DJAMBA DJƐ WEKELO 49
YEEMBO 147 Daka djɛ lowiko l’etshinda (lá Otetela)
Lowiko l’etshinda—wopo wɔkɔnge w’okokɛ mba?
‘Onto onkfumɔ wawola Wɔna la wolekɔ́ la djawo le nde [angowa] lowiko l’etshinda.’—DJ. 6:40.
IKANYI YƐ DJAMBA
Wopo wɔ ankfutami w’avuta la ɛnkɔkɔ enkina owawɔ wapɔ má olambo wɔ Kristo Yeso.
1. Lamo anto amɔtshi yɛnaka ambɔ wapakoke mbika etshinda etshinda?
ANTO efula mponaka djɛ ndɛ nkete djɛ wɔlɔ ole nanolaka demba djɛ ndjala la demba wolo. Koko, iwɔ wapakongela djɛ mbika etshinda. Wangokanelake ambɔ wapakoke mbika etshinda m’ɔtɛ w’elando weyɛka tá lotshundo. Koko, Yeso atepelaka ante anto nkoka mba ‘lowiko l’etshinda,’ ete ngo ɛnaso lá Djɔanɛ 3:16 la 5:24.
2. Djɔanɛ shapitrɛ 6 otepelande nge djɛ lowiko l’etshinda? (Djɔanɛ 6:39, 40)
2 Lofu lɔmɔtshi, Yeso alesɛka nunu dj’anto mampa la nse má nsese. a Ɔsɔ ayalaka nkambo djɛ nkamɔ efula, ko alotepelaka akambo wa djonyi efula lofu lɔlɔndisa. Anto wokilikaka tii lá Kapɛrnaumɛ, entshupa lá Ngalile, ko l’eteyi ashimelaka ante wakoka nkfundɔ la mba lowiko l’etshinda. (Wala Djɔanɛ 6:39, 40.) Má ndjoka etepela wɛsɔ, okoka nkanela tolongo la boto djɛko djɛ ngandji mbovɔ. Etepela wɛ Yeso wɛnyɛ ente anto efula wavisá wakoka ndokfundɔ la wakoka mba lowiko l’etshinda esanga la boto djɛko! Koko ayalaka wolo efula djɛ anto nsipisoyɛ etepela enkina wɛ Yeso welekɔ́ lá Djɔanɛ shapitrɛ 6. Tokolenda etepela wɛkɔ.
3. Lá nkilika Djɔanɛ 6:51 Yeso ndakɔpɛ ntepela nge lá nkambo djɛ nde?
3 Oloyi w’anto woyalisá lá Kapɛrnaumɛ wɛnaka djokanelo djalaki l’anteyi kɛ mampa yɛ Yeso ndalesɛ la mana yɛ Yehova ndapɛyɛ anka yɛwɔ. Lá nsɔsɔlɔ, Afunelo ndjetaka mana yɛsɔ ante ‘mampa yɛ m’olongo.’ (Yee. 105:40; Dj. 6:31) Yeso akambaka la mana djɛ ndalakanyɛ ekete kɛ djonyi efula. Kaanga Ndjambe ndapɛyɛ mana má nsese, ekomo ekomo anto walisá wavɔka. (Dj. 6:49) Lá lɛdji lotshikitanyi, Yeso alawetaka ante ‘mampa kɛ nsɔsɔlɔ kɛ m’olongo,’ ‘mampa kɛ Ndjambe,’ la ‘mampa kɛ lowiko.’ (Dj. 6:32, 33, 35) Yeso ɛnyɛka lanɛ otshikitano w’ekekete efula wolekɔ́ l’anteyi kɛ mana la nde nyɔmɛlɛ. Atepelaka ante: ‘Lemi ndeke mampa kewika keyisá m’olongo. Onto onkfumɔ wɔlɛ mampa kɛkɔ angowa lowiko l’etshinda.’ (Wala Djɔanɛ 6:51.) Ase Juda wasɔ watshimbaka yimba. Wopo wɔkɔnge Yeso okokande mfuna ante ayɛka má olongo ete ngo ‘mampa’ keleka mana yɛ Ndjambe ndapɛyɛka andoyi yɛwɔ má nsese? Yeso apɛyɛka ikanyi yɛ djonyi efula winá wɔ ndatepela ante: ‘Mampa wɔsɔ oyɛwɔ nde demba djɛmi.’ Ndakɔpɛ ntepela nge? Iso ladjɛ nsipisoyɛ etepela wɛsɔ mande wɛnyɛ wopo wɔ iso la anto waso wa ngandji okokaso mba lowiko l’etshinda. Tokolenda kɛnɛ kɛ Yeso ndakɔpɛ ntepela.
