Lá 1 Kɔrɛtɔ 15:8, Poolo atepelaka ante: ‘Koko l’ekomo nde ɛnamaka le lemi ngo ngete le wɔna wotakoka ngɔndɔ.’ L’etsho wɛ ntondo, tasipisoyɛki anto ente Poolo ndatepelaka nde nkambo djɛnde nyɔmɛlɛ winá wɔ ndɛnyi ɛnɛlɔ kɛ Yeso alekɔ lá lomo l’olongo. Ayalaka etengo nde awaka lomo lɔ mbotshɔ kana lɔ nkfundɔ etengo etongami kelá nyuma lá ntondo kɛ winá nkoka, ntepela ente ɛnɔnyi efula lá ntondo k’ekfundwelo kɛsɔ mbanga. Koko m’ɔkɔngɔ wɔ nangha wekelo efula lá vɛrse djɛnɛ ɛnamaka djɛ alekɔ djonyi ntshikitanyɛ looka lɔso lɔ vɛrse djɛnɛ.

Alekɔ nsɔsɔlɔ ente Poolo ndatepelaka lanɛ nde kɛnɛ kenanghemisá winá wɔ ndakadjimola oloko. Ko kɛkɔnge kɛ ndakɔpɛ ntepela má ntepela ante ‘nde ayalaka etengo wɔna wotakoka ngɔndɔ’? Tokanyi tɔ mpɛyɛ lá nkambo ntshɔ nkoka ndjala efula.

Nde akomaka Okristo l’isasimoyɛ edjinge lá yopo yetshimbɛ yimba. Mbala efula wɔna wotakoka ngɔndɔ mbotshɔka l’isasimoyɛ. Winá wɔ Sawolo (kanga loyisá ndokoma Poolo) ndotatshɔka tá Damasɛkɛ djɛ tɛnyɛ Akristo wal’eteyi ndjolo, nde atakanelaki ante angɔtɛna ɛnɛlɔ kɛ Yeso ambokfundɔ. Wopo wɔ Poolo ndakome Okristo, atokamoyɛ ngo nde nyɔmɛlɛ toko, koko akamoyɛka edjinge Akristo wayalaki lá ngando kɛ ndánáká djɛ ntawɛnyɛ ndjolo. Má djiko djɛ lásɔ, nkambo djokomelisá djɛsɔ dj’otshimbɛka yimba djɛkondeke wiso wande iyawodjɛ l’itenyi yɛ winá.​—Ele. 9:1-9, 17-19.

Nde akomaka Okristo lá ‘winá wɔ nyɛtshi.’ Itepela yelá Grɛkɛ yekadjimwama ‘wɔna wombowotshɔ́ ipa la nkoka ngɔndɔ’ nkoka lonkina nkadjimwama ente ‘wɔna wombowotshɔ lá winá wɔ nyɛtshi.’ Bible djɛ Jerusalɛmɛ ntepelaka nkambo djɛsɔ lá lɛdji lɔnɛ ante: ‘Ayalaka etengo mbotshɔka lá winá wɔ kaanga onto ɔmɔ ndotakanelaki.’ Winá wɔ Poolo ndakome Okristo, ko Yeso amboshiyɛka nkalɔ t’olongo. Lá lɛdji l’otshikitanyi l’anto wa Poolo otepelande má avɛrse wa ntondo, nde atɛná Yeso kanga lokfundwisá lá ntondo kɛnde mpanda t’olongo. (1 Kɔ. 15:4-8) Wopo wɔ Yeso ndɛnama le Poolo l’isasimoyɛ ɔpɛyɛka mbamba kɛ nde nyɛna Yeso m’ɔkɔngɔ w’ekfundwelo kɛnde kaanga ɛnamawɔ etengo ayalaka lá ‘winá wɔ nyɛtshi.’

Nde atepelaki nkambo djɛ nde nyɔmɛlɛ lá yopo y’okitshakitshɛ. Lá nkilika andjewi yɛ wayi imɔtshi, itepela yɛ Poolo ndakambe la yɛkɔ lanɛ nkoka ndjokama etengo nde ayawɔnyɔlaki. Ntsha nkambo djɛsɔ ndeke Poolo ndayalaka la djɛkɔ lá wɔɔngɔ, mbɔ ndawolakande ante nde apɛlama djɛ mba mpeyi k’indawa. Lá nsɔsɔlɔ, nde nyɔmɛlɛ atepelaka ante: ‘Lemi ndeke ɔpɔstɔlɔ woleka daambi, edjinge lemi mpɛlama ndjetama ɔpɔstɔlɔ, ladjikɛnde nyɛnyɛka otshumano wɔ Ndjambe ndjolo. Koko má wɔlɔ wɔ Ndjambe w’ipa wɔsɔdjɔmba ndeke oyɛmi wopo woyɛmi.’​—1 Kɔ. 15:9, 10.

Djɛkondeke, nyɛnamaka etengo lanɛ Poolo atepelaki wopo wɔ Yeso ndɛnama lende l’isasimoyɛ ipa la nkanela, winá wɔ ndotákaneláki wɔ ndakome Okristo, kana wopo wɔ ndɔtɛlamá djɛ nyɛna ɛnɛlɔ kelá nyuma kɛ nkamɔ kɛ nghɔsɔ. Ayale nkambo djɛkɔnge dj’indakɔpɛ ntepela, Poolo ɔsaki nkambo djepomanisá lande djɛsɔ la ntshina efula. Kɛsɔ kowimɛka ehamo enkfumɔ ente Yeso akfundɔka má nyɔyi. Djɛkondeke ndatepelaka nkambo dj’okomelisá djɛsɔ mbala la mbala winá wɔ ndapoposanyɛka nkambo djelendana l’ekfundwelo kɛ Yeso le anto ankina.​—Ele. 22:6-11; 26:13-18.