DJAMBA DJƐ WEKELO 8
YEEMBO 130 Timeyanake
Wopo wɔkɔnge w’okokɛ nyimeyɛ ete ngo Yehova?
‘Ngo ngete Yehova ndonyimeyɛ l’oloko ɔmɔ, ole nyo ladjɛ nangha wopo wɔkɔ ɔmɔ.’—KƆL. 3:13.
IKANYI YƐ DJAMBA
Djamba djɛnɛ ngɔtɛnyɛ wina wa djonyi w’okokaso ntapola djɛ nyimeyɛ onto w’ombotonanghela nkambo djɛ nyɛtshi.
1-2. a) Winá wɔkɔnge w’okokaso nyɛna ente alekɔ wolo nyimeyɛ onto? b) Wopo wɔkɔnge Denise ndɛnyɛ imeyelo?
ONGOYALAKE l’okakasano wɔ nyimeyɛ anto ankina? Anto efula wangoyalake l’okakasano wɔsɔ, pekapeka winá w’otoshimela kana w’otonanghela onto nkambo djɛtɔkɔta. Koko tokoka nangha akambo amɔtshi wangotokotshɛ́ djɛ nyimeyɛ la dj’ipa ndjoka djodjo. Ndjɔmbɔmba, tokolenda kɛnɛ kekomelisá nkaana Denise, a kanga lɛnyisá imeyelo k’efula. Lá 2017, Denise nya nkfumbo kɛnde walakalɔki má ndowembola biro dj’ekekete djɛ Ɛwakɛ wɛ Yehova djipisá ntato. Winá wɔ yotakalɔka, onto ɔmɔtshi wotakɛndjɛki otuka, akfutumoyɛka yenda y’otuka wɔnde, ko alohelaka otuka wɔwɔ. Denise ɛlɔka bɛ má aksida wasɔ. Winá wɔ ndasasimɔ, woshimelaka ambɔ wana wande wambohotala ampota yɛ nkekete efula, la womɛnde Brian, ambovɔ. Winá wɔ ndakanela nkambo djɛsɔ, Denise atepelaka ante: “Ndjokaka ete ngo wamondjopa ntenyi 2 la ntshimbaka yimba efula.” M’ɔkɔngɔ, nde ayɛka ndewa ante mpame ketakɛndjɛki otuka atavɔ waná la atɛkɔla yimba, ko nde alɔmbaka Yehova djɛ ndɔpɛyɛ vu.
2 Wavundaka mpame kɛkɔ lá lokando m’ɔtɛ wɔ ndayake onto l’aksida. Ntsha wambolomboyɛ ko nde ambɔkfɔ nkambo, wangokowa lá lokando. Koko isushi imɔtshi ashimelaka Denise ante ngo ndɔndɔ kɛnde ndeke longoshikikɛ ntsha mpame kɛkɔ angokowama kana angotshungɔ. Denise atepelaka ante: “Ndjokaka ete ngo wambonkandjola mpota, ko wambomvutela ɔlɔndɔ wɔ wɛfu l’eteyi, ete ngo ɔkɔpami nde nyɛna lonkina akambo wa nyɛtshi wankomelisá lá lowiko.” M’ɔkɔngɔ wɔ mbengo imangha, Denise atshɔka tá mvulu kɛ tominanyi ko alɔngɔsɔlaka ndɔndɔ kɛnde djɛ nsamba l’onto woyakalisá ndjolo lá nkfumbo kɛnde wɔsɔ. Kɛkɔnge kɛ ndatepela? Denise alɔmbaka isushi djɛ ndjoka mpame kɛkɔ djandji. b Winá wɔ ndashiyɛ ntepela, isushi awangaka nkɛla wisɔyi. Nde atepelaka ante: “L’ilá kenkfumɔ kɛ ɛnɔnyi 25 wɛ momokambá ete ngo isushi, ntɛnaka nkambo djɛnɛ lá mvulu kɛmi kɛ tominanyi. Ntokaka ntondo ose nkfumbo kembovusɛ onto, alɔmba djɛ ndjoka kanga lomboyaka ewoto kɛnde djandji. Ntokaka ntondo etepela wɛ ngandji la wɛ imeyelo wɛ nghɔsɔ.”
