1. Wapɔ wɛkɔnge w’owakaso má nsawola lá kɛnɛ kelendana la wopo w’isewɛ ‘akambo wa nsɔsɔlɔ’?

 “NGEWE akambo wa nsɔsɔlɔ ngetemo?” Ape l’ehamo ombokadjimólaká lá wopo wɔsɔ mbala efula. Ɔsɔ alekɔ woopó wɔ ntondo wɔ winaso andjawodji otopolakawɔ winá w’ɔkɔpaso ndembetelana wɔlɔwɔlɔ. Iso nkɔpaka ndjewa wopo wɔ wananyɔ l’ankaana yɛso iyewe la iyakɔpɛ Yehova edjinge iso nsasangaka ndashimela wopo w’akambo wa nsɔsɔlɔ oyɛwɔ la ntshina leso. (Ɔrɔ. 1:11) Eposelo weyalaka má asawo wa nghɔsɔ nde, iso mvungwanaka ntshina kelekɔ́ l’akambo wa nsɔsɔlɔ. Lonkina iso ndekaka ndashikikɛ djɛ ‘nkindjɛ nkɛnda lá akambo wansɔsɔlɔ,’ ntepela ente nkindjɛ mbika lá yopo yengotoyakala ɛtshɔkɔ mé Yehova la nkindjɛ ndjawolama me nde.​—3 Dj. 4.

2. Kɛkɔnge kɛ songoshishima lá djamba djɛnɛ?

² Lá djamba djɛnɛ tongoshishima donga mɔtshi djetotshinda djɛ nkɔpa akambo wa nsɔsɔlɔ. Masɔ tongoshishima wopo w’okokaso nkindjɛ nyɛnyɛ ente iso nkɔpaka opapɛyɛ wɔ ntshina wɔsɔ. Ape l’ehamo nshishima akambo wasɔ angofudjɛ djedjɛ djɛso te Yehova lá wopo wɔ ndatosepe lá akambo wa nsɔsɔlɔ. (Dj. 6:44) Kɛsɔ kengofudjɛ lonkina mposɛ kɛso kɛ ndakanyɛ anto ankina akambo wa nsɔsɔlɔ.

3. Elonga kɛkɔnge kɛ ntondo keleka djonyi ketotshinda djɛ nkɔpa akambo wa nsɔsɔlɔ?

³ Iso nkɔpaka akambo wa nsɔsɔlɔ m’ɔtɛ wɔ donga efula. Elonga kɛ ntondo keleka djonyi nde, iso nkɔpaka Yehova Ndjambe, Ikɔkɔ y’akambo wakɔ wa nsɔsɔlɔ. Má lotshimbo l’Otepela wɔnde, Bible, towewaka ape etengo Ontongi wɔ nkfulu efula w’olongo la looko toko, koko lonkina etengo Papa kɛso kɛ ngandji efula kel’olongo, keyakiyanyɛka efula lá nkambo  djɛso. (1 Pɛ. 5:7) Iso ndjewaka ente Ndjambe kɛso alekɔ lokana ‘djandji edjinge lokana nkɛtshi, apomalaka nkɛlɛ la nkeke ndola kfuu la ngandji kɛ nkɔmano edjinge la nsɔsɔlɔ.’ (Epo. 34:6) Yehova nkɔpaka sii. (Iza. 61:8) Nde nkiyanaka winá w’ɔtɛnande tɛna ndjolo, nde alekɔ entshupa la akongela l’oloko lukuluku, djɛ nshiyɛ ndjolo yɛso inkfumɔ lá winá wɔ ndashikikɛ. (Jɛr. 29:11) Kaanga iso tokongela winá wɔ wɔlɔ wɔsɔ l’eloko lukuluku! Djɛkondeke ɔkɔpaso Yehova efula!

4-5. Lamo ɔpɔstɔlɔ Poolo ndɛdjɛ nkongi djɛso la longo lɔ masuwa?

