Mbotshɔka lá 1927 lá ngando kɛ Illinois, entshupa lá Chicago, lá États-Unis. Papa nya mama watowotaka wana atano: Jetha, Don, lemi, Karl, la Joy. Tɔsaka isankfumɔ nkano djɛ nkambela Yehova l’anyima waso ankfumɔ. Jetha ingelaka nkalasa k’ape kɛ Ngaladɛ lá 1943. Don atshɔka tá Betɛlɛ lá Brooklyn, lá New York lá 1944, Karl lá 1947, la Joy lá 1951. Ndjɔmbɔmba kɛwɔ kɛ wɔlɔ la kɛ papa la mama, kenkamoyɛka nsɔsɔlɔ efula.

Papa la mama wayalaki antangi wa Bible wakɔpaki Ndjambe la wakonaka ngandji kɛkɔ leso wana. Koko papa, atakɔpaki lonkina nkɛlɛsiya m’ɔkɔngɔ wɔnde nkamba ete ngo ongala lá Europe lá Mbandji kɛ Ntondo k’Andja w’Otondo. Mama akawoyɛka Ndjambe lokasa efula mande papa akalɔka la lowiko, oshimelaka ante: “Karl, totshu tá ntshambeyɛ ete ngo isatshɔka.” Papa akadjimolaka ante: “Langokotshindjeyɛka, koko pamba ngo linko ndjingela l’eteyi.” Owopolaka: “Lamo?” Akadjimolaka ante: “Lá mbandji, ewandji wɛ nkɛlɛsiya weyalaki lá ekɛlɛsiya kɛmɔ wasakolaki angala wa wedji wɛkɔ epe la eta wɛwɔ! Lasɔ Ndjambe ayalaki la wedji wɛkɔ epe?”

Winá ɔmɔtshi wɔ mama ndayalaka lá ntshambeyɛ, Ewakɛ epe wɛ Yehova wayɛka lá kaso. Wapɛyɛka papa onkanda wɔ vɔlimɛ ipe wɔ yetaka ambɔ Light (Osase), wopakisolaki onkanda wɔ Ndjiso. Papa akɔpaka efula ko ɔsaka onkanda. Mama awangaka mbala winá wɔ ndɛnyi. Lofu lɔmɔtshi ɛnaka wambofuna lá jurnalɛ mɔtshi ambɔ wahona anto wakɔpa ndjeka Bible má mbamba kɛ onkanda Light. Ɔsaka nkano djɛ nde ntshɔ. Winá wɔ ndakome, omoto ɔmɔtshi w’ekokolo adjipolaka lokfuke. Mama akotaki onkanda wɔkɔ lá nkatshi, ko opolaka ante: “Nyeka onkanda wɔnɛ lanɛ?” Omoto akadjimolaka ante: “Ee, winami, ingela.” Lobengo lɔlɔndisá mama atɔtɔlaka isankfumɔ, ko masɔ tatshɔki mbala la mbala.

Lofu lɔmɔtshi, ilɔndjɛ yɛ losanghanyɛ andɔmbaka djɛ mbala Yeembo 144:​15, itepela ente anto watɛmɔla Yehova walekɔ l’osasa. Vɛrse djɛnɛ nkamoyɛka efula, ole djɛ 1 Timɔte 1:​11, djɛnyɛ ente Yehova alekɔ ‘Ndjambe k’osasa,’ la Ɛfɛsɛ  5:​1, ntokembɛ́ djɛ ‘ndjokola Ndjambe.’ L’ekomo ndɔsaka nkano ente lemi ladjɛ mba osasa la nkawoyɛ Ontongi wɔmi lokasa má mpeyi kɛ ndampɛyɛ kɛ ndokambela, nsɛsaka nangha nkete mpe djɛsɔ lowiko lɔmi l’otondo.