3. Kɛkɔnge ketshindisá Denise djɛ nyimeyɛ?
3 Kɛkɔnge kekotshisá Denise djɛ ndowimeyɛ? Nde atɔnɔlaka lá imeyelo kɛ Yehova. (Mika 7:18) Winá w’oyɛso la djedjɛ lá imeyelo kɛ Yehova ndɔtɛnyɛ, tongotshindama djɛ nyimeyɛ anto ankina.
4. Yehova ɔkɔpande iso nangha nge? (Ɛfɛsɛ 4:32)
4 Yehova nkɔpaka iso nyimeyana ete ngo ndatimeyɛ l’oloko ɔmɔ. (Wala Ɛfɛsɛ 4:32.) Nde nkongaka dj’iso nyimeyɛ anto watonanghelá nyɛtshi. (Yee. 86:5; Luka 17:4) Lá djamba djɛnɛ, tongotepela akambo asato wangotokotshɛ́ djɛ nyimeyana lá lɛdji l’efula.
TOTANANGHAKE NGO NGETE TOPOKE NKƐLƐ
5. Lá nkilika Woongo 12:18, okokaso ndawoka ngete mo winá w’otonanghelawɔ nkambo djɛ nyɛtshi?
5 Tokoka nkiyana efula m’ɔtɛ wɔ kɛnɛ kembotepela kana kembotonanghela onto ɔmɔtshi, pekapeka ntsha onto wɔkɔ alekɔ ilongo kana ose nkfumbo kɛso. (Yee. 55:12-14) Má bango, tokoka ndjoka djodjo efula ete ngo yombotowoka nde lokfula. (Wala Woongo 12:18.) Tokoka nsɛsa djɛ mfumboyɛ kana nyimɛ yimba má wopo w’okaso wɔsɔ. Koko nangha nghɔsɔ alekɔ ete ngo wambotowoka lokfula ko tombotshika lokfula lɔkɔ ngo l’eteyi kɛ mpota. Lá wopo wɔkɔ ɔmɔ, topakoke nkonga ente nkɛlɛ keshile ntsha tonangha ete ngo topoke nkɛlɛ.
6. Wopo wɔkɔnge w’okokaso ndjelola winá w’otonanghelawɔ nkambo djɛ nyɛtshi?
6 Winá w’onto ɔmɔtshi otokiyanyɛnde, ntondo ntondo tokoka ndjoka nkɛlɛ. Bible ndjawolaka ante tokoka ndjala la nkɛlɛ. Koko, ntewola dj’ipa ntshika nkɛlɛ ntapemela. (Yee. 4:4; Ɛfɛ. 4:26) Ladjikɛnge? Ladjikɛnde tongonanghake akambo má kɛnɛ kelekɔ́ lá yimba yɛso. La koko nkɛlɛ apawotaka wana wa wɔlɔ. (Dja. 1:20) Tovungɔ ente nkɛlɛ oyɛwɔ nde ekete kɛ ntondo k’okakaso winá w’otonanghelawɔ nkambo djɛ nyɛtshi, koko mbomba nkɛlɛ oyɛwɔ nde nkano dj’ɔsaso.
Nkɛlɛ alekɔ ekete kɛ ntondo k’okakaso winá w’otonanghelawɔ nkambo djɛ nyɛtshi, koko mbomba nkɛlɛ oyɛwɔ nde nkano dj’ɔsaso
7. Okokaso ndjoka ngete mo winá w’onto ɔmɔtshi otokiyanyɛnde?
7 Winá w’ɔtɛngɛyɛwɔ lá nkambo mɔtshi, tokoka ndjoka yɛnyi efula. Ndjɔmbɔmba, nkaana Ann atepela ante: “Winá wɔ mayalaka ilɛngɛ, isɛkɛmi atonaka nyɛnghɛmi ko atshukaka omoto onkina. Nyɛnaka ente nde ambonkadjɛ. Winá w’iyawote wana, nyɛnaka ente onto ɔmɔtshi ambokita. Ndafulaki l’ikanyi y’ente mpalekɔ la ntshina.” Nkaana Georgette atepela wopo wɔ ndoke winá wɔ womɛnde ndananghe loseka: “Tayalaki tolongo ngo m’ɔlɛngɛ. Tayalaki tat’ekalo la tapoposanyɛki esanga! Oloko wɔmi watshatshɛka.” Nkaana Naomi atepela ante: “Ntafɛnyɛki ente womɛmi nkoka nanghela nkambo djɛ nyɛtshi. Winá wɔ ndasuyɛ ante angolendake asango wɛnyɛwɔ anto enghanghunya, ko andjisaki, ndjokaka nsɔnyi la nyɛnaka ente ambomfunga.”
