1. Lá nkilika Malaki 3:16, onkanda wɔkɔnge Yehova ofunande, ko kɛkɔnge kelekɔ́ l’eteyi?

 L’ILÁ kɛ nunu dj’ɛnɔnyi, Yehova afuna onkanda ɔmɔtshi wotshikitanyi. Onkanda wɔsɔ wolekɔ la wiina w’anto, w’otateyɛ la djiina djɛ Owakɛ wɔ ntondo wɔ nkɔmano, Abɛlɛ. * (Luka 11:50, 51) Ntateyɛ másɔ Yehova akindjɛ mfuna wiina ankina l’onkanda wɔsɔ, ko lɔɔko kɛnɛ miliyɔ yɛ wiina itanema l’eteyi. Bible ndjetaka onkanda wɔsɔ ante ‘onkanda wɔ mvungo,’ ‘onkanda wɔ lowiko,’ la ‘ɔwɔmbɔ wɔ lowiko.’ Lá djamba djɛnɛ, tongeta onkanda wɔsɔ ente ‘onkanda wɔ lowiko.’​—Wala Malaki 3:16; Ndj. 3:5; 17:8.

2. Wiina w’anto wakɔna wambófunamá l’onkanda wɔ lowiko, ko kɛkɔnge k’okokaso nangha djɛ djiina djɛso mfunama l’onkanda wɔsɔ?

² Onkanda wotshikitanyi wɔsɔ, wolekɔ la wiina w’anto ankfumɔ woka Yehova wɔma, wɔɔtɛmɔla, la wakɔpa djiina djɛnde. Iwɔ wangoyala la mbamba kɛ mba lowiko l’etshinda. Lɔɔko kɛnɛ wiina waso nkoka mfunama l’onkanda wɔsɔ, ntsha tolekɔ la djokanelo djɛ wɔlɔ la djɛ ma ma la Yehova djembopikamá lá olambo w’oshinga wɔ mbendo wɔ Wɔnande, Yeso Kristo. (Dj. 3:16, 36) Isankfumɔ nkombolaka djɛ djiina djɛso ntanema l’onkanda wɔsɔ, ayale kaanga oyɛso nde la nkongi djɛ ntowika l’olongo kana lá looko!

3-4. a) Tongowika lotshinda lotshinda ntsha wiina waso walekɔ́ winá wɔsɔ l’onkanda wɔ lowiko? Pakisola. b) Kɛkɔnge kɛ songoshishima lá djamba djɛnɛ edjinge djeyaye?

³ Kɛsɔ nsakisolaka ente onto onkfumɔ wɔ djiina djɛnde  mbofunama l’onkanda wɔsɔ, alekɔ ngo ladjɛ mba lowiko l’etshinda? Iso ntanaka okadjimwelo lá woopó wɔsɔ má etepela wɛ Yehova ndashimela Mɔsɛ, lá Eposelo 32:33. Yehova atepelaka ante: ‘Onto w’onanghelisá mpekanto, ndeke monghodjimola m’onkanda wɔmi.’ Djɛkondeke, wiina watanemá winá wɔsɔ l’onkanda wɔsɔ, nkoka ndjimwama. Alekɔ etengo Yehova afunaka wiina wasɔ la krɛyɔ. (Ndj. 3:5, nɔtɛ) Iso ladjɛ ndashikikɛ djɛ wiina waso wangotshikala l’onkanda wɔsɔ tii iwɔ ndofunama la bikɛ, djɛ ntshikala lotshinda lotshinda.

⁴ Nkambo djɛsɔ nkoka ntokomɛ djɛ ndjopola weepó ɛmɔtshi. Ndjɔmbɔmba, Bible otepelande nge lá nkambo djɛ anto wa wiina wawɔ wafunamaka l’onkanda wɔ lowiko la lá nkambo djɛ anto wa wiina wawɔ watafunama l’eteyi? Lá winá wɔkɔnge anto wa wiina wawɔ wafunamaka l’onkanda wɔ lowiko yongowa lowiko l’etshinda? Ko otepelaso mo lá nkambo djɛ anto wavwisá ipa la mba mbamba kɛ ndjewa Yehova? Wiina wawɔ nkoka ndofunama l’onkanda wɔsɔ? Weepó wɛsɔ wengokadjimwama lá djamba djɛnɛ edjinge lá djeyaye.

