1. Woopó wɔkɔnge w’okokaso ndawopola?

ONGOYALAKE l’okiyano lá winá ɛmɔtshi w’okanelɛ akambo watokongela lá ntondo, ndjɔmbɔmba etshitanelo kɛ ntolo dj’engolo, ɔlɔshanelo wɔ Ngɔngɔ kelá Mangɔngɔ edjinge mbandji kɛ Armagɛdɔnɛ? Ongoyawopolake winá enkfumɔ ente: ‘Winá w’akambo wa wɔma wasɔ yongoyɛ, langoyala l’akoka wa ntshikala la nkɔmano?’ Ntsha ongokanelake lá weepó wɛsɔ, mbɔkoko wekelo wɔ kɛnɛ kɛ Yeso ndatepela lá vɛrse djɔsamisa ɔtɛ wɔso wɔ djamba, wongokokotshɛ efula. Yeso ashimelaka ambeki wande ante: ‘Nyotayakiyanyɛke. Nyoyale la djawo.’ (Dj. 14:1) Djawo djɛ wolo ngotokotshɛ dj’iso mpikama l’ekakasano wetokongela lá ntondo.

2. Wopo wɔkɔnge w’okokaso nkembɛ djawo djɛso, ko kɛkɔnge kɛnaso lɔ lá djamba djɛnɛ?

² Iso nkoka nkembɛ djawo djɛso djɛ nkfulumeyɛ ekakasano wetokongela lá ntondo má nshishima kɛnɛ k’onanghakaso winá w’opomanaso l’ekakasano w’ilá djawo djɛso lohemba. Ntsha iso nkanelaka wopo w’iselolaka winá w’opomanaso l’asɛsɛlɔ, iso nkoka ndjewa lampe oyɛwɔ djonyi djɛ nkembɛ djawo djɛso. Winá enkfumɔ w’opomanaso l’ekakasano, djawo djɛso nkembaka. Kɛsɔ kengotokotshɛ djɛ nkfulumeyɛ asɛsɛlɔ watokongela lá ntondo. Lá djamba djɛnɛ, tɔngɛna akambo anɛyi wapomanisa l’ambeki wa Yeso wɛnyisa djonyi djeyalisa lawɔ djɛ nkembɛ djawo djɛwɔ. M’asɔ tɔngɛna wopo w’okokaso mpomana l’ekakasano wɛkɔ ɛmɔ lɔɔko kɛnɛ edjinge wopo w’okokawɔ ntɔlɔngɔsɔla lá enkina wetokongela t’etsho weyaye.

3. Etengo yombofunama lá Mateo 6:30, 33 nkambo djɛkɔnge djelendana la djawo Yeso ndasipisoyɛ kɔɔ?

³ Alekɔ nkambo djɛ wɔlɔ djɛ owandji wɔ nkfumbo mponela wadjɛnde la wana wande nkete djɛ ndɛ, ɔlɔtɔ edjinge mvulu kɛ ndjetama. Apayalaka winá enkfumɔ wɔdju djɛ nangha nkambo djɛsɔ lá deko dj’ekakasano djɛnɛ. Lá mbamba imɔtshi, wananyɔ amɔtshi  wambotshutshɛka elemo wɛwɔ edjinge kaanga ilawɔ welo efula, iwɔ watatana enkina. Ankina wambotonaka elemo wɛ Akristo yopakoke nkamba. L’akambo ankfumɔ wasɔ, iso ladjɛ ndjala la djawo djɛ wolo ente, Yehova angonangha kenkfumɔ k’oyɛnde ladjɛ nangha djɛ ntɔpɛyɛ kɛnɛ k’oyɛso la djonyi lá nkfumbo kɛso. Yeso asipisoyɛka ambeki wande nkambo djɛsɔ papoo lá Djamba djɛnde djɛ l’onkoko. (Wala Mateo 6:30, 33.) Winá w’oyalaso l’eshikikelo kenkfumɔ ente Yehova apangotokadjɛ, tongoyala l’akoka wa ndjila yimba yɛso inkfumɔ l’edjena k’oyɛwɔ ladjɛ ndjala ntepela ente, lá wapɔ w’Onkfumi. Winá w’ɛnaso wopo wɔ Yehova otokotshɛnde djɛ mba nkete djelá demba dj’oyɛso la djonyi, tongɛna ente nde alekɔ onto wɔ nsɔsɔlɔ edjinge djawo djɛso tende ngoleka nkemba.

