1. Kɛkɔnge kɛ soke lá losanganyɛ l’ɔnɔnyi lɔ 2023?

 LÁ LOSANGHANYƐ l’ɔnɔnyi lɔ 2023, a towaka looka lɔ bango lɔ akambo amɔtshi walendana la djawo djɛso la watɔpɛyɛka ndjewo imɔtshi yɛ wɔlɔ efula ilendana l’olemo w’ipoposanyɛ. Ndjɔmbɔmba, tekaka ente anto amɔtshi wakoka ndowa mbamba kɛ mpeta l’onkoko wɔ enkambi wɛ Yehova kaanga m’ɔkɔngɔ wɔ etshitanelo kɛ Babilɔnɛ dj’Ekekete. Tokaka lonkina ente má Ngɔndɔ kɛ djomi l’ɔmɔ 2023, wapangɔlɔmbaka lonkina ansakodji y’Onkfumi alapɔlɔ w’olemo w’ipoposanyɛ. Etshikitano wɛsɔ wɛnyɛ ente olemo wɔso w’ipoposanyɛ wopalekɔ lonkina la ntshina efula la apɔlɔmbama djɛ nkamba lankenke lankenke ete ngo sananghaka ntondo? Lako!

2. Ladjikɛnge olemo wɔso w’ipoposanyɛ yotaleke ndjala ndjonyi winá wɔ mfu yotahete? (Marko 13:10)

² Winá wɔ mfu yotahete, ndeke olemo wɔso w’ipoposanyɛ yotaleke ndjala djonyi leso. Lamo? Ladjikɛnde winá wotalote lowango lowango. Tokoshishima kɛnɛ kɛ Yeso ndewoyɛ lá nkambo dj’olemo w’ipoposanyɛ l’etsho w’ekomo. (Wala Marko 13:10.) Lá nkilika ɔkɔndɔ wɔ Mateo, Yeso atepelaka ante losango lɔ wɔlɔ ladjɛ mpoposanyema lá looko l’otondo lá ntondo kɛ ‘ekomo’ ndjɛ. (Mat. 24:14) Itepela yɛsɔ ndendanaka l’ekomo kɛ nkfumbo djɛ nyɛtshi dj’akambo djɛ Satana. Yehova ambóshikikɛ ‘lofu la winá’ wɔ akambo wasɔ yongonanghema. (Mat. 24:36;  25:13; Ele. 1:7) Lofu lonkfumɔ loheta, ntosukanyɛka lá lofu lɔkɔ lɔsɔ. (Ɔrɔ. 13:11) Winá w’okongaso winá wɔkɔ, iso ladjɛ nkindjɛ mpoposanyɛ lá ntondo k’ekomo ndjɛ.

3. Donga djɛkɔnge ntotshinda djɛ mpoposanyɛ?

³ Winá w’okanelaso nkambo djɛ olemo w’ipoposanyɛ, angoyalaka wɔlɔ iso ntɔnɔla lá woopó wɔ djonyi wɔnɛ: Ladjikɛnge opoposanyɛso losango lɔ wɔlɔ? Lá yopasɛ, ngandji ndeke lototshinda djɛ mpoposanyɛ. Kɛnɛ k’onanghaso l’olemo w’ipoposanyɛ nyɛnyɛka ngandji kɛso tá losango lɔ wɔlɔ, te anto la pekapeka te Yehova la djiina djɛnde. Nyontshɔ tokoshishima nkambo mɔ mɔ.

ISO MPOPOSANYƐKA LADJIKƐNDE TƆNGƆKƆPAKE LOSANGO LƆ WƆLƆ

4. Iselolaka ngete mo winá w’owaso losango lɔ wɔlɔ?

⁴ Okoka vungɔ wopo wɔ ngoke winá wɔ ngawa losango lɔmɔtshi lɔ wɔlɔ, mbala imɔtshi winá wɔ ngoke ente ewoto kɛko kɛmɔtshi ambowota wɔna wɔ bango kana winá wɔ ngawa olemo ɔmɔtshi wɔ ngayalaka la djonyi efula? Ape l’ehamo oyalaka la mposɛ kɛ nshimela boto la tolongo tɔko losango lɔ wɔlɔ lɔsɔ. Oyawokaka wopo wɔkɔ ɔmɔ winá wɔ ngoke losango loleka nsango inkfumɔ wɔlɔ, ntepela ente losango l’Onkfumi wɔ Ndjambe?

