DJAMBA DJƐ WEKELO 51
YEEMBO 3 Wolo wɔso, nkongi djɛso, wɛkamo wɔso (lá Otetela)
Wisɔyi wanyo walekɔ la ntshina efula le Yehova
‘Ila wisɔyi wami lá iteka yɛko yɛ loposo lɔ nyama. Watafunama lá onkanda wɔko?’—YEE. 56:8.
IKANYI YƐ DJAMBA
Yehova ndjokaka wɔlɔ wɔlɔ ndjolo yɛnaso la angɔtɔpɛyɛ lokembo loyɛso la djonyi.
1-2. Akambo wakɔnge wakoka ntɔkɛdjɛ wisɔyi?
ISANKFUMƆ nkɛdjɛka wisɔyi mbala efula. Winá w’opomanaso lá nkambo ntosasangɛ, ntɔngɔkɛdjɛke wisɔyi. Mbala imɔtshi ɔkɛlaka wisɔyi winá wɔ nkambo mɔtshi djɛ wɔlɔ kana ntshikitanyi yakokomela—ndjɔmbɔmba, winá wɔ ngawote, ngavungɔ nkambo mɔtshi djɛ wɔlɔ efula, kana ngalongola winako ɔmɔtshi wɔ ngandji wɔ nyakfukana ɛnɔnyi l’ɛnɔnyi.
2 Koko esango efula, tɔngɔkɛdjɛke wisɔyi m’ɔtɛ wɔ ndjolo kɛ sokaka l’oloko. Ndjɔmbɔmba, tokoka ndela winá w’onto w’ilelaso oloko otonanghelande nyɛtshi. Tokoka ndela lonkina winá w’otolamata olando kana winá w’ovusɛso onto wɔ ngandji. Lá winá wɛ nghɔsɔ, tokoka ndjoka ete ngo ɔprɔfɛtɛ Jɛrɛmi ndoke winá wɔ Jerusalɛmɛ yakfu l’akatshi w’ase Babilɔnɛ. Jɛrɛmi atepelaka ante: ‘Ankɔkɔ yɛ washi ikɛla kɛla má wiso wami . . . Wiso wami walela ipa mpekɔ, ipa mpomola.’—Del. 3:48, 49.
3. Yehova okakande ngete mo winá w’enkambi wɛnde ɛnawɔ ndjolo? (Izaya 63:9)
3 Yehova ewa efula kɛ wisɔyi wɔkɛdjɛkaso winá w’opomanaso l’akambo wa yɛnyi. Bible ntoshikikɛ ente nde ɛna ekete kenkfumɔ kɛpɛyɛ enkambi wɛnde djodjo, la oka winá w’olelaso djɛ mpona okotshɔ. (Yee. 34:15) Koko Yehova ntonanghelaka wayi efula ape ngo ntɛna la ntoka toko. Ete ngo oyɛnde Papa kɛ ngandji, angokake yɛnyi efula winá w’ɛnande wana wande walela, la alekɔ entshupa djɛ ntokotshɛ́.—Wala Izaya 63:9.
4. Okokaso mba olakanyelo wɔkɔnge má ndjɔmbɔmba yɛ Bible lá wopo wɔ Yehova ndokaka?
4 L’Otepela wɔnde, Yehova nyɛnyɛka wopo w’okakande winá w’enkambi wɛnde olelawɔ. Tokoka nyɛna má ndenda ndjɔmbɔmba kɛ Ana, Davidɛ, la Nkfumi Hezekiya. Akambo wakɔnge waakɛdjisá wisɔyi? Yehova ndoke ngete mo l’alelo wawɔ wa yalɔmbaka okotshɔ? Ko wopo wɔkɔnge ndjɔmbɔmba yɛwɔ otokembɛwɔ winá wɔkɛdjɛso wisɔyi wa yɛnyi, kana wa ntshamba djɛ nkongi?
YEHOVA ƐNA WISƆYI WAKO WINÁ W’OVUSƐ
5. Ana ndokaka ngete mo má nkambo dj’okomelisá?
5 Ana ayalaki l’akambo efula wɔkɛdjɛki wisɔyi. Nkambo mɔtshi nde womɛnde ayalaki la wadji ape, ko waadjɛnde Penina osolaki ampɔsɔ. Atayala ngo l’okakasano wɔsɔ toko, Ana ayalaki lonkina ekfuta, ko Penina ayalaki la wana efula. (1 Sa. 1:1, 2) Penina apɛyɛki Ana nsɔnyi winá enkfumɔ mande atakokaki mbota wɔna. Iyotayala wɛ, ngotoka ngete mo? Ana okaki yɛnyi efula, ko ‘nde alelaki la atalɛka kaanga ekete,’ la okaki ‘djodjo dj’efula’ l’oloko.—1 Sa. 1:6, 7, 10.
