DJAMBA DJƐ WEKELO 21
YEEMBO 107 Ndjɔmbɔmba kɛ ngandji ketotshikelisá Ndjambe (lá Otetela)
Wopo wɔ mba wadji kana wome wɔ wɔlɔ
‘Onto wɔkɔna wokoka mba wadji wɔ wɔlɔ? Nde ndeka lɔwɔkɔ lɔ kɔrayi ntsho otale.’—WOO. 31:10.
IKANYI YƐ DJAMBA DJƐNƐ
Tɔngɛna lɔ tɔkfɔ tɔ Bible tokoka nkotshɛ́ onto djɛ mba wadji kana wome wɔ wɔlɔ, la wopo w’anto ankina w’otshumano okokawɔ nsuka endjemba wɛkɔpa ntshukana.
1-2. a) Akambo wakɔnge Akristo w’endjemba oyɛwɔ ladjɛ nshishima lá ntondo k’iwɔ mbanga nsawola djɛ bala? b) Eleko kɛ mbembo osakisolawɔ nge? (Lenda “Djɛ ndjoka wɔlɔ.”)
WƐ ƆKƆPA ntshukana? Djɛ ndjala l’osasa ape ngo ntshukana, koko kaanga oyɛwɔ nghɔsɔ, Akristo efula w’endjemba, ayale elangala, eseka kana nkokolo, wangokongelake l’oloko pakipaki djɛ ntshukana. Lá nsɔsɔlɔ, lá ntondo kɛ wɛ mbanga mbembolana, wɛ ladjɛ ndjala entshupa lá yimba, lá nyuma, ole ndjala la lofalanga. a (1 Kɔ. 7:36) Ntsha oyɛwɔ nde nghɔsɔ, okoka mba bala dj’osasa.
2 Koko, apayalaka winá enkfumɔ wɔdju djɛ mba wadji kana wome wɔ wɔlɔ. (Woo. 31:10) Kaanga winá w’owɛ onto wɔkɔpɛ ndjeka djɛ ndowewa wɔlɔ wɔlɔ, apayalaka winá enkfumɔ wɔdju djɛ ntateyɛ eleko kɛ mbembo. b Lá djamba djɛnɛ, tɔngɛna kɛnɛ kekoka nkotshɛ́ Akristo w’endjemba djɛ mba wome kana wadji wɔ wɔlɔ la wopo w’okokawɔ mbanga mbembolana. Tɔngɛna lonkina wopo wɔ anto ankina w’otshumano okokawɔ nkotshɛ́ waakɔpa ntshukana.
DJƐ MBA WADJI KANA WOME WƆ WƆLƆ
3. Akambo wakɔnge Akristo w’endjemba oyɛwɔ ladjɛ nshishima winá w’ohonawɔ wadji kana wome?
3 Ntsha ɔkɔpa ntshukana, angoyala wɔlɔ wɛ nshikikɛ lá ntondo kɛnɛ k’ohonɛ le onto w’ɔkɔpɛ ntshukana la nde lá ntondo kɛ nyo mbanga nsawola djɛ bala. Ntsha lako, okoka ntshika onto w’okoka la wɛ ko ndosawola l’onto w’opakoke la wɛ. Lá nsɔsɔlɔ, wɛ ladjɛ mbembolana ngo la Okristo w’ombolongola batisimo. (1 Kɔ. 7:39) Koko ape onto onkfumɔ w’ombolongola batisimo ndeke longoyala wadji kana wome wɔ wɔlɔ le wɛ. Djɛko ndeke, okoka ndáwopola ente: ‘Okoma wɔmi lá lowiko nge? Wekeka wakɔnge wa djonyi wohonami le wadji kana le womɛmi? Akambo wokongelami me nde wɛnyɛ ente ndekɔ l’ekanedji kɛ yimba kɛ wɔlɔ?’
