1-2. Leeta lɔkɔnge Yehova ɔpɛyɛnde enkambi wɛnde wɛ nkɔmano?

 YEHOVA oyɛnde na lá lowiko lɔko? Okoka nkandjimola ente: ‘Yehova alekɔ Papa kɛmi, Ndjambe kɛmi la Ilongo yɛmi.’ Titrɛ kana nkopo nkina dekɔ dj’okokaso ndjeta Yehova. Ko ɔngɔwɔsake lonkina ete ngo Onto w’okoka nkolongola lá mvulu kɛnde?

² Nkfumi Davidɛ ɛdjɛka djokanelo dekɔ l’anteyɛ Yehova la enkambi wɛnde wɛ nkɔmano la djokanelo dekɔ l’anteyɛ ongangɛnda la onto woolongola. Nde opolaka ante: ‘Ee Yehova, okoka ndongolama lá mvulu kɛko kɛ mpɛma na? Okoka ndjintasɛ lá onkókó wɔko w’ekina na?’ (Yee. 15:1) Etepela wefunamisá má wolo wɔ nyuma k’ekina wɛsɔ, wɛtɛnyɛ ente tokoka ndongolama me Yehova, ntepela ente nkoma tolongo tɔnde. Ɔsɔ ape alekɔ mpeyi k’ekekete efula kɛ ndjetama me Yehova?

YEHOVA NKƆPAKA NTOLONGOLA LÁ MVULU KƐNDE

3. Onto wɔ ntondo wolongolamisá me Yehova na, Yehova la onto wɔ ndalongola iyokaka ngete mo onto te winande?

³ Lá ntondo kɛ Yehova mbanga ntonga nkete, nde ayalaki ngo nyɔmɛlɛ. Koko lá winá ɛmɔtshi, Yehova alongolaka Wɔnande wɔ ntondo lá mvulu kɛnde kɛ djingingi. Yehova ayalaka l’osasa efula djɛ ndongola ongangɛnda wɔ ntondo lá mvulu kɛnde. Bible ntisolaka ante Yehova ‘akɔpaka Wɔnande lá lɛdji lotshikitanyi.’ L’onkókó wɔnde, onto wɔ ntondo wɔ Yehova ndalongola wɔsɔ, ‘asasangaki winá enkfumɔ lá ntondo kɛnde.’—Woo. 8:30.

4. Wopo wɔkɔnge Yehova ndotananolaka elelo wɛ mvulu kɛnde ndambo ndambo?

 ⁴ Yehova atongaka lonkina andjelo la awetaka djɛ ndjingela lá mvulu kɛnde. Bible ndjetaka andjelo ante ‘wana wa Ndjambe’ la nyɛnyɛka ante walekɔ l’osasa efula wɔ ndjala esanga la Yehova. (Djɔ. 38:7; Dan. 7:10) L’ila k’ɛnɔnyi, ngo ntongami djɛ nyuma ndeke Yehova ndalongola lá mvulu kɛnde kɛ djingingi, lá owikande. M’ɔkɔngɔ, alonanolaka mvulu kɛnde djɛ ndongola anto welá looko. Anto amɔtshi walongolamisá nde: Ɛnɔkɛ, Nowe, Abrahama la Djɔbɔ. Bible ndjetaka enkambi wɛ nkɔmano wɛsɔ ante tolongo tɔ Ndjambe, kana waakɛndaki ‘la Ndjambe kɛ nsɔsɔlɔ.’—Ewa. 5:24; 6:9; Djɔ. 29:4; Iza. 41:8.

