1-2. Donga djɛ wɔlɔ djɛkɔnge dj’okotshɛso djɛ ndjokana ngandji kɛ nkɔmano l’anteyi kɛso?

TOLEKƆ la donga djɛ wɔlɔ djɛ ndjokana ngandji kɛ nkɔmano l’anteyi kɛso. Donga djɛkɔnge mɔtshi? Kolenda wopo wɔ woongo wemá Bible wawɔlama wanɛ okadjimolawɔ lá woopó wɔsɔ: ‘Tawolake djɛ ngandji kɛ nkɔmano la nkɔmano nkotshika. . . . Ko wɛ ongopomana la lokolo lɔ wɔlɔ la ongoyala la ntɔnɔ djɛ wɔlɔ lá wiso wa Ndjambe la w’anto.’ ‘Onto wɔ wɔlɔ ndawayelaka wapɔ.’ ‘Onto onkfumɔ wokilika sii la ngandji kɛ nkɔmano angowa lowiko.’​—Woo. 3:3, 4; 11:17, nɔtɛ; 21:21.

² Woongo wasɔ nyɛnyɛka donga ntshato dj’oyɛso ladjɛ ndjala la ngandji kɛ nkɔmano. Kɛ ntondo, ndjokana ngandji kɛ nkɔmano ntokotshɛka djɛ ndjala la ntshina lá wiso wa Ndjambe. K’epe, má ndjokana ngandji kɛ nkɔmano, iso ndawayelaka wapɔ. Ndjɔmbɔmba, iso nkɔpɛka tolongo tɔ lotshinda l’anto ankina. K’asato, ntsha iso nkindjɛ ndjokana ngandji kɛ nkɔmano tongowa ɛtshɔkɔ wɛ wɔlɔ efula l’etsho weyaye, ndjila edjinge lowiko l’etshinda. Lá nsɔsɔlɔ, tolekɔ la donga djɛ wɔlɔ djɛ nɛmɛyɛ mvungo kɛ Yehova kɛnɛ: ‘Nyonanghelanake akambo la ngandji kɛ nkɔmano edjinge la nkɛtshi.’​—Zak. 7:9.

3. Lá weepó wɛkɔnge w’ɔkɔpaso nkadjimola?

³ Lá djamba djɛnɛ, tongowa nsakiso lá weepó ɛnɛyi. Te wa na oyɛso ladjɛ ndjala la ngandji kɛ nkɔmano? Olakanyelo wɔkɔnge w’okokaso mba m’onkanda wɔ Oruta lá kɛnɛ kelendana la ngandji kɛ nkɔmano? Wopo wɔkɔnge w’okokaso nyɛnyɛ ngandji kɛ nkɔmano lɔɔkɔ kɛnɛ? Wapɔ wɛkɔnge wengowa wanɛ wokana ngandji kɛ nkɔmano?

4. Wopo wɔkɔnge w’okokaso ndjokola Yehova má ndjokana ngandji kɛ nkɔmano? (Marko 10:29, 30)

⁴ Etengo iseke lá djamba djemboheta, Yehova nyɛnyɛka ngandji kɛnde kɛ nkɔmano, ntepela ente ngandji kɛnde kɛ lotshinda  ngo te wanɛ wɔɔkɔpa, la wokambela. (Dan. 9:4) Iso nkɔpaka ‘ndjokola Ndjambe etengo oyɛso wana wande wa ngandji.’ (Ɛfɛ. 5:1) Djɛkondeke, iso nkɔpaka ndjala la ngandji kɛ nkɔmano, ntepela ente djokanelo djɛ wolo djetshikalaka lotshinda te wananyɔ l’ankaana yɛso yelá nyuma.​—Wala Marko 10:29, 30.

5-6. Ndjɔmbɔmba kɛkɔnge k’ɛnyɛ kɛnɛ kɛ ‘nkɔmano’ osakisolawɔ nsɔsɔlɔ?

⁵ Ongawola nsɔsɔlɔ ente winá wɔ sotaleke nsipisoyɛ kɛnɛ kesakisola ngandji kɛ nkɔmano, ndeke songoleka ndjala entshupa djɛ nyɛnyɛ ngandji kɛkɔ te winaso antɛmɔdji. Dj’iso ndeka nsipisoyɛ kɛnɛ kesakisola ngandji kɛ nkɔmano, nyontshɔ tɔkɔwɛdjɛ la nkɔmano, itepela yeleka ndjewama efula. Tokolenda ndjɔmbɔmba kɛmɔtshi.

