DJAMBA DJƐ WEKELO 2
YEEMBO 132 Tombokoma demba mmɔ
Wame, nyɔpɛyɛ wadji wanyo onkfunda
‘Nyo wame, . . . nyapɛyɛ onkfunda.’—1 PƐ. 3:7.
IKANYI YƐ DJAMBA
Wopo wɔ wame okokawɔ mpɛyɛ wadji wawɔ onkfunda má etepela la nanghedji.
1. Ladjikɛnge Yehova ndatonge nonghanyi kɛ bala?
YEHOVA alekɔ ‘Ndjambe kɛ osasa,’ la nkɔpaka dj’iso koko ndjala l’osasa. (1 Ti. 1:11) Ambɔtɔpɛyɛ epapɛyɛ efula dj’iso nsasanga la lowiko. (Dja. 1:17) Opapɛyɛ ɔmɔtshi nde bala. Winá wɔ wadji la wome ɔpɛtshɛwɔ, wangonanghake ɛlɔkɔ kɛ nkɔpana, nɛmɛyana la ndɔsana l’odjito. Ndjala la djokanelo djɛ wɔlɔ nkoka ndayakala osasa wɔ nsɔsɔlɔ.—Woo. 5:18.
2. Awala efula oyɛwɔ ngete mo lɔɔko kɛnɛ?
2 Yɛnyi nde, l’andja wa lɔɔko wanɛ, antshukami efula wangovungɛke ɛlɔkɔ kɛ yananghe lofu lɔwɔ lɔ bala. Eposelo welekɔ́ nde, wapalekɔ l’osasa. Lɔpɔlɔ lɔmɔtshi lɔ Organisation Mondiale de la Santé lɛnyɛ ente wame efula wanyɔkɔla wadji wawɔ má etepela, lá demba, la lá yimba. Mpame kenangha nghɔsɔ nkoka ndɔsa wadjɛnde l’odjito lá ntondo k’anto, ntshende ɔnyɔkɔla lá mvulu. Awala efula wangotshanghanake winá wɔ wome olendande asango wɛnyɛ anto enghanghunya.
3. Akambo wakɔnge wakoka ntshinda mpame djɛ nyɔkɔla wadjɛnde?
3 Lamo ampame efula ɔnyɔkɔlawɔ wadji wawɔ? Mbala imɔtshi ambotshi wawɔ wayalaki lopango, djɛko ndeke wakoka mfɛnyɛ ambɔ eyalelo kɛ lopango kelekɔ wɔlɔ. Amɔtshi wangodjimbolamake má nkfumbo djɛ todjena tintasɛwɔ, djapɛyɛ ikanyi ipɔlɔ yɛ ente “mpame kɛ nsɔsɔlɔ” ladjɛ ndjapamela wadjɛnde la wolo djɛ ndɔwɛnyɛ ente nde ndeke owandji. Ankina wapewaka ndákota winá w’okawɔ nkɛlɛ kana w’otshimbawɔ yimba. Ampame imɔtshi walekɔ la ikanyi yɛ nyɛtshi te amato la osangelo wɔ mbeto má wopo wolendakawɔ asango wɛnyɛ anto enghanghunya mbala la mbala. Lɔpɔlɔ lakfɛ lonkina ente opela wɔ COVID-19 wofudjɛka akambo wasɔ. Lá nsɔsɔlɔ, má akambo wa sombowala wanɛ, lako kaanga mmɔ nkoka mpɛyɛ mpame elonga kɛ nyɔkɔla wadjɛnde.
