DJAMBA DJƐ WEKELO 3
YEEMBO 35 ‘Toshishime akambo ankfumɔ’
Tɔshi akano wasasangɛ Yehova
‘Wɔma wɔ Yehova ndeke ewangelo kɛ balo, la ndjewa Kanga Loleka Ekina ndeke yimba.’—WOO. 9:10.
IKANYI YƐ DJAMBA
Wopo w’okokaso nkamba la djewo, yimba ole ntɔnɔ djɛ ndɔsa akano wa wɔlɔ.
1. Isankfumɔ opomanaso l’ekakasano wɛkɔnge?
LOFU la lofu tongoyalake la djonyi djɛ ndɔsa akano. Amɔtshi walekɔ wɔdju, ete ngo ekete kɛ ndɛ la nkɛsɛ kana winá wɔ ndjetama. Akambo ankina walekɔ wolo efula ndɔsa akano. Wakoka ndjala l’eposelo lá alemba waso, osasa wɔso, anto waso wa ngandji kana lá ɔtɛmwɛlɔ wɔso. Iso nkɔpaka djɛ akano waso ntoyakala iso la nkfumbo kɛso wapɔ. Lá djiko dj’akambo ankfumɔ, iso nkɔpaka djɛ akano waso nsasangɛ Yehova.—Ɔrɔ. 12:1, 2.
2. Nkete djɛkɔnge ngokokotshɛ́ djɛ ndɔsa akano wa wɔlɔ?
2 Okoka ndɔsa nkano djɛ balo ntsha 1) ombewa akambo ankfumɔ, 2) ombewa ekanedji kɛ Yehova lá nkambo djɛkɔ, la 3) ɔmbɔtɔnɔla lá nkando inkina. Tɔnghɛna lá djamba djɛnɛ nkete ntshato dj’oyɛso ladjɛ nangha, la ngotokotshɛ́ lonkina djɛ nyɛna wopo w’okokaso nkfumba nkoka djɛso dj’ekanedji kɛ yimba.—Woo. 2:11.
HONA DJƐ NDJEWA AKAMBO ANKFUMƆ
3. Kɔpɛyɛ ndjɔmbɔmba kɛnyɛ lamo oyɛso ladjɛ ndjewa nkambo nkfumɔ lá ntondo kɛ ndɔsa akano.
3 Djina djɛ ntondo djɛ ndɔsa akano wa wɔlɔ nde ndjewa akambo ankfumɔ. Lamo oyɛwɔ djonyi? Kokanela djɛ ose olando ambotshɔ te dɔktɛrɛ mande alekɔ la olando w’ekekete. Dɔktɛrɛ angɔsa nkano djɛ ndɔpɛyɛ bɔki mɔtshi ipa ntondo ntondo ndoshishima, (kana ndonangha examens) la ndowopola wopo w’okande? Apakoke nangha nghɔsɔ. Ole wɛ, ɔngɔsa akano wa wɔlɔ ntsha omboshishima ntondo ekete kenkfumɔ kelendana la nkambo djɛko. Okokɛ nangha nghɔsɔ ngete mo?
4. Lá nkilika Woongo 18:13, wopo wɔkɔnge w’okokɛ ndashikikɛ ente ombewa akambo ankfumɔ? (Lenda ntshango.)
4 Okoka ndjewa nkambo má ndjopola weepó. Kɔsa djɛ wamboketa tá asɛkɛlɔ. Wɛ ladjɛ ntshɔ? Ntsha opewe kanga lɔmbɔlɔngɔsɔla, la nonghanyi yɛ ndombonangha, okoka ndjala la djonyi djɛ ndowopola weepó wɛnɛ: “Asɛkɛlɔ wakɔ yongoyala lampe, la winá wɔkɔnge? Anto wangoyala efula? Longonangha djɛ akambo ankfumɔ mpeta wɔlɔ na? Anto akɔna wangoyɛ? Akambo wakɔnge wangonanghema? Wana wa wolo wangoyala?” Ndjɔndɔ yɛ weepó wɛsɔ ingokokotshɛ́ djɛ ndɔsa nkano djɛ balo.—Wala Woongo 18:13.
