1. Ladjikɛnge mampa yayalaka djonyi efula lá etsho wefunamaki Bible?

 MAMPA kayalaki oleelo w’anto yalekaka ndɛ l’etsho wefunamaki Bible. (Ewa. 14:18; Luka 4:4) Lá nsɔsɔlɔ, Bible nkambaka mbala efula la itepela ‘mampa’ djɛ ntepela djɛ oleelo. (Mat. 6:11; Ele. 20:7, nɔtɛ kɛ wekelo lá Bible djɛ Falase) Mampa keyalaka ekete kɛ djonyi efula lá ansese ape wa Yeso wewama efula. (Mat. 16:9, 10) Tɛna nsese mɔtshi lá Djɔanɛ shapitrɛ 6. Winá wɔ soteke ɔkɔndɔ wɔnɛ, tisole elakanyelo wokokaso nkamba la wɛkɔ lɔɔko kɛnɛ.

2. Lá mbamba kɛkɔnge oloyi w’anto yayale la djonyi djɛ nkete djɛ ndɛ?

² M’ɔkɔngɔ wɔ apɔstɔlɔ wa Yeso nangha lɔkɛndɔ l’otale l’olemo w’ipoposanyɛ, Yeso awɔsaka ko wapemaka lá wato wopaka Ndjale kɛ Ngalile dj’iwɔ ntohomola. (Mar. 6:7, 30-32; Luka 9:10) Wakomaka lá idjena imɔtshi yɛ ntɛkɛ lá Bɛtɛsayidɛ. Koko, lako ndjala ilá oloyi w’anto wadjingaka. Yeso ataakadjɛ́. La oloko wɔlɔ onkfumɔ, ɔsaka winá wɔ ndalakanyɛ akambo w’Onkfumi la ndaasadjɛ. Edjena kɛ winá yotilaka, ambeki wopolaka wopo wɔ anto ankfumɔ wasɔ yakoke mba ekete kɛ ndɛ. Nkoka ndjala anto amɔtshi wayalaki la ndambo kɛ nkete, koko ankina wayalaka ladjɛ ntshɔ tá mbandja djɛ ntosomba nkete djɛ ndɛ. (Mat. 14:15; Dj. 6:4, 5) Yeso ndakoke nangha nge?

YESO AMBOFUDJƐ MAMPA MÁ NSESE

3. Yeso ndashimela apɔstɔlɔ wande djɛ nanghela oloyi w’anto nge? (Lenda edjinge ntshango djɛ loposo.)

³ Yeso ashimelaka ambeki wande ante: ‘Iwɔ wapakoke ntshɔ, nyapɛyɛ ekete kɛ ndɛ.’ (Mat. 14:16) Ayalaka nkambo dj’ekekete  efula ladjikɛnde wayalaka ampame 5 000. Ntsha tombila amato la dɛngɛ, wakokaka ndjala anto 15 000. (Mat. 14:21) Andele atepelaka ante: ‘Ilɛngɛ imɔtshi yɛ mpame alekɔ lanɛ la mampa 5 la tosese 2. Ko ndambo kɛ nkete djɛsɔ ngokoka la lofulo l’anto lɔnɛ?’ (Dj. 6:9) Ɛmvɔ la anto ankina efula walɛki mampa yɛ ɔrjɛ, la tosese tɔ daambi yayalaka efula ngo tombokalá la tɔ wɛfu tɔɔmi. Koko, nkete djɛ ilɛngɛ yɛsɔ nkokaka ndesɛ lofulo l’anto lɔsɔ?

