DJAMBA DJƐ WEKELO 4
YEEMBO 18 Lokasa lá nkambo djɛ oshinga wɔ mbendo
Oshinga wɔ mbendo otolakanyɛwɔ nge?
‘Má nkambo djɛnɛ ndeke ngandji kɛ Ndjambe yɛnama.’—1 DJ. 4:9.
IKANYI YƐ DJAMBA
Oshinga wɔ mbendo wɛnyɛ wekeka wa wɔlɔ wa Yehova Ndjambe la Yeso Kristo watosepa tewɔ.
1. Lá wopo wɔkɔnge w’owakaso wapɔ má ndjingela lá Bokfɔ djɛ nyɔyi kɛ Yeso nanghemaka ɔnɔnyi onkfumɔ?
LÁ NSƆSƆLƆ isankfumɔ tosanga lolemi ente oshinga wɔ mbendo wolekɔ opapɛyɛ w’ipa wɔsɔdjɔmba! (2 Kɔ. 9:15) Ladjikɛnde Yeso alambolaka lowiko lɔnde, okoka ndjala la djokanelo djɛ wɔlɔ djɛ ma ma la Yehova Ndjambe. Okoka kankina ndjala la nkongi djɛ lowiko l’etshinda. Tolekɔ l’elonga kɛ wɔlɔ efula kɛ nyɛnyɛ djedjɛ lá oshinga wɔ mbendo, la le Yehova, kanga lotshindamisá má ngandji djɛ mfuta! (Ɔrɔ. 5:8) Djɛ ntokotshɛ́ dj’iso nkindjɛ ndjala la djedjɛ la dj’ipa mvungɛ kɛnɛ kɛ Yehova la Yeso yatonanghela, Yeso amɔmɔlaka Bokfɔ djɛ nyɔyi kɛnde, nanghemaka ɔnɔnyi onkfumɔ.—Luka 22:19, 20.
2. Ɛnaso lá djamba djɛnɛ lɔ nge?
2 Ɔnɔnyi wɔnɛ, Bokfɔ ngonanghema Lofu lɔ mpɔsɔ, Ngɔndɔ k’anɛyi 12, 2025. Ape la ehamo isankfumɔ tongolalonghanyɛ djɛ ndingela. Tongowa wapɔ efula má ndɔsa winá l’eleko kɛ Bokfɔ djɛ ntɔnɔla a lá kɛnɛ kɛ Yehova la Wɔnande yatonanghela. Lá djamba djɛnɛ, tɔnghɛna kɛnɛ ketolakanyɛ oshinga wɔ mbendo lá nkambo djɛ Yehova la Wɔnande. Djamba djeyaye ngotokotshɛ́ djɛ ndjoka kɔɔ wopo w’okokaso mba wapɔ m’oshinga wɔ mbendo la wopo w’okokaso nyɛnyɛ djedjɛ djɛso.
KƐNƐ K’OSHINGA WƆ MBENDO OTOLAKANYƐWƆ LÁ NKAMBO DJƐ YEHOVA
3. Wopo wɔkɔnge nyɔyi k’onto ɔmɔ otshungolawɔ miliyɔ y’anto? (Lenda ntshango.)
3 Oshinga wɔ mbendo wotolakanyɛ sii kɛ Yehova. (Mvu. 32:4) Lá wopo wɔkɔnge? Tokolenda nkambo djɛnɛ: Má mpendo k’Adama, tosambelaka mpekanto kɛtɔla tá nyɔyi. (Ɔrɔ. 5:12) Djɛ ntotshungola má mpekanto la nyɔyi, Yehova alonghanyɛka djɛ Yeso mfuta oshinga wɔ mbendo. Koko wopo wɔkɔnge olambo wɔ onto ɔmɔ wɔ djɔ okokawɔ ntshungola miliyɔ y’anto? Ɔpɔstɔlɔ Poolo apakisola ante: ‘Ete ngo má mpendo k’onto ɔmɔ [Adama] anto efula wakomaka ananghi wa mpekanto, wopo wɔkɔ ɔmɔ ndeke má ntshunamo dj’onto ɔmɔ [Yeso] anto efula wangokoma anto wa wɔlɔ.’ (Ɔrɔ. 5:19; 1 Ti. 2:6) Ntepela ente, mpendo k’onto ɔmɔ wɔ djɔ ndeke lombotokomɛ amfumbe yɛ mpekanto la nyɔyi. Djɛko ndeke owaso lotshungɔ má ntshunamo djɛ onto ɔmɔ wɔ djɔ.