 ⁶ Lɔɔko kɛnɛ iso nkoka ndɔsa onto ɔmɔtshi wombokamba ɛnɔnyi efula lá kɔmpanyi kɛmɔtshi etengo ose olemo wɔ nkɔmano. Koko, ɛnɔnyi enkfumɔ w’oyɛnde lá kɔmpanyi kɛsɔ, mbala imɔtshi nde atapomanaka kaanga la owandji ɔmɔtshi wɔlá kɔmpanyi kɛkɔ. Mbala imɔtshi, nde apasasangaka l’akano ankfumɔ wɔsa kanga kɔmpanyi kɛsɔ. Nde apakɔpaka kɔmpanyi kɛsɔ koko ntsha nde akamba l’eteyinde, nde awa lofuto lɔ wɔlɔ m’olemo wɔkɔ. Nde angokindjɛ nkamba l’eteyi tii winá wɔ ndongowa olemo onkina w’ofutawɔ wɔlɔ ndeka wokambande winá wɔsɔ.

7-8. a) Kɛkɔnge ketshinda onto djɛ ndjokana ngandji kɛ nkɔmano? b) Lamo ohonaso nshishima avɛrse amɔtshi walekɔ l’onkanda w’Oruta?

⁷ Djɛkondeke etengo sɛnaki  l’itenyi 6 otshikitano wolekɔ l’antenyɛ nkɔmano la ngandji kɛ nkɔmanonde, kɛnɛ ketshinda onto djɛ ndjala la ndjekaka djɛkɔ. Kɛkɔnge ketshindaki enkambi wɛ Ndjambe wel’etsho wefunamaki Bible djɛ ndjokana ngandji kɛ nkɔmano l’anteyi kɛwɔ? Wanɛ wokanaki ngandji kɛ nkɔmano wananghaka nkambo djɛsɔ, ape mande watshindamaka la wolo, koko mande wakɔpaka iyɔmɛlɛ l’eloko wɛwɔ. Tokolenda ndjɔmbɔmba kɛ Davidɛ. Oloko wɔnde wotshindaka djɛ nyɛnyɛ ngandji kɛ nkɔmano te ilongo yɛnde yɛ ngandji Jɔnata kaanga papa kɛ Jɔnata ndakɔpaka ndoyaka. Ɛnɔnyi efula m’ɔkɔngɔ wɔ nyɔyi kɛ Jɔnata, Davidɛ akindjɛka nyɛnyɛ ngandji kɛ nkɔmano te Mefibɔshɛtɛ wɔna Jɔnata.​—1 Sa. 20:9, 14, 15; 2 Sa. 4:4; 8:15; 9:1, 6, 7.

⁸ Iso nkoka ndjeka akambo efula lá kɛnɛ kelendana la ngandji kɛ nkɔmano má nshishima avɛrse amɔtshi wemá Bible welá onkanda w’Oruta. Olakanyelo wɔkɔnge w’okokaso mba me anto wotepelawɔ l’onkanda wɔsɔ lá kɛnɛ kelendana la ngandji kɛ nkɔmano? Wopo wɔkɔnge w’okokaso nkamba l’elakanyelo wɛsɔ l’otshumano wɔso? *

9. Lamo Naɔmi ndakanelaka ante Yehova ndeke lonanyɛ?

⁹ Lá onkanda w’Oruta, iso ntanaka ɔkɔndɔ wɔ Naɔmi, okilo wɔnde Oruta, la mpame kɛmɔtshi k’okaki Ndjambe wɔma k’etawɔ Bɔazɛ, kanga loyalaki ewoto kɛ womɛ Naɔmi. M’ɔtɛ wɔ ndjala keyalisa l’Isariyɛlɛ, Naɔmi nya womɛnde, la wana wande ape wasɛkɔka tá Mɔabɛ. Winá wɔ yayalaka l’eteyi womɛnde avɔka. Wana wande w’ampame ape watshukaka wadji, koko nkambo djɛ yɛnyinde, iyape kɛkɔ wayɛka ndovɔ. (Oru. 1:3-5; 2:1) Akambo wa yɛnyi wasɔ wasolongoyɛka Naɔmi efula. Nde ayalaka la yɛnyi efula ko ayɛka kaanga ndokanela ante, Yehova ndeke lonanyɛ. Djɛ nyɛnyɛ wopo wɔ ndoyawokaka lá nkambo djɛ Ndjambe, nde atepelaka ante: ‘Yehova amɔmpɛyɛ ɔkɔngɔ.’ ‘Kanga nkfulu inkfumɔ ambokomɛ lowiko lɔmi ololo.’ Nde atepelaka lonkina ante: ‘Yehova ndeke lonanyɛ la Kanga nkfulu  inkfumɔ ndeke lombondjakala mbalaka yɛnɛ.’​—Oru. 1:13, 20, 21.

