1. Yehova otokembɛnde djɛ nangha nge?

NGANDJI kɛ nkɔmano kelekɔ djonyi efula le Yehova. (Oze. 6:6) Nde nkɔpaka edjinge iso ndɔsa djekeka djɛkɔ la djonyi efula. Má lotshimbo l’ɔprɔfɛtɛ Mika, Ndjambe kɛso ntokembɛka dj’iso nkɔpa djekeka djɛ ‘ngandji kɛ nkɔmano.’ (Mik. 6:8, nɔtɛ) Koko, lá ntondo k’iso ndonangha nkambo djɛsɔ, iso ladjɛ ndjewa kɛnɛ kesakisola ngandji kɛ nkɔmano.

2. Ngandji kɛ nkɔmano osakisolawɔ nge?

² Kɛkɔnge kesakisola ngandji kɛ nkɔmano? Itepela ‘ngandji kɛ nkɔmano’ ntanemaka etengo mbala 230 lá Bible—Ekadimwelo k’andja w’oyoyo. Yako osakisolawɔ nge? Lá nkilika ‘nsakiso yɛ totepela telá Bible’ t’otanaso lá ekadjimwelo kɛ Bible kɛkɔ, ‘itepela yɛsɔ ndendanaka la ngandji ketshindama má ndapɛyɛ l’oloko ɔmɔ, la nkɔmano, edjinge la omamanelo wɔ wolo. Wangokambake la itepela yɛsɔ mbala efula djɛ nyɛnyɛ ngandji kɛ Ndjambe te anto, la lonkina ngandji kɛ l’antenyɛ anto iyɔmɛlɛ.’ Yehova alekɔ ndjɔmbɔmba keleka wɔlɔ lá kɛnɛ kelendana la ngandji kɛ nkɔmano. Lá djamba djɛnɛ, tɔngɛna wopo wɔ Yehova ɛnyɛkande anto ngandji kɛnde kɛ nkɔmano. Lá djamba djɛwɔlama, tɔngɛna wopo wɔ etengo oyɛso enkambi wɛ Ndjambe, okokaso ndjokola Yehova má nyɛnyɛ anto ankina ngandji kɛ nkɔmano.

3. Wopo wɔkɔnge Yehova ndoyawisola nyɔmɛlɛ le Mɔsɛ?

³ Lako ndjala ilá m’ɔkɔngɔ w’Oposelo w’ase Isariyɛlɛ m’Edjipito, Yehova ayawisolaka nyɔmɛlɛ le Mɔsɛ má ndoshimela djiina djɛnde la wekeka wande. Nde atepelaka ante: ‘Yehova, Yehova, Ndjambe kɛ nkɛtshi la k’okana ndjandji, kepomala nkɛlɛ lankeke la kembolola kfuu la ngandji kɛ nkɔmano edjinge la nsɔsɔlɔ, kɛnyɛka ngandji kɛnde kɛ nkɔmano te nunu djɛ nsɔkɛ, ketimeyɛka  evunga, nyɛtshi la mpekanto.’ (Epo. 34:6, 7) La etepela wɛ wɔlɔ wɛsɔ, Yehova ashimelaka Mɔsɛ nkambo mɔtshi djɛ djonyi efula lá kɛnɛ kelendana la ngandji kɛ Nde kɛ nkɔmano. Nkambo djɛkɔnge djɛsɔ?

4-5. a) Wopo wɔkɔnge Yehova otepelande lá nkambo djɛnde nyɔmɛlɛ? b) Weepó wɛkɔnge wɔkɔpasɔ nshishima?