5. Olakanyelo wɔkɔnge wɔ isombowa má prɔfɛsi kɛ Ezekiyɛlɛ 37:​26, 27?

⁵ L’ila k’ɛnɔnyi nkama, Yehova akindjɛki ndjeta tolongo tɔnde djɛ nde ndalongola. (Wala Ezekiyɛlɛ 37:​26, 27.) Ndjɔmbɔmba, prɔfɛsi kɛ Ezekiyɛlɛ kɛtɛnyɛ ente Ndjambe nkombolaka nsɔsɔlɔ antɛmɔdji wande wa nkɔmano ndjala la djokanelo djɛ wɔlɔ lande. Nde ndakaka ante ‘angɔkɔta isambi yɛ vu lawɔ.’ Prɔfɛsi kɛsɔ ntɔlaka ikanyi tá eleko kɛ anto walekɔ́ la nkongi djɛ ntowika l’olongo la anto walekɔ́ la nkongi djɛ mbika lá looko, iyongoyala lá osanga lá mvulu kɛ djingingi kɛ Yehova, ete ngo ‘otonga ɔmɔ.’ (Dj. 10:16) Winá wɔkɔ wɔsɔ wokinɛ!

NDJAMBE NTOWAKELAKA AYALE IDJENA YƐKƆNGE Y’OYƐSO

6. Wopo wɔkɔnge onto ndolongolamaka lá mvulu kɛ Yehova, iya mvulu kɛnde okokawɔ ntshanghana tii l’idjena yɛkɔnge?

⁶ L’etsho wefunamaki Bible, mvulu kɛ mpɛma k’onto iyayalaka nde idjena yɛ mpomola la yɛ mvusɛ mvula, kana mpomola winá wɔ yaane. Ongangɛnda woyalaki lá mvulu kɛsɔ akongaki djɛ kanga mvulu ndowakela wɔlɔ. Winá w’olambolaso lowiko lɔso le Yehova, tongokomake anto w’olongolande lá mvulu kɛnde kɛ djingingi. (Yee. 61:4) Tongosasangake la eleelo efula wɛ nyuma ole tongokanake l’anto ankina wambolongolama me Yehova. Mvulu kɛnde kɛ djingingi kelekɔ ekekete efula djɛ ndongola anto wimá ewila enkfumɔ. Nkoka ndjala onanghaka lɔkɛndɔ l’otale má owila wɔ angangɛnda, mbala imɔtshi djɛ ndingela lá losanghanyɛ l’ekekete, ko olopomanaka la anto ankina wambosakolamá djɛ ndjala la mvulu kɛ Ndjambe. Kekoka ndjala idjena inkfumɔ ilekɔ antɛmɔdji wande wa nkɔmano.—Ndj. 21:3.

7. Lamo okokaso ntepela ente anto wa nkɔmano wavisá walekɔ tii winá wɔsɔ lá mvulu kɛ Yehova? (Lenda edjinge ntshango.)

⁷ Iya otepelaso mo lá nkambo dj’anto wa  nkɔmano wambovɔ? Tokoka ntepela ente walekɔ tii winá wɔsɔ ngo lá mvulu kɛ Yehova? Ee! Ladjikɛnge okokaso ntepela nghɔsɔ? Ladjikɛnde Yehova akindjɛ ndavungɔ, lá wɔɔngɔ wɔnde anto wasɔ walekɔ ngo la lowiko. Yeso apakisolaka ante: ‘Edjinge Mɔsɛ atepelaka lá ɔkɔndɔ wolendana la itshitshiko ipɛtaki iyɛ ante anto wavisá wangokfundɔ, winá wɔ ndete Yehova ante ‘Ndjambe kɛ Abrahama, Ndjambe kɛ Isaka la Ndjambe kɛ Djakɔbɔ.’ Nde apalekɔ Ndjambe kɛ waambovɔ koko kɛ waasɛna ladjikɛnde le nde iyankfumɔ walekɔ la lowiko.’—Luka 20:​37, 38.