10. Wopo wɔkɔnge Yehova ndelola lá etepela wɛ nyɛtshi wɛ Naɔmi?

¹⁰ Wopo wɔkɔnge Yehova ndelola l’etepela wɛ nyɛtshi wɛ Naɔmi? Nde atakadjɛ onkambi wɔnde woyalaki la yɛnyi. Koko, nde owokaka djandji. Yehova nsipisoyɛka ante lɔnyɔkɔ nkoka ‘ntshinda onto djɛ nangha akambo etengo kanga enkesa.’ (Los. 7:7) Naɔmi ndayalakande la djonyi dj’okotshɔ djɛ nyɛna ante Yehova ayalaki l’ompandju wɔnde. Okotshɔ wɔkɔnge wɔpɛyisa Ndjambe? (1 Sa. 2:8) Nde atshindaka Oruta djɛ nsembola lɔwɔ ko nyɛnyɛ Naɔmi ngandji kɛnde kɛ nkɔmano. La ɛkɔpa kɛnde edjinge la ngandji kɛnde, Oruta akotshɛka okilo wɔnde djɛ nde mba ndambo kɛ lokembo la ndjɛ nde ndjewa ante Yehova akindjɛ ndɔkɔpa. Olakanyelo wɔkɔnge w’owaso má ndjɔmbɔmba kɛ Oruta?

11. Lamo wananyɔ l’ankaana y’eloko wɔlɔ oyalakawɔ entshupa djɛ nkotshɛ wanɛ walekɔ la tɛnyi?

¹¹ Ngandji kɛ nkɔmano ntotshindaka djɛ nsembola lɔwɔ te wanɛ walekɔ l’okiyano. Ngo ngete Oruta ndatshikala nya Naɔmi, wananyɔ l’ankaana yɛ ngandji yɛ lɔɔko kɛnɛ nkindjɛka nkotshɛ ase otshumano walekɔ la tɛnyi kana wambɔlɛmba. Iwɔ nkɔpaka wananyɔ l’ankaana yɛwɔ, edjinge iwɔ ndjalaka entshupa djɛ nangha kenkfumɔ k’okokawɔ nangha djɛ ndaakotshɛ. (Woo. 12:25, nɔtɛ; 24:10) Nkambo djɛsɔ ndjokanaka la dako dj’ɔpɔstɔlɔ Poolo djɛnɛ: ‘Nyokambe l’etepela wetshitshimɛ bale te wanɛ wambɔlɛmba, nyosuke wanɛ walekɔ wɔdju, nyoyale la balentshitshi te anto ankfumɔ.’​—1 Te. 5:14.

12. Yopo imɔtshi yɛkɔnge yeleka wɔlɔ nkotshɛ wɔnanyɔ kana nkaana kɛmbɔlɛmba?

¹² Mbala efula yopo yeleka wɔlɔ y’okokɛ nkotshɛ wɔnanyɔ la nkaana kɛmbɔlɛmbande, ndowekameyɛ la ndoshikikɛ ente wɛ ndɔkɔpaka. Yehova alekɔ la djedjɛ lá welo w’ilɛ djɛ ndjila ɛnkɔkɔ wɛnde wɛ ntshó yimba. (Yee. 41:1) Woongo 19:17 ntepelaka ante: ‘Kanga loka intantemba nkɛtshi ɔsɔmbɛndende Yehova nkete, ko Nde angoofuta lá kɛnɛ k’onanghande.’

13. Wopo wɔkɔnge Oruta ndatshikitana nya Ɔrɔpa, ko lamo nkano djɛ Naɔmi ɛnyɛwɔ djɛ nde ayalaki la ngandji kɛ nkɔmano? (Lenda ntshango djelá loposo.)