4. Owaso elakanyelo wɛkɔnge má Djɔanɛ 6:11-13? (Lenda edjinge asango.)

⁴ Yeso akɔpaka nyɛnyɛ anto wasɔ nkapo, ko áshimelaka djɛ ndjintasɛ lá ndɛngɛ toloyi toloyi. (Mar. 6:39, 40; wala Djɔanɛ 6:11-13.) Towala ente Yeso akawoyɛka Papa kɛnde lokasa djɛ mampa la nse. Ndjambe akokaka mba lokasa, mande lá nsɔsɔlɔ nde ndeke Ikɔkɔ yɛ mma djɛsɔ. Alekɔ djonyi efula iso nkilika ndjɔmbɔmba kɛ Yeso má ndɔmba lá ntondo kɛ ndɛ, ayale tolekɔ isɔmɛlɛ kana l’eloyi k’anto. Yeso ashimelaka ambeki djɛ nkapanyɛ nkete, ko anto walɛka la walotaka. Nkete mɔtshi ntshikalaka, ko atakɔpa nkete djɛkɔ ntshitana. Djɛko ndeke ndashimela ambeki wande djɛ ntshumanyɛ nkete djɛkɔ, nkoka ndjala dj’iwɔ ndɔlɛ m’ɔkɔngɔ. Yeso atotshikelaka ndjɔmbɔmba kɛ nkamba la nkete djɛso la balo. Ntsha olekɔ ombotshi, lamo nghopashishima ɔkɔndɔ wɔnɛ nya wana wako la nsawola djɛ elakanyelo wokokanyo mba welandana la lɔlɔmbɔ, nkapo ole olongwelo w’anto.

5. Anto yelola ngete mo lá kɛnɛ kɛ Yeso ndananghe, ko ndananghe nge?

⁵ Anto wakamɔki efula ansese wa Yeso la  wopo wɔ ndalakanyɛka. Má ndjewa ambɔ Mɔsɛ alakaka ante Ndjambe angoposɛ ɔprɔfɛtɛ w’otshikitanyi, iwɔ wakokaki ndáwopola ambɔ: ‘Yeso ndeke ɔprɔfɛtɛ wɔkɔ?’ (Mvu. 18:15-18) Ntsha nghɔsɔ, wakokaka mfɛnyɛ ambɔ Yeso alekɔ owandji wɔ wɔlɔ, wolekɔ l’akoka wa mpɛyɛ owila w’otondo mampa. Eposelo weyalisá nde, oloyi wɔkɔpaka ‘mvunda [Yeso] djɛ ndowekadjɛ Nkfumi.’ (Dj. 6:14, 15) Yeso ndotawola nkambo djɛsɔ, atolapɛyɛ lá pɔlitikɛ k’ase Juda keyalaki l’ɛlɔndjɛlɔ k’ase Ɔrɔma. Nde awolaka? Lako. Towala ente Yeso ɔsaka nkano djɛ ‘ndɛngɔ kankina t’onkókó.’ Djɛko ndeke kaanga anto ankina yotshindaka, atingela lá pɔlitikɛ. Wole olakanyelo isombowa!

6. Okokaso nyɛnyɛ ente tɔkɔpa nkilika ndjɔmbɔmba kɛ Yeso ngete mo? (Lenda edjinge ntshango.)

⁶ Lá nsɔsɔlɔ, anto wapangɔtɔlɔmba djɛ mfudjɛ mampa, nsadjɛ anto má nsese kana mpona djɛ ntowekadjɛ nkfumi kana owandji wɔ owila. Koko wakoka ntotshinda djɛ nangha pɔlitikɛ má mvɔtɛ kana nsuka má etepela onto wɛnawɔ ambɔ angɔlɔngɔsɔla akambo. Koko, ndjɔmbɔmba kɛ Yeso k’okama papoo. Atonaka ndjingela lá pɔlitikɛ, ole atepelaka ante: ‘Onkfumi wɔmi wopalekɔ w’andja wanɛ.’ (Dj. 17:14; 18:36) Angoyala wɔlɔ lɔɔko kɛnɛ Akristo ntɔnɔla la ndjokola ndjɔmbɔmba kɛ Yeso. Iso nsukaka, mpoposanyɛka, la ndɔmbaka djɛ Onkfumi wɔsɔ. (Mat. 6:10) Tokolenda kankina  ɔkɔndɔ wɔ nsese djɛ mampa la elakanyelo w’okokaso mba.

