1. Lamo imeyelo kɛ wana w’anto yoyalaka mbala efula okakasano nsipisoyɛ?

 ‘LAMBOKIMEYƐ.’ Otepela wɔsɔ nkoka nkotshitshimɛ oloko, pekapeka ntsha ewa ente ombotepela kana omonangha ekete kɛmɔtshi kɛmbɔkɔta onto! Koko kɛkɔnge kɛ itepela ‘lambokimeyɛ’ osakisolawɔ nsɔsɔlɔ? Onto wɔ ngakiyanyɛ́ ambotepelá ante nyombokalɔ ndjala tolongo? Kana osakisolawɔ ngo apakɔpɛ ntepela nkambo djeposisá? Nyimeyɛ onto nkoka nsakisola akambo efula.

 2. Kɛkɔnge ketepela Afunelo lá nkambo djɛ imeyelo kɛ Yehova? (Lenda edjinge nɔtɛ.)

² Wopo wɔ Yehova otimeyɛkande iso ananghi yɛ mpekanto, ntshikitana otale la wopo w’oyawimeyɛkaso. Lako kaanga onto ɔmɔ w’okoka nyimeyɛ ete ngo Yehova. Ondjombe ashimelaka Yehova ante: ‘Wɛ olekɔ la imeyelo kɛ nsɔsɔlɔ, djɛ wɛ ndjokama wɔma.’ a (Yee. 130:4) Ɛwo, imeyelo kɛ Yehova kelekɔ ‘imeyelo kɛ nsɔsɔlɔ.’ Nde ndeke lɔtɛnyɛ kɛnɛ kesakisola imeyelo. Lá djena efula, winá w’amfunyi yɛ Bible iyakambaka la itepela yɛ Hebero ikadjimwama nyimeyɛ, iwɔ watakambaki djɛ ntepela imeyelo kɛ wana w’anto.

 3. Wopo wɔkɔnge imeyelo kɛ Yehova otshikitanawɔ otale la kɛso? (Izaya 55:6, 7)

³ Winá wɔ Yehova imeyɛnde onto, mpekanto kɛnde kengodjimɔke. Djokanelo djɛwɔ ntshitanisá nkalɔka mbɔnga. Yehova  nyimeyɛka lá lɛdji l’efula ole l’oloko ɔmɔ.—Wala Izaya 55:​6, 7.

 4. Wopo wɔkɔnge Yehova otokotshɛ́nde djɛ nsipisoyɛ nsakiso kɛ imeyelo kɛ nsɔsɔlɔ?

⁴ Ntsha imeyelo kɛ Yehova ketshikitana otale efula la kɛso, wopo wɔkɔnge iso wana w’anto wa ntshamba djɛ djɔ okokaso nsɔsɔlɔ nsipisoyɛ kɛnɛ k’osakisolawɔ? Yehova nkambaka la totepela tɔ wɔlɔ efula djɛ ntokotshɛ́ djɛ ndjoka kɛnɛ kesakisola imeyelo kɛnde. Lá djamba djɛnɛ, tongoshishima totepela tɔmɔtshi. Tɔngɔtɛnyɛ́ wopo wɔ Yehova imɛnde mpekanto, lá winá wɔkɔ ɔmɔ, okalɔnde ndɔngɔsɔla djokanelo ntshitanisá m’ɔtɛ wɔ mpekanto. Winá w’ɔkɔdjɛso totepela tɔsɔ, tongetela ndjala la djedjɛ te Papa kɛso kɛ ngandji, kanga lɛnyɛ imeyelo kɛnde lá topo efula.

YEHOVA NYIMƐKA MPEKANTO

 5. Kɛkɔnge kenanghemaka winá wɔ Yehova otimeyɛnde mpekanto yɛso?

⁵ Bible ndjɛdjɛka mpekanto l’odjito w’ekekete efula. Nkfumi Davidɛ atepelaka lá nkambo djɛ mpekanto yɛnde lá lɛdji lɔnɛ: ‘Evunga wɛmi wembondjikama l’ɔtɛ; ete ngo odjito w’ekekete, lemi mpakoke mbɛmba.’ (Yee. 38:4) Koko Yehova nyimeyɛka anto wa nyɛtshi walapɛlá mpekanto yɛwɔ. (Yee. 25:18; 32:5) Itepela yɛ Hebero ikadjimwama ‘nyimeyɛ’ nsakisolaka “nsangola” kana “mbɛmba.” Tokoka nyɛna Yehova ete ngo mpame kɛ nkfulu efula kembotapolá odjito w’ekekete efula wɔ mpekanto má mpɛka djɛso lá lɛdji lɔ djingingi ko ambɔtɔwɛmbɛla.

