1. Wopo wɔkɔnge w’okokaso nsawola la Yehova?

 ISO nsasangaka winá woyɛso esanga l’anto w’okaso ngandji. Antshukanyi nkɔpaka ndjala esanga djɛ nsawola l’anteyi kɛwɔ. Dangala nkɔpaka ndjala esanga la ntombe yɛwɔ. Edjinge isakfumɔ nsasangaka djɛ ndjala esanga la tolongo tɔso t’Akristo. Koko, l’adjiko dj’akambo ankfumɔ wasɔ, iso nkɔpaka nsawola la Ndjambe kɛso. Iso nkoka nangha nkambo djɛsɔ má ndɔlɔmbaka, mbalaka Otepela wɔnde la má ntɔnɔlaka l’alaka wande edjinge lá wekeka wande wa wɔlɔ efula. Winá wɔsaso djɛ nsawola la Yehova welekɔ ntshina efula!—Yee. 139:17.

2. Okakasano wɔkɔnge wopomana laso?

² Kaanga osasangakaso djɛ nsawola la Yehova, tolekɔ l’okakasano ɔmɔtshi. Tolekɔ l’akambo efula wa nangha lá lowiko, ko kɛsɔ nkoka ndjala okakasano leso djɛ mba winá wɔ ndapɛyɛ l’akambo welá nyuma. Elemo welá demba, edjito welá nkfumbo, l’akambo ankina wa djonyi nkoka ntɔsɛla winá efula, ko tokoka ndoyawoka etengo topalekɔ l’onkina la winá wɔ ndɔmba, wɔ ndjeka kana wɔ ntɔnɔla.

3. Nkambo nkina djɛkɔnge djekoka ntɔsɛla winá wɛso?

³ Nkambo nkina dekɔ djeleka ntɔsɛla winá efula. Ntsha topawadjisa, tokoka ndjawola djɛ akambo amɔtshi wapalekɔ nyɛtshi ntɔsɛla winá w’okokaso nkamba la wɛkɔ djɛ ndasukanyɛ la Yehova. Ndjɔmbɔmba, tokolenda nkambo dj’asɛkɛlɔ. Isankfumɔ ndawokaka wɔlɔ winá woyɛso l’asɛkɛlɔ. Koko kaanga asɛkɛlɔ walekɔ wɔlɔ nkoka ntɔsɛla winá w’okokaso ndapɛyɛ l’akambo  welá nyuma. Djɛkondeke iso ladjɛ mvungɔka ente ntshɛkɛlɔ apalekɔ nkambo djeleka djonyi.—Woo. 25:27; 1 Ti. 4:8.

4. Kɛkɔnge kɔkɔpaso nyɛna?

⁴ Lá djamba djɛnɛ, tongoshishima lamo oyɛwɔ djonyi nshikikɛ akambo waleka djonyi lá lowiko lɔsɔ. Tɔngɛna lonkina wopo w’okokaso nkamba la winá wɛso lá yopo yeleka wɔlɔ lá nkambo djɛ Yehova edjinge wapɔ w’okokaso mba má nkamba la winá wɛso la balo.