Onto ɔmɔ atokomɛka mfumbe yɛ mpekanto la nyɔyi. Lá wopo wɔkɔ ɔmɔ onto ɔmɔ ambototshungola (Lenda itenyi 3)
4. Lamo Yehova ndotatshika ngo tonkanola t’Adama t’eloko wɔlɔ mbika etshinda etshinda?
4 Alɔmbamaka nsɔsɔlɔ ngo Yeso mvɔ dj’iso mba ewiko? Lamo Yehova ndɔtɔsa ngo nkano djɛ ntshika tonkanola tɔ Adama tɔ eloko wɔlɔ mbika lotshinda? Le wana w’anto wa ntshamba djɛ djɔ, ɔsɔ akoka ndjala nkambo djɛ wɔlɔ la djokama papoo. Koko ekanedji kɛsɔ kepile yimba lá sii kɛ djɔ kɛ Yehova. Mande Yehova alekɔ sii, atakoká ndjipa wiso lá nkambo dj’ekekete dj’Adama ndananghe.
5. Lamo okokaso ndjala l’eshikikelo ente Yehova angonangha winá enkfumɔ ngo kɛnɛ kelekɔ sii?
5 Ko iya ntsha Yehova apafutisa oshinga wɔ mbendo ko ambɛyɛ sii kɛnde má ntshika tonkanola tɔ Adama la Eva tɔ ntshamba djɛ djɔ mbika etshinda etshinda? Anto nkoka ndjopola ntsha Ndjambe nkoka ndjɛyɛ sii kɛnde lá akambo ankina. Ndjɔmbɔmba, anto wakoka ndjila ehamo ambɔ Yehova apangokotshɛ́ alaka wande amɔtshi? Topakoke ndjoka wɔma ente nkambo djɛ nghɔsɔ ngonanghema. Ekete kelekɔ́ nsɔsɔlɔ nde Yehova ananghaka kɛnɛ kelekɔ sii, kaanga yalɔmbɛ djɛ ndambola Wɔnande wɔ ngandji—djɛ ntoshikikɛ ente nde angonangha winá enkfumɔ ngo kɛnɛ kelekɔ́ sii.
6. Wopo ɔmɔtshi wɔkɔnge w’oshinga wɔ mbendo ɛnyɛwɔ ngandji kɛ Yehova? (1 Djɔanɛ 4:9, 10)
6 Oshinga wɔ mbendo wotokotshɛ́ djɛ nsipisoyɛ ente Yehova alekɔ sii, wotokotshɛ́ pekapeka djɛ nyɛna ekekete kɛ ngandji kɛnde. (Dj. 3:16; wala 1 Djɔanɛ 4:9, 10.) Oshinga wɔ mbendo wotolakanyɛ ente Yehova nkɔpaka ape ngo iso mba lowiko l’ipa l’ekomo, koko ole dj’iso ndjala ase nkfumbo kɛnde. Tovungɔ ente: Winá w’Adama ndananghe mpekanto, Yehova okilikaka má nkfumbo kɛnde. Eposelo weyalisá nde, isankfumɔ totawotshɔ lá nkfumbo kɛ Ndjambe. Koko m’ɔtɛ wɔ oshinga wɔ mbendo wɔ ndafute, Yehova ambotimeyɛ mpekanto yɛso, la ekomo ekomo angingeyɛ wana w’anto ankfumɔ walekɔ́ la djawo ole la ntshunamo lá nkfumbo kɛnde. Kaanga winá wɔsɔ, tokoka ndjala la djokanelo djɛ wɔlɔ efula la Yehova edjinge la winaso antɛmɔdji. Lá nsɔsɔlɔ, isankfumɔ tawola ngandji k’efula kɛ Yehova!—Ɔrɔ. 5:10, 11.
