1-3. Ekakasano ɛmɔtshi wɛkɔnge wekoka nkomɛ enkambi wɛ Yehova djɛ ndela?

 WƐ OVUNGƆ mbala k’ekomo kɛ ngalele? Lá mbamba imɔtshi tongɔkɛdjɛke wisoyi w’osasa. Koko mbala efula, tongoleleke mande tolekɔ la yɛnyi y’efula l’oloko. Ndjɔmbɔmba, iso ndelaka winá w’onto ɔmɔtshi wɔkɔpaso ovɔnde. Lorilei, nkaana kɛmɔtshi kelá États-Unis afunaka ante: “Lá mbamba imɔtshi yɛnyi yɛ nyɔyi kɛ wɔnami w’omoto yayalaki efula, ko ɛnamaki etengo lako ekete kekoka nkembɛ lemi. Lá winá wɛ nghɔsɔ, ndawopolaki wopo wɔ efula kɛ yɛnyi yɛ mokaka l’oloko okokawɔ nshila.” b

² Iso ndelaka lonkina m’ɔtɛ wɔ donga nkina. Hiromi, nkaana kɛ yat’ekalo kemá Japon, atepelaka ante: “Mbala efula langoyalake la yɛnyi efula ladjikɛnde anto wapomana la lemi l’olemo w’ipoposanyɛ wapakɔpɛ ndjekameyɛ losango l’imá Bible. Mbala imɔtshi langɔlɔmbake Yehova la wisɔyi lá wiso djɛ nde nkotshɛ lemi djɛ ndjisola anto wahona akambo wa nsɔsɔlɔ.”

³ Ongoyawokake lá winá ɛmɔtshi etengo nkaana kɛso kɛsɔ? Efula l’anteyi kɛso wangoyawokake nghɔsɔ. (1 Pɛ. 5:9) Iso nkɔpaka ‘nkambela Yehova l’osasa,’ koko tokoka ndokambela la wisɔyi lá wiso, m’ɔtɛ wɔ yɛnyi, ɔlɛmbɛlɔ, kana ekiyano enkina w’ilá nkɔmano djɛso te Ndjambe l’ohemba. (Yee. 6:6; 100:2) Ko okokaso nangha nge ntsha tɛna ndjolo l’ekiyano wɛ nghɔsɔ?

4. Kɛkɔnge k’ɔkɔpaso nyɛna lá djamba djɛnɛ?

⁴ Iso nkoka mba elakanyelo efula má ndjɔmbɔmba kɛ Yeso. Lá mbamba imɔtshi, edjinge nde apomanaka l’akambo wa yɛnyi efula w’okomisa djɛ ‘ndela.’ (Dj. 11:35; Luka 19:41; 22:44;  Heb. 5:7) Nyontshɔ tokolenda akambo wakɔ. Winá wɔ sotashishima akambo wakɔ, tɔngɛna elakanyelo w’okokaso mba m’eteyi. Tɔngɛna lonkina kɛnɛ k’okokaso nangha djɛ ndongela ekakasano wɛkɔ wetokomɛ djɛ ndela.

5. Olakanyelo wɔkɔnge w’owaso lá nkambo djɛ Yeso m’ɔkɔndɔ wolekɔ lá Djɔanɛ 11:32-36?

⁵ L’eleko kɛ mɔngha ankishi, lá 32 D.D., Lazaro, ilongo yɛ wɔlɔ yɛ Yeso akfɔka olando ko avɔka. (Dj. 11:3, 14) Mpame kɛsɔ ayalaki l’ankaana ipe, Mariya nya Maata, edjinge Yeso akɔpaki nkfumbo kɛsɔ efula. Amato ape wasɔ wasolongɔka la yɛnyi yɛ nyɔnyi kɛ nkaana kɛwɔ. M’ɔkɔngɔ wɔ Lazaro mvɔ, Yeso ɔsaka lɔkɛndɔ tá Betani, l’edjena kɛ Mariya nya Maata iyayalaka. Winá wɔ Maata ndoke ante Yeso ayaye, nde alotaka djɛ ntopomanyɛ. Kokanela yɛnyi yeyalisa lande winá wɔ ndatepela ante: ‘Nkfumi, otayalawɔnde wɛ oyalaka lanɛ, ntshimi nkaana kɛmi atasamba mvɔ.’ (Dj. 11:21) Ataheta ilá, winá wɔ Yeso ndɛnyi Mariya nya anto ankina walela, edjinge nde ‘alelaka.’—Wala Djɔanɛ 11:32-36.

