1. Lá nkilika Yeembo 18:​46, Davidɛ ndɛdjɛ Yehova la nge?

 TOWIKA l’andja wambolola la wayi w’isasimoyɛ wakoka mvungusanyɛ, la kaanga ntshikitanyɛ mbiko yɛso. Ɔsɔ ngo oyɛso la djedjɛ djɛ nkadjimɔ te Yehova djɛ mpona okotshɔ lá winá wɛ nghɔsɔ! Djamba mboheta ntovungolaka djɛ Yehova alekɔ Ndjambe kewika, la alekɔ winá enkfumɔ entshupa djɛ ntokotshɛ́. Winá w’owaso okotshɔ wɔnde tokoka ndjala l’eshikikelo ente ‘Yehova alekɔ Ndjambe kewika!’ (Wala Yeembo 18:46.) Koko, ndambo daambi m’ɔkɔngɔ wɔ nde ntepela etepela wɛsɔ, Davidɛ etaka Ndjambe ante ‘Ve djɛmi.’ Ladjikɛnge Davidɛ ndɛdjɛ Yehova, Ndjambe kewika lá ve, ekete kepalekɔ́ la lowiko?

2. Lamo oyɛso ladjɛ nshishima wopo wɔ Davidɛ ndete Yehova ante ‘Ve djɛmi’?

² Lá djamba djɛnɛ, tongoshishima lamo etawɔ Yehova ve, la kɛnɛ kɛ ndjɔmbɔmba kɛsɔ otolakanyɛwɔ lá nkambo djɛnde. Tɔnghɛna lonkina wopo w’okokaso ndɔwɔsa ete ngo ve djɛso. L’ekomo, tɔnghɛna wopo w’okokaso ndjokola wekeka wande.

LAMO YEHOVA OYƐNDE ETE NGO VE?

3. Wopo wɔkɔnge Bible okambakande mbala efula la itepela ‘ve’? (Lenda ntshango djɛ loposo.)

³ Bible nkambaka l’itepela ‘ve’ djɛ ntokotshɛ́ djɛ iso nsipisoyɛ wekeka amɔtshi walekɔ́ la Yehova. Mbala efula winá wɔ enkambi wɛ Ndjambe olumɛkawɔ wekeka wande, wangotepelake ambɔ alekɔ ete ngo ve. Lá Mvungo k’ɛlɛmbɛ 32:​4, ndeke idjena yɛ ntondo yɛ Bible etande Yehova ante ‘Ve.’ Ana atepelaka lá lɔlɔmbɔ ante:  ‘Lako ve dekɔ́ ete ngo Ndjambe kɛso.’ (1 Sa. 2:2) Abakuka etaka Yehova ante: ‘Ve djɛmi.’ (Aba. 1:12) Omfunyi wɔ Yeembo 73 etaka Ndjambe ante: ‘Ve djɛ oloko wɔmi.’ (Yee. 73:26) Edjinge Yehova ndáwetaka nyɔmɛlɛ kɛnde ante ve. (Iza. 44:8) Nyontshɔ tokoshishima wekeka asato wa Yehova wanangha djɛ nde ndjala ete ngo ve la tokolenda wopo w’okokaso nangha djɛ nde ndjala ‘Ve djɛso.’—Mvu. 32:31.

4. Wopo wɔkɔnge Yehova oyɛnde djiisa? (Yeembo 94:22)

⁴ Yehova alekɔ djiisa. Ngo ngete onto okokande ndjisama lá ve winá wɔ lofunge, Yehova ntowombaka winá w’ompomanaso l’ekakasano wɛ nkekete lá lowiko. (Wala Yeembo 94:22.) Nde ntokotshɛ́ka dj’iso nama djokanelo djɛ wɔlɔ la nde, la angotoshikikɛke ante lako ekete kɛtɛnyɛ ndjolo winá wɔsɔ kengotoyakala eposelo wɛ nyɛtshi etshinda etshinda. Ole nde alaka lonkina ante: L’etsho weyaye nde angimɛ ekete kenkfumɔ ketoyakala ndjolo la ekiyano.—Ezk. 34:​25, 26.

