DJAMBA DJƐ WEKELO 4
Donga dj’onanghakaso Bokfɔ
‘Nyongonangheke nkɔkɔnɛ djɛ mvungɔka lemi.’—LUKA 22:19.
YEEMBO 20 Wɛ ɔpɛyɛka ɛtɔyi kɛ Wɔnako wɔ ngawote (lá Otetela)
LÁ YOPASƐ a
1-2. a) Winá wɔkɔnge w’olekakaso nkanela onto wɔso wɔ ngandji wovwisa? b) Kɛkɔnge kɛ Yeso ndananghe l’otsho w’ekomo lá ntondo kɛ nyɔyi kɛnde?
AYALE ilá kɛkɔnge kɛ anto waso wa ngandji yombovɔ, iso nkindjɛka ndaavungɔ. Tongaakanelake mbala efula lá datɛ djɛ yavu.
2 Ɛnɔnyi enkfumɔ, tongoyalake l’anteyi kɛ miliyɔ y’anto wel’andja w’otondo wa sanghanaka djɛ mvungɔ nyɔyi k’onto ɔmɔtshi w’ɔkɔpakawɔ efula, Yeso Kristo. (1 Pɛ. 1:8) Má nangha nghɔsɔ, tongovungɔke esanga kanga lɔpɛyisa lowiko lɔnde etengo oshinga wɔ mbendo djɛ ntotshungola má mpekanto la nyɔyi. (Mat. 20:28) Lá nsɔsɔlɔ, Yeso angɔkɔpake djɛ ambeki wande mvungɔka nyɔyi kɛnde. L’otsho w’ekomo lá ntondo kɛ nyɔyi kɛnde, nde ananghaka dambo djetshikitanyi ko atepelaka ante: ‘Nyonghonanghake nkɔkɔnɛ djɛ mvungɔka lemi.’ b—Luka 22:19.
3. Kɛkɔnge k’ɛnaso lɔ lá djamba djɛnɛ?
3 Ngo anto daambi toko wingelaka lá Bokfɔ djɛ nyɔyi kɛ Kristo ndeke olekɔ la nkongi djɛ ntowika l’olongo. Koko edjinge miliyɔ y’anto walekɔ la nkongi djɛ mbika lanɛ lá looko wangingelake. Lá djamba djɛnɛ, tɔngɛna donga djetshinda eloyi wɛkɔ epe djɛ nkongela Bokfɔ dj’ɛnɔnyi enkfumɔ l’eloko lukuluku. Tɔnghɛna lonkina wapɔ w’owakaso má ndjingela l’eteyi. Nyontshɔ tokowanga nshishima donga dj’ɛnyɛ lamo Akristo w’ankfutami ingelakawɔ lá Bokfɔ.
DONGA DJ’AKRISTO W’ANKFUTAMI INGELAKAWƆ LÁ BOKFƆ
4. Lamo ankfutami w’avuta ɔlɛkawɔ mampa la vinyo lá Bokfɔ?
4 Ɛnɔnyi enkfumɔ, Akristo w’ankfutami wingeláka lá Bokfɔ ndɛka mampa la vinyo. Lamo ɔlɛkawɔ mampa la vinyo? Djɛ nkadjimola lá woopó wɔsɔ, tokolenda kɛnɛ kehetisa l’otsho w’ekomo wɔ lowiko lɔ Yeso lanɛ lá looko. M’ɔkɔngɔ wɔ dambo djɛ Pasaka, Yeso awangaka nangha dambo djewama lɔɔko kɛnɛ etengo Dambo djɛ nkɔlɔ djɛ Nkfumi. Nde apɛyɛka apɔstɔlɔ wande wa nkɔmano 11 mampa la vinyo ko áshimelaka ante nyɔle la nyɔnɔ. Yeso áshimelaka lá kɛnɛ kelendana la djokanelo kana tosambi tope, isambi yɛ bango la isambi y’Onkfumi. c (Luka 22:19, 20, 28-30) Tosambi tɔsɔ todjipolaka apɔstɔlɔ edjinge iloyi inkina y’anto yɛ daambi mboka djɛ ndjala ankfumi la ankfundji l’olongo. (Ndj. 5:10; 14:1) Ngo antshikadji w’ankfutami, d w’ɔsa opiko lá tosambi tɔsɔ toko ndeke lokoka ndɛ mampa la vinyo lá Bokfɔ.
