Papa nya mama yayalaka nde ase Katɔlikɛ wa mɛlɛmɛlɛ. Koko winá wɔ yeke lá Bible ambɔ djiina djɛ Ndjambe nde Yehova, wakomaka Ewakɛ wɛ Yehova w’osasalo efula. Isɛkɛmi atshikaka nsɛla tosakandole tɔ Yeso. Koko, akambaki l’akoka wande wasɔ djɛ ndjila lomba lɔ sima lá mvulu kɛso la lá Mvulu k’Onkfumi lá San Juan del Monte, embombo kɛmɔtshi kɛ Manille, kapitalɛ kɛ Philippines.

M’ɔkɔngɔ wɔ lemi mbotshɔ lá 1952, ambotshi wami wandakanyɛki akambo wa nsɔsɔlɔ wa yalakanyɛka amama yɛmi y’ampame 4 la yɛ amato 3. Winá wɔ moolafulaka papa ankembɛka djɛ mbalaka shapitrɛ kɛ Bible lofu lonkfumɔ, la ekaki enkanda etshikitanyi wɛ Teokrasi nya lemi. Mbala efula, ambotshi wami wetaki elami wɛ djingadjinga la antomɔ yɛ filiyalɛ djɛ ndoyala lá kaso. Nkfumbo kɛso kawaki osasa efula má kɛnɛ kɛ wananyɔ yotambelaka, kɛsɔ ketotshindaka djɛ mpetshɛ́ onkfumi l’edjena kɛ ntondo lá mbiko yɛso.

Ambotshi wami wantshikelaka djawo ete ngo okitshɔ. M’ɔkɔngɔ wɔ nyɔyi kɛ mama, isa papa towangaka nkamba ete ngo tat’ekalo lá 1971. Koko lá 1973 winá wɔ mawa ɛnɔnyi 20, papa avɔka. Ndjokaka ente lambotshikala ngo totoko la mɔmɛlɛ má nyɔyi k’ambotshi wami ape wakɔ. Koko ‘nkongi djɛso djɛ ‘wolo ndii’ djɛ Bible nkotshɛ́ka djɛ mpikama la nshikimala lá nyuma la lá yimba. (Heb. 6:19) Ataheta ilá m’ɔkɔngɔ wɔ nyɔyi kɛ papa, ndjawolaka ntshɔ ete ngo yat’ekalo itshikitanyi tá Coron, ngando k’eyalaki otale efula lá prɔvɛnsɛ kɛ Palawan.

Ndjalaki l’ɛnɔnyi 21 winá wɔ yantome tá Coron. Ete ngo ilɛngɛ ifulisá lá ngando, nkamɔka efula winá wɔ mewe ente l’owila wɔnɛ lako kura, lako washi w’ɛlɔnda, la lako abisɛ la etutu efula wenangha  taxi. Kaanga wananyɔ amangha yayalaka, ntawaka yat’ekalo inkina yɛ mpoposanyɛ isande ole mbala efula mapoposanyɛka ngo mɔmɛlɛ. Lá ngɔndɔ yɛ ntondo, nkanelaki nkfumbo la tolongo tɔmi efula. La lotsho, lalendaki tɔɔtɔ l’olongo ko lakɛdjɛki wisɔyi. Ntateyɛka nkanela djɛ nyima má idjena yɛ yantome ko nkalɔ tá kaso.

Lá winá wɔ olengedji wɔsɔ, ladjipolaki Yehova oloko wɔmi. Lavungɔki tokanyi tokembɛ tɔ mawalaka lá Bible la l’enkanda wɛso. Mavungɔka efula nde Yeembo 19:14. Nsipisoyɛka ente Yehova ‘alekɔ Ve djɛmi la omfuti wɔmi’ ntsha lambɔtɔnɔla lá nkete dj’osasangɛ, ete ngo elemo la wekeka wande. Djamba “Wɛ opalekɔ nghɔmɛlɛ” a dj’Etange k’Olami nkotshɛka efula. Mbalaka mbala la mbala. Lá lɛdji lɔmɔtshi, layalaki mɔmɛlɛ isa Yehova lá winá wɛ nghɔsɔ, ko kɛsɔ kampɛyɛki mbamba yɛ wɔlɔ efula yɛ ndɔmba, ndjeka, la ntɔnɔla.