MAMPA KEWIKA LA DEMBA DJƐNDE
4. Lamo anto amɔtshi yoke yɛnyi má etepela wɛ Yeso?
4 Ase Juda amɔtshi wekameyɛki Yeso wokaka yɛnyi efula winá wɔ ndatepela ante: ‘Mampa wɔsɔ nde demba djɛmi djɛ mɔnghɔpɛyɛ djɛ anto w’andja mba lowiko.’ Iwɔ wakanelaka ambɔ Yeso akɔpa ndapɛyɛ ankfunda yɛnde yɛ demba dj’iwɔ ndɛ. (Dj. 6:52) Kolenda nkambo djɛ nkamɔ djɛ Yeso ndakfɛ djɛnɛ: ‘Ntsha nyopalisá demba djɛ Wɔna onto la nyopanisá ekila wɛnde, mbɔ koko nyopangoyala la lowiko.’—Dj. 6:53.
5. Ladjikɛnge okokaso ndjala l’eshikikelo ente Yeso atakɔpa ntepela ante anto wanɔ ekila wɛnde?
5 Tokokawoyɛ wiso l’etsho wɛ Nowe, Ndjambe ashimbaka anto dj’ipa ndɛ ekila. (Ewa. 9:3, 4) Yehova asɛpɔlaka ɔlɛmbɛ wɔsɔ lá Ɛlɛmbɛ wɛ ndapɛyɛ Isariyɛlɛ. Onto onkfumɔ wɔlɛki ekila ayalaki ‘ladjɛ ndjakema.’ (Lew. 7:27, nɔtɛ) Yeso alɛmɛyɛki Ɔlɛmbɛ wɔsɔ. (Mat. 5:17-19) Djɛko ndeke topakoke mfɛnyɛ ente Yeso akembɛka ase Juda dj’iwɔ ndɛ ankfunda yɛnde yɛ demba kana nnɔ ekila welekɔ́ lá esisa wɛnde. Kaanga yayale nghɔsɔ, la etepela wɛnde wevunda eloko wɛsɔ, Yeso ndalakanyɛka nde anto wopo wɔ mba lowiko—‘lowiko l’etshinda.’—Dj. 6:54.
6. Lá wopo wɔkɔnge w’okokaso ndjoka etepela wɛ Yeso wɛ ndɛ demba la nnɔ ekila wɛnde?
6 Olakanyelo wɔkɔnge Yeso ndalakanyɛ? Okama papoo ente, Yeso ndatepelaka nde lá yopo yɛ djingingi, ete ngo ndashimela omoto w’ose Samariya: ‘Onto wɔnghɔnɔ washi wa mɔnghɔpɛyɛ apokaki mposɛ lonkina, ladjikɛnde washi wa mɔnghɔpɛyɛ wangoyala ete ngo ikɔkɔ yɛ washi ikfunghunɔ djɛ mpɛyɛ lowiko l’etshinda.’ (Dj. 4:7, 14) b Yeso atakɔpa ntepela ante omoto w’ose Samariya angowa lowiko l’etshinda ngo má nnɔ washi wa washi. Lá wopo wɔkɔ ɔmɔ, nde atakɔpa ntepela ante oloyi w’anto woyalaki lá Kapɛrnaumɛ wangowa lowiko l’etshinda ntsha wambɔlɛ ankfunda yɛ demba djɛnde.