4-5. Kɛkɔnge kekotshisa nkfumbo kɛmɔtshi djɛ ndongela okiyano wɔ wolo woyalaki lawɔ lá kɛnɛ kelendana l’ehomba welá demba?

⁴ Tokolenda wopo wɔ nkfumbo kɛmɔtshi kelá Vénézuela yɛnyi okotshɔ wɔ Yehova lá winá w’iyayale l’okiyano lá nkambo dj’ehomba wɛwɔ welá demba. L’etsho ɛmɔtshi, nkfumbo kɛ wɔnanyɔ Castro wawaki ndambo kɛ lofalanga kɛ mbika m’olemo wɔwɔ wiyakambaka wɔ mbongola anyama. Masɔ, oloyi w’angala wantɔmbɔki wapapolaka nkete djɛwɔ nkfumɔ edjinge watshindaka la wolo djɛ nyima m’owila wɔwɔ. Papa kɛwɔ, Miguel, atepela ante: “Winá wɔsɔ tolowika ngo má nkamba itatshi yɛ looko yɛ sasɔmbɛ me onto ɔmɔtshi. Lofu la lofu langowangake ndɔmba Yehova djɛ nde ntɔpɛyɛ ngo kɛnɛ k’oyɛso la djonyi lá lofu lɔ lɔɔko.” Lowiko lomboyala wolo le nkfumbo kɛsɔ, koko la djawo nkfumɔ l’akoka walekɔ la Papa kɛso kɛ ngandji wa ntoseyɛ ehomba wɛso wɛ lofu la lofu, nkfumbo kɛ wɔnanyɔ Castro ndjingelaka lá nsanghanyɛ y’Onkfumi la mpoposanyɛka mbala la mbala. Iwɔ ndjilaka wapɔ w’Onkfumi l’edjena kɛ ntondo lá mbiko yɛwɔ, edjinge Yehova ndapɛyɛka kɛnɛ k’oyɛwɔ la djonyi.

⁵ L’etsho w’ekakasano wɛsɔ, Miguel nya wadjɛnde, Yurai, wangilake yimba lá wopo wɔ Yehova alamande. Lá winá ɛmɔtshi, Yehova angokambake la winawɔ andjawodji djɛ ndapɛyɛ okotshɔ welá demba kana djɛ nkotshɛ Miguel djɛ mba ilelemo imɔtshi. Lá winá enkina, Yehova nkambaka la kɔmite kɛ filialɛ kɛwɔ djɛ ndapɛyɛ nkete dj’oyɛwɔ la djonyi. Yehova átákadjɛ kaanga ndambo daambi. Eposelo weyalisa la nkambo djɛsɔnde, iwɔ wɛnaka djɛ djawo djɛ nkfumbo kɛwɔ djefulaka. M’ɔkɔngɔ wɔ nde mpɛyɛ ndjɔmbɔmba kɛmɔtshi kɛnyɛ wopo wɔ Yehova ndaakotshɛ, nkaana kɛwɔ k’omoto, Yoselin, atepelaka ante: “Ayalaka nkambo djekembɛ efula djɛ nyɛna lɔwɔ lɔ Yehova lá yopo yɛnama papoo. Langɔwɔsake etengo ilongo edjinge langoyalake l’eshikikelo ente nde angonkotshɛka lá winá enkfumɔ.” Nde nkotshɛka ante: “Ohemba w’okfulumeyɛso lá nkfumbo kɛso wɔmbɔtɔlɔngɔsɔla djɛ nkfulumeyɛ ehemba enkina wetokongela tá ntondo.”