5. Wopo wɔkɔnge ntɔnɔla lá dako djelá Ɛfɛsɛ 5:15-17 okokawɔ nkotshɛ olangala djɛ nkamba la lowiko lɔnde lá yopo yɛ wɔlɔ?

⁵ Sɔna lowiko loleka wɔlɔ. Dangala wangoyalake l’okakando djɛ ndjewa yopo yeleka wɔlɔ yɛ nkamba la lowiko lɔwɔ. L’onkoko ɔmɔtshi, wetsha welá ankalasa la boto djɛwɔ djepalekɔ Ewakɛ wɛ Yehova nkoka ndakembɛ dj’iwɔ ndjingela ankalasa yel’adjiko dj’iwɔ ndowa elemo wɛ lomo l’andja wanɛ. Ankalasa yɛsɔ nkoka ndaawɔsɛla winá efula. L’onkoko onkina, ambotshi la tolongo tɔl’otshumano nkoka nkembɛ dangala dj’iwɔ mpetshɛ lowiko lɔwɔ l’olemo wɔ Yehova. Kɛkɔnge kekoka nkotshɛ olangala wɔkɔpa Yehova djɛ ndɔsa nkano djɛ wɔlɔ? Nde nkoka mba wapɔ má mbala Ɛfɛsɛ 5:15-17 edjinge ntɔnɔla l’eteyi. (Wala.) M’ɔkɔngɔ wɔ mbala vɛrse djɛsɔ, olangala nkoka ndawopola weepó wɛnɛ: ‘Oye ‘ɛkɔpa kɛ Yehova’? Nkano djɛkɔnge djengosasangɛ? Nkano djɛkɔnge djengonkotshɛ djɛ nkamba la winá wɛmi lá yopo yɛ wɔlɔ?’ Vungɔ ente, ‘etsho wɛnɛ welekɔ nyɛtshi,’ edjinge andja wa nyɛtshi walɔndjɛma me Satana wanɛ wokoma l’ekomo kɛwɔ lako ilá. Djɛkondeke angoyala nkambo djɛ balo leso djɛ nkamba la lowiko lɔso lá yopo yengotokotshɛ djɛ ndasukanyɛ la Yehova.

6. Ɔsɔnɛlɔ wɔkɔnge Mariya ndananghe, ko lamo ɔsɔnɛlɔ wɔsɔ iyayale wɔ balo?

⁶ Shikikɛ akambo waleka djonyi. Lá winá ɛmɔtshi, nkamba la winá wɛso lá yopo yɛ wɔlɔ nsakisolaka nsɔna nkambo mɔtshi l’anteyi k’akambo ape wapalekɔ wɔlɔ. Tongosipisoyɛ nkambo djɛsɔ wɔlɔ má nshishima kɛnɛ kehetisa winá wɔ Yeso ndatshu ntowembola Mariya nya Maata. Ape l’ehamo Maata ayalaka l’osasa efula wɔ ndongola Yeso etengo ɔngangɛnda, djɛnkondeke ndolambelaka dambo dj’ekekete. Koko, ankfunyɛnde Mariya akɔpaka mba wapɔ má mbembo kɛsɔ ko intasɛka l’ekolo wɛ Nkfumi kɛnde djɛ ndjekameyɛ elakanyelo wɛnde. Maata atanangha nyɛtshi, koko Mariya ‘asɔnaka kɛnɛ keleka wɔlɔ.’ (Luka 10:38-42, nɔtɛ) M’ɔkɔngɔ w’etsho ɛmɔtshi, Mariya akokaka vungɛ nkete dj’iyasɛmɛyɛ Yeso lá mbamba kɛsɔ, koko iso nkoka ndashikikɛ ente atavungɛ kaanga ndambo daambi kɛnɛ k’indeke me Yeso lofu lɔsɔ. Ngo ngete Mariya ndasasanga l’itenyi yɛ winá yɛ ndahetshɛ nya Yeso yɛsɔ, iso nsasangaka winá wosawola la Yehova. Ko wopo wɔkɔnge w’okokaso nkamba la winá wɛsɔ lá yopo yɛ wɔlɔ?

7. Lamo oyɛwɔ djonyi ndɔmbaka, ndjekaka, la ntɔnɔlaka?

⁷ Ewa ente lɔlɔmbɔ, wekelo, la ntɔnɔla alekɔ etenyi kɛmɔtshi k’ɔtɛmwɛlɔ wɔso. Winá wɔlɔmbaso, osawolasonde la Papa kɛso kel’olongo, kɛtɔkɔpaka efula. (Yee. 5:7) Winá w’ekaso Bible, iso mbaka ‘balo djɛ Ndjambe,’ kanga lolekɔ Ikɔkɔ yɛ awalo ankfumɔ. (Woo. 2:1-5) Winá wɔtɔnɔlaso, iso ntɔnɔlaka lá kɛnɛ kelendana la nanghedji djɛnde edjinge mvungɔka akambo wa wɔlɔ wɔkɔpande ntonanghela iso l’anto ankina ankfumɔ. Okoka ndjewa yopo yeleka wɔlɔ y’okokɛ nkamba  la winá wɛko? Ko wopo wɔkɔnge wokokaso mba wapɔ má ndambo kɛ winá koyawombelaso lá nkambo djɛsɔ?