4. Akristo oyɛwɔ ladjɛ ndalama má nkambo djɛkɔnge, ko ladjikɛnge?
4 Wame w’Akristo ladjɛ ndalama dj’ipa ndjala la ikanyi yɛ nyɛtshi lá nkambo djɛ amato. a Lamo? Elonga kɛmɔtshi nde anto efula nanghaka akambo má wopo w’okanelawɔ. Ɔpɔstɔlɔ Poolo ewolaka Akristo w’ankfutami w’avuta w’ase Ɔrɔma djɛ ‘ntshika ndjokola andja wanɛ.’ (Ɔrɔ. 12:1, 2) Winá wɔ Poolo ndafunelaka ase Ɔrɔma onkanda, otshumano womboshiyɛ nkfumbama. Koko, etepela wɛ Poolo wɛnyɛ ente anto amɔtshi l’otshumano wadjimbolamaki má nkfumbo la tokanyi tɔ ase andja. Djɛko ndeke ndakembɛ dj’iwɔ ntshikitanyɛ ekanedji la djalelo djɛwɔ. Dako djɛsɔ dendana ole l’Akristo w’ampame lɔɔkɔ kɛnɛ. Yɛnyi nde, amɔtshi wangokfumbolamake má ekanedji k’ase andja la wangɔnyɔkɔlake wadji wawɔ. b Yehova okongande djɛ wome ndɔsa wadjɛnde ngete mo? Tɛna ekadjimwelo lá vɛrse dj’ɔtɛ wɔ djamba.
5. Lá nkilika 1 Pɛtɛlɔ 3:7, wome oyɛnde ladjɛ nanghela wadjɛnde akambo ngete mo?
5 Wala 1 Pɛtɛlɔ 3:7. Yehova ndɔmbaka djɛ wome mpɛyɛ wadjɛnde onkfunda. Onkfunda ntɔlaka ikanyi tá wopo w’ɔsaso onto w’ɔlɛmɛyɛso. Mpame kɛpɛyɛ wadjɛnde onkfunda ndonanghelaka akambo la ngandji ole l’oloko wɔlɔ. Lá djamba djɛnɛ, tɛna wopo wɔ wome okokande ndjila wadjɛnde onkfunda. Koko ntondo ntondo, tokolenda djalelo la nkɔmɔ ntshiyɛ amato onkfunda.
TSHIKA EYALELO KESHIYƐ́ WADJƐKO ONKFUNDA
6. Yehova ndokaka ngete mo winá wɔ mpame okfusande wadjɛnde? (Kɔlɔsɛ 3:19)
6 Ɛkɔmɔ kɛ nkfusa wadji. Yehova nkfupaka onto onkfumɔ wɔ lopango. (Yee. 11:5) Yehova ntonaka mpame kekfusa wadji. (Mal. 2:16; wala Kɔlɔsɛ 3:19.) Lá nkilika vɛrse dj’ɔtɛ wɔ djamba, 1 Pɛtɛlɔ 3:7, ntsha wome apananghela wadjɛnde akambo lá wopo wɔ wɔlɔ, djokanelo djɛnde la Ndjambe ngotshitana. Yehova apakoke kaanga ndjekameyɛ ndɔmbɔ yɛnde.
7. Lá nkilika Ɛfɛsɛ 4:31, 32, wome oyɛnde ladjɛ ntshika etepela wɛ ngete mo? (Lenda “Djɛ ndjoka wɔlɔ.”)
7 Ɛkɔmɔ kɛ mposɛ etepela wɛ nyɛtshi. Wame amɔtshi nyɔkɔlaka wadji wawɔ má mposɛ etepela wɛ nkɛlɛ la wɛkɔta. Koko Yehova nkfupaka ‘nkɛlɛ, nkɛlɛ k’indeko, oloso, atoyi la etepela enkfumɔ wɛ lɔlɛngɔ.’ c (Wala Ɛfɛsɛ 4:31, 32.) Nde ndjokaka akambo ankfumɔ. Etepela wɛ wome oposɛyɛnde wadji, kaanga lá mvulu kɛwɔ k’eteyi, Yehova nkɔmɛka. Wome woposɛ wadji etepela wɛ lɔlɛngɔ atshita bala djɛnde la djokanelo djɛnde la Yehova.—Dja. 1:26.