WIINA W’ANTO WAKƆNA WALEKƆ́ L’ONKANDA WƆSƆ?

5-6. a) Etengo yɔmbɛnyɛ lá Filipɛ 4:3, wiina w’anto wakɔna walekɔ́ l’anteyi kɛ wiina wambofunama l’onkanda wɔ lowiko? b) Lá winá wɔkɔnge wiina wawɔ yongofunama lotshinda lotshinda l’onkanda wɔ lowiko?

⁵ Wiina w’anto wakɔna wambofunamá l’onkanda wɔ djingingi wɔsɔ? Djɛ nkadjimola lá woopó wɔsɔ, tongoshishima eloyi w’anto etano wetshikitanyi. L’anteyi kɛwɔ, wiina w’anto amɔtshi wafunamaka l’onkanda wɔ lowiko, koko w’anto ankina lako.

⁶ Oloyi wɔ ntondo nkfumbamba la anto wasɔnamisá djɛ ntɔlɔndjɛ esanga la Yeso l’olongo. Wiina w’anto wasɔ walekɔ winá wɔsɔ l’onkanda wɔ lowiko? Ee. Lá nkilika etepela wɛ  ɔpɔstɔlɔ Poolo ndafunela ‘winande w’olemo’ welá Filipɛ, wiina wa ankfutami y’avuta wasɔnamisá djɛ ntɔlɔndjɛ esanga la Yeso l’olongo, walekɔ winá wɔsɔ l’onkanda wɔ lowiko. (Wala Filipɛ 4:3.) Koko djɛ wiina wawɔ ntshikala lotshinda lotshinda l’onkanda wɔsɔ, iwɔ ladjɛ ntshikala la nkɔmano. Masɔ winá w’iyongawila itshapa y’ekomo, ayale lá ntondo k’iwɔ mvɔ kana lá ntondo kɛ ndjolo k’ekekete mbanga, wiina wawɔ wangofunama lotshinda lotshinda l’onkanda wɔsɔ.​—Ndj. 7:3.

7. Lá nkilika Ndjiso 7:16, 17 kɛkɔnge kɛ sombosipisoyɛ lá kɛnɛ kelendana la winá wongofunama wiina w’oloyi w’ekekete w’anto w’ɛnkɔkɔ enkina lotshinda lotshinda l’onkanda wɔ lowiko?

⁷ Iloyi y’ape nkfumbama l’oloyi w’ekekete w’ɛnkɔkɔ enkina. Wiina wawɔ walekɔ winá wɔsɔ l’onkanda wɔ lowiko? Ee. Wiina wawɔ wangotshikala l’onkanda wɔ lowiko m’ɔkɔngɔ wɔ iwɔ mba ewiko l’Armagɛdɔ? Ee. (Ndj. 7:14) Yeso atepelaka ante ɛnkɔkɔ wɛnde wɛ djingidjingi wɛsɔ ‘wangotshɔ tá lowiko l’etshinda.’ (Mat. 25:46) Koko anto wangowa ewiko l’Armagɛdɔ wasɔ wapangowa lowiko l’etshinda lá mbala kɛkɔ kɛmɔ. Wiina wawɔ wangotshikala l’onkanda ngo wopo w’iyafunamá la krɛyɔ. Lá Ɛlɔndjɛlɔ k’ɛnɔnyi kinunu, Yeso ‘angalama la angalɔndjɛ tá tɔkɔkɔ tɔ washi wa lowiko.’ Wanɛ wangokilika ɛlɔndjɛlɔ kɛ Kristo la wangotshikala la nkɔmano te Yehova lá winá wɔ dombo dj’ekomo ndeke wiina wawɔ wangotshikala lotshinda lotshinda l’onkanda wɔ lowiko.​—Wala Ndjiso 7:16, 17.

