1-2. a) Lá mbamba kɛkɔnge onkanda wɔ Ɛfɛsɛ yafunama? b) Weepó wɛkɔnge w’ɔkɔpaso nshishima?

 WINÁ wɔ ndayalaka lá lokando lá Ɔrɔma, ɔpɔstɔlɔ Poolo akɔpaki nkembɛ winande andjawodji. Nde atakokaki ndawembola, djɛkondeke ndafunelaka ngo enkanda. Nde afunelaka ase Ɛfɛsɛ onkanda ɔmɔtshi tá ɔnɔnyi wɔ 60 kana 61 D.D.​—Ɛfɛ. 1:1; 4:1.

² Ɛnɔnyi ndekana djomi lá ntondo kɛ lasɔ, Poolo ahetshɛka winá efula lá Ɛfɛsɛ, djɛ mpoposanyɛ losango lɔ wɔlɔ. (Ele. 19:1, 8-10; 20:20, 21) Nde akɔpaki wananyɔ wande lombombe la akɔpaki ndakotshɛ́ dj’iwɔ ntshikala la nkɔmano le Yehova. Ko lamo ndafunela Akristo w’ankfutami w’avuta nkambo djelendana la widjima edjinge l’osase? Iya elakanyelo wɛkɔnge Akristo ankfumɔ okokawɔ mba má dako djɛnde djɛsɔ? Nyontshɔ tokoshishima nsakiso kɛ weepó wɛsɔ.

MÁ WIDJIMA TÁ OSASE

3. Totepela tɔkɔnge tokambisá la Poolo l’onkanda wɔ Ɛfɛsɛ?

³ Poolo afunelaka Akristo w’Ɛfɛsɛ ante: ‘Nyayalaká ntondo nde widjima, koko winá wɔsɔ nyombokoma osase.’ (Ɛfɛ. 5:8) Lanɛ, Poolo akambaka la totepela ‘widjima’ la ‘osase’ djɛ nyɛnyɛ nkete mpe djepokana kana djetshikitanyi otale. Nyontshɔ tokolenda lamo Poolo ndatepela ante ase Ɛfɛsɛ ‘yayalaka ntondo nde widjima.’

4. Lá wopo wɔkɔnge ase Ɛfɛsɛ yayalaká lá widjima wɔ ntolo?

⁴ Ntolo dj’engolo. Lá ntondo k’iwɔ ndjewa nsɔsɔlɔ la nkoma Akristo, ase Ɛfɛsɛ wa Poolo ndafunela onkanda wɔnɛ wayalaki  mfumbe yɛ tokanyi tɔ ntolo dj’engolo la yɛ wayi wa maji. Ngando k’Ɛfɛsɛ yayalaka nde edjena kɛ yapike tɛmpɛlɔ kɛ indjandjambe y’ongolo yetawɔ ambɔ Artɛmis, kɛ anto efula w’etsho wɛsɔ yɛnaka ambɔ kelekɔ mvulu kekamoyɛ ketapikamaká ntondo lá looko. Waatɛmɔlaki l’eteyi yatɛmɔlaka nde tosakandole. Nsɛla la nsadjɛ tosakandole tɔ indjandjambe Artɛmis yɛ ntolo dj’engolo yatɛmɔlaka, yayalaká nde opoto wɔ mfalanga efula. (Ele. 19:23-27) Lá djiko djɛ lasɔ, anto efula welá ngando kɛsɔ wananghaki akambo wa maji.​—Ele. 19:19.

5. Lá wopo wɔkɔnge ase Ɛfɛsɛ yayalaká lá widjima wɔ nanghedji?

⁵ Wayi wa mbindo wa ntshɛngi. Ngando k’Ɛfɛsɛ kewamaki má eyalelo kɛnde kɛ wayi wa mbindo wa ntshɛngi la wa ntshamba nsɔnyi. Anto efula welá ngando kɛsɔ watɛmaki l’etombo la kaanga lá fɛtɛ yɛwɔ yɛ ntolo. (Ɛfɛ. 5:3) Anto efula wawikaki lá ngando kɛsɔ wayalaki anto ‘wambimɛ yimba má ɛlɛmbɛ welendana la nanghedji,’ ntepela ente ‘anto wapokaka lonkina djodjo l’oloko.’ (Ɛfɛ. 4:17-19) Lá ntondo k’iwɔ ndjewa kɛnɛ kelekɔ́ nsɔsɔlɔ wɔlɔ kana nyɛtshi, ase Ɛfɛsɛ watokaki kaanga ndambo kɛ yɛnyi lá nkfum’oloko kana wafɛnyɛki ambɔ wapalekɔ la lowo lá ntondo kɛ Yehova. Djɛkondeke Poolo ndatepela lá nkambo djɛwɔ ante, ‘walekɔ lá widjima lá ntimba tɔwɔ la wambowangɔ otale la lowiko lime Ndjambe.’