8. Yehova ndokaka ngete mo lá olendelo w’asango wɛnyɛ anto enghanghunya, ko ladjikɛnge?
8 Ɛkɔmɔ kɛ ndenda asango wɛnyɛ anto enghanghunya. Yehova ndokaka ngete mo lá nkambo djɛ ndenda asango wɛnyɛ anto enghanghunya? Nde mfulɔka. Djɛko ndeke mpame kelanda asango wa mbindo angotshitake djokanelo djɛnde la Yehova la nanghelaka wadjɛnde nyɛtshi. d Yehova ndɔmbaka djɛ wome ndjala la nkɔmano te wadjɛnde lá nanghedji la lonkina lá yimba. Yeso atepelaka ante mpame kelenda omoto onkina lá wopo wɔ nyɛtshi tii nde ndolula amonangha loseka ‘lá oloko wɔnde.’ e—Mat. 5:28, 29.
9. Lamo Yehova ndofulɔka winá wɔ wome otshindande wadji la wolo djɛ nangha akambo wa ndopakɔpɛ winá wosangawɔ mbeto?
9 Ɛkɔmɔ kɛ nangha wadji la wolo akambo wa ndopakɔpɛ winá wosanganyo mbeto. Winá wosangawɔ mbeto, ampame imɔtshi wangotshindake wadji wawɔ la wolo djɛ nangha akambo wapɛyɛ olando la wakomɛ dj’iwɔ nyɛna ambɔ wapalekɔ la ntshina kana wapaakɔpɛ. Yehova mfulɔka ɛkɔmɔ kɛ nyɛtshi la kɛ lokaki kɛ nghɔsɔ. Yehova ndɔmbaka wame djɛ nkɔpa la mbɔndjawɔndjɛ wadji wawɔ la nɛmɛyɛ tokanyi ole nkfum’eloko yɛwɔ. (Ɛfɛ. 5:28, 29) Iya ntsha wome w’Okristo ambɔnyɔkɔla la ambonangha la wolo wadjɛnde akambo wa ndopakɔpɛ winá wosangawɔ mbeto kana ambolenda asango wɛnyɛ anto enghanghunya? Okokande ntshikitanyɛ ikanyi la nanghedji djɛnde ngete mo?
WOPO WƆ NTSHIKA EYALELO KESHIYƐ WADJI ONKFUNDA
10. Wopo wɔkɔnge wame okokawɔ mba wapɔ má ndjɔmbɔmba kɛ Yeso?
10 Ekete kɛkɔnge kengokotshɛ́ wome djɛ ntshika ɛkɔmɔ kɛ nyɔkɔla la ntshinda wadji djɛ nangha akambo wa ndopakɔpɛ lá mbeto? Ananghe la wolo djɛ ndjokola Yeso. Kaanga Yeso ndotatshuka wadji, wopo wɔ ndɔsaka ambeki wande wolekɔ ndjɔmbɔmba kɛ wopo wɔ wome okokande ndɔsa wadjɛnde. (Ɛfɛ. 5:25) Ndjɔmbɔmba, tokolenda elakanyelo wɛ wame okokawɔ mba má wopo wɔ Yeso ndashimelaka la ndananghelaka apɔstɔlɔ wande akambo.
11. Wopo wɔkɔnge Yeso ndananghelaka ambeki wande akambo?
11 Yeso ananghelaki ambeki wande akambo la ngandji ole lá yopo yapɛyɛ onkfunda. Nde atayalaki akambo wolo la lopango. Kaanga ndayalaka Nkfumi la Owandji wɔwɔ, Yeso atayala la djonyi djɛ ndawɛnyɛ lowandji lɔnde má nangha akambo wa nkfulu dj’iwɔ ndowoka wɔma. Koko la okitshakitshɛ onkfumɔ, nde akambelaka. (Dj. 13:12-17) Ashimelaka ambeki wande ante: ‘Nyeke akambo me lemi, ladjikɛnde lemi ndekɔ la ndákota ole la oloko w’okitshakitshɛ, ko nyongowa lokembo.’ (Mat. 11:28-30) Tɛna lanɛ ente Yeso ayalaki la ndákota. Onto wolakota apalekɔ etshumbe. Koko alekɔ la nkfulu k’eteyi k’otshinda djɛ nde ndákota. Winá w’osolawɔ, nde ntshikalaka vu la ndjewaka ndjapemela nkɛlɛ kɛnde.