8. Wiina w’anto wakɔna watafunama l’onkanda wɔ lowiko, ko kɛkɔnge kengakomela?

⁸ Iloyi y’asato nkfumbama l’ambodji, ntepela ente anto wangotshitana lá Armagɛdɔ. Wiina wawɔ wapalekɔ l’onkanda wɔ lowiko. Yeso atepelaka ante ‘iwɔ wangotshɔ t’etshitanelo kɛ lotshinda.’ (Mat. 25:46) Poolo, kanga lotshindamisá má nyuma k’ekina atoshimelaka ante, ‘anto wasɔ wangowa dilanyɛ djɛ etshitanelo kɛ lotshinda.’ (2 Te. 1:9; 2 Pɛ. 2:9) Kɛsɔ ndeke okokaso ntepela lá nkambo djɛ anto wananghelisá nyuma k’ekina mpekanto l’onkonda onkfumɔ. Edjinge iwɔ wangoyakema lotshinda lotshinda, wapangowa lowiko l’etshinda. Ndjokamaka papoo ente, wapangokfundɔ. (Mat. 12:32; Mar. 3:28, 29; Heb. 6:4-6) Nyontshɔke tokoshishima la nkɔmɛ nkfumɔ eloyi epe w’anto wangokfundɔ djɛ ndowika lá looko.

ANTO WANGOKFUNDƆ́

9. Etengo yɔmbɛnyɛ lá Elemo 24:15, eloyi epe wɛkɔnge w’anto wangokfundɔ djɛ ndowika lá looko, ko otshikitano wɔkɔnge wolekɔ l’antenyɛ eloyi epe wɛkɔ?

⁹ Bible ntepelaka nkambo dj’eloyi epe w’anto wangokfundɔ la nkongi djɛ ndowika lotshinda lotshinda lá looko, ‘anto wa wɔlɔ’ la ‘anto wapɔlɔ.’ (Wala Elemo 24:15.) ‘Anto wa wɔlɔ’ oyɛwɔnde wanɛ wakambelisá Yehova la nkɔmano nkfumɔ winá w’iyayalaka la lowiko. L’onkoko onkina, ‘anto wapɔlɔ’ watakambela Yehova la nkɔmano. Lá nsɔsɔlɔ, lá akambo efula watayala la nanghedji djɛ wɔlɔ. Ladjikɛnde eloyi epe wɛsɔ wangokfundɔ, lasɔ iso nkoka ntepela ente wiina wawɔ walekɔ l’onkanda wɔ lowiko? Djɛ nkadjimola lá woopó wɔsɔ, nyontshɔ tokoshishima oloyi ɔmɔ ɔmɔ l’anteyi k’eloyi epe wɛsɔ.

10. Lamo ‘anto wa wɔlɔ’ yongokfundɔ, ko mpeyi kɛkɔnge amɔtshi l’anteyi kɛwɔ yongowa? (Lenda lonkina “Weepó w’antangi” welá numelo kɛnɛ lá kɛnɛ kelendana l’ekfundwelo kelá looko.)

¹⁰ ‘Anto wa wɔlɔ’ walekɔ iloyi y’anɛyi. Lá ntondo k’iwɔ mvɔ, wiina wawɔ wafunamaka l’onkanda wɔ lowiko. Wiina wawɔ wadjimwamaka m’onkanda wɔsɔ winá w’iyavu? Lako, ladjikɛnde lá ‘wɔɔngɔ’ wɔ Yehova iwɔ wakindjɛka ndjala ngo la lowiko. Yehova ‘apalekɔ Ndjambe kɛ anto wambovɔ, koko kɛ anto wawika ladjikɛnde lende iyankfumɔ walekɔ ngo la lowiko.’ (Luka 20:38) Kɛsɔ nsakisolaka  ente winá w’anto wa wɔlɔ yongokfundɔ djɛ ndowika lá looko, wiina wawɔ wangotanema l’onkanda wɔ lowiko, kaanga iyafunama ntondo la ‘krɛyɔ.’ (Luka 14:14) Ape l’ehamo, amɔtshi l’anteyi k’anto wangokfundɔ wasɔ wangowa mpeyi kɛ nkambela Yehova etengo ‘ewandji lá looko l’otondo.’​—Yee. 45:16.