5. Kɛkɔnge kɛ ankfutami w’avuta ewakawɔ lá kɛnɛ kelendana la nkongi djɛ yapɛyɛ?
5 Elonga kenkina kɛ ankfutami w’avuta okongelakawɔ Bokfɔ l’oloko lukuluku nde: Nonghanyi kɛsɔ kengapɛyɛke mbamba kɛ ntɔnɔla lá kɛnɛ kelendana la nkongi djɛwɔ. Yehova ápɛyɛka nkongi djɛ wɔlɔ lombombe, djɛ ntowika l’olongo la demba djepavu edjinge djepapɔndɛ, la djɛ ntokamba lompandju wɔ Yeso Kristo kanga lokfundwisa la wɔ ankfutami ankina wel’anteyi k’anto 144 000, edjinge kɛnɛ keleka djonyi nde, ntɛnama lá ntondo kɛ Yehova Ndjambe! (1 Kɔ. 15:51-53; 1 Dj. 3:2) Ankfutami w’avuta ndjewaka ambɔ iwɔ wetamaka djɛ ntosasanga la mpeyi yɛ nghɔsɔ l’olongo. Koko dj’iwɔ ndjawolama l’olongo, ngo iwɔ ntshikala la nkɔmano tii tá nyɔyi yɛwɔ. (2 Ti. 4:7, 8) Ankfutami w’avuta ndjalaka l’osasa efula má ntɔnɔla lá nkongi djɛwɔ djɛ t’olongo. (Tito 2:13) Ya otepelaso mo nkambo ‘dj’ɛnkɔkɔ enkina’? (Dj. 10:16) Donga mɔtshi djɛkɔnge dj’ingelakawɔ lá Bokfɔ?
DONGA DJ’ƐNKƆKƆ ENKINA INGELAKAWƆ LÁ BOKFƆ
6. Lamo ɛnkɔkɔ enkina ingelakawɔ lá Bokfɔ ɛnɔnyi enkfumɔ?
6 Ɛnkɔkɔ enkina ndjingelaka lá Bokfɔ, ape etengo wanɛ walɛ mapa la vinyo, koko etengo anto wakɔmɛ kɛnɛ keheta. Lá 1938, wanɛ walekɔ la nkongi djɛ mbika lá looko wawaka leeta lotshikitanyi mbala kɛ ntondo djɛ ndjingela lá Bokfɔ. Etange k’Olami kɛ Ngɔndɔ k’asato 1, 1938 lá Angɛlɛ, ketepelaka ante: ‘Angoyala nkambo djɛ wɔlɔ la djɛlama djɛ ɛnkɔkɔ enkina ndjingelaka lawɔ lá losanghanyɛ lɔsɔ edjinge nkɔmɛ kɛnɛ kenanghema. . . . Mbamba kɛsɔ ladjɛ ndjala la kelekɔ winá w’osasa edjinge lewɔ.’ Ngo ngete wanɛ wawaka leeta tá fɛtɛ kɛ bala oyalakawɔ l’osasa wɔ nkɔmɛ tosawo t’onanghakawɔ l’eteyi, ɛnkɔkɔ enkina ndjalaka l’osasa wɔ ndjingela lá Bokfɔ djɛ ntɔkɔmɛ kɛnɛ keheta.
7. Lamo ɛnkɔkɔ enkina okongakawɔ djamba djɛ Bokfɔ l’eloko lukuluku?
7 Edjinge ɛnkɔkɔ enkina ntɔnɔlaka lá nkongi djɛwɔ. Iwɔ nkongelaka djamba djɛ Bokfɔ l’eloko lukuluku ladjikɛnde efula k’akambo w’otepelakawɔ l’eteyi ndendanaka la kɛnɛ kɛ Kristo ny’anto 144 000 wangɔlɔndjɛ esanga lande yongonanghela anto wa nkɔmano lá Ɛlɔndjɛlɔ k’ɛnɔnyi kinunu. Má ɛlɔndjɛlɔ kɛ Nkfumi kɛwɔ Yeso Kristo, tɔlɔndjɛ tɔngɔlɔndjɛ l’olongo tɔsɔ wangokotshɛ djɛ nkadjimola looko paradiso la wangokotshɛ anto dj’iwɔ ndjala djɔ. Ɔsɔngo wɔlɔ le nunu dj’anto wingelaka lá Bokfɔ djɛ ntɔkɔmɛ kɛnɛ keheta djɛ nkanela ekotshamelo kɛ prɔfɛsiya yɛ Bible y’otanaso lá Izaya 35:5, 6; 65:21-23; edjinge lá Ndjiso 21:3, 4. Má nkanela wopo wɔ yongotoyala l’andja wa bango wasɔ iwɔ l’anto wawɔ wa ngandji wasɔ, iwɔ nkembɛka nkongi djɛwɔ dj’etsho weyaye la nkano djɛwɔ dj’ipa ntshika nkambela Yehova.—Mat. 24:13; Nga. 6:9.