6. Lamo Yeso ndalele lá mbamba kɛnɛ?

⁶ Lamo Yeso ndalele lá mbamba kɛsɔ? Onkanda Étude perspicace des Écritures nkadjimolaka ante: “Nyɔyi kɛ ilongo yɛnde Lazaro la yɛnyi y’efula y’eyalaki l’ankaana yɛ Lazaro atshindaka Yeso djɛ ‘nsekumɔ edjinge ndela.’” c Mbala imɔtshi Yeso akanelaka paa kɛ Lazaro ndokaka winá wɔ ndayalaka l’olando la wopo wɔ ndoyawoke winá wɔ ndasipisoyɛ ante apangowika. Lonkina, Yeso alelaka má wopo wɔ ndɛnyi yɛnyi yeyalaki la Mariya nya Maata má nyɔyi kɛ nkaana kɛwɔ. Ntsha ombovusɛka ilongo yɛko imɔtshi kana ose nkfumo kɛko ɔmɔtshi, mbɔ lako ehamo wɛ okaka wopo wɔ yɛnyi yɛkɔ. Tokolenda elakanyelo esato w’okokaso mba má ɔkɔndɔ wɔnɛ.

7. Olakanyelo wɔkɔnge w’owaso lá nkambo djɛ Yehova má wopo wɔ Yeso ndalele ilongo yɛnde?

⁷ Yehova nsipisoyɛka wopo woyawokɛ. Yeso  ndeke ‘loleka mfɛna’ la Papa kɛnde. (Heb. 1:3) Winá wɔ Yeso ndalele, nde ɛnyɛka wopo woyawoka Papa kɛnde ntsha tombovusɛ onto wɔso wɔ ngandji. (Dj. 14:9) Ntsha okfulumeyɛ yɛnyi yɛ nyɔyi k’onto wɔko ɔmɔtshi wɔ ngandji, yashikikɛ ente Yehova apakome ngo lá nyɛna yɛnyi yɛko toko, koko nde ndawilaka l’edjena kɛko. Nde nkɔpaka nkɔnɔla oloko wɔko wombatshɛ.—Yee. 34:18; 147:3.

8. Lamo okakaso ndashikikɛ ente Yeso angokfundola anto waso wa ngandji?

⁸ Yeso nkɔpaka nkfundola anto wako wa ngandji. Ndambo lá ntondo kɛ nde ndela, Yeso ashikikɛka Maata ante: ‘Nkaana kɛko angokfundɔ.’ Maata awolaka Yeso. (Dj. 11:23-27) Etengo ndayalaka ntɛmɔdji kɛ nkɔmano kɛ Yehova, ipa l’ehamo Maata okaka nkambo djɛ nkfundwelo djenanghemisa me Elidja nya Elisha. (1 Nk. 17:17-24; 2 Nk. 4:32-37) Edjinge mbala imɔtshi nde okaka lonkina nkfundwelo dj’enanghisa Yeso. (Luka 7:11-15; 8:41, 42, 49-56) Ole wɛ okoka ndashikikɛ ente ɔngɛnana lonkina l’anto wako wa ngandji wavwisa. Delo djelelisa Yeso winá wɔ ndakembɛka tolongo tɔnde toyalisa la yɛnyi efula, alekɔ ilembetelo yetoshikikɛ ente nde nkombolaka nkfundola anto má nyɔyi!

9. Lá ndjɔmbɔmba kɛ Yeso, wopo wɔkɔnge w’okokɛ nsuka wanɛ walekɔ la yɛnyi? Pɛyɛ ndjɔmbɔmba.

⁹ Wɛ nkoka nsuka wanɛ walekɔ la yɛnyi. Yeso atakoma ngo lá ndela nde nya Maata la Mariya toko, koko lonkina nde áwekameyɛka edjinge ákembɛka. Iso nkoka nangha wopo wɔk’ɔmɔ te wanɛ walekɔ la yɛnyi. Dan, ikokolo imɔtshi yelá Australie, atepelaka ante: “M’ɔkɔngɔ wɔ lemi mvusɛ wadjɛmi, ndjalaka la djonyi dj’osukɔ. Wananyɔ efula la wadji wawɔ wayalaki winá enkfumɔ entshupa la lemi otsho mbile ngo djɛ nsawoyɛka lemi. Iwɔ wantshikaki djɛ lemi ndela edjinge watakamɔki winá wɔ malelaka. Lonkina, iwɔ wankotshɛki lá topo tɛnama papoo, ndjɔmbɔmba nsolela otuka, nsombela nkete má lobengo kana nkatsheyɛ nkete djɛ ndɛ lá winá wɔ motayalaka la wolo wɔ nangha akambo wasɔ. Lonkina, iwɔ walɔmbaki la lemi mbala la mbala. Iwɔ wɛnyɛka djɛ walekɔ tolongo tɔ nsɔsɔlɔ la koko, wananyɔ w’okokami ‘ndjɛkɛ oloko lá winá wɔ ndjolo.’”—Woo. 17:17.

