1. Osasa wɔkɔnge woyɛso la wɔkɔ?

TOLEKƆ nsɔsɔlɔ la mpeyi kɛ ndjala anto wa l’otshumano wɔ Yehova! Iso tolekɔ lá paradiso kɛ lonyuma kembolola kfu l’anto wa m’vu edjinge w’osasa. Olekɔ la ntshina l’otshumano?

2. Ndjɔmbɔmba kɛkɔnge kekambisa ɔpɔstɔlɔ Poolo l’enkanda wɛnde windafune má okotshɔ wɔ nyuma k’ekina?

² Iso nkoka ndjeka wayi efula lá n’kambo n’tshɔ má ndjɔmbɔmba kekambisa l’ɔpɔstɔlɔ Poolo lá efula k’enkanda wɛnde windafune má okotshɔ wɔ nyuma k’ekina. L’enkanda wɛsɔ enkfumɔ, Poolo ɛdjɛka otshumano la demba dj’onto. Nde ɛdjɛka lonkina anto wal’otshumano la n’tenyi djɛ demba dj’onto.​—Ɔrɔ. 12:4-8; 1 Kɔ. 12:12-27; Ɛfɛ. 4:16.

3. Elakanyelo wɛkɔnge esato wɔkɔpaso ndjeka lá djamba djɛnɛ?

³ Lá djamba djɛnɛ, tongeka elakanyelo esato wɛ djonyi wokokasomba má ndjɔmbɔmba kekambisa la Poolo. Wɔ ntondo, tongeka lɔ ente onto onkfumɔ alekɔ la ntshina * l’otshumano wɔ Yehova. W’epe, tɔngɛna lɔ wopo woyɛso ladjɛ nangha ntsha tomboyala l’okakasano djɛ ndembetela ente tolekɔ la mpipo edjinge la ntshina l’otshumano. Edjinge w’asato, tɔngɛna lɔ ladjikɛnge oyɛwɔ djonyi nkindjɛ ndjala l’akambo efula wa nangha lá otshumano wɔ Ndjambe.

4. Olakanyelo wɔkɔnge isombowa má Ɔrɔma 12:4, 5?

⁴ Olakanyelo wɔ ntondo woyɛso ladjɛ mba má djɔmbɔmba kekambisa la Poolo nde, onto onkfumɔ wɔ l’anteyi kɛso alekɔ  la mpipo kɛ ntshina lá nkfumbo kɛ Yehova. Poolo awanga la ndjɔmbɔmba kɛnde kɛnɛ ante: ‘Ngo ngete oyɛso la n’tenyi djɛ demba efula la demba mɔ, koko n’tenyi djɛ demba djɛkɔ m’pakambe olemo ɔmɔ, wopo wɔkɔ ɔmɔ ndeke, kaanga oyɛso efula koko tolekɔ demba mɔ esanga la Kristo, koko le onto l’onto, tolekɔ n’tenyi djɛ demba djembosanghana esanga.’ (Ɔrɔ. 12:4, 5) Olakanyelo wɔkɔnge w’owaso me Poolo? Onto onkfumɔ wɔ l’anteyi kɛso alekɔ la mpipo ketshikitanyi l’otshumano, kaanga oyɛwɔ nghɔsɔ onto onkfumɔ alekɔ la ntshina.

5. ‘Epapɛyɛ’ wɛkɔnge Yehova ndɔtɔpɛyɛ l’otshumano?

⁵ Wina wokanelɛ n’kambo djɛ walekɔ la mpipo l’otshumano, yimba yɛko ntshɔka mbala kɛkɔ kɛmɔ te waalɔndjɛ. (1 Te. 5:12; Heb. 13:17) Alekɔ nsɔsɔlɔ ngo má lotshimbola lɔ Kristo, Yehova apɛyɛka otshumano Wɔnde ‘ampame yɛ ngete epapɛyɛ.’ (Ɛfɛ. 4:8) Lanteyi kɛ ‘ampame yelekɔ ngete epapɛyɛ’ yɛsɔ ndeke olekɔ edjinge Iloyi-ilɔndjɛ, enkambi wekotshɛ Iloyi-ilɔndjɛ, ase Kɔmite kɛ filialɛ, anami w’edjingadjinga, wetsha w’ankalasa y’ɔlonganyelo, tokokolo tel’otshumano edjinge wakotshɛ tokokolo. Wananyɔ wasɔ ankfumɔ nsɔnamaka me nyuma k’ekina djɛ nama ɛnkɔkɔ wɛ Yehova wɛ n’tsho edjinge nkambaka lá wapɔ w’otshumano.​—1 Pɛ. 5:2, 3.