 6. Tá otale wɔ ngete mo Yehova owangoyɛnde mpekanto yɛso?

⁶ Bible nkamba l’itepela inkina yɛnyɛ ente Yehova mbangoyɛka mpekanto yɛso otale la nde. Yeembo 103:12 itoshimela ante: ‘Ete ngo ɛkɛlɔ la edjimbelo kɛ winá yombowangɔ otale, nghɔsɔ ndeke ndawangoyɛ nyɛtshi yɛso otale laso.’ Ɛkɛlɔ kembowangɔ otale efula l’edjimbelo. Atshuku ape wasɔ wapapomanaki. Kɛsɔ nsakisolaka ente Yehova ambowangoyɛ́ mpekanto yɛso lá lɛdji lɔ sopakoke nkanela. Ɔsɔ ngo oyɛso l’eshikikelo má ndjewa ente Yehova ntimeyɛka lá lɛdji l’efula!

 7. Kɛkɔnge kɛ Bible otepelande djɛ kɛnɛ kɛ Yehova onanghakande la mpekanto yɛso? (Mika 7:18, 19)

⁷ Kaanga Yehova owangoyɛkande lá djingingi mpekanto yɛso otale laso, angovungɔke mpekanto yɛkɔ? Lako. Nkfumi Hezekiya afunaka lá nkambo djɛ Yehova ante: ‘Wɛ ɔhɔnyɔlaka mpekanto yɛmi inkfumɔ tá ɔkɔngɔ wɔko.’ Kana, ete ngo nɔtɛ otepelande ante: ‘imɛka mpekanto yɛmi inkfumɔ má ntondo kɛko.’ (Iza. 38:9, 17; nɔtɛ) Totepela tɔsɔ tɛnyɛ ente Yehova ndɔsaka mpekanto y’anto walapɛla ko nde mpɔnyɔlaka otale má wiso wande. Etepela wɛsɔ wekoka nkadjimwama lonkina nghɔnɛ: “Wɛ ombonanghá ngo ngete lemi ntananghaka [mpekanto] ntondo.” Bible mpika lonkina nghɔmɔ ɛnsɔsɔ lá itepela inkina itanema lá Mika 7:​18, 19. (Wala.) L’eteyi Yehova ɛnyɛ ante angɔhɔnyɔla mpekanto yɛso lá ndjinga kɛ ndjale. Lá Isariyɛlɛ yɛ ntondo, lako kaanga onto w’okokaki mposɛ ekete kembotubela lá ndjinga kɛ ndjale.

 8. Sombeka tii lanɛ nge?

⁸ Má mbamba kɛ totepela tɔsɔ, tombewa ente winá wɔ Yehova otimeyɛnde, nde ntokotshɛ́ka dj’iso ndjoka wɔlɔ má ntɔwɛmbɛla odjito wɔ mpekanto yɛso. Lá nsɔsɔlɔ, ete ngo Davidɛ ndatepela, ‘Mpeyi le anto wa yimeyɛ nanghedji djɛwɔ djɛ pɔlɔ la w’iyadjipisanyɛ mpekanto yɛwɔ; mpeyi le onto wɔ Yehova ndopangila yimba lá mpekanto kɛnde.’ (Ɔrɔ. 4:7, 8) Ɔsɔ ndeke imeyelo kɛ nsɔsɔlɔ!