¹³ Iso nsipisoyɛka wɔlɔ ngandji kɛ nkɔmano má nshishima kɛnɛ kekomelisa Naɔmi m’ɔkɔngɔ wɔ nyɔyi kɛ womɛnde la kɛ wana wande ape w’ampame. Winá wɔ Naɔmi ndoke ante ‘Yehova ambila anto wande yimba má ndaapɛyɛ nkete djɛ ndɛ,’ nde ɔsaka nkano djɛ nkalɔ tákawɔ. (Oru. 1:6) Akilo wande wakɔ ape wawangaka lɔkɛndɔ lande. Koko, lá mboka mbala isato y’etondo, Naɔmi akembɛka wana w’amato wasɔ dj’iwɔ nkalɔ tá Mɔabɛ. Kɛkɔnge keposisa? Towala nghɔnɛ: ‘Ɔrɔpa asomanaka l’okilo wɔnde ko nde akalɔka. Koko Oruta atotshika.’ (Oru. 1:7-14) Má ndɔsa nkano djɛ nkalɔ, Ɔrɔpa akilikaka dako djɛ Naɔmi, nde ananghaka kɛnɛ kɛ ndɔlɔmbɛ djɛ nangha. Koko Oruta, atakoma ngo lasɔ. Nde ayalaka la lotshungɔ  lɔ nkalɔ, koko má ngandji kɛ nkɔmano, nde ɔsaka nkano djɛ ntshikala djɛ nkotshɛ nyɔ kɛnde keyalaki la djonyi dj’okotshɔ kɛsɔ. (Oru. 1:16, 17) Oruta ɔsaka nkano djɛ ntshikala nya Naɔmi, ape ladjikɛnde atshindamaka la wolo, koko mande nde akɔpaka. Nkano dj’ɔsisa Oruta djɛsɔ djɛnyɛka enanghedji kɛ ngandji kɛ nkɔmano kɛ nsɔsɔlɔ. Elakanyelo wɛkɔnge w’owaso m’ɔkɔndɔ wɔsɔ?

14. a) Ɛsɔnɛlɔ wɛkɔnge wenangha wananyɔ l’ankaana yɛ ngandji lɔɔko kɛnɛ? b) Lá nkilika Hebero 13:16, elambo wɛkɔnge wesasangɛ Ndjambe?

¹⁴ Ngandji kɛ nkɔmano kepakome ngo lá nangha kɛnɛ kɛlɔmbama djɛ nanghema. Ayale lɔɔko, kana l’etsho wemboheta, wananyɔ l’ankaana yɛso efula wɔsaka nkano djɛ nyɛnyɛ ngandji kɛ nkɔmano te winawɔ andjawodji, kaanga te wanɛ wa yotapomanaka lawɔ ntondo. Ndjɔmbɔmba, winá w’okawɔ ambɔ ndjolo yemá nkete djetongamisa imbonanghemaka, iwɔ mponaka mbala kɛkɔ kɛmɔ wopo wokokawɔ mpɛyɛ okotshɔ. Winá w’onto ɔmɔtshi wɔ l’otshumano opomanande l’ekakasano, iwɔ wapengengaka djɛ nsembola lɔwɔ te onto ɔsɔ edjinge djɛ ndokotshɛ lá yopo yɛnama papoo. Etengo ase Makɛdɔniya wa l’ɛtɛndɔ kɛ ntondo, iwɔ nanghaka akambo efula ndeka kɛnɛ kɛlɔmbama. Iwɔ mpɛyɛka, winá la nkete dj’okotshɛwɔ ‘kaanga lá lɛdji loleka akoka wawɔ’ ngo djɛ nkotshɛ wananyɔ wawɔ walekɔ l’osambo. (2 Kɔ. 8:3) Yehova ndjalaka nsɔsɔlɔ l’osasa efula winá wawɛnande wɛnyɛ wopo wɔ ngandji kɛ nkɔmano kɛ nghɔsɔ!​—Wala Hebero 13:16.

15-16. Wopo wɔkɔnge Oruta ndɛnyɛ entete kɛnde?

¹⁵ Iso nkoka mba elakanyelo efula wɛ wɔlɔ má nshishima wopo w’Oruta ndakotshɛ Naɔmi. Tokolenda ngo emangha toko.

¹⁶ Yala l’entete. Winá wɔ Oruta ndakɔpɛ ntshɔ nya okilo wɔnde tá Juda, Naɔmi atonaka má bango. Koko Oruta atapekɔ. Eposelo wɛkɔnge weyalisa? ‘Winá wɔ Naɔmi ndɛnyi ante Oruta atshinyinyala ngo djɛ ntshɔ nyande, nde atshikaka ndoshimba.’​—Oru. 1:15-18.