8. a) Donga djɛkɔnge djetotshinda djɛ nyimeyɛ? b) Wɛlɔ ɛmɔtshi wɛkɔnge w’isowaka winá w’imeyɛso anto ankina? (Lenda ipapango “ Iya ntsha onto ambotonanghela nkambo ntotshimbɛ́ yimba?”)
8 Topakoke nshimela anto kɛnɛ k’oyɛwɔ ladjɛ nangha, koko tokoka ndenda wopo w’elolaso. Ole mbala efula wopo wɔ wɔlɔ wɔ ndjelola nde nyimeyɛ. Ladjikɛnge? Ladjikɛnde tɔkɔpa Yehova, la tokombola nyimeyana. Ntsha towomba nkɛlɛ la topimeyana, alekɔ ete ngo tonangha akambo ngete enkesa ole tokoka ntata olando. (Woo. 14:17, 29, 30) Tokolenda ndjɔmbɔmba kɛ nkaana Christine. Nde atepela ante: “Winá w’okfulunghanami lá nkɛlɛ, mpafulaka monghamongha. Mpewaka nsɔna nkete djɛ ndɛ. Mpawaka kaanga ndambo k’ilɔ la langoyalake l’okakasano wɔ ndjewa ntɔnɔla, ko kɛsɔ kengoyalake l’eposelo wɛ nyɛtshi lá bala djɛmi la lá djokanelo djɛmi l’anto ankina.”
9. Lamo oyɛso ladjɛ nshiyɛ nkɛlɛ k’okaso?
9 Kaanga ntsha onto wotonanghelisá nyɛtshi apawolisa ovunga wɔnde, tokoka nangha dj’ipa nkambo djɛsɔ ntonanghela nyɛtshi. Ngete mo? Georgette, kanga sotepelaki, atepela ante: “Ndɔsaka ndambo kɛ winá, koko mfumboyɛka nkɛlɛ kɛ mokaka womɛmi wɔ ntondo. Eposelo weyalisá nde, ndjalaka la vu dj’efula.” Winá w’ofumboyɛso nkɛlɛ, tongolamake eloko wɛso dj’ipa ntata elando kana ndokoma lá nkambo mɔtshi djɛ nyɛtshi. Tongoyananghelake wɔlɔ, la tongosasangake la lowiko lɔso. (Woo. 11:17) Ntsha ombewa ente olekɔ la nkɛlɛ, ongoyala entshupa djɛ nyimeyɛ?
WOPO WƆ NSHIYƐ NKƐLƐ KƐKO
10. Ladjikɛnge oyɛso ladjɛ ndɔsa ndambo kɛ winá djɛ nshiyɛ nkɛlɛ k’okaso? (Lenda asango.)
10 Wopo wɔkɔnge w’okokɛ mfumboyɛ yɛnyi kana nkɛlɛ k’okɛ? Wopo ɔmɔtshi nde ntshika ndambo kɛ winá mpeta. Djɛ wonga nkɔnɔ, angɔlɔmbamake ndambo kɛ winá m’ɔkɔngɔ wɔ nana. Lá wopo wɔkɔ ɔmɔ, alɔmbama ndambo kɛ winá dj’iso nkɔnɔ lá yimba lá ntondo k’iso ndjala entshupa djɛ nyimeyɛ onto l’oloko ɔmɔ.—Los. 3:3; 1 Pɛ. 1:22.
Ete ngo ɔlɔmbamawɔ nana wonga wɔlɔ wɔlɔ la winá djɛ nkɔnɔ, oyɛwɔ ngo nghɔsɔ ole djɛ mfumboyɛ nkɛlɛ (Lenda itenyi 10)
11. Wopo wɔkɔnge lɔlɔmbɔ okokawɔ nkokotshɛ́ djɛ ndjala entshupa djɛ nyimeyɛ?
11 Lɔmba la wɔnda Yehova akokotshɛ́ djɛ nyimeyɛ. c Ann, kanga sotepelaki, apakisola wopo wɔ lɔlɔmbɔ yokotshɛ́. Nde atepela ante: “Ndɔmbaka Yehova djɛ nyimeyɛ onto onkfumɔ welá nkfumbo m’ɔtɛ wɔ akambo wa nyɛtshi w’isananghe la w’isatepela. Ko mfunelaka papa la wadjɛnde onkanda, ko ndashimelaka ente lambonyimeyɛ.” Ann asuyɛ ante nangha nghɔsɔ atayala wɔdju. Koko atepela ante: “Nkongaki ente má ndjokola imeyelo kɛ Yehova, isɛkɛmi la wadjɛnde wangotshindama djɛ ndjeka akambo walendana la nde.”