⁴ Elonga kenkina kɛkɔnge ketotshinda djɛ nkɔpa akambo wa nsɔsɔlɔ? Akambo wa nsɔsɔlɔ ntoyakalaka wapɔ efula. Tokoshishima ndjɔmbɔmba kɛmɔ. L’anteyi k’akambo wa nsɔsɔlɔ w’otanaso lá Bible ndeke otanaso edjinge nkongi djɛso djelendana l’etsho weyaye. Djɛ nyɛnyɛ ntshina kelekɔ la nkongi djɛsɔ, ɔpɔstɔlɔ Poolo afunaka ante: ‘Nkongi djelekɔ laso djɛsɔ djelekɔ etengo longo lɔ masuwa tá mbiko yɛso, djelekɔ ndi mpasukasuka.’ (Heb. 6:19) Ngo ngete longo oshikimadjɛkande masuwa, nkongi djɛso djemá Bible ntoshikimadjɛka winá w’opomanaso l’ehemba lá mbiko yɛso.

⁵ Lanɛ, Poolo atepelaki nkongi dj’Akristo w’ankfutami w’avuta djɛ towika l’olongo. Koko etepela wɛnde ndendanaka lonkina l’Akristo wakongela djɛ mbika lotshinda lotshinda lá paradiso kelá looko. (Dj. 3:16) Lá nsɔsɔlɔ, wekelo wolendana la nkongi djɛ lowiko l’etshinda wombotokotshɛ djɛ ndjala la lowiko lolekɔ l’okoma.

6-7. Wopo wɔkɔnge Yvonne ndawa wapɔ má ndjewa nsɔsɔlɔ kelendana l’etsho weyaye?

⁶ Tokoshishima ndjɔmbɔmba kɛ nkaana kɛso kɛmɔtshi k’etawɔ Yvonne. Nde atafula lá nkfumbo k’Ewakɛ wɛ Yehova, edjinge m’ɔlɛngɛ wɔnde nde okaki nyɔyi wɔma efula. Nde mvungɔka djɛ awalaka etepela ɛmɔtshi wetshikalisa lá wɔɔngɔ wɔnde: “Lofu lɔmɔtshi lomi apangoyala.” Nde ntepelaka ante: “Ntawaki ilɔ m’ɔtɛ w’etepela wɛsɔ ngo djɛ nkanela lá nkambo dj’etsho weyaye. ‘Ntepelaka ente lowiko lopangoyalaka ngo nghɔnɛ toko.’ Ndawopolaka ente: ‘Lamo owikaso ngo ɛnɔnyi emangha toko kaanga sopakombolaka mvɔ?’”

⁷ M’ɔkɔngɔ, winá wɔ ndookomaka oseka, Yvonne apomanaka nya Ewakɛ wɛ Yehova. Nde atepela ante: “Mbangaka ndjawola ente lemi nkoka ndjala la nkongi djɛ ndowika lotshinda lotshinda lá Paradiso kelá looko.” Wapɔ wɛkɔnge wewisa nkaana kɛso kɛsɔ má ndjeka akambo wa nsɔsɔlɔ? Nde akotshɛ ante: “Mposambaka ilɔ lonkina l’otsho má wɔma wɔ kɛnɛ kengonkomela l’etsho weyaye kana wɔ nyɔyi.” Etengo okokɛ nkanela, akambo wa nsɔsɔlɔ wamboyala ntshina efula le Yvonne, edjinge nde awa osasa efula má nshimela anto ankina nkongi djelendana l’etsho weyaye.​—1 Ti. 4:16.

8-9. a) Lá ndjɔmbɔmba kɛmɔtshi kɛ Yeso, mpame kɛmɔtshi ndananghe nge winá wɔ ndisola ekete kɛmɔtshi kɛ ntshó? b) Ntshina kɛ ngetenge kelekɔ l’akambo wa nsɔsɔlɔ lewɛ?

⁸ Losango lɔ wɔlɔ l’Onkfumi wɔ Ndjambe lolekɔ l’anteyi k’akambo wa nsɔsɔlɔ welá Bible. Yeso ɛdjɛka akambo wa nsɔsɔlɔ walendana l’Onkfumi wɔ Ndjambe la nkete djɛ ntshó djembisamá. Etengo otepelawɔ lá Mateo 13:44, Yeso atepelaka ante: ‘Onkfumi wel’olongo wolekɔ etengo ekete kɛ ntshó kembisamá lá bedji, ko onto ɔmɔtshi ɛnaka ko isaka lonkina, edjinge má efula k’osasa keyalisá lande, nde atshɔka, asadjɛka nkete djɛnde nkfumɔ ko ayɛka ndosomba bedji djɛkɔ.’ Tokote ente mpame kɛsɔ atahonaki nkete djɛ ntshó. Koko winá wɔ ndiisolaka ekete kɛ djonyi kɛsɔ, nde awolaka ntshutshɛ kenfumɔ kɛ keyalaki lande djɛ ndowa. Lá nsɔsɔlɔ, nde asadjɛka kenkfumɔ keyalaki lande. Lámo? Ladjikɛnde  nde ewaki ante ekete kɛ ntshó kɛ ndisola kɛsɔ kelekɔ ntshina efula. Keleka nkete nkfumɔ dj’okotshɛnde ntshina otale.