Lako mpeta ilá m’ɔkɔngɔ wɔ nkoma lá Coron, nkomaka ikokolo. Ete ngo ɛtɔyi k’ikokolo, ntateyɛka ndɔndjɛ lobengo lonkfumɔ Nkalasa k’Olemo wɔ Teokrasi, Losanghanyɛ l’olemo, Wekelo wɔ Bible w’Otshumano, la Wekelo w’Etange k’Olami. Lapɛyɛki lonkina djamba djɛ ntshandjawala lobengo lonkfumɔ. Ekete kɛ molashikikɛka nde—ntawaki winá wɔ ndjala lá olengedji!

Olemo wɔmi wɔ lá Coron wɔtɔka mbambo efula—ambeki wami amɔtshi wa Bible walongolaka batisimo. Koko ekakasano wetashila. Winá ɛmɔtshi, ndjalaka ladjɛ nkɛnda etenyi kɛ lofu djɛ ntokoma l’edjena kɛ mpoposanyɛ, ipa ndjewa idjena y’okokami ndjetama la winá w’okokami nkoma. Etatshi kɛ looko k’otshumano wɔso keyalaki la towiwila efula l’anteyi kɛ ndjale. Mbala efula tapemaki waato wɛ mɔtɛrɛ djɛ ndjopa ndjale djɛ ntokoma l’eteyi, koko ntewaki djɔkɔ! Yehova anamaka la ansukaka kaanga l’anteyi k’ekakasano wɛsɔ. M’ɔkɔngɔ, nyɛnaka ente Yehova andɔngɔsɔlaka djɛ nkfulumeyɛ ekakasano enkina wɛ nkekete lá ndjena djɛ yoontomaka.

Lá 1978 wantomaka tá Papouasie Nouvelle Guinée, lá nɔrɔ kɛ Australie. Papouasie Nouvelle Guinée alekɔ owila w’enkókó efula, ekekete kɛnde ngo ngete kɛ Espagne. Nkamɔka efula má nyɛna ente owila wɔkɔ woyalaki l’anto watepela etepela 800. Mpeyi nde, anto efula watepelaki mélanésien Pidgin, ketakawɔ ambɔ Tok Pisin.

Wantomaka winá ɔmɔtshi tá otshumano wɔ anglɛ lá kapitalɛ, Port Moresby. Ko manyi nsɛkɔka tá otshumano wɔ Tok Pisin ko mbangaka ndjeka otepela. Nkambaki lá olemo w’ipoposanyɛ la kɛnɛ kɛ mekaka. Kɛsɔ kenkotshɛ́ka djɛ ntɔnghɔna otepela mbala kɛmɔ. Lako ilá, ndjalaka l’akoka wa mpɛyɛ djamba djɛ ntshandjawala lá Tok Pisin. Kokanela wopo wɔ makamɔ má nyɛna ente momonangha lá Papouasie Nouvelle Guinée ngo etenyi k’ɔnɔnyi, ko wambɔsɔna ete ngo olami w’edjingadjinga lá ntshumano djɛ Tok Pisin, lá Prɔvɛnsɛ k’ekekete efula.

Mande ntshumano djawangwanaki efula, ndjalaki ladjɛ ndɔngɔsɔla nsanghanyɛ efula yɛ djingadjinga la nangha nkɛndɔ yɛ nkekete. Má bango ndjalaki lá olengedji efula m’ɔtɛ wɔ owila wɔ ntato, otepela wɔ ntato la nkfumbo djɛ ntato djɛ  motekelaki. Ntakokaki nyima má otshumano wɔnɛ tá otshumano onkina lá mboka kɛ ekolo mande enkókó la mbenga iyalaki efula. Ko lapemaki ngo aviyɔ lobengo lonkfumɔ. Mbala imɔtshi iviviyɔ imɔtshi imbonangha ntshitana yambɛmbaki ngo lemi toko. Lɔkɛndɔ lɔ nghɔsɔ lampɛyɛki wɔma ndeka kaanga ndjapema waato!