12. Yeso ndatepelaka la anto ankina ngete mo?
12 Yeso akambaki la etepela wɛnde djɛ nkembɛ la ntshitshimɛ anto ankina. Nde ataposɛki etepela wɛ nyɛtshi te ambeki wande. (Luka 8:47, 48) Kaanga winá wɔ antonyi yotolaka la yosolaka, ‘nde atatolaki.’ (1 Pɛ. 2:21-23) Lá winá wɛ nghɔsɔ, Yeso ɔsaki nkano djɛ ntshikala vu l’edjena kɛ nkawoyɛ etepela wɛ nyɛtshi. (Mat. 27:12-14) Wole ndjɔmbɔmba kɛ wɔlɔ le wame w’Akristo!
13. Ete ngo Mateo 19:4-6 otepelande, wopo wɔkɔnge wome okokande ‘malema wadjɛnde’? (Lenda ntshango.)
13 Yeso alakanyɛka wame djɛ ndjala la nkɔmano te wadji wawɔ. Ɛnyɛka ante Papa kɛnde atepelaka ante, wome ladjɛ ‘malema wadjɛnde.’ (Wala Mateo 19:4-6.) Itepela ikambema lá vɛrse djɛnɛ ikadjimwamá ‘malema’ nsakisolaka ‘mamana.’ Djɛko ndeke, ntshudji kana ɔkɔdji wɔ bala wokowá wadji la wome ladjɛ ndjala wolo ndii dj’iwɔ mamana maa ete ngo yombokoma nde ekete kɛmɔ. Ɔkɔdji wɔwɔ wopakoke ndjopɛ ipa ndananghela iyape kɛkɔ nyɛtshi. Wome wonanghá djɛ ntshudji djɛwɔ ndjala wolo nghɔsɔ, ntonaka ndenda topo tonkfumɔ tɔ asango wɛnyɛ anto enghanghunya. Angokadjimɔ idjena inkina mbala kɛkɔ kɛmɔ winá ‘w’ɛnande ekete kepalekɔ la ntshina.’ (Yee. 119:37) Lá nsɔsɔlɔ, ambɔkɔta isambi nya wiso wande dj’ipa ndula omoto onkina, ngo wadjɛnde toko.—Djɔ. 31:1.
Wome wɔ nkɔmano apakɔpɛ ndenda asango wɛnyɛ anto enghanghunya (Lenda itenyi 13) g