8. Olakanyelo wɔkɔnge w’okokaso mba má wopo wɔ Yeso ndakambe la winá wɔ ndayalaka l’osowe?

⁸ Ntsha nkokaka, hona edjena kɛ vu. Tɔkɔtɔnɔla lá ndjɔmbɔmba kɛ Yeso. Ntondo kɛ nde mbanga l’olemo wɔnde w’ipoposanyɛ lanɛ lá looko, Yeso ahetshɛka etsho 40 l’osowe. (Luka 4:1, 2) L’edjena kɛ vu kɛsɔ, Yeso akokaka ndɔmba Papa kɛnde Yehova edjinge ntɔnɔla lá ɛkɔpa kɛnde. Ipa l’ehamo, kɛsɔ kɛlɔngɔsɔlaka Yeso djɛ ndokfulumeyɛ ehemba wokongelaki lá ntondo. Wopo wɔkɔnge wokokɛ mba wapɔ má ndjɔmbɔmba kɛ Yeso? Ntsha wɛ olekɔ l’anteyi kɛ nkfumbo k’ekete, apangoyalaka winá enkfumɔ wɔdju djɛ wɛ mba edjena kɛ vu lá mbandja. Lá mbamba kɛ nghɔsɔ, wɛ nkoka mpona edjena kɛ vu l’edjena kenkina. Kɛsɔ ndeke Julie onanghakande winá wɔkɔpande ndɔsa winá wɔ nsawola nya Yehova lá lɔlɔmbɔ. Nde nya womɛnde wangintasɛke lá France lá mvulu kɛmɔtshi k’intasɛ anto efula, edjinge angoyalake okakasano dj’onto ndjala ngo nyɔmɛlɛ la ipa onto onkina ndofutanyɛ. Julie ntepelaka ante: “Djɛkondeke langotshɔke mfu inkfumɔ tá parkɛ. L’eteyi, langoyalake mɔmɛlɛ, lako ofutano, edjinge langosawolake wɔlɔ isa Yehova.”

9. Kaanga ndayalaka l’akambo efula wa nangha, wopo wɔkɔnge Yeso ndɛnyɛka ante nde ɔsaki djokanelo djɛnde nya Yehova la ntshina?

⁹ Yeso ayalaki l’akambo efula wa nangha lá lowiko. L’ilá k’olemo wɔnde lá looko, eloyi w’anto w’okilikaki, m’idjena yɛnɛ, tá idjena inkina, ko yankfumɔ kɛkɔ wakɔpaki djɛ nde ndaawila yimba. Lá mbamba kɛmɔtshi, ‘ngando k’otondo watshumanaka lá wiso’ djɛ ndɔwɛna. Kaanga yayalaka nghɔsɔ, Yeso alonghanyɛki djɛ mba winá wɔ nkembɛ djokanelo djɛnde nya Yehova. L’inkɛkɛsɛ, nde atshɔka ‘l’idjena y’anto yopalekɔ’ djɛ nde ntosawola ngo nde nya Papa kɛnde toko.—Mar. 1:32-35.

10-11. Lá nkilika Mateo 26:40, 41, dako djɛkɔnge djɛ djonyi Yeso ndapɛyɛ ambeki wande lá bedji djɛ Ngɛtɛsɛmanɛ, ko kɛkɔnge kehetisa?

¹⁰ L’otsho w’ekomo wɔ lowiko lɔnde lanɛ lá looko, lasɔ ko ambokoma l’ekomo k’olemo wɔnde, Yeso ahonaka lonkina edjena kɛ vu djɛ ntɔlɔmba la ntɔtɔnɔla. Nde isolaka edjena kɛ vu kɛsɔ lá bedji djɛ Ngɛtɛsɛmanɛ. (Mat. 26:36) Lá mbamba kɛsɔ, Yeso apɛyɛka ambeki wande alako wɛndje lá kɛnɛ kelendana la lɔlɔmbɔ.