7. Ndjolo yɛ Yeso otokotshɛwɔ djɛ nsipisoyɛ wopo wɔ Yehova ɔtɔkɔpande ngete mo?
7 Tokoka nsipisoyɛ ekekete kɛ ngandji ketoka Yehova má ntɔnɔla tii lá lɛdji lɔkɔnge ndoke djodjo lá bale má mfuta oshinga wɔ mbendo. Satana afunaka ante lako onkambi wɔ Ndjambe wongotshikala la nkɔmano le nde lá winá w’ekakasano. Djɛ ntongola Satana, Yehova awolaka djɛ Yeso nyɛna ndjolo lá ntondo kɛnde mvɔ. (Djɔ. 2:1-5; 1 Pɛ. 2:21) Yehova alendaki wopo w’antonyi wa Yeso w’ewandji w’ɛtɛmwɛlɔ yɔwɔlaka, angala yokfusaka la yopanyɛ l’otamba. Yehova ndalendaka ngo ndenda winá wɔ Wɔnande ndotavɔka nyɔyi kɛ ndjolo. (Mat. 27:28-31, 39) Yehova ayalaki l’akoka wa nshimba akambo wasɔ winá onkfumɔ wɔ ndotakɔpa. Ndjɔmbɔmba, winá wɔ antonyi yatepela ambɔ: ‘Ntsha [Ndjambe] ndɔkɔpaka owikɛke winá wɔsɔ,’ Yehova atakoka ndowikɛ. (Mat. 27:42, 43) Koko, Ndjambe ndotashimba akambo wasɔ, oshinga wɔ mbendo wotasamba mfutama la iso totakalema ngo nghokonyi ipa nkongi. Djɛko ndeke Yehova awolaka djɛ Wɔnande nyɛna ndjolo tii lá nyɔyi.
8. Yehova okaka djodjo l’oloko winá wɔ ndɛnaka Wɔnande ɛna ndjolo? Pakisola. (Lenda ntshango.)
8 Topakoke mfɛnyɛ ente mande Ndjambe alekɔ Kanga-Nkfulu-Inkfumɔ, apakoke ndjoka lá bale! Totongamaka lá ɛfɔ kɛnde, la akoka wa ndjoka djodjo l’oloko, djɛko ndeke tokoka nkanela ente Yehova akoka ndjoka djodjo lá bale. Bible ntepelaka ante nde ‘ndjokaka djodjo’ la ‘nkiyanaka.’ (Yee. 78:40, 41) Tokolenda kankina kɛnɛ kekomelisá Abrahama nya Izaka. Tovungɔ ente Yehova ashimelaka Abrahama djɛ ndolambola ɛtɔyi kɛnde kɛ wɔna. (Ewa. 22:9-12; Heb. 11:17-19) Tokoka nkanela yɛnyi yɛ ngete nge Abrahama ndoke winá wɔ ndolalɔngɔsɔlaka djɛ ndjaka Izaka la lokfula. Ɔsɔ ngo Yehova ndadjike oloko winá wɔ ndɛnaka anto la onkonda onkfumɔ wanyɔkɔla Wɔnande tii lá nyɔyi!—Lenda lá jw.org video Nyokole djawo djɛwɔ—Abrahama, etenyi 2.
Yehova okaka lá bale efula winá wɔ ndɛnaka Wɔnande ɛna ndjolo (Lenda itenyi 8)
9. Ɔrɔma 8:32, 38, 39 okokotshɛnde djɛ nsipisoyɛ nge lá nkambo djɛ ekekete kɛ ngandji kɛ Yehova okokande la okande winako antɛmɔdji?
