DJAMBA DJƐ WEKELO 25
YEEMBO 7 Yehova ndeke wolo wɔso (lá Otetela)
Tovungɔke ente Yehova alekɔ ‘Ndjambe kewika’
‘Yehova alekɔ la lowiko!’—YEE. 18:46.
IKANYI YƐ DJAMBA DJƐNƐ
Iso mbaka wapɔ efula má mvungɔ ente Ndjambe k’ɔtɛmɔlaso alekɔ ‘Ndjambe kewika.’
1. Kɛkɔnge kekotshɛ́ enkambi wɛ Yehova djɛ nkindjɛ ndɔtɛmɔla kaanga okfulumeyɛwɔ ekakasano?
‘DEKO djɛ ndjolo djɛ wolo nkfulumeyɛ’—nghɔsɔ ndeke Bible etande etsho w’owikaso wɛnɛ. (2 Ti. 3:1) Lá djiko djɛ ekakasano w’anto ankfumɔ okfulumeyɛwɔ lá nkfumbo dj’akambo djɛnɛ, enkambi wɛ Yehova wakfulumeyɛ lonkina onanyelo la lɔnyɔkɔ. Kɛkɔnge ketokotshɛ́ djɛ nkindjɛ nkambela Yehova kaanga l’anteyi k’ekakasano wɛsɔ? Ekete kɛmɔtshi k’ekekete nde tewa ente Yehova alekɔ ‘Ndjambe kewika.’—Jɛr. 10:10; 2 Ti. 1:12.
2. Lá wopo wɔkɔnge Yehova oyɛnde Ndjambe kewika?
2 Yehova alekɔ Onto wɔ nsɔsɔlɔ wotosuka winá w’oyɛso l’ekakasano la wohona mbamba yɛ ntokotshɛ́. (2 Ɛk. 16:9; Yee. 23:4) Ndɔwɔsa ete ngo Ndjambe kewika nkoka ntokotshɛ́ djɛ nkfulumeyɛ lá lɛdji lɔ wɔlɔ okakasano onkfumɔ w’okoka ntokomela. Tokolenda wopo wɔ nsɔsɔlɔ kɛ nkambo djɛsɔ iyɛnama lá kɛnɛ kekomelisá Nkfumi Davidɛ.
3. Kɛkɔnge kɛkɔpisá ntepela Davidɛ winá wɔ ndatepela ante ‘Ndjambe alekɔ la lowiko’?
3 Davidɛ ewaki Yehova la ayawɛkɛki le nde. Winá wɔ antonyi wande, ndjila ole Nkfumi Saolo iyohonaka djɛ ndoyaka, Davidɛ alɔmbaka Yehova djɛ mpona okotshɔ. (Yee. 18:6) M’ɔkɔngɔ wɔ Ndjambe nkadjimola lɔlɔmbɔ lɔnde la ndowikɛ, Davidɛ atepelaka ante: ‘Yehova alekɔ la lowiko!’ (Yee. 18:46) Má etepela wɛsɔ, Davidɛ atakɔpa ntepela ngo ante Ndjambe alekɔ. Onkanda ɔmɔtshi wɛnyɛ ante Davidɛ atepelaka djɛ nyɛnyɛ wɛkamo wɔnde le Yehova “ete ngo Ndjambe kewika kenanghaka winá la winá akambo lá wapɔ w’enkambi wɛnde.” Ɛwo, Davidɛ ewaki ante Ndjambe alekɔ la lowiko m’akambo w’okomelisá, ko eshikikelo kɛsɔ kakembɛki nkano djɛnde djɛ nkambela la numɛ Yehova.—Yee. 18:28, 29, 49.
