DJAMBA DJƐ WEKELO 19
YEEMBO 22 Onkfumi wɔlɔndjɛ—woye! (lá Otetela)
Kɛkɔnge k’ewaso lá nkambo djɛ dombo djeyaye djɛ Yehova?
‘Yehova . . . apakɔpɛ kaanga onto ɔmɔ ndjakema.’—2 PƐ. 3:9.
IKANYI YƐ DJAMBA DJƐNƐ
Tokoka ndjala l’eshikikelo ente winá wɔ Yehova ndongolomboyɛ anto l’etsho weyaye, angaalomboyɛ lá lɛdji lɔ djɔ la lɔ sii.
1. Lamo okokaso ntepela ente towika l’eleko kɛ wɔlɔ efula?
TOWIKA l’eleko kɛ wɔlɔ efula! Lofu la lofu, prɔfɛsi yɛ Bible ikotshama lá wiso waso. Ndjɔmbɔmba, tɛna wopo wɔ ‘nkfumi kɛ nɔrɔ’ la ‘nkfumi kɛ sidɛ’ onanawɔ mbandji djɛ ndjapemela andja w’otondo. (Dan. 11:40, nɔtɛ) Tɛna lonkina wopo wɔ losango lɔ wɔlɔ l’Onkfumi wɔ Ndjambe opoposanyemawɔ lá lɛdji lotananghemaka ntondo la wopo wɔ miliyɔ y’anto elolawɔ lá losango lɔsɔ. (Iza. 60:22; Mat. 24:14) Edjinge towa eleelo wɛ nyuma ankfuka ankfuka ‘lá winá w’ɛdje.’—Mat. 24:45-47.
2. Oyalaso l’eshikikelo kɛkɔnge, ko oyɛso ladjɛ ndjawola nge?
2 Yehova akindjɛ ntokotshɛ́ dj’iso ndjala la looka lɔ papoo l’akambo efula wa djonyi wakɔpa nanghema. (Woo. 4:18; Dan. 2:28) Tokoka ndjala l’eshikikelo ente má winá wɔ ndjolo k’ekekete yongowanga, tongewa kenkfumɔ kɛ songoyala la djonyi djɛ ndjewa djɛ nkfulumeyɛ la nkɔmano nkfumɔ ole ndjala iwoke imɔ l’eleko kɛ wolo kɛsɔ. Koko, iso ladjɛ nsuyɛ ente akambo amɔtshi walekɔ wa sopewe lá nkambo dj’etsho weyaye. Lá djamba djɛnɛ, tɔngɛna ntondo ntondo lamo sombotshikitanyɛ akambo amɔtshi wa sombotepelá lá kɛnɛ kelendana l’akambo wa tokongela wasɔ. Masɔ tongoshishima akambo amɔtshi w’ewaso lá nkambo djelendana l’etsho weyaye la wopo wɔ Papa kɛso kɛ l’olongo ndongonangha.
KƐNƐ KƐ SOPEWE
3. Kɛkɔnge kesatepelaka lá nkambo djɛ winá wɔ anto yopangowa mbamba kɛ mpeta l’onkoko wɔ Yehova, ko lamo satepelaka nghɔsɔ?
3 Ntondo, tatepelaki ente winá wɔ ndjolo k’ekekete yongowanga, anto watayalá la djawo le Yehova wapangowa lonkina mbamba kɛ mpeta l’onkoko wɔnde la wapangowika l’Armagɛdɔ. Tatepelaki nghɔsɔ ladjikɛnde tafɛnyɛki ente ɔkɔndɔ wɔ Mvula k’elola oyɛwɔ nde prɔfɛsi kɛnyɛki wopo wɔ akambo yongonanghema l’etsho wɛso. Ndjɔmbɔmba, takanelaki ente, ngo ngete Yehova ndadjipe nkfuke yɛ wato lá ntondo kɛ Mvula k’elola ntɔnga, nde “angodjipa lokfuke” lɔ nkfumbo dj’akambo djɛ Satana má bango djɛ ndjolo k’ekekete, dj’ipa kaanga onto ɔmɔ mba mbamba kɛ mbika.—Mat. 24:37-39.