‘NSAKISO KƐ MAMPA’

7. Yeso nya apɔstɔlɔ yananghe nge? (Djɔanɛ 6:16-20)

⁷ M’ɔkɔngɔ wɔ Yeso ndesɛ oloyi, ashimelaka ambeki wande djɛ nyima la nkalɔ tá Kapɛrnaumɛ la waato, ko awɔmbɔka tá onkókó djɛ mpengɔ weelo wilaki anto djɛ ndowekadjɛ nkfumi. (Wala Djɔanɛ 6:16-20.) Winá wɔ apɔstɔlɔ yotalukaka, lompopo l’ekekete lowangaka, ko loposɛka anyɛnghu. Ko Yeso alayɛki lewɔ, alakɛndaki lá djiko djɛ washi. Ko ashimelaka ɔpɔstɔlɔ Pɛtɛlɔ djɛ nkɛnda ole nde lá djiko djɛ washi. (Mat. 14:22-31) Winá wɔ Yeso ndapema lá waato, lompopo loshilaka. Ambeki wakamɔka ko woshimelaka ambɔ: ‘Wɛ nsɔsɔlɔ olekɔ Wɔna Ndjambe.’ a (Mat. 14:33) Koko, iwɔ watɛna djokanelo dekɔ l’anteyi kɛ nsese djɛnɛ la kɛnɛ kehetisa ntondo la oloyi w’anto. Marko akfɛ ante: ‘[Apɔstɔlɔ] wakamɔka efula, ladjikɛnde iwɔ watasipisoyɛ nsakiso kɛ mampa, koko wakindjɛka ndjala l’eloko wɛ ontshuko djɛ nsipisoyɛ akambo lankeke.’ (Mar. 6:50-52) Ɛwo, watasipisoyɛ tii lá lɛdji lɔkɔnge Yehova ndapɛyɛ Yeso nkfulu kɛ nangha ansese. Koko lako ndjala ilá, Yeso ananghaka nsese djɛ mampa la atotshikelaka olakanyelo.

8-9. Ladjikɛnge oloyi w’anto yakilika Yeso? (Djɔanɛ 6:26, 27)

⁸ Oloyi wɔ Yeso ndalesɛ wɛnyɛka ambɔ yilaka yimba ngo djɛ nshiyɛ ehomba la mposɛ yɛ demba. Ngete mo? La nkɛsɛ, wɛnaka ambɔ Yeso la ambeki wande wambotshɔ. Amɔtshi wapemaka lá waato weyisá má Tibɛriya, ko watshɔka ntohona Yeso lá Kapɛrnaumɛ. (Dj. 6:22-24) Yananghe nghɔsɔ ngo djɛ ntekameyɛ akambo w’Onkfumi? Lako. Iyakanelaka ntondo ntondo nde djɛ Yeso nkalɔ ndafudjeyɛ mampa. Ewaso nghɔsɔ ngete mo?

⁹ Tokolenda kɛnɛ k’enanghemisá winá wɔ oloyi w’anto yɛnyi Yeso lá Kapɛrnaumɛ. Yeso atepelaka ante ekete keleka djonyi lewɔ nde nshiyɛ mposɛ yɛwɔ yɛ demba. Atepelaka ante ‘walɛka mampa la walotaka’ la ‘eleelo wetshitana.’ Nde akembɛka djɛ mpona ‘eleelo wetshikala ilá wɛpɛyɛ lowiko l’etshinda.’ (Wala Djɔanɛ 6:26, 27.) Yeso atepelaka ante Papa kɛnde nkoka ndapɛyɛ eleelo wɛ nghɔsɔ. Ikanyi yɛ oleelo wokoká ntɔla tá lowiko l’etshinda yakamoyɛka efula! Oleelo wɔkɔnge w’okoka nangha nghɔsɔ, ko andjoki wa Yeso yoke nkambo djɛsɔ ngete mo?

10. Anto wasɔ yayale ladjɛ ndjeka ‘enanghedji kɛ Ndjambe’ kɛkɔnge?

¹⁰ Ɛnama ete ngo ase Juda wasɔ wafɛnyɛka ambɔ wakoka nangha ekete kana nanghedji mɔtshi djɛ nkotshɛ kɛnɛ kɛlɔmbama djɛ mba oleelo wɔ nghɔsɔ. Iwɔ wakokaka nkanela ‘nanghedji’ djɛ Ɛlɛmbɛ wɛ Mɔsɛ. Koko, Yeso ashimelaka ante: ‘Enanghedji kɛ Ndjambe kekinɛ, djɛ nyo ndjala la djawo le kanga ndatome.’ (Dj. 6:28, 29) Dj’iwɔ ‘mba lowiko l’etshinda,’ ngo iwɔ ndjala la djawo le ntomɔ kɛ Ndjambe. Lá nsɔsɔlɔ, Yeso ashimelaka nkambo djɛsɔ ntondo. (Dj. 3:16-18, 36) Ayalaka ole la nkete efula djɛ ntepela lá wopo w’okokaso mba lowiko l’etshinda.—Dj. 17:3.