6. Lamo Poolo ndakoke ntepela ante ase Ɛfɛsɛ wambokoma ‘winá wɔsɔ osase’?

⁶ Koko, ase Ɛfɛsɛ amɔtshi watatshikala lá widjima. Poolo afunaka ante ‘winá wɔsɔ wambokoma osase lá kɛnɛ kelendana la Nkfumi.’ (Ɛfɛ. 5:8) Iwɔ walongolaka l’osasa onkfumɔ osase w’Afunelo wa nsɔsɔlɔ. (Yee. 119:105) Ase Ɛfɛsɛ wasɔ watshikaka nanghedji djɛ ntolo djɛwɔ dj’engolo la eyalelo kɛwɔ kɛ wayi wa mbindo wa ntshɛngi. Iwɔ wawangaka ‘ndjokola Ndjambe’ la wananghaka kenkfumɔ kɛ yakoke nangha djɛ ntɛmɔla la nsasangɛ Yehova.​—Ɛfɛ. 5:1.

7. Lá wopo wɔkɔnge w’oyɛso wopo ɔmɔ l’Akristo efula wa Ɛfɛsɛ?

⁷ Lá wopo wɔkɔ ɔmɔ ndeke, lá ntondo k’iso ndjewa nsɔsɔlɔ, tayalaki lá ntolo la lá  nanghedji djɛ widjima. Amɔtshi l’anteyi kɛso wananghaki fɛtɛ yɛ ntolo dj’engolo, ankina wayalaki la lowiko lɔ mbindo. Koko winá wɔ seke ɛlɛmbɛ wɛ Yehova welendana la kɛnɛ kelekɔ́ wɔlɔ la kɛnɛ kelekɔ́ nyɛtshi, tonanghaka etshikitano. Towangaka mbika lá wopo w’okaná l’ɛlɛmbɛ wɛnde wɛ sii. Ko eposelo weyalisá nde, tosasanga l’esako efula. (Iza. 48:17) Koko winá wɔsɔ, topomana l’ekakasano wepashile. Iso ladjɛ mbangɔ otale la widjima wɔ satshike edjinge ‘nkindjɛ nkɛnda etengo wana w’osase.’ Okokaso nangha nghɔsɔ ngete mo?

TOPOSE MÁ WIDJIMA

8. Lá nkilika Ɛfɛsɛ 5:3-5, kɛkɔnge kɛ ase Ɛfɛsɛ yayale ladjɛ ntona?

⁸ Wala Ɛfɛsɛ 5:3-5. Djɛ mbangɔ otale la nanghedji djɛ widjima, Akristo w’Ɛfɛsɛ wayalaka ladjɛ nkindjɛ ntona nanghedji djepasasangɛ Yehova. Nanghedji djɛsɔ ape ngo wayi wa mbindo wa ntshɛngi toko, koko ole etepela wɛ nsɔnyi. Poolo avungolaka ase Ɛfɛsɛ ante iwɔ ladjɛ ndota nanghedji djɛ nghɔsɔ ntsha wakɔpa ‘nkita nkete l’Onkfumi wɔ Kristo la wɔ Ndjambe.’

9. Ladjikɛnge oyɛso ladjɛ ntona ekete kenkfumɔ kekoka ntotshinda djɛ nangha wayi wa mbindo wa ntshɛngi?

⁹ Ole iso ladjɛ nkindjɛ nangha la wolo dj’ipa ndapɛyɛ lá ‘nanghedji dj’ipa la ntshina djɛ widjima.’ (Ɛfɛ. 5:11) Nkambo dekɔ nsɔsɔlɔ nde, ntsha onto angolendake, angekameyɛke, kana angotepelake akambo wa nsɔnyi, ntepela ente akambo wa mbindo winá la winá, angoyala wɔdju lende djɛ nkfɔ kana nangha akambo wa nyɛtshi. (Ewa. 3:6; Dja. 1:14, 15) L’engidji ɛmɔtshi, wananyɔ efula nkomaka “tolongo” lá toloyi t’asawo lá Ɛtɛrnɛtɛ. Efula l’anteyi kɛwɔ wangowangake nsawola akambo wa nyuma lá toloyi tɔwɔ. Koko, ndambo ndambo, wamba wawɔ ndjɛka ndokoma wamba wa nsɔnyi. Wamba wawɔ wangowangake ntshimba ngo lá wayi wa mbindo wa ntshɛngi. Efula kɛwɔ wayɛka ndawola m’ɔkɔngɔ ambɔ etepela wɛ mbindo la wɛ nsɔnyi wakomɛka djɛ nangha wayi wa mbindo wa ntshɛngi.