4. Akambo amɔtshi wakɔnge anto amɔtshi yɔlɔmbaka lá ndɔmbɔ yɛwɔ?
4 Ape l’ehamo, wɛ ɔmbɔlɔmbaká djɛ mba wadji kana wome wɔ wɔlɔ ntsha okombola ntshukana. (Flp. 4:6) Lá nsɔsɔlɔ, Yehova apalake kaanga onto ɔmɔ ante angɔpɛyɛ wadji kana wome. Koko nde ndjewaka mposɛ yɛko la nde nkoka nkokotshɛ́ lá welo w’ilɛ djɛ wɛ mba wadji kana wome wɔ wɔlɔ. Djɛko ndeke kindjɛ ndoshimela mposɛ l’ehomba wɛko. (Yee. 62:8) Lɔmba djɛ nde nkɔpɛyɛ balo la bale ntshitshi. (Dja. 1:5) John, c wɔnanyɔ ɔmɔtshi w’ondjemba wemá États-Unis apakisola kɛnɛ kilakande lá ndɔmbɔ yɛnde, ante: “Langoshimelake Yehova wekeka w’okombolami wadjɛmi ndjala la wakɔ. Langɔlɔmbake mbamba yɛ mpomana la wadji wɔ wɔlɔ. Langɔlɔmbake lonkina Yehova djɛ nde nkotshɛ́ djɛ lemi ndjala la wekeka wangonangha djɛ lemi ndjala wome wɔ wɔlɔ.” Tanya, nkaana kɛmɔtshi kemá Sri Lanka atepela ante: “Winá w’ohonami wome, langɔlɔmbake Yehova djɛ nde nkotshɛ́ lemi djɛ ntshikala la nkɔmano, l’ikanyi yɛ wɔlɔ ole l’osasa.” Kaanga ntsha otawa wadji kana wome wɔ wɔlɔ winá wɔsɔ, Yehova ndakaka ante angokindjɛ nkoseeyɛ ehomba wɛko wɛ demba la wɛ yimba.—Yee. 55:22.
5. Mbamba yɛkɔnge Akristo w’endjemba okotshɛwɔ djɛ mpomana l’onto wɔkɔpa Yehova? (1 Kɔrɛtɔ 15:58) (Lenda edjinge ntshango.)
5 Bible ntokembɛka djɛ ndjala ‘l’akambo efula wa nangha l’olemi wɔ Nkfumi.’ (Wala 1 Kɔrɛtɔ 15:58.) Ntsha okindjɛ ndjala l’akambo efula wa nangha l’olemo wɔ Yehova, la okindjɛ mpetshɛ winá la wananyɔ l’ankaana itshikitanyi, ongowa ntombe ikokembɛ, la mbamba yɛ mpomana la wananyɔ kana ankaana iyapɛyɛ l’olemo wɔ Yehova ngete wɛ. La winá w’onanghɛ la wolo djɛ nsasangɛ Yehova, ongoyala l’osasa wɔ nsɔsɔlɔ.
Ntsha okindjɛ ndapɛyɛ l’olemo wɔ Yehova la ohetshɛ winá l’Akristo ankina, okoka mpomana la anto ankina walekɔ́ l’ikanyi yɛ mpɛtshɛ bala (Lenda itenyi 5)
6. Kɛkɔnge k’Akristo w’endjemba oyɛwɔ ladjɛ mvungɔ winá w’ohonawɔ wadji kana wome?
6 Koko kota nkambo djɛnɛ: Tawolake djɛ ohonelo wɔ wadji kana wome ndjala ekete keleka djonyi lá lowiko lɔko. (Flp. 1:10) Ape mande olekɔ ondjemba kana mpɛtshɛki ndeke okokɛ ndjala l’osasa wɔ nsɔsɔlɔ, koko mande olekɔ la djokanelo djɛ wɔlɔ la Yehova. (Mat. 5:3) Lonkina, winá w’oyɛ ondjemba, okoka ndjala la mbamba efula yɛ ndeka nkambela Yehova. (1 Kɔ. 7:32, 33) Kamba la winá wɔko wɔsɔ lá lɛdji lɔ wɔlɔ. Jessica, nkaana kɛmɔtshi kemá États-Unis ketshukamisá l’ɛnɔnyi nsuke la 40 atepela ante: “Ndjalaki l’akambo efula wa nangha l’olemo wɔ Yehova, kɛsɔ kenkotshɛ́ka djɛ ndjala l’osasa, kaanga makongaka bala.”