10. Kɔkɔndɔla ɔkɔndɔ wolekɔ lá Luka 19:36-40.

¹⁰ Yeso akomaka lá Jerusalɛma lá Nisana 9, 33 D.D. Winá wɔ ndakome entshupa la ngando kɛsɔ, oloyi w’anto watshumanaka ko wawangaka ntowalela ntshendja djɛwɔ lá mboka djɛ nyɛnyɛ ente wambowawola etengo Nkfumi kɛwɔ. Ɔsɔ ayalaka nsɔsɔlɔ mbamba k’osasa efula. (Wala Luka 19:36-40.) Mbala imɔtshi ambeki wande watakanela djɛ nkambo mɔtshi djeyisa ndonaghema l’ɔkɔngɔ, ngonanghema. ‘Winá wɔ Yeso ndayale entshupa djɛ nkoma, nde atangelaka ngando ko alelaka.’ La wisɔyi lá wiso, Yeso ewoyɛka nkambo mɔtshi djɛ yɛnyi djeyisa ndokomela ase Jerusalɛmɛ.—Luka 19:41-44.

11. Lamo Yeso ndalele lá nkambo dj’anto w’intasɛki lá Jerusalɛmɛ?

¹¹ Yeso ayalaka la yɛnyi l’oloko ladjikɛnde nde ewaki ante kaanga iyolongola l’osasa onkfumɔ, ase mbandja kɛwɔ washiyɛka nyɛnyɛ dj’iwɔ wangotona losango l’Onkfumi. Eposelo wengoyala la nkambo djɛsɔnde, Jerusalɛmɛ ngotshitana edjinge onto onkfumɔ wongoyala winá w’otshitanelo wɔ ngando kɛsɔ angɔtɔlɔma tá lonfumbe. (Luka 21:20-24) Nkambo djɛ yɛnyinde, ngo ngete Yeso ndatepela, efula k’anto w’otonaka. Wopo wɔkɔnge anto efula elolawɔ lá losango l’Onkfumi l’edjena k’oyalɛ? Ntsha ngo anto daambi  toko ndeke lawolaka akambo wa nsɔsɔlɔ, olakanyelo wɔkɔnge w’okokɛ mba má delo djɛ Yeso? Tokolenda elakanyelo enkina esato.

12. Olakanyelo wɔkɔnge w’okokaso mba lá nkambo djɛ Yehova má wopo wɔ Yeso ndalele lá nkambo djɛ anto wa ndasambishɛka?

¹² Yehova ndakiyanyɛka lá nkambo dj’anto. Delo djɛ Yeso djɛsɔ ntovungolaka djɛ Yehova ndakiyanyɛka efula lá nkambo dj’anto. ‘Nde apakɔpɛ kaanga onto 1 mvɔ, koko nde nkombolaka dj’anto ankfumɔ mba mbamba kɛ ndapɛla.’ (2 Pɛ. 3:9) Lɔɔko kɛnɛ iso nyɛnyɛka ente iso ndakiyanyɛka lá nkambo djɛ winaso anto, ma nangha la wolo djɛ ndakotshɛ dj’iwɔ ndjeka akambo walendana la losango lɔ wɔlɔ l’Onkfumi.—Mat. 22:39. d

13-14. Wopo wɔkɔnge Yeso ndɛnyɛ ante nde ndjokaka anto nkɛtshi, ko wopo wɔkɔnge w’okokaso ndowokola?