9 Oshinga wɔ mbendo ntolakanyɛka ente lako onto wɔtɔkɔpa ndaka Yehova, kaanga mboto djɛso djɛ lɔsɔpɔ lɔmɔ, kana tolongo tɔso tɔ ngandji. (Wala Ɔrɔma 8:32, 38, 39.) Ape l’ehamo, Yehova ntɔkɔpaka ndeka kaanga wopo wolakɔpaso iso sɔmɛlɛ. Ɔkɔpa mbika etshinda etshinda? Ape ete ngo Yehova okɔpande. Ɔkɔpa mpekanto yɛko nyimeyama? Ape ete ngo Yehova ɔkɔpande. Kenkfumɔ kɛ Yehova okongande meso ngo dj’iso ndjawola opapɛyɛ wɔnde wɔ ntsho má ndjala la djawo ole la ntshunamo. Oshinga wɔ mbendo wolekɔ nsɔsɔlɔ ilembetelo y’ekekete yɛ ngandji kɛ Ndjambe. Edjinge lá andja wa bango, tongeka akambo efula walendana la ngandji kɛ Ndjambe.—Los. 3:11.
KƐNƐ KƐ OSHINGA WƆ MBENDO OTOLAKANYƐWƆ LA NKAMBO DJƐ YESO
10. a) Ekete kɛkɔnge kelekaki mpɛyɛ Yeso yɛnyi lá nkambo djɛ nyɔyi kɛnde? b) Wopo wɔkɔnge Yeso ndaseela djiina djɛ Yehova? (Lenda ipapango “ nkɔmano djɛ Yeso ntsheelaka djiina djɛ Yehova.”)
10 Yeso akiyanaka lombombe lá nkambo djɛ lokumu lɔ Papa kɛnde. (Dj. 14:31) Lá ntondo kɛnde mvɔ, Yeso ayalaka la yɛnyi efula ladjikɛnde wowandaka ambɔ ambotola Ndjambe la alekɔ ɔntɔmbɔki, ko akanelaka ante anto wangɔfɛnyɛ ambɔ ambɔpɛyɛ djiina djɛ Papa kɛnde nsɔnyi. Djɛko ndeke ndalɔmbɛ ante: ‘Papa, ntsha nkokaka, ombangoyɛ nkɔpɔ djɛnɛ.’ (Mat. 26:39) Má ntshikala la nkɔmano le Yehova tii lá nyɔyi, Yeso ɛnyɛka lá hwemi ante kɛnɛ ketepela Satana lá nkambo djɛ Papa kɛnde kelekɔ ongolo.
11. Wopo wɔkɔnge Yeso ndɛnyɛ ngandji k’ekekete kɛ ndokaka anto? (Djɔanɛ 13:1)
11 Oshinga wɔ mbendo wotolakanyɛ ente Yeso nkɔpaka anto lombombe, pekapeka ambeki wande. (Woo. 8:31; wala Djɔanɛ 13:1.) Ndjɔmbɔmba, Yeso ewaki ante topo tɔmɔtshi tɔ olemo wɔnde lá looko tongoyala okakasano efula, pekapeka nyɔyi kɛnde kɛ ndjolo. Koko, Yeso akotshɛka edjito wɛnde enkfumɔ ape ngo mande Yehova ɔlɔmbaka djɛnde nangha, koko ladjikɛnde akɔpaki anto. Yeso apoposanyɛki, alakanyɛki, la akambelaki anto ankina l’oloko ɔmɔ. Kaanga lofu lɔ nyɔyi kɛnde, Yeso ɔsaka winá wɔ nsola ambeki wande ekolo la ashimelaka etepela wɛ alɛnɔ djɛ ndakembɛ la djɛ ndapɛyɛ ɛlɔndjɛlɔ. (Dj. 13:12-15) Manyi winá wɔ ndayalaka l’otamba, Yeso ɔsaka ndambo kɛ winá djɛ mpɛyɛ onto ɔmɔtshi wɔ pɔlɔ nkongi la ɔsaka nonghanyi kɛ mbakela nyɛnghɛnde. (Luka 23:42, 43; Dj. 19:26, 27) Lá nsɔsɔlɔ ngandji k’ekekete kɛ Yeso kɛnɛma ape ngo má nyɔyi kɛnde koko ole lá lowiko lɔnde l’otondo lá looko.