5. Ngoyawoke ngete mo mbala kɛ ntondo kɛ ngeke akambo wa nsɔsɔlɔ w’imá Otepela wɔ Ndjambe? (Lenda edjinge asango.)

⁵ Kokanela wopo wɔ ngoke mbala kɛ ntondo kɛ yakolakanyɛ akambo wa nsɔsɔlɔ m’Otepela wɔ Ndjambe. Wɛ isolaka ente Papa kɛko kɛ l’olongo nkɔkɔpaka, nde nkombolaka wɛ ndɔsa opiko lá nkfumbo k’antɛmɔdji wande, nde ambolaka djɛ nshiyɛ ndjolo la djɛmɔ, ambolaka lonkina ante okoka ndjala la nkongi djɛ nyɛnana lonkina l’anto wako wavisá l’andja wa bango, edjinge akambo ankina efula. (Mar. 10:29, 30; Dj. 5:28, 29; Ɔrɔ. 8:38, 39; Ndj. 21:3, 4) Akambo wa nsɔsɔlɔ wasɔ wasasangɛka oloko wɔko. (Luka 24:32) Ɔkɔpaka kɛnɛ kɛ ngekáká, ole otakoká mbomba akambo wa nsɔsɔlɔ wa ntshina wasɔ ngo lewɛ nghɔmɛlɛ!​—Ɛdjɛ la Jɛrɛmi 20:9.

6. Olakanyelo wɔkɔnge ngombowa má kɛnɛ kekomelisá Ernest nya Rose?

 ⁶ Kolenda nkambo nkomelisá wɔnanyɔ ɔmɔtshi. Wɔnanyɔ Ernest b ayalaki l’ɛnɔnyi ete ngo djomi winá wɔ isɛkɛnde ndavu. Ernest avungɔ ante: “Ndáwopolaki ente: ‘Ndombohanda nde t’olongo? Ndo koko apayalaki la lowiko lonkina lotshinda lotshinda?’ Lákombolaki dɛngɛ nkina efula djalaki la papa yɛwɔ.” Ernest atshɔki mbala la mbala tá anketa ko apikaki awɔngɔ lá nketa kɛ papa kɛnde ko alɔmbaki ante: “Ndjambe, lambɔkɔwɔnda, nkɔpa ndjewa idjena ilekɔ papa kɛmi.” Ɛnɔnyi ete ngo 17 m’ɔkɔngɔ wɔ nyɔyi kɛ papa kɛnde, onto ɔmɔtshi alɔmbaka Ernest djɛ nde ndjeka Bible, ko nde awolaka ipa la ntshatshimba. Nde okaka osasa efula winá wɔ ndewe ante onto wombovɔ́ apewe kaanga ekete, la ente Bible alaka ante ekfundwelo kengoyala l’etsho weyaye. (Los. 9:5, 10; Ele. 24:15) Ekomo ekomo, nde awaka ndjɔndɔ lá weepó wotshimbɛki yimba ilá efula! Ernest ayalaka l’osasa efula m’ɔtɛ wɔ akambo wa nsɔsɔlɔ wa ndeke má Bible. Wadjɛnde Rose, awangaka ndjeka ole nde edjinge akɔpaka losango l’Onkfumi lombombe. Yape kɛkɔ walongolaka batisimo lá 1978. Iwɔ washimelaka boto djɛwɔ, tolongo tɔwɔ, la anto ankina wakɔpisá ndawekameyɛ akambo wa ntshina wa yawola wasɔ l’osasa onkfumɔ. Eposelo weyalisá nde, Ernest nya Rose wakotshɛ́ka anto ndekana 70 djɛ ndjewa Yehova la ndongola batisimo.

7. Kɛkɔnge kenanghemáká winá wɔ ngandji k’akambo wa nsɔsɔlɔ wemá Bible opikawɔ esisa l’oloko wɔso? (Luka 6:45)

⁷ Ndjokamaka papoo ente, winá wɔ ngandji k’akambo wa nsɔsɔlɔ welá Bible opikawɔ esisa l’oloko wɔsɔ, topangokoka ntshikala vu. (Wala Luka 6:45.) Tongoyawoka ete ngo ambeki wa Yeso wa l’ɛtɛndɔ kɛ ntondo watepelisá ambɔ: ‘Topangotshika ntepela akambo wa sɛnyi la wa soke.’ (Ele. 4:20) Iso nkɔpaka akambo wa nsɔsɔlɔ lombombe, djɛko ndeke ɔkɔpakaso nshimela anto ankina.

