1-2. Ambotshi oyɛwɔ ladjɛ ndjelola ngete mo winá wɔ wɔna opolande weepó welendana l’akambo wa Bible wawolaso?

 ANTO efula wangosanga lolemi ambɔ ndjala ombotshi alekɔ olemo w’ekekete efula. Ntsha olekɔ la wɔna wɔ daambi, tɔmbɔkɔlɔmba djɛ nangha la wolo djɛ nkembɛ djawo djɛnde. (Mvu. 6:​6, 7) Winá wɔ wɔnako ndongotafulaka angotateyɛ ndjopola weepó welendana la akambo wa Bible wawolaso, ole ɛlɛmbɛ wɛ Bible welendana la nanghedji.

² Má bango, okoka nkiyana m’ɔtɛ wɔ weepó wɛ wɔnako. Okoka kaanga mfɛnyɛ ente ntsha opola weepó nde mande djawo djɛnde ntahɔlɛ. Koko lá nsɔsɔlɔ, winá wɔ wɔna ndotafule, angopolaka weepó djɛ nkembɛ djawo djɛnde. (1 Kɔ. 13:11) Djɛko ndeke, opalekɔ l’elonga kɛ ndjoka wɔma. Okoka ndɔsa weepó enkfumɔ wɛ wɔlɔ wɛ wɔnako opolande welendana la djawo djɛso ete ngo mbamba kɛ ndookotshɛ́ djɛ nde mfudjɛ nkoka dj’ekanedji kɛ yimba.

3. Ɛnaso lá djamba djɛnɛ lɔ nge?

³ Lá djamba djɛnɛ, tɔnghɛna wopo w’ambotshi okokawɔ nkotshɛ́ wɔna kana wana wawɔ djɛ 1) mfudjɛ djawo djɛwɔ, 2) mfudjɛ djedjɛ djɛwɔ lá ɛlɛmbɛ wɛ Bible welendana la nanghedji, la 3) nseela djawo djɛwɔ. Tɔnghɛna lonkina akambo amɔtshi wa djonyi w’okokaso mposɛ má weepó wɛ wana, la akambo amɔtshi wa nangha lá nkfumbo wangɔpɛyɛ ambotshi mbamba kɛ ndashimela akambo wa Bible wawola Akristo.

 KOTSHƐ́ WƆNAKO DJƐ NDE MFUDJƐ DJAWO DJƐNDE

4. Ilɛngɛ okokande ndjala la weepó wɛkɔnge, ko lamo?

⁴ Ambotshi w’Akristo ndjewaka ambɔ djawo le Ndjambe apalekɔ ekete k’okokawɔ nsambeyɛ wana wawɔ. Wɛ otawotshɔ la djawo le Yehova. Djoyi djɛsɔ dekɔ nsɔsɔlɔ ole le wɔnako. Ilɛngɛ nkoka nana ilá efula la weepó ete ngo wɛnɛ: ‘Okokami ndjewa ente Ndjambe alekɔ ngete mo? Nkoka ndjawola nsɔsɔlɔ kɛnɛ kɛ Bible olakanyɛnde?’ Lá nsɔsɔlɔ, Bible ntokembɛka djɛ nkamba la ‘akoka waso w’ekanedji kɛ yimba’ la djɛ ‘nshishima akambo ankfumɔ.’ (Ɔrɔ. 12:1; 1 Te. 5:21) Ko, okokɛ nkotshɛ́ wɔnako djɛ nkembɛ djawo djɛnde ngete mo?