4. Wapɔ wɔkɔnge w’owaso winá w’ɔsaso Yehova ete ngo Ndjambe kewika?
4 Ndáshikikɛ ente Yehova alekɔ Ndjambe kewika nkoka ntokotshɛ́ djɛ ndokambela la osasalo. Tongowa wolo wɔ nkfulumeyɛ ekakasano la tongoyala la mposɛ djɛ nkindjɛ nkamba la wolo l’olemo wɔnde. Tɔngɔsa lonkina nkano djɛ ndjala imama la Yehova.
NDJAMBE KEWIKA ANGOKOKEMBƐ
5. Kɛkɔnge kekoka ntoshikikɛ winá w’oyɛso l’ekakasano? (Filipɛ 4:13)
5 Tongoyala l’akoka wa nkfulumeyɛ okakasano onkfumɔ, w’ekekete kana wɔ daambi, ntsha towopɔ ente Yehova alekɔ la lowiko la alekɔ entshupa djɛ ntosuka. Lá djiko djɛ lasɔ, lako nkambo nkoka ntokomela djeleka Ndjambe kɛso wolo. Nde alekɔ Kanga-Nkfulu-Inkfumɔ, ole nde nkoka ntɔpɛyɛ wolo wɔ nkfulumeyɛ. (Wala Filipɛ 4:13.) Djɛko ndeke, tolekɔ la donga nkfumɔ djɛ nkfulumeyɛ ekakasano wɛso la wɛkamo onkfumɔ. Ntsha tombovungɔ ente Yehova atokotshɛ́ka djɛ nkfulumeyɛ ekakasano wɛ daambi, tongoyala l’eshikikelo ente angotokotshɛ́ djɛ nkfulumeyɛ ekakasano wɛ nkekete.
6. Akambo wakɔnge wakomelisá Davidɛ lá ɔlɛngɛ wɔnde wafudjisá wɛkamo wɔnde te Yehova?
6 Tokolenda akambo ape wanɛ wakomelisá Davidɛ, w’okotshisá djɛ mfudjɛ wɛkamo wɔnde te Yehova. Winá wɔ Davidɛ ndayalaka ilɛngɛ la wɔ ndalamaka ɛnkɔkɔ, lɔwondo la kimbwe wavundaka ɛnkɔkɔ wɛ papa kɛnde. Lá mbamba ipe yɛkɔ, Davidɛ akilikaka nyama yɛsɔ l’oloko wolo onkfumɔ la awikɛka ɛnkɔkɔ. Koko, nde atafuna ante ndananghe akambo wasɔ nde má wolo wɔnde. Ewaki ante Yehova ndeke lɔpɛyisa wolo. (1 Sa. 17:34-37) Davidɛ atavungɛki akambo w’okomelisá wasɔ. Má ntɔnɔla lá wayi wasɔ, nde ayalaka l’eshikikelo ante Ndjambe kewika angɔpɛyɛ wolo l’etsho weyaye.
7. Davidɛ ndapikaka wiso l’ekete kɛkɔnge, ko lá wopo wɔkɔnge nkambo djɛsɔ iyokotshɛ́ djɛ nana la Gɔliyatɛ?
7 M’ɔkɔngɔ, nkoka ndjala winá wɔ ndayalaka olangala, Davidɛ atshɔka ntowembola ká k’angala w’Isariyɛlɛ. Nde ɛnaka ante angala w’Isariyɛlɛ wayalaki l’ɔpɔdju w’efula ladjikɛnde nkonga dj’ose Filistiya ɔmɔtshi djɛ iyetaka Gɔliyatɛ, ayɛka ‘ndosanela ananyi mbandji w’Isariyɛlɛ.’ (1 Sa. 17:10, 11) Angala wadjidjimaki lokomba ladjikɛnde wapikaki wiso lá ekekete la otale wɔ Gɔliyatɛ ole lá etepela wɛnde. (1 Sa. 17:24, 25) Koko Davidɛ ɛnaki nkambo djɛsɔ lá wopo onkina. Nde ewaki ante winá w’ɔsɔkande angala w’Isariyɛlɛ, otolande nde ‘ananyi mbandji wa Ndjambe kewika.’ (1 Sa. 17:26) Davidɛ ndɛnaka nde Yehova lá wɔɔngɔ. Davidɛ ayalaka la wɛkamo ante Ndjambe k’okotshisá winá wɔ ndayalaka olami w’ɛnkɔkɔ, angokotshɛ́ lonkina lá nkambo djɛnɛ. Má ndashikikɛ djɛ okotshɔ wɔ Ndjambe, Davidɛ ananaka la Gɔliyatɛ, edjinge lá nsɔsɔlɔ, olongaka!—1 Sa. 17:45-51.