⁹ Oyawokɛ nde nghɔsɔ lá kɛnɛ kelendana l’akambo wa nsɔsɔlɔ? Ee ape l’ehamo! Iso ndjewaka ente lako ekete k’andja wanɛ okokawɔ ntɔpɛyɛ ko ndjɛlama l’osasa w’owaso má nkambela Yehova winá wɔsɔ, edjinge nkongi dj’okotshɛso djɛ ndowika lotshinda l’etsho weyaye l’ɛlɔndjɛlɔ k’Onkfumi wɔ Ndjambe. Mpeyi k’okotshɛso kɛ ndjala la djokanelo djɛ ma ma la Yehova ndeka nkete nkfumɔ djɛ somboyapekala ntshina. Osasa wɔso woleka ekekete nde ‘ndosasangɛ l’akambo ankfumɔ.’​—Kɔl. 1:10.

10-11. Kɛkɔnge ketshindisa Michael djɛ nangha etshikitano wɛ nkekete lá lowiko lɔnde?

¹⁰ Efula l’anteyi kɛso wayapekalaka nkete efula ngo djɛ ndjawolama me Yehova. Wamɔtshi wambotshikaká elemo wɛwɔ wɛ nkekete wel’andja wanɛ. Ankina wambotshikaka ndapɛyɛ tshɛ djɛ mpona okfudji wel’andja wanɛ. Amɔtshi lonkina watshikitanyɛka mbiko yɛwɔ winá w’iyeke akambo walendana la Yehova. Kɛsɔ ndeke Michael ndananghe. Nde atafula lá nkfumbo k’Ewakɛ wɛ Yehova. Winá wɔ ndayalaka olangala, wokfumbaka lá karate. Nde ntepelaka ante: “Ayalaka djonyi le lemi djɛ nkindjɛ ndjala la demba djɛ wɔlɔ. L’etsho wɛsɔ, ndawokaki djɛ lako onto wokoka nanghela lemi nyɛtshi.” Koko winá wɔ ndotateyɛka ndjeka Bible, Michael ekaka ikanyi yɛ Yehova lá kɛnɛ kelendana la wayi wa lopango. (Yee. 11:5) Michael atepelaka lá nkambo dj’Ewakɛ wɛ Yehova w’olakanyɛki Bible ante: “Lako kaanga lofu l’iyanshimela ambɔ ngo lemi ntshika karate, iwɔ wakindjɛki ngo ndakanyɛ lemi akambo wa nsɔsɔlɔ welá Bible.”

¹¹ Winá wɔ Michael ndotalekaka ndjeka akambo walendana la Yehova, ndeke ngandji kɛnde te Nde iyotalekaka mfula. Nde asepamaka pekapeka má nkɛtshi kɛ Yehova te enkambi wɛ Nde. Lá winá wɔk’ɔmɔ, Michael asipisoyɛka ante nde ladjɛ ntshikitanyɛ lowiko lɔnde. Nde atepelaka ante: “Lewaki ente ntshika karate ayalaka nkambo dj’ekekete djɛ motananghaka ntondo.” Koko, lewaki lonkina ente nkambo djɛsɔ ngosasangɛ Yehova, edjinge layalaki l’eshikikelo ente nkambela Yehova ndeka nkete nkfumɔ dj’okokami ntshutshɛ ntshina.” Michael ewaki ante akambo wa nsɔsɔlɔ wa ndisola wayalaki ntshina efula, ko kɛsɔ k’otshindaka djɛ nangha etshikitano wɛ nkekete lá lowiko lɔnde.​—Dja. 1:25.

12-13. Wopo wɔkɔnge akambo wa nsɔsɔlɔ wemá Bible iyakotshɛ Mayli?