8. Elonga kenkina kɛkɔnge kɛ ɛnkɔkɔ enkina engelakawɔ lá Bokfɔ?
8 Tolende elonga kenkina kɛ ɛnkɔkɔ enkina ingelakawɔ lá Bokfɔ. Iwɔ nkɔpaka nyɛnyɛ ngandji kɛwɔ la osukɔ wɔwɔ te ankfutami w’avuta. Otepela wɔ Ndjambe w’ewoyɛka ante, djokanelo djɛ ma ma ngoyala l’antenyɛ ankfutami w’avuta la wanɛ walekɔ la nkongi djɛ mbika lá looko. Lá wopo wɔkɔnge? Nyontshɔ tokolenda ndjɔmbɔmba imangha.
9. Kɛkɔnge kɛ prɔfɛsi kɛ Zakari 8:23 ɛnyɛnde lá kɛnɛ kelendana la wopo w’ɛnkɔkɔ enkina ɔsakawɔ ankfutami w’avuta?
9 Wala Zakari 8:23. Prɔfɛsi kɛsɔ nyɛnyɛka lá yopo yɛ wɔlɔ wopo w’ɛnkɔkɔ enkina ɔsakawɔ wananyɔ l’ankaana yɛwɔ y’ankfutami w’avuta. Totepela tɔnɛ ‘ose Juda’ la ‘nyo’ ndendanaka ngo la iloyi imɔ yɛ antshikadji y’ankfutami. (Ɔrɔ. 2:28, 29) Anto ‘10 wemá etepela enkfumɔ la ewila enkfumɔ’ oyɛwɔnde ɛnkɔkɔ enkina. Iwɔ ‘nkotaka,’ ntepela ente mamanaka l’ankfutami w’avuta má ndjala esanga la wɔ la nkɔmano nkfumɔ l’etolo kɛ piyɔɔ. Djɛkondeke, lá winá wɔ Bokfɔ, ɛnkɔkɔ enkina nyɛnyɛka djokanelo djɛwɔ djɛ ma ma iwɔ l’ankfutami w’avuta má nsanghana esanga lawɔ.
10. Kɛkɔnge kɛ Yehova ndananghe djɛ nkotshɛ prɔfɛsi kelá Ezekiyɛlɛ 37:15-19, 24, 25?
10 Wala Ezekiyɛlɛ 37:15-19, 24, 25. Djɛ nkotshɛ prɔfɛsi kɛsɔ, Yehova ananghaka djɛ ankfutami w’avuta l’ɛnkɔkɔ enkina nkamba esanga mpɛka la mpɛka. Prɔfɛsi kɛsɔ ketepela nkambo djɛ totenyi tɔ totamba tope. Wanɛ walekɔ la nkongi djɛ ntowika l’olongo walekɔ etengo itenyi y’otamba ‘yɛ Juda’ (ikɔlɛ yɛ yasɔnɛ nkfumi k’Isariyɛlɛ), edjinge wanɛ walekɔ la nkongi djɛ mbika lanɛ lá looko walekɔ etengo itenyi y’otamba ‘yɛ Efrayimɛ.’ e Yehova asanganyɛka eloyi epe wɛsɔ dj’iwɔ ndjala ‘itenyi imɔ y’otamba.’ Kɛsɔ nsakisolaka dj’iwɔ wakamba esanga l’ɛlɔndjɛlɔ kɛ Nkfumi kɛwɔ kɛmɔ, Kristo Yeso. Ɛnɔnyi enkfumɔ, ankfutami w’avuta l’ɛnkɔkɔ enkina ndjingelaka lá Bokfɔ, ape etengo eloyi epe wembatɔna, koko etengo ‘oloyi ɔmɔ’ l’ɛlɔndjɛlɔ kɛ ‘onami ɔmɔ w’ɛnkɔkɔ.’—Dj. 10:16.
