DJAMBA DJƐ WEKELO 5
YEEMBO 108 Ngandji kɛ nkɔmano kɛ Ndjambe
Wapɔ wowaso má ngandji kɛ Yehova
‘Kristo Yeso ayɛka lá andja djɛ ndowikɛ ananghi wa mpekanto.’—1 TI. 1:15.
IKANYI YƐ DJAMBA
Wopo w’okokaso mba wapɔ má oshinga wɔ mbendo la wopo w’okokaso nyɛnyɛ Yehova djedjɛ djɛso.
1. Oyɛso ladjɛ nangha nge djɛ nsasangɛ Yehova?
KOKANELA djɛ ɔmbɔpɛyɛ onto wɔkɔpɛ ekete kɛ oshinga wolo, kɛ wɔlɔ efula la kɛ djonyi. Lá nsɔsɔlɔ ongoka yɛnyi efula ntsha onto wɔkɔ ambokadjɛ ekete kɛkɔ lá mvulu ko apilaka yimba lonkina! Lá lɛdji lotshikitanyi, ongoka osasa efula ntsha onto wɔkɔ akamba la ekete kɛkɔ lá wopo wɔ wɔlɔ la ɛnyɛ ante asasanga la ekete kɛkɔ. Olakanyelo wowaso nge? Yehova alambolaka Wɔnande lá nkambo djɛso. Ɔsɔ ngo Yehova ndongoyala l’osasa winá wɔ ndɔngɔtɛna tɛnyɛ djedjɛ lá opapɛyɛ wɔsɔ la lá ngandji kɛnde kotshindisá djɛnde mfuta oshinga wɔ mbendo!—Dj. 3:16; Ɔrɔ. 5:7, 8.
2. Ɛnaso lá djamba djɛnɛ lɔ nge?
2 Koko l’ilá k’etsho, tokoka ndɛna ente oshinga wɔ mbendo wopalekɔ la ntshina. Alekɔ ngo ngete nkadjɛ opapɛyɛ wɔ Ndjambe lá mvulu. Tolekɔ l’osasa wɔ mba opapɛyɛ wɔsɔ, koko iso ladjɛ nama lá wɔɔngɔ wɔso. Dj’ipa iso ndookadjɛ lá mvulu, iso ladjɛ mvungolaka mbala la mbala djedjɛ djɛso lá kɛnɛ kɛ Ndjambe la Kristo yatonanghela. Djamba djɛnɛ ngotokotshɛ́ djɛ nangha nghɔsɔ. Tɔnghɛna wopo w’okokaso mba wapɔ m’oshinga wɔ mbendo má winá wɔsɔ la l’etsho weyaye. Tɔnghɛna wopo w’okokaso ndjelola la djedjɛ nkfumɔ lá ngandji kɛ Yehova, pekapeka lá eleko kɛ Bokfɔ.
WAPƆ WOWASO WINÁ WƆSƆ
3. Wapɔ ɔmɔtshi wɔkɔnge wowaso m’oshinga wɔ mbendo winá wɔsɔ?
3 Tomboshiyɛka mba wapɔ má olambo w’oshinga wɔ mbendo wɔ Kristo. Ndjɔmbɔmba, mpeyi m’oshinga wɔ mbendo, Yehova ntimeyɛka mpekanto yɛso. Lako onto wotshindisá djɛ nde ntimeyɛ la wolo. Nde ndeke l’ɔkɔpisá. La djedjɛ nkfumɔ ondjombe atshumbaka ante: ‘Ladjikɛnde, Ee Yehova, wɛ olekɔ onto wɔlɔ la entshupa djɛ nyimeyɛ.’—Yee. 86:5; 103:3, 10-13.