5. Ambotshi oyɛwɔ ladjɛ nangha nge djɛ mfudjɛ djawo djɛ wɔnawɔ lá Bible? (Ɔrɔma 12:2)

⁵ Nyokembɛ wana wanyo dj’iwɔ yɔmɛlɛ ndjewa nsɔsɔlɔ. (Wala Ɔrɔma 12:2.) Winá wɔ wɔnako opolande weepó, kamba la mbamba kɛsɔ djɛ ndɔwɛnyɛ wopo w’okokande mba ndjɔndɔ, má nkamba la mpeko dj’ohonelo ete ngo Index des publications des Témoins de Jéhovah, la Dibuku di’eyangelo di’Ɛmɛnyi wa Jehowa. Lá Dibuku di’eyangelo, akoka ndenda lá itɛ yɛ djoyi “Bible,” anghɛna “Mfunama má wolo wɔ Ndjambe” djɛ nde ndjisola tolembetelo tɛnyɛ ente Bible mpalekɔ ngo onkanda wɔ wɔlɔ w’anto yafune. Koko, oyɛwɔ nde ‘Otepela wɔ Ndjambe.’ (1 Te. 2:13) Ndjɔmbɔmba, akoka mpona ngando kɛ Ninivɛ kɛ Asuriya wa ntondo. L’etsho wemboheta, anyɔnyɔdji amɔtshi wa Bible watepelaki ambɔ ngando kɛ Ninivɛ ketayala. Koko lá 1850, wisolaka boko djɛ ngando kɛsɔ, kɛsɔ kɛnyɛka ente ɔkɔndɔ wɔ Bible wɔsɔ wolekɔ nsɔsɔlɔ. (Sef. 2:​13-15) Djɛ ndjewa akambo efula lá wopo wɔ etshitanelo kɛ Ninivɛ yakotshɛ prɔfɛsi kɛ Bible, akoka ndenda djamba: “Wɛ ongewake?” lá Etange k’Olami kɛ Ngɔndɔ kɛ djomi l’ɔmɔ 2021. Má ndjɛdjɛ akambo wekande m’enkanda wɛso la kekande m’enkanda wɛ siansɛ la má nkete nkina djɛdje ndjilela oloko, wɔnako angowa elonga kɛ mfudjɛ djawo djɛnde lá kɛnɛ kɛ Bible otepelande.

6. Wopo wɔkɔnge ambotshi okokawɔ nkotshɛ́ wɔna djɛ nde ndjala l’ekanedji kɛ yimba kɛ wɔlɔ? Pɛyɛ ndjɔmbɔmba. (Lenda edjinge ntshango.)

⁶ Kotshɛ́ wɔnako djɛ nde ndjala l’ekanedji kɛ yimba. Ambotshi walekɔ la mbamba efula yɛ nsawola la wɔnawɔ akambo wa Bible kana djɛ djawo le Ndjambe. Wakoka mba mbamba yɛsɔ winá w’owembolawɔ musée, ewolo kɛmɔtshi kɛ yombokona ansoso la etamba wɛ wɔlɔ, kana winá w’owembolawɔ filialɛ kɛ Ewakɛ wɛ Yehova. Ndjɔmbɔmba, winá w’otshɔnyo ntowembola musée, kana wolendanyo l’ɛntɛrnɛtɛ, okoka nsepa ikanyi yɛnde lá nkambo nanghemisá l’etsho wemboheta kana lá ekete kɛmɔtshi k’anto yatshule kengokembɛ djawo djɛnde  ente Bible ntepelaka nsɔsɔlɔ. Wɔnako ndjewaka ante djiina djɛ Ndjambe dekɔ lá banga mbonangha ɛnɔnyi 3000 dj’etawɔ Stèle de Mesha? Banga djɛsɔ dekɔ lá Musée du Louvre lá Paris, lá France. La koko, foto kɛ Stèle de Mesha kelekɔ lá Musée “Bible la djiina djɛ Ndjambe” lá Biro dj’Ekekete djɛ Ewakɛ wɛ Yehova lá Warwick, lá New York. Banga Stèle de Mesha djɛnyɛ ente Nkfumi kɛ Moabɛ, Mesha atɔmbɔkɛlaka Isariyɛlɛ. Kɛsɔ kokana la kɛnɛ kɛ Bible otepelande. (2 Nk. 3:​4, 5) Winá wɔ wɔnako ndɔnghɛna la wiso wande tolembetelo tɔ Bible tɔ nsɔsɔlɔ la tɔ djɔ tɔsɔ, djawo djɛnde ngokemba.— Ɛdjɛ la 2 Ɛkɔndɔ 9:6.

