1. Okakasano wɔkɔnge wɔ wolo wopomanisa la Davidɛ?

 DAVIDƐ ayalaka l’olotshi djɛ nama lowiko lɔnde. Sawolo, nkfumi kɛ nkfulu k’Isariyɛlɛ, ɔsaka nkano djɛ ndoyaka. Winá wɔ Davidɛ ndayale la djonyi djɛ nkete djɛ ndɛ, nde emalaka lá ngando kɛ Nabɔ, ko alɔmbaka ngo mampa itano toko. (1 Sa. 21:1, 3) M’ɔkɔngɔ, nde ny’ampame yɛnde watshɔka t’isamá lá wendo. (1 Sa. 22:1) Wopo wɔkɔnge Davidɛ ndookomaka lá nkambo djɛsɔ?

2. Wopo wɔkɔnge Sawolo ndoyawilaka nyɔmɛlɛ lá mbalaka? (1 Samwɛlɛ 23:16, 17)

² Sawolo okaki Davidɛ nkandjema efula ladjikɛnde nde akɔpamaki efula me anto la alongaki lá ambandji. Sawolo ewaki lonkina ante mpendo kɛnde nyɔmɛlɛ ndeke lotshindisa Yehova djɛ ndoowimɛ nkfumi má Isariyɛlɛ ko nsɔna Davidɛ djɛ ndookita lá nkosa kɛ lowandji. (Wala 1 Samwɛlɛ 23:16, 17.) Koko, l’etsho wɛsɔ, Sawolo ayalaki ngo nkfumi l’Isariyɛlɛ, ayalaki l’oloyi w’ekekete w’angala la efula k’anto w’osukaki, djɛko ndeke Davidɛ ndotalotaka djɛ mbikɛ lowiko lɔnde. Sawolo akanelaki ante nde nkoka nyemadjɛ nsɔsɔlɔ ikanyi yeyalaki la Ndjambe lá nkambo djɛ Davidɛ djɛ nkotshama? (Iza. 55:11) Bible apatepela nkambo djɛsɔ, koko iso nkoka ndashikikɛ ngo nkambo mɔ: Sawolo ayawilaki nyɔmɛlɛ lá mbalaka. Wanɛ wananyɛka Ndjambe wapalongaka!

3. Davidɛ ndananghe mo winá wɔ ndapomanaka l’ekakasano?

³ Davidɛ atayalaki mpame k’otako. Nde atasɔna djɛ ndjala nkfumi l’Isariyɛlɛ. Yehova ndeke lɔsɔnisa. (1 Sa. 16:1, 12, 13) Ko m’ɔtɛ wɔ nkambo djɛsɔ, Sawolo ayɛka ndɔsa Davidɛ etengo ontonyi w’ekekete. Koko Davidɛ atamama Yehova lowo lɔ ekakasano  w’okomelisa, kaanga nkiyana lá wopo wɔ ndawaka ngo ndambo kɛ nkete djɛ ndɛ daambi kana wopo wɔ ndotisamáka lá wendo. Koko, nkoka ndjala winá wɔ ndayalaka lá wendo wɛsɔ, ndeke ndototshumba yeembo yɛ wɔlɔ yotanaso etepela welá vɛrse djɔsamisa ɔtɛ wɔso wɔ djamba: ‘Wanɛ wahona Yehova wapangosamba kaanga ekete kɛ wɔlɔ.’—Yee. 34:10.

4. Lá weepó wɛkɔnge wɔkɔpaso nkadjimola, ko lamo weepó wɛkɔ oyɛwɔ djonyi?

⁴ Lɔɔko kɛnɛ enkambi wɛ Yehova efula walekɔ l’osambo wɔ nkete djɛ ndɛ kana kete djoyɛwɔ la djonyi djɛ mbika. b Nkambo djɛsɔ djɛnamaka nsɔsɔlɔ, pekapeka lá winá w’opela wɔnɛ. Edjinge lá ‘ndjolo k’ekekete’ ketokongela lako ilá, tokoka mpomana l’akambo waleka wanɛ wolo. (Mat. 24:21) L’akambo wasɔ lá wɔɔngɔ, nyontshɔ tokokadjimola lá weepó ɛnɛyi wɛnɛ: Lá wopo wɔkɔnge Davidɛ ‘ndotasamba ekete kɛ wɔlɔ’? Lamo oyɛso ladjɛ ndjeka djɛ nsasangaka la kɛnɛ k’okotshɛso? Lamo okokaso ndjala l’eshikikelo ente Yehova angotoseeyɛ ehomba wɛso? La wopo wɔkɔnge okokaso ndalɔngɔsɔla má winá wɔsɔ lá kɛnɛ kelendana l’etsho weyaye?