8. Wopo wɔkɔnge w’okokaso mpika wiso le Yehova winá w’opomanaso l’ekakasano? (Lenda edjinge ntshango.)
8 Ole iso tokoka nkfulumeyɛ ekakasano wɛso ntsha tombovungɔ ente Ndjambe kewika alekɔ entshupa djɛ ntokotshɛ́. (Yee. 118:6) Tokoka nkembɛ wɛkamo wɔso ente Yehova angotokotshɛ́ má nkɔmɛ kɛnɛ kɛ ndananghe l’etsho wemboheta. Mbala ɛkɔndɔ wɛ Bible nkoka nkowopola wopo wɔ Yehova ndawikɛ enkambi wɛnde. (Iza. 37:17, 33-37) Lonkina, shishima ɛkɔndɔ welá sitɛ kɛso kɛ jw.org wɛnyɛ́ wopo wɔ Yehova ndásuke wananyɔ l’ankaana yɛso y’etsho wɛnɛ. Lá djiko djɛ lasɔ, vungɔ winá wɛ Yehova ndakonanghela akambo amɔtshi. Toyalake la wɔma ntsha opavungɔ akambo wa nkamɔ, ete ngo nana la lɔwondo kana la kimbwe. Lamo? Ladjikɛnde, kɛnɛ kelekɔ́ nsɔsɔlɔ nde, Yehova ambokonanghela akambo efula! Nde ambonangha djɛ wɛ ndjala la djokanelo djɛ ma ma la nde. (Dj. 6:44) Kaanga winá wɔsɔ, mpeyi m’okotshɔ wɔnde ndeke okindjɛ ndjala lá nsɔsɔlɔ. Ladjikɛnge ngɔpɔlɔmbɛ akokotshɛ́ djɛ wɛ mvungɔ mbala yɛ ndombokadjimola ndɔmbɔ yɛko, ndombokosuka lá winá wɛdje, kana ndakosuke lá winá w’ekakasano wɛ wolo? Ntɔnɔla l’akambo wa nghɔsɔ, angokembɛ wɛkamo wɔko ente Yehova angokindjɛ nangha akambo lá wapɔ wɔko.
Ekakasano wɛso oyɛwɔ nde etenyi kɛ nkambo mɔtshi dj’ekekete (Lenda itenyi 8-9)
9. Kɛkɔnge k’oyɛso ladjɛ mvungɔka winá w’opomanaso l’ekakasano? (Woongo 27:11)
9 Nyɛna Yehova ete ngo Onto wowika angotokotshɛ́ djɛ ndjala l’ikanyi yɛ wɔlɔ lá nkambo dj’ekakasano wɛso. Lá ngete mo? Tongotateyɛ nyɛna ekakasano wɛso ete ngo etenyi kɛ nkambo dj’ekekete dekɔ l’antenyɛ Yehova nya Satana. Djabolo mfunaka ante tongokadjɛ Yehova winá w’ɛnaso ndjolo. (Djɔ. 1:10, 11; wala Woongo 27:11.) Koko winá w’olongaso ekakasano wɛso, tɔngɛnyɛke ente tɔkɔpa Yehova la ente Djabolo alekɔ kanga ongolo. Okfulumeyɛ onanyelo wɔ ewandji wɛ lɛɛta, ekakasano welendana la wayi wa mfalanga, kana anto welola nyɛtshi l’olemo wɔko w’ipoposanyɛ, ole okfulumeyɛ ekakasano enkina? Ntsha nghɔsɔ, vungɔ ente akambo wasɔ wakɔpɛyɛ mbamba kɛ nsasangɛ oloko wɔ Yehova. Vungɔ lonkina ente nde apawolaki wɛ mpembama lá lɛdji loleka akoka wako. (1 Kɔ. 10:13) Nde angɔkɔpɛyɛ wolo wɔ nkfulumeyɛ.