6. Ana ndananghe nge djɛ mba lokembo?
6 Ana ndananghe nge djɛ mba lokembo? Ekete kɛmɔtshi kɛ ndananghe nde atshɔka tá tabɛrnaklɛ, layalaki djwe djɛ ɔtɛmwɛlɔ wɔ piyɔɔ. L’eteyi, nkoka ndjala entshupa la wiso wɔ bandja djɛ tabɛrnaklɛ, ‘nde atateyɛka ndɔmba Yehova la alelaka efula.’ Awɔndaka Yehova: ‘Lenda ndjolo k’onkambi wɔko ko omvungɔ.’ (1 Sa. 1:10b, 11) Ana ashimelaka Yehova papoo wopo wɔ ndokaka la kɛnɛ keyalaki l’ɔtɛ wɔnde. Yehova okaka yɛnyi efula winá wɔ ndɛnyi delo la wisɔyi wa Ana, mande nde ɔkɔpaki efula!
7. Ana ndoke ngete mo m’ɔkɔngɔ wɔ nde ndjipola Yehova oloko lá lɔlɔmbɔ?
7 Ana ndoke ngete mo m’ɔkɔngɔ wɔ nde ndjipola Yehova oloko lá lɔlɔmbɔ la wɔ Nkfundji k’Ekekete Eli ndoshikikɛ? Bible ntepela nghɔnɛ: ‘Omoto wɔkɔ atshɔka, atɔlɛka la nde atayala lonkina l’elongi kɛ djandji djandji.’ (1 Sa. 1:17, 18) Kaanga ndayalaka ngo lá okakasano wɔnde, Ana okaka wɔlɔ. Asodjɛka odjito wɔnde wotshimbɛki Yimba le Yehova. Nde ɛnaka ndjolo yɛnde, okaka alelo wande, ko manyi ɔpɛyɛka mbamba kɛ mbota.—1 Sa. 1:19, 20; 2:21.
8-9. Lá nkilika Hebero 10:24, 25, lamo oyɛso ladjɛ nangha la wolo djɛ ndjingela nsanghanyɛ? (Lenda ole ntshango.)
8 Elakanyelo w’owaso. Okfulumeyɛ okakasano ɔmɔtshi wokotshinda djɛ ndela kana nkɛdjɛ wisɔyi? Nkoka ndjala okfulunghana la djodjo l’oloko mande ombovusɛ́ ewoto kana ilongo yɛko imɔtshi. Lá winá wɛ nghɔsɔ, lako nyɛtshi ntsha olekɔ la mposɛ kɛ ndjala nghɔmɛlɛ. Koko ete ngo Ana ndawa lokembo la ndoke wɔlɔ má ntshɔ tá tabɛrnaklɛ, okoka mba lokembo má ndjingela nsanghanyɛ, kaanga ngotoke wɔlɔ. (Wala Hebero 10:24, 25.) Winá w’ekameyɛso losango lokembɛ́ lɔ Bible lá nsanghanyɛ, Yehova ntokotshɛ́ka djɛ ndjala la tokanyi tɔ wɔlɔ ko nyimɛ tɔ nyɛtshi. Kɛsɔ ntokotshɛ́ka djɛ ndjoka wɔlɔ, kaanga ntsha okakasano wɔso wotashile.
9 Lá nsanghanyɛ, tongopomanake lonkina la winaso andjawodji watokembɛ la watɔkɔpa, ko kɛsɔ ntokotshɛ́ka djɛ ndjoka wɔlɔ. (1 Te. 5:11, 14) Tokolenda kɛnɛ kekomelisá yat’ekalo itshikitanyi imɔtshi ivusisá wadji. Atepela ante: “Winá ɛmɔtshi, langoyalake la mposɛ kɛ ndjala mɔmɛlɛ, mande langokindjɛke ndela wadjɛmi. Koko nsanghanyɛ yɛso iyalaka ikɔkɔ yɛ lokembo. Etepela wɛ wɔlɔ wɛ wananyɔ l’ankaana wenkembɛki. Kaanga m’okaka yɛnyi la wɔma lá ntondo kɛ nkoma lá nsanghanyɛ, lokaki winá enkfumɔ wɔlɔ l’eteyi.” Winá w’oyɛso lá nsanghanyɛ, Yehova nkoka nkamba la wananyɔ l’ankaana djɛ ntokotshɛ́.
