ONGOKANELAKE ente wɛ ladjɛ nkfulumeyɛ ekakasano wɛko ngo nghɔmɛlɛ? Towika lá ‘deko djɛ ndjolo djɛ wolo nkfulumeyɛ’ nkoka ntokomɛ l’olengedji kana ntɔlɛmbɛ. (2 Ti. 3:1) Koko, topakoke nkfulumeyɛ etshikitano wetokomela lá lowiko ngo isɔmɛlɛ. Bible djɛnyɛ djonyi djɛ ndjala la tolongo tɔ nsɔsɔlɔ lá ‘deko djɛ ndjolo.’—Woo. 17:17.

Ɔpɔstɔlɔ Poolo awaka okotshɔ w’efula me tolongo tonanghaki nkɛndɔ la nde. (Kɔl. 4:7-11) Winá wɔ Poolo ndayalaka lá lokando lá Ɔrɔma, tolongo tɔnde wananghaki akambo wa Poolo ndotasamba nangha. Ndjɔmbɔmba, Epafrodito atɛɛlaka Poolo nkete djɛ ndayalaka la djonyi djɛ wananyɔ l’ankaana yɛ Filipɛ yotomela. (Flp. 4:18) Tishikɛ akapanyɛka enkanda wɛ Poolo lá ntshumano. (Kɔl. 4:7; lenda nɔtɛ kɛ wekelo) La okotshɔ wɔ tolongo tɔnde, Poolo akambaka olemo wɔnde, kaanga ndayalaka nyɔmɛlɛ lá lokando. Wopo wɔkɔnge w’okokaso ndjala ilongo yɛ nsɔsɔlɔ lɔɔko kɛnɛ?

Ndjɔmbɔmba efula yɛ etsho wɛnɛ yɛnyɛ djonyi djɛ ndjala ilongo yɛ wɔlɔ. Tokolenda ndjɔmbɔmba kɛ nkaana kɛmɔtshi keyalisá ilongo yɛ wɔlɔ yɛ Elisabet, yat’ekalo lá Espagne. Winá wɔ yavunde nyɛnghɛnde la kansɛrɛ, nkaana atomelaka Elisabet amesajɛ efula y’avɛrse wa Bible djɛ ndokembɛ. Elisabet atepela ante: “Amesajɛ isɔ impɛyɛka wolo wɔ mpika bongo lofu lonkfumɔ ipa ndjoka ente ndekɔ mɔmɛlɛ.”—Woo. 18:24.

Tokoka nkembɛ djokanelo djɛso la tolongo tɔso má ndasuka l’elemo wɛ nyuma. Ndjɔmbɔmba, okoka ndɔmba nkaana kana wɔnanyɔ w’ekokolo djɛ ndɔtɔlaka tá nsanghanyɛ kana tá olemo w’ipoposanyɛ? Ntsha nyomonangha nkɔkɔsɔ, nyongoyala l’osasa mande nyongokembɛna efula. (Ɔrɔ. 1:12) Koko, Akristo amɔtshi wapakoke mposa m’amvulu yɛwɔ. Okokaso ndjala ilongo yɛ nsɔsɔlɔ lewɔ ngete mo?

Winaso andjawodji amɔtshi walekɔ l’elando wɛ nkekete kana wapomana l’akambo wapapɛyɛ mbamba kɛ ndjingela nsanghanyɛ elongi l’elongi. Tokolenda ndjɔmbɔmba kɛ David, kanga yavunde l’olando wɔ lymphome. Nde ɔsaka bɔki l’ilá kɛ ngɔndɔ 6. L’ilá kɛ bɔki djɛsɔ, David nya wadjɛnde Lidia, wingelaki nsanghanyɛ ngo má mvulu kɛwɔ.

Tolongo tɔwɔ tɔ otshumano yasuke ngete mo? M’ɔkɔngɔ wɔ losanghanyɛ lonkfumɔ, amɔtshi wananghaki la wolo djɛ nsawola la David ole la Lidia  lá mvulu kɛ Onkfumi lá zumɛ. Ladjiko djɛ lasɔ, winá wɔ David nya Lidia yapɛyɛka kɔmantɛrɛ, walongolaki amesajɛ efula yɛ lokembo yɛ wananyɔ l’ankaana yatomelaka. Eposelo weyalaki nge? David nya Lidia watayalaki lá olengedji.