⁴ Yehova atepelaka lá nkambo djɛnde nyɔmɛlɛ ape etengo onto wolekɔ la ngandji toko koko etengo onto ‘wombolola kfuu la ngandji kɛ nkɔmano.’ Totepela tɔsɔ ntanemaka lá Bible ndekana mbala isamalo. (Ew. 14:18; Nɛh. 9:17; Yee. 86:15; 103:8; Yɔw. 2:13; Yɔn. 4:2) Lá mbala yɛkɔ inkfumɔ, totepela tɔsɔ ndendanaka ngo la Yehova, koko ape l’onto. Ape, eloko wɛso wekotama lá wopo wɔ Yehova opikande nghɔmɔ ɛnsɔsɔ la wolo onkfumɔ lá nkambo djɛ djekeka djɛnde djɛ ngandji kɛ nkɔmano? Ape l’ehamo, tɛna ente ngandji kɛ nkɔmano kelekɔ djonyi efula lende. * Djɛkondeke Nkfumi Davidɛ ndatshindama djɛ ntepela ante: ‘Yehova, ngandji kɛko kɛ nkɔmano nkomaka tii l’olongo . . . Ndjambe, ɔsɔngo ngandji kɛko kɛ nkɔmano oyɛwɔ la ntshina! Lá ntshitshi k’apafu wako, ndeke wana w’anto isamakawɔ.’ (Yee. 36:5, 7) Ongɔkɔpake ngandji kɛ nkɔmano kɛ Ndjambe efula etengo Davidɛ?

⁵ Dj’iso ndeka nsipisoyɛ kɛnɛ kɛ ngandji kɛ nkɔmano osakisolawɔ, nyontshɔ tokoshishima weepó epe wɛnɛ: Te anto wakɔna Yehova ɛnyɛkande ngandji kɛnde kɛ nkɔmano? Ko wopo wɔkɔnge w’okokaso mba wapɔ má nanghedji djɛ ngandji kɛ nkɔmano kɛ Yehova?

6. Te anto wakɔna Yehova ɛnyɛkande ngandji kɛ nkɔmano?

⁶ Te anto wakɔna Yehova ɛnyɛkande ngandji kɛnde kɛ nkɔmano? Bible ntepelaka ante iso nkoka nkɔpa nkete efula, ndjɔmbɔmba ‘bedji,’ ‘waaná l’avuta,’ ‘dilanyɛ,’ ‘balo,’ ‘yimba,’ la nkete nkina efula. (2 Ɛk. 26:10; Woo. 12:1; 21:17; 29:3) Koko, wapayalaka la ngandji kɛ nkɔmano tá nkete, koko ngo te anto. Koko lonkina, Yehova apayalaka la ngandji kɛ nkɔmano te onto ngo onto. Nde nyɛnyɛka ngandji kɛsɔ ngo te wanɛ walekɔ la djokanelo djetshikitanyi la nde. Ndjambe kɛso alekɔ la nkɔmano te tolongo tɔnde. Nde alekɔ l’ikanyi yɛ wɔlɔ lomombe lá nkambo djɛwɔ, edjinge apatshikaki ndaakɔpa.

7. Wopo wɔkɔnge Yehova ndɛnyɛ ante nde ndjokaka wepo w’anto ankfumɔ ngandji?

⁷ Yehova ndjokaka onto onkfumɔ ngandji. Yeso ashimelaka mpame kɛmɔtshi ketawɔ Nikɔdɛmɛ ante: ‘Ladjikɛnde Ndjambe akɔpaka andja [anto] lá lɛdji l’efula ndeke ndaapɛyɛ ɛtɔyi kɛ Wɔnande wɔ ndawote, djɛ onto onkfumɔ  woyala la djawo tende atavɔke koko awa lowiko l’etshinda.’​—Dj. 3:1, 16; Mat. 5:44, 45.

8-9. a) Lamo Yehova ɛnyɛkande ngandji kɛnde kɛ nkɔmano te enkambi wɛnde? b) Kɛkɔnge k’ɔkɔpaso nyɛna lonkina?

