Ɔpɔstɔlɔ Poolo afunelaka Timɔte, winande ikokolo ante: ‘Lambɔkɔpɛyɛ ɔlɛmbɛ lá ntondo kɛ Ndjambe la kɛ Kristo Yeso la kɛ andjelo wasɔnamisá djɛ wɛ nkilika alako wanɛ má nsamba ndjala l’ikanyi yɛ nyɛtshi ntondo ole nsamba nsɔna dongi.’—1 Ti. 5:21.

Ntondo ntondo, tokolenda anto wapalekɔ́ lá oloyi wɔ andjelo w’ɔkɔpaso ntepela lanɛ. Okama papoo ente andjelo wanɛ wapalekɔ l’anteyi k’anto 144 000 wasɔnamisá. Winá wɔ Poolo ndafunelaka Timɔte, ekfundwelo kɛ Akristo w’ankfutami w’avuta ketatateyɛ. Apɔstɔlɔ l’ankfutami ankina watakome ntongami djɛ nyuma, lasɔ ape iwɔ ndeke ‘andjelo wasɔnamisá.’—1 Kɔ. 15:50-54; 1 Te. 4:13-17; 1 Dj. 3:2.

La koko, ‘andjelo wasɔnamisá’ wasɔ ape andjelo watɔmbɔkisá lá eleko kɛ Mvula k’Elola. Andjelo wasɔ wahetaka tá onkoko wɔ Satana, wakomaka ɛdjɛngɛ la antonyi wa Yeso. (Ewa. 6:2; Luka 8:30, 31; 2 Pɛ. 2:4) L’etsho weyaye, wangawokela lá mpeku dj’ipa l’ekomo l’ilá k’ɛnɔnyi 1000, ekomo ekomo wangoyakema esanga la Djabolo.—Yuda 6; Ndj. 20:1-3, 10.

‘Andjelo wasɔnamisá’ wa Poolo ndatepela wayalaka ladjɛ nsuka ‘Ndjambe la Kristo Yeso’ l’olongo, ete ngo vɛrse otepelande.

Andjelo wa nkɔmano walekɔ nunu la nunu. (Heb. 12:22, 23) Topakoke nkanela ente andjelo ankfumɔ wangokambake ngo olemo ɔmɔ lá winá wɔkɔ ɔmɔ. (Ndj. 14:17, 18) Tovungɔ ente ondjelo ɔmɔtshi awaka odjito wɔ ndjaka angala 185 000 w’ase Asuriya. (2 Nk. 19:35) Andjelo amɔtshi wawaka odjito wɔ ‘nyimɛ akambo ankfumɔ watakanyɛ anto la anto wanangha wayi wa pɔlɔ má Onkfumi’ wɔ Yeso. (Mat. 13:39-41) Ankina wangokotshɛ́ djɛ ‘ntshumanyɛ ansɔnami wande’ l’olongo. (Mat. 24:31) Ole ankina walekɔ l’odjito wɔ ‘ntolama lá amboka yɛso.’—Yee. 91:11; Mat. 18:10; ɛdjɛ la Mateo 4:11; Luka 22:43.

‘Andjelo wasɔnamisá’ w’otepelawɔ lá 1 Timɔte 5:21 oyɛwɔ nde andjelo wawisá edjito etshikitanyi djɛ nkotshɛ́ enkambi wɛ Ndjambe. Lá nkilika akambo wa Poolo ndatepelaka, ndapɛyɛka nde tokokolo alako, mande wɛdje mba dilɛmɛlɔ me otshumano. Koko lá wedji wɔwɔ, tokokolo ladjɛ nkotshɛ edjito wɛwɔ ipa ‘ndjala l’ikanyi yɛ nyɛtshi ntondo ole nsamba nsɔna dongi,’ la nsamba ndɔsa nkano kana ndjopa dombo lankeke lankeke lá ntondo kɛ ntɔnɔla. Elonga k’ekekete k’oyɛwɔ ladjɛ nkilika dako djɛ Poolo ndafune má nyuma k’ekina djɛsɔ nde, wakamba ‘lá ntondo kɛ Ndjambe la kɛ Kristo Yeso la kɛ andjelo wasɔnamisá.’ Okama papoo ente andjelo amɔtshi walekɔ l’odjito wɔ nkotshɛ́ otshumano, ndjɔmbɔmba nama otshumano, ndenda olemo w’ipoposanyɛ, ko manyi mpɛyɛ Yehova lɔpɔlɔ.—Mat. 18:10; Ndj. 14:6.