Anto efula watayalaka la telefɔnɛ, ko lasawolaki la ntshumano ngo má enkanda. Mbala efula lakomaki lá ntondo kɛ enkanda wɛ matome, la layalaki ladjɛ ndjopola idjena ilekɔ́ ansakodji. Koko mbala kenkfumɔ lisolaki wananyɔ, wandongolaki l’osasa efula ko lavungɔki lamo mayalaka ladjɛ ndjila welo wɛsɔ. Nyɛnaka okotshɔ wɔ Yehova efula, la djokanelo djɛmi isande nkembaka.

Lá losanghanyɛ lɔ ntondo lɔ mananghe lá ingangando iyalaki l’omamo wɔ ndjale yɛ yetaka ambɔ Bougainville, antshukami ape wasɛmɛlaka le lemi, wamɔnghamɔnghaka ko wandjopolaka ambɔ: “Otovungɔ kankina hanɛ?” Mvungɔka ente mpoposanyɛka antshukami wasɔ winá wɔ makome bango lá Port Moresby. Ntateyɛka wekelo wɔ Bible lawɔ lá ntondo kɛ mpɛyɛ wananyɔ wa mbandja nkindjɛ lawɔ. Yape kɛkɔ wambolongolaka batisimo! Ɔsɔ alekɔ osako ɔmɔtshi wɔ mawa l’ilá k’ɛnɔnyi esato wɛ mananghe lá Papouasie Nouvelle Guinée.

Lá ntondo kɛ nyima má Coron lá 1978, ndjewanaka la Adel, nkaana kɛ ɔwɔngi efula la keyalaki la yimba yɛ ndasambɛ. Nde ayalaki yat’ekalo la awongolaki wana wande ape, Samuel nya Shirley. Awongolaki lonkina nyɛnghɛnde keyalaki ekokolo. Lá Ngɔndɔ k’atano 1981, nkalɔka tá Philippines djɛ ntotshuka Adel. M’ɔkɔngɔ wɔ ntshukana, tokambaka ete ngo tat’ekalo tɔ lotshinda la tashiyɛki ehomba wɛ nkfumbo kɛso esanga.

Lá 1983 kaanga sayalaka la nkfumbo, wansɔnaka lonkina ete ngo yat’ekalo itshikitanyi ko wantomaka ta ngando kɛ Linapacan, lá prɔvɛnsɛ kɛ Palawan. Ko tɔsɛkɔka nkfumbo k’otondo tá idjena y’otale yɛsɔ laatayalaki kaanga Owakɛ ɔmɔ. Nyangho Adel avɔka m’ɔkɔngɔ w’ɔnɔnyi. Koko, tokindjɛka ndápɛyɛ l’olemo wɔ nyuma, ko wotosukaka efula l’ilá k’okakasano wɔsɔ. Towangaka ndjeka Bible l’anto wafulaki lá Linapacan ko lako mpeta ilá toyalaka la djonyi djɛ Mvulu k’Onkfumi kɛ daambi. Isɔmɛlɛ topikaka. Ɛnɔnyi esato djɔ m’ɔkɔngɔ w’iso nkoma, toyalaka l’osasa wɔ nyɛna anto 110 wambingela lá Bokfɔ, efula l’anteyi kɛwɔ wafulaka tii lá batisimo m’ɔkɔngɔ wɔso.