⁸ Etengo sotepelaki ndambo má djiko, Yehova nyɛnyɛka ngandji kɛnde kɛ nkɔmano ngo te wanɛ walekɔ la djokanelo djɛ ma ma lande, ntepela ente enkambi wɛnde. Kɛsɔ nyɛnamaka papoo má kɛnɛ ketepelisa Nkfumi Davidɛ nya ɔprɔfɛtɛ Danyɛlɛ. Ndjɔmbɔmba, Davidɛ atepelaka ante: ‘Kindjɛ nyɛnyɛ ngandji kɛko kɛ nkɔmano te wanɛ wakewa.’ ‘Ngandji kɛ nkɔmano kɛ Yehova ntshikalaka lotshinda te wanɛ wowoka wɔma.’ Lonkina Danyɛlɛ atepelaka ante: ‘Wɛ Yehova Ndjambe kɛ nsɔsɔlɔ, [kanga] lɛnyɛka ngandji kɛ nkɔmano te wanɛ wɔɔkɔpa la wakindjɛ nɛmɛyɛ ɛlɛmbɛ wɛnde.’ (Yee. 36:10; 103:17; Dan. 9:4) Lá nkilika etepela wefunamisa má nyuma k’ekina wɛsɔ, Yehova nyɛnyɛka ngandji kɛnde kɛ nkɔmano te enkambi wɛnde, ladjikɛnde iwɔ ndowokaka wɔma, ndɔkɔpaka, la namaka ɛlɛmbɛ wɛnde. Yehova nyɛnyɛka ngandji kɛnde kɛ nkɔmano ngo te enkambi wɛnde, antɛmɔdji yɛnde yɛ nsɔsɔlɔ.

⁹ Ntondo k’iso mbanga nkambela Yehova, Nde ntokaka ngandji k’okakande anto ankfumɔ. (Yee. 104:14) Koko, winá w’okomaso enkambi wɛnde, nde ntɛnyɛka lonkina ngandji kɛnde kɛ nkɔmano. Lá nsɔsɔlɔ, Yehova nshikikɛka enkambi wɛnde ante: ‘Ngandji kɛmi kɛ nkɔmano kepimaki me nyo.’ (Iza. 54:10) Etengo Davidɛ nyɔmɛlɛ ndasipisoyɛ, ‘Yehova angonanghela onkambi wɔnde wɔ nkɔmano akambo lá yopo yetshikitanyi.’ (Yee. 4:3) Wopo wɔ Yehova otonanghelande akambo lá yopo yetshikitanyi, okokawɔ ntotshinda djɛ nangha nge? Ontshumbi yeembo afunaka ante: ‘Onto onkfumɔ wolekɔ la balo angoshishima akambo wasɔ la angoshishima la nkɔmɛ nkfumɔ nanghedji djɛ Yehova djɛ ngandji kɛ nkɔmano.’ (Yee. 107:43) La dako djɛ wɔlɔ djɛsɔ lá wɔɔngɔ, nyontshɔ tolende topo tosato tɔ enkambi wɛ Yehova owakawɔ wapɔ má nanghedji djɛnde djɛ ngandji kɛ nkɔmano.

10. Wopo wɔkɔnge ngandji kɛ nkɔmano kɛ Ndjambe ketshikalaka lotshinda otokotshɛwɔ? (Yeembo 31:7)

¹⁰ Ngandji kɛ nkɔmano kɛ Ndjambe ntshikalaka lotshinda. Nkambo djɛ djonyi djɛsɔ djelendana la ngandji kɛ nkɔmano kɛ Ndjambe  ntanemaka mbala 26 lá Yeembo 136. Towala má bango djɛ vɛrse djɛkɔ, ambɔ: ‘Nyokawoyɛ Yehova lokasa, mande nde alekɔ wɔlɔ, ngandji kɛnde kɛ nkɔmano kengotshikalake lotshinda.’ (Yee. 136:1) Má vɛrse 2 tii 26, iso ntanaka mpeto kɛnɛ: ‘Mande ngandji kɛnde kɛ nkɔmano kengotshikalake lotshinda.’ Winá w’owalaso avɛrse ankina watshikala lá yeembo yɛkɔ, iso nkamɔka má topo efula tɔ Yehova ɔtɛnyɛnde ngandji kɛnde kɛ nkɔmano ipa l’ekomo. Mpeto k’ente ‘ngandji kɛnde kɛ nkɔmano kengotshikalake lotshinda’ ntoshikikɛka djɛ ngandji kɛ Ndjambe te anto wande kepatshikitanaka. Ɔsɔngo owaso lokembo má ndjewa ente Yehova apakadjɛka enkambi wɛnde la nkeke! Koko, winá wotateyɛnde nyɛnyɛ ngandji kɛnde te onto ɔmɔtshi wokambela, nde apotshike ayale kaanga lá deko djɛ ndjolo. Wopo w’owaso wapɔ: Ndjewa ente Yehova ntshikalaka lotshinda ma ma laso ntɔpɛyɛka osasa la wolo woyɛso la djonyi djɛ ndongela ekakasano wɛso la nkindjɛ nkɛnda lá mboka kɛ lowiko.​—Wala Yeembo 31:7.