Otshumano woyalaki entshupa laso woyalaki lá kilɔmɛtrɛ 32 la Chicago. Kaanga nghɔsɔ, tatshɔki, la djewo djɛmi djɛ Bible ntafulaki. Mvungɔ mbala kɛmɔtshi kɛ ilɔndjɛ ndasɔnɛ Jetha djɛ mpɛyɛ kɔmantɛrɛ. Winá wɔ mowekameyɛ, ntepelaka ente: ‘ndjewa ekete kɛsɔ. Ntasangɛka lɔwɔ djɛ nkadjimola hanyi.’ Ntateyɛka ndálɔngɔsɔla la mpɛyɛ kɔmantɛrɛ l’etepela wɛmi. Nkambo deka djonyi nde, mfulaka lá nyuma esanga l’amama edjinge la ankfune wami. Ndongolaka lá 1941.

Langovungɔke pekapeka losanghanyɛ lɔ rɛjɔ lonanghemisá lá 1942 lá Cleveland, lá Ohio. Wananyɔ l’ankaana wekameyɛki má telefɔnɛ lá djena ndekana 50 lá États-Unis w’otondo. Nkfumbo kɛso kintasɛki esanga la wananyɔ l’ankaana inkina lá tovuvulu t’ampɛma entshupa lá idjena inanghemaki losanghanyɛ. Mbandji k’Ape k’Andja w’Otondo ketelaka, ko wanyɔkɔlaki Ewakɛ wɛ Yehova efula. La nkɔlɔ, nyɛnaka oloyi wɔ wananyɔ wemɛ etuka wɛwɔ, koko watapɛtshɛki tɔyɛ. Iyankfumɔ wawolaka djɛ anto mpolama lá otuka onkfumɔ. Ntsha ndambo k’ovungusano womboposá, wananyɔ ladjɛ mpoma angonga y’otuka ole mpɛtshɛyɛ wakɔpa mposɛ ovungosano tɔyɛ tɔ ntondo lá wiso dj’ipa iwɔ nyɛna. Ankina ladjɛ ndota djɛ ntokotshɛ́. Nyɛnaka ente ‘enkambi wɛ Yehova wangolalɔngɔsɔlake wɔlɔ lá nkambo nkfumɔ!’ Ko ndjalaka l’eshikikelo, mvɔka ilɔ, mande lako kaanga ovungusano ɔmɔ woyalisá.

M’ɔkɔngɔ w’ɛnɔnyi, winá w’ovungɔkami losanghanyɛ lɔsɔ, langɛnake ente mama atoka wɔma la atakiyana. Alawɛkɛka lá kenkfumɔ le Yehova la l’olonghanyelo wɔnde. Mpavungɛki ndjɔmbɔmba kɛnde kɛ wɔlɔ.

Ndambo daambi lá ntondo kɛ losanghanyɛ, Mama akomaka yat’ekalo yɛ lotshinda. Ko winá wɔ yapɛyɛka wamba walendana l’olemo wɔ winá enkfumɔ, afunaki akambo amɔtshi. Winá wɔ saakalɔka lá mbandja, atepelaka ante: “Nkɔpa nkindjɛ ndjala yat’ekalo, koko mpangokoka nangha nghɔsɔ la nkamba elemo wɛ mvulu.” Atopolaka ntsha tokoka ndokotshɛ́. Tawolaka, ko atɔpɛyɛka onto l’onto mvulu kɛmɔ kana ipe yɛ nsolaka lá ntondo kɛ oleelo wɔ nkɛsɛ. M’ɔkɔngɔ w’iso mposa má nkalasa, alendaki ntsha mvulu kelekɔ piyɔɔ ko atshɔki ntopoposanyɛ. Akambaki elemo efula koko atavungɛki wana wande. Winá wɔ isayɛka ndɔlɛ lá mbandja la m’ɔkɔngɔ wɔ nkalasa, nde ayalaki winá enkfumɔ. Winá ɛmɔtshi tapoposanyɛki la nde m’ɔkɔngɔ wɔ nkalasa, kɛsɔ ketokotshɛ́ka djɛ ndjewa kɛnɛ kesakisola ndjala yat’ekalo.