Lá 1986, wantomaka tá ingangando yɛ Culion, iyalaki la djena djɛ yatshikaka ase anghɛnyi. M’ɔkɔngɔ, wasɔnaka Adel ete ngo yat’ekalo itshikitanyi. Má bango tokaki wɔma mpoposanyɛ anto wayalaki la nkɔmɔ m’anghɛnyi. Koko ansakodji y’ase mbandja watoshikikɛka ambɔ anto watata olando wɔsɔ wangɔsake bɔki la wapangofula ntosambeyɛ. Ase anghɛnyi amɔtshi watateyɛka ndjingela lá nsanghanyɛ lá mvulu kɛ nkaana kɛmɔtshi. Lako ndjala ilá tekelaka la tokaka osasa efula djɛ nkapana  nkongi djɛso djɛ Bible l’anto wafɛnyɛki ambɔ Ndjambe la anto ankina wapawilaka yimba. Toyalaka l’osasa efula má nyɛna anto w’elando wamboyala la osasa ambɔ lofu lɔmɔtshi wangoyala la alemba wa djɔ.—Luka 5:​12, 13.

Wana waso yananghe etshikitano lá mbiko yɛwɔ lá Culion ngete mo? Ɛwo, lemi isa Adel tetaka nkaana ipe y’eseka má Coron djɛ ntɔwɔlama djɛ wanaso ndjala la ntombe yɛ wɔlɔ. Samuel, Shirley, la nkaana ipe yɛsɔ wasasangaki mpoposanyɛ anto ankina la watateyɛka ndjeka Bible la dɛngɛ nkina efula winá wɔ lemi isa Adel sekaka l’ambotshi wa wana wasɔ. Lá nsɔsɔlɔ tekaki la nkfumbo 11 lá winá ɔmɔ. Lako ndjala ilá tekaka Bible la anto efula wafulaki lá nyuma ko tokfumbaka otshumano wɔ bango!

Má bango oyalaki ikokolo ngo lemi. Djɛko ndeke biro djɛ filiyalɛ ndɔmbaka djɛ ndɔdjɛka losanghanyɛ lobengo lonkfumɔ lá iloyi yɛ ansakodji 8 lá Culion la lá iloyi yɛ ansakodji 9 lá mbandja kɛ yetaka ambɔ marily, lá winá esato l’etenyi wɛ lɔkɛndɔ lá waato. M’ɔkɔngɔ wɔ losanghanyɛ, nkfumbo kɛso k’otondo takɛndaki l’ekolo lá djeke djɛ enkókó l’ilá kɛ winá wɛ ntango efula djɛ nteke l’anto Bible lá mbandja kɛ yetaka ambɔ Halsey.

Ekomo ekomo anto efula wekaka nsɔsɔlɔ lá Marily la lá Halsey, ko topikaka Amvulu y’Onkfumi lá djena djɛkɔ 2. Ete ngo Linapacan, wananyɔ l’anto wayalaki la mposɛ wapɛyɛka nkete djɛ mpika amvulu la wakambaki elemo. Mvulu kɛ Marily kekokaki ndjingela anto 200, ko m’ɔkɔngɔ tolonanolaka ndeke isoyalaka l’akoka wa nangha losanghanyɛ l’ekekete l’eteyi.

Lá 1993 winá wɔ wana yafule, lemi isa Adel towangaka olemo w‘edjingadjinga lá Philippines. Lá 2000, ndjingelaka Nkalasa k’Olemo wɔ Onkfumi djɛ ndjala wetsha wɔ nkalasa kɛkɔ. Nyɛnaka ente mpalekɔ l’akoka wa nkotshɛ odjito wɔsɔ, koko Adel ankembɛki winá enkfumɔ. Amvungolaka ante Yehova angɔkɔpɛyɛ wolo wɔ nkotshɛ odjito wɔ bango wɔsɔ. (Flp. 4:13) Adel atepelaka nghɔsɔ má kɛnɛ kokomelisá mande akotshɛki edjito wɛnde kaanga ndayalaka la olando.