5-6. Wopo wɔkɔnge Yeembo 23:1-6 otokotshɛwɔ djɛ nsipisoyɛ kɛnɛ kɛ Davidɛ ndakɔpɛ ntepela winá wɔ ndatepela ante enkambi wɛ Ndjambe ‘wapangosamba kaanga ekete kɛ wɔlɔ’?

⁵ Kɛkɔnge kɛ Davidɛ ndakɔpɛ ntepela winá wɔ ndatepela ante enkambi wɛ Yehova ‘wapangosamba kaanga ekete kɛ wɔlɔ’? Iso nkoka mba ikanyi má nshishima etepela wɛfɔna la wɛsɔ wetanemá lá Yeembo 23. (Wala Yeembo 23:1-6.) Davidɛ awangaka yeembo yɛsɔ l’etepela wɛnɛ: ‘Yehova ndeke Onami wɔmi. Mpangosamba kaanga ekete.’ Lá etenyi ketshikala kɛ yeembo yɛsɔ, Davidɛ awalaka akimbo walekɔ nsɔsɔlɔ djonyi efula, ndjɔmbɔmba ɛtshɔkɔ lombombe welá nyuma windawaka má ndjawola Yehova etengo Onami wɔnde. Yehova ɔlɔndjɛki lá ‘mboka yɛ sii’ edjinge Nde ásukaki Davidɛ la nkɔmano nkfumɔ l’etsho wɛ wɔlɔ la wɛ ndjolo. Davidɛ ewaki ante lowiko  lɔnde lolekɔ lá ‘wilo wamɔngha’ wa Yehova lopangosamba ekakasano. Lá winá ɛmɔtshi, nde akokaki ndɛmba etengo onto ‘wotakilimɔ lá wɔɔkɔ wɔ widjima pii,’ lonkina, nde ayalaki l’antonyi. Koko mande Yehova ayalaka Onami wɔnde, Davidɛ atoka ‘mbalaka wɔma.’

⁶ Lasɔ tombowa nsakiso lá woopó wɔso wɔnɛ: Lá wopo wɔkɔnge Davidɛ ‘ndotasambaki kaanga ekete kɛ wɔlɔ’? Nde ayalaki la kenkfumɔ k’indayalaka la djonyi lá nyuma. Osasa wɔnde wotayɛki má nkete djelá demba. Davidɛ asasangaki la kɛnɛ kɛ Yehova ndɔpɛyɛka. Kɛnɛ kelekaki djonyi lendende, ntshɔkwama la namema me Ndjambe.

7. Lá nkilika Luka 21:20-24, okakasano wɔkɔnge wopomanisa l’Akristo wawikaki l’ɛtɛndɔ kɛ ntondo lá Judeya?

⁷ Má etepela wɛ Davidɛ tɛna ente alekɔ djonyi efula leso dj’ipa ndɔsaka nkete djelá demba la ntshina efula. Iso nkoka nsɔsɔlɔ nsasanga la nkete nkfumɔ djelá demba dj’okotshɛso, koko topakoke ndjɛkɛ lowiko lɔso ngo l’eteyi. Ɔsɔ alekɔ nsɔsɔlɔ kɛ djonyi k’Akristo wawikaki lá Judeya l’ɛtɛndɔ kɛ ntondo iyasipisoyɛ. (Wala Luka 21:20-24.) Yeso awewoyɛka ante etena kengokoka kɛ ngando kɛ Jerusalɛmɛ ‘iyongodjingama me angala.’ Winá wɔ nkambo djɛsɔ iyananghema, iwɔ wayalaka ladjɛ ‘ndota t’enkókó.’ Olotshi wɔsɔ wakotshɛka dj’iwɔ ntshikala la lowiko, koko watshutshɛka nkete djɛwɔ efula. Amboheta ndambo k’ɛnɔnyi, Etange k’Olami ketepelaka lá nkambo djɛsɔ ante: “Iwɔ watshikaka awedji l’amvulu yɛwɔ, edjinge watɔsa kaanga lokekete l’imá amvulu yɛwɔ. La ndashikikɛ kenkfumɔ ambɔ Yehova angakotshɛ la angasuka, iwɔ wahetshɛka ɔtɛmwɛlɔ wɔnde lá ntondo kɛ nkete nkfumɔ djɛnamaki etengo dekɔ djonyi.”

