka me ambotshi w’oka Yehova ngandji. Koko winá wɔ ndakome l’ɛnɔnyi djomi l’ɛmɔtshi, Elie asɔnaka ntombe yɛ nyɛtshi. Nde ayɛka ndoyapɛyɛ lá nnɔ nnɔ djɛ wolo, lá wayi wa mbindo edjinge lá wibi. Elie ntepelaka nyɔmɛlɛ ante ayawɛnaki djɛ amboyala ɛnkɛnkɛlɛ la lopango. Nde ndjawolaka ante: “Lananghaki kenkfumɔ kɛ meeke ente Okristo apakoke nangha.” Koko, Elie atavungɛ akambo wa ndeeke m’ɔlɛngɛ wɔnde. Ekomo ekomo, nde awangaka ndjeka Bible lonkina. Nde ananghaka la wolo djɛ ntshika nanghedji djɛnde djɛ pɔlɔ ko alongolaka batisimo l’ɔnɔnyi wɔ 2000. Ko wapɔ wɛkɔngɛ ndoowaka má mbika lá yopo y’okana l’ɛlɛmbɛ wɛ Yehova? Elie ntepelaka ante: “Winá wɔsɔ lamboyala la vu lá wɔɔngɔ edjinge la nkfum’oloko kɛ piyɔɔ.” * Etengo ndjɔmbɔmba kɛsɔ ɛnyɛwɔ, wanɛ watona ɛlɛmbɛ wɛ Yehova, ndananghelaka iyɔmɛlɛ nyɛtshi. Koko kaanga tii lá mbamba kɛsɔ, Yehova ndjawolaka ndaakotshɛ dj’iwɔ ntshikitana.
11. Akambo wakɔnge Yehova otonakande?
11 Eka djɛ ntona kɛnɛ kɛ Yehova otonande. (Yee. 97:10) Bible ntepelaka ante Yehova ntonaka ‘wiso wa lotamanyɛ, lolemi lotepela ongolo, la ɛwɔ wetshanghanyɛ ekila w’ipa la lowo.’ (Woo. 6:16, 17) Nde ‘ntonaka lonkina anto wa mpango edjinge wa lokeso.’ (Yee. 5:6) Yehova ntonaka djalelo la nanghedji djɛsɔ efula, djɛkondeke ndayake anto ankfumɔ wa nyɛtshi wa l’etsho wɛ Noe walodjisa looko l’akambo wa lopango. (Ewa. 6:13) Tokoshishima ndjɔmbɔmba kenkina. Má lotshimbo l’ɔprɔfɛtɛ Malaki, Yehova atepelaka ante Nde ntonaka anto wayaka awala la lokeso lonkfumɔ la wadji kana la wame wawɔ w’ipa la lowo. Ndjambe apawola ɔtɛmwɛlɔ wɔwɔ edjinge angoyalomboyɛ m’ɔtɛ wɔ nanghedji djɛwɔ.—Mal. 2:13-16; Heb. 13:4.
Iso ladjɛ ntona nangha nkambo mɔtshi djɛ Yehova otepelande ante dekɔ nyɛtshi etengo otonakaso ndɛ nkete djɛmbɔpɔnda (Lenda itenyi 11-12)
12. Kɛkɔnge kesakisola ‘ntona kɛnɛ kelekɔ nyɛtshi’?
12 Yehova nkɔpaka dj’iso ‘ntona kɛnɛ kelekɔ nyɛtshi.’ (Ɔrɔ. 12:9) Itepela ‘ntona’ nsakisolaka mfulɔ ekete kɛmɔtshi lá lɛdji lɔ wolo, ntepela ente ndɔsa ekete kɛkɔ etengo ekete kɛ wɛnyɛnyɛ. Kokanela wopo wɔ ngongelola ntsha wambɔkɔlɔmba djɛ ndɛ dambo mɔtshi djɛmbɔpɔnda. Ikanyi yɛ ndɛ nkete djɛsɔ toko nkoka nkɔpɛyɛ olando. Wopo wɔk’ɔmɔ ndeke, ikanyi yɛ nangha djoyi mɔtshi djɛ Yehova otepelande ante djelekɔ nyɛtshi ladjɛ ndjala wɛnyɛnyɛ leso.