10. Wopo wɔkɔnge Satana ndɔsɛsaka ntodjimba? (Ɛfɛsɛ 5:6)

¹⁰ Andja wa Satana wangɔsɛsake ntodjimba dj’iso ndjawola ente kɛnɛ kɛ Yehova ɛnande ante mbindo la nsɔnyi kepalekɔ nsɔsɔlɔ nyɛtshi. (2 Pɛ. 2:19) Nkambo djɛsɔ mpakoke ntokamoyɛ! Djabolo angɔsɛsake winá enkfumɔ ndjila anto l’okakando dj’ipa iwɔ ndjala l’akoka wa ndjewa kɛnɛ kelekɔ́ wɔlɔ la kɛnɛ kelekɔ́ nyɛtshi. (Iza. 5:20; 2 Kɔ. 4:4) Djɛkondeke sopakamɔ djɛ nyɛna ente afilmɛ, televisiɔ, la wa sitɛ y’ɛntɛrnɛtɛ efula opoposanyɛwɔ ngo tokanyi topokana la ɛlɛmbɛ wɛ sii wɛ Yehova! Satana angɔsɛsake ntodjimba dj’iso nkanela ente nanghedji djɛ nyɛtshi la lowiko lɔ mbindo lombotshanghaná l’andja lɔɔko kɛnɛ, lolekɔ wɔlɔ, longosasangɛke, la lopalekɔ l’eposelo wɛ nyɛtshi.​—Wala Ɛfɛsɛ 5:6.

11. Wopo wɔkɔnge kɛnɛ kekomelisá Angela ɛnyɛwɔ djonyi djɛ nkamba la dako djɛ balo dj’otanaso lá Ɛfɛsɛ 5:7? (Lenda edjinge ntshango.)

¹¹ Satana nkombolaka dj’iso ndjala tolongo l’anto wakoka ntokomɛ djɛ nkanela ente ɛlɛmbɛ wɛ Yehova welekɔ wolo nɛmɛyɛ. Djɛkondeke Poolo ndakembɛ ase Ɛfɛsɛ ante: ‘Nyotayalake la djokanelo lawɔ,’ ntepela ente l’anto wanangha kɛnɛ kelekɔ́ nyɛtshi lá wiso wa Ndjambe. (Ɛfɛ. 5:7) Iso ladjɛ mvungɔka ente ape ngo anto wahetshɛ laso winá elongi l’elongi toko ndeke tolongo tɔso, koko edjinge anto wasawola laso lá rɛzo sosio. Djɛkondeke iso ladjɛ mbadjɛ ndeka kaanga ase Ɛfɛsɛ wa ntondo. Angela, a kanga lowika lá Asie, ɛnaka wopo wɔ rɛzo sosio okokawɔ ndjala mbalaka k’ekekete efula. Nde asuyɛ ante: “Rɛzo sosio alekɔ  ilongo yekoka ntshita ekanedji kɛko kɛ yimba ndambo ndambo. Ndjɛka ndokoma tii lá nkanela ente lako nyɛtshi lemi ndjala la ‘tolongo’ topalɛmɛyɛ tɔkfɔ tɔ Bible. Ekomo ekomo, ntateyɛka nkanela ente alekɔ wɔlɔ ndjala la lowiko lopasasangɛ Yehova.” Mpeyi nde, tokokolo tɔ ngandji wakotshɛ́ka Angela djɛ nangha etshikitano. Nde atepela ante: “Winá wɔsɔ ndodjɛ yimba yɛmi l’akambo wa nyuma l’edjena kɛ ndapɛyɛ lá rɛzo sosio.”