Tokoka mba lokembo me winaso Akristo (Lenda itenyi 8-9)
10. Okokaso ndjokola ndjɔmbɔmba kɛ Ana winá w’oyɛso la yɛnyi ngete mo?
10 Ana okaka lonkina wɔlɔ má nshimela Yehova wopo wɔ ndokaka lá lɔlɔmbɔ. Ngole nyo nyokoka ‘nsodjɛ ekiyano wɛnyo le [Yehova],’ l’eshikikelo ente angonyoka. (1 Pɛ. 5:7) Nkaana kɛmɔtshi kɛ ase wibi yawole womɛnde asesa, avungɔ ante: “Ndjokaka ete ngo oloko wɔmi wombatshɛ totatshi totatshi la ente mpokaki wɔlɔ lotshinda. Yehova, Papa kɛmi kɛ ngandji kɛ l’olongo ndeke lɔmpɛyɛki wolo la lokembo má lɔlɔmbɔ. Winá ɛmɔtshi, ntawaki etepela wɛ wɔlɔ wɛ mposɛ, koko andjokaki. Winá wɔ matshimbaka yimba efula, ndɔmbaki djɛ mba vu. Ndjokaki vu djeyɛ má oloko lá yimba, ko nkindjɛki ntshɔ tá ntondo.” Winá w’oshimelɛ Yehova ekiyano wɛko, wisɔyi wako ndɔpɛyɛka yɛnyi efula, angokake djodjo dekɔ l’oloko wɔko. Kaanga nkambo nkɔpɛyɛ okiyano yotashile, Yehova nkoka mpɔdjɛ oloko wɔko wombatshɛ la nkokotshɛ́ djɛ ndjala ndambo vu. (Yee. 94:19; Flp. 4:6, 7) Ngole angofuta okfulumedji wɔko wɔ nkɔmano.—Heb. 11:6.
WINÁ W’ONTO ƆMƆTSHI OKOFUNGANDE
11. Davidɛ ndokaka ngete mo má akambo ankfumɔ wa yɛnyi w’okomelaki?
11 L’ilá kɛ lowiko lɔnde, Davidɛ akfulumeyɛka akambo efula w’oledjisá la wɔkɛdjisá wisɔyi. Anto efula w’otonaki, la anto amɔtshi wa ndilelaka oloko wofungaka. (1 Sa. 19:10, 11; 2 Sa. 15:10-14, 30) Winá ɔmɔtshi wɔ ndayalaka l’okakasano, afunaka ante: ‘Lemi lambɔtɛka m’ɔtɛ w’osekumelo wɔmi; lemi nyɔkɛka mbeto kɛmi otsho w’otondo la wisɔyi; lambolodjɛ nkosa kintasɛmi la wisɔyi.’ Lamo Davidɛ ndananghe nghɔsɔ? Apakisola ante: ‘M’ɔtɛ w’anto wa nyɛnyɛ nkɛtshi.’ (Yee. 6:6, 7) Nanghedji djɛ nyɛtshi dj’anto ankina mpɛyɛki Davidɛ ndjolo k’efula k’otshindaki djɛ nde mpolokɔ wisɔyi.
12. Ete ngo ɛnaso lá Yeembo 56:8, Davidɛ ndayalaka l’eshikikelo lá nkambo djɛkɔnge?
12 Davidɛ ayalaki l’eshikikelo ante Yehova ɔkɔpa, kaanga antonyi wa nkekete yonanyɛka. Afunaka ante: ‘Yehova angoka tɛndjɛ tɔ delo djɛmi.’ (Yee. 6:8) Lá mbamba kɛmɔtshi, Davidɛ atepelaka etepela wɛ wɔlɔ efula wɛnaso lá Yeembo 56:8. (Wala.) Etepela wɛnɛ wɛnyɛ papoo wopo wɔ Yehova ndokaka la ndotowakelaka. Davidɛ okaka ngo ngete Yehova alongeyɛ wisɔyi wande lá iteka kana afuna l’onkanda. Davidɛ ayashikikɛki ante Yehova ewa la avungɔ ndjolo yɛnde. Davidɛ ewaki wɔlɔ wɔlɔ ante Papa kɛnde kɛ l’olongo kɛ ngandji ewa ape ngo ekakasano w’okfulumeyɛnde, koko ole wopo w’okande.