Ewa akambo ankfumɔ má ndjopola weepó (Lenda itenyi 4) a
5. Oyɛ ladjɛ nangha nge m’ɔkɔngɔ wɔ ndjewa akambo ankfumɔ wangoheta?
5 M’ɔkɔngɔ wɔ ndjewa akambo ankfumɔ wasɔ, tɔnɔla djɛ ndjewa wopo wongonanghema asɛkɛlɔ wakɔ. Ndjɔmbɔmba, iya ntsha ombewa ente anto amɔtshi wapalɛmɛyɛ́ tɔkfɔ tɔ Bible wangoyala kana wana wa wolo wangoyala efula ipa onto wolama? Ɛna ente winá ɛmɔtshi asɛkɛlɔ wasɔ wakoka ndokoma fɛtɛ kɛ nyɛtshi? (1 Pɛ. 4:3) L’onkoko onkina, asɛkɛlɔ wasɔ wafutanyɛ nonghanyi kɛko kɛ nsanghanyɛ la k’olemo w’ipoposanyɛ? Winá wɔ nghɔnghɛna wopo wɔ akambo ankfumɔ yongoheta, angoyala wɔdju le wɛ djɛ ndɔsa nkano djɛ wɔlɔ. Koko nkambo nkina dekɔ dj’oyɛ ladjɛ nangha. Ombewa wopo wɔ akambo yongoheta; iya Yehova ɛnande ante mo?—Woo. 2:6.
TƆNƆLA LÁ KƐNƐ KƐ YEHOVA OKANELANDE
6. Lá nkilika Djakɔbɔ 1:5, ladjikɛnge oyɛso ladjɛ ndɔmba Yehova okotshɔ?
6 Lɔmba Yehova akokotshɛ́ djɛ wɛ ndjewa wopo wokanelande. Yehova ntolakaka djɛ ntɔpɛyɛ balo djɛ ndjewa kana nkano mɔtshi ngosasangɛ. ‘La lokapo lonkfumɔ nde mpɛyɛka anto ankfumɔ ipa la ndapangola’ balo djɛ nghɔsɔ.—Wala Djakɔbɔ 1:5.
7. Wopo wɔkɔnge w’okokaso ndjisola ekanedji kɛ Yehova? Pɛyɛ ndjɔmbɔmba.
7 Ntsha ɔmbɔlɔmba ɛlɔndjɛlɔ kɛ Yehova, yala la ntɔnɔ djɛ ndjewa ekadjimwelo kɛnde. Ndjɔmbɔmba: Ntsha ombokfunga lá idjena imɔtshi, okoka ndɔmba onto ɔmɔtshi wintasɛ lanyi djɛ nde nkokotshɛ́. Iya okoka ntshɔ lá ntondo kɛ nde nkokadjimola? Lako. Ongopika ntoyi lá ɛlɔndjɛlɔ k’ɔkɔpɛyɛnde. Lá wopo wɔkɔ ɔmɔ, m’ɔkɔngɔ wɔ ndɔmba okotshɔ wɔ Yehova, nangha la wolo djɛ ndjisola ndjɔndɔ kɛnde má mpona ɛlɛmbɛ la tɔkfɔ tɔ Bible tokambema lá nkambo djɛko. Ndjɔmbɔmba, winá w’ɔsɛ nkano ntsha okoka ntshɔ tá asɛkɛlɔ wa sotepelisá, okoka ndenda kɛnɛ kɛ Bible otepelande djɛ afɛtɛ yɛ nyɛtshi, asɛkɛlɔ wa nyɛtshi, la djonyi djɛ ndjila wapɔ w’Onkfumi lá ntondo kɛ akambo w’ɔkɔpɛ.—Mat. 6:33; Ɔrɔ. 13:13; 1 Kɔ. 15:33.
8. Okokɛ nangha nge ntsha olekɔ la djonyi djɛ okotshɔ djɛ ndjewa akambo wohonɛ? (Lenda ntshango.)
8 Koko winá ɔmɔtshi, ongoyala la djonyi dj’okotshɔ djɛ ndjewa akambo wohonɛ. Okoka mba alako me wananyɔ l’ankaana imbopakisɔ akambo. Koko, okoka mba wapɔ lonkina má nangha ehonelo nghɔmɛlɛ kɛko. Akambo w’oyɛ la djonyi djɛ ndjewa walekɔ efula lá enkanda wɛso wɛ wekelo ete ngo Guide de recherche des temoins de Jehovah la Afunelo walendana la lowiko l’Okristo. Vungɔ okoma wɔko: Ndɔsa akano wangosasangɛ Yehova.