8. Olakanyelo wɔkɔnge wɔ djonyi w’okokaso mba má kɛnɛ kekomelisa Akristo wa l’ɛtɛndɔ kɛ ntondo wawikaki lá Judeya?

⁸ Olakanyelo wɔkɔnge w’okokaso mba má kɛnɛ kekomelisa Akristo wawikaki lá Judeya l’ɛtɛndɔ kɛ ntondo? Etange k’Olami kɛ sombolumula ndambo má djiko ntepelaka ante: “L’etsho weyaye tokoka mpomana l’ehemba wekoka nyɛnyɛ wopo w’ɔsaso nkete djelá demba. Nkete djɛsɔ ndeka ewiko kengowa wanɛ walekɔ l’onkoko wɔ Ndjambe djonyi? Ee, leso olotshi nkoka nsakisola nkfulumeyɛ ekakasano kana ndasambɛ akambo amɔtshi. Iso ladjɛ ndjala entshupa djɛ nangha kenkfumɔ kengoyala djonyi ngo ngete winaso Akristo wa l’ɛtɛndɔ kɛ ntondo walotisa má Judeya iyananghe.” c

9. Lokembo lɔkɔnge lɔngombowa má dako dj’ɔpɔstɔlɔ Poolo ndapɛyɛ ase Hebero?

⁹ Okoka nkanela okakasano woyalisa l’Akristo wasɔ djɛ ntshika kenkfumɔ keyalaki lawɔ, ko ntotateyeyɛ la lowiko lɔ bango l’edjena kenkina? Alɔmbamaka iwɔ ndjala la djawo djɛ ndjawola ambɔ Yehova angaaseyɛka ehomba wɛwɔ. Koko iwɔ watasamba okotshɔ. Ɛnɔnyi etano lá ntondo kɛ Jerusalɛmɛ ndjingama me angala w’ase Ɔrɔma, ɔpɔstɔlɔ Poolo apɛyɛka ase Hebero dako mɔtshi djɛ djonyi, nde atepelaka ante: ‘Lá lowiko lɔnyo nyotayalake la ngandji kɛ mfalanga, Koko nyosasange la kɛnɛ kokotshɛnyo. Ladjikɛnde Ndjambe atepelaka ante: ‘Lemi mpakotshikaki, la mpakokadjɛki kaanga ndambo daambi.’ Djɛkondeke oyɛso nsɔsɔlɔ l’oloko wolo wɔ ntepela ente: ‘Yehova ndeke okotshɔ wɔmi, lemi mpangoka wɔma. Kɛkɔnge kekoka onto nanghela lemi?’’ (Heb. 13:5, 6) Ape l’ehamo, wanɛ wakambisa la dako djɛ Poolo lá ntondo k’angala w’ase Ɔrɔma ndawingela watayala l’okakasano djɛ ndjekesanela lowiko l’onghanghunya l’iyatshu ntowika lá djena djɛ bango dj’iyalote. Iwɔ wakokaka ndashikikɛ ambɔ Yehova angapɛyɛ kɛnɛ k’oyɛwɔ la djonyi. Etepela wɛ Poolo ntoshikikɛka djɛ kaanga iso, nkoka ndjala la djawo djɛkɔ mɔ.

10. ‘Iseke’ yɛkɔnge Poolo ndombotisola?