ƆSA WINÁ DJƐ NKƆMƐ
7. Lamo oyɛwɔ nkambo djɛ balo nkɔmɛ onto wɔlɔ wɔlɔ lá ntondo kɛ ndoshimela ikanyi yɛko? (Woongo 13:16)
7 Iya ntsha ɛna ente onto ɔmɔtshi akoka ndjala wadji kana wome wɔlɔ le wɛ? Wɛ ladjɛ ntshɔ ntoshimela onto wɔkɔ ipa ntshatshimba? Bible ntepelaka ante kanga nkɛsɔ nanghaka akambo la balo. (Wala Woongo 13:16.) Djɛko ndeke, yala la balo djɛ nkɔmɛ onto wɔkɔ lá wisisa l’ilá kɛ winá ɛmɔtshi lá ntondo kɛ ndoshimela ikanyi yɛko. Aschwin, kanga lowika lá Pays-Bas, atepela ante: “Mposɛ nkoka mfula lankeke, koko lonkina nkoka mpɔla lankeke. Djɛko ndeke má ndɔsa winá wɔ nkɔmɛ onto ɔmɔtshi, ongoyalama dj’ipa nsawola la nde djɛ bala m’ɔtɛ wɔ mposɛ yɛ lodjadjiko y’okɛ.” Koko, winá w’oyɛ ndɔkɔmɛ onto onkina, okoka nyɛna ente onto wɔ ngakɔmɛ ntondo wonyi atasamba nkoka la wɛ.
8. Wopo wɔkɔnge ondjemba okokande nkɔmɛ onto wɔkɔpande nsawola la nde djɛ bala? (Lenda edjinge ntshango.)
8 Wopo wɔkɔnge w’okokɛ nkɔmɛ onto ɔmɔtshi lá wisisa? Okoka ndjewa lonyuma, lonto la eyalelo kɛnde winá wɔ nsanghanyɛ y’otshumano, kana w’opomananyo l’oloyi ɔmɔtshi. Olekɔ́ ntombe yɛnde na, olekakande nsawola akambo wakɔnge? (Luka 6:45) Ekoma wɛnde, wokana la wɛko? Okoka nsawola la tokokolo tɔ otshumano wɔnde kana l’Akristo ankina wambotshunda lá nyuma w’owewa wɔlɔ. (Woo. 20:18) Okoka ndjopola ntsha alekɔ la wekeka ole la lokumu lɔ wɔlɔ. (Oru. 2:11) Winá w’ɔkɔmɛ onto wɔkɔ, yashikikɛ dj’ipa nde ndjewa ko ndɛna nyɛtshi. Lɛmɛyɛ mposɛ yɛnde la ewa ente lako wɔlɔ ntshatshimbaka winá enkfumɔ le nde la mpona djɛ ndjewa ikakambo inkfumɔ ilendana la nde.
Lá ntondo kɛ nshimela onto ɔmɔtshi ikanyi yɛko, kɔmɛnde lá wisisa l’ilá k’etsho ɛmɔtshi (Lenda itenyi 7-8)
9. Lá ntondo kɛ nsawola l’onto w’okoka ndjala wadji kana womɛko, kɛkɔnge k’oyɛ ladjɛ ndáshikikɛ?
9 Etsho emangha w’oyɛ ladjɛ nkɔmɛ onto lá ntondo kɛ ndoshimela ikanyi yɛko? Ntsha apayalisa ilá ko omboshimela, akoka nyɛnama ngo ngete ɔngɔsake akano ipa ntɔnɔla. (Woo. 29:20) L’onkoko onkina, ntsha koko amboyala ilá efula, pekapeka ntsha onto onkina ambewa ante olekɔ l’ikanyi yɛ nsawola la nde, akoka nyɛna ngo ngete wɛ okakanyɛ djɛ ndɔsa nkano djɛko. (Los. 11:4) Vungɔ ente lá ntondo kɛ wɛ nsawola la nde, lako ohomba wɔ wɛ ndáshikikɛ ente nyongotshukana. Koko wɛ ladjɛ ndjala l’eshikikelo ente olekɔ entshupa djɛ ntshukana, la onto wɔkɔ angokoka la wɛ.