6. Wopo wɔkɔnge w’okokɛ mfudjɛ djawo djɛko winá w’opomanɛ l’ekakasano welendana la mfalanga?

⁶ Wɛ ɛna ndjolo l’ekakasano welendana la mfalanga? Ntsha oyɛwɔ nde nghɔsɔ, mbɔ ɔsɔ alekɔ etena kɛ paa efula lewɛ. Koko, okoka nkamba l’etena kɛsɔ djɛ nkembɛ djawo djɛko. Lɔmba Yehova edjinge wala etepela wɛ Yeso welá  Mateo 6:25-34 la tɔnɔla l’eteyi. Kanela lá ndjɔmbɔmba yɛ l’etsho wɛso wɛnɛ yɛnyɛ djɛ Yehova nkotshɛka ehomba wɛ wanɛ wakindjɛ ndjila yimba l’olemo wɔnde. (1 Kɔ. 15:58) Ntsha wɛ nangha nghɔsɔ, ongokembɛ djawo djɛko dj’ente Papa kɛko kel’olongo angokokotshɛ ngo ngete ndakotshɛ anto ankina wapomanisa l’ekakasano w’etengo wepomana la wɛ. Nde ndjewaka kɛnɛ k’oyɛ la djonyi, nde ndjewaka wopo wɔ nkokotshɛ. Winá w’ɛnɛ okotshɔ wɔ Yehova la lowiko lɔko, djawo djɛko ngoleka nkemba edjinge ongoyala l’akoka wa nkfulumeyɛ ekakasano weleka nkekete wekokongela l’etsho weyaye.​—Aba. 3:17, 18.

7. Lá nkilika Mateo 8:23-26, wopo wɔkɔnge ‘lompopo l’ekekete’ iyile djawo dj’ambeki l’ohemba?

⁷ Winá wɔ Yeso nya ambeki wande yapomana la lompopo lá ndjale, Yeso akambaka la nkambo djɛsɔ djɛ ndakotshɛ dj’iwɔ nyɛna tii lá lɛdji lɔkɔnge loyɛwɔ ladjɛ ndjala la djawo djɛ wolo. (Wala Mateo 8:23-26.) Winá wɔ lompopo yotalekaka ndjala wolo edjinge washi iyawange ndjingela lá wato, Yeso ayalaka l’ilɔ yɛ wolo efula. Winá wɔ ambeki yoke wɔma, iwɔ wawetsholaka Nkfumi kɛwɔ ko yɔmbɔlɔmba djɛnde ndaawikɛ, nde akadjimolaka la ngandji kenkfumɔ ante: ‘Lamo okanyo wɔma? Lamo oyɛnyo la djawo djɛ daambi nghɔnɛ?’ Ambeki wayalisa la wɔma wasɔ wayalaka ladjɛ nsipisoyɛ ambɔ Yehova ayalaka l’akoka ankfumɔ wa nama Yeso la wanɛ wayalaki lande má lompopo lɔsɔ. Ɔmbɛna olakanyelo w’okokaso mba? Djawo djɛ wolo nkoka ntokotshɛ djɛ nkfulumeyɛ wopo wɔkɔnge wɔ ‘lompopo l’ekekete,’ ayale lɔ nsɔsɔlɔ kana lɔ djingingi.

8-9. Wopo wɔkɔnge djawo djɛ Anel iyahembama, ko kɛkɔnge kookotshisa?

⁸ Kolenda wopo wɔ djawo djɛ Anel, nkaana k’epolo kelá Porto Rico, yaleke nkemba m’ɔkɔngɔ wɔnde nkfulumeyɛ ohemba ɔmɔtshi wɔ wolo. ‘Lompopo l’ekekete’ lopomanisa lande loyalaka lɔ nsɔsɔlɔ. Ohemba wɔsɔ wowangaka lá 2017 winá wɔ lompopo l’ekekete l’etawɔ Hurricane Maria yatshite mvulu kɛ Anel. Lonkina, ngo má lompopo lɔsɔ, nde atshutshɛka olemo wɔnde. Anel atepela ante: “L’etsho w’ekakasano wɛsɔ, ndjalaka l’okiyano w’efula koko ndjekaka ndawɛkɛ te Yehova má lɔlɔmbɔ la ntatshika dj’okiyano nsolongoyɛ lemi.”