11. Wopo wɔkɔngɔ ase Juda yɛnyɛ ambɔ wilaki yimba efula ngo lá ndɛ oleelo wɔ demba? (Yeembo 78:24, 25)

¹¹ Ase Juda wasɔ watawola olakanyelo wɔ Yeso wɔ ‘enanghedji kɛ Ndjambe’ kɛ bango. Wowopolaka ambɔ: ‘Ilembetelo yɛkɔnge nghongonangha ndeke tɛnyi la tokawole?’ (Dj. 6:30) Iwɔ watepelaka ambɔ anka yɛwɔ y’etsho wɛ Mɔsɛ wawaka mana, ifɛnaki  la mampa. (Nɛh. 9:15; wala Yeembo 78:24, 25.) Okama papoo ente, yimba yɛwɔ yayalaka ngo djɛ ndɛ oleelo wɔ demba. Iwɔ watatshinda Yeso djɛ nde ndapakisola winá wɔ ndotepelaka djɛ ‘mampa kɛ nsɔsɔlɔ kɛ m’olongo,’ keyalaki ete ngo mana yɛ m’olongo ipɛyɛki lowiko. (Dj. 6:32) Iwɔ walapɛyɛka lá ehomba wɛ demba, ko wavungɛka akambo wa nsɔsɔlɔ wa nyuma wa Yeso ndakɔpaka ndashimela. Olakanyelo wɔkɔnge w’owaso?

KƐNƐ KELEKA DJONYI LESO

12. Wopo wɔkɔnge Yeso ndɛnyɛ kɛnɛ keleka djonyi?

¹² Lendo, towa olakanyelo wɔ djonyi efula má Djɔanɛ shapitrɛ 6. Ehomba wɛ nyuma ladjɛ ndjala ekete keleka djonyi leso. Tovungɔ ente Yeso ɛnyɛka olakanyelo wɔsɔ winá wɔ ndatonaka ohemba wɔ Satana. (Mat. 4:3, 4) Ole lá djamba djɛ l’onkókó, apikaka nghɔmɔ ɛnsɔsɔ djɛ onto l’onto ndjewa ehomba wɛ nyuma. (Mat. 5:3) Djɛko ndeke, tolawopole ente: ‘Wopo wɔmi wɔ mbika wɛnyɛ ente ndjila yimba efula djɛ nshiyɛ ehomba wɛ nyuma ndeka wɛ demba?’

13. a) Lamo oyɛwɔ wɔlɔ nsasanga la oleelo? b) Ndjewo kɛkɔnge k’oyɛso ladjɛ ndjila yimba? (1 Kɔrɛtɔ 10:6, 7, 11)

¹³ Alekɔ wɔlɔ ndɔmba djɛ ehomba wɛso wɛ demba la nsasanga djɛ ndakotshɛ. (Luka 11:3) Olemo wɔ wolo wotokotshɛ́ djɛ ‘ndɛ la nnɔ’ ntɔpɛyɛka osasa ole nkambo djɛsɔ oyɛwɔ nde ‘má lɔwɔ lɔ Ndjambe kɛ nsɔsɔlɔ.’ (Los. 2:24; 8:15; Dja. 1:17) Koko iso ladjɛ ntshika nkete djɛ demba l’edjena kɛwɔ. Ɔpɔstɔlɔ Poolo akɔkɔmɛka nkambo djɛsɔ winá wɔ ndafunela Akristo wawikaki lá ekomo kɛ nkfumbo dj’akambo dj’ase Juda. Avungolaka akambo wananghemisá lá Isariyɛlɛ yɛ ntondo, la wananghemisá entshupa la Onkókó wɔ Sinayi. Nde ewolaka Akristo ‘dj’ipa nkombola nkete djɛ nyɛtshi ete ngo [ase Isariyɛlɛ] yakombolaka.’ (Wala 1 Kɔrɛtɔ 10:6, 7, 11.) Yehova apɛyɛka ase Isariyɛlɛ eleelo má nsese, koko mande wayalaki la lolemba, eleelo wɛsɔ welokomaka ‘nkete djɛ nyɛtshi’ lewɔ. (Ew. 11:4-6, 31-34) Iwɔ walɛka, wanɔka la wasasangaka winá wɔ yatɛmɔla yana yɛ ngɔmbɛ yɛ mpaonyi. (Epo. 32:4-6) Poolo atepelaka nkambo djɛsɔ djɛ ndjewola Akristo wawikaki lá ntondo kɛ ekomo kɛ nkfumbo dj’akambo dj’ase Juda lá 70 D.D. Towika entshupa l’ekomo kɛ nkfumbo dj’akambo, djɛko ndeke angoyala wɔlɔ iso ndɔsa l’odjito dako djɛ Poolo.