¹³ Yeso akambaka la wolo efula l’olemo w’ipoposanyɛ. Nde ɛnyɛka ngandji kɛnde te anto má nkindjɛ ndaalakanyɛ lá mbamba inkfumɔ. (Luka 19:47, 48) Kɛkɔnge k’otshindaki djɛ nangha nghɔsɔ? Yeso awokaki nkɛtshi. Lá winá ɛmɔtshi, anto efula wakɔpaki ndjekameyɛ etepela wɛ Yeso ko nde nya ambeki wande ‘watakokaki mba mbamba kɛ ndɛ kaanga ekete.’ (Mar. 3:20) Lonkina nde ɔsaki winá kaanga l’otsho djɛ nsawola l’anto amɔtshi wawaki mbamba ngo l’otsho. (Dj. 3:1, 2) Efula k’anto wekameyisa Yeso má bango watakoma ambeki wande. Koko onto onkfumɔ w’owekameyisa awaka elakanyelo wɛ djɔ. Lɔɔko kɛnɛ iso nkɔpaka mpɛyɛ onto onkfumɔ mbamba kɛ ndjekameyɛ losango lɔ wɔlɔ. (Ele. 10:42) Djɛ nangha nkambo djɛsɔ, nkoka ndjala djonyi iso ntshikitanyɛ yopo yɛso yɛ mpoposanyɛ.

¹⁴ Yala entshupa djɛ nangha etshikitano welekɔ djonyi. Ntsha topatshikitanyɛ winá wohetshɛso l’olemo w’ipoposanyɛ, tokoka nsamba mpomana l’anto wakɔpa ndjekameyɛ losango lɔ wɔlɔ. Yat’ekalo imɔtshi yetawɔ Matilda ntepelaka ante: “Lemi isa womɛmi tongowembolake anto lá winá wetshikitanyi. La nkɛsɛ, tongopoposanyɛke lá djena dj’onanghawɔ opoto. La midi winá wɔ anto efula wamboheeta iso mpoposanyɛka lá prezantwarɛ. La nkɔlɔ, tɔngɛnake djonyi ntana anto lá ndjena  djɛwɔ.” Topakoke mpoposanyɛka ngo lá winá wolekɔ wɔlɔ leso, koko iso ladjɛ ndjala entshupa djɛ ntshikitanyɛ nonghanyi kɛso, ko mpoposanyɛ lá winá w’okokaso ntana anto. Ntsha iso nangha nghɔsɔ, tongosasangɛ Yehova.

15. Lá nkilika Luka 22:39-44, kɛkɔnge kehetisa l’otsho w’ekomo wɔ lowiko lɔ Yeso lanɛ lá looko?

¹⁵ La nkɔlɔ djɛ Nisana 14, 33 D.D., Yeso atshɔka tá bedji djɛ Ngɛtɛsɛmanɛ. L’eteyi nde adjipolaka Yehova oloko wɔnde. (Wala Luka 22:39-44.) Lá winá wɛ ndjolo wɛsɔ ndeke Yeso ‘ndananghe mbɔndɔ . . . la tɛɛndjɛ edjinge la wisɔyi lá wiso.’ (Heb. 5:7) Kɛkɔnge kɛ Yeso ndalɔmbaka l’otsho w’ekomo wɔ ntondo kɛ nyɔnyi kɛnde wɔsɔ? Nde alɔmbaki djɛ mba wolo wɔ ntshikala la nkɔmano te Yehova la nangha ɛkɔpa kɛnde. Yehova okaka ndɔmbɔ yɛ m’anse k’oloko yɛ Wɔnande yɛsɔ ko atomaka ondjelo djɛ ndookembɛ.

16. Lamo Yeso ndayale la yɛnyi efula winá wɔ ndalɔmbaka lá bedji djɛ Ngɛtɛsɛmanɛ?

¹⁶ Ape l’ehamo Yeso alelaka winá wɔ ndalɔmbaka lá bedji djɛ Ngɛtɛsɛmanɛ ladjikɛnde nde ayakiyanyɛki lá wopo wɔ anto yɔngɔwɔsa etengo onto wopalɛmɛyɛ djiina djɛ Ndjambe. Lonkina nde ewaki odjito w’ekekete woyalaki lande, wɔ nseela djiina djɛ Papa kɛnde. Ntsha wɛ onkfulumeyɛ nkambo mɔtshi djɛ yɛnyi dj’ilá nkɔmano djɛko te Yehova l’ohemba, olakanyelo wɔkɔnge wokokɛ mba má delo djɛ Yeso? Tolende elakanyelo enkina esato.

17. Olakanyelo wɔkɔnge w’okokaso mba lá nkambo djɛ Yehova lá wopo wɔ ndakadjimola ndɔmbɔ yɛ Yeso yɛ m’anse k’oloko?

¹⁷ Yehova ndjekameyɛka mbɔndɔ yɛko. Yehova ekameyɛka mbɔndɔ yɛ Yeso yɛ m’anse k’oloko. Lamo? Ladjikɛnde okiyano wɔ ntondo wɔ Yeso yayalende ntshikala la nkɔmano te Papa kɛnde la nseela djiina djɛnde. Ntsha okiyano wɔso wɔ ntondo oyɛwɔnde wɔ ntshikala la nkɔmano te Yehova la nseela djiina djɛnde, nde angokadjimola lá ndɔmbɔ yɛso yohonaso okotshɔ.—Yee. 145:18, 19.