⁹ Anel atepela nkambo nkina dj’okotshisa djɛ nkfulumeyɛ okakasano wɔsɔ, nkambo djɛkɔnde ntshunamo. Nde ntepelaka ante: “Nkilika ɛlɔndjɛlɔ kɛ olonghanyelo ankotshɛka djɛ lemi ntshikala vu. Nyɛnaka lɔwɔ lɔ Yehova ayale má ekeketshelo kelá nyuma kɛ mawa kana má okotshɔ welá demba w’ime wananyɔ.” Nde akotshɛ ante: “Yehova ampɛyɛka nkete efula ndeka kaanga kɛnɛ kɛ makoke ndɔɔlɔmba edjinge djawo djɛmi djelekaka nkemba efula.”

10. Kɛkɔnge k’okokɛ nangha ntsha okfulumeyɛ ‘lompopo lɔmɔtshi l’ekekete’?

¹⁰ Wɛ okfulumeyɛ ‘lompopo lɔmɔtshi l’ekekete’ lá lowiko lɔko? Akoka ndjala ndjolo yeyɛ má nkete djetongamisa. Kana nkoka ndjala lompopo lɔ djingingi, ndjɔmbɔmba olando wɔ wolo wɔmbɔkɔlɛmbɛ edjinge wombokosambɛ kɛnɛ kɛ nangha. Okoka ndjala l’okiyano lá winá ɛmɔtshi, koko tawolake djɛ okiyano wɔsɔ nkoshimba djɛ  wɛ ndawɛkɛ te Yehova. Yasukanyɛ tende má nanghaka ndɔmbɔ yɛ manse k’oloko. Kembɛ djawo djɛko má ntɔnɔlaka lá mbala inkfumɔ yɛ Yehova ndombokokotshɛ. (Yee. 77:11, 12) Wɛ ongoyala l’eshikikelo ente nde apakokadjɛki lotshinda, ayale winá wɔsɔ kana l’etsho weyaye.

11. Lamo oyɛso ladjɛ ndɔsa nkano djɛ ndjalaka la ntshunamo te wanɛ watɔlɔndjɛ?

¹¹ Kɛkɔnge kekoka nkokotshɛ lonkina djɛ nkfulumeyɛ ehemba? Etengo Anel ndotepelaki, ntshunamo. Eka djɛ ndawɛkɛ te anto wa Yehova nya Yeso oyawɛkɛwɔ. Lá winá ɛmɔtshi, wanɛ watɔlɔndjɛ nkoka ntɔpɛyɛ ɛlɔndjɛlɔ kɛnama etengo lako kɔɔ leso. Koko, Yehova ntshɔkɔlaka wanɛ walekɔ la ntshunamo. Iso ndjewaka má Otepela wɔnde la má ndjɔmbɔmba yɛ enkambi wɛnde wɛ nkɔmano ente ntshunamo mbikɛka mbiko. (Epo. 14:1-4; 2 Ɛk. 20:17) Tɔnɔlaka lá ndjɔmbɔmba y’etengo yɛsɔ. Ntsha wɛ nanghaka nghɔsɔ ongokembɛ mposɛ kɛko kɛ nkilika ɛlɔndjɛlɔ kɛtɔpɛyɛ olonghanyelo ayale má winá wɔsɔ kana l’etsho weyaye. (Heb. 13:17) Lonkina topangoyala la donga djɛ ndjoka lompopo l’ekekete ntepela ente ndjolo k’ekekete kɛkɔpa ntokomela wɔma.​—Woo. 3:25.

12. Lá nkilika Luka 18:1-8 djokanelo djɛkɔnge djelekɔ l’antenyɛ ndjala la djawo la nkfulumeyɛ akambo wa ntshamba djɛ sii?