5. Wopo wɔkɔnge Yehova okokande nkoma Djiisá djɛso?

⁵ Wopo ɔmɔtshi w’okokaso nangha djɛ Yehova ndjala ve djɛ Djiisa djɛso nde má ndɔlɔmba. Winá w’ɔlɔmbaso, Yehova ntɔpɛyɛka ‘vu djɛ Ndjambe’ djelamaka eloko la timba tɔso. (Flp. 4:​6, 7) Tokolenda kɛnɛ kekomelisá Artem, wɔnanyɔ w’ingelisá lá lokando m’ɔtɛ wɔ djawo djɛnde. Onto wowopolaki weepó, owopolaka mbala la efula la ɔtɛkɛka nsɔnyi lombombe. Artem atepela ante: “Latshimbaki yimba mbala inkfumɔ yɛ ndandjopolaka weepó. . . . Lalɔmbaki Yehova winá enkfumɔ. Ndɔlɔmbaka djɛ nde mpɛyɛ vu djɛ l’oloko la balo. Topo tɔ mayɛlɛ tokambisá l’onto w’ondjopolaki weepó tɔsɔ, totakamba le lemi. . . . Má okotshɔ wɔ Yehova, ayalaka ete ngo lambemala m’ɔkɔngɔ wɔ epele k’awanga.”

6. Ladjikɛnge okokaso ndáwɛkɛ winá enkfumɔ le Yehova? (Izaya 26:​3, 4)

⁶ Yehova alekɔ onto wɛdje ndjilela oloko. Ete ngo ve ndopasɛkɔka, Yehova alekɔ winá enkfumɔ entshupa djɛ ntokotshɛ́. Tokoka ndowilela oloko mande nde alekɔ ‘Ve dj’etshinda etshinda.’ (Wala Izaya 26:​3, 4.) Nde angoyalaka winá enkfumɔ la lowiko djɛ nkotshɛ alaka wande, ndjoka ndɔmbɔ yɛso, la ntɔpɛyɛ okotshɔ w’oyɛso la djonyi. Tokoka lonkina nkongela me Yehova ladjikɛnde nde alekɔ la nkɔmano te anto wokambela. (2 Sa. 22:26) Nde apavungɛki lotshinda kɛnɛ k’onanghaso la angotofuta ngo ntofuta.—Heb. 6:10; 11:6.

7. Kɛkɔnge kengotokomela winá w’oyawɛkɛso le Yehova? (Lenda edjinge ntshango.)

⁷ Iso nanghaka djɛ Yehova ndjala Ve djɛso winá w’oyawɛkɛso le nde lá akambo ankfumɔ. Tolekɔ l’eshikikelo ente má ndɔlɛmɛyɛ kaanga lá winá wɛ ndjolo, tongowa wapɔ. (Iza. 48:​17, 18) Winá wɔ isɔngɛna osukɔ wɔnde, wɛkamo wɔso te nde wongofula. Ko manyi tongoyalɔngɔsɔla wɔlɔ efula djɛ nkfulumeyɛ ekakasano má ndjala l’eshikikelo ente, ngo Yehova toko ndeke l’okoka ntokotshɛ́. Mbala efula tongoyɛke ndosipisoyɛ ente Yehova alekɔ onto wɛdje ndjilela oloko, winá w’oyɛso lá okakasano wɔ lako kaanga onto w’okokaso nkadjimɔ te nde djɛ mpona okotshɔ. Vladimir atepela ante: “Winá wɛ mahetshɛ lá mvulu kɛ lokando weyalaka eleko kɛ wɔlɔ  efula lá djokanelo djɛmi la Ndjambe. Ndjekaka djɛ ndjala la wɛkamo w’efula le Yehova ladjikɛnde, layalaki ngo mɔmɛlɛ la ngo nde toko ndeke lokokisá nkotshɛ́ lemi djɛ nkfulumeyɛ.”

8. a) Ladjikɛnge okokaso ntepela ente Yehova apatshikitana? b) Wapɔ wɔkɔnge w’owaso me Ndjambe kewika má ndɔwɔsa ete ngo Ve djɛso? (Yeembo 62:​6, 7)