17. Kɛkɔnge kengotokotshɛ dj’ipa mpekɔ la nkeke?

¹⁷ Olakanyelo w’owaso: Ndɔmbamaka ndjala la Balentshitshi djɛ nkotshɛ wanɛ walekɔ l’okiyano, koko totapekɔke djɛ ndakotshɛ. Nkaana kelekɔ la djonyi dj’okotshɔ nkoka ntona okotshɔ wɔso má bango. * Koko, ngandji kɛ nkɔmano kengototshinda dj’iso nangha la wolo djɛ nkindjɛ ndokotshɛ. (Nga. 6:2) Iso ndjalaka la nkongi ente ekomoekomo nde angoyawola ilongo yɛso edjinge angoyawola dj’iso ndokotshɛ.

18. Kɛkɔnge kekokisa nkiyanyɛ Oruta?

¹⁸ Tomalake lankeke. Winá wɔ Naɔmi ny’Oruta yakome lá Betɛlɛhɛmɛ, Naɔmi ɛnanaka nya winande. Nde ashimelaka ante: ‘Lemi ndjalaka l’efula winá m’otatshɔka, koko Yehova ambonkawoyɛ ɛwɔ toko.’ (Oru. 1:21) Kokanela wopo wɔ Oruta ndakoke ndaawoka winá ndooke etepela wɛsɔ me Naɔmi! Oruta ananghaka la welo wɛnde enkfumɔ djɛ nkotshɛ Naɔmi. Oruta alelaka nyande, osukaka, la akɛndaka nyande lɔkɛndɔ l’otale lɔ etsho efula. Koko kaanga kenkfumɔ kɛsɔ, Naɔmi atepelaka ante: ‘Yehova ambonkawoyɛ ɛwɔ toko.’ Má etepela wɛsɔ, Naɔmi atɛnyɛ kaanga ndambo kɛ djedjɛ tá osukɔ w’Oruta, kanga l’intasɛki l’ompandju wɔnde. Ɔsɔ ngo yɛnyi Oruta ndakoke ndjoka! Koko, nde atshikalaka ngo nya Naɔmi.

19. Kɛkɔnge kengotokotshɛ djɛ nkindjɛ nkotshɛ onto wolekɔ la yɛnyi?

¹⁹ Olakanyelo wowaso: Lɔɔko kɛnɛ, nkaana kelekɔ la yɛnyi nkoka ntoposeyɛ etepela wɛtɔpɛyɛ nkɛlɛ, ayale welo wɛkɔnge w’ilaso  djɛ ndokotshɛ. Koko totomalake la nkeke. Tokindjɛ nkotshɛ nkaana kɛso kelekɔ la djonyi dj’okotshɔ, la tɔlɔmbɛ Yehova djɛ ntokotshɛ dj’iso ndjewa yopo yɛ wɔlɔ yɛ ndosuka.​—Woo. 17:17.

20. Kɛkɔnge kɛpɛyisa Oruta lokembo lɔ ndayalaka la djonyi dj’ipa mpekɔ?

²⁰ Tɔpɛyɛ ekeketshelo lá winá wɛdje. Oruta ɛnyɛka Naɔmi ngandji kɛ nkɔmano, koko winá wɔsɔ Oruta nyɔmɛlɛ amboyala la djonyi dj’ekeketshelo. Ko Yehova atshindaka Bɔazɛ djɛ ndokembɛ. Bɔazɛ ashimelaka Oruta ante: ‘Yehova akɔtshɔkɔlɛ má kɛnɛ kɛ nghananghe, Yehova Ndjambe k’Isariyɛlɛ kanga ngomboyɛ lende djɛ ndohoná djisa l’apafu wande, akofute lofuto l’ekekete.’ Etepela wɛ wɔlɔ wɛsɔ wekembɛka Oruta efula. Ko Oruta akadjimolaka Bɔazɛ ante: ‘wɛ ombonkembɛ edjinge ombotshitshimɛ bale dj’onkambi wɔko.’ (Oru. 2:12, 13) Etepela wekembɛ wɛ Bɔazɛ wɛ ndashimela Oruta lá winá wɛdje, w’ɔpɛyɛka lokembo lɔ ndayalaka la djonyi dj’ipa mpekɔ.