6. Lá nkilika 1 Tesalɔnikɛ 2:6-8, wananyɔ wambɔsɔnama me nyuma k’ekina ndakelembɛka djɛ nangha nge?

⁶ Wananyɔ nsɔnamaka me nyuma k’ekina djɛ mbɛmba edjito wetshikitanyi. Ngo ngete n’tenyi djɛ demba djetshikitanyi, ndjɔmbɔmba, ɛwɔ la ekolo okambawɔ lá wapɔ wɔ demba dj’otondo, nghɔsɔndeke, edjinge wananyɔ wasɔnamisa me nyuma k’ekina nkambaka olemo wɔ wolo lá wapɔ w’otshumano onkfumɔ. Iwɔ wapahonaka lumo lɔwɔ iyɔmɛlɛ. Koko iwɔ nanghaka la wolo djɛ nkeketshɛ wananyɔ la wankaana yɛwɔ. (Wala 1 Tesalɔnikɛ 2:6-8.) Lokasa le Yehova lá wopo wɔ ndɔtɔpɛyɛ ampame yelekɔ l’akoka wa lonyuma edjinge walekɔ la yimba yɛ ndasambɛ!

7. Esako wɛkɔnge wewa efula k’anto kelekɔ l’olemo wa n’tena nkfumɔ?

⁷ Ase otshumano amɔtshi nsɔnamaka etengo wa misiɔnɛrɛ, tatekalo totshikitanyi kana tatekalo tɔlotshinda. Lá nsɔsɔlɔ, wananyɔ la wankaana yel’andja w’otondo ndɔsaka olemo wipoposanyɛ edjinge wɔ nkfumba anto ambeki ngete olemo wɔ n’tena nkfumɔ wɔ lowiko lɔwɔ l’otondo. Lonanghawɔ nghɔsɔ, iwɔ wambokotshɛ anto efula dj’iwɔ ndjala ambeki wa Kristo Yeso. Kaanga ankambi welá n’tena nkfumɔ wasɔ iyopakotshi n’kete djela ndemba efula, Yehova ndapɛyɛka lowiko lombolola kfu la esako. (Mar. 10:29, 30) Iso ndɔsaka wananyɔ la wankaana yɛso yɛsɔ la n’tsho, edjinge tolekɔ la lowando lá wopo woyalawɔ lá n’tshumano!

8. Ladjikɛnge nsakodji kenkfumɔ kɛ losango lɔ wɔlɔ alekɔ ngo la ntshina le Yehova?

⁸ Lasɔ wananyɔ wambɔsɔnama wasɔ edjinge wálekɔ l’olemo wɔ n’tena nkfumɔ toko ndeke la ntshina l’otshumano? Lako! Nsakodji k’enkfumɔ kɛ losango lɔ wɔlɔ alekɔ la ntshina le Ndjambe edjinge l’otshumano. (Ɔrɔ. 10:15; 1 Kɔ. 3:6-9) Lá nsɔsɔlɔ, okoma ɔmɔtshi woleka djonyi le ase otshumano oyɛwɔ nde, nkomɛ anto ambeki wa Nkfumi kɛso Yeso Kristo. (Mat. 28:19, 20; 1 Ti. 2:4) Anto ankfumɔ wal’otshumano, ayale ansakodji yembobatisama kana watabatisama ladjɛ nangha la wolo djɛ mpetshɛ olemo wɔsɔ lá etena kɛ ntondo.​—Mat. 24:14.