OTSHIKITANO WOLEKƆ L’ANTEYI KƐ MBAMBA IPE YƐSƆ
7. Anto amɔtshi yotepelaka ambɔ nge lá etepela wɛ Yeso welekɔ́ lá Djɔanɛ 6:53?
7 Ewandji ɛmɔtshi wɛ ntolo ntepelaka ambɔ etepela wɛ Yeso welekɔ́ lá Djɔanɛ 6:53 wɛ ndɛ demba la nnɔ ekila wɛnde, wɛnyɛ kɛnɛ k’anto oyɛwɔ ladjɛ nangha lá Dambo djɛ Nkɔlɔ djɛ Nkfumi, mande lá mbamba kɛsɔ atepelaka lonkina etepela wɛfɛna. (Mat. 26:26-28) Wangotepelake ambɔ onto onkfumɔ wingela lá Dambo djɛ Nkɔlɔ djɛ Nkfumi ladjɛ ndɛ mampa la nnɔ vinyɔ. Nkambo djɛsɔ dekɔ nsɔsɔlɔ? Alekɔ djonyi nsipisoyɛ nsɔsɔlɔ k’etepela wɛsɔ ladjikɛnde ɔnɔnyi onkfumɔ miliyɔ y’anto l’andja w’otondo nsanghanaka laso lá Bokfɔ. Tɔnghɛna otshikitano wolekɔ́ l’anteyi kɛ kɛnɛ kɛ Yeso ndatepela lá Djɔanɛ 6:53 la kɛnɛ kɛ ndatepela lá Dambo djɛ Nkɔlɔ djɛ Nkfumi.
8. Otshikitano wɔkɔnge wolekɔ l’anteyi kɛ mbamba ipe yɛsɔ? (Lenda edjinge asango.)
8 Nyontshɔ tokolenda otshikitano wolekɔ́ l’anteyi kɛ mbamba ipe yɛsɔ. Wɔ ntondo, winá la edjena kɛkɔnge Yeso ndatepela etepela welekɔ́ lá Djɔanɛ 6:53-56? Ndashimelaka nde oloyi w’ase Juda woyalaki lá Ngalile lá 32 D.D. Ananghaka nkambo djɛsɔ ɔnɔnyi ɔmɔ lá ntondo kɛnde mɔmɔla Dambo djɛ Nkɔlɔ djɛ Nkfumi lá Jerusalɛmɛ. W’ape, ndashimelaka na? Ekete kelekaki djonyi le anto wowekameyɛki lá Ngalile nde nshiyɛ ehomba wɛ demba koko ape wɛ nyuma. (Dj. 6:26) Lá nsɔsɔlɔ, winá wɔ efula k’anto yasambe nsipisoyɛ etepela wɛ Yeso ndatepela, iwɔ watshutshɛka djawo le nde mbala kɛkɔ kɛmɔ. Kaanga ambeki wande amɔtshi watshikaka ndokilika. (Dj. 6:14, 36, 42, 60, 64, 66) Nkambo djɛsɔ ntshikitana la kɛnɛ kenanghemisá m’ɔkɔngɔ w’ɔnɔnyi lá 33 D.D. winá wɔ Yeso ndamɔmɔla Dambo djɛ Nkɔlɔ djɛ Nkfumi la anto wayalaki la nde. Lá mbamba kɛsɔ, apɔstɔlɔ 11 wa nkɔmano watshikalaka la nde kaanga yotasipisoyɛ wɔlɔ wɔlɔ kɛnɛ kɛ ndaalakanyɛka. Koko, lá lɛdji lotshikitanyi la anto wa Ngalile, apɔstɔlɔ wa nkɔmano wasɔ wawolaka ambɔ Yeso ndeke Wɔna Ndjambe womboyɛ m’olongo. (Mat. 16:16) Ashimelaka ante: ‘Nyo ndeke anto wambokindjɛ ndjala la lemi l’ehemba wɛmi.’ (Luka 22:28) Etshikitano epe wɛsɔ wɛnyɛ ente lá Djɔanɛ 6:53 Yeso atapakisola kɛnɛ kengonanghemá lá Dambo djɛ Nkɔlɔ djɛ Nkfumi. Tolembetelo tonkina tolekɔ.
Djɔanɛ 6 ɛnyɛ kɛnɛ kɛ Yeso ndashimela oloyi w’anto lá Ngalile (lá wadjɛ lɔwɔ). Ɔnɔnyi ɔmɔ m’ɔkɔngɔ, ashimela iloyi yɛ daambi y’apɔstɔlɔ wande wa nkɔmano lá Jerusalɛmɛ (lá womɛ lɔwɔ) (Lenda itenyi 8)