YEHOVA NDJIMOLAKA MPEKANTO

 9. Totepela tɔkɔnge tombokamba la Yehova djɛ mpakisola wopo w’otshanghanyɛnde imeyelo kɛnde?

⁹ Yehova akamba la totepela tonkina djɛ ntokotshɛ́ dj’iso mfudjɛ djedjɛ djɛso, lá wopo  w’odjimolande mpekanto yɛ anto walapɛla, má mbamba k’oshinga wɔ mbendo. Yehova atepela lá lɛdji lɔ djingingi ete ngo angosolake la angosasolake mpekanto. Kɛsɔ nanghaka djɛ onanghi wɔ mpekanto ndjɛla piyɔɔ. (Yee. 51:7; Iza. 4:4; Jɛr. 33:8) Yehova nyɔmɛlɛ kɛnde ndeke lotepela djɛ eposelo weyɛka má nonghanyi kɛsɔ: ‘Kaanga ntsha mpekanto yɛnyo imboyala nkola nkola k’efula, ingoyala mpɛmbɛ ete ngo nkeka djɛ lowonge; kaanga ntsha ilekɔ nkola nkola ete ngo esendja kɛ teele, ingokoma ete ngo wɛsa wɛ nyama.’ (Iza. 1:18) Angoyalake wolo efula nyimɛ badji djɛ nkola nkola má esendja. Koko, má mbamba kɛ totepela tɔnɛ, Yehova atoshikikɛ ante mpekanto ikoka nsolama la ndjɛla piyɔɔ lá lɛdji lɔ sopakoke nyɛna lonkina.

10. Totepela tonkina tɔkɔnge tɔ djonyi tombokamba la Yehova djɛ nyɛnyɛ ekekete kɛ imeyelo kɛnde?

¹⁰ Ete ngo satepela lá djamba mboheta, mpekanto ilekɔ lonkina ete ngo basa. (Mat. 6:12; Luka 11:4) Djɛko ndeke winá onkfumɔ w’onanghelaso Yehova mpekanto, alekɔ ete ngo totetela ndjingela awasa le nde. Tolekɔ la basa dj’ekekete efula! Koko winá wɔ Yehova otimeyɛnde, alekɔ ngo ngete ambotshika, apatopaki lonkina basa djɛkɔ. Nde apatopaki basa djɛ mpekanto yɛ ndombotimeyɛ. Ɔsɔ ngo etepela wɛsɔ ototshitshimɛwɔ eloko la wɔlɔ w’isokaka winá wɔ Yehova otimeyɛnde!

11. Kɛkɔnge kɛkɔpa ntepela Bible winá w’otepelande ante mpekanto yɛso ‘imbodjimɔ́’? (Elemo 3:19)

¹¹ Yehova apatimeyɛka ngo mpekanto kana awasa waso toko, nde angodjimolake. (Wala Elemo 3:19.) Ndjɔmbɔmba, winá w’onto otimeyɛnde dj’ipa iso ndofutela basa djɛnde, nde nkoka nkfula eshidji lá nkishi djɛ ndafune djɛ ndjimola basa djɛkɔ. Koko, akumi amɔtshi nkoka nyɛnama. Koko ndjimola atshikitana la nkfula eshidji. Djɛ ndjoka ndjɔmbɔmba kɛsɔ wɔlɔ, iso ladjɛ mvungɔ ente l’etsho wɛ ntondo yasanghanyɛka nde mokubu wɔ yetaka ambɔ karbɔnɛ la gɔmɛ ole la washi djɛ mba washi wa bikɛ djɛ mfuna onkanda. Onto akokaki ndɔsa itatshi yɛ matela imɔnyɔka ko ndjimola alɛta wambofunamá. Winá w’onto ndadjimolaka basa, akumi wa ndafune ‘wadjimɔki’ etshinda. Akumi wafunamisá ntondo watakokaki nyɛnama lonkina lá wiso. Ayalaki ete ngo basa ntayala. Ɔsɔ ngo eloko wɛso otshitshimawɔ má ndjewa ente Yehova apatimeyɛka ngo mpekanto toko, koko angodjimolake ole mpekanto yɛkɔ!—Yee. 51:9.

12. Itepela bonde djɛ tshulu osakisolawɔ nge leso?

¹² Yehova akamba la itepela inkina ifɛna djɛ nyɛnyɛ wopo w’odjimolakande mpekanto. Nde atepela ante: ‘Lemi langodjipa evunga wɛko ete ngo la bonde la mpekanto yɛko ngo ngete la bonde djɛ tshulu.’ (Iza. 44:22) Winá wɔ Yehova imeyɛnde, alekɔ ngo ngete nde ambodjipisanyɛ mpekanto yɛso la bonde djɛ tshulu dj’ipa nyɛnama lá wiso.