13. Lamo oyɛso ladjɛ nama tokanyi tɔso?
13 Lama yimba yɛko. Tokanyi tɔso ntshindaka nanghedji djɛso. Djɛkondeke Yeso ndotolakanyɛ ante nyotone tokanyi tokoka nyotshinda djɛ nangha evunga wɛ nkekete. (Mat. 5:21, 22, 28, 29) Iso nkɔpaka nsasangɛ Papa kɛso kɛ l’olongo, ape nghɔsɔ? Lasɔ alekɔ djonyi efula iso nyimɛka mbala kɛkɔ kɛmɔ ikanyi inkfumɔ yɛ nyɛtshi yetoyela lá wɔɔngɔ!
14. Etepela wɛso ɛnyɛkawɔ nge, ko weepó wɛkɔnge woyɛso ladjɛ nkadjimola?
14 Lama lolemi lɔko. Yeso atepelaka ante: ‘Kenkfumɔ keposa m’ɔlɔmɔ ndjɛka m’oloko.’ (Mat. 15:18) Ee, etepela wɛso nyɛnyɛka papoo kɛnɛ kelekɔ l’eteyi k’oloko wɔso. Djɛkondeke yawopola weepó wɛnɛ: ‘Langotonake ntepela ongolo, kaanga ntsha ntépélá nsɔsɔlɔ nkoka ndjakala lemi ekakasano? Ntsha oyɛminde onto wombótshuká kana wombótshukáma, langoyalake la yewo dj’ipa mbetshola nsaki yɛ mpame kana omoto wopalekɔ wɔmi? Lemi ndjewɔka etepela wɛ mbindo ngo ngete onto ewɔkande olando? Lemi ndjalaka la ndakota winá w’onto ɔmɔtshi onkiyanyɛnde?’ Angoyala nkambo djɛ wɔlɔ efula wɛ ntɔnɔla lá weepó wɛsɔ. Etepela wɛko nkoka ndjɛlama l’ɔtɛlɛlɔ wɔ ntshɛndja. Ntsha wɛ nangha la wolo djɛ nyimɛ tokanyi tɔ pɔlɔ, t’ongolo edjinge etepela wɛ mbindo lá wamba wako, angoyala wɔdju lewɛ djɛ ndjoola lonto lɔ ntondo.
15. Kɛkɔnge kesakisola nkɔkɔmɛ lonto lɔso lɔ ntondo sɛti ‘l’otamba’?
15 Yala entshupa djɛ nangha kenkfumɔ kɛlɔmbama. Ɔpɔstɔlɔ Poolo akambaka la etepela wɛ wolo wɛ djingingi ngo djɛ ntɛnyɛ lamo oyɛwɔ djonyi iso nangha la wolo wɔso onkfumɔ djɛ ntshikitanyɛ yopo yɛso yɛ lowiko. Nde afunaka ante: Iso ladjɛ nkɔkɔmɛ lonto lɔso lɔ ntondo sɛti ‘l’otamba.’ (Ɔrɔ. 6:6) L’etepela enkina, iso nkɔpaka nkilika ndjɔmbɔmba kɛ Kristo. Nde ayalaka entshupa djɛ mpanyema l’otamba ngo djɛ nsasangɛ Yehova. Wopo wɔk’ɔmɔ ndeke, iso ladjɛ ndjala entshupa djɛ ntshika djalelo la nkfumbo djepasasangɛ Yehova. Ngo iso nangha akambo wasɔ ko iso ndjala la nkfum’oloko kɛ piyɔɔ edjinge nkongi djɛ ndowa lowiko l’etshinda. (Dj. 17:3; 1 Pɛ. 3:21) Tovungɔ ente Yehova apangotshikitanyɛ ɛlɛmbɛ wɛnde djɛ ntosasangɛ. Koko ayale wopo wɔkɔnge woyɛso, iso ndeke lokoka ntshikitanyɛ lonto lɔso ko ndafɛnyɛ l’ɛlɛmbɛ wɛnde.—Iza. 1:16-18; 55:9.