¹¹ Tokolenda kɛnɛ kehetisa. Iwɔ wakomaka lá bedji djɛ Ngɛtɛsɛmanɛ l’otsho wɔ pii, nkoka ndjala ambolekana midi k’otsho. Yeso ashimelaka apɔstɔlɔ dj’iwɔ ‘mbadjɛka,’ ko masɔ nde atshɔka tɔlɔmba. (Mat. 26:37-39)  Koko winá wɔ ndalɔmbaka, iwɔ wetamaka ilɔ. Ko winá wɔ ndaatanaka wambetama, Yeso akembɛka lonkina ante ‘nyowadjɛ la nyokindjɛ ndɔmba.’ (Wala Mateo 26:40, 41.) Nde asipisoyɛka ante oyɛwɔnde la yɛnyi edjinge la lɔlɛmbɔ efula. La nkɛtshi k’enkfumɔ nde awolaka ante ‘demba ndeke wɔdju.’ Koko, mbala ipe inkina, Yeso átanaki ambeki wande wawetshe, l’edjena k’iwɔ ndɔmba.—Mat. 26:42-45.

12. Okokaso nangha mo ntsha lá winá ɛmɔtshi tongoyawokake djɛ topawa wolo wɔ ndɔmba m’ɔtɛ w’ekiyano kana lɔlɛmbɔ?

¹² Sɔna winá wɔ wɔlɔ. Lá winá ɛmɔtshi tokoka ndjala l’ekiyano edjinge la lɔlɛmbɔ efula ko topawa wolo wɔ ndɔmba. Ntsha nkambo djɛsɔ djengokokomelake, ewa ente ape wɛ nghɔmɛlɛ. Ya okokɛ nangha nge? Anto efula wayalaki l’ekfumbo kɛ ndɔmba Yehova l’otsho w’efula, wayɛka ndɛna wɔlɔ ndɔmbaka ndambo lá ntondo la nkɔlɔ, winá w’iyotaleke ndɛmba. Anto ankina wayɛka ndɛna lonkina djɛ pozisiɔ k’ɔsawɔ djɛ ndɔmba ndakotshɛka djɛ alɔmbɛlɔ ndjɛ m’anse k’oloko, ndjɔmbɔmba l’intasɛ kana lokfusama. Yako otepelaso nge ntsha ekiyano kana lɔlɛmbɔ wengokoshimbake djɛ ndɔmba? Shimela Yehova wopo woyawokɛ. Yala l’eshikikelo ente Papa kɛso k’okanaka nkɛtshi angokekameyɛ.—Yee. 139:4.

13. Wopo wɔkɔnge watelefɔnɛ okokawɔ ntɛkɔla yimba winá wosawolaso la Yehova?

¹³ Tɛkɔlake yimba yɛko winá w’ekɛ. Ape ngo lɔlɔmbɔ ndeke lotokotshɛka djɛ nkembɛ djokanelo djɛso la Yehova. Wekelo w’Otepela wɔ Ndjambe la wingelo wɔ nsanghanyɛ y’otshumano nkoka lonkina ntokotshɛ djɛ ndasukanyɛ la Ndjambe. Nkambo mɔtshi dekɔ dj’okokɛ nangha djɛ nkokotshɛ djɛ wɛ nkambaka la winá wɔsɛ djɛ ndjeka edjinge woyalɛ lá nsanghanyɛ y’otshumano lá yopo yɛ wɔlɔ? Yawopola ente: ‘Akambo wakɔnge wɛkɔlaka yimba yɛmi winá woyɛmi lá nsanghanyɛ kana wonanghami wekelo w’onto nyɔmɛlɛ?’ Nkoka ndjala leeta kana mesajɛ má telefɔnɛ kana má mpeko nkina djɛ ntshulatshula? Lɔɔko kɛnɛ miliyɔ y’anto efula wangokambake la mpeko djɛ djonyi djɛsɔ. Ehonelo ɛmɔtshi wɛnyɛka ambɔ, winá wohonaso ndjila yimba lá nkambo mɔtshi ndjala entshupa la telefɔnɛ kɛso nkoka ntɛkɔla yimba. Ondjewi ɔmɔtshi wɔ wayi atepelaka ante: “Opangila yimba lá kɛnɛ k’onanghɛ. Yimba  yɛko ingɛkɔ tá nkambo nkina.” Lá ntondo kɛ mbanga nsanghanyɛ yɛ djingadjinga kana yɛ rɛjɔ, wangotoshimelake djɛ ndjimɛ wa telefɔnɛ yɛso, kana ndjila lá modɛ kepangofutanyɛ anto ankina. Topakoke nangha wopo wɔk’ɔmɔ dj’ipa atelefɔnɛ yɛso ntofutanyɛ winá wosawolaso la Yehova?

