DJAMBA DJƐ WEKELO 6
YEEMBO 18 Djedjɛ lá nkambo djɛ oshinga wɔ mbendo
Ladjikɛnge olɛso la djedjɛ lá imeyelo kɛ Yehova?
‘Ndjambe akɔpaka anto lá lɛdji l’efula, djɛko ndeke ndapɛyɛ ɛtɔyi kɛ Wɔna kɛ ndawote.’—DJ. 3:16.
IKANYI YƐ DJAMBA
Djamba djɛnɛ ngotokotshɛ́ djɛ mfudjɛ djedjɛ djɛso tá imeyelo kɛ Yehova kɛ mpekanto yɛso, má ndjala la looka lɔ lotshimola lɔ kɛnɛ kɛ ndananghe djɛ ntimeyɛ.
1-2. Lá wopo wɔkɔnge nkambo djɛ wana w’anto oyɛwɔ ete ngo nkambo djɛ ilɛngɛ y’otepelawɔ lá itenyi 1?
TOKOKANELA djɛ ilɛngɛ imɔtshi yɛ mpame ifulisá lá nkfumbo keyalaki l’okfudji. Lofu lɔmɔtshi, nkambo djɛ yɛnyi efula djokomelaka, woshimelaka ambɔ ambotshi wande wambovɔ lá aksida. Losango lɔsɔ losolongoyɛka efula. Koko nkambo nkina djɛ yɛnyi djokongaki. Nde alewaka ante ambotshi wande washiyɛka mfalanga inkfumɔ la wingelaka awasa w’efula. Winá wɔsɔ, l’edjena kɛ nde nkita okfudji, ambolokita nde awasa, ole ase mfalanga walowopa mfalanga yɛwɔ. Nde apalekɔ l’akoka wa mfuta awasa wasɔ.
2 Lá lɛdji lɔmɔtshi, nkambo djɛso nkfɛna la djɛ ilɛngɛ yɛsɔ. Ambotshi waso wa ntondo, Adama nya Eva, wayalaki djɔ la wawikaki lá paradiso kɛ wɔlɔ efula. (Ewa. 1:27; 2:7-9) Iwɔ wayalaki la nkongi djɛ lowiko l’okfudji ole l’etshinda. Koko akambo watshikitanaka. Iwɔ watshutshɛka intaselo kɛwɔ kelá Paradiso ole nkongi djɛ lowiko l’etshinda. Iya okitshɔ wɔkɔnge yatshikela wana wawɔ? Bible ntoshimela ante: ‘Ngo ngete mpekanto iyingela lá andja me onto ɔmɔ [Adama] la nyɔyi má mpekanto, djɛko ndeke nyɔyi ketshanganaka le anto ankfumɔ, ladjikɛnde anto ankfumɔ wananghaka mpekanto.’ (Ɔrɔ. 5:12) Okitshɔ wɔ Adama ndatotshikela nde mpekanto la nyɔyi. Mpekanto kɛ ndatosambeyɛ kelekɔ ndaka basa dj’ekekete efula, djɛ kaanga onto ɔmɔ ndopakoke mfuta.—Yee. 49:8.
3. Ladjikɛnge mpekanto yɛso oyɛwɔ ete ngo ‘basa’?
3 Yeso ɛdjɛka mpekanto la ‘basa.’ (Mat. 6:12; Luka 11:4) Winá w’onanghaso mpekanto, alekɔ ete ngo tombingela basa le Yehova. Iso ladjɛ mfuta basa djɛ mpekanto yɛso. Yehova ndotasamba ndɔsa nonghanyi kɛ ntimeyɛ, sotafuta basa djɛ mpekanto yɛso ngo winá w’ovɔso.—Ɔrɔ. 6:7, 23.
4. a) Iyotasamba ntokotshɛ́, kɛkɔnge ketakomela ananghi inkfumɔ yɛ mpekanto? (Yeembo 49:7-9) b) Lá Bible, itepela ‘mpekanto’ ɔtɔlawɔ ikanyi tá ekete kɛkɔnge? (Lenda ipapango “ Mpekanto.”)