7-8. a) Olakanyelo wɔkɔnge wowaso má etongelo kɛ nkamɔ kɛnaso lá looko? Pɛyɛ ndjɔmbɔmba. (Lenda edjinge ntshango.) b) Okokɛ ndjopola wɔnako weepó wɛkɔnge djɛ nkembɛ djawo djɛnde le Ontongi?

⁷ Nkembɛ wɔna djɛ nde ntɔnɔla lá etongelo. Winá wɔ nyotaheta l’okonda kana lá bandja, sepa ikanyi yɛ wɔnako lá nkete mɔtshi ntongamisá lá lɛdji lɔ nkamɔ. Lamo? Nkete djɛsɔ dekɔ ilembetelo yɛ yimba la balo djɛ kanga lotongisá. Ndjɔmbɔmba, ase siansɛ wambeka nkete mɔtshi djɛ nkamɔ efula l’ilá k’ɛnɔnyi. Nicola Fameli, ondjewi ɔmɔtshi wɔ nkete dekɔ la lowiko (Biophysicien), apakisola ante winá w’owalɛ lofulo lɔ spiralɛ ilekɔ́ lá ansoso wa chou romanesco, ɔnghɛna ente lofulo lɔ Fibonacci lolekɔ ngo lɔmɔ. Alekɔ ngo wopo wɔkɔ ɔmɔ ole djɛ spiralɛ ikfumba ɔtɛ wɔ tournesol, kana nkete nkina mposɛ ansoso wa wepo etshikitanyi. a

⁸ Winá w’eka wɔnako akambo wa siansɛ lá nkalasa, angewa ante nkete efula ngokilikake ɛlɛmbɛ w’etongelo wɛ yawilela. Ndjɔmbɔmba, etamba efula wɛngɔlɔndake ngo wopo wɔ yatonge. Otamba mposɛka antape, ko antape ntoposɛ totatape. Etakawɔ wopo w’otamba oposɛnde antape wɔsɔ nde fractale. Fractale nanghemaka kaanga lá nkete nkina ntongamisá. Iya ilisá ɔlɛmbɛ wɔ nkete djɛsɔ nanghema nghɔsɔ na? Olekɔ́ l’ɔkɔngɔ wɔ ɛlɛmbɛ w’etongelo la nkete nkfumɔ djɛ wɔlɔ ntongamisá djɛnaso la looko na? Winá wɔ wɔnako okindjɛnde ntɔnɔla lá weepó wɛ nghɔsɔ, angoyala la djawo djɛ wolo ante Ndjambe ndeke lotongisá nkete nkfumɔ. (Heb. 3:4) Winá ɛmɔtshi, okoka ndowopola woopó wɔnɛ: “Ntsha Ndjambe ndeke lototongisá, ape ewa wopo wɔ wɔlɔ w’okokaso mbika djɛ ndjala l’osasa?” Okoka nyɛnyɛ ente ɛlɔndjɛlɔ kɛ djonyi kɛsɔ kelekɔ lá Bible.

MFUDJƐ DJEDJƐ LÁ ƐLƐMBƐ WƐ BIBLE WELENDANA LA NANGHEDJI

9. Ekete kɛkɔnge kekoka ntshinda wɔna djɛ ndjopola weepó lá nkambo dj’ɛlɛmbɛ wɛ Bible welendana la nanghedji?

⁹ Ntsha wɔnako opola djɛ ndjewa ntshina k’ɛlɛmbɛ wɛ Bible welendana la nanghedji,  hona djɛ ndjewa lamo opolande weepó wɛsɔ. Nde apawola nsɔsɔlɔ ɛlɛmbɛ wɛ Bible wɛsɔ, ndo koko oyɛnde ngo l’okakasano wɔ nseela djawo dj’Akristo winá w’osawolande nya anto ankina? Lá akambo amɔtshi, okoka nkotshɛ́ wɔnako djɛnde nkɔpa ɛlɛmbɛ wɛ Bible welendana la nanghedji má ndjeka onkanda Sasanga la lowiko lotshinda lotshinda! b