11. Kɛkɔnge kɛ ‘anto wapɔlɔ’ yongoyala la djonyi djɛ ndjeka lá ntondo kɛ wiina wawɔ mfunama l’onkanda wɔ lowiko?

¹¹ Toshishimake winá wɔsɔ, iloyi y’ekomo yembokfumbama, ‘l’anto wapɔlɔ.’ Mbala imɔtshi m’ɔtɛ wɔ yotewaki ɛlɛmbɛ wɛ Yehova, iwɔ watananghaki akambo wa wɔlɔ lá ntondo k’iwɔ mvɔ. Djɛkondeke wiina wawɔ watafundama l’onkanda wɔ lowiko. Koko má ndakfundola, Ndjambe angapɛyɛ mbamba kɛ wiina wawɔ mfunama l’onkanda wɔ lowiko. ‘Anto wapɔlɔ’ wasɔ wangoyala la djonyi dj’okotshɔ w’efula. Lá ntondo k’iwɔ mvɔ, amɔtshi wananghaki akambo wapɔlɔ, wa nkekete efula. Djɛkondeke wangoyala la djonyi djɛ ndjeka wopo wɔ mbika lá yopo y’okana l’ɛlɛmbɛ wɛ sii wɛ Yehova. Djɛ nkotshɛ okoma wɔsɔ, Onkfumi wɔ Ndjambe wɔngɔlɔndjɛ olemo w’ekekete wɔ ndakanyɛ wotananghemaká ntondo l’ɔkɔndɔ w’anto ankfumɔ.

12. a) Anto wakɔna wangolakanyɛ anto wapɔlɔ? b) Kɛkɔnge kengokomela anto wangotona djɛ nkamba la kɛnɛ k’iyongawekɛ?

¹² Anto wakɔnge wangolakanyɛ anto wapɔlɔ wasɔ? Oloyi w’ekekete w’anto la anto wa wɔlɔ wakfundwisá. Djɛ wiina wawɔ mfunama l’onkanda wɔ lowiko, anto wapɔlɔ wasɔ ladjɛ ndjala la djokanelo djɛ wɔlɔ la Yehova la ndalambola te nde. Yeso Kristo nya Akristo w’ankfutami wangolendaka anto wapɔlɔ wasɔ la nkɔmɛ nkfumɔ m’olongo djɛ ndenda wopo w’iyongelolaka lá kɛnɛ k’ekawɔ. (Ndj. 20:4) Onto onkfumɔ wongotona okotshɔ wɔ yongɔpɛyɛ wɔsɔ angotshitana, ayale kaanga oyɛnde nde l’ɛnɔnyi 100. (Iza. 65:20) Yehova nya Yeso walekɔ l’akoka wa mbala kɛnɛ kelekɔ́ l’eloko edjinge wapangawola onto onkfumɔ wokoka ndjila ovungusano l’andja wa bango.​—Iza. 11:9; 60:18; 65:25; Dj. 2:25.

 EKFUNDWELO KƐ LOWIKO LA KƐ DOMBO

13-14. a) L’etsho wemboheta, isakanelaka ente etepela wɛ Yeso welá Djɔanɛ 5:29 ndendanaka lange? b) Kɛkɔnge k’oyɛso ladjɛ nkota lá kɛnɛ kelendana l’etepela wɛsɔ?

¹³ Kaanga Yeso atepelaka nkambo djelendana la waangokfundɔ djɛ ndowika lá looko. Ndjɔmbɔmba, nde atepelaka ante: ‘Winá woyaye w’anto ankfumɔ walekɔ́ lá anketa yevungwamá wangoka djoyi djɛnde ko wangoposa, anto wananghaki akambo wa wɔlɔ tá ekfundwelo kɛ lowiko, edjinge anto wananghaki akambo wapɔlɔ tá ekfundwelo kɛ dombo.’ (Dj. 5:28, 29) Kɛkɔnge kɛ Yeso ndakɔpɛ ntepela?