4 Tokoka nkalɔ mba nkete nkfumɔ djɛ Adama la Eva yatshutshɛ? Ape má akoka waso. (Wala Yeembo 49:7-9.) Iyotasamba ntokotshɛ́, totasamba ndjala la nkongi djɛ lowiko l’etsho weyaye kana dj’ekfundwelo. Lá nsɔsɔlɔ, nyɔyi kɛso ketayala ete ngo k’anyama.—Los. 3:19; 2 Pɛ. 2:12.
5. Wopo wɔkɔnge Papa kɛso kɛ ngandji kɛ l’olongo ndatokotshɛ́ lá nkambo djɛ basa djɛ mpekanto djɛ sasambela? (Lenda djɛ loposo.)
5 Tokokanela djɛ ilɛngɛ yɛ sotepelisá, okokande ndjoka ngete mo ntsha mpame kɛmɔtshi kelekɔ́ l’okfudji ambawola ndofutela awasa wande ankfumɔ? Ape l’ehamo, ilɛngɛ yɛsɔ angoyala la djedjɛ dj’efula la angawola opapɛyɛ wɔ l’ɛkɔpa wɔsɔ. Lá wopo wɔkɔ ɔmɔ, Papa kɛso kɛ ngandji, Yehova, atɔpɛyɛka opapɛyɛ wofutisá awasa waso wa mpekanto wa Adama ndatosambeyɛ. Yeso apakisolaka nkambo djɛsɔ ante: ‘Ndjambe akɔpaka anto la lɛdji l’efula, djɛko ndeke ndapɛyɛ ɛtɔyi kɛ Wɔna kɛ ndawote, djɛ onto onkfumɔ woyala la djawo le nde atavɔke, koko awa lowiko l’etshinda.’ (Dj. 3:16) Lá djiko djɛ lasɔ, opapɛyɛ wɔkɔ ɔmɔ, wɔtɔpɛyɛ mbamba kɛ ndjala la djokanelo djɛ wɔlɔ la Yehova.
Yeso apoposanyɛ losango lɔ wɔlɔ lɔ imeyelo kɛ Ndjambe k’owaso mpeyi má oshinga wɔ mbendo. (Dj. 3:16) Manyi, ambolambola l’ɛkɔpa lowiko lɔnde djɛ mfuta oshinga wɔkɔ (Lenda itenyi 5)
6. Totepela tɔkɔnge tɔ Bible tɔkɔpaso nshishima lá djamba djɛnɛ, ko lamo?
6 Wopo wɔkɔnge w’okokaso mba wapɔ má opapɛyɛ wɔ wɔlɔ wɔsɔ ole mba imeyelo kɛ mpekanto, kana ‘awasa’ waso? Ekadjimwelo kɛ woopó wɔsɔ ketanema lá totepela tokamba la Bible tɔnɛ: Ndjokana, ndjipisanyɛ, ndjila vu, oshinga wɔ mbendo, ntshungɔ, la ndɔsama anto wa wɔlɔ. Lá djamba djɛnɛ, tɔnghɛna nsakiso kɛ totepela tonkfumɔ tɔsɔ. Winá w’ɔtɔnɔlaso lá nsakiso yɛ totepela tɔsɔ, djedjɛ djɛso tá donga ntshindisá Yehova djɛ ntimeyɛ ngofula.