9. Ladjikɛnge ɔsaso wankaana yɛso la ntshina?

⁹ Yehova mpɛyɛka wankaana y’Akristo mpipo yɛ lomo lá otshumano. Nde ndɔsaka wamato wambotshukama, walekɔ la wana, wadji w’edjo edjinge wankaana yɛso yɛ m’polo yokambela la n’kɔmano la ntshina. Afunelo  ntepelaka mbala efula n’kambo djɛ wamato wayalaki la n’kfumbo djɛ wɔlɔ djesasangɛki Ndjambe. Iwɔ nkokaka mba lowando la wopo wɛnyɛwɔ ndjɔmbɔmba yɛwɔlɔ y’anto wayalaki la yimba, djawo, osasalo, oloko wolo, lokapo edjinge nanghedji djɛ wɔlɔ. (Luka 8:2, 3; Ele. 16:14, 15; Ɔrɔ. 16:3, 6; Flp. 4:3; Heb. 11:11, 31, 35) Tolekɔ la lowando le Yehova lá wopo woyɛso lá n’tshumano djɛso, la wamato w’Akristo walekɔ la wekeka wa wɔlɔ wa nghɔsɔ!

10. Ladjikɛnge ɔsaso n’kokolo djembotshunda la ntshina?

¹⁰ Tolekɔ lonkina l’osasa efula wɔ ndjala la n’kokolo djembotshunda l’anteyi kɛso. N’tshumano mɔtshi dekɔ la wananyɔ la wankaana yembotshunda koko wakambela Yehova ngo la nkɔmano lá lowiko lɔwɔ l’ontondo. Nkoka ndjala n’kokolo mɔtshi wambeka akambo wa nsɔsɔlɔ ngo entshupa. Ayale kaanga wambekaka akambo wa nsɔsɔlɔ ila kana lako, nkoka ndjala walekɔ l’ekakasano wopomanawɔ wawilela enkeka wɛ wopo la wopo welendana la lotshundo. Ekakasano wɛsɔ nkoka ndawilela elelo lá wopo wokokawɔ nangha olemo l’otshumano edjinge l’olemo wipoposanyɛ. Koko, n’kokolo djɛsɔ nanghaka kɛnɛ k’oyɛwɔ ladjɛ nangha l’olemo wipoposanyɛ edjinge iwɔ n’kambaka la wolo wɔwɔ onkfumɔ djɛ nkeketshɛ edjinge nkfumba anto ankina! Edjinge iso mbaka wapɔ má balo djɛwɔ. Iwɔ walekɔ nsɔsɔlɔ mbɔngi wɔlɔ lá wiso wa Yehova edjinge lá wiso waso.​—Woo. 16:31.

11-12. Wopo wɔkɔnge ngakeketshama me dangala l’eseka wel’otshumano wɔnyu?

¹¹ Tokokanela n’kambo djɛ dangala la eseka wɛso. Iwɔ mpomanaka l’ekakasano efula wina wiyotafule l’andja walɔndjɛma me Satana Djabolo edjinge wina wotshindamawɔ la tokanyi tɔ nyɛtshi tɔ filozofi. (1 Dj. 5:19) Koko, iso isankfumɔ n’keketshamaka wina wɛnaso dangala wapɛyɛ wa kɔmatɛrɛ lá nsanghanyɛ, wa poposanyɛ edjinge wasuka djawo djɛwɔ la oloko wolo onkfumɔ. Nsɔsɔlɔ, dangala nyolekɔ la mpipo kɛ ntshina efula l’otshumano wɔ Yehova!​—Yee. 8:2.

¹² Koko wananyɔ la wankaana imɔtshi, ndjalaka l’okakasano djɛ ndjawola ambɔ walekɔ la ntshina l’otshumano. Kɛkɔnge kekoka ntokotshɛ  dj’iso ndaawoka ente tolekɔ la ntshina lá otshumano? Nyontshɔ tolende.

13-14. Ladjikɛnge anto amɔtshi okanelawɔ ambɔ wapalekɔ la ntshina l’otshumano?