11. Yopo yɛ ntondo yɛkɔnge ‘y’ɛnkɔkɔ enkina’ w’otepelawɔ la Mateo 25:31-36, 40 ɛnyɛwɔ osukɔ wɔwɔ te wananyɔ wa Kristo?
11 Wala Mateo 25:31-36, 40. ‘Ɛnkɔkɔ’ w’otepelawɔ lá ndjɔmbɔmba kɛnɛ oyɛwɔnde djingingi djɛ anto wa wɔlɔ wel’etsho w’ekomo walekɔ la nkongi djɛ mbika lá looko, ntepela ente ɛnkɔkɔ enkina. Iwɔ nsukaka wananyɔ wa Akristo w’antshikadji y’ankfutami w’avuta la nkɔmano nkfumɔ, ntondontondo má ndaakotshɛ dj’iwɔ nkotshɛ odjito w’ekekete w’iyawa, ntepela ente olemo wɔ mpoposanyɛ la wɔ nkfumba anto ambeki l’andja w’otondo.—Mat. 24:14; 28:19, 20.
12-13. Topo tonkina tɔkɔnge tɔ ɛnkɔkɔ enkina osukakawɔ wananyɔ wa Kristo?
12 Ɛnɔnyi enkfumɔ lá mbengo yɛwɔlama otsho wɔ Bokfɔ, ɛnkɔkɔ enkina nyɛnyɛka osukɔ wɔwɔ te wananyɔ w’Akristo má ndapɛyɛ tshɛ lá kampanyɛ kenanghemaka l’andja w’otondo kɛ ndjeta anto wakɔpa, dj’iwɔ ndosanghana lawɔ lá Bokfɔ. (Lenda ipapango “ Wɛ omboshiyɛ ndalɔngɔsɔla lá nkambo djɛ eleko kɛ Bokfɔ?”) Iwɔ nkotshɛka lonkina má ndɔsa nonghanyi inkfumɔ yelekɔ djonyi djɛ Bokfɔ nanghema lá ntshumano nkfumɔ djel’andja w’otondo ayale kaanga ntshumano djɛsɔ wapalekɔ l’anto walɛ mampa la vinyo. Ɛnkɔkɔ enkina nsasangaka djɛ nsuka wananyɔ wa Kristo lá topo tɔsɔ. Ɛnkɔkɔ enkina wɛsɔ ndjewaka ambɔ Yeso ndɔsaka kɛnɛ k’onanghelawɔ wananyɔ wande w’ankfutami etengo nde nyɔmɛlɛ ndeke onanghelawɔ.—Mat. 25:37-40.
13 Donga nkina djɛkɔnge dj’ingelakaso isankfumɔ lá Bokfɔ, ayale kaanga nkongi djɛkɔnge dj’okotshɛso?
DONGA DJ’INGELAKASO ISANKFUMƆ LÁ BOKFƆ
14. Wopo wɔkɔnge Yehova nya Yeso yatɛnyɛ ngandji kɛwɔ k’epa wɔsɔdjɔmba?
14 Tolekɔ la djedjɛ efula lá ngandji kɛ Yehova nya Yeso iyatɛnyɛ. Yehova ambɔtɛnyɛ ngandji kɛnde lá topo efula, koko yopo imɔtshi ndeka topo tonkina tonkfumɔ. Ndjambe kɛso ɛnyɛka ngandji kɛnde kɛ ndapekala má ntoma Wɔnande wɔ ntshina efula djɛ nde ndɛna ndjolo la ndovɔ lá nkambo djɛso. (Dj. 3:16) Iso nsipisoyɛka ente ngole Yeso atɛnyɛka ngandji k’efula má ndjawola l’ɛkɔpa kɛnde djɛ mpɛyɛ lowiko lɔnde lá wapɔ wɔso. (Dj. 15:13) Topayalaki lotshinda l’akoka wa mfuta Yehova nya Yeso má ngandji kɛ yatɛnyɛ. Koko iso nkoka nyɛnyɛ djedjɛ djɛso má yopo yɛ lowiko lowikaso mfu inkfumɔ. (Kɔl. 3:15) Lonkina iso ndjingelaka lá Bokfɔ djɛ mvungɔka ngandji kɛ yatɛnyɛ la dj’iso ndawɛnyɛ ngandji k’awokaso.