OKOMA: NDJOKANA
7. a) Kɛkɔnge kɛ Adama nya Eva iyatshutshɛ lonkina? b) Ete ngo oyɛso tonkanola tɔ Adama nya Eva, kɛkɔnge k’oyɛso la djonyi? (Ɔrɔma 5:10, 11)
7 Lá djiko dj’iwɔ ntshutshɛ nkongi djɛ lowiko l’etshinda, Adama nya Eva watshutshɛka lonkina djokanelo djɛwɔ djɛ wɔlɔ la Papa kɛwɔ, Yehova. Má bango, Adama nya Eva wayalaki ase nkfumbo kɛ Ndjambe. (Luka 3:38) Koko winá wɔ yatɔmbɔkɛla Yehova, nde akilikaka má nkfumbo kɛnde lá ntondo k’iwɔ mbota wana. (Ewa. 3:23, 24; 4:1) Ete ngo oyɛso tonkanola tɔwɔ, tolekɔ la djonyi dj’iso nkalɔ ndjokana la Yehova. (Wala Ɔrɔma 5:10, 11.) Kɛsɔ nsakisolaka ente, tolekɔ la djonyi djɛ ndjala la djokanelo djɛ wɔlɔ la nde. Lá nkilika onkanda ɔmɔtshi, itepela yɛ Grɛkɛ yekadjimwama “ndjokana” yokambawɔ lanɛ, nkoka nsakisola “nangha djɛ ontonyi nkoma ilongo.” Nkambo djɛ nkamɔ nde, Yehova ndeke lɔsisá nonghanyi djɛ nkambo djɛsɔ nanghema. Lá wopo wɔkɔnge?
NONGHANYI: NDJIPISANYƐ
8. Etawɔ a) odjipisanyelo nge? b) ndjila vu nge?
8 Odjipisanyelo oyɛwɔ nde nonghanyi kɛ Yehova ndɔshi djɛ nde la wana w’anto wananghi yɛ mpekanto nkalɔ ndjala la djokanelo djɛ wɔlɔ. Nonghanyi kɛsɔ kesakisola mpenghanyɛ nkete 2 djɛlama oshinga djɔ. Lá lɛdji lɔsɔ, ekete ketshwisá kana ketshitanisá kekoka ndɔngɔsɔlama kana mpɛnyama. Afunelo wa Grɛkɛ wakamba la itepela ikadjimwama ‘ndjila vu,’ yɛ nsakiso kɛnde ɔfɛnawɔ la ndjipisanyɛ. (Ɔrɔ. 3:25) Ndjila vu oyɛwɔ nde nkambo djɛ Yehova onanghande djɛ ntokotshɛ́ djɛ ndjala vu ole la djokanelo djɛ wɔlɔ la nde.
9. Nonghanyi kɛ winá ɛmɔtshi kɛkɔnge kɛ Yehova ndananghe djɛ nyimeyɛ wana w’Isariyɛlɛ mpekanto yɛwɔ?
9 Djɛ mpɛyɛ wana w’Isariyɛlɛ mbamba kɛ ndjala la djokanelo djɛ wɔlɔ la nde, Yehova ananghaka nonghanyi kɛ winá ɛmɔtshi djɛ ndawimeyɛ mpekanto yɛwɔ. Lá Isariyɛlɛ, Lofu l’Odjipisanyelo iyayalaka nde fɛtɛ kenanghemaki mbala kɛmɔ l’ɔnɔnyi. Lofu lɔsɔ, nkfundji k’ekekete alambolaki elambo w’anyama lá wapɔ w’owila. Lá nsɔsɔlɔ, elambo w’anyama wepakoke ndjipisanyɛ lá lɛdji lɔ djɔ mpekanto y’onto mande nyama kɛpɛlama l’onto. Koko l’ilá kenkfumɔ kɛ wana w’Isariyɛlɛ walapɛlaki iyalambolaka Yehova elambo wɛ ndalɔmbaka, nde ayalaki entshupa djɛ ndawimeyɛ. (Heb. 10:1-4) Lá djiko djɛ lasɔ, nonghanyi l’elambo wɛ iyalambolaka Lofu lɔ Odjipisanyelo, akotshɛ́ki wana w’Isariyɛlɛ dj’iwɔ nsipisoyɛ ambɔ wayalaki ananghi yɛ mpekanto, la wayalaki la djonyi djɛ nkando kɛ lotshinda djɛ imeyelo kɛ mpekanto yɛwɔ.