12. Kɛkɔnge kengotokotshɛ́ djɛ nɛmɛyɛ ɛlɛmbɛ wɛ Yehova welendana la kɛnɛ kelekɔ́ wɔlɔ la kɛnɛ kelekɔ́ nyɛtshi?

¹² Iso ladjɛ nana l’ikanyi y’andja wanɛ y’ente wayi wa mbindo wa ntshɛngi walekɔ wɔlɔ. Iso tewa wɔlɔ ente walekɔ nyɛtshi. (Ɛfɛ. 4:19, 20) Angoyala wɔlɔ iso ndáwopola ente: ‘Lemi langowadjɛke dj’ipa ndjala ilongo la winami w’olemo, wa nkalasa kana l’anto ankina wapalɛmɛyɛ ɛlɛmbɛ wɛ sii wɛ Yehova? Langoseelake ɛlɛmbɛ wɛ Yehova l’oloko wolo onkfumɔ kaanga anto amɔtshi okokawɔ ndjeta ambɔ kanga akambo wolo?’ Etengo 2 Timɔte 2:20-22 ɛnyɛnde, iso ladjɛ mbadjɛ lonkina winá w’ɔsɔnaso tolongo kaanga l’anteyi k’otshumano w’Akristo. Iso namaka lá yimba ente anto amɔtshi wapakoke ntokotshɛ́ dj’iso ntshikala la nkɔmano l’olemo wɔ Yehova.

NYƆKƐNDƐ ‘ETENGO WANA W’OSASE’

13. Kɛkɔnge kesakisola ‘nkɛnda etengo wana w’osase’? (Ɛfɛsɛ 5:7-9)

¹³ Poolo akembɛka Akristo w’Ɛfɛsɛ dj’iwɔ nkindjɛ ntona akambo wa widjima la djɛ ‘nkindjɛ nkɛnda etengo wana w’osase.’ (Wala Ɛfɛsɛ 5:7-9.) Nkambo djɛsɔ osakisolawɔ nge? Kɛsɔ nsakisolaka, nangha akambo winá enkfumɔ etengo Akristo wa nsɔsɔlɔ. Yopo imɔtshi y’okokaso nkotshɛ okoma wɔsɔ nde má mbalaka la ndjekaka Bible la enkanda wɛso la nkɔmɛ nkfumɔ. Alekɔ djonyi efula ndjeka la nkɔmɛ nkfumɔ, pekapeka ndjɔmbɔmba la elakanyelo wɛ Yeso Kristo, ‘osase w’andja.’​—Dj. 8:12; Woo. 6:23.

14. Wopo wɔkɔnge nyuma k’ekina okokawɔ ntokotshɛ́?

¹⁴ Tolekɔ lonkina la djonyi dj’okotshɔ wɔ nyuma k’ekina kɛ Ndjambe dj’iso nkindjɛ nangha akambo ‘etengo wana w’osase.’ Lamo? Ladjikɛnde alekɔ nkambo djɛ wolo efula ntshikala piyɔɔ l’andja wa mbindo wanɛ. (1 Te. 4:3-5, 7, 8) Nyuma k’ekina nkoka  ntokotshɛ́ dj’iso nana la yimba y’andja wanɛ, nkanela nkanela dj’anto la ekanedji kɛ yimba kepokana la ikanyi yɛ Ndjambe. Nyuma k’ekina nkoka ntokotshɛ́ lonkina djɛ ndjala la ‘wopo onkfumɔ w’oloko wɔlɔ ole wɔ sii.’​—Ɛfɛ. 5:9.

15. Má topo tɔkɔnge t’okokaso mba nyuma k’ekina? (Ɛfɛsɛ 5:19, 20)

¹⁵ Yopo imɔtshi y’okokaso mba nyuma k’ekina nde, má ndɔmba Ndjambe nyuma kɛnde. Yeso atepelaka ante Yehova ‘angɔpɛyɛ anto w’ɔlɔmba nyuma k’ekina.’ (Luka 11:13) La koko winá w’ɔlɔmbaso Yehova esanga lá nsanghanyɛ y’Akristo, iso mbaka nyuma k’ekina. (Wala Ɛfɛsɛ 5:19, 20.) Ndjimbo kɛ wɔlɔ kɛ nyuma k’ekina kɛ Ndjambe kengotokotshɛ́ djɛ mbika lá wopo w’osasangɛ.