4. Lamo sopakanela lonkina ente ɔkɔndɔ wɔ Mvula k’elola oyɛwɔ nde prɔfɛsi kewoyɛ akambo wangonanghemá? Pakisola.
4 Iso ladjɛ nkanela ente ɔkɔndɔ wɔ Mvula k’elola oyɛwɔ nde prɔfɛsi kɛmɔtshi kewoyɛ nkambo mɔtshi ngonanghema l’etsho weyaye? Ndjɔndɔ lá woopó wɔsɔ nde lako. Lamo? Ladjikɛnde Afunelo wapatepela nghɔsɔ. a Yeso ɛdjɛka ‘etsho wɛ Nowe’ la eleko k’ɛnamelo kɛnde, koko nde atatepela ante Mvula k’elola kana ikakambo inkfumɔ inanghemisá l’etsho wɛ Nowe ingokalɔ ndonanghema l’etsho weyaye; kana ente odjipelo wɔ lokfuke lɔ wato oyɛwɔ nde prɔfɛsi kesakisola nkambo mɔtshi. Koko, kɛsɔ kepasakisola ente topakoke mba elakanyelo má ɔkɔndɔ wɔ Nowe la wɔ Mvula k’elola.
5. a) Kɛkɔnge kɛ Nowe ndananghe lá ntondo kɛ Mvula k’elola ntɔnga? (Hebero 11:7; 1 Pɛtɛlɔ 3:20) b) Lá kɛnɛ kelendana la olemo w’ipoposanyɛ, wopo wɔkɔnge etsho wɛso wɛnɛ ɔfɛnawɔ l’etsho wɛ Nowe?
5 Winá wɔ Nowe ndoke losango lɔ ndjewo me Yehova, nde ɛnyɛka ante alekɔ la djawo má nangha wato w’ekekete. (Wala Hebero 11:7; 1 Pɛtɛlɔ 3:20.) Lá wopo wɔkɔ ɔmɔ, anto woka losango lɔ wɔlɔ l’Onkfumi wɔ Ndjambe ladjɛ ndjelola lá kɛnɛ k’okawɔ. (Ele. 3:17-20) Pɛtɛlɔ etaka Nowe ante ‘nsakodji k’akambo wa wɔlɔ.’ (2 Pɛ. 2:5) Koko, ete ngo isatepela lá djamba mboheta, topewe ntsha Nowe alonghanyɛka kampanyɛ djɛ mpoposanyɛ anto ankfumɔ wawikaki lá looko lá ntondo kɛ Mvula k’elola ndjɛ. Lɔɔko kɛnɛ, tɔsa opiko lá olemo w’ipoposanyɛ wɔ andja w’otondo, la tonangha la wolo djɛ mba osasa m’eteyi. Koko, ayale kaanga onanghaso la wolo wɔkɔnge, topangokoka mpoposanyɛ losango lɔ wɔlɔ le onto onkfumɔ wɔ lá looko lá ntondo kɛ ekomo ndjɛ. Lamo?
6-7. Lamo okokaso ntepela ente topangokoka mpoposanyɛ losango lɔ wɔlɔ le onto onkfumɔ wɔ lá looko lá ntondo k’ekomo ndjɛ? Pakisola.
6 Tokolenda kɛnɛ kɛ Yeso ndatepela lá nkambo djɛ olemo wɔso w’ipoposanyɛ. Nde ewoyɛka ante losango lɔ wɔlɔ longopoposanyema ‘lá looko l’otondo ete ngo owakɛ l’ewila enkfumɔ.’ (Mat. 24:14) Prɔfɛsi kɛsɔ kekotshama lɔɔko kɛnɛ lá lɛdji lotananghemaka ntondo. Losango l’Onkfumi lopoposanyema l’etepela ndekana 1 000, edjinge anto w’andja w’otondo wakoka ndjoka losango lɔsɔ má mbamba kɛ sitɛ kɛ jw.org.
7 Koko, Yeso ashimelaka ambeki wande lonkina ante nde angoyɛ ndolomboyɛ wana w’anto lá ntondo k’iwɔ ‘nshiyɛ nkindola ngando’ inkfumɔ kana mpoposanyɛ onto onkfumɔ. (Mat. 10:23; 25:31-33) Etepela wɛ Yeso wɛsɔ wekotshama ole l’etsho wɛso wɛnɛ. Miliyɔ y’anto lɔɔko kɛnɛ wawika lá djena djɛ yomboshimbá olemo w’ipoposanyɛ. Lá djiko djɛ lasɔ, nkama la nkama yɛ wana iwotshɔ minitɛ inkfumɔ. Tonangha kenkfumɔ k’okokaso nangha djɛ mpoposanyɛ losango lɔ wɔlɔ le anto wa ‘ewila enkfumɔ, tɔkɔlɛ tonkfumɔ, la etepela enkfumɔ.’ (Ndj. 14:6) Koko nkambo djɛ nsɔsɔlɔ nde, topangoyala l’akoka wa mpoposanyɛ onto onkfumɔ w’owika lá looko losango lɔ wɔlɔ lá ntondo k’ekomo ndjɛ.