¹² Yeso ewaka ante akambo wa ntshamba djɛ sii wangila djawo dj’ambeki wande l’okakasano. Djɛ ndaakotshɛ dj’iwɔ nkfulumeyɛ nkambo djɛsɔ, nde ápɛyɛka ndjɔmbɔmba kelekɔ l’onkanda wɔ Luka. Yeso atepelaka ɔkɔndɔ wɔ wadj’odjo wokindjɛki mbɔnda isushi imɔtshi djɛ ndolendela nkambo djɛnde. Nde ayashikikɛka ante angowa wapɔ m’entete kɛnde. Ekomo ekomo, isushi ayɛka ndoonangela kɛnɛ kɛ ndɔɔlɔmbaka. Olakanyelo wɔkɔnge w’owaso? Yehova apasɔnaka ndongi. Djɛkondeke Yeso atepelaka ante: “Lasɔ, Ndjambe apangosambola akambo w’ansɔnami wande woleelá otsho mbile la sii kenkfumɔ?” (Wala Luka 18:1-8.) Masɔ Yeso akotshɛka ante: ‘Winá wɔ Wɔna onto ndongoyɛ, nde angotana nsɔsɔlɔ djawo djɛ nghɔsɔ lá looko?’ Winá w’ɛnaso ndjolo l’akambo wa ntshamba djɛ sii, iso ladjɛ nyɛnyɛ má balentshitshi la má onkfulumelo wɔso ente tolekɔ la djawo djɛ wolo dj’etengo djɛ wadj’odjo wɔsɔ. La djawo djɛ nghɔsɔ, iso nkoka ndashikikɛ ente ayale má lɔɔko kana l’etsho weyaye Yehova angotosela. Lonkina iso ladjɛ ndjawola ente ndɔmbɔ yɛso ilekɔ la nkfulu k’efula. Lá winá ɛmɔtshi ndɔmbɔ yɛso nkoka nkadjimwama lá yopo yɛ sotakanelaki.

13. Wopo wɔkɔnge lɔlɔmbɔ iyakotshɛ nkfumbo kɛmɔtshi winá wɔ yaananghela akambo la ntshamba djɛ sii?

¹³ Kolenda kɛnɛ kekomelisa nkaana kɛso kɛmɔtshi k’etawɔ Vero, kanga l’intasɛ lá République démocratique du Congo. Vero, womɛnde wopalekɔ Owakɛ wɔ Yehova, la wɔnawɔ w’omoto wolekɔ l’ɛnɔnyi 15, walotaka má iwaandja yɛwɔ winá w’oloyi w’angala iyingela la mbandji l’eteyi. Winá wɔ nkfumbo kɛsɔ iyotalotaka, wakomaka lá bariɛrɛ mɔtshi dj’angala, wavundaka ko watepelaka ambɔ ngo ndaayaka. Winá wɔ Vero ndatateyɛ ndela, wɔnande w’omoto ovumbɛka ko alɔmbaka la djoyi djɛ wolo edjinge  lá lɔlɔmbɔ lɔnde nde alumulaka djiina djɛ Yehova mbala efula. Winá wɔ ndashiyɛ ndɔmba, owandji w’oloyi w’angala wɔsɔ owopolaka ante: “Mbayi, kanga lokolakanyisa djɛ ndɔmbana?” Nde akadjimolaka ante: “Nyɔ kɛmi ndeke londjekisa, má nkamba la lɔlɔmbɔ lɔ ndjɔmbɔmba l’otanaso lá Mateo 6:9-13.” Ko owandji w’angala oshimelaka ante: “Mbayi, tshɔka nya ambotshi wako la vu, edjinge Ndjambe kɛko Yehova anyolame!”