16. Lamo oyɛ ladjɛ ndɔsa nkano djɛ nkindjɛ nana la mposɛ yɛ nyɛtshi?
16 Kindjɛ nana la mposɛ yɛ demba. Kaanga m’ɔkɔngɔ wɔ wɛ ndongola batisimo, wɛ ladjɛ nkindjɛ nana la mposɛ yɛ demba. Tokokanela kɛnɛ kekomelisa mpame kɛmɔtshi k’etawɔ Maurício. Winá wɔ ndayalaka ilɛngɛ, nde atateyɛka nangha wayi wa ntshɛngi la winande ampame. L’ekomo, nde ayɛka ndopomana nya Ewakɛ wɛ Yehova ko atateyɛka ndjeka Bible. M’ɔkɔngɔ wɔ nde nangha etshikitano lá lowiko lɔnde, nde alongolaka batisimo lá 2002. Kaanga winá wɔsɔ ndombokambela Yehova l’ilá k’ɛnɔnyi efula, Maurício ntepelaka ante: “Lemi ladjɛ ndjawola ente láyáláki ladjɛ nana la mposɛ yɛ nyɛtshi winá la winá.” Nde atalɛmba. Koko, nde atepelaka ante: “Mbaka lokembo má ndjewa ente winá w’ɔsɔnami dj’ipa nkilika mposɛ yɛ nyɛtshi yɛsɔ, lemi nkoka nsasangɛ Yehova.” *
17. Kɛkɔnge kekokembɛ lá kɛnɛ kekomelisa Nabiha?
17 Lɔmba Yehova akokotshɛ edjinge yawɛkɛ tá nyuma kɛnde, koko ape ta wolo wɔko nghɔmɛlɛ. (Nga. 5:22; Flp. 4:6) Iso ladjɛ ndjila welo ntsha iso nkombolaka ndjoola lonto lɔso lɔ ntondo la ipa ndɔlɔta lonkina. Tokoshishima ndjɔmbɔmba kɛ omoto ɔmɔtshi wetawɔ Nabiha. Papa kɛnde okadjɛka winá wɔ ndayalaka ngo l’ɛnɔnyi esamalo toko. Nde ntepelaka ante: “Nkambo djɛsɔ djɛmpɛyɛka paa efula.” Winá wɔ ndafule, Nabiha akomaka ɛnkɛnkɛlɛ la lopango efula. Nde atateyɛka nsadjɛ nnɔ nnɔ djɛ wolo, wovundaka ko ahetshɛka ɛnɔnyi ɛmɔtshi lá lokando. Ewakɛ wɛ Yehova wetshɔki ntopoposanyɛ lá lokando wawangaka ndjeka lande Bible. Nabiha awangaka nangha etshikitano wɛ nkekete. Nde ntepelaka ante: “Ayalaka wɔdju le lemi djɛ ntshika djalelo djɛmi mɔtshi djɛ nyɛtshi. Koko ntshika nnɔ ikaya ayalaka okakasano w’ekekete efula le lemi.” Nabiha ananaka l’ekfumbo kɛ nnɔ ikaya kɛsɔ ndekana ɔnɔnyi ɔmɔ ko l’ekomo ayɛka ndotshika nnɔ ikaya. Ndananghe ngetemo? Nde ntepelaka ante: “Nkambo djeleka djonyi nde alɔmbɛlɔ wa mbala la mbala te Yehova ndeke lonkotshisa djɛ ntshika.” Winá wɔsɔ nde aloshimela anto ankina ante: “Ndekɔ l’eshikikelo ente ntsha lemi nanghaka etshikitano djɛ nsasangɛ Yehova, mbɔ koko onto onkina onkfumɔ nkoka nangha!” *
WƐ NKOKA NKOTSHƐ KƐNƐ KƐLƆMBAMA DJƐ NDONGOLA BATISIMO!