16. Kɛkɔnge kengotokotshɛ́ djɛ ndɔsa akano wa balo? (Ɛfɛsɛ 5:10, 17)

¹⁶ Winá w’ɔsaso akano wa djonyi, iso la djɛ ndjewa ‘oye ɛkɔpa kɛ Yehova’ lá nkambo djɛkɔ, ko masɔ nangha akambo lá wopo w’okana l’ɛkɔpa kɛkɔ. (Wala Ɛfɛsɛ 5:10, 17.) Má mpona tɔkfɔ tɔ Bible tolendana la nkambo djɛso mɔtshi, iso mponaka nsɔsɔlɔ ikanyi yɛ Ndjambe lá nkambo djɛkɔ. Masɔ, winá w’okambaso la tɔkfɔ tɔnde, tongoyala l’akoka wa ndɔsa akano wa wɔlɔ.

17. Kɛkɔnge kesakisola nkamba la winá wɛso la balo? (Ɛfɛsɛ 5:15, 16) (Lenda edjinge ntshango.)

¹⁷ Poolo alakaka Akristo wa Ɛfɛsɛ lonkina dj’iwɔ nkamba la winá wɛwɔ la balo. (Wala Ɛfɛsɛ 5:15, 16.) ‘Kanga nyɛtshi,’ ontonyi wɔso Satana, nkombolaka dj’iso ndjala l’akambo efula wa nangha l’andja wanɛ, dj’ipa iso mba winá wɔ nkambela Ndjambe. (1 Dj. 5:19) Akoka ndjala wɔdju efula le Okristo djɛ ndjila nkete djelá demba, nkalasa, kana olemo wɔnde l’edjena kɛ ntondo, ko nkawoyɛ mbamba yɛ nkambela Yehova t’ɔkɔngɔ. Ntsha Okristo amonangha nghɔsɔ, kɛsɔ kɛngɛnyɛ ente ambodjimbolama má yimba y’andja wanɛ. Lá nsɔsɔlɔ, nkete djɛsɔ mpalekɔ nyɛtshi, koko djepakoke ndɔsa edjena kɛ ntondo lá lowiko  lɔso kaanga ndambo daambi. Djɛ nkɛnda ‘etengo wana w’osase,’ iso ladjɛ ‘nkamba la winá wɛso lá wopo wɔ wɔlɔ,’ ntepela ente ndeka ndapɛyɛ lá kɛnɛ kelekɔ́ nsɔsɔlɔ djonyi.

18. Kɛkɔnge kɛ Donald ndananghe djɛ nkamba la winá wɛnde lá wopo wɔ wɔlɔ?

¹⁸ Hona mbamba yɛ ndeka nkambela Yehova. Kɛsɔ ndeke Donald, kanga lowika lá Afrique du sud ndananghe. Nde atepela ante: “Ntɔnɔlaka lá nkambo djɛ lowiko lɔmi la mbɔndaka Yehova djɛ nkotshɛ́ lemi djɛ mfudjɛ olemo wɔmi w’ipoposanyɛ. Ndɔmbaka djɛ mba olemo wokoka nkotshɛ́ lemi djɛ ndapɛyɛka efula l’olemo w’ipoposanyɛ. Má okotshɔ wɔ Yehova, mbaka olemo wokoka. Masɔ lemi isa wadjɛmi towangaka nkambela Yehova esanga lá olemo wɔ winá enkfumɔ.”

19. Wopo wɔkɔnge w’okokaso nkindjɛ nkɛnda ‘etengo wana w’osase’?

¹⁹ Onkanda wɔ Poolo ndafunela ase Ɛfɛsɛ woyalaka ladjɛ ndakotshɛ́ nsɔsɔlɔ lá lowiko lɔwɔ l’Okristo. Edjinge alako wafunamisá má wolo wɔ nyuma k’ekina wasɔ nkoka ntokotshɛ́ ole iso. Etengo sɔmbɛna, wakoka ntokotshɛ́ dj’iso nsɔna etombo la tolongo tɔso la balo. Wakoka ntotshinda djɛ nkindjɛ nkɛnda l’osase wɔ nsɔsɔlɔ má ndjala la nonghanyi kɛ wɔlɔ kɛ wekelo wɔ Bible. La wapika nghɔmɔ ɛnsɔsɔ lá djonyi djɛ nyuma k’ekina kekoka ntokotshɛ́ djɛ ndjala la wekeka wa wɔlɔ. Nkamba la kɛnɛ kɛ Poolo ndafune nkoka ntokotshɛ́ djɛ ndɔsa akano wa wɔlɔ, w’okaná l’ikanyi yɛ Yehova. Má nangha akambo wasɔ, tongoyala l’akoka wa ndjewɔ akambo wa widjima w’andja wanɛ la ntshikala l’osase!