15. Lamo ayale ankfutami w’avuta kana ɛnkɔkɔ enkina ɔsakawɔ oshinga wɔ mbendo la ntshina efula?
15 Iso ndɔsaka opapɛyɛ w’oshinga wɔ mbendo la ntshina efula. (Mat. 20:28) Ankfutami w’avuta ndɔsaka oshinga wɔ mbendo la ntshina efula ladjikɛnde mpeyi m’oshinga wɔ mbendo wɔsɔ ndeke oyɛwɔ la nkongi djɛ wɔlɔ lombembe djɛsɔ. M’ɔtɛ wɔ djawo djɛwɔ t’olambo wɔ Kristo, Yehova ndaawɔsaka etengo anto wa wɔlɔ la ndaawawolaka etengo wana wande. (Ɔrɔ. 5:1; 8:15-17, 23) Edjinge ɛnkɔkɔ enkina walekɔ la djedjɛ lombombe l’oshinga wɔ mbendo. Má djawo djɛwɔ t’ekila wetshanghanisa wɛ Kristo, iwɔ ndɔsamaka etengo anto wa piyɔɔ lá ntondo kɛ Ndjambe, etengo anto wɛlama ndookambela olemo w’ekina, la walekɔ la nkongi djɛ mba ewiko lá ‘ndjolo k’ekekete.’ (Ndj. 7:13-15) Yopo inkina yɛ ankfutami w’avuta kana ɛnkɔkɔ enkina ɛnyɛkawɔ djedjɛ djɛwɔ tá oshinga wɔ mbendo nde, má ndjingelaka lá Bokfɔ ɛnɔnyi enkfumɔ.
16. Elonga kenkina kɛkɔnge k’ingelakaso lá Bokfɔ?
16 Elonga kenkina k’ingalakaso lá Bokfɔnde, iso nkɔpaka nɛmɛyɛ Yeso. Ayale nkongi djɛkɔnge djelekɔ laso t’etsho weyaye, isankfumɔ nkɔpaka nɛmɛyɛ ɔlɛmbɛ wɔ Yeso ndapɛyɛ l’otsho w’ekomo wɔ ndananghe Bokfɔ: ‘Nyonghonanghake nkɔkɔnɛ djɛ mvungɔka lemi.’—1 Kɔ. 11:23, 24.
WOPO W’OWASO WAPƆ ISANKFUMƆ MÁ NDJINGELAKA LÁ BOKFƆ
17. Wopo wɔkɔnge Bokfɔ otokotshɛwɔ djɛ ndasukanyɛ la Yehova?
17 Iso ndekaka ndasukanyɛ la Yehova. (Dja. 4:8) Etengo sɛnaki, Bokfɔ ntɔpɛyɛka mbamba kɛ nkanela lá nkongi djɛ Yehova ndatɔpɛyɛ la kɛ ntɔnɔla lá ngandji k’efula kɛ ndatɛnyɛ. (Jɛr. 29:11; 1 Dj. 4:8-10) Winá w’ɔtɔnɔlaso lá nkongi djɛso djɛ nsɔsɔlɔ djɛ l’etsho weyaye edjinge lá ngandji kɛ Ndjamba kepa l’ekomo ketoka Yehova, iso mfudjɛka ngandji kɛso te Yehova la nkembɛka djokanelo djɛso lande.—Ɔrɔ. 8:38, 39.
18. Ntɔnɔla lá ndjɔmbɔmba kɛ Yeso ntotshindaka djɛ nangha nge?
18 Iso ntshindamaka djɛ ndjokola ndjɔmbɔmba kɛ Yeso. (1 Pɛ. 2:21) L’etsho we tá Bokfɔ, iso ndjilaka yimba l’ɛkɔndɔ welá Bible welendana la lobengo l’ekomo lɔ lowiko lɔ Yeso lanɛ lá looko, nyɔyi kɛnde la ekfundwelo kɛnde. Masɔ la nkɔlɔ djɛ Bokfɔ, djamba djɛpɛyama ntovungolaka ngandji kɛ Yeso ndɔtɛnyɛ. (Ɛfɛ. 5:2; 1 Dj. 3:16) Winá w’owalaso akambo walendana la ndjɔmbɔmba kɛ ndapekala kɛ Yeso la ɔtɔnɔlaso l’eteyi, iso ntshindamaka djɛ ‘nkɛndaka etengo onto wɔsɔ ndakɛndɛ.’—1 Dj. 2:6.