NDJAMBE KEWIKA ANGOKOFUTA
10. Kɛkɔnge kɛ Ndjambe kewika ndongonanghela anto wɔtɛmɔla?
10 Yehova alekɔ Omfuti w’anto wɔtɛmɔla. (Heb. 11:6) Nde ntɔpɛyɛka vu la osasa má winá wɔsɔ la angɔtɔpɛyɛ lowiko l’etshinda l’etsho weyaye. Tokoka nkongela me Yehova l’eshikikelo kenkfumɔ ente nde alekɔ la mposɛ ole la nkfulu kɛ ntofuta. Ndáshikikɛ nghɔsɔ ntotshindaka djɛ ndjala la akambo efula wa nangha lá ɔtɛmwɛlɔ wɔso, ete ngo enkambi wɛ Ndjambe wɛ nkɔmano iyatshindama djɛ nangha l’etsho wemboheta. Nsɔsɔlɔ kɛ nkambo djɛsɔ kɛnamaka le Timɔte, lowikaki l’ɛtɛndɔ kɛ ntondo.—Heb. 6:10-12.
11. Kɛkɔnge ketshindaki Timɔte djɛ nkamba la wolo l’otshumano? (1 Timɔte 4:10)
11 Wala 1 Timɔte 4:10. Timɔte ayalaka la nkongi le Ndjambe kewika. Djɛko ndeke ndakambaka olemo la wolo lá nkambo djɛ Yehova la dj’anto ankina. Lá ngete nge? Ɔpɔstɔlɔ Poolo okembɛka djɛ nangha efulelo ete ngo wetsha la ntɛndji kɛ lá ntshandjawala. Timɔte ayalaka lonkina ladjɛ mpɛyɛ ndjɔmbɔmba kɛ wɔlɔ le winande andjawodji, ayale nkokolo kana dɛngɛ. Edjinge akotshɛki edjito ɛmɔtshi wɛ wolo efula, ete ngo mpɛyɛ anto amɔtshi wayalaki la djonyi alako wa wolo koko wa ngandji. (1 Ti. 4:11-16; 2 Ti. 4:1-5) Timɔte akokaki ndjala l’eshikikelo ante kaanga ntsha lá winá wɛsɔ anto watafulaki nyɛna elemo wɛ ndakambaka, Yehova angofuta.—Ɔrɔ. 2:6, 7.
12. Kɛkɔnge kekoka ntshinda tokokolo dj’iwɔ ndeka ndápɛyɛ l’olemo wɔwɔ? (Lenda edjinge ntshango.)
12 Ole lɔɔko kɛnɛ, tokokolo nkoka ndjala l’eshikikelo ambɔ Yehova ɛna la ɔsa la ntshina elemo wɛwɔ wɛ wɔlɔ. Lá djiko djɛ nama ɛnkɔkɔ, ndakanyɛ la mpoposanyɛ, tokokolo efula wasuka olemo wɔ opikelo wɔ amvulu yɛ teokrasi, la wakotshɛ́ winá w’oposa ambalaka. Amɔtshi wakamba lá Iloyi Yewembola ase Elando kana lá Kɔmite kɛ Djokanelo l’Opitalo. Tokokolo tɔlekɔ́ entshupa djɛ nkamba elemo wɛ nghɔsɔ, wɔsa otshumano ete ngo nonghanyi kɛ Yehova, koko ape ete ngo nonghanyi kɛ wana w’anto. Eposelo weyalaka nde, wangokambake la anyima wawɔ ankfumɔ l’otshumano, la wangoyalake l’eshikikelo ambɔ Ndjambe angafuta lá kɛnɛ k’onanghawɔ.—Kɔl. 3:23, 24.