13. Winá wɔ Yehova otimeyɛnde evunga wɛso, sokaka ngete mo?

¹³ Kɛsɔ osakisolawɔ nge leso? Winá wɔ Yehova otimeyɛnde mpekanto, topakoke nyɛna ente tolekɔ la badji djɛ mpekanto yɛkɔ lá lowiko lɔso l’otondo. Má mbamba k’ekila wɛ Yeso Kristo, awasa waso ankfumɔ wambimeyamá. Kaanga lá idjena ifunamisá awasa wakɔ, wapangɛnama lonkina. Kɛsɔ ndeke losakisola imeyelo kɛ nsɔsɔlɔ kɛ Yehova winá w’olapɛlaso má mpekanto yɛso.

YEHOVA NDJAWOLAKA DJ’ISO NKALƆ NDJALA TOLONGO TƆNDE

14. Lamo olɛso ladjɛ ndjilela imeyelo kɛ Yehova oloko? (Lenda asango.)

¹⁴ Imeyelo kɛ nsɔsɔlɔ keyɛ́ me Yehova ntɔpɛyɛka mbamba k’iso ndjala la djokanelo djɛ wɔlɔ la nde. Kengotokotshɛ́ke dj’ipa ndáwɛmbɛ lowo l’indeko. Topakoke ndjoka wɔma ente  Yehova awomba nkɛlɛ la ahona yopo imɔtshi lá lisisá yɛ ntɔpɛyɛ iluku. Nkambo djɛsɔ mpananghemaki. Ladjikɛnge okokaso ndjilela Yehova oloko winá w’otepelande ante angotimeyɛ? Ɔprɔfɛtɛ Jɛrɛmi afunaka etepela wɛ Yehova wɛnɛ: ‘Lemi langawimeyɛ evunga wɛwɔ, mpangovungɔ lonkina mpekanto yɛwɔ.’ (Jɛr. 31:34) Winá wɔ ndakanela etepela wɛsɔ, ɔpɔstɔlɔ Poolo akambaka l’itepela imɔtshi ifɛna, má ntepela ante: ‘Lemi mpangovungɔ mpekanto yɛwɔ lonkina.’ (Heb. 8:12) Ko kɛsɔ osakisolawɔ nsɔsɔlɔ nge?

15. Lá wopo wɔkɔnge Yehova ndopavungɔka mpekanto yɛso?

¹⁵ Lá Bible, itepela ‘mvungɔ’ ipasakisolaka winá enkfumɔ ngo mbopɔ kana nkanela nkambo mɔtshi. Koko, nkoka ntɔla ikanyi lonkina te onto w’onangha ekete kɛmɔtshi. Ose wibi wɔ yapanyɛ l’otamba entshupa la Yeso, ɔwɔndaka ante: ‘Yeso, ongovungɔ winá wɔ ngongoyala lá Onkfumi wɔko.’ (Luka 23:42, 43) Atalɔmbá ngo djɛ Yeso ndoowopɔ́ toko lá winá wɔkɔ. Ekadjimwelo kɛ Yeso kɛnyɛ ente angonangha nkambo mɔtshi djɛ ndokfundolá ose wibi wɔsɔ. Djɛko ndeke, winá wɔ Yehova otepelande ante apangovungɔ mpekanto yɛso, ɔkɔpande ntepela nde ante apangotonanghela lonkina nkambo djɛ nyɛtshi. Apangɔtɔpɛyɛ lonkina iluku l’etsho weyaye m’ɔtɛ w’evunga wɛ ndombotimeyɛ́.