4. Yehova ndapɛyɛ oshinga wɔ mbendo lá nkambo dj’anto akɔna? (Luka 5:32; 1 Timɔte 1:15)
4 Anto amɔtshi nkoka nyɛna ambɔ wapɛdje Yehova ndaawimeyɛ. Lá nsɔsɔlɔ, isankfumɔ tɔpɛdje nyimeyama. Ɔpɔstɔlɔ Poolo atepelaka nkambo djɛsɔ ante: ‘Lemi mpɛlama ndjetama ɔpɔstɔlɔ.’ Koko akfɛka ante: ‘Má wɔlɔ w’ipa wɔsɔdjɔmba wɔ Ndjambe ndeke oyɛmi wopo w’oyɛmi.’ (1 Kɔ. 15:9, 10) Winá wolapɛlaso má mpekanto yɛso, Yehova ntimeyɛka. Lamo? Mande ape tɛdje djɛnde ntimeyɛ, koko ladjikɛnde nde ntɔkɔpaka. Ntsha otshimba yimba l’ikanyi yɛ ente ɔpɛdje nyimeyama, vungɔ ente Yehova apɛyɛka oshinga wɔ mbendo, ape lá nkambo dj’anto wapananghe mpekanto koko lá nkambo dj’ananghi wa mpekanto walapɛla.—Wala Luka 5:32; 1 Timɔte 1:15.
5. Onto ɔmɔtshi nkoka mfuna ante nde ɛdje djɛ Yehova ndowimeyɛ? Pakisola.
5 Lako kaanga onto ɔmɔ l’anteyi kɛso wokoka ntepela ante nde ɛdje Yehova ndowimeyɛ kaanga ntsha ambookambelá ɛnɔnyi efula. Lá nsɔsɔlɔ Yehova ndɔsaka la ntshina akambo wa wɔlɔ wa sombonanghela. (Heb. 6:10) Nde atɔpɛyɛka Wɔnande ofele, koko ape ete ngo lofuto l’olemo w’okambelaso. Ntsha tofuna ente iso tɛdje nyimeyama kana ente nde ladjɛ ntɔsa lá lɛdji lotshikitanyi, lá nsɔsɔlɔ otepelaso nde ente Kristo ndavu ngo ovɔvɔ, iso topalekɔ la djonyi djɛ oshinga wɔ mbendo.—Ɛdjɛ la Ngalatiya 2:21.
6. Lamo Poolo ndakambe la wolo efula l’olemo wɔ Yehova?
6 Poolo ewaki ante nde apɛdje Ndjambe ndowimeyɛ. Ko lamo ndakambe la wolo efula l’olemo wɔ Yehova? Ape djɛ nde nyɛnyɛ ante ɛdje nyimeyama, koko djɛ nyɛnyɛ djedjɛ djɛnde lá wɔlɔ w’ipa wɔsɔdjɔmba wɔ Yehova. (Ɛfɛ. 3:7) Ete ngo Poolo, tokindjɛ nkamba l’otshilo, ape djɛ Yehova ntoka djandji, koko djɛ ndɔwɛnyɛ djedjɛ djɛso.
7. Wapɔ onkina wɔkɔnge wowaso winá wɔsɔ m’oshinga wɔ mbendo? (Ɔrɔma 5:1; Djakɔbɔ 2:23)
7 Wapɔ onkina wowaso m’oshinga wɔ mbendo winá wɔsɔ nde onto l’onto nkoka ndjala la djokanelo djɛ ma ma la Yehova. a Ete ngo satepela lá djamba mboheta, winá w’owotshɔso topalekɔ la djokanelo la Ndjambe. Koko mpeyi má oshinga wɔ mbendo, tokoka nsasanga la ‘vu djɛ Ndjambe’ ole tokoka ndjala imfuka la nde.—Wala Ɔrɔma 5:1; Djakɔbɔ 2:23.