10. Kɛkɔnge k’oyɛ ladjɛ nangha ntsha ɔmɛna ente onto ɔmɔtshi akɔkɔpa ko wɛ ɔpɔkɔpɛ?
10 Iya ntsha ombewa ente onto ɔmɔtshi angɔkɔkɔpake? Ntsha wɛ ɔpɔkɔpɛ, ɛnyɛnde nkambo djɛsɔ papoo má nanghedji djɛko. Angoyala nyɛtshi onto mfɛnyɛ ante mbamba kɛ nyo ntateyɛ nsawola djɛ bala kelekɔ, ntshende ape nghɔsɔ.—1 Kɔ. 10:24; Ɛfɛ. 4:25.
11. Lá ewila w’anto ankina okokawɔ mpomanyɛ mpame l’omoto kana nonghanyɛ bala, akambo wakɔnge w’oyɛwɔ ladjɛ ntɔnɔla la nkɔmɛ nkfumɔ?
11 Lá djena mɔtshi, ambotshi kana nkokolo nkoka nsɔnɛla boto djɛwɔ dj’endjemba wadji kana wame. Lá djena nkina, ase nkfumbo kana tolongo nkoka mponela ondjemba ɔmɔtshi wadji kana wome, ko makɔ, iwɔ nonghanyɛ djɛ ndapomanyɛ djɛ mpame la omoto wɔkɔ ndosawola. Ntsha wambɔkɔlɔmba djɛ wɛ ndɔngɔsɔla djɛ mpame la omoto ndopomana dj’iwɔ ndosawola kana dj’iwɔ ntshukana, nangha la wolo djɛ ndjewa kɛnɛ kɛ iyape kɛkɔ ɔkɔpawɔ la oyɛwɔ la djonyi. Ntsha ɔmɛna ente onto ɔmɔtshi akoka la ewoto kana lotombe lɔko, hona djɛ ndjewa onto wonyi wɔlɔ wɔlɔ, djɛ ndjewa wekeka la lonto lɔnde, la ekete keleka nde, lonyuma lɔnde. Djokanelo djɛ wɔlɔ la Yehova dekɔ djonyi efula ndeka kaanga mfalanga, nkalasa, kana mpipo k’andja wanɛ. Koko, vungɔ ente wɔnanyɔ la nkaana kɛ ondjemba ndeke lɔngɔsa nkano dj’ekomo, ntsha wangotshukana kana lako.—Nga. 6:5.
WOPO W’OKOKANYO NTATEYƐ NSAWOLA
12. Ntsha ɔkɔpa nsawola l’onto ɔmɔtshi djɛ bala, wopo wɔkɔnge w’okokɛ ndoshimela?
12 Ntsha ɔkɔpa ntateyɛ nsawola l’onto ɔmɔtshi djɛ bala, wopo wɔkɔnge w’okokɛ ndoshimela ikanyi yɛko? d Okoka ndálɔngɔsɔla djɛ nsawola la nde lá ntshandjawala kana lá telefɔnɛ. Shimelande ikanyi yɛko papoo. (1 Kɔ. 14:9) Ntsha angoyala djonyi, pɛyɛ onto wɔkɔ winá wɔ nde ntɔnɔla lá ntondo kɛ nde nkokadjimola. (Woo. 15:28) Edjinge ntsha onto apakɔpɛ, lɛmɛyɛ ikanyi yɛnde.