¹⁴ L’etsho wemboheta, takanelaki ente etepela wɛ Yeso wɛsɔ ndendanaka la kɛnɛ kɛ anto wangokfundɔ yongoonangha m’ɔkɔngɔ w’ekfundwelo kɛwɔ, ntepela ente amɔtshi wangokfundɔ ko wangoonangha akambo wa wɔlɔ ko ankina wangokfundɔ ko wangoonangha akambo wapɔlɔ. Koko, tokote ente, Yeso atatepela ante anto wangokfundɔ má anketa yevungwamá wangoonangha akambo wa wɔlɔ kana wangoonangha akambo wapɔlɔ. Ndakambende la totepela tɛnyɛ akambo wamboheta. Nde atepelaka nkambo djɛ ‘anto wananghaki akambo wa wɔlɔ’ la anto ‘wananghaki akambo wapɔlɔ.’ Kɛsɔ nyɛnyɛka ente ɔsɔ alekɔ akambo w’iyananghe lá ntondo kɛ nyɔnyi kɛwɔ. Nkambo djɛsɔ ndjokamaka, ape nghɔsɔ? Tolekɔ la donga djɛ ntepela nghɔsɔ, ladjikɛnde lako onto wɔ yongawola djɛ nde nangha akambo wapɔlɔ l’andja wa bango. Anto wapɔlɔ iyayale ladjɛ nangha akambo wasɔ nde lá ntondo kɛ nyɔyi kɛwɔ. Lasɔ, kɛnɛ kɛ Yeso ndatepela lá nkambo djɛ ‘enkfundwelo kɛ lowiko’ la ‘ekfundwelo kɛ dombo’ osakisolawɔ nge?

15. Anto wakɔna wangowa ‘ekfundwelo kɛ lowiko,’ ko lamo?

¹⁵ Anto wa wɔlɔ, wánanghakí akambo wa wɔlɔ lá ntondo kɛ nyɔyi kɛwɔ, ‘wangokfundɔ djɛ ndoyala la lowiko’ ladjikɛnde wiina wawɔ wamboshiyɛká mfunama l’onkanda wɔ lowiko. Kɛsɔ nsakisolaka ente ekfundwelo ‘k’anto wananghaki akambo wa wɔlɔ’ k’otepelawɔ lá Djɔanɛ 5:29 la ekfundwelo ‘k’anto wa wɔlɔ’ k’otepelawɔ lá Elemo 24:15 oyɛwɔ ngo kɛmɔ. Looka lɔsɔ ndjokanaka l’etepela w’otanaso lá Ɔrɔma 6:7, wetepela ante: ‘Onto wombovɔ ambotshungɔ má mpekanto yɛnde.’ Yehova avungɛka mpekanto y’anto wá wɔlɔ wasɔ winá wɔ nyɔyi kɛwɔ, koko nde angokindjɛ mvungɔ akambo ankfumɔ wa nkɔmano w’iyananghe winá w’iyayalaka la lowiko. (Heb. 6:10) Lá nsɔsɔlɔ, anto wa wɔlɔ wangokfundɔ́ wasɔ ladjɛ ntshikala la nkɔmano djɛ wiina wawɔ ntshikala lotshinda l’onkanda wɔ lowiko.

16. ‘Ekfundwelo kɛ dombo’ osakiwolawɔ nge?

¹⁶ Iya otepelaso mo lá nkambo djɛ anto wananghaki akambo wapɔlɔ lá ntondo k’iwɔ mvɔ? Kaanga mpekanto yɛwɔ iyavungama winá wɔ nyɔyi kɛwɔ, iwɔ watakambela Yehova la nkɔmano winá w’iyayalaka la lowiko. Wiina wawɔ watafunamá l’onkanda wɔ lowiko. Djɛkondeke, ekfundwelo kɛ ‘anto wananghaki akambo wa nyɛtshi’ la ekfundwelo kɛ ‘anto wa nyɛtshi’ k’otepelawɔ lá Elemo 24:15 oyɛwɔ ngo kɛmɔ. Ekfundwelo kɛwɔ ‘kengoyala kɛ dombo.’ * Anto wapɔlɔ wangokfundɔ́ wangalomboyɛ má wopo wɔ Yeso ndongakɔmɛka. (Luka 22:30) Angɔlɔmbama ndambo k’etsho djɛ ndoshikikɛ́ ntsha wambɛlama djɛ wiina wawɔ mfundama l’onkanda wɔ lowiko. Ngo ntsha anto wapɔlɔ wasɔ wambotshika lowiko  lɔwɔ lɔ ntondo, ko wamboyalambola te Yehova ndeke wiina wawɔ okokawɔ ndofunama l’onkanda wɔ lowiko.

17-18. Kɛkɔnge k’anto ankfumɔ wangokfundɔ́ djɛ ndowika lá looko oyɛwɔ ladjɛ nangha, ko ‘nanghedji’ djɛkɔnge dj’otepelawɔ lá Ndjiso 20:12, 13?