⁸ Yehova apatshikitana. Yehova alekɔ ete ngo ve dj’ekekete kana onkókó w’ombopikamá la womboshikimalá. Lonto lɔnde ole alaka wande wapatshikitanaka kaanga ndambo daambi. (Mal. 3:6) Winá wɔ Adama la Eva iyɔtɔmbɔkɛla lá Ɛdɛna, Yehova atatshikitanyɛ ikanyi yɛnde lá nkambo djɛ wana w’anto. Ete ngo ɔpɔstɔlɔ Poolo ndafune, Yehova ‘apakoke ndáwanghana nyɔmɛlɛ kɛnde.’ (2 Ti. 2:13) Kɛsɔ nsakisolaka ente ayale nkambo djɛkɔnge djekoka mposa kana kɛkɔnge kɛ anto ankina okokawɔ nangha, Yehova apatshikitanyɛki wekeka, ikanyi, kana ɛlɛmbɛ wɛnde. Má ndawɛkɛ le Ndjambe kɛso kemboshikimala, tokoka nkongela ewiko kɛso me nde ole okotshɔ djɛ nkfulumeyɛ lá deko djɛ ovungusano.—Wala Yeembo 62:​6, 7.

9. Olakanyelo wɔkɔnge isombowa má kɛnɛ kekomelisá Tatyana?

⁹ Tongonangha djɛ Yehova ndjala Ve djɛso má mpika wiso lá wopo w’onto w’oyɛnde la má nama lá yimba ikanyi yɛnde lá nkambo djɛ looko la djɛ wana w’anto. Nangha nghɔsɔ nkoka ntokotshɛ́ djɛ nama vu djɛso edjinge ntshikala la nkɔmano tende winá w’okfulumeyɛso ekakasano. (Yee. 16:8) Nsɔsɔlɔ kɛ nkambo djɛsɔ kɛnamaka le nkaana kɛmɔtshi ketawɔ Tatyana, kanga lingelisá lá lokando m’ɔtɛ wɔ djawo djɛnde. Nde atepela ante: “Ndjalaki ngo mɔmɛlɛ. Ɔsɔ ayalaka okakasano w’ekekete efula. Lalɛmbaki mbala efula.” Koko winá wɔ ndɛnyi wopo wɔ ekakasano wɛnde iyalendanaka la Yehova ole l’ikanyi yɛnde, nde ayalaka l’akoka wa nkfulumeyɛ la awaka lokembo lá yimba. Nde atepela ante: “Nsipisoyɛ lamo akambo wasɔ yankomela ankotshɛ́ka djɛ lemi mvungɔ ente momokoma l’ekakasano wɛnɛ nde m’ɔtɛ wɔ Yehova. Kɛsɔ kenkotshɛ́ka dj’ipa lemi nkindjɛ nkanela ngo lá nkambo djɛmi mɔmɛlɛ.”

10. Wopo wɔkɔnge Yehova okokande ndjala Ve djɛso má winá wɔsɔ?

¹⁰ L’etsho wetokonga lá ntondo, tongopomana l’ekakasano wɛngɔlɔmba dj’iso ndáwɛkɛ te Yehova lá lɛdji lɔ sotananghaka ntondo. Winá wɔsɔ ndeke winá wɔ nkembɛ wɛkamo wɔso ente nde angɔtɔpɛyɛ kenkfumɔ k’oyɛso la djonyi. Okokaso nangha nkambo djɛsɔ ngete mo? Má mbala ɛkɔndɔ wɛ Bible la kɛnɛ kekomela Ewakɛ wɛ lɔɔko kɛnɛ. Winá wɔ ngotawale ɛkɔndɔ wɛsɔ, kɔmɛ wopo wɔ Ndjambe ndasuke enkambi wɛnde. Tɔnɔla efula l’ɛkɔndɔ wɛsɔ. Nangha nghɔsɔ angokokotshɛ́ djɛ Yehova ndjala Ve djɛko.

OKOLA WEKEKA WA YEHOVA

11. Lamo okombolaso ndjokola wekeka wa Yehova? (Lenda ole ipapango “ Okoma w’okoka ndáwilela wananyɔ w’elangala.”)

¹¹ Tɔmɛna wopo wɔ Yehova ɛnyɛnde ante alekɔ ete ngo ve. Winá wɔsɔ tokolenda wopo w’okokaso ndjokola wekeka wande. Ntsha tombonangha la wolo djɛ ndjokola wekeka wa Yehova, tokoka nkembɛ wananyɔ l’ankaana yɛso. Ndjɔmbɔmba,  Yeso apɛyɛka Simɔ djiina: Sefasɛ (djekadjimwama ente “Pɛtɛlɔ”), djesakisola “Etatshi kɛ Banga.” (Dj. 1:42) Kɛsɔ kɛnyɛ ente nde angoyala ikɔkɔ yɛ lokembo la angoshikimadjɛ otshumano. Bible ntepelaka djɛ tokokolo t’otshumano ante ‘walekɔ ete ngo ntshitshi kɛ ve dj’ekekete.’ Kɛsɔ kɛnyɛ wopo w’olamawɔ anto walekɔ́ l’otshumano. (Iza. 32:2) Lá nsɔsɔlɔ, otshumano onkfumɔ mbaka wapɔ winá wɔ anto ankfumɔ, wananyɔ l’ankaana, okolawɔ wekeka wa Yehova.—Ɛfɛ 5:1.