Lenda kɛnɛ kɛ Yehova okanelande (Lenda itenyi 8) b
9. Okokaso ndjala l’eshikikelo ente nkano djɛso ngosasangɛ Yehova ngete mo? (Ɛfɛsɛ 5:17)
9 Okokaso ndjala l’eshikikelo ente akano waso wangosasangɛ Yehova ngete mo? Ekete kɛ ntondo nde, iso ladjɛ ndowewa wɔlɔ wɔlɔ. Bible ntepela ante: ‘Ndjewa Kanga Loleka Ekina ndeke yimba.’ (Woo. 9:10) Ee, yimba yɛ nsɔsɔlɔ ndjɛka má ndjewa wekeka wa Yehova, akambo wosangolande nangha, la kɛnɛ kɔkɔpande la kotonande. Kolawopola ente: ‘Lá wopo wewami Yehova, nkano djɛkɔnge mɔnghɔsa djɛ ndosasangɛ?’—Wala Ɛfɛsɛ 5:17.
10. Lamo tɔkfɔ tɔ Bible oyɛwɔ djonyi ndeka nkfumbo djɛso kana kɛnɛ k’ase nkfumbo kɛso otepelawɔ?
10 Winá ɛmɔtshi, dj’iso nsasangɛ Yehova, iso ladjɛ ntona kɛnɛ kɛ boto la tolongo tɔso otoshimelawɔ. Ndjɔmbɔmba, ambotshi wa ngandji nkoka ntshinda wɔnawɔ w’omoto djɛ ntshukana nya mpame kelekɔ́ l’okfudji, kana kanga lokoka ndapɛyɛ djɛlɔ dj’efula, kaanga ndopalekɔ la lonyuma lɔ wɔlɔ. Lá nsɔsɔlɔ, wakɔpa djɛ wɔnawɔ ndjala la bala djɛ wɔlɔ, ko ongokotshɛ́ djɛ mfula lá nyuma na? Yehova ɛnande nkambo djɛsɔ ngete nge? Towa ndjɔndɔ lá Mateo 6:33. Vɛrse djɛnɛ djekembɛ Akristo djɛ ‘mpona ntondo ntondo Onkfumi.’ Kaanga ɔkɔpaso mpɛyɛ ambotshi waso lomo la ɔkɔpaso nɛmɛyɛ ase mbandja, ekete keleka djonyi leso nde nsasangɛ Yehova.
TƆNƆLA LÁ NKANDO INKINA
11. Nkoka djɛkɔnge dj’otepelawɔ lá Filipɛ 1:9, 10 ngokokotshɛ́ djɛ ntɔnɔla lá nkando inkina?
11 Winá woshishimɛ tɔkfɔ tɔ Bible tolendana la nkano djɛko, wɛ ladjɛ ntɔnɔla lá nkando inkina. (Wala Filipɛ 1:9, 10.) Nkoka djɛ ekanedji kɛ yimba ngokokotshɛ́ djɛ nyɛna eposelo wɛ akambo ankfumɔ woshishimaso. Winá ɛmɔtshi akano nkoka ndjala wɔdju ndɔsa. Koko ape akano ankfumɔ ndeke loyalaka wɔdju. Nkoka djɛ ekanedji kɛ yimba ngokokotshɛ́ djɛ ndɔsa akano wa balo kaanga lá akambo wa wolo.
12-13. Wopo wɔkɔnge nkoka dj’ekanedji kɛ yimba yongokokotshɛ́ djɛ ndɔsa nkano djɛ balo ndendana la olemo?
12 Tokolenda nkambo djɛnɛ. Ohona olemo djɛ ndesɛ nkfumbo kɛko. Ombowa elemo epe. Omboshishima la ɔmbɔtɔnɔla lá akambo ankfumɔ, ndjɔmbɔmba wopo wɔ olemo, nonghanyi, winá wɔsɛ djɛ ntokoma lá olemo, la wayi ankina. Bible djawola elemo wɛkɔ epe. Okoka nsɔna olemo ɔmɔtshi ladjikɛnde wɛ nkɔpaka wopo wɔ olemo wɔkɔ kana mande wangokofuta djudji djɛ nkfuta. Koko akambo amɔtshi walekɔ w’oyɛ ladjɛ ntɔnɔla lá ntondo kɛ ndɔsa nkano.
13 Ndjɔmbɔmba, olemo wɔko wofutanyɛ nonghanyi kɛ nsanghanyɛ y’otshumano? Olemo wɔsɔ wɔngɔkɔpɛyɛ winá w’oyɛ la djonyi djɛ nsuka nkfumbo kɛko lá demba la lá nyuma? Ndjopola weepó wɛ nghɔsɔ angokokotshɛ́ djɛ ndjila ‘akambo waleka djonyi’—ɔtɛmwɛlɔ wɔko l’ehomba wɛ nkfumbo kɛko—l’edjena kɛ ntondo ko ndjɛyɛ ehomba wɛ demba. Ko ɔngɔsa nkano ntshasangɛ Yehova.