10. Nonghanyi kɛkɔnge k’etshinda etshinda kɛ Yehova ndalonghanyɛ djɛ nyimeyɛ mpekanto?
10 Yehova ayalaki la nonghanyi k’etshinda etshinda lá yimba djɛ imeyelo kɛ mpekanto. Nde alonghanyɛka djɛ wɔnande wɔ ngandji ‘ndálambola mbala kɛmɔ lotshinda lotshinda djɛ mbɛmba mpekanto y’anto efula.’ (Heb. 9:28) Yeso apɛyɛka ‘lowiko lɔnde ete ngo oshinga wɔ mbendo lá nkambo dj’anto efula.’ (Mat. 20:28) Etawɔ oshinga wɔ mbendo nge?
OSHINGA W’OFUTAMISÁ: OSHINGA WƆ MBENDO
11. a) Lá nkilika Bible, etawɔ oshinga wɔ mbendo nge? b) Kɛkɔnge keyalisá djonyi djɛ mfuta oshinga wɔ mbendo?
11 Lá nkilika Bible, oshinga wɔ mbendo nde oshinga w’ofutama djɛ ndjipisanyɛ kana nkalɔ ndjokana. a Lá ikanyi yɛ Yehova, wɔngɔɔpɛyɛke donga djɛ nkawoyɛ kɛnɛ ketshwisá. Lá wopo wɔkɔnge? Tovungɔ ente, Adama nya Eva watshutshɛka lowiko lɔwɔ lɔ djɔ la nkongi djɛ mbika etshinda. Djɛko ndeke oshinga wɔ mbendo woyalaka ladjɛ ndjɛlama djɔ la oshinga wɔ ekete ketshwisá. (1 Ti. 2:6) Yotakoka mfutama ngo me mpame kembokomá ekokolo: 1) keyalaki djɔ; 2) keyalaki l’akoka wa mbika etshinda etshinda lá looko, la 3) keyalaki la ɛkɔpa kɛ mpɛyɛ, kana ndambola lowiko lɔsɔ lá nkambo djɛso. Ngo lowiko l’onto wɔsɔ ndeke lotakoka mpɛna, kana ndjipisanyɛ lowiko lotshwisá.
12. Lamo Yeso ndayale l’akoka wa mfuta oshinga wɔ mbendo w’oyalisá djonyi?
12 Tokolenda donga ntshato djɛ Yeso ndayale l’akoka wa mfuta oshinga wɔ mbendo. 1) Nde ayalaki djɔ, ‘atanangha mpekanto.’ (1 Pɛ. 2:22) 2) M’ɔtɛ wɔ nkambo djɛsɔ, nde ayalaki l’akoka wa mbika etshinda etshinda lá looko. 3) Nde ayalaki entshupa djɛ mvɔ la djɛ mpɛyɛ lowiko lɔsɔ lá nkambo djɛso. (Heb. 10:9, 10) Ete ngo ndayalaka djɔ, Yeso ɛlamaki ngo djɔ la mpame kɛ ntondo Adama, lá ntondo kɛ nde nangha mpekanto. (1 Kɔ. 15:45) Má nyɔyi kɛnde, Yeso ayalaka l’akoka wa ndjipisanyɛ mpekanto kɛ Adama, ntepela ente, nkawoyɛ kɛnɛ kɛ Adama ndatshutshɛ. (Ɔrɔ. 5:19) Nghɔsɔ ndeke Yeso ndakome ‘Adama w’ekomo.’ Lako lonyi l’onto onkina wɔ djɔ ndjɛ djɛ ndofuta kɛnɛ kɛ Adama ndatshutshɛ. Yeso avɔka ‘mbala kɛmɔ lotshinda lotshinda.’—Heb. 7:27; 10:12.