19. Wopo wɔkɔnge w’okokaso ntshikala lá ngandji kɛ Ndjambe?
19 Iso ntshindamaka djɛ ndɔsa nkano djɛ ntshikala lá ngandji kɛ Ndjambe. (Yuda 20, 21) Iso ntshikalaka lá ngandji kɛ Ndjambe má nangha kenkfumɔ k’okokaso nangha djɛ ndɔlɛmɛyɛ, nkinyɛ djiina djɛnde la nsasangɛ oloko wɔnde. (Woo. 27:11; Mat. 6:9; 1 Dj. 5:3) Nsanghanaka lá Bokfɔ ntotshindaka djɛ ndeka ndjila welo djɛ mbika mfu inkfumɔ lá yopo yɛ nshimela Yehova ente, ‘lemi nkɔpaka ntshikala lá ngandji kɛko lotshinda lotshinda!’
20. Donga djɛ wɔlɔ djɛkɔnge dj’ingelakaso lá Bokfɔ?
20 Kaanga nkongi djɛso oyɛwɔnde djɛ ntowika lotshinda lotshinda l’olongo kana lá looko, tolekɔ la ndonga djɛ wɔlɔ djɛ ndjingela lá Bokfɔ. Ɛnɔnyi enkfumɔ winá wosanghanaso esanga lá datɛ djɛsɔ, iso mvungɔka nyɔyi k’onto ɔmɔtshi w’ɔkɔpaso efula, Yeso Kristo. Nkambo deka djonyi nde, iso mvungɔka enanghedji kɛ ngandji keleka ekekete, ntepela ente ngandji kɛtɛnyisa Yehova má ntɔpɛyɛ Wɔnande etengo oshinga wɔ mbendo. Ɔnɔnyi wɔnɛ, Bokfɔ ngonanghema la nkɔlɔ djɛ lofu l’atano, Ngɔndɔ k’anɛyi 15, 2022. Iso nkɔpaka Yehova nya Wɔnande, djɛkɔndeke lofu lɔ Yeso ndavu lɔsɔ, ekete kengoleka djonyi leso nde ndjingela lá Bokfɔ.
YEEMBO 16 Tolumɛ Yah, m’ɔtɛ wɔ Wɔnande onkfutami w’avuta (lá Otetela)
a Kaanga ntsha nkongi djɛso oyɛwɔnde djɛ ntowika l’olongo kana lá paradiso kelá looko, ɛnɔnyi enkfumɔ iso nkongelaka l’eloko lukuluku djɛ ndjingela lá Bokfɔ. Lá djamba djɛnɛ, tongoshishima donga djɛ wɔlɔ djemá Afunelo dj’ɛnyɛ lamo ingelakaso lá Bokfɔ ɛnɔnyi enkfumɔ, la wopo w’okokaso mba wapɔ má nangha nghɔsɔ.
b Ekadjimwelo kɛ Bible (Today’s English Version) nkadjimolaka etepela wɛsɔ ante: “Nyonghonanghake nkɔkɔnɛ djɛ mvungɔka lemi” edjinge kɛ (The Jerusalem Bible) “Nyonghonanghake nkɔkɔnɛ etengo mvungo kɛmi.”
c Djɛ ndjewa akambo efula walendana l’isambi yɛ bango la isambi y’Onkfumi, lenda djamba djelekɔ l’ɔtɛ wɔ djoyi ante: “Nyo nyongoyala ‘Onkfumi w’Ankfundji,’” lá Etange k’Olami kɛ Ngɔndɔ kɛ djomi 15, 2014, nki. 15-17. (lá Otetela)
d DJƐ NDJOKA WƆLƆ: Itepela antshikadji w’ankfutami ndendanaka l’Akristo w’ankfutami walekɔ la lowiko winá wɔsɔ lá looko.
e Djɛ ndjewa akambo ankina walendana la prɔfɛsi kelekɔ lá Ezekiyɛlɛ shapitrɛ 37 ketepela nkambo djɛ totenyi tope tɔ totamba, lenda onkanda Ɔtɛmwɛlɔ wa pudipudi wa Jehowa wambokaloyama!, nki. 130-135, ite. 3-17.