14. Wopo wɔkɔnge nkamba la ntɔnɔ la nyɛnyɛ ngandji yongotokotshɛ́ dj’ipa ntakanyɛ anto ankina?
14 Ntɔnɔ nkoka ntokotshɛ́ djɛ nkɔdjɛ nkano djɛso la eposelo wengoyala ‘dj’ipa iso ntakanyɛ anto ankina.’ (Flp. 1:10) Nkambo djɛsɔ dekɔ djonyi winá w’ɔsaso akano walendana la ɔlɔtɔ ole l’afo. Ndjɔmbɔmba ɔkɔpa yopo imɔtshi y’ɔlɔtɔ kana yɛ nkfo. Ko iya ntsha anto wa l’eteyi kana wa bandja dj’otshumano wakiyana? Ntɔnɔ ngokokotshɛ́ djɛ nɛmɛyɛ ikanyi yɛwɔ. Ngandji kengokotshinda djɛ mpona ntondo ‘wapɔ w’anto ankina’ la djɛ ndjala la wɛdjimo. (1 Kɔ. 10:23, 24, 32; 1 Ti. 2:9, 10) Ko tɔngɔsa nkano djɛnyɛ ngandji la dilɛmɛlɔ te anto ankina.
15. Lamo oyɛ ladjɛ ntɔnɔla lá ntondo kɛ nkotshɛ nkano djɛ wolo?
15 Ntsha ɔkɔpa ndɔsa nkano djɛ wolo, tɔnɔla wopo wɔ nghongokamba la nkano djɛkɔ. Yeso atolakanyɛka djɛ ‘nkamba akumi’ lá ntondo kɛ ndɔsa nkano. (Luka 14:28) Djɛko ndeke, lenda winá, nkete, la welo wɛ nghongoyala la djonyi djɛ nkotshɛ́ nkano djɛkɔ. Lá akambo amɔtshi, okoka ndjopola ase nkfumbo kɛko dj’onto l’onto nshikikɛ kɛnɛ k’oyɛnde ladjɛ nangha djɛ nsuka nkano djɛko. Lamo oyɛwɔ wɔlɔ nangha nghɔsɔ? Mande okoka ndɛna ente olekɔ la djonyi djɛ ntshikitanyɛ tokakambo tɔmɔtshi kana ente okoka nangha lá topo totshikitanyi. La koko, winá w’oshimelɛ nkfumbo kɛko la w’ekameyɛ alako wawɔ, wangoleka ndjala entshupa djɛ nkokotshɛ́ djɛ ndɔsa akano wangolonga.—Woo. 15:22.
ƆSA NKANO NGOLONGA
16. Ekete kɛkɔnge kengokokotshɛ́ djɛ nkano djɛko ndonga? (Lenda ipapango “ Wopo wɔ ndɔsa akano wa balo.”)
16 Ntsha ɔmbɔlɔnda alako kana wina wasɔmɛna má djiko, mbɔ koko ongoyala entshupa djɛ ndɔsa nkano djɛ balo. Ombewa akambo ankfumɔ la omboshishima tɔkfɔ tongokokotshɛ́ djɛ ndɔsa nkano ngosasdjɛ nkano djɛangɛ Yehova. Winá wɔsɔ okoka ndɔmba Yehova akokotshɛ́ ko ndonga.
17. Ekete kɛkɔnge kengokokotshɛ́ djɛ ndɔsa akano wa wɔlɔ?
17 Kaanga ɔsaka akano wa wɔlɔ efula l’etsho wemboheta, vungɔ ente iseke yɛ ndɔsa akano wa wɔlɔ nde, ndawɛkɛ lá djaana djɛ Yehova, koko ape lá yimba la balo djɛko. Ngo nde ndeke lokoka nkɔpɛyɛ djewo djɛ nsɔsɔlɔ, yimba, la ntɔnɔ—ntepela ente mpikamelo djɛ balo. (Woo. 2:1-5) Yehova akoka nkokotshɛ́ djɛ ndɔsa akano wangoosasangɛ.—Yee. 23:2, 3.
YEEMBO 28 Tɔkɔpɛ ilongo la Yehova