¹⁰ Poolo apɛyɛka Timɔte ndjila edjinge iso, wopo wɔ dako djɛkɔ mɔ. Nde afunaka ante: ‘Djɛkondeke, ntsha tolekɔ la nkete djɛ ndɛ, ntshendja djɛ ndɔta, l’edjena kɛ mbetshɛ ɔtɛ, tosasange la nkete djɛsɔ.’ (1 Ti. 6:8) Kɛsɔ nsakisolaka ante topakoke nsasanga la nkete djɛ wɔlɔ djɛ ndɛ, mvulu kɛ wɔlɔ kana nsomba ntshendja djɛ bango mbala la mbala? Ape kɛsɔ ndeke Poolo ndakɔpɛ ntepela. Poolo ndatepela nde ante, iso ladjɛ nsasanga la nkete djelá demba dj’okotshɛso. (Flp. 4:12) Ɔsɔ ndeke ‘iseke’ yɛ Poolo. Ekete keleka djonyi k’okotshɛso nde djokanelo dj’oyɛso la Ndjambe kɛso, koko ape nkete dj’okotshɛso.—Aba. 3:17, 18.

11. Olakanyelo wɔkɔnge w’owaso má etepela wɛ Mɔsɛ ndashimela ase Isariyɛlɛ lá kɛnɛ kelendana la nsasanga la kɛnɛ k’okotshɛso?

¹¹ Kɛnɛ k’okanelaso ente tolekɔ la djonyi nkoka ntshikitana la kɛnɛ kɛ Yehova ɛnande ante tolekɔ la djonyi. Kolenda kɛnɛ kɛ Mɔsɛ ndashimela ase Isariyɛlɛ m’ɔkɔngɔ w’iwɔ mpetshɛ ɛnɔnyi 40 l’osowe wɔ lɔsɛkɛ: ‘Yehova Ndjambe kɛ nyo anyɔtshɔkɔlaka l’akambo ankfumɔ wanyomonangha. Nde ndjewaka wɔlɔ wopo wɔ nyɔmbɔkɛnda l’osowe wɔ lɔsɛkɛ w’ekekete wɔnɛ. L’ilá k’ɛnɔnyi 40 wɛnɛ, Yehova Ndjambe kɛnyo alekɔ esanga la nyo edjinge nyo nyotasamba kaanga ekete.’ (Mvu. 2:7) L’ilá k’ɛnɔnyi 40 wɛsɔ, Yehova apɛyɛki ase Isariyɛlɛ mana dj’iwɔ ndɛ. Ntshendja djɛwɔ djɛ wɔlɔ djɛ yapose ladjɛkɔ m’Edjipito, djetakoma ebusu kaanga ndambo daambi. (Mvu.  8:3, 4) Kaanga anto amɔtshi okokawɔ ndɔsa nkete djɛsɔ etengo daambi, Mɔsɛ avungolaka ase Isariyɛlɛ ante iwɔ wawaki kenkfumɔ k’iyayalaka la djonyi. Yehova angoyala l’osasa ntsha iso ndjeka djɛ nsasanga la kɛnɛ k’okotshɛso, má ndjala la djedjɛ kaanga lá nkete djɛ daambi dj’ɔtɔpɛyɛnde, la nsipisoyɛ ente nkete djɛkɔ oyɛwɔnde ɔtshɔkɔ wɔ mende edjinge ndokawoyɛka lokasa.