14. Lá kɛnɛ kelendana la oleelo, okokaso nkongela lá andja wa bango nge?

¹⁴ Winá wɔ Yeso ndatepelaka djɛ ‘nkete djɛ ndɛ djɛ lofu lɔ lɔɔko,’ Yeso ndatepelaka nde winá wɔ ɛkɔpa kɛ Ndjambe yongonanghema ‘lá looko ete ngo onanghemawɔ l’olongo.’ (Mat. 6:9-11) Andja yongoyala ngete mo l’etsho wɛsɔ? Bible djɛnyɛ ente eleelo wengoyala winá w’ɛkɔpa kɛ Ndjambe yongonanghema lá looko. Lá nkilika Izaya 25:6-8, Eleelo wɛ wɔlɔ efula wengoyala lá Onkfumi wɔ Ndjambe. Yeembo 72:16 yewoyɛ ante: ‘Nkete djɛ ndɛ ngoyala efula lá looko; ngoyala ankfuka ankfuka lá tɔsɔdji t’enkókó.’ Olekɔ l’oloko pakipaki djɛ ndolamba ekete kɛ ngɔkɔpaka efula kana kɛ ngotalambaka ntondo? Ongosasanga efula djɛ ndɛ nkete djɛsɔ la mbambo yɛ vinyɔ yɛ ngongokona. (Iza. 65:21, 22) La opangoyala nghɔmɛlɛ.

15. Anto wangokfundɔ́ yongeka nge? (Djɔanɛ 6:35)

¹⁵ Wala Djɔanɛ 6:35. Ekete kɛkɔnge kekonga anto walisá mampa la nse yɛ Yeso ndafudjɛ? Okoka ndɛnana l’amɔtshi l’ekfundwelo. Kaanga lá etsho wehetisá watayala la djawo, wakoka ndokfundɔ. (Dj. 5:28, 29) Anto wasɔ wangeeka nsakiso kɛ etepela wɛ Yeso wɛnɛ: ‘Lemi ndeke mampa kɛ lowiko. Onto onkfumɔ woyɛ le lemi apokaki ndjala lonkina.’ Iwɔ  wangoyala ladjɛ mfudjɛ djawo lá olambo wɔ Yeso, má ndjawola ambɔ apɛyɛka lowiko lɔnde lá nkambo djɛwɔ. Lá etsho wɛsɔ, nonghanyi kengonanghema djɛ ndakanyɛ anto wangokfundɔ la wana wangowotshɔ. Wole osasa yongoyala djɛ ndɔsa opiko lá nonghanyi kɛ olakanyelo! Nangha nghɔsɔ angoleka ole ndɛ oleelo wɔ demba osasa. Ɛwo, akambo wa nyuma wangoyala ekete kelaka djonyi.

16. Sɔngɛna lá djamba djeyaye nge?

¹⁶ Tɔmɛna etenyi kɛ ɔkɔndɔ wɔ Djɔanɛ shapitrɛ 6, koko Yeso ananghaka akambo efula djɛ ndakanyɛ wayi walendana la ‘lowiko l’etshinda.’ Ase Juda wayalaka ladjɛ nkɔdjɛ akambo wasɔ, ole iso lɔɔko kɛnɛ ladjɛ nkɔdjɛ akambo wakɔ. Tongokindjɛ nshishima Djɔanɛ shapitrɛ 6 lá djamba djeyaye.