ETEPELA WƐ YESO WELENDANA LA WƐ
9. Etepela wɛ Yeso wɛ Dambo djɛ Nkɔlɔ djɛ Nkfumi olendanawɔ l’anto akɔna?
9 Lá Dambo djɛ Nkɔlɔ djɛ Nkfumi, Yeso apɛyɛka apɔstɔlɔ wande mampa w’ipa l’okanga w’ifudjɛ la ashimelaka ante oyɛwɔ nde djingingi djɛ demba djɛnde. Apɛyɛka lonkina nkɔpɔ djɛ vinyɔ la ashimelaka ante ɔnɛ nde djingingi djɛ ‘ekila wɛmi wɛ isambi.’ (Mar. 14:22-25; Luka 22:20; 1 Kɔ. 11:24) Ɔsɔ alekɔ djoyi djɛ ntshina efula. Ndakɔtɛ isambi yɛ bango nde la ‘mvulu [kɛ nyuma] kɛ Isariyɛlɛ’ kengingela ‘lá Onkfumi wɔ Ndjambe,’ koko ape l’anto ankfumɔ. (Heb. 8:6, 10; 9:15) Apɔstɔlɔ wewaka ambɔ akambo ankfumɔ wa isambi yɛsɔ wapangonanghema ngo nkɔlɔ djenyi, koko lako ilá wangokfutama avuta má nyuma, ko makɔ wangingela lá isambi yɛ bango djɛ ndjala l’ompandju wɔ Yeso l’olongo.—Dj. 14:2, 3.
10. Wopo wɔkɔnge etepela wɛ Yeso wɛ Ngalile otshikitanawɔ la wɛ ndatepela lá Dambo djɛ Nkɔlɔ djɛ Nkfumi? (Lenda edjinge ntshango.)
10 Tewe ente lá Dambo djɛ Nkɔlɔ djɛ Nkfumi, Yeso ndashimelaka nde ‘iloyi yɛ daambi y’ɛnkɔkɔ.’ Iloyi yɛ daambi yɛsɔ iwangaka la apɔstɔlɔ wande wa nkɔmano wayalisá la nde lá mvulu. (Luka 12:32) Iwɔ la ankina wangingelá lá oloyi wɔsɔ, ndeke lɔngɔlɛ mampa la vinyɔ. Ngo iwɔ ndeke longowa edjena lá olongo l’ompandju wɔ Yeso. Otshikitano wolekɔ́ lá mbamba ipe yɛsɔ nde, Yeso ndashimelaka lá Ngalile nde oloyi w’anto, koko lá Dambo djɛ Nkɔlɔ djɛ Nkfumi ngo anto amangha toko. Etepela wɛnde wɛ lá Kapɛrnaumɛ welendana la lofulo lɔ anto lopewama mbala.
Anto walɛ mampa la vinyɔ oyɛwɔ ngo iloyi yɛ daambi yewama lofulo, koko ‘onto onkfumɔ’ wongoyala la djawo le Yeso angowa lowiko l’etshinda (Lenda itenyi 10)
11. Wopo wɔkɔnge etepela wɛ Yeso wɛ lá Ngalile ɛnyɛwɔ ente atatepela djɛ iloyi y’anto yewama lofulo?
11 Winá wɔ Yeso ndayalaka lá Ngalile lá 32 D.D., ndatepelaka nde djɛ ase Juda wakɔpaki djɛ nde ndapɛyɛ mampa. Koko, nde asepaka yimba yɛwɔ lá ekete keleká mampa djonyi—nonghanyi kekoka ndapɛyɛ lowiko l’etshinda. La Yeso atepelaka ante anto wambovɔ́ wakoka nkfundɔ lá lofu l’ekomo, la ndowika lotshinda. Atatepelaka djɛ anto amangha wambɔsɔnama wewama lofulo, ete ngo ndootepelaka m’ɔkɔngɔ lá Dambo djɛ Nkɔlɔ djɛ Nkfumi. Koko ndatepelaka lá Ngalile nde djɛ esako wekoka mba anto ankfumɔ. Lá nsɔsɔlɔ, nde atepelaka ante: ‘Onto onkfumɔ wɔngɔlɛ mampa wɔkɔ angowika etshinda etshinda . . . Mampa wɔsɔ nde demba djɛmi djɛ mɔngɔpɛyɛ djɛ anto w’andja mba lowiko.’—Dj. 6:51. c
12. Oyɛso ladjɛ nangha nge djɛ mba lowiko l’etshinda?
12 Yeso atashimela ase Juda lá Ngalile ante onto onkfumɔ wowika kana wongowotshɔ angowa esako wɛsɔ. Ngo anto ‘wangɔlɛ mampa’ toko, waangɛnyɛ djawo, ndeke longosakolama. Anto efula lɔɔko kɛnɛ ntepelaka ambɔ wangowa lowiko l’etshinda mande ‘walekɔ la djawo’ le Yeso, la má ndɔwɔsa ete ngo ombiki wɔwɔ. (Dj. 6:29) Koko, anto amɔtshi wa oloyi wɔ Ngalile wayalaki la djawo le Yeso wokadjɛka. Ladjikɛnge?