ISO MPOPOSANYƐKA LADJIKƐNDE ISO NKƆPAKA ANTO

8. Kɛkɔnge ketotshindaka djɛ nshimela anto ankina losango lɔ wɔlɔ? (Lenda ipapango “ Kɔpa anto, kfumba ambeki.”) (Lenda edjinge ntshango.)

⁸ Ngo ngete Yehova nya Wɔnande, iso nkɔpaka anto. (Woo. 8:31; Dj. 3:16) Iso ndjokaka anto ‘wapalekɔ́ la Ndjambe’ ole ‘wapalekɔ́ la nkongi’ djandji efula. (Ɛfɛ. 2:12) M’ɔtɛ w’efula k’ekakasano welekɔ́ lawɔ, angɛnamake ete ngo oyɛwɔ nde lá mpeku dj’otale efula, koko iso tolekɔ l’ɔkɔdji wokoka ndaasepa má mpeku djɛkɔ, ɔkɔdji wɔkɔ nde, losango lɔ wɔlɔ l’Onkfumi wɔ Ndjambe. Ngandji la nkɛtshi k’okaso anto wa nghɔsɔ ntotshindaka djɛ nangha la wolo djɛ mpoposanyɛ losango lɔ wɔlɔ. Losango  lɔ ntsho lɔsɔ nkoka ndodjɛ eloko wɛwɔ la nkongi, nkoka ndakotshɛ́ djɛ ndjala l’osasa má winá wɔsɔ, ole ndapɛyɛ mbamba kɛ ndowa ‘lowiko lɔ nsɔsɔlɔ,’ ntepela ente lowiko l’etshinda l’andja wa bango wa Ndjambe.​—1 Ti. 6:19.

9. Ndjewo kɛkɔnge kɔpɛyɛso anto lá kɛnɛ kelendana l’etsho weyaye, ko lamo? (Ezekiyɛlɛ 33:7, 8)

⁹ Ngandji k’okaso anto ntotshindaka djɛ ndawewola ente ekomo k’andja wa nyɛtshi wanɛ kemboyala entshupa. (Wala Ezekiyɛlɛ 33:7, 8.) Iso ndjokaka winaso anto la mboto djɛso nkɛtshi. Efula wawika ipa la ndjewa kɛnɛ kɛkɔpa nanghema, ‘ndjolo k’ekekete kengoyala lá wopo w’otayalaká ntondo ntateyɛ má ewangelo k’andja tii lɔɔko kɛnɛ, la lá wopo w’opangoyala lonkina lotshinda lotshinda.’ (Mat. 24:21) Iso nkɔpaka iwɔ ndjewa kɛnɛ kengonanghemá lá winá wɔ dombo, ntondo ntondo etshitanelo kɛ ntolo dj’engolo ko masɔ etshitanelo kɛ andja wa nyɛtshi wanɛ lá Armagɛdɔ. (Ndj. 16:14, 16; 17:16, 17; 19:11, 19, 20) Tɔlɔmba djɛ anto efula ndjawola ndjewo kɛsɔ la dj’iwɔ ntokilika l’ɔtɛmwɛlɔ wɔ nsɔsɔlɔ má winá wɔsɔ. Iya otepelaso mo djɛ anto wapakɔpɛ ndjawola ndjewo kɛso winá wɔsɔ, ndjila ole boto la bɔndɔ djɛso djɛ ngandji?