¹² Djɛ nyɛnyɛ ntshina kelekɔ l’akambo wa nsɔsɔlɔ, Bible ndjɛdjɛka akambo wa nsɔsɔlɔ la ntala djɛpɛta lá windjima. (Yee. 119:105; Ɛfɛ. 5:8) Mayli, nkaana kɛmɔtshi kemá Azerbaijan, ɔsaki okotshɔ wɔ ndawa m’Otepela wɔ Ndjambe la ntshina efula. Nde afulaka lá nkfumbo kɛtɛmɔlaki lá ntolo djetshikitanyi. Papa kɛnde ayalaki ose Mizilima, ko nyɔ kɛnde ose Juda. Nde ntepelaka ante: “Kaanga motilaki ehamo ente Ndjambe alekɔ, ndawopolaki weepó efula. Ndawopólaki ente: ‘Lamo Ndjambe ndatonge Onto, edjinge lamo onto oyɛnde ladjɛ nyɛna ndjolo lá lowiko lɔnde l’otondo ko m’asɔ m’ɔkɔngɔ wɔ nyɔyi ntɛna ndjolo lonkina l’iyɛ yɛ lotshinda lotshinda?’ Ladjikɛnde anto wangotepelake ambɔ kenkfumɔ ketokomela oyɛwɔ nde ɛkɔpa kɛ Ndjambe, ndawopolaki ente, ‘Ndjambe oyɛnde ngo onto wɔkɔpaka nyɛna wopo wɔ anto ɛnawɔ ndjolo toko?’”

¹³ Mayli akindjɛka mpona nsakiso lá weepó wɛnde. M’ɔkɔngɔ, nde ayɛka ndawola ndjeka Bible edjinge akomaka Owakɛ wɔ Yehova. Nde ntepelaka ante: “Tolembetelo t’awoyɛ tɔpɛyɛ Bible tonkotshɛka djɛ lemi ndjala  la lowiko l’osasa. Nsakiso yokama papoo yɛ mawa m’Otepela wɔ Ndjambe yɛmpɛyɛka vu djel’eteyi k’oloko.” Ngo ngete Mayli, isankfumɔ numeka Yehova, “Kanga l’otetisá [má] widjima tá osase wɔnde wɔ nkamɔ.”​—1 Pɛ. 2:9.

14. Wopo wɔkɔnge w’okokaso mfudjɛ ngandji kɛso t’akambo wa nsɔsɔlɔ? (Lenda lonkina ipapango yelekɔ́ l’ɔtɛ wɔ djoyi ante “ Ndjɔmbɔmba inkina.”)

¹⁴ Ɔsɔ alekɔ ngo ndjɔmbɔmba imangha toko yɛnyɛ ntshina kelekɔ́ la akambo wa nsɔsɔlɔ. Ape l’ehamo okoka ntɔnɔlá lá ndjɔmbɔmba inkina efula. Lamo ngopalonghanyɛ djɛ mpona donga nkina djetotshinda djɛ nkɔpa akambo wa nsɔsɔlɔ lá wekelo wɔko wɔ onto nyɔmɛlɛ? Winá wɔ sotaleke nkɔpa akambo wa nsɔsɔlɔ, ndeke songotalekaka mba topo tɔ nyɛnyɛ ngandji kɛso t’akambo wakɔ wa nsɔsɔlɔ.

15. Yopo imɔtshi yɛkɔnge y’okokaso nyɛnyɛ ente iso nkɔpaka akambo wa nsɔsɔlɔ?

¹⁵ Iso nkoka nyɛnyɛ ente iso nkɔpaka akambo wa nsɔsɔlɔ má ndjekaka Bible la enkanda wesakisola Bible mbala la mbala. Lonkina, ayale ilá kɛkɔnge kɛ sombewa akambo wa nsɔsɔlɔ, tolekɔ winá enkfumɔ l’akambo efula wa ndjeka. Numelo kɛ ntondo kɛ periodikɛ kɛnɛ  ketepelaka ante: “Akambo wa nsɔsɔlɔ [walekɔ etengo] dɛmbɔlɛmbɔ djɛ daambi djelekɔ l’osowe djembodjingama la nkɛngɔ yɛ ngando efula. Djɛ onto mba dɛmbɔlɛmbɔ djɛkɔ nde ladjɛ ndjila welo efula. . . . Lonkina winá wowande dɛmbɔlɛmbɔ djɛkɔ, nde apakoke nsasanga djɛ mba ngo mmɔ toko. . . . Nde ladjɛ nkindjɛ mpona djɛ ndjisola alɛmbɔmbɔ ankina efula. Ndjeka alekɔ nkambo djɛ wolo koko wapɔ w’owaso ndekaka welo w’ilaso.