Ndjambe kewika angokofuta winá w’okambɛ la wolo wɔko l’otshumano (Lenda itenyi 12-13)
13. Yehova ndookaka ngete mo djɛ welo w’ilaso l’olemo wɔnde?
13 Ape onto onkfumɔ ndeke lokoka ndjala ikokolo. Koko isankfumɔ tolekɔ l’ekete k’okokaso mpɛyɛ Yehova. Ndjambe kɛso ndɔsaka la ntshina efula winá w’onanghaso la wolo djɛ ndokambela. Nde angɛnake epapɛyɛ w’ɔpɛyɛso lá nkambo dj’olemo w’onanghema l’andja w’otondo, ayale kaanga wɛ daambi. Nde nsasangaka efula winá w’onanghaso la wolo djɛ mfumboyɛ nsɔnyi la w’osangɛso lɔwɔ djɛ mpɛyɛ kɔmantɛrɛ lá losanghanyɛ, edjinge angosasangake efula winá w’imeyɛso anto watokiyanyɛ. Kaanga ntsha ɛna ente opakoke nangha akambo efula l’olemo wɔ Yehova ete ngo okombolɛ, yala l’eshikikelo ente Yehova ɔsa la ntshina kɛnɛ k’onanghɛ. Nde nkɔkɔpaka l’ɔtɛ wɔ nkambo djɛsɔ, la angokofuta.—Luka 21:1-4.
TOTSHIKALE ENTSHUPA LA NDJAMBE KEWIKA
14. Wopo wɔkɔnge ndjala imama la Yehova otokotshɛ́wɔ djɛ ntshikala la nkɔmano? (Lenda edjinge ntshango.)
14 Ntsha tɔsa Yehova ente alekɔ onto wɔ nsɔsɔlɔ, tɔnghɛna ente alekɔ wɔdju ntshikala la nkɔmano le nde. Nsɔsɔlɔ kɛ nkambo djɛsɔ kɛnamaka le Yosɛfu. Nde atakɔpa kaanga dambo daambi nangha wayi wa mbindo wa ntshɛngi. Ndjambe ayalaki Onto wɔ nsɔsɔlɔ le nde, la koko nde atakɔpaki ndotshutshumadjɛ. (Ewa. 39:9) Djɛ Yehova ndjala onto wɔ nsɔsɔlɔ le so, iso ladjɛ ndɔsa winá wɔ ndɔlɔmba la wɔ ndjeka Otepela wɔnde. Lombayi lɔso lande longetela nkemba. Winá wɔ insongoyala la djokanelo djɛ ma ma la Yehova ete ngo Yosɛfu, topangɔkɔpa nangha ekete kekoka ndotshutshumadjɛ.—Dja. 4:8.
Nsɛmɛla entshupa te Ndjambe kewika angokokotshɛ́ djɛ wɛ ntshikala la nkɔmano (Lenda itenyi 14-15)
15. Olakanyelo wɔkɔnge w’okokaso mba má kɛnɛ kekomelisá wana w’Isariyɛlɛ winá w’iyayalaka l’osowe wɔ lɔsɛkɛ? (Hebero 3:12)
15 Anto wavungɛ ambɔ Yehova alekɔ Ndjambe kewika, nkoka mbangɔ otale la nde ipa l’okakasano. Tokolenda kɛnɛ kekomelisá wana w’Isariyɛlɛ l’osowe wɔ lɔsɛkɛ. Iwɔ wewaki ambɔ Yehova alekɔ, koko wawangaka ndjila ehamo ambɔ nde apakoke ndaaseyɛ ehomba wɛwɔ. Walawopolaka kaanga ambɔ: ‘Yehova alekɔ l’anteyi kɛso ndo lako?’ (Epo. 17:2, 7) M’ɔkɔngɔ, iwɔ watɔmbɔkɛlaka Ndjambe. Lá nsɔsɔlɔ, iso ladjɛ ndjewɔ dj’ipa nkilika ndjɔmbɔmba kɛwɔ kɛ ntshamba djɛ dilɛmɛlɔ, kelekɔ́ ete ngo ndjewo leso.—Wala Hebero 3:12.