14. Kɛkɔnge kekoka ndjila djawo djɛso l’ohemba, ko kɛkɔnge kengotokotshɛ djɛ nkfulumeyɛ?

¹⁴ Djɔmbɔmba yɛ nghɔsɔ ntokotshɛka dj’ipa mvungɛ kaanga ndambo daambi djonyi djelekɔ la lɔlɔmbɔ. Iya otepelaso mo ntsha ndɔmbɔ yɛso ipakadjimwamisa lankeke kana mbala kɛkɔ kɛmɔ? Etengo wadj’odjo welá ndjɔmbɔmba kɛ Yeso, kindjɛ ndɔmba l’eshikikelo ente Ndjambe kɛso apakokadjɛki kaanga ndambo daambi, nde angokadjimola lɔlɔmbɔ lɔko lá winá w’ɛdje edjinge lá lɛdji lɔmɔtshi. Kindjɛ mbɔnda Yehova djɛ nde nkɔpɛyɛ nyuma kɛnde k’ekina. (Flp. 4:13) Vungɔ ente lak’ilá Yehova angɔkɔtshɔkɔla lombombe ko ongovungɛ ndjolo inkfumɔ yemboheta. Winá w’okfulumeyɛ ekakasano m’okotshɔ wɔ Yehova la djawo nkfumɔ, ongoyala la wolo la ongoyala l’akoka wa nkfulumeyɛ ekakasano enkina wekokongela l’etsho weyaye.​—1 Pɛ. 1:6, 7.

15. Etengo yombofunama lá Mateo 17:19, 20, okakasano wɔkɔnge wopomanisa l’ambeki wa Yeso?

¹⁵ Yeso alakanyɛka ambeki wande ante djawo djengakotshɛ djɛ ndongela ekakasano. (Wala Mateo 17:19, 20.) Kaanga yaposɛka ɛdjɛngɛ lá winá ɛmɔtshi, lá mbamba inkina iwɔ watalonga. Okakasano iyayale lampe? Yeso asipisoyɛka ante iwɔ wayalaka ladjɛ ndjala la djawo dj’efula. Nde ashimelaka ante ntsha walekɔ la djawo dj’efula wangoyala l’akoka wa nsɛkɔla enkókó ntepela ente nkfulumeyɛ ekakasano wɛ nkekete! Lɔɔko kɛnɛ, edjinge iso tongopomanake l’ekakasano wɛnama etengo topangokoka ndonga.

16. Wopo wɔkɔnge djawo yakotshɛ Geydi djɛ nkfulumeyɛ yɛnyi yɛ nyɔnyi kɛ womɛnde?

¹⁶ Tokokanela lá ndjɔmbɔmba kɛ Geydi, nkaana kɛso kemá Guatemala. Wayakaka womɛnde Edi, winá wɔ yotakalɔka tá mvulu má losanghanyɛ l’otshumano. Wopo wɔkɔnge djawo djɛ Geydi yokotshɛ djɛ ndongela efula kɛ yɛnyi yeyalaki lande? Nde ntepelaka ante: “Lɔlɔmbɔ nkotshɛka lemi djɛ mbokela ekiyano wɛmi te Yehova, ko kɛsɔ kengonkotshɛke djɛ mba vu. Lemi nyɛnaka okotshɔ wɔ Yehova me ase nkfumbo kɛmi la me tolongo tɔmi tel’otshumano. Nkindjɛ ndapɛyɛ l’olemo wɔ Yehova nkitshakitshɛka yɛnyi yɛmi edjinge nkotshɛka lemi djɛ ndjila yimba lá lofu lɔ lɔɔko ipa ndakiyanyɛ amboleka lá nkambo djɛ lofu lɔ lomi. M’ɔkɔngɔ wɔ nkambo djenkomelisa djɛsɔ, nyɛnaka ente ayale okakasano wɔkɔnge wɔ mongopomana l’etsho weyaye, langoyala l’akoka wa ndolongela m’okotshɛ wɔ Yehova, wɔ Yeso la w’olanghanyelo.”