8. Woopó wɔkɔnge w’okokaso ndáwopola lá nkambo djɛ alombo wa Yehova wa l’etsho weyaye? (Lenda edjinge asango.)
8 Djɛko ndeke, tokoka ndáwopola ente: Otepelaso mo lá nkambo djɛ anto wapangowa mbamba kɛ ndjoka losango lɔ wɔlɔ lá ntondo kɛ ndjolo k’ekekete mbanga? Yehova la Wɔnande, kanga ndapɛyɛ odjito wɔ ndomboyɛ anto yongonangha lawɔ mo? (Dj. 5:19, 22, 27; Ele. 17:31) Vɛrse djɛso dj’ɔtɛ wɔ djamba djɛnɛ ntepela ante Yehova ‘apakɔpaka kaanga onto ɔmɔ ndjakema.’ Koko nde nkɔpaka djɛ ‘onto onkfumɔ awa mbamba kɛ ndápɛla.’ (2 Pɛ. 3:9; 1 Ti. 2:4) Kaanga oyɛwɔ nghɔsɔ, iso ladjɛ ndjawola ente Yehova atatoshimela wopo wɔ ndongolomboyɛ anto wapangowa mbamba kɛ ndjoka losango lɔ wɔlɔ. Lá nsɔsɔlɔ, apalɔmbama ntoshimela nkambo nkfumɔ djɛ ndonanghaka la djɛ ndongonangha.
Yehova ndongonangha mo l’anto watakoka mba mbamba kɛ ndjoka losango lɔ wɔlɔ lá ntondo kɛ ndjolo k’ekekete mbanga? (Lenda itenyi 8) c
9. Kɛkɔnge kɛ Yehova ndotisola lá Bible?
9 Lá Otepela wɔnde, Yehova ambotisolá akambo amɔtshi wa ndongonangha. Ndjɔmbɔmba, Bible ntoshimelaka ante Yehova angokfundola ‘anto wa nyɛtshi’ watawa mbamba kɛ ndjoka losango lɔ wɔlɔ la kɛ ntshikitanyɛ nanghedji djɛwɔ. (Ele. 24:15; Luka 23:42, 43) Kɛsɔ keposɛ weepó enkina wɛ djonyi.
10. Weepó enkina wɛkɔnge w’okokaso ndáwopola?
10 Anto ankfumɔ wangovɔ́ lá wina wɔ ndjolo k’ekekete, wangovɔ lotshinda ipa la nkongi djɛ ekfundwelo? Afunelo mpakisolaka papoo ante anto wananyɛ Yehova la angala wande, wa yongoyaka lá Armagɛdɔ wapangokfundɔ. (2 Te. 1:6-10) Iya otepelaso mo lá nkambo dj’anto ankina, ndjɔmbɔmba anto wavɔ má ambalaka yeyɛ má nkete ntongamisá, aksida, kana anto wayakema me anto ankina? (Los. 9:11; Zak. 14:13) Anto amɔtshi wakoka ndjala l’anteyi kɛ ‘anto wa nyɛtshi’ wangokfundɔ l’andja wa bango? Topewe.
KƐNƐ K’EWASO
11. Anto yongolomboyama lá Armagɛdɔ m’ɔtɛ wɔ nkambo djɛkɔnge?
11 Tewa wayi efula walendana l’akambo wangoheta l’etsho weyaye. Ndjɔmbɔmba, tewa ente l’Armagɛdɔ anto wangolomboyama lá nkilika wopo wɔ yananghelaka wananyɔ wa Kristo akambo. (Mat. 25:40) Anto wangɔsama ete ngo wana w’ɛnkɔkɔ wangosuka ankfutami w’avuta la Kristo. Tewa lonkina ente wananyɔ wa Kristo amɔtshi wangoyala lá looko m’ɔkɔngɔ wɔ ewangelo kɛ ndjolo k’ekekete la wangɔsama t’olongo ndambo daambi lá ntondo kɛ Armagɛdɔ mbanga. L’ilá kenkfumɔ kɛ wananyɔ wa Kristo yongoyalaka lanɛ lá looko, anto w’eloko wɔlɔ wakoka mba mbamba kɛ ndasuka la nsuka olemo w’okambawɔ. (Mat. 25:31, 32; Ndj. 12:17) Lamo akambo wasɔ oyɛwɔ la ntshina?
12-13. Wopo wɔkɔnge anto amɔtshi yongelola m’ɔkɔngɔ wɔ iwɔ nyɛna etshitanelo kɛ ‘Babilɔnɛ dj’Ekekete’? (Lenda edjinge asango.)