Nkomaka yat’ekalo la ɛnɔnyi 16. Kaanga lá winá wɔkɔ wɔsɔ Papa ndotalongolaka batisimo, ilaki yimba lá kɛnɛ kɛ mananghaka. Nkɔlɔ mɔtshi, ndoshimelaka ente kaanga monanghisa la wolo, lako onto wawolisa ndjeka Bible. Mvumbaka ndambo ko ndoshimelaka ente “Ɔkɔpa ndjeka la  lemi?” Atɔnɔlaka tii ko akadjimolaka ante: “Mpɛnyi kaanga elonga k’okokami ntona.” Ee, ombeki wɔmi wɔ ntondo wɔ Bible nde papa kɛmi. Ekokolo kɛ mpeyi mawa!

Tekaka onkanda “La vérité vous affranchira.” L’ilá kɛ wekelo, ndɛnaka ente Papa ankotshɛ́ki djɛ ndjala ombeki la wetsha wɔ wɔlɔ. Ndjɔmbɔmba, lofu lɔmɔtshi m’ɔkɔngɔ wɔ mbala itenyi, opolaka ante: “Nyɛna kɛnɛ ketepela onkanda. Iya wɛ ewɛ ente onkanda otepela nsɔsɔlɔ ngete mo?” Ntalalɔngɔsɔla djɛ nkadjimola woopó wɔsɔ, ko ndoshimelaka ente: “Mpangokoshikikɛ winá wɔsɔ, koko mbala k’ɔkɔngɔ kɛ songeka, langokokadjimola.” Ko ndookadjimolaka. Ndisolaka avɛrse wasuka kɛnɛ kɛ satepelaka. Manyi, ndálɔngɔsɔlaki wɔlɔ efula lá ntondo k’iso ndjeka, la nanghaki ehonelo. Kɛsɔ kenkotshɛ́ka lemi ole Papa djɛ mfula lá nyuma. Akambaki la wayi wa ndekaka ko alongolaka lá 1952.

Nyimaka má kaso winá wɔ mawa ɛnɔnyi 17. Jetha a akomaka misiɔnɛrɛ, la Don, ingelaka lá Betɛlɛ. Mbaki lokembo má ndjewa ente wakɔpaki olemo wɔwɔ efula. Ko ndodjɛka fɔrmilɛrɛ kɛ Betɛlɛ la kɛ Ngaladɛ, la ntshikaka nkambo djɛsɔ l’akatshi wa Yehova. Eposelo weyalisá nge? Wandjetaka lá Betɛlɛ lá 1946.

L’ilá k’ɛnɔnyi, nkambaka lá djena efula lá Betɛlɛ, ko ndoyalaka l’akoka wa ndjeka nkete efula djɛ ntato. Lá nsɔsɔlɔ, l’ilá k’ɛnɔnyi 75 wɛ mahetshɛ́ lá Betɛlɛ, ndjekaka wopo wɔ nangha enkanda la nama mfalanga. Ndjekaka lonkina wopo wɔ ntoma la ndongola nkete. Lá djiko djɛ lasɔ, nkɔpaki efula oleelo wɔ nyuma wɔ sawaka má ɔtɛmwɛlɔ wɔ nkɛsɛ wɔ Betɛlɛ la má badji djɛ Bible.

Ndjekaka lonkina akambo efula me ankfunɛmi Karl, kanga lingelisá lá Betɛlɛ lá 1947. Nde ayalaki ombeki la wetsha wɔ nsɔsɔlɔ wɔ Bible. Ndɔlɔmbaka mbala kɛmɔtshi djɛ nde nkotshɛ́ winá wɔ yampɛyɛ djamba mɔtshi. Nshimelaka Karl ente lambowa akambo efula wa ntepela koko mpewe w’okokami ndɔsa. Akandolaka okakasano wɔsɔ má ndjopola woopó ɔmɔ: “Joel, ɔtɛ wɔ djamba djɛko nge?” Nkambaka l’ikanyi yɛnde mbala kɛkɔ kɛmɔ—ndɔsaka akambo wa djonyi ko ntshikaka ankina. Mpavungɛka nkambo djɛsɔ.