12. Kootepela wopo w’okokaso ndjala djiisa dj’anto ankina.

¹² Yala djiisa. Lá winá ɛmɔtshi, tokoka ndjala djiisa djɛ wananyɔ lá winá w’ambalaka yeyɛ má nkete djetongamisá, evungusano wɛ wana wa mbandja, kana ambandji. Ete ngo akambo wa ‘etsho w’ekomo’ iyotaleke ntshitana, ape l’ehamo tongowa mbamba efula yɛ nkotshana. (2 Ti. 3:1) Tokoka lonkina mpɛyɛ wananyɔ l’ankaana lokembo la ndawɛnyɛ ngandji k’oyɛwɔ la djonyi. Yopo imɔtshi y’okokaso nangha nkambo djɛsɔ nde, má iwɔ nyɛna ambɔ talongola wɔlɔ winá w’oyɛwɔ lá Mvulu k’Onkfumi, la nkotshɛ́ djɛ otshumano ndjala lá osasango. Towika l’andja wambolola la ndjolo, ntshamba djɛ ngandji ole l’akambo wa yɛnyi. Djɛko ndeke, winá wɔ wananyɔ l’ankaana oyɛwɔ lá losanghanyɛ, tongokombolake dj’iso nangha la wolo dj’iwɔ nyɛna ambɔ takɔpa, takembɛ la tawomba.

13. Wopo wɔkɔnge, pekapeka tokokolo, okokawɔ nkoma djiisa dj’anto ankina? (Lenda edjinge ntshango.)

¹³ Tokokolo wakoka ndjala djiisá djɛ ase otshumano wakfulumeyɛ ekakasano wɛ wolo. Winá wɔ ambalaka yeyɛ má nkete djetongamisá la elando w’isasimoyɛ, tokokolo nonghanyɛka okotshɔ wɛnama. Wangɔpɛyɛke lonkina okotshɔ wɔ nyuma. Wananyɔ l’ankaana wangoyala entshupa djɛ nsawola l’ikokolo ntsha wangewake ambɔ alekɔ onto wɔlɔ, angokanake nkɛtshi la angoyalake entshupa djɛ ndjekameyɛ. Wekeka wa nghɔsɔ wangokotshɛ́ anto ankina dj’iwɔ nyɛna ambɔ waawakanyɛ wɔlɔ, la angoyala wɔdju le wɔ djɛ nkamba  l’ɛlɔndjɛlɔ kembopikama lá Bible kɛ ikokolo okokande mpɛyɛ.—1 Te. 2:​7, 8, 11.

14. Wopo wɔkɔnge w’okokaso nyɛnyɛ ente tolekɔ onto wɛdje ndjilela oloko?

¹⁴ Yala onto wɛdje ndjilela oloko. Tongokombolake djɛ anto ankina ndáshikikɛ ambɔ tokoka ndakotshɛ́ winá w’oyalawɔ la djonyi, pekapeka lá deko djɛ wolo. (Woo. 17:17) Kɛkɔnge k’oyɛso ladjɛ nangha dj’anto ankina ntilela oloko? Tokoka nangha la wolo djɛ nyɛnyɛ wekeka wa Ndjambe winá la winá ete ngo nkotshɛ alaka waso la nangha la wolo djɛ nɛmɛyɛ winá. (Mat. 5:37) Tokoka lonkina mpɛyɛ okotshɔ wɛnama ntsha djonyi dekɔ. Lá djiko djɛ lasɔ, toyashikikɛ djɛ nkotshɛ odjito wɔ iyɔmbɔtɔpɛyɛ lá nkilika alako w’olongolaso.