14. Wina wakɔnge wome okokande ntapola djɛ ndɔngɔsɔla djokanelo djɛnde nya Yehova la nya wadjɛnde?
14 Mpame kekfusá la keposɛ etepela wɛ nyɛtshi te wadjɛnde ladjɛ ntapola wina efula djɛ ndɔngɔsɔla djokanelo djɛnde la Yehova ole la wadjɛnde. Wina wakɔnge? Ntondo ntondo, nde ladjɛ ndjawola ante alekɔ la nkambo dj’ekekete efula. Lako kaanga ekete kɛmɔ kisama lá wiso wa Yehova. (Yee. 44:21; Los. 12:14; Heb. 4:13) Dj’ape, nde ladjɛ ntshika nyɔkɔla wadjɛnde la ntshikitanyɛ eyalelo kɛnde. (Woo. 28:13) Dj’asato, nde ladjɛ ndɔmba wadjɛnde la Yehova imeyelo la nangha la wolo dj’iwɔ ndowimeyɛ. (Ele. 3:19) Nde ladjɛ mbɔnda Yehova djɛ ndɔpɛyɛ mposɛ kɛ nde ntshikitana la ndokotshɛ́ djɛ nde ndenda tokanyi, etepela la nanghedji djɛnde. (Yee. 51:10-12; 2 Kɔ. 10:5; Flp. 2:13) Dj’anɛyi, nde ladjɛ nangha akambo lá nkilika ndɔmbɔ yɛnde má ndjeka djɛ ntona topo tonkfumɔ tɔ akambo wa lopango la etepela wɛ lɔlɛngɔ. (Yee. 97:10) Dj’atano, nde ladjɛ ndɔmba ipa ntshatshimba okotshɔ wɔ alami wa ngandji w’otshumano. (Dja. 5:14-16) Dj’asamalo, nde ladjɛ nangha nonghanyi kengokotshɛ́ dj’ipa nde ndɔkfɔ lá eyalelo kɛ nghɔsɔ lonkina. Wome wolenda asango wɛnyɛ anto enghanghunya ladjɛ ndɔnda wina wakɔ amɔ. Yehova angosakola welo wilande djɛ ntshikitanyɛ ɛkɔmɔ kɛnde. (Yee. 37:5) Koko ape ngo ntsha wome ambotshika ɛkɔmɔ kɛ nshiyɛ wadji onkfunda, ete koko amboshiya. Nde ladjɛ ndjeka wopo wɔ mpɛyɛ wadjɛnde onkfunda. Okokande nangha nghɔsɔ ngete mo?
WOPO WƆ MPƐYƐ WADJƐKO ONKFUNDA LA LOMO
15. Wome okokande nyɛnyɛ wadjɛnde ngandji ngete mo?
15 Ɛnyɛnde ngandji. Wananyɔ amɔtshi walekɔ́ la wadji wambɔsá enkfumbo kɛ nangha lofu lonkfumɔ ekete kɛmɔtshi djɛ nyɛnyɛ wadji wawɔ ambɔ iwɔ ndakɔpaka efula. (1 Dj. 3:18) Wome nkoka nyɛnyɛ wadjɛnde ngandji má topo tɔmɔtshi tɔ daambi, ete ngo má ndokota lá nkatshi kana má ndɔpɛyɛ bizɛ. Nde nkoka ndofunela mesajɛ ante “ombontshika lá olengedji” kana ndoowopola ante “mo, lofu lotahete ngo wɔlɔ?” Winá la winá, akoka ndoshimela totepela tɛnyɛ ente nde ndɔkɔpaka má ndofunela lá nkishi kana lá kartɛ totepela tɔ mbɛmbɛ. Winá wɔ wome onanghande akambo wasɔ, angɔpɛyɛ wadji onkfunda la angokembɛ bala djɛwɔ.
16. Ladjikɛnge wome oyɛnde ladjɛ numɛ wadjɛnde?
16 Edjɛnde mbala la mbala. Mpame k’ila wadji onkfunda ndɔwɔsaka l’odjito la ndokembɛka. Wopo ɔmɔtshi wɔ nangha nghɔsɔ nde má ndowandjɛka lá nkambo nkfumɔ dj’onanghande djɛ nsuka womɛnde. (Kɔl. 3:15) Winá wome olumɛnde wadjɛnde l’oloko ɔmɔ, angɔpɛyɛ osasa. Anghɛna ante wome ɔkɔpa, olumɛ la bala djɛnde mpangovɔ.—Woo. 31:28.
17. Wopo wɔkɔnge wome okokande nyɛnyɛ wadjɛnde dilɛmɛlɔ?
17 Yala onto wɔlɔ ole la dilɛmɛlɔ. Mpame kɛkɔpa wadjɛnde ndɔwɔsaka l’odjito la ndɔmɔkamɔkɛka. Nde ndɔwɔsaka ete ngo opapɛyɛ wɔ ntsho wɔ Yehova. (Woo. 18:22; 31:10) Eposelo wengoyala nde, angonanghela akambo l’oloko wɔlɔ ole la dilɛmɛlɔ, kaanga lá winá w’osangawɔ mbeto. Apakoke ndotshinda la wolo djɛ nangha akambo wa ndopakɔpɛ, wokande olando efula, wɛnande ete ngo okesola, kana wakɔta nkfum’oloko kɛnde winá w’osangawɔ mbeto. f Angonangha lonkina la wolo djɛ nama nkfum’oloko kɛ piyɔɔ lá wiso wa Yehova.—Ele. 24:16.