¹⁷ Ayale wayalaki ntondo anto wa wɔlɔ kana wapɔlɔ, anto wangokfundɔ́ ladjɛ nɛmɛyɛ ɛlɛmbɛ welekɔ́ lá ɔwɔmbɔ wɔ bango wɔ yongodjipola lá eleko k’ɛnɔnyi 1 000. Ɔpɔstɔlɔ Djɔanɛ ntepelaka kɛnɛ kɛ ndɛnyi lá ɛnɛlɔ ante: ‘Ko nyɛnaka anto wavwisá, anto w’anyanya la wa lomo wambemala lá ntondo kɛ yɛkɔ yɛ lowandji, edjinge wafolaka ɛwɔmbɔ. Koko wafolaka ɔwɔmbɔ onkina, iyayalende ɔwɔmbɔ wɔ lowiko. Anto wavwisá walomboyɛmaka lá nkilika akambo wafunamisá l’ɛwɔmbɔ wɛkɔ lá nkilika nanghedji djɛwɔ.’​—Ndj. 20:12, 13.

¹⁸ Lá nkilika ‘nanghedji’ djɛkɔnge anto wangokfundɔ yongolomboyɛma? Yongolomboyɛma nde lá nkilika nanghedji dj’iyananghaka lá ntondo k’iwɔ mvɔ? Lako! Tovugnɔ ente, iwɔ watshungɔka má mpekanto yɛwɔ yɛ ntondo lá winá wɔ nyɔyi kɛwɔ. Djɛkondeke, lanɛ, ‘nanghedji djɛwɔ’ djɛsɔ mpalekɔ nanghedji djɛwɔ djɛ ntondo. Koko oyɛwɔ nde nanghedji djengoyalá lawɔ m’ɔkɔngɔ w’iwɔ mba okfumbelo l’andja wa bango. Kaanga anto wa nkɔmano ndjɔmbɔmba, Noe, Samwɛlɛ, Davidɛ, la Danyɛlɛ wangeka akambo walendana la Yeso Kristo, edjinge nyɛnyɛ djawo djɛwɔ t’olambo wɔnde. Ntsha ampame yɛsɔ ladjɛ ndjeka akambo efula, ape lasɔ anto wapɔlɔ wangoyala l’akambo efula wa ndjeka ndaaleka!

19. Kɛkɔnge kengokomelá waangotoná mbamba yɛ wɔlɔ yɛ yongapɛyɛ yɛsɔ?

¹⁹ Kɛkɔnge kengokomelá wanɛ wangotona mbamba yɛ wɔlɔ y’iyongapɛyɛ yɛsɔ? Ndjiso 20:15 ntoshimelaka ante: ‘Onto onkfumɔ wɔ djiina djɛnde ntatanema l’onkanda wɔ lowiko ahɔnywamaka t’odjiya w’iyɛ.’ Ee, wangaatshita lotshinda lotshinda. Alekɔ nsɔsɔlɔ djonyi efula iso ndashikikɛ ntsha djiina djɛso nkfundamaka l’onkanda wɔ lowiko, la ngotshikala l’eteyi lotshinda lotshinda!

20. Olemo w’osasa wɔkɔnge wonghonanghemá lá Ɛlɔndjɛlɔ k’ɛnɔnyi kinunu? (Lenda ntshango djelá loposo.)

²⁰ Ɔsɔngo akambo wa wɔlɔ wanghonanghemá l’Ɛlɔndjɛlɔ k’ɛnɔnyi kinunu! Angoyala eleko kenghonanghema olemo woleka ekekete wɔ ndakanyɛ wotananghemaká ntondo lá looko. Koko angoyala lonkina eleko kɛ yongoshishimaka la nkɔmɛ nkfumɔ nanghedji djɛ anto wa wɔlɔ la anto wapɔlɔ. (Iza. 26:9; Ele. 17:31) Wopo wɔkɔnge olemo wɔ ndakanyɛ wɔso yonghonanghema? Djamba djɛso djeyaye ngotokotshɛ djɛ nsipisoyɛ nkambo djɛsɔ la djɛ ndjala la djedjɛ tá nonghanyi kɛ wɔlɔ efula kɛsɔ.