15. Wopo wɔkɔnge otshumano okokawɔ mba wapɔ ntsha tokokolo walekɔ anto wɛdje ndjilela oloko?

¹⁵ Tokokolo tɛdje ndjilila oloko oyɛwɔ nde wapɔ w’ekekete efula l’otshumano. Lá ngete mo? Winá wɔ ansakodji ewawɔ ambɔ wakoka ndjeta tokokolo winá onkfumɔ w’oyɛwɔ la djonyi djɛ okotshɔ, ndjɔmbɔmba olami w’iloyi y’olemo w’ipoposanyɛ, iwɔ wangɛna ambɔ wangasukake.  Ansakodji wangɛna lonkina ambɔ wangawakanyɛke wɔlɔ winá w’ewawɔ ambɔ tokokolo walekɔ entshupa djɛ ndaakotshɛ́. Winá wɔ tokokolo ɔpɛyɛwɔ alako wambopikama lá Bible la lá enkanda wɛ mfumbe kɛ nkɔmano, koko ape lá tokanyi tɔwɔ, wananyɔ l’ankaana wangoleka ndawilela oloko. Wananyɔ l’ankaana walekɔ l’elonga kenkina kɛ ndjala la wɛkamo te ikokolo ilama toseke la ikotshɛ kɛnɛ k’otepelande.

16. Wapɔ wɔkɔnge iso isɔmɛlɛ la anto ankina isowaka winá w’onanghaso kɛnɛ kɛ Yehova otepelande ante kelekɔ wɔlɔ?

¹⁶ Nangha winá enkfumɔ kɛnɛ kɛ Yehova otepelande ante kelekɔ wɔlɔ. Tokoka ndjala la ndjimbo kɛ wɔlɔ l’anto ankina ntsha topikama ndii lá kɛnɛ kelekɔ wɔlɔ, la ntsha tɔsa akano wambopikama lá tɔkfɔ tɔ Bible. Winá w’ofulaso lá djawo la lá balo djɛ djɔ, tongoleka mpikama ndii lá nsɔsɔlɔ. Tongewa elakanyelo w’engolo la tokanyi topokana l’ikanyi yɛ Yehova, ole topangotshika dj’iwɔ ntokfumbola. (Ɛfɛ. 4:14; Dja. 1:​6-8) Djawo djɛso te Yehova la l’alaka wande ngotoshikimadjɛ winá w’olongolaso nsango yɛ nyɛtshi. (Yee. 112:​7, 8) Tongoyala lonkina l’akoka wa nkotshɛ́ anto wapomana l’ekakasano.—1 Te. 3:​2, 3.

17. Kɛkɔnge kekotshɛ́ tokokolo dj’iwɔ ndjala la ndjimbo kɛ wɔlɔ?

¹⁷ Tokokolo ladjɛ nangha akambo la wɛdjimo, ndjala la yimba yɛ wɔlɔ, ndjila akambo l’ɔnɔnghɔ la ndjala l’ekanedji kɛ wɔlɔ. Ampame yɛsɔ wangoyalake la ndjimbo kɛ wɔlɔ te anto ankina la wangokembɛke otshumano má ‘mvunda otepela wɔ nkɔmano mpidji.’ (Tito 1:9; 1 Ti. 3:​1-3) Má ndjɔmbɔmba kɛwɔ la wopo w’olamawɔ ɛnkɔkɔ, tokokolo nkotshɛ́ka ansakodji djɛ ndjingela nsanghanyɛ mbala inkfumɔ, mpoposanyɛ la nangha wekelo w’onto nyɔmɛlɛ. Winá wɔ wananyɔ l’ankaana okfulumeyɛwɔ ekakasano, tokokolo nkoka nangha akambo efula má ndakotshɛ́ dj’iwɔ nkindjɛ mpika wiso le Yehova la l’alaka wande.

18. Ladjikɛnge okombolaso numɛ Yehova la ndeka ndjala imama la nde? (Lenda ole ipapango “ Wopo wɔ ndeka ndjala imama la Yehova.”)

¹⁸ M’ɔkɔngɔ w’iso nshishima wekeka wa wɔlɔ efula wɔ Yehova, tokoka ntepela ete ngo Nkfumi Davidɛ ente: ‘Yehova, Ve djɛmi, alumame.’ (Yee. 144:1) Tokoka ndáwɛkɛ winá enkfumɔ le Yehova. Lá lowiko lɔso l’otondo, kaanga tá lotshundo, tolekɔ l’elonga kɛ ntepela ente: ‘Nde alekɔ Ve djɛmi,’ l’eshikikelo ente angotokotshɛ́ winá enkfumɔ djɛ ntshikala imama la nde.—Yee. 92:​14, 15.