8. Lamo oyɛso ladjɛ ndjala la djedjɛ te Yehova lá mpeyi kɛ lɔlɔmbɔ?
8 Tokolenda ekete kɛmɔtshi kɛ djonyi k’onanghaso má ndjala la djokanelo la Yehova—mpeyi kɛ ndɔlɔmba. Yehova ndjokaka enkambi wɛnde ape ngo winá w’ɔlɔmbawɔ l’eloyi toko, koko ole winá wɔ onto l’onto l’anteyi kɛso ɔlɔmbande. Lɔlɔmbɔ nkoka ntshutɛ eloko wɛso la ntɔpɛyɛ vu djɛ yimba, djeleka bɔki nkfumɔ dj’okokaso ndɔsa. Lokoka nkembɛ djokanelo djɛso la Ndjambe. (Yee. 65:2; Dja. 4:8; 1 Dj. 5:14) Winá wɔ ndayalaka lá looko, Yeso alɔmbaki mbala efula ladjikɛnde ewaki ante Yehova owokaki, la mande lɔlɔmbɔ lokembɛki djokanelo djɛnde nya Papa kɛnde. (Luka 5:16) Ɔsɔ ngo oyɛso la djedjɛ, mande mpeyi l’olambo wɔ Yeso, tokoka ndjala tolongo tɔ Yehova la kaanga nsawola lande lá lɔlɔmbɔ!
WAPƆ WƐ SONGOWA L’ETSHO WEYAYE
9. Wopo wɔkɔnge enkambi wɛ nkɔmano yongowa wapɔ m’oshinga wɔ mbendo l’etsho weyaye?
9 Wopo wɔkɔnge enkambi wɛ nkɔmano wɛ Yehova yongowa wapɔ má oshinga wɔ mbendo l’etsho weyaye? Wangowa lowiko l’etshinda. Anto efula mfɛnyɛka ambɔ kɛsɔ kepakoke nanghema ladjikɛnde má andɛlɛ la andɛdji anto ovɔkawɔ ngo mvɔ. Koko ikanyi yɛ Yehova yɛ má banga banga yayale nde djɛ anto mbika lotshinda lotshinda. Adama ndotasamba nangha mpekanto, ntshimi lako onto wotafɛnyɛ ante lowiko l’etshinda oyɛwɔ nde dɔ. Kaanga nghɔsɔ, ndjalaka ndambo wolo djɛ nkanela ente tongowika etshinda etshinda, koko tawola mande tewa ente Yehova afutaka oshinga wɔ wolo efula—lowiko lɔ Wɔnande djɛ nkambo djɛsɔ nanghema.—Ɔrɔ. 8:32.
10. Ankfutami w’avuta la ɛnkɔkɔ enkina okongawɔ l’oloko lukuluku nge?
10 Kaanga lowiko l’etshinda oyɛwɔ l’etsho weyaye, Yehova nkɔpaka iso nkanela nkambo djɛkɔ má winá wɔsɔ. Ankfutami w’avuta wakonga lowiko lɔ wɔlɔ efula l’olongo winá wɔ yɔngɔlɔndjɛ looko esanga la Kristo. (Ndj. 20:6) Ɛnkɔkɔ enkina wakonga djɛ ntshungɔ má yɛnyi la ndjolo djɛ ndowika lá paradiso kelá looko. (Ndj. 21:3, 4) Oyɛ nde ɔnkɔkɔ onkina wolekɔ́ la nkongi djɛ ndowika lá looko? Ɔsɔ apalekɔ lofuto lɔkɔpɛyɛwɔ djɛ nkovumbɛ! Onto onkfumɔ ndatongama nde djɛ ndowika lá looko. Mbika lá looko angɔtɔpɛyɛ osasa wɔ sopewe ndjɛdjɛ.
11-12. Esako ɛmɔtshi wɛkɔnge wɛ Paradiso w’okokɛ nkanela má winá wɔsɔ? (Lenda asango.)
11 Kokanela wopo wɔ lowiko yongoyala lá Paradiso kelá looko. Opangoka lonkina olando la nyɔyi wɔma. (Iza. 25:8; 33:24) Yehova angoshiyɛ mposɛ inkfumɔ yɛ nghongoka. Ekete kɛkɔnge kɛ nghongeka djɛ ndjewa? Amfulu l’anyama? Mpoma ankombe l’anghɔmɔ? Ntshula nkete kana nsanga asango? Ape l’ehamo tongoyala la djonyi djɛ atshudji, ampiki y’amvulu, la akambi y’awedji. Tongoyala lonkina la djonyi dj’anto wangokotshɛ́ l’elemo w’ɔlɔngɔswɛlɔ, olambelo wɔ nkete djɛ ndɛ, ntshula mpeko, ole nangha bolo djɛ wɛlɔ efula. (Iza. 35:1; 65:21) Lá ngongotawikaka etshinda etshinda, ongoyala la winá wɔ nangha akambo ankfumɔ wa nghɔngɔkɔpa.