13. Winá wɔ onto otofungande, okokaso mba lokembo má mpe? (Lenda ole ntshango.)
13 Elakanyelo w’owaso. Okfulumeyɛ ekakasano ɛmɔtshi mande onto ɔmɔtshi wɔ ngilelaka oloko ambokodjimba kana ambokofunga? Nkoka ndjala okfulunghana la djodjo l’oloko mande oshile kana bala djɛko mbovɔ, kana onto ɔmɔtshi wɔkɔpɛ efula ambokadjɛ Yehova. Wɔnanyɔ ɔmɔtshi wɔ wadjɛnde ndananghe loseka la ndokadjɛ atepela ante: “Ndjalaka la yɛnyi efula, la ntawolaki ente nkambo djɛ nghɔnɛ nkoka nkomela lemi. Nyɛnaka ente mpalekɔ lonkina l’onkfunda ole ndjokaka yɛnyi la nkɛlɛ efula.” Ntsha onto ɔmɔtshi ambokofungá la ambɔkɔpɛyɛ́ nsɔnyi, waka lokembo má ndjewa ente Yehova apakokadjɛki kawo. Wɔnanyɔ atepelaka ante: “Ndjɛka ndɛna ente anto wapakoke ndjala winá enkfumɔ la nkɔmano, koko Yehova alekɔ Ve djɛso. Ayale kɛkɔnge kengotokomela, Yehova alekɔ winá enkfumɔ imfuka djɛ ntokotshɛ́. Apakadjɛki enkambi wɛnde wɛ nkɔmano.” (Yee. 37:28) Vungɔ lonkina ente, ngandji kɛ Yehova keleka kɛ wana w’anto otale. Kaanga yoyalaka yɛnyi efula winá w’onto wɔkɔpɛ okofungande la okokadjɛnde, ngandji kɛ Yehova kepatshikitanaka. (Ɔrɔ. 8:38, 39) Olakanyelo w’owaso nde: Kaanga onto kokofungaka, Papa kɛko kɛ l’olongo nkɔkɔpaka.
Onkanda wɔ Teembo ntoshikikɛka ente Yehova alekɔ imfuka l’anto wambatshɛ eloko (Lenda itenyi 13)
14. Eshikikelo kɛkɔnge kɛtɔpɛyɛ Yeembo 34:18?
14 Winá wotofungawɔ, tokoka mba lokembo m’etepela wekembɛ wɛ Davidɛ welekɔ lá Yeembo 34:18. (Wala.) Onkanda ɔmɔtshi wɛdjɛ anto “wambotshimba yimba” la “anto wapalekɔ́ l’ekete kɛ wɔlɔ kakonga lá ntondo.” Yehova ndokaka ngete mo te onto wɔ yombofunga kana wɔ yombokadjɛ? Ete ngo ombotshi wɔ ngandji ndɔwɛmbaka la ndɔwɔndaka wɔna winá w’olelande, Yehova ‘alekɔ entshupa’ laso—ntokaka djandji la nkɔpaka ntokotshɛ́ winá w’otofungawɔ la w’ovusɛso. Alekɔ entshupa djɛ ntokembɛ la mpɔdjɛ djodjo dj’okaso l’oloko la yimba yɛso imbotshimbá. La ambɔtɔpɛyɛ́ nkete efula dj’okongaso l’oloko lukuluku ntokotshɛ́ djɛ nkfulumeyɛ ehemba wɛso.—Iza. 65:17.
WISƆYI WA NTSHAMBA DJƐ NKONGI
15. Nkambo djɛkɔnge nkomelisá Hezekiya dj’okomisá djɛ nde ndela?
15 Winá wɔ ndayalaka l’ɛnɔnyi 39, Hezekiya, Nkfumi kɛ Juda ewaka ante alekɔ l’olando wɔ wolo w’ipa la nkongi djɛ nsala. Ɔprɔfɛtɛ Izaya ashimelaka Hezekiya losango lime Yehova ante ovɔ l’olando wɔsɔ. (2 Nk. 20:1) Ɛnama ete ngo Hezekiya atayala la nkongi lonkina. Hezekiya asolongotɔka la alelaka efula m’ɔtɛ wɔ losango lɔsɔ. Alɔmbaka Yehova l’otshilo onkfumɔ.—2 Nk. 20:2, 3.