13. Otshikitano wɔkɔnge wolekɔ́ l’anteyi kɛ nonghanyi k’odjipisanyelo la oshinga wɔ mbendo?
13 Iya otshikitano wɔkɔnge wolekɔ́ l’antenyɛ nonghanyi kɛ odjipisanyelo la oshinga wɔ mbendo? Nonghanyi k’odjipisanyelo oyɛwɔ nde nkambo djɛ Ndjambe ndananghe djɛ nde nkalɔ ndjala la djokanelo djɛ wɔlɔ la wana w’anto. Oshinga wɔ mbendo nde oshinga wofutamisá djɛ ndjipisanyɛ mpekanto yɛ wana w’anto. Oshinga wɔsɔ oyɛwɔ nde djingingi djɛ ekila wɛ Yeso w’oshinga wolo w’ɛkɛlisá lá nkambo djɛso.—Ɛfɛ. 1:7; Heb. 9:14.
LƆƆLA: TOMBOTSHUNGƆ́ LA TƆMBƆSAMÁ ANTO WA WƆLƆ
14. Ɔkɔpaso nshishima nge, ko ladjikɛnge?
14 Nonghanyi kɛ ndjipisanyɛ oyɛwɔ la lɔɔla lɔkɔnge? Bible nkambaka la totepela efula djɛ mpika nghɔmɔ ɛnsɔsɔ lá efula kɛ wapɔ. Kaanga nsakiso yɛ totepela tɔsɔ yɔfɛnaka, itepela inkfumɔ mpikaka nghɔmɔ ɛnsɔsɔ lá ikakambo imɔtshi yɛ nonghanyi kɛ ndjipisanyɛ kedjipolisá imeyelo kɛ Yehova mboka. Winá wɔ sotakɔdjɛ totepela tɔsɔ, tɔnghɛna lonkina wopo w’oyɛwɔ l’eposelo l’onto onkfumɔ.
15-16. a) Lá Bible, kɛkɔnge kesakisola itepela ‘ntshungɔ’? b) Wopo wɔkɔnge nkambo djɛsɔ olendanawɔ laso?
15 Lá Bible, ntshungɔ osakisolawɔ nde ntshungola, nkoola, kana mposɛ má lokando. Ɔpɔstɔlɔ Pɛtɛlɔ atepelaka djɛ nkambo djɛsɔ ante: ‘Nyo ndjewaka ente ape la nkete djɛpɔndá, la mfɛsa kana la mpaonyi, ndeke nyatshungɔ [ntepela ente, [“iyanyowendola; iyanyotshungola”] má yopo yɛnyo yɛ lowiko lɔ totoko lonyotshikelisá andoyi yɛnyo. Koko la ekila wɛ ntsho welekɔ́ ete ngo wɛ wɔna ɔnkɔkɔ, w’ipa l’ɛkɔmɔ la w’ipa la badji, ntepela ente Kristo.’—1 Pɛ. 1:18, 19; nɔtɛ.
16 Mpeyi la oshinga wɔ mbendo, tokoka ntshungɔ má mpekanto la nyɔyi, nkete mpe djakala ndjolo y’efula. (Ɔrɔ. 5:21) Lá nsɔsɔlɔ, tolekɔ l’elonga kɛ wɔlɔ efula kɛ nyɛna ente tolekɔ la basa dj’ekekete efula le Yehova la le Yeso má lotshungɔ lɔ sawa má ekila wɛ ntsho, kana lowiko lɔ Yeso.—1 Kɔ. 15:22.
17-18. a) Ndɔsama anto wa wɔlɔ, osakisolawɔ nge? b) Eposelo wɛkɔnge welekɔ́ la nkambo djɛsɔ leso?
17 Bible ntepela ante enkambi wɛ Yehova wambɔsamá anto wa wɔlɔ. Kɛsɔ nsakisolaka ente, nde apatɔlɔmbɛ djɛ mfuta oshinga wɔ mpekanto yɛso. Má nangha nghɔsɔ, Yehova atatshita ɛlɛmbɛ wɛnde welendana la sii. Nde apatɔshi anto wa wɔlɔ má akoka waso kana ente adjipa wiso lá mpekanto yɛso. Koko ladjikɛnde tolekɔ la djawo lá nonghanyi k’odjipisanyelo, edjinge lá oshinga wɔ mbendo w’ofutamisá, Yehova alekɔ l’elonga kɛ ntimeyɛ mpekanto yɛso.—Ɔrɔ. 3:24; Nga. 2:16.