¹³ Tokolenda olakanyelo w’ape wokokaso mba má ndjɔmbɔmba kɛ Poolo ndɔshi. Nde asepaka yimba yɛnde l’ekakasano wepomana l’anto efula lɔɔko; iwɔ ndjalaka l’okakasano djɛ ndjawola ambɔ walekɔ la ntshina l’otshumano. Poolo afunaka ante: ‘Ntsha lokolo angotepela ante, ‘Ladjikɛnde lemi mpalekɔ lɔwɔ, lemi mpalekɔ etenyi kɛ demba,’ oyɛwɔ mo, má n’kambo n’tshɔ lopalekɔ etenyi kɛ ndemba? Edjinge ntsha n’toyi angotepela ante, ‘Ladjikɛnde mpalekɔ n’tsho, lemi lako etenyi kɛ demba,’ oyɛwɔ mo má n’kambo n’tshɔ ndjepalekɔ etenyi kɛ ndemba?’ (1 Kɔ. 12:15, 16) Olakanyelo wɔkɔnge Poolo ndakɔpɛ ntɔpɛyɛ?

¹⁴ Ntsha omboyawɛdjɛ l’anto walekɔ l’otshumano wɔko, okoka nkanela ente opalekɔ la ntshina l’otshumano. As’otshumano amɔtshi walekɔ wetsha wɛ nsɔsɔlɔ efula, anto wewa ndɔnga akambo wɔlɔ kana anami walekɔ la balo. Mbala imɔtshi wɛ nkoka ndaawoka djɛ opalekɔ l’akoka wa nangha akambo ngete iwɔ. N’kambo n’tshɔ nyɛnyɛka ente wɛ olekɔ la okitshakitshɛ edjinge wɛ ndjewaka elelo wɛko. (Flp. 2:3) Kaanga oyɛwɔ nghɔsɔ, ngo wɛ mbadjɛ. Ntsha wɛ ndawɛdjɛka wina okfumɔ l’anto walekɔ l’akoka watshikitanyi, n’kambo n’tshɔ nkoka nkɔlɛmbɛ. Okoka ndawoka ngete Poolo ndafune djɛ opalekɔ la ntshina l’otshumano. Kɛkɔnge kekoka nkokotshɛ djɛwɛ nyimɛ tokanyi tɔ nghɔsɔ?

15. Lá nkilika 1 Kɔrɛtɔ 12:4-11, kɛkɔnge koyɛso ladjɛ ndjewa la kɛnɛ kelendana la epapɛyɛ w’owaso?

¹⁵ Tokolenda n’kambo djɛnɛ: Yehova apɛyɛki Akristo amɔtshi wa l’ɛtɛndɔ kɛ ntondo opapɛyɛ wɔ nangha ansese má lotshimbo lɔ nyuma k’ekina, koko ape Akristo ankfumɔ ndeke loyalisa la opapɛyɛ wɔsɔ. (Wala 1 Kɔrɛtɔ 12:4-11.) Yehova apɛyɛka onto l’onto opapɛyɛ edjinge akoka watshikitanyi, koko, kaanga oyɛwɔ nghɔsɔ Okristo onkfumɔ alekɔ la ntshina. Lɔɔko kɛnɛ, iso lako la mbamba kɛ  nangha ansese má wolo wɔ nyuma k’ekina. Koko ikfɔ yɛsɔ ilekɔ djonyi edjinge lɔɔko kɛnɛ. Nkokandjala ko iso topalekɔ l’akoka wakɔ amɔ, koko isankfumɔ tolekɔ la ntshina lá ntondo kɛ Yehova.

16. Dako djɛkɔnge ɔpɔstɔlɔ Poolo ndapɛyɛ djoyɛso ladjɛ nkamba la djɛkɔ?

¹⁶ Dj’ipa ndawɛdjɛ l’Akristo ankina, iso ladjɛ n’kamba la dako djɛpɛyamisa me ɔpɔstɔlɔ Poolo djetepela ante: ‘Onto l’onto ashishime naghedji djɛnde nyɔmɛlɛ, ko nde angoyala la okoma wɔ nsaasanga la kɛnɛ konanghande nyɔmɛlɛ, koko ape ndawɛdjɛ l’anto ankina.’​—Nga. 6:4.