16. Yehova ndoke ngete mo winá wɔ ndɛnyi Hezekiya alela?
16 Yehova okaka Hezekiya la bale efula, ko oshimelaka la djandji nkfumɔ ante: ‘Lamboka lɔlɔmbɔ lɔko. Lamɛna wisɔyi wako. Nkɔpa nkosadjɛ.’ Má mbamba kɛ Izaya, Yehova olakaka djɛ ntaloyɛ lowiko lɔnde la djɛ nseela Jerusalɛmɛ má akatshi w’ase Asuriya.—2 Nk. 20:4-6.
17. Wopo wɔkɔnge Yehova okokande ntosuka ntsha tolekɔ l’olando w’ekekete? (Yeembo 41:3) (Lenda ole ntshango.)
17 Elakanyelo w’owaso. Otata olando ɔmɔtshi ipa la nkongi djɛ nsala? Shimela Yehova lá lɔlɔmbɔ, angokoka kaanga olelɛ. Bible ntoshikikɛka ente ‘Papa kɛ nkɛtshi edjinge Ndjambe kɛ lokembo lonkfumɔ’ angotokembɛ l’ehemba wɛso enkfumɔ. (2 Kɔ. 1:3, 4) Topakoke nkongela lɔɔko kɛnɛ ente Yehova angotimeyɛ ekakasano enkfumɔ, koko tokoka nkongela ente angotosuka. (Wala Yeembo 41:3.) Má mbamba kɛ nyuma kɛnde, Yehova ntɔpɛyɛka wolo, balo, la vu djɛ l’eteyi djɛ nkfulumeyɛ. (Woo. 18:14; Flp. 4:13) Angotosukake lonkina má ntɔpɛyɛ nkongi ente nkopo inkfumɔ y’elando ingoshiya.—Iza. 33:24.
Yehova angokadjimola ndɔmbɔ yɛso má ntɔpɛyɛ wolo, balo la vu djɛ l’eteyi (Lenda itenyi 17)
18. Vɛrse djɛkɔnge nkokembɛka winá w’oyɛ l’ohemba wɔ wolo? (Lenda ipapango “ Etepela wetovumbɛ́ w’edjola wisɔyi waso.”)
18 Etepela wɛ Yehova wɛpɛyɛka Hezekiya wolo. Lá wopo wɔkɔ ɔmɔ, tokoka mba wolo má Otepela wɔ Ndjambe. Yehova alamaka etepela wevumbɛ wokokaso ndodjɛ lá wɔɔngɔ winá w’otshimbaso yimba. (Ɔrɔ. 15:4) Winá wɔ yavunde nkaana kɛmɔtshi kimá owɛstɛ wɔ Afrique la kansɛrɛ, alelaki mbala efula. Akɔndɔla ante: “Vɛrse mpɛyisá lokembo efula nde Izaya 26:3. Kaanga sopakoke ntshikitanyɛ akambo kana nyimɛ ohemba, vɛrse djɛsɔ nshikikɛka ente Yehova ntɔpɛyɛka vu dj’eteyi ntokotshɛ́ djɛ ndenda wopo wɔ ndjelola winá w’oyɛso l’ehemba.” Olekɔ la vɛrse mɔtshi nkokembɛka winá w’oyɛ l’ohemba wɔ wolo kana wɛnɛ ente opalekɔ la nkongi?
19. Akambo wakɔnge watokonga l’etsho weyaye?
19 Towika l’eleko k’etsho w’ekomo, la tewa ente akambo wakoka ntoledjɛ wataleke mfula. Koko ete ngo sɛnisa djɛ Ana, Davidɛ, la Nkfumi Hezekiya, Yehova ɛna wisɔyi waso la atoka la bale efula. Wisɔyi waso walekɔ la ntshina efula le nde. Djɛko ndeke winá w’opomanaso l’akambo wa ndjolo, lá nsɔsɔlɔ iso nkɔpaka ndjipola Yehova oloko lá lɔlɔmbɔ. Totawangɔke wananyɔ l’ankaana yɛso yɛ ngandji y’otshumano. La tokindjɛ mba lokembo má etepela w’ekembɛ wɛ Bible. Tokoka ndáshikikɛ ente ntsha tombokfulumeyɛ la nkɔmano, Yehova angotofuta. Lofuto lɔsɔ lolendana ole la daka djɛnyɛ ente lá winá wɛdje, angodjola má wiso waso wisɔyi wa ndjolo la w’ekakasano enkfumɔ w’okfulumeyɛso. (Ndj. 21:4) Ko manyi tɔngɔkɛdjɛka ngo wisɔyi w’osasa.
YEEMBO 4 ‘Yehova ndeke Olami wɔmi’ (lá Otetela)