18. Lá topo tɔkɔnge tɔ Yeso oyɛnde ilongo yeyawila l’edjena kɛso?

¹⁸ Yeso nsipisoyɛka wopo woyawokɛ. Winá woyɛso l’ekiyano, tolekɔ l’osasa wɔ nkembɛma me ilongo yeyawila l’edjena kɛso edjinge yepomanisa l’ehemba w’etengo wɛso. Yeso  ndeke ilongo yɛsɔ. Nde ndjewaka kɛnɛ kesakisola ndɛmba la ndjala la djonyi dj’okotshɔ. Nde nsipisoyɛka wɛdju wɛso edjinge nde nanghaka dj’iso mba osukɔ woyɛso la djonyi ‘lá winá w’ɛdje.’ (Heb. 4:15, 16) Ngo ngete Yeso ndawola okotshɔ w’ondjelo lá bedji djɛ Ngɛtɛsɛmanɛ, edjinge iso ladjɛ ndjala entshupa djɛ ndjawola okotshɔ wɔtɔpɛyɛ Yehova, ayale má lotshimbo l’enkanda, l’avideo, lɔ djamba mɔtshi, kana má mbembo kekembɛ kɛ ikokolo kana ilongo yembotshunda lá nyuma.

19. Wopo wɔkɔnge wokokɛ mba lokembo winá wopomanɛ l’ekakasano wekoka ndjila nkɔmano djɛko te Ndjambe l’ohemba? Pɛyɛ ndjɔmbɔmba.

¹⁹ Yehova angɔtɔpɛyɛ ‘vu djɛ Ndjambe.’ Wopo wɔkɔnge Yehova ndongotokembɛ? Winá wɔlɔmbaso, tongowa ‘vu djɛ Ndjambe djeleka tokanyi tonkfumɔ.’ (Flp. 4:6, 7) Vu djɛ Yehova ɔtɔpɛyɛnde nkitshakitshɛka eloko wɛsɔ la ntokotshɛka djɛ ndjala l’ikanyi yɛ wɔlɔ. Tokolenda wopo wɔ nsɔsɔlɔ kɛ nkambo djɛsɔ iyɛnama le nkaana k’etawɔ Luz. Nde atepelaka ante: “Mbala efula, langoyawokake olengedji. Lá winá ɛmɔtshi, tokanyi tɔsɔ nkomɛka lemi djɛ nkanela ente Yehova apankɔpɛ. Koko winá wɔ moyawokaka nghɔsɔ, lashimelaki Yehova wopo w’oyawokami, ipa la ntshatshimba. Ko winá wɔ malɔmbaka, ndawokaki wɔlɔ.” Etengo isɔmbɛna má ndjɔmbɔmba kɛnde, iso nkoka mba vu má lɔlɔmbɔ.

20. Elakanyelo wɛkɔnge sombowa má wopo wɔ Yeso ndalele?

²⁰ Ɔsɔngo elakanyelo wekembɛ la wɛ kɔɔ sombowa má wopo wɔ Yeso ndalele! Wambotovungola djɛ nsukaka tolongo tɔso tovusɛ anto wawɔ la djɛ ndjala la djawo ente Yehova nya Yeso wangotosuka winá wovusɛso onto wɔso ɔmɔtshi wɔ ngandji. Tombokeketshama djɛ mpoposanyɛka la ndakanyɛka la nkɛtshi ladjikɛnde Yehova Ndjambe nya Yeso Kristo wangɔtɛnyɛke djekeka djɛ wɔlɔ djɛsɔ. Edjinge tombowa lokembo má ndjewa ente Yehova nya Wɔnande nsipisoyɛka wopo woyawokaso, ntokaka nkɛtshi winá woyɛso wɔdju la nkɔpaka ntokotshɛ djɛ nkfulumeyɛ. Djɛkondeke nyontshɔ tokindjɛke nkamba la kɛnɛ kɛ sombeka tii lofu lɔ Yehova ndongokotshɛ daka djɛnde djɛ wɔlɔ efula djɛ ‘ndjola wisɔyi ankfumɔ má wiso’ waso!—Ndj. 21:4.