Tokoka mpoposanyɛ la waapapose má amvulu wasɔ? Tokoka nangha etshikitano ɛmɔtshi, djɛ nyɛnyɛ wananyɔ l’ankaana yɛsɔ ente totavungɛ. (Woo. 3:27) Lamo nghopakoke ndɔsa ndambo kɛ winá djɛ mpoposanyɛ lawɔ má mfunela anto enkanda kana má telefɔnɛ? Waapakoke mposa má mvulu wakoka ndjingela nsanghanyɛ y’olemo w’ipoposanyɛ má zumɛ. David nya Lidia wakɔpaka nonghanyi kɛsɔ efula. David apakisola ante: “Ngo mpetshɛ winá emangha la ndɔmba esanga la wananyɔ l’ankaana y’iloyi yɛso y’olemo w’ipoposanyɛ atokembɛki efula.” Ntsha nkokaka, tokoka ndɔsa nonghanyi kɛ ntshɔka mbala la mbala la ombeki wɔso wɔ Bible tá mvulu kɛ nsakodji kepakoke mposa má mvulu djɛ nteka la nde l’eteyi?

Winá wokambaso mpɛka la mpɛka la wananyɔ l’ankaana wapapose má mvulu la wɛnaso wekeka wawɔ, tongoleka ndjala imfuka lawɔ. Ndjɔmbɔmba, winá w’opoposanyɛ la ansakodji yɛ nghɔsɔ ole ndenda wopo wokambawɔ l’Otepela wɔ Ndjambe djɛ mvunda eloko w’anto, ongoleka ndjala imfuka nyawɔ. Winá waakotshɛ́ l’elemo wɛ nyuma, ongetela mba tolongo tonkina.—2 Kɔ. 6:13.

Poolo alekaka mba lokembo má ndjala entshupa nya ilongo yɛnde Tito. (2 Kɔ. 7:​5-7) Ɔkɔndɔ wɔsɔ wotovungola ente tokoka mpɛyɛ lokembo má nshimela anto walekɔ́ la djonyi etepela wɛ djandji koko lonkina má nangha kenkfumɔ k’okokaso nangha djɛ ndaakotshɛ́.—1 Dj. 3:18.

Wananyɔ l’ankaana yɛso yɛ Russie wambototshikela ndjɔmbɔmba kɛ wɔlɔ efula kɛ nkotshana. Tokolenda kɛnɛ kekomelisá Sergey nya wadjɛnde Tatyana. M’ɔkɔngɔ wɔ ampulushi mpɛndja mvulu kɛwɔ, waatɔlaka djɛ ntawopola weepó. Watshungolaka Tatyana ntondo ko akalɔka lá mbandja. Sergey akɔndɔla ante: “Ngo má [Tatyana] ndakalɔ lá mbandja, nkaana kɛmɔtshi k’oloko wolo akɔkɔlaka lá lokfuke lɔso. Tolongo efula wayɛka la watokotshɛ́ka djɛ ndɔnga nkete lá mvulu.”

Sergey akfɛ ante: “Ndaawɛdjɛki winá enkfumɔ la ilongo yotepelawɔ la Woongo 17:17 yɛnɛ: ‘Ilongo yɛ nsɔsɔlɔ ndjokanaka ngandji winá enkfumɔ la nde alekɔ wɔnanyɔ w’okokɛ ndjilela oloko lá deko djɛ ndjolo.’ Etepela wɛsɔ weyalaka la nsakiso k’ekekete efula le lemi l’eleko kɛ lɔnyɔkɔ winá wɔ motakoka nkfulumeyɛ mɔmɛlɛ. Yehova ampɛyɛka tolongo tɔ nsɔsɔlɔ tonsukisá ipa ndjoka wɔma.” a

Winá w’opomanaso l’ekakasano wɛ wolo, tolekɔ la djonyi djɛ tolongo tɔ nghɔsɔ. Tongoyala la djonyi djɛwɔ efula lá ndjolo k’ekekete. Djɛko ndeke, nyontshɔ tonanghe la wolo dj’iso ndjala tolongo tɔ nsɔsɔlɔ!—1 Pɛ. 4:7, 8.