12 Kaanga m’ɔkɔngɔ wɔ ndjolo k’ekekete mbanga, anto amɔtshi wangɛná etshitanelo kɛ ‘Babilɔnɛ dj’Ekekete’ wakoka ndovungɔ ambɔ Ewakɛ wɛ Yehova wambotepelá nkambo djɛnɛ ilá efula. Anto amɔtshi wangɛná akambo wasɔ wakoka ndotshikitanyɛ eloko?—Ndj. 17:5; Ezk. 33:33.
13 Ntsha amboyala nghɔsɔ, akoka nanghema ete ngo kɛnɛ kenanghemisá l’Edjipito l’etsho wɛ Mɔsɛ. Tovungɔ ente ‘anto ankina efula wasanganaka’ la wana w’Isariyɛlɛ djɛ mposa esanga lawɔ má Edjipito. Amɔtshi l’anteyi k’anto wasɔ wakokaka ntateyɛ ndjala la djawo winá wɔ yɛnaka ambɔ akambo wa Mɔsɛ ndewoyɛka lá nkambo djɛ Ndjolo Djomi wambokotshama. (Epo. 12:38) Ntsha nkambo djɛ nghɔsɔ ngonanghema m’ɔkɔngɔ wɔ etshitanelo kɛ Babilɔnɛ dj’Ekekete, tokoka ndoka nkɛlɛ lá wopo wɔ yongotshikitanyɛ eleko ngo ndambo daambi lá ntondo kɛ ekomo ndjɛ? Lá nsɔsɔlɔ lako! Iso nkombolaka ndjokola lonto lɔ Papa kɛso kɛ l’olongo ‘Ndjambe kɛ nkɛtshi la kɛ djandji, kepoke nkɛlɛ lankeke ole kembolola kfu la ngandji kɛ nkɔmano ole nsɔsɔlɔ.’ b—Epo. 34:6.
Anto amɔtshi wangɛná etshitanelo kɛ ‘Babilɔnɛ dj’Ekekete’ wangovungɔ ambɔ Ewakɛ wɛ Yehova wambotepela nkambo djɛnɛ ilá efula (Lenda itenyi 12-13) d
14-15. Lowiko l’etshinda ndendanaka la winá ole la edjena k’onto ndombovɔ? Pakisola. (Yeembo 33:4, 5)
14 Winá ɛmɔtshi, wananyɔ kana ankaana nkoka ntepela lá nkambo djɛ ewoto kɛwɔ kɛmɔtshi kepakambela Yehova ambɔ: “Ntsha nde mvɔ lá ntondo kɛ ndjolo k’ekekete mbanga angoyala wɔlɔ ladjikɛnde angoyala la nkongi djɛ ekfundelo.” Ɔsɔ alekɔ donga djɛ wɔlɔ djetshinda onto djɛ ntepela nghɔsɔ. Koko lowiko l’etshinda lopalendana ngo la winá w’onto ovɔnde. Yeheva alekɔ Isushi yɛ djɔ, akano wande wangoyalake winá enkfumɔ djɔ la sii. (Wala Yeembo 33:4, 5.) Tokoka ndjala lonkina l’eshikikelo ente ‘Isushi yɛ looko l’otondo,’ angonangha kɛnɛ kelekɔ́ wɔlɔ.—Ewa. 18:25.
15 Tolekɔ lonkina l’elonga kɛ ntepela ente lowiko l’etshinda lopalendana la edjena kɛ onto owikande. Topakoke mfɛnyɛ kaanga ndambo daambi ente Yehova angɔsa milliyɔ y’anto wawika l’ewila wetawa mbamba kɛ ndjoka losango l’Onkfumi ete ngo ‘ambondji.’ (Mat. 25:46) Isushi yɛ sii yɛ looko l’otondo angoyakiyanyɛke efula lá nkambo djɛ anto wasɔ ntoleka iso. Topewe wopo wɔ Yehova ndɔngɔlɔndjɛ akambo lá winá wɔ ndjolo k’ekekete. Amɔtshi l’anteyi k’anto wasɔ wakoka ndowa mbamba kɛ ndjeka akambo walendana la Yehova, ndjala la djawo te nde la mpeta lá djeke djɛ Yehova winá wɔ ndongoyakinyɛ lá ntondo k’ewila enkfumɔ.—Ezk. 38:16.
M’ɔkɔngɔ wɔ ndjolo k’ekekete mbanga, . . . anto amɔtshi wangɛná akambo wasɔ wakoka ndotshikitanyɛ eloko?