12. Lá wopo wɔkɔnge Yeso okindjɛnde ntonanghela akambo efula?
12 Kristo avɔka ‘mbala kɛmɔ etshinda,’ nde atonanghela akambo efula tii lɔɔko. (Ɔrɔ. 6:10) Lá wopo wɔkɔnge? Nde akindjɛ ndjila winá la welo djɛ nangha akambo efula djɛ oshinga wɔ mbendo ntoyakala wapɔ. Tokolenda kɛnɛ konanghande. Alekɔ Nkfumi kɛso, Nkfudji k’Ekekete, la owandji w’otshumano. (1 Kɔ. 15:25; Ɛfɛ. 5:23; Heb. 2:17) Nde alekɔ l’odjito wɔ ntshumanyɛ ankfutami w’avuta la oloyi w’ekekete, olemo wɔsɔ yongoshila ngo lá ntondo kɛ ekomo k’efunge funge k’ekekete. b (Mat. 25:32; Mar. 13:27) Nde alenda lonkina djɛ enkambi wɛnde wɛ nkɔmano ndɛ wɔlɔ lá nyuma l’etsho w’ekomo wɛnɛ. (Mat. 24:45) Ole lá Onkfumi wɔnde w’Ɛnɔnyi Kinunu, angokindjɛ nkamba lá wapɔ wɔso. Lá nsɔsɔlɔ Yehova ambɔtɔpɛyɛ Wɔnande!
TOKINDJƐ NDJEKA AKAMBO WA BANGO
13. Wopo wɔkɔnge w’okokɛ nkindjɛ ndjeka akambo efula walendana la ngandji kɛ Ndjambe la kɛ Kristo otokawɔ?
13 Okoka ndjeka akambo efula má ngandji kɛ Yehova Ndjambe la Kristo Yeso otokawɔ ntsha okindjɛ ntɔnɔla l’eteyi. Mbala imɔtshi l’eleko kɛ Bokfɔ k’ɔnɔnyi wɔnɛ, okoka mbala la nkɔmɛ nkfumɔ evanjiliyo ɔmɔ kana efula. Tohonake djɛ mbala akambo efula mbala kɛmɔ. Koko wala ɔkɔkɛ ɔkɔkɛ la hona donga nkina dj’oyɛso ladjɛ nkɔpa Yehova la Yeso. Ko nshimela anto ankina nkete nkfumɔ dj’ekɛ.
14. Lá nkilika Yeembo 119:97 la nɔtɛ, wopo wɔkɔnge ehonelo okokawɔ ntokotshɛ́ djɛ nkindjɛ ndjeka akambo walendana la oshinga wɔ mbendo ole akambo ankina? (Lenda ntshango.)
14 Ntsha omonanghá ɛnɔnyi efula lá nsɔsɔlɔ, okoka ndawopola ntsha ongisola akambo ankina wa bango watshikitanyi la akambo wa ngewaka ntondo ete ngo sii, ngandji kɛ Ndjambe, la oshinga wɔ mbendo. Nkambo djɛ nsɔsɔlɔ nde, akambo wa ndjeka walekɔ efula lá tɔtɛ tɔ wayi tɔnɛ kana tonkina. Ko oyɛ ladjɛ nangha mo? Wala la eka akambo ankfumɔ walekɔ́ lá enkanda wɛso. Winá w’owalɛ vɛrse mɔtshi djɛ nghopoke wɔlɔ, nangha ehonelo. Manyi l’ilá k’etsho, tɔnɔla lá kɛnɛ kɛ nghombisola la kɛ vɛrse djɛkɔ ndombokoshimela lá nkambo djɛ Yehova la djɛ Wɔnande, ole ngandji k’okokawɔ.—Wala Yeembo 119:97 la nɔtɛ.