12. Ladjikɛnge oyɛso ladjɛ ndjilela Yehova oloko, koko ape tokanyi tɔso? (Woongo 3:5, 6)
12 Ilela Yehova oloko, ape tokanyi tɔko. (Wala Woongo 3:5, 6.) Yehova ndjewaka winá enkfumɔ kɛnɛ kelekɔ́ wɔlɔ leso. (Iza. 55:8, 9) Nde apatɔlɔmbaki dj’iso nangha ekete kengotonanghela ohanela. Djɛko ndeke winá w’ɔtɔlɔmbande djɛ nyimeyɛ, toyale l’eshikikelo ente nangha nghɔsɔ angotoyakala wapɔ efula. (Yee. 40:4; Iza. 48:17, 18) L’onkoko onkina, ntsha tombilela wopo w’oyawokaso la tokanyi tɔso oloko, topangoyala l’akoka wa nyimeyɛ. (Woo. 14:12; Jɛr. 17:9) Naomi, kanga sotepelaki, atepela ante: “Má bango mfɛnyɛki ente mpimeyɛki womɛmi má wopo wɔ ndalende asango wa mbindo. Lokaki wɔma ente angokalɔ nanghela djoyi nkina djɛ pɔlɔ kana angovungɛ ante ntoka yɛnyi. Ole lakanelaki ente Yehova oka wopo w’okami. Koko ntateyɛka nsipisoyɛ ente ape mande Yehova oka wopo w’okami, mbɔ koko awola lemi mbomba nkɛlɛ. Nde ewa wopo w’okami, la ewa ante angɔlɔmbama ndambo kɛ winá djɛ nyimɛ ikanyi yɛsɔ, koko nde nkɔpaka lemi nyimeyɛ.” d
TONANGHE DJƐ NDJALA L’IKANYI YƐ WƆLƆ
13. Lá nkilika Ɔrɔma 12:18-21, kɛkɔnge k’oyɛso ladjɛ nangha?
13 Winá w’imeyɛso onto w’otonanghelisá nyɛtshi, iso nkombolaka nangha akambo efula ape ngo ndɔsa nkano dj’ipa ntepela kɛnɛ kehetisá. Ntsha onto wɔkɔ oyɛnde nde Okristo, okoma wɔso wɔ ntondo nde ndjila vu. (Mat. 5:23, 24) Tɔngɔsɔna djɛ mpɛnyɛ nkɛlɛ la djandji ole yɛnyi la imeyelo. (Wala Ɔrɔma 12:18-21; 1 Pɛ. 3:9) Kɛkɔnge kengotokotshɛ́?
14. Oyɛso ladjɛ ndjila welo djɛ nangha nge, ko ladjikɛnge?
14 Iso ladjɛ nangha la wolo djɛ ndɔsa onto wɔkɔ ete ngo Yehova ɔwɔsande. Yehova olendakande ngo akambo wa wɔlɔ walekɔ́ le onto. (2 Ɛk. 16:9; Yee. 130:3) Mbala efula tɔnghɛnake kɛnɛ k’ohonakaso le anto, ayale kɛ wɔlɔ kana kɛ nyɛtshi. Winá w’ohonaso djɛ nyɛna akambo wa wɔlɔ walekɔ́ le anto, tɔnghɛna ente alekɔ wɔdju ndawimeyɛ. Ndjɔmbɔmba, wɔnanyɔ Jarrod atepela ante: “Langɛnake ente alekɔ wɔdju nyimeyɛ wɔnanyɔ ɔmɔtshi, winá wɛdjɛmi nkambo djɛ nyomonanghela l’akambo wa wɔlɔ walekɔ́ le nde.”