10. Lamo oyɛwɔ djonyi iso nkindjɛ nshimela anto akambo wakɔpa nanghema lako ilá?

¹⁰ Ete ngo yapakisola lá djamba djemboheta, mbala imɔtshi Yehova nkoka ndjawola djɛ mbikɛ anto wangotshikitanyɛ eloko winá wɔ yɔngɛna etshitanelo kɛ Babilɔnɛ dj’Ekekete. Ntsha nghɔsɔ, mbɔ tokindjɛ ndaashimela má winá wɔsɔ ladjikɛnde winá wɔnɛ ndeke yomboleká djonyi iwɔ ndjoka ndjewo kɛkɔ. Tokote nkambo djɛnɛ: Kɛnɛ k’ashimelaso winá wɔsɔ nkoka ndapɛyɛ nkambo mɔtshi dj’iwɔ ndovungɔ m’ɔkɔngɔ. (Ɛdjɛ lá Ezekiyɛlɛ 33:33.) Iwɔ nkoka ndɔtɔnɔla lá ndjewo kɛ yoke meso ko ntshindama djɛ ntokilika l’ɔtɛmwɛlɔ wɔ piyɔɔ lá ntondo kɛ akambo ntshitana. Ete ngo olami wɔ lokando w’ose Filipɛ ndotshikitanyɛka oloko ngo m’ɔkɔngɔ wɔ ‘ntshikito djɛ looko,’ anto amɔtshi wapawola losango lɔso winá wɔsɔ, nkoka ndotshikitanyɛ eloko m’ɔkɔngɔ wɔ etshitanelo kɛ Babilɔnɛ dj’Ekekete.​—Ele. 16:25-34.

ISO MPOPOSANYƐKA LADJIKƐNDE TƆNGƆKƆPAKE YEHOVA LA DJIINA DJƐNDE

11. Wopo wɔkɔnge wɔpɛyɛso Yehova lomo, womu, la nkfulu? (Ndjiso 4:11) (Lenda edjinge asango.)

¹¹ Elonga keleka djonyi k’opoposanyɛso losango lɔ wɔlɔ nde, iso nkɔpaka Yehova Ndjambe la djiina djɛnde dj’ekina. Tɔngɔsake olemo wɔso w’ipoposanyɛ ete ngo mbamba kɛ numɛ Ndjambe kɛso k’ɔkɔpaso. (Wala Ndjiso 4:11.) Iso ndjawolaka l’oloko ɔmɔ ente: Yehova Ndjambe ndeke lokoka ndongola lomo, womu, la wolo me enkambi wɛnde wɛ nkɔmano. Iso mpɛyɛka Yehova lomo la womu  winá w’oshimelaso anto ankina tolembetelo totoshikikɛ ente nde ‘atongaka nkete nkfumɔ’ la ente ntsha tolekɔ la lowiko nde, nde atotongaka. Tɔngɔpɛyɛke nkfulu kɛso winá w’okambaso la winá wɛso, wolo wɔsɔ, ole looto lɔso djɛ ndápɛyɛ lá lɛdji l’efula l’olemo w’ipoposanyɛ lá nkilika akoka waso. (Mat. 6:33; Luka 13:24; Kɔl. 3:23) Lá yopasɛ, iso nkɔpaka nshimela anto ankina akambo walendana la Ndjambe kɛso k’ɔkɔpaso. Tɔngɔkɔpake lonkina nshimela anto ankina djiina djɛnde la wopo wɔ Ndjambe k’oyɛnde. Lamo?

12. Wopo wɔkɔnge sokinyɛka djiina djɛ Yehova l’olemo wɔso w’ipoposanyɛ?

¹² Ngandji k’okaso Yehova ntotshindaka djɛ nkinyɛ djiina djɛnde. (Mat. 6:9) Iso nkɔpaka ndɔsa opiko djɛ nsola djiina djɛnde má emamɔ wɛ Satana ndomame la má engolo wɛnde w’omfumfu. (Ewa. 3:1-5; Djɔ. 2:4; Dj. 8:44) L’olemo wɔso w’ipoposanyɛ, iso nkɔpaka nseela Ndjambe kɛso, má shimela anto ankfumɔ wangotekameyɛ nsɔsɔlɔ lá nkambo djɛnde. Iso nkombolaka djɛ onto onkfumɔ ndjewa ante djekeka djɛnde djeleká ekekete nde ngandji, yopo yɛnde yɛ ndɔndjɛ yelekɔ djɔ la sii la ente lako ilá Onkfumi wɔnde woshiyɛ ndjolo inkfumɔ la woyakala nkfumbo kɛ wana w’anto vu la osasa. (Yee. 37:10, 11, 29; 1 Dj. 4:8) Winá w’oseelaso lokumu lɔ Yehova l’olemo w’ipoposanyɛ, tongokinyɛke djiina djɛnde. Tongoyalake lonkina l’osasa má ndjewa ente towika lá wopo w’okana la djiina djɛso. Lamo otepelaso nghɔsɔ?