13. Kɛkɔnge k’okokɛ nangha ntsha onto ɔmɔtshi ambokoshimela ante nde nkɔkɔpaka? (Kɔlɔsɛ 4:6)
13 Iya ntsha onto ambawola? Akoka ndjala la djonyi djɛ oloko wolo djɛ nkoshimela ikanyi yɛnde, djɛko ndeke yala la dilɛmɛlɔ ole l’osasango. (Wala Kɔlɔsɛ 4:6.) Ntsha olekɔ la djonyi djɛ winá djɛ wɛ ntɔnɔla ntsha ɔkɔpa mbanga mbembolana la nde, shimelande. Koko, ntsha nkokaka, nangha la wolo djɛ nkadjimola ndambo lankeke. (Woo. 13:12) Ntsha opakɔpɛ, nshimelande papoo ole la dilɛmɛlɔ. Kolenda wopo wɔ Hans, wɔnanyɔ ɔmɔtshi wemá Autriche, ndakadjimola winá wɔ nkaana kɛmɔtshi ndohone: “Ndoshimelaka nkano djɛmi papoo koko la dilɛmɛlɔ. Ndokadjimolaka lankeke mande ntakɔpa nde nkonga lemi ekonga konga. M’ɔtɛ w’elonga kɛkɔ kɛmɔ, mbadjɛki dj’ipa ntepela kana nangha nkambo mɔtshi djekoka ndotshinda djɛ nde mfɛnyɛ ante lambotshikitanyɛ ikanyi yɛmi.” L’onkoko onkina, ntsha ɔkɔpa mbembolana l’onto wɔkɔ, shimelande wopo wɔkɔpɛ akambo mpeta lá eleko kɛnyo kɛ mbembo. Akambo w’onto l’onto okongande me winande nkoka ntshikitana má nkilika nkfumbo, idjena y’onto ndafule la m’akambo ankina.
WOPO WƆKƆNGE ANTO ANKINA OKOKAWƆ NKOTSHƐ́ AKRISTO W’ENDJEMBA?
14. Wopo wɔkɔnge w’okokaso nsuka Akristo w’endjemba m’etepela wɛso?
14 Wopo wɔkɔnge isankfumɔ okokaso nsuka Akristo w’endjemba wakombola ntshukana? Wopo ɔmɔtshi nde, má nkɔmɛ wɔlɔ wɔlɔ kɛnɛ k’otepelaso. (Ɛfɛ. 4:29) Tokoka ndáwopola ente: ‘Langɔsɔkake anto wakɔpa ntshukana? Winá w’ɛnami wɔnanyɔ la nkaana k’ondjemba wasawola, langɔfɛnyɛke ente wakɔpana iyape kɛkɔ?’ (1 Ti. 5:13) Lá djiko djɛ lasɔ, topakoke lotshinda nangha dj’Akristo w’endjemba nyɛna ngo ngete wasamba ekete kɛmɔtshi kana wapalekɔ la ntshina mande watatshukana. Hans, kanga sɛnisa má djiko atepela ante: “Wananyɔ amɔtshi wandjopolaki ambɔ: ‘Wɛ ngopatshukana lamo? Opalekɔ lonkina ilɛngɛ.’ Etepela wɛ nghɔsɔ wekoka ntshinda endjemba djɛ nyɛna ete ngo wapalekɔ la ntshina la wakoka nyɛna ngo ngete watshinda la wolo djɛ ntshukana.” Ɔsɔ ngo yongoyala wɔlɔ mpona mbamba yɛ mbandjɛ Akristo w’endjemba!—1 Te. 5:11.
15. a) Lá nkilika ikfɔ ilekɔ lá Ɔrɔma 15:2, kɛkɔnge k’oyɛso ladjɛ nshishima lá ntondo kɛ nkotshɛ́ onto ɔmɔtshi djɛ nde mba wadji kana wome wɔ wɔlɔ? (Lenda edjinge ntshango.) b) Elakanyelo wɛkɔnge wɛ djonyi ngombowa má video?