12. Kɛkɔnge k’ɛnyɛ ente Davidɛ ayawɛkɛki te Yehova, koko ape tá wolo wɔnde nyɔmɛlɛ?

¹² Davidɛ ewaki ante Yehova alekɔ la nkɔmano edjinge Nde ndakiyanyɛka lombombe lá nkambo djɛ wanɛ wɔɔkɔpa. Kaanga lowiko lɔnde iyayalaka lá mbalaka l’etsho wɛ ndatshumbaka Yeembo 34, la wiso wa djawo, Davidɛ ɛnaka ‘ondjelo wɔ Yehova amboodjinga.’ (Yee. 34:7) Mbala imɔtshi Davidɛ ɛdjɛka ondjelo wɔ Yehova la ongala wolama l’edjena kɛmɔtshi djɛ ndjewoyɛ anto winá enkfumɔ w’ɛnande antonyi. Kaanga nyɔmɛlɛ ndayalaka onanyi w’ambandji la Yehova ndoolake ante angoyala nkfumi, Davidɛ atayawɛkɛ l’akoka walekɔ lande wa mfuná mbɔkɔ kana wa ndongela antonyi. (1 Sa. 16:13; 24:12) Davidɛ ayawɛkɛka te Ndjambe má ndashikikɛ ante ondjelo wɔ Yehova ‘ntshungolaka wanɛ woowoka wɔma.’ Lá nsɔsɔlɔ, lɔɔko kɛnɛ topakongela djɛ namema lá yopo yɛ nsese. Iso ndjewaka ente onto onkfumɔ woyawɛkɛ te Yehova angowa lowiko l’etshinda kaanga nde kovɔka winá wɔsɔ.

13. Winá wɔ Ngɔngɔ kelá Mangɔngɔ ndongotonanyɛ, tɔngɛnama etengo topalekɔ l’osukɔ, ko lamo sopakoke ndjoka wɔma? (Lenda ntshango djelá loposo.)

¹³ Lako ilá l’etsho weyaye, djawo djɛso tá akoka walekɔ la Yehova wa ntolama ngingela l’ohemba. Winá wɔ Ngɔngɔ kɛ lá Mangɔngɔ, ntepela ente osanga w’ewila, yongonanyɛ enkambi wɛ Ndjambe, mbiko yɛso yɛngɛnama etengo yelekɔ lá mbalaka. Tongoyala la djonyi djɛ ndjala l’eshikikelo ente Yehova nkoka ntowikɛ edjinge angotowikɛ. Le ewila, tɔngɛnama etengo ɛnkɔkɔ wepalekɔ l’onami. (Ezk. 38:10-12) Topangoyala kaanga l’ekete kɛ nana mbandji, kana mba onkfumbelo djɛ nana mbandji. Ewila wangokanela ambɔ wangotolongela ipa l’okakasano. Iwɔ wapangɛna kɛnɛ kɛnaso la wiso waso wa djawo, ntepela ente nunu dj’andjelo wambotodjinga iso enkambi wɛ Ndjambe enkfumɔ la walekɔ entshupa djɛ ntoseela. Ewila wɛsɔ okokawɔ ndaawɛna ngetemo ladjikɛnde wapɛnyi akambo la wiso wa nyuma? Ɔsɔngo yongoshashimɔ winá wɔ yɔngɛna angala wem’olongo wamboyɛ ndotokotshɛ!—Ndj. 19:11, 14, 15.

14. Kɛkɔnge k’okokaso nangha má winá wɔsɔ djɛ ndalɔngɔsɔla lá nkambo dj’etsho weyaye?

¹⁴ Kɛkɔnge k’okokaso nangha djɛ ndalɔngɔsɔla má wina wɔsɔ lá nkambo dj’etsho weyaye? Ntondontondo, iso ladjɛ ndjala l’ikanyi yɛ wɔlɔ lá kɛnɛ kelendana la nkete djelá demba, mande lofu lɔmɔtshi tongotshika nkete nkfumɔ djɛsɔ. Lonkina iso ladjɛ nsasanga la kɛnɛ k’okotshɛso la mba osasa efula má djokanelo dj’oyɛso la Yehova. Winá wɔ sotaleke ndjewa Ndjambe wɔlɔ, ndeke sotaleke ndashikikɛ la songoleka ndawɛkɛ t’akoka wa Yehova wa ntolama, winá wɔ Ngɔngɔ kelá Mangɔngɔ ndongotonanyɛ.