Djɛ mba osasa lá Betɛlɛ, toyalaki ladjɛ mpoposanyɛ efula, eposelo weyalaki nde topomanaki  l’akambo wakembɛ. Nkambo mɔtshi dj’ovungɔmi bangaka nkɔlɔ mɔtshi lá Bronx, lá New York City. Totshɔka isa wɔnanyɔ ɔmɔtshi ntowembola omoto ɔmɔtshi wawolisá Etange k’Olami la Wetshɔ! Toshimelaka oyɛso na, la takfɛka ente: “Nkɔlɔ djɛnɛ tokotshɛ́ anto djɛ ndjeka wayi wa Bible wakembɛ.” Akadjimolaka: “Ntsha djɛ Bible, nyingele.” Towalaka la toopakisolaka avɛrse efula walendana l’Onkfumi wɔ Ndjambe ole l’andja wa bango wayaye. Akamɔka efula, ko etaka tolongo tɔnde efula djɛ ndeka laso lobengo lɔlɔndisá. Nde nya womɛnde walokomaka enkambi wɛ nkɔmano wɛ Yehova.

Nkembaka wadji l’ilá k’ɛnɔnyi 10 lá ntondo kɛ ndopomana la wadjɛmi. Ekete kenkotshisá djɛ ndowa wadji wɔ wɔlɔ nge? Ndɔmbaki efula djɛ woopó wɔnɛ: ‘ɔkɔpami nangha nge m’ɔkɔngɔ w’iso mpɛtshɛ?’

Lá Losanghanyɛ l’ekekete lɔ Yankee Stadium lɔ 1953, nyɛnanaka la nkaana Mary Aniol. Nde nya Jetha wingelaka lá nkalasa 2 kɛ Ngaladɛ, la koko Mary ayalaki misiɔnɛrɛ ete ngo lemi. L’osasa onkfumɔ, Mary anshimelaka djɛ idjena yɛ yotome ete ngo misiɔnɛrɛ lá Caraïbes la wekelo wɛ Bible wɛ ndalɔndjɛka. Winá wɔ satewanaka ndambo ndambo, tɔlɛnaka ente tolekɔ la ekoma wɛ wopo ɔmɔ. Totetelaki nkɔpana, ko totshukanaka Ngɔndɔ k’anɛyi 1955. Lá akambo efula, nyɛnaki ente Mary oyɛnde nde opapɛyɛ wɔ Yehova la ndjɔmbɔmba kɛ ndjokola. Asasangaki idjena inkfumɔ yɛ yatotomaka. Ayalaki nkambi, akiyanaki dj’anto ankina, la ilaki winá enkfumɔ wapɔ w’Onkfumi lá ntondo. (Mat. 6:33) Tokambaka l’edjingadjinga l’ilá k’ɛnɔnyi esato, ko lá 1958, watetaka lá Betɛlɛ ete ngo antshukami.

Ndjekaka akambo efula me Mary. Ndjɔmbɔmba, má bango djɛ bala djɛso, tɔsaka nkano djɛ mbalaka Bible esanga, winá ɛmɔtshi tawalaki avɛrse 15. M’ɔkɔngɔ wɔ ɔmɔtshi ntanga, tapakisolaki la tatepelaki wopo w’okokaso nkamba la akambo wakɔ lá lowiko lɔso. Esango efula Mary anshimelaki akambo wa yeke lá Ngaladɛ kana l’olemo wɔ misiɔnɛrɛ. Asawo wasɔ wampɛyɛka djaana la wankotshɛ́ka djɛ ndɔngɔsɔla wamba wami, la alako wa mapɛyɛka ankaana.—Woo. 25:11.

Ndjonde kɛmi Mary avɔka lá 2013. Ndekɔ l’oloko pakipaki djɛ ndɔwɛna l’andja wa bango! Lá winá wɔkɔ ɔmɔ, lambɔsa nkano djɛ nkindjɛ ndjeka, má ndáwɛkɛ le Yehova l’oloko wɔmi onkfumɔ. (Woo. 3:5, 6) Langowake lokembo l’osasa má ntɔnɔla lá kɛnɛ kɛ enkambi wɛ Yehova yongonangha l’andja wa bango. Lá nsɔsɔlɔ, langeka akambo efula wa bango mewɔ la me Wetsha wɔso w’Ekekete! Ee, mpewe kaanga wopo wɔ ndokawoyɛ lokasa má kenkfumɔ kɛ ndombondjekɛ la ngandji kɛnde k’ipa wɔsɔdjɔmba.