17. Wopo wɔkɔnge okokaso mba wapɔ má ndjɔmbɔmba kɛ Poolo?

¹⁷ Ntsha iso ndjawola dako djɛ Poolo djefunamisa má okotshɔ wɔ nyuma edjinge nshishima nanghedji djɛso, mbɔkoko iso nkoka nyɛna djɛ tolekɔ l’akoka amɔtshi w’anto ankina iyopakotshi. Ndjɔmbɔmba, nkoka ndjala ikokolo imɔtshi lako l’opapɛyɛ wɔ ndakanyɛ wɔlɔ wina woyalande lá ɛstradɛ, koko mbala imɔtshi nde ndjewaka olemo wɔ nkfumba anto ambeki efula. Kana nde apalekɔ onto wewa ndɔnga akambo wɔlɔ djɛ nkotshɛ anto etengo tokokolo tonkina tel’otshumano wɔwɔ, koko nde alekɔ ikokolo y’ewa ndjila anto lá demba la yɛ ngandji efula edjinge ansakodji wap’engenga djɛ nsukana tende djɛ mpona alako má Afunelo. Kana nkoka ndjala ko nde alekɔ la lomo l’onto wɔ wɔlɔ w’ewa ndongola anto. (Heb. 13:2, 16) Ntsha tɔmbɛna papoo akoka wokotshɛso, mbɔkoko tongosasanga la kɛnɛ kokokaso nangha l’otshumano. Edjinge topangokombola wananyɔ walekɔ l’akoka watshikitana la waso.

18. Wopo wɔkɔnge okokaso nfudjɛ akoka waso wa ndakanyɛ?

¹⁸ Kanga mpipo kɛkɔnge kokotshɛ l’otshumano, isankfumɔ ladjɛ nkombola djɛ ndeka ndalɔngɔsɔla l’olemo wɔso edjinge nfudjɛ akoka waso. Djɛ ntokotshɛ dj’iso ndalɔngɔsɔla l’olemo, Yehova ntokfumbaka wɔlɔ efula má lotshimbo l’olonghanyelo wɔnde. Ndjɔmbɔmba, lá losanghanyɛ lɔ l’anteyi kɛ lobengo iso nkfumbamaka la wopo woyɛso ladjɛ nangha djɛ ndjala l’akoka efula l’olemo w’ipoposanyɛ. Iya wɛ ongowake wapɔ enkfumɔ wima nonghanyi k’okfumbelo kɛsɔ?

19. Wopo wɔkɔnge okokɛ nangha djɛ nkotshɛ kɛnɛ kɛlɔmbama djɛ ndjingela lá Nkalasa k’esambisha wɛ Onkfumi?

¹⁹ Nkalasa k’Esambisha wɛ Onkfumi kelekɔ nonghanyi kenkina kɛwɔlɔ efula k’okfumbelo. Nkalasa yɛsɔ inanghemaka n’kambo djɛ wananyɔ la wankaana yelekɔ lá olemo wɔ n’tena nkfumɔ la walekɔ l’ɛnɔnyi má 23 tá 65. Wɛ nkoka nyɛna djɛ opongokoka nkotshɛ okoma wɔsɔ. Koko l’idjena yɛ wɛ nangha listɛ lɔ donga djɛngopakoke ndjingela, nangha listɛ lɔ donga djɔkɔpɛ ndjingela. M’eteyi, nangha ehonelo wengokokotshɛ djɛ nkotshɛ wayi wɔlɔmbawɔ. La okotshɔ wɔ Yehova edjinge la welo w’efula wɛ ngongila, wɛ ongonangha akambo wangete ape wɛ ndeke lonanghisa.

20. Olakanyelo wɔkɔnge w’owaso má Ɔrɔma 12:6-8?

²⁰ Olakanyelo w’asato woyeso ladjɛ mba má ndjɔmbɔmba kɛpɛyisa Poolo wolekɔ lá Ɔrɔma 12:6-8. (Wala.) Poolo ambɛnyɛ lonkina lanɛ djɛ anto walekɔ l’otshumano walekɔ l’epapɛyɛ wetshikitanyi. Koko nde ambɔkɔkɔmɛ dj’iso ladjɛ n’kamba l’opapɛyɛ onkfumɔ wokotshɛso djɛ nkeketshɛ otshumano.