Kaanga ntsha tombonanghá ɛnɔnyi efula lá nsɔsɔlɔ, tokoka mfudjɛ djedjɛ djɛso lá oshinga wɔ mbendo (Lenda itenyi 14)
15. Lamo oyɛso ladjɛ nkindjɛ mpona nkete djɛ ntsho djɛ Bible?
15 Tɔtɛkake ntsha opisola nkambo nkina djɛ ntato, kana djɛ winá wɔ wɔlɔ wɔ nghombohetshɛ djɛ mbala la nangha ehonelo. Lá lɛdji lonkina, olekɔ ete ngo onto wotshima mbɔkɔ yɛ ntsho. Mbala efula, anto watshima mbɔkɔ yɛ ntsho ndɔsaka winá la etsho lombombe lá ntondo k’iwɔ mba. Koko wangokindjɛke mande kaanga ikfusa yɛ daambi yɛ mpaonyi, ilekɔ la ntsho efula lewɔ. Akambo ankfumɔ wa nsɔsɔlɔ wa Bible walekɔ ntsho efula! (Yee. 119:127; Woo. 8:10) Djɛko ndeke yala la bale ntshitshi la kindjɛ la badji djɛko djɛ Bible.—Yee. 1:2.
16. Wopo wɔkɔnge w’okokaso ndjokola Yehova la Yeso?
16 Winá w’ekɛ, hona wopo wɔ nkamba la kɛnɛ kɛ nghombisola. Ndjɔmbɔmba, okola sii kɛ Yehova má nsamba ndjɛngɛyɛ anto amɔtshi. Okola ngandji kɛ Yeso ndokaka Papa kɛnde la anto má ndjala entshupa djɛ nyɛna ndjolo lá nkambo djɛ djiina djɛ Yehova la má ndápɛyɛ lá nkambo djɛ winako Akristo. Lonkina, okola Yeso má mpoposanyɛ anto ankina djɛ ole iwɔ ndjawola opapɛyɛ wɔ Yehova w’ipa wɔsɔdjɔmba.
17. Sɔnghɛna lá djamba djeyaye nge?
17 Winá wɔ sotaleke nsipisoyɛ la nkɔpa oshinga wɔ mbendo, ndeke songoleka nkɔpa Yehova la Wɔnande. Lá onkoko wɔwɔ, wangetela ntɔkɔpa. (Dj. 14:21; Dja. 4:8) Djɛko ndeke nyontshɔ tokambe la nonghanyi yɛ Yehova ndɔshi djɛ nkindjɛ ndjeka oshinga wɔ mbendo. Lá djamba djɛlɔnda, tongoshishima wepo ɛmɔtshi w’okokaso mba wapɔ má oshinga wɔ mbendo la wopo w’okokaso mfudjɛ djedjɛ djɛso tá ngandji kɛ Yehova.
YEEMBO 107 Ndjɔmbɔmba kɛ ngandji ketotshikelisá Ndjambe
a DJƐ NDJOKA WƆLƆ: “Ntɔnɔla” nsakisolaka ndápɛyɛ kana ndjila yimba la nkɔmɛ nkfumɔ lá ɔtɛ wɔ djoyi ɔmɔtshi djɛ nangha wekelo wɔ lotshimola.
b Osanghanelo wɔ ‘nkete djɛ l’olongo’ wɔ Poolo ndatepela lá Ɛfɛsɛ 1:10, w’otshikitana l’osanghanelo wɔ ‘ansɔnami’ wa Yeso ndatepela lá Mateo 24:31 la Marko 13:27. Poolo ndatepelaka nde winá wɔ Yehova ndɔngɔsɔna wanande wa nyuma má ndakfuta avuta má nyuma k’ekina. Yeso ndatepelaka nde winá wɔ antshikadji w’ankfutami w’avuta walekɔ lá looko yongotshumana l’olongo lá efunge funge k’ekekete.