21. Etengo Izaya 32:1, 2 ɛnyɛwɔ, kɛkɔnge kenanghaka tokokolo tolekɔ la nkɔmɛ?

²¹ Olakanyelo w’owaso: Wanɛ wɛnyɛ ngandji kɛ nkɔmano te anto ankina wangoyalake edjinge iwɔ la djonyi djɛ onto ndakembɛ lá winá ɛmɔtshi. Ngo ngete Bɔazɛ ndashikikɛ Oruta ante, nanghedji djɛnde djɛ ngandji djɛnama le anto ankfumɔ, lɔɔko kɛnɛ tokokolo tɔkɔmɛka akambo wangoyalake la djedjɛ te wananyɔ l’ankaana yɛ ngandji yɛpɛyɛ anto ankina okotshɔ. Etepela wɛ djedjɛ wɛ nghɔsɔ wɛpɛyámá lá winá wɛdje wɛngɔpɛyɛ wananyɔ l’ankaana wolo woyɛwɔ la djonyi dj’ipa mpekɔ.​—Wala Izaya 32:1, 2.

22-23. Wopo wɔkɔnge ikanyi yɛ Naɔmi iyatshikitana, ko lamo? (Yeembo 136:23, 26)

²² M’ɔkɔngɔ w’etsho ɛmɔtshi mpeta, Bɔazɛ apɛyɛka Oruta nya Naɔmi nkete djɛ ndɛ. (Oru. 2:14-18) Wopo wɔkɔnge Naɔmi ndelola lá lokapo lɔ Bɔazɛ? Nde atepelaka ante: ‘Yehova kanga  lopatshutshɛ ngandji kɛnde kɛ nkɔmano te wanɛ wawika kana wambovɔ ɔtshɔkɔlɛ.’ (Oru. 2:20a) Ɔsɔngo ikanyi yɛ Naɔmi yatshikitana! Ntondo, la yɛnyi inkfumɔ nde atepelaka ante: ‘Yehova . . . ndeke lonanyɛ,’ koko winá wɔsɔ nde alotepela l’osasa onkfumɔ ante: ‘Yehova . . . apatshutshɛ ngandji kɛnde kɛ nkɔmano.’ Kɛkɔnge kekotshisa Naɔmi djɛ ntshikitanyɛ ikanyi yɛnde?

²³ L’ekomo Naɔmi atateyɛka nyɛna lɔwɔ lɔ Yehova la lowiko lɔnde. Yehova akambaka l’Oruta djɛ ndɔpɛyɛ okotshɔ wɔ ndayalaka la djonyi lá lɔkɛndɔ lɔnde lɔ tá Juda. (Oru. 1:16) Naɔmi ɛnaka lɔwɔ lɔ Yehova lonkina winá wɔ Bɔazɛ kanga loyalaki ɔmɔtshi l’ateyi kɛ ‘antshungodji wawɔ,’ ndapɛyɛ amato ape wasɔ nkete djɛ ndɛ la ngandji kenkfumɔ. * (Oru. 2:19, 20b) Naɔmi akokaka nkanela ante, ‘Winá wɔsɔ lambosipisoyɛ ente, Yehova atankadjɛ kaanga ndambo daambi. Nde ayalaka la lemi lá ndjolo yɛmi inkfumɔ!’ (Wala Yeembo 136:23, 26.) Ɔsɔngo djedjɛ Naɔmi ndayale ladjɛ ndjala te Oruta la te Bɔazɛ lá wopo wɔ yotapekɔ! Tokanela ente y’asato kɛkɔ wasasangaka má eposelo wɛ wɔlɔ weposisa.

24. Lamo ɔkɔpaso nkindjɛ nyɛnyɛ ngandji kɛ nkɔmano te winaso Akristo?

²⁴ Kɛkɔnge kɛ sombeka m’onkanda wɔ Oruta lá kɛnɛ kelendana la ngandji kɛ nkɔmano? Ngandji kɛ nkɔmano ntotshindaka dj’ipa iso mpekɔ lankeke winá w’okotshɛso wananyɔ l’ankaana yelekɔ la yɛnyi. Kengototshindake lonkina djɛ ndjila welo wɛlɔmbama djɛ ndakotshɛ. Tokokolo ladjɛ nkembɛka wanɛ wɛnyɛ anto ankina ngandji kɛwɔ kɛ nkɔmano lá winá wɛdje. Winá wɛnaso wopo wɔ wanɛ walekɔ la djonyi dj’okotshɔ owawɔ wolo lá nyuma, iso ndjalaka l’osasa efula. (Ele. 20:35) Ko elonga kɛkɔnge keleka djonyi ketotshinda djɛ nyɛnyɛ ngandji kɛ nkɔmano? Elonga kɛkɔnde, iso nkɔpaka nsasangɛ la ndjokola Yehova, kanga ‘l’ombolola kfuu la ngandji kɛ nkɔmano.’​—Epo. 34:6; Yee. 33:22.