10. Okokɛ nkotshɛ́ wɔnako djɛ nde ntɔnɔla lá djokanelo djɛnde nya Yehova ngete mo?

¹⁰ Kembɛ wɔnako djɛ nde ndɔsa djokanelo djɛnde nya Yehova la ntshina. Winá w’ekɛ Bible nya wɔnako, opolande weepó wengotshinda djɛ nde ntepela kɛnɛ kelekɔ́ l’oloko wɔnde, la kamba la ndjɔmbɔmba ilekɔ́ lá onkanda Sasanga la lowiko lotshinda lotshinda!​ (Woo. 20:5) Ndjɔmbɔmba, wekelo 8 wɛdjɛ Yehova la ilongo yɛ ngandji itɔpɛyɛ mvungo ikoka ntolama la ntoyakala wapɔ. M’ɔkɔngɔ wɔ nshishima 1 Djɔanɛ 5:​3, okoka ndjopola ente, Má ndjewa ente Yehova alekɔ ete ngo Ilongo, oyɛso ladjɛ ndɔsa akambo w’otoshimelande dj’iso nangha ngete mo?” Woopó wɔsɔ wokoka nyɛnama ete ngo wɔ daambi, koko w’okoka nkotshɛ́ wɔnako djɛ nyɛna ɛlɛmbɛ wɛ Ndjambe ete ngo ilembetelo yɛ ngandji kɛnde.—Iza. 48:​17, 18.

11. Okokɛ nkotshɛ́ wɔnako djɛnde nkɔpa tɔkfɔ tɔ Bible ngete mo? (Woongo 2:​10, 11)

¹¹ Ɛnyɛnde wopo w’owaso wapɔ má nkamba la tɔkfɔ tɔ Bible. Winá w’owalanyo Bible kana w’oshishimanyo vɛrse djɛ nkɛsɛ esanga, nyɔtɔnɔlɛ lá wopo wɔ tɔkfɔ tɔ Bible yombokotshɛ́ nkfumbo kɛnyo. Wapɔ wakɔnge wɔnako okokande mba má ndjala lá nkɔmɛ la má ntepela nsɔsɔlɔ? (Heb. 13:18) Okoka nkɔkɔmɛ wopo wɔ tɔkfɔ tɔ Bible otowombawɔ lá demba ole lá yimba. (Woo. 14:​29, 30) Nshishima tɔkfɔ tɔ nghɔsɔ nkoka nkotshɛ́ wɔnako djɛnde ndeka nkɔpa alako wa Bible.—Wala Woongo 2:​10, 11.

12. Wopo wɔkɔnge papa kɛmɔtshi ndakotshɛ́ wɔnande djɛ nyɛna djonyi djɛ tɔkfɔ tɔ Bible?

¹² Papa kɛmɔtshi kelá France, apakisola wopo wɔ nde nya wadjɛnde yakotshɛ́ wɔnawɔ Ethan, djɛ nyɛna ngandji kɛ Yehova m’ɛlɛmbɛ wɛnde: “Towopolaka nghɔnɛ, ‘lamo Yehova ɔtɔlɔmbande dj’iso nɛmɛyɛ ikfɔ yɛnɛ? Kɛkɔnge k’ɛnyɛ ente nde ntɔkɔpaka? Kɛkɔnge kengokokomela ntsha opakambisa l’ikfɔ yɛnɛ?’” Asawo wa nghɔsɔ wakotshɛ́ka Ethan djɛ nkakitela ɛlɛmbɛ wɛ Yehova welendana la nanghedji. Steve akfɛ ante: “Okoma wɔso nde wɔ nkotshɛ́ Ethan djɛ nyɛna ente Bible dekɔ la djaana deka otale djaana djɛ wana w’anto.”