15. Ladjikɛnge oyɛwɔ djonyi nshimela onto ente ombowimeyɛ?
15 Ekete kenkina kɛ djonyi k’okokaso nangha nde nshimela onto wɔkɔ ente tombowimɛyɛ. Lamo? Tokolenda kɛnɛ kɛ Naomi, kanga sɛnaki, otepelande: “Womɛmi andjopolaka ante ‘ngo nsɔsɔlɔ omonyimeyɛ?’ Winá wɔ madjipola ɔlɔmɔ djɛ ndoshimela ente, ‘lambokimeyɛ,’ ntawa kaanga wopo wɔ ntepela. Nsipisoyɛka ente ntowimeyɛ l’oloko ɔmɔ. Winá wɔsɔ, ndjalaka l’akoka wa ntepela itepela yɛ nkfulu inɛ, ‘lambokimeyɛ.’ Winá wɔ mboshimela ente lambokimeyɛ, wiso wa womɛmi walolaka kfu la wisɔyi. Nkamɔka efula lá wopo wɔ ndoke wɔlɔ má nkambo djɛsɔ, ole lemi ndjokaka vu dj’efula. Ko makɔ, nkalɔka ndowilela oloko, edjinge tombokalɔ́ ndjala tolongo tɔ wɔlɔ efula.”
16. Elakanyelo wɛkɔnge ngombowa lá kɛnɛ kelendana l’imeyelo?
16 Yehova nkɔpaka iso nyimeyana. (Kɔl. 3:13) Kaanga oyɛwɔ nghɔsɔ, tokoka ndjala l’okakasano djɛ nyimeyana. Koko tongonangha nghɔsɔ, ntsha topananghisa ete ngo topoke ekete, la ntsha tombonangha la wolo djɛ mfumboyɛ nkɛlɛ kɛso. Ko tongoyala la ikanyi yɛ wɔlɔ.—Lenda ipapango “ Wina asato watɔlá tá imeyelo.”
TOPIKE WISO LÁ WƐLƆ WEYƐKÁ MÁ NYIMEYANA
17. Wɛlɔ wɛkɔnge w’owaso má nyimeyɛ?
17 Tolekɔ la donga efula djɛ nyimeyana. Tokolenda donga mɔtshi. Kɛ ntondo, tokola la tosasangɛ Papa kɛso kɛ nkɛtshi, Yehova. (Luka 6:36) K’ape, tɛnyɛ djedjɛ tá imeyelo kɛ Yehova ndɔtɛnyɛ. (Mat. 6:12) La k’asato, tongoyalamake dj’ipa ntata elando la tongoyalake la djokanelo djɛ wɔlɔ.
18-19. Eposelo wɛkɔnge wekoka ndjala ntsha tombimeyɛ onto?
18 Winá w’imeyɛso anto ankina, tongowa esako w’ipa ndjewa. Ndjɔmbɔmba, tokolenda kɛnɛ kekomelisá Denise, kanga isotepelaki. Kaanga Denise ndotewaki, mpame kenanghisá aksida la wɔ ɔsaka nkano djɛ ndáyaka m’ɔkɔngɔ wɔ dombo. Koko nde akamɔka efula má imeyelo kɛ Denise, ko awangaka ndjeka Bible nya Ewakɛ wɛ Yehova.
19 Tokoka nyɛna ente nyimeyɛ onto alekɔ nkambo djɛ wolo efula nangha. Koko akoka ndjala lonkina lofuto l’ekekete efula l’okokaso mba. (Mat. 5:7) Djɛko ndeke, nyontshɔ tonanghe kenkfumɔ k’okokaso nangha djɛ nyimeyana ete ngo Yehova.
YEEMBO 125 ‘Osasa le anto wokaná djandji’
a Nkombo imɔtshi itshikitanyemaka.
b Lá nkambo djɛ nghɔnɛ, onto l’onto ladjɛ ndɔsa nkano djɛnde lá kɛnɛ k’oyɛnde ladjɛ nangha.
c Lenda lá jw.org avideo wa teembo wanɛ: “Pardonnons-nous les uns aux autres,” “Aide-moi à pardonner,” la “L’amitié retrouvée.”
d Kaanga ndenda asango wɛnyɛ enghanghunya oyɛwɔ mpekanto la nkambo djɛ nyɛtshi la djodjo efula apapɛyɛ wadji kana wome lotshungɔ lɔ ndjaka bala lá nkilika Afunelo.