21-22. Olakanyelo wɔkɔnge wokokasomba me Robert nya Felice?

²¹ Tokolenda ndjɔmbɔmba kɛ wɔna nyɛnghɛso Robert. M’ɔkɔngɔ wɔnde nkamba lá owila onkina, wayɛka ndotoma djɛnde ntokamba lá Betɛlɛ kelá owila wɔwɔ. Kaanga iyopakisola  ambɔ wapotshikitanyisa olemo má ovunga, owe ɔmɔtshi windananghe, nde atepelaka ante: “Ngɔndɔ efula ntshutshɛka osasa lá wopo wɔ makanelaka ente watshikitanyɛka olemo lá wopo wɔ motakamba olemo wɔlɔ. Lá wina ɛmɔtshi, nkɔpaka ntshika olemo wɔ lá Betɛlɛ.” Wopo wɔkɔnge ndowaka osasa lonkina? Winande ikokolo imɔtshi ovungulaka ante Yehova atokfumbaka l’olemo onkfumɔ wisakambe ntondo dj’iso ndeka ndjala l’olemo wokambaso etsho wɛnɛ. Robert asipisoyɛka djɛnde ladjɛ ntshika ndjila yimba l’akambo wambohetaka edjinge mbanga ndjila yimba l’akambo wokokande nangha etsho wɛnɛ.

²² Wɔnanyɔ Felice Episcopo apomanaka l’okakasano wɔkɔ ɔmɔ. Nde nya wadjɛnde wa waka apɔlɔmɛ má nkalasa kɛ Ngiliyadɛ lá 1956 edjinge wakambaka olemo wɔ onami w’edjinga ngɔlɔ lá Bolivie. Lá 1964 iwɔ wawotaka wɔna. Felice atepela ante: “Toyalaka l’okakasano dj’iso ntshika olemo wɔso wɔlɔ wɔsɔ. Lá nsɔsɔlɔ ndjalaka l’otshutshumalo ɔnɔnyi w’otondo. Koko má okotshɔ wɔ Yehova, ndjɛka ndotshikitanyɛ ikanyi yɛmi edjinge ndapɛyɛka lá mpipo kɛmi kɛ bango ngete ombotshi.” Edjinge wɛ ndeke loyawoka ngete Robert nya Felice? Wɛ ombotshutshɛ osasa wɔko lá wopo wɔ ngombotshutshɛ edjito wɛko wingayalaka la wɛkɔ ntondo? Ntsha nghɔsɔ, mbɔkoko wɛ ongoyala l’osasa ntsha wɛ ntshikitanyɛ ikanyi yɛko edjinge ndjila yimba la kɛnɛ kokokɛ nangha etsho wɛnɛ djɛ nkambela Yehova la wananyɔ. Yala l’akambo efula wa nagha, kamba l’opapɛyɛ edjinge l’akoka wako djɛ nkotshɛ anto ankina, ko, ongoyala l’osasa wɔ nkeketshɛ as’otshumano.

23. Iso ladjɛ ndɔsaka etena kɛ nangha nge, edjinge kɛkɔnge kisongeka lá djamba djeyaye?

²³ Onto onkfumɔ wɔ l’anteyi kɛso alekɔ ngo la ntshina lá wiso wa Yehova. Nde nkɔpaka dj’iso ndjala ase nkfumbo kɛnde. Ntsha iso ndɔsaka wina djɛ ntɔnɔla lá kɛnɛ k’okokaso nangha djɛ nsuka wananyɔ la wankaana, edjinge masɔ nangha la wolo djɛ nkotshɛ odjito wɔso, mbɔkoko topongoyawoka ngete topalekɔ la ntshina l’otshumano! Koko wopo wɔkɔnge oyɛso ladjɛ ndɔsa anto ankina wa l’otshumano? Wopo wɔkɔnge okokaso nyɛnyɛ dj’iso tolekɔ la djedjɛ te wɔ? Lá djamba djeyaye, tongɛna n’kambo djɛ djonyi n’tshɔ.