11. Lá nkilika Yeembo 86:5, kɛkɔnge ketshinda Yehova djɛ nyimeyɛ?

¹¹ Ngandji kɛ nkɔmano kɛ Ndjambe ndotshindaka djɛ ntimeyɛ. Winá wɔ Yehova ɛnande onanghi w’ovunga amboyapɛla la ambotshika akambo wande wa nyɛtshi, ngandji kɛnde kɛ nkɔmano Ndotshindaka djɛ ndowimeyɛ. Ontshumbi yeembo Davidɛ afunaka lá nkambo djɛ Yehova ante: ‘Nde atatonanghela akambo lá nkilika mpekanto yɛso la nde atatofuta lá nkilika evunga wɛso.’ (Yee. 103:8-11) Davidɛ nyɔmɛlɛ okaka yɛnyi yeyalaka winá wɔ nkfum’oloko ɔwɛmbɛnde onto lowo. Koko nde ekaka lonkina djɛ Yehova alekɔ ‘entshupa djɛ nyimeyɛ.’ Kɛkɔnge k’etshinda Yehova djɛ nyimeyɛ? Nsakiso ntanemaka lá Yeembo 86:5. (Wala.) Ee, etengo Davidɛ ndatepela lá lɔlɔmbɔ, Yehova nyimeyɛka mande nde ndola kfuu la ngandji kɛ nkɔmano te onto onkfumɔ w’ɔlɔmba imeyelo.

12-13. Ntsha tokindjɛ ndakiyanyɛ efula lá nkambo dj’evunga wɛso wɛ ntondo, kɛkɔnge kengotokotshɛ?

¹² Winá w’onanghaso ovunga, ɛdje edjinge alekɔ wɔlɔ, ndakiyanyɛ lá kɛnɛ kɛ sombonangha. Okiyano wɔsɔ nkoka ntotshinda djɛ ndapɛla edjinge ntapola wina wakoka ntokotshɛ djɛ ndɔngɔsɔla evunga wɛso. Koko, enkambi wɛ Ndjambe ɛmɔtshi nkindjɛka ndakiyanyɛ efula lá nkambo dj’evunga w’iyananghe wembohetaka. Wangokindjɛke nkanela ambɔ Yehova apangawimeyɛ ayale kaanga wambɔlɔmba imeyelo, la  wambotshika nangha nyɛtshi. Ntsha onana la tokanyi tɔ nghɔsɔ, ndjewa ente Ndjambe alekɔ entshupa djɛ nyɛnyɛ ngandji kɛ nkɔmano te enkambi wɛnde, angokokotshɛ.

¹³ Wopo w’owaso wapɔ: Kaanga oyɛso anto wa ntshamba djɛ djɔ, iso nkoka nkambela Yehova l’osasa onkfumɔ la nkfum’oloko kɛ piyɔɔ. Nkambo djɛsɔ nkoka nanghema ladjikɛnde ‘ekila wɛ Wɔnande Yeso ntɛdjɛka piyɔɔ m’evunga enkfumɔ.’ (1 Dj. 1:7) Ntsha ɔmbɔlɛmba m’ɔtɛ w’ovunga ɔmɔtshi, vungɔ ente Yehova alekɔ entshupa djɛ nyimeyɛ, ee djɛ nyimeyɛ onanghi w’ovunga woyapɛla. Kolenda wopo wɔ Davidɛ ɛnyɛnde djokanelo djelekɔ lantenyɛ ngandji kɛ nkɔmano la imeyelo. Nde afunaka ante: ‘Etengo olongo la looko yombowangɔ otale, nghɔsɔ ndeke lolekɔ ekekete kɛ ngandji kɛ nkɔmano kɛnde te wanɛ wowoka wɔma. Etengo ɛkɛɛlɔ la edjimbelo kɛ winá yombowangɔ otale, nghɔsɔ ndeke ndombowangoyɛ evunga wɛso otale laso.’ (Yee. 103:11, 12) Lá nsɔsɔlɔ, Yehova alekɔ entshupa djɛ ‘nyimeyɛ l’oloko ɔmɔ.’​—Iza. 55:7.