13. Ekete kɛkɔnge kelekɔ́ djonyi djɛ ndjala ombeki wɔ nsɔsɔlɔ?
13 Anto efula wa oloyi wɔ Yeso ndalesɛ wayalaka l’osasa wɔ ndokilika l’ilá kenkfumɔ kɛ ndapɛyɛka kɛnɛ kɛ yakɔpaka. Yakɔpaka nde ndasadjɛ má nsese, ndalesɛ ofele, la ndalakanyɛ kɛnɛ kɔkɔpawɔ. Koko, Yeso ɛnyɛka ante ambeki wa nsɔsɔlɔ ladjɛ nangha akambo ankina efula. Atayɛ lá looko ngo djɛ ndoseyɛ anto ehomba wɛwɔ wɛ demba. Iwɔ wayalaka ladjɛ ndjelola lá leeta lɔnde lɔ ‘ndjɛ le’ nde má ndjawola la nɛmɛyɛ ekete kenkfumɔ kɛ ndalakanyɛka.—Dj. 5:40; 6:44.
14. Oyɛso ladjɛ nangha nge djɛ mba wapɔ má demba l’ekila wɛ Yeso?
14 Yeso apikaka nghɔmɔ ɛnsɔsɔ lá djonyi djɛ ndjala la djawo. Lá ekete kɛkɔnge? Lá nkfulu kelekɔ́ la demba ole ekila wɛnde wɛ ndayale entshupa djɛ ndambola. Ase Juda wayalaki la djonyi djɛ djawo djɛ nghɔsɔ, ngole iso lɔɔko kɛnɛ tolekɔ la djonyi. (Dj. 6:40) Ɛwo, dj’iso mba wapɔ má demba la ekila wɛ Yeso, ete ngo Djɔanɛ 6:53 ɛnyɛnde, iso ladjɛ ndjala la djawo l’oshinga wɔ mbendo. Anto efula wakoka mba mbamba kɛsɔ.—Ɛfɛ. 1:7.
15-16. Djɔanɛ 6 otokotshɛ́nde djɛ nkota la wɔngɔ nkambo djɛkɔnge?
15 Ɔkɔndɔ wɔ Bible wɔ Djɔanɛ shapitrɛ 6 wolekɔ la ntshina efula leso la l’anto waso wa ngandji. Wɛnyɛ papoo wopo wɔ Yeso ɔkɔpande anto. Asadjɛka elando lá Ngalile, alakanyɛka akambo w’Onkfumi, la ayashikikɛka djɛ nshiyɛ ehomba wɛwɔ wɛ demba. (Luka 9:11; Dj. 6:2, 11, 12) Ekete keleka djonyi nde, alakanyɛka ante nde ndeke ‘mampa kɛ lowiko.’—Dj. 6:35, 48.
16 Anto wa ndete ante ‘ɛnkɔkɔ enkina’ wapalɛka la wapakoke ndɛ mampa la vinyɔ lá Dambo djɛ Nkɔlɔ djɛ Nkfumi nanghemaka ɔnɔnyi onkfumɔ. (Dj. 10:16) Kaanga nghɔsɔ, wangowake wapɔ má demba l’ekila wɛ Yeso Kristo. Wangowake wapɔ má ndjala la djawo l’oshinga wɔ mbendo w’olambo wɔnde. (Dj. 6:53) L’onkoko onkina, anto walɛ mampa la vinyɔ wɛnyɛ ambɔ wangɔsa opiko lá isambi yɛ bango ete ngo ekitshɔ wɛ Onkfumi w’olongo. Lá nsɔsɔlɔ, ayale oyɛso nde onkfutami kana ɔnkɔkɔ onkina, ɔkɔndɔ wɔ Djɔanɛ 6 wolekɔ la nsakiso k’efula leso. Wɔkɔkɔmɛ djonyi djɛ ndjala la djawo djɛ mba lowiko l’etshinda.
YEEMBO 150 Hona Yehova djɛ nde nkotshungola (lá Otetela)
a Totepelaka djɛ Djɔanɛ 6:5-35 lá djamba mboheta.
b Washi wa Yeso ndatepela oyɛwɔ nde djingingi djɛ nonghanyi yɛ Yehova ndɔshi dj’iso mba lowiko l’etshinda.