15 Iya ntsha tɛna ente wɔnanyɔ la nkaana kɛmɔtshi wakoka nkfumba bala djɛ wɔlɔ? Bible ntoshimelaka djɛ ndɔsa mposɛ y’anto ankina l’odjito. (Wala Ɔrɔma 15:2.) Endjemba efula wapakɔpaka anto ankina ndasɔnɛla onto w’okoka ntshukana la nde, iso ladjɛ nɛmɛyɛ ikanyi yɛwɔ. (2 Te. 3:11) Amɔtshi wangɔkɔpake ndakotshɛ́, koko topakoke nangha nkambo djɛsɔ ntsha watatɔlɔmbɛ. e (Woo. 3:27) Endjemba ɛmɔtshi wapakɔpaka ndashimela mbala kɛkɔ kɛmɔ ente lambokowayela onto w’okokɛ ntshukana la nde. Lydia, nkaana kɛmɔtshi k’epolo kemá Allemagne atepela ante: “Okoka nonghanyɛ ngo djɛ wananyɔ l’ankaana mpomana l’oloyi ɔmɔtshi. Omboposɛ ngo mbamba k’iwɔ mpomana ko ndatshika iwɔ yɔmɛlɛ ndɔsa nkano djɛ kɛnɛ k’ɔkɔpawɔ nangha.”
Nsanghana lá eloyi wɛ nkekete mpɛyɛka Akristo w’endjemba mbamba k’iwɔ mpomana (Lenda itenyi 15)
16. Kɛkɔnge k’Akristo w’endjemba oyɛwɔ ladjɛ mvungɔ?
16 Isankfumɔ, ayale endjemba kana antshukami, tokoka ndjala la lowiko l’osasa! (Yee. 128:1) Djɛko ndeke ntsha ɔkɔpa ntshukana koko otawa onto w’okoka, kindjɛ ndápɛyɛ l’olemo wɔ Yehova. Nkaana kɛmɔtshi kemá Macao ketawɔ Sin Yi atepela ante: “Lá ndjɛdjɛ la winá wɔ nghongokoka mpetshɛ la wadji kana womɛko lá Paradiso, winá w’oyɛ ondjemba wɛnama ete ngo wolekɔ daambi efula. Sasanga edjinge kamba la winá wɔkɔ lá lɛdji lɔ wɔlɔ.” Iya ntsha ombowa onto w’okoka la wɛ la nyombowanga mbembolana? Lá djamba djeyaye tɔngɛna wopo w’okokanyo mbembolana lá lɛdji lɔ wɔlɔ.
YEEMBO 137 Ankaana yɛso y’Akristo walekɔ amato wa nkɔmano (lá Otetela)
a Djɛ ndáshikikɛ ntsha olekɔ entshupa djɛ ntshukana, lenda lá jw.org djamba “Fréquenter (partie 1): Suis-je prêt ?”
b DJƐ NDJOKA WƆLƆ: Lá djamba djɛnɛ la djeyaye, “eleko kɛ mbembo” nsakisolaka eleko kɛ mpame l’omoto osawolawɔ djɛ ndjewana wɔlɔ wɔlɔ dj’iwɔ ndáshikikɛ ntsha wakoka ndjala wadji kana wome wɔ wɔlɔ. Lá ewila ɛmɔtshi akoka nsakisola eleko kɛ mpame l’omoto oyɛwɔ ashile, k’osawolawɔ djɛ ndjewana wɔlɔ, kana k’oyɛwɔ la djokanelo dj’efula má ngandji k’okanawɔ. Eleko kɛ mbembo mbangaka winá wɔ mpame l’omoto oshimelanawɔ papoo ambɔ wakɔpana la kengokindjɛke tii winá w’ɔsawɔ nkano djɛ ntshukana kana djɛ nkapolana.
c Nkombo imɔtshi itshikitanyemaka
d Lá nkfumbo mɔtshi, mbala efula wananyɔ ndeke l’ohonaka ankaana djɛ mbanga nsawola la wɔ djɛ bala. Koko lako nyɛtshi nkaana mpona wɔnanyɔ. (Oru. 3:1-13) Djɛ ndjewa akambo efula, lenda djamba: “Les jeunes s’interrogent . . . Comment lui dire ce que je ressens pour lui ?” lá Réveillez-vous ! wɛ Ngɔndɔ kɛ djomi 22, 2004.
e Lenda video: Wanɛ walɔ ta dia dimɛna dikambo dia mbetawɔ—Akristo w’enyemba, lá jw.org.