13. Wopo wɔkɔnge ambotshi okokawɔ nkfumba wɔnawɔ djɛ nkamba la tɔkfɔ tɔ Bible? Pɛyɛ ndjɔmbɔmba.

¹³ Kfumba wɔnako djɛ nkamba la tɔkfɔ tɔ Bible. Mbamba kɛmɔtshi kɛ nangha nghɔsɔ nde winá wɔ wetsha wɔ nkalasa ɔpɛyɛnde wɔnako onkanda wɔ ndotanga lá mbandja. Onkanda nkoka ndjala l’ɛkɔndɔ wɛ anto wananghaki wayi wa ntshɛngi kana anto wayalaki la nkɛlɛ k’efula, ko waafunisá onkanda wɛnyɛ ete ngo alekɔ wɔlɔ ndaawokola. Okoka nkembɛ wɔnako djɛ ntɔnɔla lá nanghedji dj’anto wasɔ má nkilika tɔkfɔ tɔ Bible. (Woo. 22:​24, 25; 1 Kɔ. 15:33; Flp. 4:8) Kɛsɔ kɛngɔɔpɛyɛ akoka wa mpoposanyɛ wetsha la winande ambeki winá w’otepelande djɛ akambo wa yɔlɔmbɛ djɛ nde mbala.

LƆNGƆSƆLA WƆNAKO DJƐ NSEELA DJAWO DJƐNDE

14. Nkambo djɛkɔnge nkoka mpɛyɛ wɔna wɔma, ko ladjikɛnge?

¹⁴ Dɛngɛ dj’Akristo nkoka nsamba winá ɛmɔtshi oloko wolo wɔ nseela djawo djɛwɔ. Wakoka ndjoka wɔma winá w’ekawɔ olakanyelo  w’opilwelo lá nkalasa. Lamo? Wetsha wɛwɔ nkoka ndakanyɛ opilwelo ete ngo nkambo djɛ nsɔsɔlɔ. Ntsha oyɛ nde ombotshi, wopo wɔkɔnge w’okokɛ nkotshɛ́ wɔnako djɛ ndáshikikɛ ante angopikama ndii lá djawo djɛnde?

15. Kɛkɔnge kekoka nkotshɛ́ ilɛngɛ y’Okristo djɛnde ndjala l’eshikikelo lá djawo djɛnde?

¹⁵ Kotshɛ́ wɔnako djɛ nde ndjala l’eshikikelo lá djawo djɛnde. Wɔnako apakoke ndjoka nsɔnyi mande ewa nsɔsɔlɔ lá etongelo. (2 Ti. 1:8) Lamo? Kɛnɛ kelekɔ́ nsɔsɔlɔ nde ase siansɛ efula wangewake ambɔ lowiko lotaposa eposa posa. Iwɔ wangɛnake ambɔ onto ɔmɔtshi wolekɔ́ la yimba y’efula atongaka nkete nkfumɔ djɛ nkamɔ dekɔ́ la lowiko. Eposelo welekɔ nde, wapawola elakanyelo w’opilwelo welakanyema l’ankalasa efula l’andja w’otondo. Wɔnako nkoka nkembɛ djawo djɛnde nyɔmɛlɛ kɛnde má ntɔnɔla lá donga djɛ wananyɔ l’ankaana yawola ambɔ lowiko lotongamaka. c

16. Ombotshi okokande nkotshɛ́ wɔnande djɛ nseela djawo djɛnde le Ontongi ngete mo? (1 Pɛtɛlɔ 3:15) (Lenda edjinge ntshango.)

¹⁶ Lɔngɔsɔla wɔnako djɛ nde mpakisola anto ankina lamo awolande ante Ontongi alekɔ. (Wala 1 Pɛtɛlɔ 3:15.) Okoka nyɛna ente alekɔ djonyi efula nkalɔ nshishima esanga ɔnɔnghɔ wɔ wamba “les jeunes s’interrogent—Création ou évolution?” lá jw.org. Eka nya wɔnako tokanyi t’ɛnande ante tokoka nkotshɛ́ anto ankina dj’iwɔ nyɛna ambɔ Ontongi alekɔ. Vungolande ente lako djonyi djɛ nsɛ ampɔsɔ nya ntombe yɛnde yɛ nkalasa. Kembɛnde djɛ nde nkamba la tokanyi edjinge l’etepela wɛ wɔdju ntsha amɔtshi wakɔpa nsawola la nde. Ndjɔmbɔmba, winande wɔ nkalasa nkoka ntepela ante: “Lemi awolami ngo ekete k’okokami nyɛna, koko lemi ntɛnaka Ndjambe.” Ilɛngɛ y’Okristo nkoka nkadjimola ante: “Kokanela djɛ otakɛndɛ nghɔmɛlɛ kɛko l’okonda otale la mbandja ole la idjena ilekɔ anto, ko ɔmɛna mpeku mbokengamá la awanga. Otepelɛ ente mo? Ntsha mpeku dekɔ ilembetelo yɛnyɛ ente onto ɔmɔtshi ndeke lokengisá, mbɔ koko tolekɔ la tolembetelo efula tɛnyɛ ente onto ɔmɔtshi ndeke lotongisá nkete nkfumɔ djɛnɛ!”