15. Akambo wakɔnge wapomanaki la Davidɛ w’oshikikɛki djɛ Yehova apotshikaki kaanga ndambo daambi?

¹⁵ Tokolenda nkambo nkina djekotshisa Davidɛ, djekoka ntokotshɛ edjinge iso djɛ ndalɔngɔsɔla lá nkambo dj’ehemba wetokongela. Davidɛ atepelaka ante: ‘Nyɔlɛtɛ ko nyɔngɛna ente Yehova alekɔ wɔlɔ, osasa le onto woyawisa lende.’ (Yee. 34:8) Etepela wɛsɔ nyɛnyɛka lamo Davidɛ ndewaka ante nde nkoka ndawɛkɛ  t’osukɔ wɔ Yehova. Mbala la mbala Davidɛ ayawɛkɛki te Yehova, ko Ndjambe kɛnde atɔpɛyɛ nsɔnyi kaanga mbala kɛmɔ. Winá wɔ ndayalaka ilɛngɛ, Davidɛ atshɔka ntonana nya nkongá djɛ mpame dj’ose Filistiya dj’iyetaka Gɔliatɛ, ko nde ashimelaka onanyi w’ambandji wɔ nkfulu wɔsɔ ante: ‘Lɔɔko Yehova angokotshika l’ɛwɔ wɛmi.’ (1 Sa. 17:46) L’ɔkɔngɔ, Davidɛ ayɛka ndokambela nkfumi Sawolo, kanga lohonaki mbala la mbala djɛ ndoyaka. Koko ‘Yehova ayalaki esanga’ nya Davidɛ. (1 Sa. 18:12) Ladjikɛnde l’etsho wemboheta Davidɛ ɛnaka okotshɔ wɔ Yehova, Davidɛ ewaka ante nde nkoka ndawɛkɛ te Nde lá winá w’indapomanaka l’ekakasano wɛsɔ.

16. Lá topo tɔkɔnge t’okokaso ‘ndɛta’ djɛ nyɛna wɔlɔ wɔ Yehova?

¹⁶ Ntsha iso ndeka ndaawɛkɛ má winá wɔsɔ l’ɛlɔndjɛlɔ kɛ Yehova, tongoleka ndaawɛkɛ l’akoka wande wa ntowikɛ l’etsho weyaye. Ndɔmbamaka dj’iso ndjala la djawo edjinge ndawɛkɛ te Yehova djɛ ndɔmba owandji wɔso w’olemo konje djɛ ndjingela lá losanghanyɛ lɔso l’ekekete, lɔ rɛjɔ kana ndɔlɔmba dj’iso ntshikitanyɛ nonghanyi kɛso k’olemo djɛ mba akoka wa ndjingelaka lá nsanghanyɛ inkfumɔ, la ndapɛyɛka efula l’olemo w’ipoposanyɛ. Kokanela ntsha owandji wɔso w’olemo ambotona kɛnɛ k’ɔlɔmbaso, ko ambotimɛ m’olemo. Tongoyala la djawo ente Yehova apatokadjɛki kaanga ndambo daambi la angɔtɔpɛyɛka winá enkfumɔ kɛnɛ k’oyɛso la djonyi? (Heb. 13:5) Efula kɛ wananyɔ l’ankaana yekamba lá olemo wɔ winá enkfumɔ nkoka ntɔkɔndɔla wopo wɔ Yehova ndakotshɛ ngo lá winá w’iyayalaka la djonyi djɛnde efula. Yehova alekɔ la nkɔmano.

17. Vɛrse djɛso dj’ɔnɔnyi wɔ 2022 oyɛwɔ nge, ko lamo okokaso ntepela ente vɛrse djɛsɔ mboyɛ lá winá wɛdje?

¹⁷ Mande Yehova alekɔ l’ompandju wɔso, topalekɔ l’elonga kaanga kɛmɔ kɛ ndjoka wɔma wɔ kɛnɛ kengotokomela l’etsho weyaye. L’ilá kenkfumɔ kɛ songilaka wapɔ wɛnde l’edjena kɛ ntondo lá lowiko lɔso, Ndjambe kɛso apatokadjɛki kaanga ndambo daambi. Djɛ ntovungola djonyi djɛ ndalɔngɔsɔla má winá wɔsɔ la ndjala la djawo ente Yehova apatokadjɛki kaanga ndambo daambi, Iloyi yɛlɔndjɛ asɔnaka Yeembo 34:10 etengo vɛrse djɛso dj’ɔnɔnyi wɔ 2022: ‘Wanɛ wahona Yehova wapangosamba kaanga ekete kɛ wɔlɔ.’