16. Kɛkɔnge kekoka ndjila djawo djɛso l’ohemba?
16 Andja wanɛ watilela onkeka djɛ ndásukanyɛ la Yehova. Anto efula wangotonake ikanyi yɛ ente Ndjambe alekɔ. Mbala efula, angɛnamake ete ngo, anto wapile ɛlɛmbɛ wɛ Ndjambe yimba wangoyalake la lowiko lɔ wɔlɔ. Winá wɛnaso nkambo djɛ nghɔsɔ, djawo djɛso nkoka ndjingela l’ohemba. Kaanga ewaso ente Ndjambe alekɔ, tokoka ndáwopola ntsha nde angonangha akambo la wapɔ wɔso. Omfunyi wɔ Yeembo 73 atateyɛka ndáwopola nghɔsɔ winá ɛmɔtshi. Nde ɛnaki anto woodjingi watalɛmɛyɛki ɛlɛmbɛ wɛ Ndjambe, wayalaki la lowiko l’osasa. Nde awangaka ndáwopola ntsha alekɔ djonyi nkambela Ndjambe.—Yee. 73:11-13.
17. Kɛkɔnge kengotokotshɛ́ djɛ ntshikala imama la Yehova?
17 Kɛkɔnge kekotshisá ondjombe djɛ ntshikitanyɛ ikanyi yɛnde? Nde atɔnɔlaka lá kɛnɛ kengokomela anto wavungɛ Yehova. (Yee. 73:18, 19, 27) Nde ashishimaka lonkina wapɔ woyɛka má nkambela Ndjambe. (Yee. 73:24) Ole iso tokoka ntɔnɔla lá esako wɛ Yehova ndatɔpɛyɛ. Isotasamba nkambela Yehova, ntshimi otshikitano w’ekekete efula wotayala lá lowiko lɔso. Nangha nghɔsɔ nkoka ntokotshɛ́ djɛ ntshikala la nkɔmano la ntepela ete ngo ondjombe ente: ‘Le lemi, nsukana la Ndjambe alekɔ wɔlɔ le lemi.’—Yee. 73:28.
18. Lamo isopakoke ndjala la wɔma w’etsho weyaye?
18 Tokoka nkfulumeyɛ okakasano onkfumɔ wotokomela l’etsho w’ekomo wɛnɛ mande ‘tokambela Ndjambe kewika la kɛ nsɔsɔlɔ.’ (1 Te. 1:9) Ndjambe kɛso oyɛnde nde onto wɔ nsɔsɔlɔ wonangha akambo la wapɔ wɔ anto w’ɔtɛmɔla. Nde ɛnyɛka ante ayalaka esanga l’enkambi wɛnde w’etsho wemboheta la alekɔ ole laso lɔɔko kɛnɛ. Lako ilá, ndjolo k’ekekete kowanga lá looko. Koko topangoyala isɔmɛlɛ. (Iza. 41:10) Nyontshɔ isankfumɔ ‘toyale l’oloko wolo w’efula la totepele ente: ‘Yehova ndeke okotshɔ wɔmi; lemi mpangoka wɔma.’’—Heb. 13:5, 6.
YEEMBO 3 Wolo wɔso, nkongi djɛso, wɛkamo wɔso (lá Otetela)