WAPƆ W’OWASO LA EDJITO W’OYƐSO LADJƐ NKOTSHƐ

8. Wopo wɔkɔnge anto wa Yehova olongolande okokawɔ mba wapɔ má ndjala lá mvulu kɛnde?

⁸ Ete ngo mvulu kɛ mpɛma kɛ nsɔsɔlɔ okokawɔ ndjala idjena yɛ mpomola la yɛ ndjisamá winá wɔ yaane la mvula, mvulu kɛ Yehova namaka anto wolongolande má ambalaka yɛ nyuma la ntshamba djɛ nkongi. Winá w’okindjɛso ndjala imama la Yehova, Satana apakoke ntonanghela nkambo djɛ nyɛtshi ngotshikala lotshinda lotshinda. (Yee. 31:23; 1 Dj. 3:8) L’andja wa bango, Yehova angokindjɛ nama tolongo tɔnde tɔ nkɔmano ape ngo má mbalaka yɛ nyuma toko, koko ole má nyɔyi.—Ndj. 21:4.

9. Kɛkɔnge kɛ Yehova ɔlɔmbande anto wolongolande dj’iwɔ nangha?

⁹ Alekɔ nsɔsɔlɔ mpeyi k’ekekete efula kɛ ndongolama lá mvulu kɛ Yehova, ntepela ente nsasanga la djokanelo djɛ ma ma ole dj’etshinda la nde. Kɛkɔnge k’oyɛso ladjɛ nangha ntsha tɔkɔpa ntshikala etshinda lá mvulu kɛ Yehova? Ntsha onto ɔmɔtshi ambokolongola lá mvulu kɛnde, wɛ ɔngɔkɔpa ndjewa kɛnɛ k’okombolande wɛ nangha. Ndjɔmbɔmba, nde nkoka nkɔlɔmba djɛ ndjoola sabata lá ntondo kɛ wɛ ndjingela lá mvulu, ko wɛ ongoyala entshupa djɛ nɛmɛyɛ. Lá wopo wɔkɔ ɔmɔ, iso nkɔpaka nsɔsɔlɔ ndjewa kɛnɛ kɛ Yehova ɔlɔmbande anto wakombola nkidjɛ ndjala lá mvulu kɛnde. Ngandji k’okaso Yehova kengototshinda djɛ nangha kɛnɛ k’okokaso nangha djɛ ‘ndosasangɛ l’akambo ankfumɔ.’ (Kɔl. 1:10) La koko, winá w’ɔsaso Yehova ete ngo Ilongo yɛso, tongosipisoyɛ ente alekɔ lonkina Ndjambe la Papa kɛso, kanga lokoka ndongola dilɛmɛlɔ djɛso. (Yee. 25:14) Iso ladjɛ nkota nkambo djɛsɔ lá yimba, ladjɛ ndjala winá enkfumɔ la wɔma w’efula te nde, totavungɛke kaanga ndambo daambi wopo wɔ Ndjambe k’oyɛnde. Wɔma wombosanghaná la dilɛmɛlɔ wɔ nghɔsɔ, wongotokotshɛ́ dj’iso ndjewɔ dj’ipa ndjala la eyalelo kekoka ndotshutshumadjɛ. Tongokombolake nsɔsɔlɔ nkɛnda la Ndjambe kɛso.—Mika 6:8.

YEHOVA ƐNYƐKA ANTE APALEKƆ KANGA ISƆNƆDJI L’OSOWE WƆ LƆSƐKƐ

10-11. Wopo wɔkɔnge kɛnɛ kɛ Yehova ndananghela ase Isariyɛlɛ lá osowe wɔ Sinayi ɛnyɛwɔ ente nde apalekɔ la isɔnɔdji?