17. Kɛkɔnge k’okokaso nangha winá w’opomanaso l’okakasano wɔ wolo wolekɔ etengo onkókó?

¹⁷ Oyɛnde lá yɛnyi y’onto wɔko ɔmɔtshi w’okɛ ngandji wombovɔ? Ɔsaka winá djɛ nkembɛ djawo djɛko djelendana la nkongi dj’ekfundwelo má mbalaka ɛkɔndɔ wɛ Bible w’anto w’iyakfundola  má nyɔyi. Olekɔ la yɛnyi ladjikɛnde ose nkfumbo kɛkɔ ɔmɔtshi amboposa m’otshumano? Eka djɛ ndashikikɛ ente dilanyɛ djɛ Ndjambe ngoyalake winá enkfumɔ ngo wɔlɔ. Ayale okakasano wɔkɔnge wɔ ngombopomana, ɔsa okakasano wɔkɔ etengo mbamba kɛ nkembɛ djawo djɛko. Djipolaka Yehova oloko wɔko. Toyawangoyɛke, koko yalaka winá enkfumɔ entshupa nya wananyɔ l’ankaana yɛko. (Woo. 18:1) Yapɛyɛ l’elemo wekoka nkokotshɛ djɛ wɛ nkfulumeyɛ, ayale kaanga ntsha ongonanghake elemo wɛkɔ la wisɔyi lá wiso. (Yee. 126:5, 6) Kindjɛ la nonghanyi kɛko kɛ ndjingelaka nsanghanyɛ, mpoposanyɛka la mbalaka Bible. Edjinge ilá yimba yɛko inkfumɔ tá ɛtshɔkɔ wɛ wɔlɔ ndakapɔnda wetolaka Yehova. Winá w’ɛnɛ wopo wɔ Yehova okokotshɛnde, djawo djɛko ngoleka nkemba.

18. Ntsha ombisola ente djawo djɛko dekɔ wɔdju, okokɛ nangha mo?

¹⁸ Ntsha ohemba wɔ ngapomana kana wɔ ngombopomana winá wɔsɔ wɔmbɛnyɛ ente djawo djɛko dekɔ wɔdju, tɔlɛmbake. Ɔsa nkambo djɛsɔ etengo mbamba kɛ nkembɛ djawo djɛko. Nangha lɔlɔmbɔ etengo apɔstɔlɔ wa Yeso yananghe ambɔ: ‘Otofudjeyɛ djawo djɛso.’ (Luka 17:5) Lonkina, tɔnɔla lá ndjɔmbɔmba yɛ sombeka lá djamba djɛnɛ. Lá ndjɔmbɔmba kɛ Miguel nya Yurai, vungɔka mbala inkfumɔ yɛ Yehova ndombokokotshɛ. Etengo wɔna Vero nya Anel, lɔmbaka Yehova l’entete, pekapeka winá wɔ ngombopomana l’okakasano w’ekekete. Edjinge etengo Geydi, awola ente Yehova nkoka nkɔpɛyɛ okotshɔ w’oyɛ la djonyi má lotshimbo lɔ nkfumbo kana lɔ tolongo. Winá w’awolɛ djɛ Yehova nkokotshɛ djɛ nkfulumeyɛ okakasano wɔ ngopomana, ongoleka ndjala l’eshikikelo ente nde angokokotshɛ djɛ nkfulumeyɛ wepo w’ekakasano enkfumɔ w’okokɛ mpomana t’etsho weyaye.

19. Eshikikelo kɛkɔnge keyalisa la Yeso, ko kɛkɔnge kekoka nkokotshɛ djɛ ndjala l’eshikikelo kɛkɔ?

¹⁹ Yeso ɛnyɛka tii lá lɛdji lɔkɔnge ambeki wande iyasambe djawo, koko nde atila kaanga ndambo k’ehamo ante m’okotshɔ wɔ Yehova iwɔ wangolonga l’ekakasano enkina. (Dj. 14:1; 16:33) Nde ayalaka l’eshikikelo ante djawo dj’ekekete ndeke longokotshɛ oloyi w’ekekete djɛ mbika lá ndjolo k’ekekete. (Ndj. 7:9, 14) Wɛ ongoyala l’anteyi k’anto wasɔ? Má okotshɔ wɔ la ngandji wɔ Yehova, wɛ ongoyala l’anteyi kɛwɔ ntsha wɛ nkamba la mbamba k’enkfumɔ k’owɛ winá wɔsɔ djɛ ndjala la djawo edjinge nkembɛ djawo djɛko!​—Heb. 10:39.