ƆNGHƐNAKE ente anto efula w’andja wa lɔɔko wa lokaki wanɛ wangohonake mpipo, lotshungɔ kana ndawɔsa lá lɛdji lotshikitanyi? Kaanga iwɔ kowaka nkete djɛsɔ, wangokombolake lonkina mba efula. Yimba yɛsɔ oyɛwɔ nde ikanyi yɛ lokaki kana esapo w’etsho w’ekomo wɛnɛ.—2 Ti. 3:2.

Lá nsɔsɔlɔ lokaki apalekɔ ekete kɛ bango. Adama nya Eve wɔsaka nkano djɛ nsɔna kɛnɛ kelekɔ wɔlɔ la kɛnɛ kelekɔ nyɛtshi yɔmɛlɛ ko kɛsɔ keyalaka l’eposelo wɛ nyɛtshi efula. Nkama y’ɛnɔnyi m’ɔkɔngɔ, Nkfumi k’ase Juda Oziya afɛnyɛka ante alekɔ la lotshungɔ lɔ ntshumba itshɔ lá tɛmpɛlɔ. (2 Ɛk. 26:18, 19) Lá wopo wɔkɔ ɔmɔ, Afarisɛ la Asadukɛ wafɛnyɛki ambɔ Ndjambe ladjɛ ndakɔpa lá lɛdji lotshikitanyi mande wayalaki tonkanola tɔ Abrahama.—Mat. 3:9.

Tombodjingamá m’anto wa lokaki, la wakoka ntosambeyɛ yimba yɛwɔ yɛ nyɛtshi. (Nga. 5:26) Tokoka ntateyɛ mfɛnyɛ ente iso ladjɛ mba mpipo yɛ nkekete, kana ndɔsama lá lɛdji lotshikitanyi. Okokaso ndjewɔ dj’ipa ndjala la yimba yɛsɔ ngete mo? Djɛ ntateyɛ iso ladjɛ ndjewa ikanyi yɛ Yehova lá nkambo djɛsɔ. Tɔkfɔ tope tɔ Bible tongotokotshɛ.

Yehova ndeke loshikikɛ kɛnɛ k’oyɛso ladjɛ mba. Tokolenda ndjɔmbɔmba yɛnɛ.

•   Lá nonghanyi kɛ bala, wome nkɔpaka wadji ndɔlɛmɛyɛ la wadji nkɔpaka wome ndɔkɔpa. (Ɛfɛ. 5:33) Wadji la wome ladjɛ nanghelana akambo wa ngandji l’anteyi kɛwɔ. (1 Kɔ. 7:3) Ambotshi wakoka ndɔmba djɛ wana wawɔ ndalɛmɛyɛ, la wana wakoka nkonga djɛ ambotshi ndakɔpa la ndasuka.—2 Kɔ. 12:14; Ɛfɛ. 6:2.

• Lá otshumano, tokokolo wɛdje mba dilɛmɛlɔ meso. (1 Te. 5:12) Koko, wapalekɔ la lotshungɔ lɔ ndjapamela wananyɔ l’ankaana.—1 Pɛ. 5:2, 3.

• Ndjambe apɛyɛka enkfumi wɛ wana w’anto lotshungɔ lɔ mfutisɛ elambo la lɔ ndongola dilɛmɛlɔ me anto w’ɔlɔndjɛwɔ.—Ɔrɔ. 13:1, 6, 7.

La ngandji kenkfumɔ Yehova ntɔpɛyɛka nkete efula ndeka dj’okokaso mba. Mande tolekɔ ananghi wa mpekanto, okokaso ngo mvɔ. (Ɔrɔ. 6:23) Koko, Yehova atɔpɛyɛ esako efula má ngandji kɛnde kɛ nkɔmano. (Yee. 103:10, 11) Osako la mpipo kenkfumɔ k’owaso me nde oyɛwɔ nde má ngandji kɛnde kipa wɔsɔdjɔmba.—Ɔrɔ. 12:6-8; Ɛfɛ. 2:8.

Towadjɛ dj’ipa ndjala l’ikanyi y’andja. Ntsha topakɔmisa, tokoka mbanga nkanela ente iso tɛdje mba ndeka anto ankina. Yeso ɛnyɛka ante ikanyi yɛ nghɔsɔ ikoka ntoyela ipa l’okakasano má nkamba la ndjɔmbɔmba k’enkambi wewisá lofuto lɔ denariyo mmɔ. Enkambi ɛmɔtshi wakambaka má nkɛsɛ la wakindjɛka nkamba lofu l’otondo la yaane yɛ ndjami; koko ankina yakambe ngo winá ɔmɔ wɔ ntango toko. Anto wakambisá ntondo wafɛnyɛka ambɔ wangowa lofuto loleka waayisá m’ɔkɔngɔ mande wakambaka efula. (Mat. 20:1-16) Yeso akambaka la ndjɔmbɔmba kɛsɔ djɛ ntɛnyɛ ante ambeki wande ladjɛ nsasanga la kɛnɛ kɛ Ndjambe apɛyɛnde.

Yala la djedjɛ, tɔlɔmbake nkete efula. (1 Te. 5:18) Okola ɔpɔstɔlɔ Poolo, kanga lotalɔmba wananyɔ wa Kɔrɛtɔ nkete djɛ demba kaanga ndayalaka  la lotshungɔ lɔ ndalɔmba. (1 Kɔ. 9:11-14) Iso ladjɛ nsasanga la osako onkfumɔ wowaso, la ndjewɔ dj’ipa ndjala la yimba yɛ ndɔmbaka efula.

Yala l’okitshakitshɛ. Winá w’onto ɔmɔtshi olekande ndjila yimba efula le nde nyɔmɛlɛ, angotateyɛ nyɛna ante ɛdje nde mba lowandji kana nkete efula. Okitshakitshɛ ndeke lokoka mpikola yimba yɛ nyɛtshi yɛsɔ.

Ɔprɔfɛtɛ Danyɛlɛ atshikaka ndjɔmbɔmba kɛ wɔlɔ efula kɛ okitshakitshɛ. Ayalaki ose nkfumbo kɛ wɔlɔ efula, ayalaki ɔwɔngi, la yimba ole l’akoka watokomɛ djɛ nde mfɛnyɛ ante ɛdje ndɔsama lá lɛdji lotshikitanyi la ɛdje mba edjito wɛ ndawa. (Dan. 1:3, 4, 19, 20) Koko, Danyɛlɛ ayalaka la okitshakitshɛ, ko wekeka wasɔ wowilaka onto wɔ ntshina efula lá wiso wa Yehova.—Dan. 2:30; 10:11, 12.

Nyontshɔ totone lokaki, la yimba yɛ lolemba imbolola kfu l’andja wanɛ. Koko tokindjɛ ndjala l’osasa lá osako onkfumɔ wɔ Yehova ɔtɔpɛyɛnde má wɔlɔ wɔnde w’ipa wɔsɔdjɔmba.