Anto amɔtshi wáwálá ɔkɔndɔ wɔsɔ lankelankeke ndawopolaka woopó wɔsɔ. Koko vɛrse djɛsɔ ntepela nkambo dj’ampame ipe yetshikitanyi yeyalaki ngo la djiina mmɔ Mefibɔshɛtɛ, edjinge iso nkoka mba olakanyelo ɔmɔtshi má nshishima nkambo mɔtshi djehetisá

Sawolo Nkfumi k’Isariyɛlɛ ayalaka la wana esambele w’ampame la w’amato ape. Wɔna Sawolo wɔ ntondo nde Jɔnata. L’ɔkɔngɔ, nkfumi Sawolo awotaka ny’oshile wɔnde Rizipa wɔna mpame wɔ ndadjɔ djiina Mefibɔshɛtɛ. Nkambo djɛ nkamɔ nde, Jɔnata koko awotaka wɔna mpame wɔ ndadjɔ djiina Mefibɔshɛtɛ. Djɛkondeke, Nkfumi Sawolo ayalaki la wɔna mpame w’iyetaka Mefibɔshɛtɛ la onkana wɔ mpame woyalaki la djiina djɛkɔ mmɔ Mefibɔshɛtɛ.

Lá mbamba kɛmɔtshi, Nkfumi Sawolo okaka ase Ngibiyɔna w’intansɛki l’Isariyɛlɛ nkɛlɛ ko ahonaka ndaayaka yankfumɔ. Nyɛnamaka etengo, efula l’anteyi kɛwɔ wayakemaka. Ɔsɔ ayalaka nsɔsɔlɔ nkambo djɛ nyɛtshi efula. Lamo? Ladjikɛnde l’etsho wɛ Yosua, tɔlɔndjɛ t’ase Isariyɛlɛ wananghaka isambi yɛ vu iwɔ l’ase Ngibiyɔna.—Yos. 9:3-27.

Isambi yɛsɔ yayalaki wolo tii l’etsho wɛ Nkfumi Sawolo. Koko lá lɛdji l’otshikitanyi l’isambi yɛsɔ, nkfumi ɔsaka nkano djɛ ndjaka ase Ngibiyɔna ankfumɔ. Eposelo weyalisa la nkambo djɛsɔ nde, ‘Sawolo nya ase mvulu kɛnde wawɛmbaka lowo l’ekila.’ (2 Sa. 21:1) L’ɔkɔngɔ, Davidɛ ayɛka ndoyala nkfumi. Ase Ngibiyɔna watshikalisa la lowiko w’oshimelaka nyɛtshi k’ekekete kɛsɔ. Davidɛ áwópolaka kɛnɛ kekokisa nanghema djɛ ndjipa nyɛtshi kenanghisa Sawolo kɛsɔ la mpɛyɛ owila mbamba kɛ Yehova ndaatshɔkɔla. L’edjena kɛ ndɔmba mfalanga, ase Ngibiyɔna walɔmbaka djɛ wana esambele wa mpame kehonisa ndashiyɛ yankfumɔ kɛsɔ ‘mpanyema l’otamba’ edjinge ndjakema. (Ew. 35:30, 31) Davidɛ ananghelaka kɛnɛ kɛ yɔlɔmbɛ.—2 Sa. 21:2-6.

Lasɔ ko, Sawolo nya Jɔnata wamboshiyɛka mvɔ lá mbandji, koko Mefibɔshɛtɛ kɛ wɔna Jɔnata ayalaki la lowiko. Nde akomaka ekfuse m’ɔlɛngɛ wɔnde m’aksida w’indananghe edjinge nde lako nsuka ndoyi kɛnde lá mbandji kɛ ndananyɛka ase Ngibiyɔna. Davidɛ ananghaka isambi nya ilongo yɛnde Jɔnata, isambi yeyalisa la wapɔ tii te tonkanola tɔnde ndjila edjinge te Mefibɔshɛtɛ kɛ wɔna Jɔnata. (1 Sa. 18:1; 20:42) Ɔkɔndɔ ntepelaka ante: ‘Nkfumi Davidɛ okaka Mefibɔshɛtɛ kɛ wɔna Jɔnata djɛ wɔna Sawolo nkɛtshi, m’ɔtɛ wɔ etshibelo kɛ ndatshibe lá ntondo kɛ Yehova.’—2 Sa. 21:7.

Koko, Davidɛ ananghaka kɛnɛ k’ase Ngibiyɔna yɔlɔmbɛ. Nde apanyɛka wana ape wa Sawolo l’otamba, ɔmɔtshi djiina djɛnde nde Mefibɔshɛtɛ la ankana atano wa Sawolo. (2 Sa. 21:8, 9) Kɛnɛ kɛ Davidɛ ndananghe kɛsɔ kekomɛka lowo l’ekila loyalaki la owila.

Ɔkɔndɔ wɔnɛ w’opalekɔ ngo djamba dj’anyanya toko, koko wotolakanyɛ akambo efula. Ɔlɛmbɛ wɔ Ndjambe woyalaka papoo. W’otepelaka ante: ‘Wana wapakoke ndjakema má kɛnɛ kenánghá ambotshi wawɔ.’ (Mvu. 24:16) Yehova atasamba ndjawola kɛnɛ kɛ yananghela wana ape wa Sawolo la ankana wande atano kɛsɔ ntsha iwɔ watayala la lowo. Ɔlɛmbɛ wɔkɔ nkotshɛka ante: ‘Onto ladjɛ ndjakema ngo l’ɔtɛ wɔ mpekanto kɛnde nyɔmɛlɛ.’ Nyɛnamaka etengo wana ape la ankana atano wa Sawolo wavwisa wasɔ w’ingelaka l’iseke yɛ Sawolo yɛ ndjaka ase Ngibiyɔna ankfumɔ. Eposelo weyalisa la nkambo djɛsɔ nde, anto esambele wasɔ wavɔka má nyɛtshi kɛwɔ kɛ yananghe.

Ɔkɔndɔ wɔsɔ nyɛnyɛka ante, onto apakoke nyimeyama nyɛtshi kɛ ndananghe má nkanela kana ntepela ante ndananghe ngo kɛnɛ k’iyoshimala djɛ nangha. Djongo mɔtshi ntepelaka ante: ‘Wɔngɛ mboka k’ekolo wɛko, ko mboka yɛko inkfumɔ ingosembɔ sii.’—Woo. 4:24-27; Ɛfɛ. 5:15.