12 Wole osasa songoka djɛ ndongola waangokfundɔ! (Ele. 24:15) Kokanela kankina osasa wɔ nghongoka, má ndjeka elemo wɛ nkamɔ wɛ Yehova w’etongelo. (Yee. 104:24; Iza. 11:9) Ladjiko djɛ nkete nkfumɔ, kokanela pekapeka osasa wɔ songoka djɛ ntɛmɔla Yehova ipa ndjala la kanele kanele kɛ nde ntimeyɛ lonkina! Okoka mpenghanyɛ esako weyaye wɛsɔ la ‘osasa wɔ winá emangha wimá mpekanto’? (Heb. 11:25) Okaka lako! Esako wɛsɔ wɛdje dj’iso ndásambɛ nkete efula winá wɔsɔ djɛ ndowa. Tovungɔ ente Paradiso kɛ lá looko kepangoyala lonkina ekete kɛ songokongaka winá enkfumɔ. Kengoyala edjena kɛ songowikaka winá enkfumɔ. Akambo wasɔ watasamba nanghema otasambawɔ Yehova ntɔkɔpa lá lɛdji l’efula má ntɔpɛyɛ opapɛyɛ wɔ Wɔnande!
Esako wɛkɔnge wɛ Paradiso wolekɛ nkongela l’oloko lukuluku? (Lenda itenyi 11-12)
TƐNYƐ ENTE TOLEKƆ LA DJEDJƐ LÁ NGANDJI KƐ YEHOVA
13. Wopo wɔkɔnge w’okokaso nyɛnyɛ djedjɛ lá ngandji kɛ Yehova? (2 Kɔrɛtɔ 6:1)
13 Wopo wɔkɔnge w’okokaso nyɛnyɛ djedjɛ l’oshinga wɔ mbendo wɔ Yehova ndapɛyɛ? Má mpetshɛ olemo wɔnde lá edjena kɛ ntondo lá lowiko lɔso. (Mat. 6:33) L’akambo ankfumɔ, Yeso avelaka ‘anto ankfumɔ dj’ipa anto wawika nkindjɛ mbika lá nkambo djɛwɔ yɔmɛlɛ, koko wawike lá nkambo dj’onto wavelisá la wokfundwisá.’ (2 Kɔ. 5:15) Topakombola nsɔsɔlɔ kaanga ndambo daambi nsamba nonghanyi kɔsisa Yehova má wɔlɔ wɔnde w’ipa wɔsɔdjɔmba kɛsɔ.—Wala 2 Kɔrɛtɔ 6:1.
14. Wopo wɔkɔnge wɛnyɛso djawo lá ɛlɔndjɛlɔ kɛ Yehova?
14 Tokoka lonkina ndjala la djedjɛ lá ngandji kɛ Yehova má ndjala la djawo lá ɛlɔndjɛlɔ kɛnde. Ngete mo? Winá wɔkɔpaso ndɔsa nkano, ete ngo djɛ ndjewa tii lá nkalasa kɛkɔnge kɔkɔpaso nkoma kana wopo w’olemo w’oyɛso ladjɛ ndjawola, iso ladjɛ nshishima kɛnɛ kɛ Yehova ɔkɔpande iso nangha. (1 Kɔ. 10:31; 2 Kɔ. 5:7) Winá wilaso djawo djɛso lá nanghedji, nkambo mɔtshi djɛ nkamɔ nanghemaka—djawo la djokanelo djɛso la Yehova nkembaka. Nkongi djɛso ndjetelaka ndjala wolo.—Ɔrɔ. 5:3-5; Dja. 2:21, 22.
