Mary nya womɛnde John a wawika lá etatshi kɛ looko kɛ losango lɔ wɔlɔ okokawɔ mpoposanyɛma l’angangɛnda wayɛ ndokambá lá Philippines. Lá opela wɔ COVID-19, Mary awangaka ndjeka Bible ape ngo l’anto w’owila wɔ ndawikaka koko ole l’anto wa djena nkina djɛ looko. Ndananghe nghɔsɔ ngete mo?

Mary opolaki ambeki wande wa Bible ante: “Ewa onto ɔmɔtshi wɔkɔpa ndjeka Bible?” Ntsha wambawola ambɔ ee, awopolaki ante: “Okoka mpomanyɛ isande?” Woopó wɔ daambi wɔsɔ woyalaki mbala efula l’eposelo wɛ wɔlɔ. Lamo? Mande anto efula wakɔpá Otepela wɔ Ndjambe, nkɔpaka mbala efula nkapana l’ase nkfumbo ole la tolongo tɔwɔ. Ndjopola woopó wɔsɔ yayalaka l’eposelo wɛkɔnge?

Jasmin, ombeki wɔnde wɔ Bible, owewanyɛka l’ambeki anɛyi wa Bible wa bango. Ɔmɔtshi l’anteyi kɛwɔ nde Kristine, asasangaki la wekelo wɔnde wɔ Bible efula ko alɔmbaka Mary djɛ ndjekaka nyande mbala ipe lá lobengo. Winá wɔ Mary ndowopola ntsha ewa anto ankina wakombola ndjeka Bible, Kristine akadjimolaka ante: “Ee, langokopomanyɛ la tolongo tɔmi.” Lá mbengo imangha Kristine apomanyɛka Mary la tolongo tɔnde tɔnɛyi tɔkɔpaki ndjeka Bible. M’ɔkɔngɔ, Kristine opomanyɛka la tolongo tɔnde tonkina, tɔmɔtshi wananghaka wopo wɔkɔ ɔmɔ l’anto ankina.

Kristine akɔpaka lonkina ase nkfumbo kɛnde kelá Philippines ndjeka Bible. Ko ashimelaka wɔnande Andrea. Andrea afɛnyɛki ante ‘Ewakɛ wɛ Yehova oyɛwɔ nde ɔtɛmwɛlɔ wombatɔna, wapalekɔ la djawo le Yeso, la okambawɔ ngo la Afunelo wa Hebero.’ Koko, m’ɔkɔngɔ wɔ wekelo ɔmɔ toko, tokanyi tɔnde tɔ mbindo tɔsɔ tofumbɔka. L’ila kɛ wekelo wɔnde, akamɔki ante: “Mande Bible ntepela nkambo djɛnɛ, ngokotshama ngo nkotshama!”

M’ɔkɔngɔ wɔ winá emangha, Andrea apomanyɛka Mary la tolongo tɔnde tope la winande w’olemo ko wawangaka ndjeka. Lonkina, Mary atewaki ante Angela, isomoto kɛ Andrea kembowodjɛ wiso, ekameyɛki wekelo wɔwɔ. Lofu lɔmɔtshi, Angela alɔmbaka Andrea djɛ nsawola nya Mary djɛ ndɔlɔmba djɛ ndjeka nya nde Bible. Angela akɔpaki akambo wa ndekaka lombombe. Lá ngɔndɔ kɛmɔ, akotaka avɛrse efula l’ɔtɛ ole akɔpaki ndjeka mbala inɛyi lá lobengo! La okotshɔ w’Andrea, Angela awangaka ndjingela nsanghanyɛ mbala la mbala lá zumɛ.

 Winá wɔ Mary ndewe ante Joshua, womɛ Kristine, intasɛki má ɔkɔngɔ wɔ Kristine winá wɔ yekaka, Mary owopolaka ntsha nde koko akɔpa ndjeka lawɔ. Joshua atepelaka ante: “Ɔkɔpami ngo ndjekameyɛ, mpakɔpɛ ndjopola lemi weepó; ntsha ombondjopola lɔɔ lamboposa.” Lá minitɛ itano yɛ ntondo yɛ wekelo, opolaka Kristine weepo efula ko akombolaka nkindjɛ nsawola akambo wa Bible.

Woopo wɔ Mary woposɛka ambeki wa Bible efula. Nde ɔsaka nonghanyi kɛ Ewakɛ efula nkotshɛ́ amɔtshi l’anteyi kɛwɔ. Ambeki ankfumɔ wa Bible wa Mary ndawange ndjeka lawɔ l’ewila etshikitanyi wayalaka 28.

Jasmin, ombeki wɔ Bible wɔ ntondo wɔ Mary alongolaka batisimo lá Ngɔndɔ k’anɛyi 2021. Kristine alongolaka lá Ngɔndɔ k’atano 2022, ko akalɔka tá kawɔ tá Philippines. Ambeki ape ankina wa Kristine ndapomanyɛ la Mary walongolaka batisimo ole iwɔ. Angela alongolaka batisimo ngɔndɔ imangha m’ɔkɔngɔ ko winá wɔsɔ akamba ete ngo yat’ekalo yɛ lotshinda. Joshua womɛ Kristine, la wɔnawɔ Andrea, l’ambeki ankina wanangha efulelo wɛ wɔlɔ efula wɛ nyuma.

L’ɛtɛndɔ kɛ ntondo, losango lɔ wɔlɔ lotshanghanaka mbala kɛmɔ m’ase nkfumbo la tolongo. (Dj. 1:41, 42a; Ele. 10:24, 27, 48; 16:25-33) Lamo nghopakoke ndjopola ambeki wako wa Bible l’anto ankina wɛnyɛ mposɛ ente: “Ewa onto ɔmɔtshi wɔkɔpa ndjeka Bible?” Ewa na ntsha anto ankina wakoka mbanga la wekelo wɔ Bible ngo má ndjopola woopó wɔ daambi wɔsɔ?