16. Wopo wɔkɔnge Bible otepelande nkambo djɛ lotshungɔ loyɛka má imeyelo kɛ nsɔsɔlɔ?

¹⁶ Bible nkamba la itepela inkina yɛ djonyi efula djɛ ntokotshɛ́ djɛ nsipisoyɛ lotshungɔ loyɛka má imeyelo kɛ nsɔsɔlɔ. Ladjikɛnde tolekɔ ase ntshamba djɛ djɔ, tolekɔ ete ngo ‘amfumbe yɛ mpekanto.’ Koko mpeyi la imeyelo kɛ Yehova, tolekɔ ngo ngete amfumbe ‘imbotshungɔ má mpekanto.’ (Ɔrɔ. 6:17, 18; Ndj. 1:5) Ɛwo, imeyelo kɛ Yehova kɛmbɔtɔpɛyɛ osasa w’efula mande tombotshungɔ má lomfumbe.

17. Wopo wɔkɔnge imeyelo otosadjɛkawɔ m’olando? (Izaya 53:5)

¹⁷ Wala Izaya 53:5. Itepela y’ekomo y’ohonaso ntepela lá djamba djɛnɛ yɛnyɛ ente  tolekɔ ete ngo onto wolekɔ́ l’olando wɔ nyɔyi. Mpeyi má oshinga wɔ mbendo wɔ Yehova ndafute má ekila wɛ Wɔnande, tombosálá má olando w’ekekete wɔ djingingi. (1 Pɛ. 2:24) Oshinga wɔ mbendo wɔmbɔtɔpɛyɛ́ akoka wa nkalɔ ndjala la djokanelo la Yehova, djetshitanisá má olando wɔ nyuma. Ngo ngete onto oyalakande l’osasa winá w’osalande má olando w’ekekete, tolekɔ l’osasa mande tombosalá lá nyuma, Yehova ambɔtɔkɔpa lonkina, ko eposelo welekɔ́ nde tombowa imeyelo kɛnde.

KƐNƐ KESAKISOLA IMEYELO KƐ YEHOVA LESO

18. Elakanyelo wɛkɔnge wɛ sombowa má nshishima totepela tɔ djonyi totanema lá Bible tolendana la imeyelo kɛ Yehova? (Lenda ipapango “Wopo wɔ Yehova otimeyɛnde.”)

¹⁸ Elakanyelo wɛkɔnge wɛ sombowa má nshishima totepela tɔ djonyi totanema lá Bible tolendana la imeyelo kɛ Yehova? Winá wɔ otimeyɛnde, nde ntimeyɛka mpekanto inkfumɔ ole etshinda etshinda. Kɛsɔ ntɔpɛyɛka mbamba kɛso ndjala la djokanelo djɛ wɔlɔ la Papa kɛso kɛ l’olongo. Lá winá wɔkɔ ɔmɔ, tovungɔ ente imeyelo kɛ nsɔsɔlɔ oyɛwɔ nde opapɛyɛ, woyɛ má ngandji kɛ Yehova la wɔlɔ wɔnde w’ipa wɔsɔdjɔmba wɛnyɛnde wana wande wananghi yɛ mpekanto. Ɔsɔ ape ekete kekotshí onto, k’oyɛnde ladjɛ ndɔmba.—Ɔrɔ. 3:24.

19. a) Olɛso ladjɛ ndjala la djedjɛ lá nkambo djɛkɔnge? (Ɔrɔma 4:8) b) Kɛkɔnge kɛ songotepela lá djamba djeyaye?

¹⁹ Wala Ɔrɔma 4:8. Ɔsɔ ngo onto onkfumɔ wɔ l’anteyi kɛso oyɛnde ladjɛ ndjala la djedjɛ má nyɛna ente Yehova alekɔ Ndjambe kɛ ‘imeyelo kɛ nsɔsɔlɔ’! (Yee. 130:4) Koko, djɛ Yehova ntimeyɛ ngo iso nangha nkambo mɔtshi djɛ djonyi. Yeso apakisolaka ante: ‘Ntsha nyo nyopimeyɛ anto ankina evunga wɛwɔ, mbɔ koko Papa kɛnyo kɛ l’olongo apangonyimeyɛ ole nyo evunga wɛnyo.’ (Mat. 6:14, 15) Lá nsɔsɔlɔ, alekɔ djonyi efula ndjokola imeyelo kɛ Yehova. Ko okokaso nangha nkambo djɛsɔ ngete mo? Djamba djɛlɔnda ngɔtɛnyɛ kɛnɛ kesakisola nkambo djɛsɔ.