18. Wame oyɛwɔ ladjɛ ndjila welo djɛ nangha nge? (Lenda ipapango “ Wepo ɛnɛyi wɛ ndjala wome wolekɔ́ la dilɛmɛlɔ.”)
18 Wame, nyoyale l’eshikikelo ente Yehova nyɛnaka la nkɔpaka welo w’onanghanyo djɛ mpɛyɛ wadji wanyo onkfunda lá akambo ankfumɔ wa lowiko. Nyonanghe la wolo djɛ ndalumɛ má ntshika nkɔmɔ dj’ashiyɛ onkfunda, la má ndjala l’oloko wɔlɔ, la dilɛmɛlɔ, ole la ngandji. Má nangha nghɔsɔ, nyongawɛnyɛ ente nyo ndakɔpaka la walekɔ l’odjito le nyo. Nyile wadji wanyo onkfunda, ko nyongowomba djokanelo djɛnyo deka djonyi—ilongo yɛnyo la Yehova.—Yee. 25:14.
YEEMBO 131 ‘Kɛnɛ kɛ Ndjambe ndamamanyɛ’
a Wame wangowa wapɔ efula má mbala djamba “Ɔngɔsake amato etengo Yehova awɔsande?” lá Etange k’Olami, Ngɔndɔ kɛ ntondo 2024.
b Amato wa yombokesola nkoka mba wapɔ má mbala djamba “De l’aide pour les victimes de violences conjugales” lá “Wamba ankina,” lá ɔnɔngɔ wɔ wamba wa jw.org la lá JW Library®.
c DJƐ NDJOKA WƆLƆ: Lá “Etepela wɛ nyɛtshi kana wɛ lɔlɛngɔ” tokoka ndjila ole etepela wɛnɛ: Ntola wadji atoyi w’olando, ndonangha kana ntepela winá enkfumɔ nyɛtshi lá nkambo djɛnde. Nshimela wadji otepela wɔ nyɛtshi, wɔkɔta, wolekɔ́ ete ngo vundo kana ntoyi oyɛwɔ nde yopo imɔtshi yɛ ndɔnyɔkɔla.
d Lenda lá jw.org la lá JW Library djamba “La pornographie peut briser votre couple.”
e Omoto wolekɔ́ la wome wolenda asango wɛnyɛ anto enghanghunya nkoka mba wapɔ má djamba “Okokɛ nangha mo ntsha womɛko angolendake asango wɛnyɛwɔ anto enghanghunya?” lá Etange k’Olami kɛ Ngɔndɔ k’enanɛyi 2023.
f Bible mpatepela akambo la nanghedji nkfumɔ dekɔ́ piyɔɔ la dekɔ́ mbindo lá wopo wɔ wadji la wome okokawɔ nsanga mbeto. Antshukami w’Akristo ankfumɔ ladjɛ ndɔsa nkano djɛ nangha kɛnɛ kɛnyɛ ente walɛmɛyɛ nkano djɛwɔ djɛ mpɛyɛ Yehova lomo, dj’asasangɛ iyape kɛkɔ, la djɛ ndjala la nkfum’oloko kɛ piyɔɔ. Lá ndenda wɔlɔ, antshukami wapakoke ntepela akambo wa iseke yɛ bala djɛwɔ wasɔ l’anto ankina.
g NSAKISO KƐ NTSHANGO: Mpame kɛmɔtshi kepalekɔ́ Owakɛ kekamba la wɔnanyɔ, asɛsa ndɔwɛnyɛ asango wɛnyɛ anto enghanghunya lá jurnalɛ.