14. Lá nkilika Filipɛ 4:6, 7, wopo wɔkɔnge Yehova ndongotokotshɛ djɛ ndjila yimba?

¹⁴ Lɔmba Yehova akokotshɛ djɛ wɛ ndjila yimba. Ntsha ɔmbɛna ente yimba yɛko ndjɛkɔka winá wekɛ nghɔmɛlɛ, kana woyɛ lá nsanghanyɛ y’otshumano, lɔmba Yehova akokotshɛ. Ntsha olekɔ la yɛnyi kana l’ekiyano, apangoyala wɔdju ndjila yimba l’akambo welá nyuma, koko alekɔ djonyi wɛ nangha nkambo djɛsɔ. Lɔmba djɛ wɛ mba vu djɛ Ndjambe djengolama apengo oloko wɔko toko, koko edjinge ‘tokanyi tɔko.’—Wala Filipɛ 4:6, 7.

15. Wapɔ ɔmɔtshi wɔkɔnge w’okokɛ mba má nsawolaka nya Yehova?

¹⁵ Ntsha wɛ ndɔsaka winá wɔ nsawolaka, ndjekameyɛka edjinge ntɔnɔlaka lá nkambo djɛ Yehova, ongowa wapɔ efula. Lá wopo wɔkɔnge? Ntondontondo, ɔngɔsaka akano wa wɔlɔ efula. Bible ntoshikikɛka ante ‘kanga lɔkɛndaka esanga nya kanga balo angoyala la balo.’ (Woo. 13:20) Djɛkondeke winá wosawolɛ nya Ikɔkɔ yɛ balo Yehova, ongoyala la balo. Ongoleka nsipisoyɛ wopo w’okokɛ ndosasangɛ la wopo w’okokɛ ndjewɔ akano wakoka ndokiyanyɛ.

16. Wopo wɔkɔnge nsawolaka la Yehova okokawɔ ntokotshɛ djɛ ndɔngɔsɔla akoka waso wa ndakanyɛ?

¹⁶ Nkambo dj’epe, ongokoma wetsha wɔ wɔlɔ. Winá w’ekaso Bible l’onto ɔmɔtshi, okoma wɔso wɔ ntondo nde nkotshɛ ombeki wɔso djɛ nde ndasukanyɛ nya Yehova. Winá w’olekaso nsawola la Papa kɛso kel’olongo ndeke ngandji kɛso tende yongoleka mfula la songoleka ndjala l’akoka wa ndakanyɛ ambeki waso dj’iwɔ ndɔɔkɔpa. Nsɔsɔlɔ kɛ nkambo djɛsɔ kɛnamaka le Yeso. Nde atepelaki akambo wa wɔlɔ walendana la Papa kɛnde lá yopo yekota oloko edjinge la totepela tɔ ngandji, ko kɛsɔ kekotshɛka ambeki wande wa nkɔmano dj’iwɔ nkɔpa Yehova.—Dj. 17:25, 26.

17. Lamo lɔlɔmbɔ la wekelo otokotshɛwɔ djɛ nkembɛ djawo djɛso?

¹⁷ Nkambo dj’asato, djawo djɛko tende ngoleka nkemba. Tokolenda kɛnɛ kenanghema winá w’ɔlɔmbɛ ndjɛ Ndjambe nkɔlɔndjɛ, nkokembɛ, kana nkosuka. Winá enkfumɔ wɔ nghɔnghɛnaka Yehova akadjimola ndɔmbɔ yɛsɔ, djawo djɛko tende ngoleka nkemba. (1 Dj. 5:15) Kɛkɔnge kekoka nkokotshɛ lonkina djɛ nkembɛ djawo djɛko? Wekelo w’onto nyɔmɛlɛ. Vungɔ  ente, ‘djawo ndjɛka má kɛnɛ k’oka onto.’ (Ɔrɔ. 10:17) Koko, dj’iso nkembɛ djawo djɛso, topakoke nkoma ngo lá ndjeka toko. Kɛkɔnge k’oyɛso ladjɛ nangha lonkina?