16. Kɛkɔnge kɛ somboyɛ ndewa lá nkambo djɛ Yehova? (Lenda edjinge ntshango.)
16 Má mbamba kɛ wekelo wɔso wɔ Bible, tomboyɛ ndewa ente Yehova ndɔsaka lowiko l’onto la ntshina efula. Nde apɛyɛka lowiko lɔ Wɔnande dj’isankfumɔ mba nkongi djɛ mbika etshinda etshinda. (Dj. 3:16) Tɛna isankfumɔ ente Yehova ntɔkɔpaka lombombe. (Iza. 49:15) Nde ndjewaka djiina djɛ onto l’onto wɔ l’anteyi kɛso. Lá nsɔsɔlɔ, nde ndjewaka wɔlɔ wɔlɔ onto onkfumɔ wɔ l’anteyi kɛso lá lɛdji lɔ kaanga ntsha tombovɔ, nde nkoka ntotonga lonkina l’ikakambo yɛso inkfumɔ ole angotokawoyɛ akambo ankfumɔ wasavungɔka! (Mat. 10:29-31) Lá nsɔsɔlɔ, tolekɔ l’elonga kɛ ndjala l’eshikikelo ente Papa kɛso kɛ ngandji kɛ l’olongo angolomboyɛ onto onkfumɔ lá lɛdji lɔ djɔ, sii, ole la nkɛtshi kenkfumɔ.—Dja. 2:13.
Tokoka ndjala l’eshikikelo ente Yehova angolomboyɛ onto onkfumɔ lá lɛdji lɔ djɔ, lɔ sii, ole la nkɛtshi kenkfumɔ (Lenda itenyi 16)
17. Kɛkɔnge kɛ songotepela lá djamba djeyaye?
17 Lá nsɔsɔlɔ looka lɔ bango lɔsɔ lɔmbɔtɔpɛyɛ donga djɛ nkamba olemo wɔso w’ipoposanyɛ lankeke lankeke. Lamo okokaso ntepela nghɔsɔ? Ko kɛkɔnge kengototshinda djɛ nkindjɛ mpoposanyɛ losango lɔ wɔlɔ ipa mpekɔ? Lá djamba djeyaye tongotshimola ikakambo inkfumɔ ilendana la ndjɔndɔ yɛ weepó wɛsɔ.
YEEMBO 76 Oyawokɛ ngete mo? (lá Otetela)
a Djɛ mba mpakiso efula yɛ donga mbototshindá djɛ nangha etshikitano wɛnɛ, lenda djamba: “Wɛ akasale dikambo sɔ lo ndjela lolango layɛ,” lá Etange k’Olami kɛ Ngɔndɔ k’asato 15, 2015, nki. 7-11.
b M’ɔkɔngɔ wɔ etshitanelo kɛ Babilɔnɛ dj’Ekekete, enkambi wɛ Yehova enkfumɔ wangingela l’ohemba winá wɔ Ngɔngɔ kɛ Mangɔngɔ ndongaananyɛ. Onto onkfumɔ wongoheta tá djeke djɛ Yehova m’ɔkɔngɔ wɔ etshitanelo kɛ Babilɔnɛ dj’Ekekete angohembama ole nde.
c NSAKISO K’ASANGO : Akambo asato wɛnyɛ lamo olemo w’ipoposanyɛ wɔ l’andja w’otondo yopakoke nkoma le anto amɔtshi: 1) Omoto ɔmɔtshi awika l’idjena yɛ ntolo djapemela l’eteyi wanangha djɛ idjena yɛkɔ nkoma mbalaka, 2) ampɛtshɛki imɔtshi wawika l’idjena yɛ ewandji wɛ lɛɛta yombokomɛ olemo w’ipoposanyɛ ete ngo nkambo djepokana l’ɛlɛmbɛ la djɛ mbalaka, la 3) Mpame kɛmɔtshi awika l’idjena y’otale la wolo nkoma l’eteyi.
d NSAKISO KƐ NTSHANGO: Oseka ɔmɔtshi wotshikisá akambo wa nsɔsɔlɔ avungɔ kɛnɛ kɛ ndeke lá nkambo djɛ etshitanelo kɛ ‘Babilɔnɛ dj’Ekekete.’ Nde ambotshikitanyɛ oloko wɔnde ko ambokalɔ l’ambotshi wande w’Akristo. Ntsha nkambo djɛ nghɔsɔ mbolonanghema, angoyala wɔlɔ iso ndjokola lonto lɔ Papa kɛso kɛ l’olongo lɔ nkɛtshi la lɔ djandji la nsasanga ente onanghi wɔ mpekanto ambokalɔ.