 Lá 2006 winá wɔ mayalaka wetsha, Adel atataka olando w’etawɔ ambɔ Parkinson. Tokaka yɛnyi y’efula! Winá wɔ moshimela djɛ ntshika olemo wɔso, djɛ nde ndɔsa bɔki djɛ wɔlɔ, Adel atepelaka ante: “Lambɔkɔwɔnda ohonele dɔktɛrɛ nkoka nkotshɛ́ la olando wɔmi, la ndjewa ente Yehova angotokotshɛ́ djɛ nkfulumeyɛ.” L’ilá k’ɛnɔnyi 6 wɛlɔndisá, Adel akindjɛka nkambela Yehova ipa nsamana. Winá wɔ ndotakokaki nkɛnda, apoposanyɛki lá nkosa kɛnde. Winá wɔ ndotakokaki ntepela, akadjimolaki itepela imɔ kana tope lá losanghanyɛ. Tii lá nyɔyi kɛnde lá 2013, Adel alongolaki mesajɛ yɛ djedjɛ m’ɔtɛ wɔ ndjɔmbɔmba kɛnde kɛ wɔlɔ kɛ okfulumedji. Mpetshɛka ɛnɔnyi 30 isa Adel, wadjɛmi wɔ ngandji la wɔ nkɔmano, ko winá wɔ ndetama lá nyɔyi, lambokalɔ ndola kfu la yɛnyi ole la olengedji.

Adel akɔpaki lemi nkindjɛ l’olemo wɔmi, djɛko ndeke okindjɛmi. Langokambake elemo efula ko kɛsɔ nkotshɛka lemi djɛ nkfulumeyɛ olengedji. Má 2014 tii 2017, wantomaka djɛ ntowembola ntshumano djɛ otepela wɔ Tagalog lá ewila w’olemo wɔso yomboshimbama. Masɔ mbembolaka ntshumano djɛ otepela wɔ Tagalog lá Taiwan, lá Etats-Unis, ole lá Canada. Lá 2019, ndɔndjɛka nkalasa k’ansakodji w’Onkfumi lá otepela wɔ anglɛ lá Inde la lá Thailand. Edjito wɛsɔ wɛmpɛyɛka osasa efula. Langoyalake l’osasa efula winá woyalami l’akambo kfu wa nangha l’olemo wɔ Yehova.

Lá idjena inkfumɔ yɛ bango yɛ satshɔka, nkɔpaki wananyɔ l’ankaana efula, ko ndatshika atayalaki wɔdju. Lá winá wɛ nghɔsɔ, ndjekaka djɛ ndawɛkɛ le Yehova. Mbala efula nyɛnaki okotshɔ wɔnde, ko kɛsɔ kenkotshɛki djɛ ndjawola l’oloko ɔmɔ etshikitano wenkomelaki. Lɔɔko kɛnɛ ndekɔ yat’ekalo itshikitanyi lá Philippines. Ndekɔ winá wɔsɔ lá otshumano wɔmi wɔ bango, wombokomá nkfumbo kɛmi kensuka la kembongola. Ndekɔ la ofuno djɛ nyɛna Samuel nya Shirley wokola djawo djɛ nyɛnghɛwɔ.—3 Dj. 4.

Ɛwo, mpomanaka la ekakasano lombombe lá lowiko lɔmi, nyɛnaka ole ndjolo la nyɔyi kɛ wadjɛmi má olando w’ɔlɛmbɛki. Ndjalaki la djɛ ndjekela la nkfumbo djɛ bango. Koko, nyɛnaka ente Yehova ‘apalekɔ otale la onto l’onto wɔ l’anteyi kɛso.’ (Ele. 17:27) Lɔwɔ lɔ Yehova ‘lopalekɔ itenyi’ djɛ nsuka la nkembɛ enkambi wɛnde kaanga l’ewila w’etale. (Iza. 59:1) Yehova Ve djɛmi, ayalaka nya linko lowiko lɔmi l’otondo, la ndekɔ la djedjɛ efula le nde. Ntayalaki mɔmɛlɛ.