14. Lá lɛdji lɔkɔnge Davidɛ ndɛnyɛ wopo wɔ ngandji kɛ nkɔmano kɛ Ndjambe otolamawɔ?

¹⁴ Ngandji kɛ nkɔmano kɛ Ndjambe ntolamaka lá nyuma. Lá lɔlɔmbɔ lɔnde te Yehova, Davidɛ atepelaka ante: ‘Wɛ olekɔ edjena kɛmi kɛ djisa, wɛ onghonama lá ndjolo. Wɛ onghondjinga la tɛndjɛ t’osasa tɔ etshungwelo. . . . Onto woyawɛkɛ te Yehova ndjingamaka la ngandji kɛ Nde kɛ nkɔmano.’ (Yee. 32:7, 10) Etengo mpele dj’angando yɛ ntondo yalamaka anto me antonyi wawɔ, nghɔsɔ ndeke ngandji kɛ nkɔmano kɛ Yehova otolamawɔ má ekakasano wekoka ndjila nkɔmano djɛso lá mbalaka. Lonkina, ngandji kɛ nkɔmano kɛ Yehova ndotshindaka djɛ ntosepa tende.​—Jɛr. 31:3.

15. Djokanelo djɛkɔnge djelekɔ l’antenyɛ ngandji kɛ nkɔmano kɛ Yehova la djisa edjinge la isamelo?

¹⁵ Davidɛ akambaka l’itepela inkina yɛnyɛ wopo wɔ Ndjambe olamande anto wande. Nde afunaka ante: ‘Ndjambe alekɔ djisa djɛmi djɛ nsɔsɔlɔ, Ndjambe kɛnyɛnyɛka ngandji kɛ nkɔmano.’ Davidɛ afunaka lonkina lá nkambo djɛ Yehova ante: ‘Nde ndeke ngandji kɛmi kɛ nkɔmano edjinge isamelo kɛmi, djisa djɛmi djɛ nsɔsɔlɔ edjinge kanga lombikɛka, nguwa kɛmi la kanga loyawisami tende.’ (Yee. 59:17; 144:2) Lamo Davidɛ ɛdjɛnde ngandji kɛ nkɔmano kɛ Yehova la djisa edjinge l’isamelo? Ayale ntshuku djɛkɔnge djɛ looko dj’oyalaso, winá enkfumɔ wɛ songotshikalaka enkambi wɛnde, Yehova angɔtɔpɛyɛka elamelo k’oyɛso lakɛkɔ djonyi djɛ nama djokanelo dj’ɛso lande. Etepela wetoshikikɛ wɛsɔ ntanemaka lonkina lá Yeembo 91. Onfuni wɔ yeembo yɛsɔ atepelaka ante: ‘Lemi langoshimela Yehova ente: ‘Wɛ ndeke djisa djɛmi la isamelo kɛmi.’’ (Yee. 91:1-3, 9, 14) Mɔsɛ akambaka l’etepela wɛkɔ ɛmɔ lá nkambo djɛ djisa. (Yee. 90:1, nɔtɛ) Lonkina, t’ekomo kɛ lowiko lɔnde, Mɔsɛ asepaka ikanyi lá nkambo mɔtshi djɛ djonyi. Nde afunaka ante: ‘Ndjambe alekɔ isamelo ntateyɛ m’etsho wɛ ntondo, ɛwɔ wɛnde wɛ lotshinda welekɔ l’anse kɛko.’ (Mvu. 33:27) Itepela y’ente ‘ɛwɔ wɛnde wɛ lotshinda welekɔ l’anse kɛko’ otolakanyɛwɔ nge lá nkambo djɛ Yehova?