16. Yopo yɛkɔnge yɛ wekelo wɔ Bible yolekakɛ nkɔpa? (Woongo 2:4-6)

¹⁶ Ape isankfumɔ ndeke lɔkɔpaka mbala la ndjeka. Koko Yehova ntoshimelaka dj’iso nkindjɛ ‘mpona’ la nkindjɛ ‘nshishima’ dj’iso ndjala la looka lɔ wɔlɔ l’akambo wa nsɔsɔlɔ. (Wala Woongo 2:4-6.) Winá w’ilaso welo wɛ nghɔsɔ, iso mbaka wapɔ efula. Lá kɛnɛ kelendana la badji djɛnde djɛ Bible, Corey ntepelaka ante nde ndjilaka yimba yɛnde inkfumɔ lá vɛrse mmɔ. Nde mpakisolaka ante: “Lemi mbalaka nɔtɛ inkfumɔ, ndendaka rɛfɛransɛ enkfumɔ, la nanghaka ehonelo enkina. . . . Yopo yɛmi yɛ ndjeka yɛsɔ nkotshɛka lemi djɛ ndjewa akambo efula!” Ayale okambakaso nde la yopo yɛsɔ kana inkina, iso nyɛnyɛka ente iso ndɔsaka akambo wa nsɔsɔlɔ la ntshina winá w’ɔsaso winá la w’ilaso welo djɛ ndjeka.​—Yee. 1:1-3.

17. Kɛkɔnge kesakisola mbika lá yopo yokana l’akambo wa nsɔsɔlɔ? (Djakɔbɔ 1:25)

¹⁷ Lá nsɔsɔlɔ, iso ndjewaka ente topakoke nkoma ngo lá ndjeka akambo wa nsɔsɔlɔ toko. Djɛ mba wapɔ m’eteyi, iso ladjɛ mbika lá yopo yokana l’akambo wa nsɔsɔlɔ, ntepela ente nkamba la kɛnɛ k’ekaso lá lowiko lɔso. Ngo má nangha nghɔsɔ ndeke akambo wa nsɔsɔlɔ yongotoyakala osasa wɔ nsɔsɔlɔ. (Wala Djakɔbɔ 1:25.) Wopo wɔkɔnge okokaso ndashikikɛ ente towika lá yopo yokana l’akambo wa nsɔsɔlɔ? Wɔnanyɔ ɔmɔtshi apɛyɛka ikanyi ante iso nkoka ndashishima isɔmɛlɛ djɛ ndjewa lampe onanghaso wɔlɔ edjinge lampe oyɛso ladjɛ ndalɔngɔsɔla. Ɔpɔstɔlɔ Poolo atepelaka nkambo djɛsɔ lá lɛdji lɔnɛ ante: ‘Ayale lá lɛdji lɔkɔnge lɔ sombofula, tokindjɛ ntshɔ tá ntondo lá lɛdji lɔ wɔlɔ lá nkilika djina djɛkɔ mmɔ.’​—Flp. 3:16.

18. Lamo oyɛso ladjɛ ndjila welo djɛ ‘nkindjɛ nkɛnda lá akambo wa nsɔsɔlɔ’?

¹⁸ Kokanela efula kɛ wapɔ w’owaso má ndjila welo wɛso enkfumɔ djɛ ‘nkindjɛ nkɛnda lá akambo wa nsɔsɔlɔ’! Topalɔngɔsɔla ngo lowiko lɔso toko koko lonkina iso nsasangɛka Yehova la winaso andjawodji. (Woo. 27:11; 3 Dj. 4) Lá nsɔsɔlɔ, ɔsɔ alekɔ donga djɛ wɔlɔ efula djetotshinda djɛ nkɔpa akambo wa nsɔsɔlɔ la djɛ mbika lá yopo yokana l’akambo wakɔ wa nsɔsɔlɔ!