18 Kɛsɔ osakisolawɔ nge le onto onkfumɔ wɔ l’anteyi kɛso? Waasɔnamisá djɛ ntɔlɔndjɛ́ la Yeso l’olongo, wambɔsama anto wa wɔlɔ ete ngo wana wa Ndjambe. (Tito 3:7; 1 Dj. 3:1) Mpekanto yɛwɔ imboshiyɛ nyimeyama. Alekɔ ngo ngete watananghaka mpekanto ntondo, la wakotshɛ kɛnɛ kɛlɔmbama djɛ ndjingela l’Onkfumi. (Ɔrɔ. 8:1, 2, 30) Waalekɔ́ la nkongi djɛ mbika lá looko wambɔsama anto wa wɔlɔ ete ngo tolongo tɔ Ndjambe, ole mpekanto yɛwɔ imimeyama. (Dja. 2:21-23) Oloyi w’ekekete wongopandá má Armagedɔ wongoyala la nkongi dj’ipa mvɔ lonkina. (Dj. 11:26) ‘Anto wa wɔlɔ’ la ‘anto wa nyɛtshi’ wambetamá lá nyɔyi wangokfundɔ. (Ele. 24:15; Dj. 5:28, 29) L’ekomo, enkambi enkfumɔ wɛ Ndjambe wɛ ntshunamo welá looko, ‘wangowa lotshungɔ lɔ lomo lɔ wana wa Ndjambe.’ (Ɔrɔ. 8:21) Ɔsɔ ngo esako wɛ wɔlɔ efula w’eyɛ́ má nonghanyi k’odjipisanyelo, ntepela ente má djokanelo djɛ wɔlɔ la Papa kɛso, Yehova!
19. Wopo wɔkɔnge nkambo djetokomelisá yakadjimɔ tá wɔlɔ? (Lenda ipapango “ Nsakiso kɛ totepela tɔnɛ leso.”)
19 Lá nsɔsɔlɔ, nkambo djetokomelisá dekɔ ete ngo djɛ ilɛngɛ yɛ sotepelaki, itshutshisá nkete nkfumɔ la ikitisá awasa w’efula wa ndotasamba ndjala l’akoka wa mfuta. Koko, tolekɔ l’okotshɔ mpeyi me Yehova. Nkambo djɛso djetshikitanaka mpeyi má nonghanyi k’odjipisanyelo la ofutelo w’oshinga wɔ mbendo. Djawo djɛso le Yeso ntɔpɛyɛ mbamba kɛ ntshungɔ, kana mposa má lokando lɔ mpekanto la nyɔyi. Winá w’otimeyɛ Yehova, alekɔ ngo ngete totananghaka mpekanto ntondo. Koko ekete keleka djonyi nde, winá wɔsɔ, tokoka ndjala la djokanelo djɛ wɔlɔ lombombe la Papa kɛso kɛ ngandji, Yehova.
20. Sɔngɛna lá djamba djeyaye nge?
20 Winá w’ɔtɔnɔlaso lá kɛnɛ kɛ Yehova la Yeso iyatonanghela, eloko wɛso welola kfu la djedjɛ. (2 Kɔ. 5:15) Iyotasamba ntokotshɛ́, totasamba ndjala la nkongi! Iya kɛkɔnge kesakisola nsɔsɔlɔ imeyelo kɛ Yehova le onto onkfumɔ wɔ l’anteyi kɛso? Ɔsɔ ndeke isongotepela lá djamba djeyaye.
YEEMBO 10 Tolumɛ Yehova Ndjambe kɛso!
a Lá etepela ɛmɔtshi, itepela ‘oshinga wɔ mbendo’ nkoka nkadjimwama “oshinga wɔ lowiko,” kana “oshinga w’ofutamisá.”