18. Lá nkilika 1 Kɔrɛtɔ 6:9-11, kɛkɔnge kɛ enkambi wɛ Ndjambe efula iyayale l’akoka wa nangha?
18 L’ɛtɛndɔ kɛ ntondo, ampame la amato amɔtshi wa Yehova ndasɔnɛ djɛ ntɔlɔndjɛ esanga la Kristo l’olongo wayalaki ntondo mfumbe yɛ nanghedji djɛ nyɛtshi efula. Ndjɔmbɔmba, iwɔ wayalaki anto wa nseka, wananghaki wayi wa mbindo wa ntshɛngi lantenyɛ mpame la mpame kana omoto l’omoto, edjinge wa wibi. Koko m’okotshɔ wɔ nyuma k’ekina kɛ Ndjambe, iwɔ watshikitanyɛka lonto lɔwɔ. (Wala 1 Kɔrɛtɔ 6:9-11.) Wopo wɔk’ɔmɔ ndeke lɔɔko kɛnɛ, Bible mbokotshɛ miliyɔ y’anto djɛ nangha etshikitano lá mbiko yɛwɔ. * Iwɔ watshikaka nanghedji djeyalisa wolo efula djɛ ntshika. Ndjɔmbɔmba kɛwɔ nyɛnyɛka ente kaanga wɛ nkoka nangha etshikitano lá lonto lɔko edjinge ndongela nanghedji djɛ pɔlɔ ko nkotshɛ kɛnɛ kɛlɔmbama djɛ ndongola batisimo.
19. Kɛkɔnge kɛ sɔngɛna lá djamba djeyaye?
19 Má djiko djɛ nangha la wolo djɛ ndjoola lonto lɔ ntondo, wanɛ wakɔpa ndongola batisimo ladjɛ ndjila welo djɛ ntshikala la lonto lɔ bango. Djamba djeyaye ngotepela wopo w’okokaso nangha nkambo djɛsɔ la wopo w’anto ankina okokawɔ ntokotshɛ.
YEEMBO 41 Lambɔkɔwɔnda oka lɔlɔmbɔ lɔmi (lá Otetela)
^ par. 5 Djɛ nkotshɛ kɛnɛ kɛ lɔmbama djɛ ndongola batisimo, iso ladjɛ ndjala entshupa djɛ nangha etshikitano lá lonto lɔso. Djamba djɛnɛ ngotokotshɛ djɛ nyɛna nanghedji djɛkɔnge djekfumbaka lonto lɔ ntondo, lamo oyɛso ladjɛ ntshika nanghedji djɛsɔ, edjinge wopo w’okokaso nangha nkambo djɛsɔ. Djamba djɛwɔlama ngɛnyɛ wopo w’okokaso nkindjɛ ndɔta lonto lɔ bango, kaanga m’ɔkɔngɔ w’iso ndongola batisimo.
^ par. 3 DJƐ NDJOKA WƆLƆ: ‘Ndjoola lonto lɔ ntondo’ nsakisolaka nyimɛ nanghedji la mposɛ yepasasangɛ Yehova. Iso ladjɛ ntateyɛ nangha nkambo djɛsɔ lá ntondo k’iso ndongola batisimo.—Ɛfɛ. 4:22.
^ par. 10 Djɛ ndjewa akambo ankina efula walendana la Elie lenda djamba djelekɔ l’ɔtɛ wɔ djoyi ante: “Bible ntshikitanyɛka mbiko—‘Nyɛnaka djonyi djɛ nkalɔ te Yehova,’” djéposisa lá Etange k’Olami kɛ Ngɔndɔ k’anɛyi 1, 2012. (lá Otetela)
^ par. 16 Djɛ ndjewa akambo ankina efula walendana la wɔnanyɔ Maurício, lenda djamba djelekɔ l’ɔtɛ wɔ djoyi ante: “‘Ils m’ont parlé avec bonté,’” djeposisa lá Etange k’olami kɛ Ngɔndɔ k’atano 1, 2012. (lá falase)
^ par. 17 Djɛ ndjewa akambo ankina walendana la nkaana Nabiha, lenda djamba djelekɔ l’ɔtɛ wɔ djoyi ante: “Bible ntshikitanyɛka mbiko—‘Lemi layalaki oseka wɔ ɛnkɛnkɛlɛ la wɔ lopango,’” djeposisa lá Etange k’Olami kɛ Ngɔndɔ kɛ djomi 1, 2012. (lá Falase)
^ par. 18 Lenda ipapango “ Bible ntshikitanyɛka mbiko.”
^ par. 64 NSAKISO Y’ASANGO : Ndjoola djalelo la nanghedji djɛ pɔlɔ alekɔ etengo ndjoola esendja k’obusu.