15. Wopo wɔkɔnge w’okokaso nyɛnyɛ djedjɛ lá eleko kɛ Bokfɔ?
15 Wopo onkina wolekɔ w’okokaso nyɛnyɛ djedjɛ tá ngandji kɛ Yehova. Wopo wɔkɔ nde nkamba l’eleko kɛ Bokfɔ djɛ nyɛnyɛ Yehova tii lá lɛdji lɔkɔnge oyɛso la djedjɛ lá oshinga wɔ mbendo. Ladjiko dj’iso ndálɔngɔsɔla djɛ ndingela lá Bokfɔ, tokoka ndjeta anto ankina. (1 Ti. 2:4) Pakisola anto wetɛ kɛnɛ kengonanghema lá Bokfɔ. Ɔnghɛna ente alekɔ djonyi efula ndawɛnyɛ avideo wa jw.org wanɛ: Lamo Yeso ndavu? la Tovungɔke nyɔyi kɛ Yeso. Tokokolo ladjɛ ndáshikikɛ djɛ ndjeta waambɔlɛmba lá nyuma. Ɔsɔ ngo osasa wongoyala l’olongo la lá looko ntsha ɛnkɔkɔ wevungisá wɛ Yehova wambovundama l’oloko djɛ nkalɔ lá lokoto! (Luka 15:4-7) Lá Bokfɔ, totemoyanake ngo isoko isoko, koko temoyɛ anto wamboyɛ ntato la wambokfuka ndjɛ lá nsanghanyɛ. Iso nkɔpaka iwɔ nyɛna ambɔ tombalongola wɔlɔ!—Ɔrɔ. 12:13.
16. Lamo oyɛso ladjɛ ntɔnɔla djɛ ndapɛyɛ l’elemo wɛ nyuma lá eleko kɛ Bokfɔ?
16 Okoka nangha akambo efula wa nyuma l’eleko kɛ Bokfɔ? Nangha nghɔsɔ alekɔ yopo imɔtshi y’okokaso nyɛnyɛ djedjɛ lá kenkfumɔ kɛ Ndjambe la kɛ Kristo yatonanghela. Winá wolapɛyɛso efula lá olemo wɔ Yehova, ndeke songetela nyɛna okotshɔ wɔnde, ko eposelo wengoyala nde wɛkamo wɔso le nde wongetela nkemba. (1 Kɔ. 3:9) Kankina, ɔsa nonghanyi kɛ nkindjɛ la badji djɛko djɛ Bible djɛ eleko kɛ Bokfɔ ete ngo yombofunamá lá Toshishimake Afunelo lofu la lofu, kana lá nkishi djɛ losanghanyɛ. Okoka nsɔna djɛ ndjila avɛrse wakɔ ete ngo ɛtɛ wɛ wayi wɛ wekelo wɔko wɔ Bible.
17. Ekete kɛkɔnge kesasangɛ Yehova? (Lenda ipapango “ Wopo wɔ nyɛnyɛ djedjɛ lá ngandji kɛ Yehova.”)
17 Lá nsɔsɔlɔ, winá ɔmɔtshi opalekɔ l’akoka wa nangha akambo ankfumɔ wa sombotepela lá djamba djɛnɛ. Vungɔ ente Yehova apɛdjɛ kɛnɛ k’onanghɛ la kenangha anto ankina; ɛnande nde kɛnɛ kelekɔ́ l’oloko wɔko. Nde nsasangaka winá wɛnyɛ djedjɛ djɛ l’oloko ɔmɔ tá olambo wɔnde wɔ ntsho, oshinga wɔ mbendo.—1 Sa. 16:7; Mar. 12:41-44.
18. Lamo oyɛso la djedjɛ le Yehova Ndjambe la le Yeso Kristo?
18 Ngo mande oshinga wɔ mbendo wofutamaka ndeke mpekanto yɛso yombimeyama, sombokoma tolongo tɔ Yehova, la sombowa nkongi djɛ lowiko l’etshinda. Nyontshɔ winá onkfumɔ tɛnyɛ djedjɛ tá ngandji kɛ Yehova, kotshindisá djɛ ntɔpɛyɛ esako wɛsɔ. (1 Dj. 4:19) Tɛnyɛ djedjɛ djɛso lonkina le Yeso, kanga lɔtɔkɔpisá lombombe la lɔpɛyisá lowiko lɔnde lá nkambo djɛso!—Dj. 15:13.
YEEMBO 154 Ngandji kepashile