16. Má topo tɔkɔnge tope t’ɔtshɔkwamakaso? (Yeembo 136:23)

¹⁶ Ntsha tombawola ente Yehova alekɔ Djisa djɛso, tongoyawokake ente tolekɔ lá vu. Koko, lá winá ɛmɔtshi tokoka ndawoka entengo tɔmbɔlɛmba la tombosolongɔ. Lá winá wɛ nghɔsɔ, kɛkɔnge kɛ Yehova otonanghelakande? (Wala Yeembo 136:23.) Nde angokitshɛ ɛwɔ wɛnde l’anse kɛso, angotemadjɛ ikɔkɛ ikɔkɛ tá djiko, la angotokotshɛ dj’iso mba wolo. (Yee. 28:9; 94:18) Wopo w’owaso wapɔ: Ndjewa ente iso nkoka ndawɛkɛ winá enkfumɔ tá osukɔ wɔ Ndjambe ntokotshɛka djɛ mvungɔ ente tɔtshɔkwama lá topo tope. Yopo yɛ ntondo, tolekɔ l’edjena kɛ djisa k’oyalakaso lá vu ayale l’edjena kɛkɔnge k’oyɛso. Yopo y’ape, Papa kɛso kel’olongo kɛ ngandji ntilaka yimba lombombe.

17. Eshikikelo kɛkɔnge kekoka ndjala laso lá nkambo djɛ ngandji kɛ nkɔmano kɛ Ndjambe? (Yeembo 33:18-22)

¹⁷ Etengo sɛnaki, winá wopomanaso l’ekakasano, iso nkoka ndashikikɛ ente Yehova angotokotshɛ dj’iso nkindjɛ ndjala la djokanelo djɛ wɔlɔ lande. (2 Kɔ. 4:7-9) Ɔprɔfɛtɛ Jɛrɛmi afunaka ante: ‘M’ɔtɛ wɔ ngandji kɛ nkɔmano kɛ Yehova ndeke sotáshilá, mande nkɛtshi kɛnde kepalekɔ l’ekomo.’ (Del. 3:22) Iso nkoka ndashikikɛ ente ngandji kɛ nkɔmano kɛ Ndjambe kengokindjɛka leso, ladjikɛnde ontshumbi yeembo atoshikikɛka ante, ‘wiso wa Yehova ndendaka wanɛ wowoka wɔma, wanɛ wakonga ngandji kɛnde kɛ nkɔmano.’​—Wala Yeembo 33:18-22.

18-19. a) Kɛkɔnge k’oyɛso ladjɛ nama lá yimba? b) Kɛkɔnge k’isɔngɛna lá djamba djeyaye?

¹⁸ Kɛkɔnge k’ɔkɔpaso nama lá yimba? Ntondo k’iso nkambela Yehova, iso mbaka wapɔ má ngandji kɛ Ndjambe k’okande wepo wanto ankfumɔ. Koko, winá wɔ sombokoma antɛmɔdji yɛnde, iso mbaka wapɔ lonkina má ngandji kɛnde kɛ nkɔmano. Má ngandji kɛsɔ, Yehova ntolongolaka la ɛwɔ wɛnde wɛ elamelo. Nde angotolamaka winá enkfumɔ w’oyɛso entshupa lande edjinge angokotshɛ alaka wande walendana laso. Nde nkɔpaka dj’iso ntshikala tolongo tɔnde lotshinda! (Yee. 46:1, 2, 7) Djɛkondeke, ayale okakasano wɔkɔnge wongopomana laso, Yehova angɔtɔpɛyɛ wolo w’oyɛso la djonyi djɛ nkindjɛ ntshikala la nkɔmano.

¹⁹ Tɔmbɛna wopo wɔ Yehova okande enkambi wɛnde ngandji kɛ nkɔmano. Lá wedji wɔso, nde ntɔlɔmbaka dj’iso ndjoka winaso ankina ngandji kɛkɔ kɛ nkɔmano. Wopo wɔkɔnge w’okokaso nangha nkambo djɛsɔ? Lá djamba djeyaye tongoshishima nkambo djɛ djonyi djɛsɔ.