18. Kɔpɛyɛ ndjɔmbɔmba k’ɛnyɛ lamo oyɛwɔ djonyi iso ntɔnɔlaka.

¹⁸ Iso ladjɛ ntɔnɔlaka lá kɛnɛ k’ekaso. Tokoshishima kɛnɛ kekomelisa onfunyi wɔ Yeembo 77. Nde ayakiyanyɛka efula ladjikɛnde nde ayawokaka djɛ nde nya winande w’ase Isariyɛlɛ wapawolama me Yehova. Nde atawaki ilɔ m’ɔtɛ w’ekiyano wɛsɔ. (Vɛrse 2-8) Ndananghe mo? Nde ashimelaka Yehova ante: ‘Lemi langɔtɔnɔlaka lá kenkfumɔ k’onanghɛ la langɔtɔnɔlaka lá wekeka wako.’ (Vɛrse 12) Lá nsɔsɔlɔ, ontshumbi yeembo ewaki kɛnɛ kɛ Yehova ndananghela owila wɔnde l’etsho wemboheta, koko nde ayawopolaki ante: ‘Ndjambe ambovungɛ djɛ mpomanyɛ lokolo lɔ wɔlɔ, kana nkɛlɛ kɛnde kembokomɛ nkɛtshi kɛnde?’ (Vɛrse 9) Ontshumbi yeembo wɔsɔ atɔnɔlaka lá nanghedji djɛ Yehova edjinge lá wopo wɔ ndɛnyɛka djandji la nkɛtshi l’etsho wemboheta. (Vɛrse 11) Iya lɔla lɔkɔnge loyalisa? Ontshumbi yeembo ayɛka ndoyashikikɛ ante Yehova apakadjɛki enkambi Wɛnde. (Vɛrse 15) Wopo wɔk’ɔmɔ ndeke, djawo djɛko ngoleka nkemba ntsha wɛ ntɔnɔlaka lá kɛnɛ kɛ Yehova ndananghela enkambi wɛnde l’etsho wemboheta la lá kɛnɛ kɛ ndakonanghela wɛ nghɔmɛlɛ.

19. Wapɔ onkina wɔkɔnge w’okokaso mba má nsawolaka la Yehova?

¹⁹ Nkambo dj’anɛyi, edjinge djeleka djonyi, ngandji kɛko te Yehova kengoleka mfula. Lá, lɛdji loleka wekeka ankfumɔ, ngandji angokotshinda djɛ wɛ nɛmɛyɛ Yehova, ndapekala akambo amɔtshi l’ikanyi yɛ ndosasangɛ, la nkfulumeyɛ wepo enkfumɔ w’asɛsɛlɔ. (Mat. 22:37-39; 1 Kɔ. 13:4, 7; 1 Dj. 5:3) Lako ekete keleka ndasukanyɛ la Yehova la ndjala la djokanelo djɛ ma ma lande!—Yee. 63:1-8.

20. Wopo wɔkɔnge ngombolonghanyɛ djɛ mba winá wɔ nsawolaka la Yehova?

²⁰ Tovungɔke ente lɔlɔmbɔ, wekelo la ntɔnɔlaka oyɛwɔnde etenyi kɛmɔtshi k’ɔtɛmwɛlɔ wɔso. Lá nkilika ndjɔmbɔmba kɛ Yeso, tohonake djena djɛ vu djɛ nsawolaka la Yehova. Timɛ akambo wapalekɔ ntshina wakoka ndjɛkɔla yimba yɛso. Lɔmba Yehova akokotshɛ djɛ wɛ ndjilaka yimba winá w’onanghɛ akambo wa nyuma. Ntsha wɛ nkamba la winá wɛko lá yopo yɛ wɔlɔ má winá wɔsɔ, Yehova angɔkɔtshɔla má nkɔpɛyɛ lowiko l’etshinda l’andja wa bango wa Ndjambe.—Mar. 4:24.