IKANYI YƐ BIBLE
Wɛ okotshi djawo?
Djɛ nsasangɛ Yehova, iso ladjɛ ndjala la djawo. Koko, Bible ntepelaka ante: ‘Ape anto ankfumɔ ndeke lolekɔ́ la djawo.’ (2 Te. 3:2) Ɔpɔstɔlɔ Poolo atepelaka lá nkambo djɛ ‘anto wa lopango la wa nyɛtshi,’ wɔwɛnyɛki ndjolo wandayale ladjɛ ntshungɔ mewɔ. Koko kɛnɛ kɛ ndatepela la nkambo djɛ djawo kelekɔ nsɔsɔlɔ edjinge le anto ankina efula. Anto amɔtshi wapile yimba lá ilembetelo yɛnyɛ papoo ente Ndjambe alekɔ Ontongi. (Ɔrɔ. 1:20) Amɔtshi nkoka ntepela ambɔ wangawolake ambɔ ekete kana onto ɔmɔtshi wolekɔ́ la nkfulu k’efula alekɔ. Koko djawo djɛ nghɔsɔ apalekɔ djawo djekoka nsasangɛ Yehova.
Iso ladjɛ ndjala l’eshikikelo kenkfumɔ ente Yehova alekɔ, la nde alekɔ omfuti wɔ anto walekɔ́ la djawo djɛ wolo. (Heb. 11:6) Djawo oyɛwɔ nde etenyi kɛmɔtshi kɛ lowambo lɔ nyuma kɛnde k’ekina. Nkadjimɔ te Yehova lá lɔlɔmbɔ, nkoka nkotshɛ́ onto djɛ nde mba nyuma kɛnde k’ekina. (Luka 11:9, 10, 13) Yopo inkina yɛ djonyi yɛ mba nyuma k’ekina nde má mbalaka mbala la mbala Otepela wɔ Ndjambe wofunamisá má wolo wɔ nyuma kɛkɔ. Makɔ, tokoka ntɔnɔla lá kɛnɛ k’owalaso la nangha la wolo djɛ nkamba la kɛnɛ k’ekaso. Ko manyi, nyuma kɛ Yehova kengoyala la ndjimbo kɛ wɔlɔ la lowiko lɔso, la kengotokotshɛ́ djɛ ndjala la djawo dj’osasangɛ.