13. Lamo oyɛso l’ofuno wɔ ndjetama Ewakɛ wɛ Yehova? (Izaya 43:10-12)

¹³ Yehova atɔsɔnaka dj’iso ndjala ‘ewakɛ’ wɛnde. (Wala Izaya 43:10-12.) Amboheta ndambo k’ɛnɔnyi, Iloyi yɛ lɔndjɛ atotomelaka onkanda wotepelaki ante: “Lomo loleka ekekete lɔ onto onkfumɔ wɔ l’anteyi kɛso okotshɛnde  nde ndjetama Owakɛ wɔ Yehova.” c Lamo nghɔsɔ? Tokolenda ndjɔmbɔmba kɛnɛ. Ntsha olekɔ la djonyi djɛ onto ɔmɔtshi ndjala owakɛ wɔko lá dombo, ɔngɔsɔna onto wewɛ wɔlɔ, wokokawɔ ndjilela oloko, la wolekɔ la lokumu lɔ wɔlɔ djɛ anto ankina ndjawola owakɛ wɔnde. Má ntɔsɔna ete ngo Ewakɛ wɛnde, Yehova atɛnyɛ ante nde ntewaka wɔlɔ la ntilelaka oloko dj’iso mbakanyɛ ente nde ndeke ɛtɔyi kɛ Ndjambe kɛ nsɔsɔlɔ. Iso nyɛnaka ente alekɔ nkambo djɛ lomo ndjala Ewakɛ wɛnde djɛko ndeke tongokambake la mbamba k’enkfumɔ k’owaso djɛ ndjewanyɛ djiina djɛnde la tongotongolake engolo w’efula wotepelawɔ lá nkambo djɛnde. Má nangha nghɔsɔ, iso mbikaka lá wopo w’okana la djiina dj’oyɛso l’ofuno wɔ ndɔta, djiina Ewakɛ wɛ Yehova!​—Yee. 83:18; Ɔrɔ. 10:13-15.

TONGOKINDJƐ MPOPOSANYƐ TII L’EKOMO

14. Akambo wakɔnge wa wɔlɔ efula watokonga lá ntondo?

¹⁴ Ɔsɔ ngo akambo wa wɔlɔ watokonga lá ntondo! Má esako wɛ Yehova, tokongela djɛ ndɛna anto efula wawola akambo wa nsɔsɔlɔ lá ntondo kɛ ndjolo k’ekekete banga. Lonkina, tolekɔ l’osasa efula ladjikɛnde, kaanga l’eleko keleka ndjolo kɛ l’ɔkɔndɔ wɔ wana w’anto, ntepela ente lá ndjolo k’ekekete, tokoka ndɛna anto efula wapɛyɛ andja wa Satana ɔkɔngɔ ko watɔlɔnda djɛ ndolumɛ Yehova esanga laso!​—Ele. 13:48.

15-16. Kɛkɔnge kɛ songokindjɛ nangha, ko tii winá wɔkɔnge?

¹⁵ Lá winá wɔkɔ ɔmɔ, tolekɔ l’olemo wɔ nangha. Tolekɔ la mpeyi kɛ ndɔsa opiko l’olemo wopangonanghema lonkina lotshinda lotshinda, olemo wɔ mpoposanyɛ losango lɔ wɔlɔ l’Onkfumi wɔ Ndjambe lá looko l’otondo. Lá winá wɔkɔ ɔmɔ, iso ladjɛ nkindjɛ ndjewoyɛ anto akambo wakɔpa nanghema lako ilá. Anto ladjɛ ndjewa ambɔ ekomo kɛ nkfumbo dj’akambo djɛnɛ kelasɛmɛla lankenke lankenke. Masɔ winá wɔ eleko kɛ dombo yongokoka, wangewa ambɔ losango lɔ sapoposanyɛka yaye nde me Yehova Ndjambe.​—Ezk. 38:23.

¹⁶ Iya nkano djɛkɔnge djɛ sɔmbɔsa? Tongokindjɛ mpoposanyɛ l’osasalo, lankenke lankenke ole l’entente m’ɔtɛ wɔ ngandji kɛso tá losango lɔ wɔlɔ, te anto la pekapeka te Yehova Ndjambe la djiina djɛnde, tii winá wɔ Yehova ndongotepela ante: ‘Ambokoka!’