Yehova ashimelaka ase Isariyɛlɛ dj’iwɔ ndjala owila w’ekina. Djɛ ndakotshɛ dj’iwɔ ndjala ekina, nde ashimelaka ante: ‘Tóheetake l’anteyi k’owila wɔko djɛ ntshanghanyɛ wayi w’emamanyɛ. Tóhonake djɛ ntshutshɛ lowiko lɔ winako onto. Lemi ndeke Yehova.’—Lew. 19:2, 16.

Itepela ‘tóhonake djɛ ntshutshɛ’ ilekɔ ekadjimwelo kɛ wɔlɔ kɛ itepela yemá Efunelo welá Hebero wɛ ntondontondo. Yako osakisolawɔ nge? Onkanda ɔmɔtshi w’ase Juda wotepela wayi walendana l’Ase lewi ntepelaka ante: “Etenyi kɛ vɛrse kɛnɛ . . . kelekɔ wolo nsipisoyɛ mande alekɔ wolo ndjewa wopo wɔ yakambaka l’itepela yemá Hebero yɛsɔ, yekadjimɔma itepela l’itepela nghɔnɛ ante: ‘Teemalake lá djiko djɛ, má, entshupa la.’”

Andjewi yɛ wayi imɔtshi nkanelaka ambɔ etepela wɛsɔ ndjokanaka l’etepela welá vɛrse 15, wetepela ante: ‘Nyolomboyɛkɛ la sii. Toyalake l’isɔnɔdji te ose ɔmvɔ kana ndeka ndapɛyɛ te kanga okfudji. Ongolomboyɛke winako onto la sii.’ (Lew. 19:15) Lá mbamba kɛsɔ, ɔlɛmbɛ wolekɔ lá vɛrse 16 wotepela ‘dj’ipa ntshutshɛ lowiko’ l’onto ɔmɔtshi nkoka nsakisolaka ante, enkambi wɛ Ndjambe watakokaki nangha nkambo mɔtshi djɛ ntshamba djɛ sii lá dombo, l’akambo w’opoto kana l’akambo amɔtshi welá nkfumbo la nangha nkambo mɔtshi ngo lá wapɔ wɔnde nyɔmɛlɛ. Alekɔ nsɔsɔlɔ ente, topakoke nangha akambo wasɔ, koko y’opo inkina yeleka wɔlɔ yɛ nsipisoyɛ etepela wɛsɔ ilekɔ lá vɛrse 16.

Tokolenda ewangelo kɛ vɛrse djɛkɔ. Ndjambe ilelaka enkambi wɛnde ɔlɛmbɛ dj’ipa ntshanghanyɛ akambo w’emamanyɛ. Tovungɔ ente, kaanga lɔtɛndɔ okokawɔ ndjakala ekakasano, emamanyɛ ndeka lɔtɛndɔ nyɛtshi. (Woo. 10:19; Los. 10:12-14; 1 Ti. 5:11-15; Dja. 3:6) Mbala efula kanga omamanyɛ ntepelaka akambo wewande ante walekɔ ongolo edjinge nkambaka l’engolo wɛsɔ djɛ ntshita lokumu l’onto ɔmɔtshi. Kanga omamanyɛ nkoka mpɛyɛ owakɛ w’ongolo lá nkambo djɛ onto onkina kaanga ntsha nkambo djɛsɔ okokawɔ ndjila lowiko l’onto wɔkɔ lá mbalaka. Tovungɔ ente ampame imɔtshi y’emamanyɛ wapɛyɛka owakɛ w’ongolo lá nkambo djɛ Nabɔtɛ, ko nkambo djɛsɔ djekomɛka anto dj’iwɔ ndovuta ave edjinge ndooyaka. (1 Nk. 21:8-13) Ee, kanga omamanyɛ nkoka ntshutshɛ lowiko l’onto onkina, etengo etenyi k’ape kɛ onkanda wɔ Ase lewi 19:16 otepelawɔ.

Lonkina, kanga omamanyɛ nkoka mamanyɛ onto ɔmɔtshi nkambo mande nde ndootonaka. Lá 1 Djɔanɛ 3:15, iso mbalaka: ‘Onto onkfumɔ wotona wɔnanyɔ wɔnde alekɔ ondjakanyi, edjinge nyo ndjewaka ente lako ondjakanyi wongowa lowiko l’etshinda.’ Alekɔ djonyi iso nkota ente m’ɔkɔngɔ wɔ Ndjambe ntepela etepela welá vɛrse 16 nde akfɛka ante: ‘Totonake winako onto l’oloko wɔko.’—Lew. 19:17.

Lasɔ, etepela wɛ nkamɔ welekɔ lá Ase lewi 19:16 mpɛyɛka Akristo ndjewo kɛ wolo. Iso ladjɛ ntshika tokanyi tonkfumɔ tɔ nyɛtshi la ipa mamanyɛ anto ankina akambo kaanga ndambo daambi. Lá yopasɛ, ntsha iso ‘mpona djɛ nanghela winaso onto nyɛtshi,’ má ndjawola djɛ lotono kana ankombola ntotshinda djɛ ndomamanyɛ akambo, kɛsɔ k’engɛnyɛ ente iso ndotonaka. Akristo ladjɛ ndjewɔ nkambo djɛsɔ lá topo tonkfumɔ.—Mat. 12:36, 37.