17. Ambotshi okokawɔ nkembɛ wɔnawɔ djɛ mpona mbamba kɛ nshimela anto ankina akambo wa nsɔsɔlɔ ngete mo? Pɛyɛ ndjɔmbɔmba.

¹⁷ Kembɛ wɔnako djɛ nde mpona mbamba yɛ  nshimela anto ankina nsɔsɔlɔ kɛ Bible. (Ɔrɔ. 10:10) Okoka ndjɛdjɛ welo wilande djɛ mpoposanyɛ djawo djɛnde la welo wɛlɔmbama djɛ mpoma ngidalɛ. Má bango, kanga leka angeka djɛ mpoma yeembo yɛ wɔdju. L’ilá kɛ etsho, mpoma ngidalɛ angokoma wɔdju le nde. Lá wopo wɔkɔ ɔmɔ, má bango ilɛngɛ y’Okristo nkoka nkamba la yopo yɛ wɔdju winá w’owangande mpoposanyɛ anto ankina. Ndjɔmbɔmba akoka ndjopola winande wa nkalasa ante: “Ongewake ente anto wanangha nkete yokolaka mbala efula nde nkete ntongamisá? Konga nkɔkɛnyɛ video djɛ wɔlɔ efula djɛnɛ.” M’ɔkɔngɔ wɔ ndenda video djɛ ɔnɔnghɔ Évolution ou conception ? akoka ndjopola ante: “Ntsha ose siansɛ alekɔ mba lomo má ndjokola ekete ketongamisá kelekɔ́ ntondo, ntshande kanga lotongisá ekete kɛ ntondo kɛ ndombokola?” Nkamba la wopo wɔ wɔdju wɔ nghɔsɔ, nkoka mpɛyɛ winande mposɛ la mbamba kɛ ndjawola ndjeka akambo ankina.

KINDJƐ NKOTSHƐ́ WƆNAKO DJƐ NDE NKEMBƐ DJAWO DJƐNDE

18. Ambotshi okindjɛwɔ nkembɛ djawo djɛ wɔnawɔ le Ndjambe ngete mo?

¹⁸ Towika l’andja wambolola l’anto wapalekɔ la djawo le Yehova. (2 Pɛ. 3:3) Djɛko ndeke, ambotshi, winá wekanyo Bible la wɔnanyo, nyokembɛ djɛ nde ntshimola tɔtɛ tɔ wayi tongofudjɛ dilɛmɛlɔ djɛnde tá Otepela wɔ Ndjambe la tá ɛlɛmbɛ welendana la nanghedji. Nyokotshɛ́ djɛ nde ntɔnɔla lá tokakambo tɔmɔtshi tɔ wɔlɔ tolekɔ lá etongelo kɛ Yehova. Nyokotshɛ́ djɛ nde nshipisoyɛ prɔfɛsi yɛ Bible yɛ nkamɔ imbokotshamá. Ladjiko djɛ akambo ankfumɔ wasɔ, nyɔlɔmbɛ nyande la nyɔlɔmbɛlɛ. Winá w’onanghanyo nghɔsɔ, nyoyashikikɛ ente Yehova angofuta welo wilanyo djɛ nkembɛ djawo djɛnde.—2 Ɛk. 15:7.