¹⁰ Yehova apayalaka l’isɔnɔdji winá w’onanghelande anto wolongolande akambo. (Ɔrɔ. 2:11) Tokoka nshikikɛ nkambo djɛsɔ má wopo wɔ Yehova ndananghela wana w’Isariyɛlɛ akambo l’osowe wɔ Sinayi

¹¹ M’ɔkɔngɔ wɔnde ntshungola enkambi wɛnde má lomfumbe l’Edjipito, Yehova asɔnaka ankfundji dj’iwɔ nkamba lá tabarnaklɛ. Ase Lewi wawaka odjito wɔ nkamba elemo ɛmɔtshi welendanaki la mvulu k’ekina kɛsɔ. Yehova awakelaki anto wakambaki kana wayalaki edjingadjinga la tɛmpɛlɔ, ndeka wopo wɔ ndawakelaka anto ankina? Lako! Yehova apalekɔ l’isɔnɔdji.

12. Wopo wɔkɔnge Yehova ndɛnyɛ ante nde apalekɔ la isɔnɔdji winá wɔ ndalongola owila wɔnde lá looko lɔ bango? (Eposelo 40:38) (Lenda edjinge ntshango.)

¹² Ose Isariyɛlɛ onkfumɔ akokaki ndjala la  djokanelo la Yehova ayale angokambake lá tabɛrnaklɛ kana lako, ayale mvulu kɛnde kelekɔ entshupa lá tabɛrnaklɛ kana lako. Ndjɔmbɔmba, Yehova ananghaka djɛ ndáshikikɛ ante owila onkfumɔ wongoyala l’akoka wa nyɛna nkondji djɛ bonde la nkondji djɛ iyɛ djemalaki lá djiko djɛ tabɛrnaklɛ. (Wala Eposelo 40:38.) Winá wɔ nkondji djɛ bonde iyawangaka nsɛkɔ tá idjena yɛ bango, kaanga anto wapikisá amvulu yɛwɔ otale la tabɛrnaklɛ wayalaki l’akoka wa ntangela, ko wɔsaki nkete djɛwɔ, wapikolaki amvulu yɛwɔ yɛ ampɛma, la wangandjɔki esanga la owila onkfumɔ. (Ew. 9:​15-23) Anto ankfumɔ wakokaki ndjoka eyoko w’etshikitanyi wɛ kilɔlɔ ipe yɛ mfɛsa yɛ iyafulaka djɛ ndjewoyɛ onto onkfumɔ ambɔ winá wɔ ngandjɔ wombokoka. (Ew. 10:2) Okama papoo ente, ndjintasɛ entshupa la tabɛrnaklɛ toko atayalaki ilembotelo yɛ djokanelo djɛ ma ma la Yehova. Koko lá owila wɔ bango, ose Isariyɛlɛ onkfumɔ akokaki ndongolama me Yehova la akokaki ndashikikɛ ante nde angɔlɔndjɛ la angoolama. Lá wopo wɔkɔ ɔmɔ ndeke, lɔkɔ kɛnɛ ayale idjena yɛkɔnge y’owikaso lá looko, Yehova ntɔkɔpaka, ntowakelaka la ntolamaka.

NDJƆMBƆMBA Y’ETSHO WƐNƐ YƐNYƐ́ ENTE YEHOVA APALEKƆ L’ISƆNƆDJI

13. Wopo ɔmɔtshi wɔkɔnge Yehova ɛnyɛnde ante apalekɔ la isɔnɔdji lɔɔko kɛnɛ?

¹³ Enkambi ɛmɔtshi wɛ Ndjambe lɔɔko kɛnɛ w’intasɛ entshupa lá biro dj’ekekete djɛ Ewakɛ wɛ Yehova kana lá biro djɛ filialɛ. Amɔtshi wakamba lá djena djɛsɔ. Eposelo welekɔ́ nde, anto wa nghɔsɔ wakoka nkamba elemo efula wenanghema lá djena djɛsɔ la ndjala la djokanelo djɛ ma ma l’anto walɔndjɛ. Koko ankina wakamba lá olemo w’edjingadjinga kana lá yopo inkina yɛ olemo wɔ winá enkfumɔ. Ntsha olekɔ l’anteyi k’oloyi w’ekekete w’anto wapalekɔ́ l’akoka wa nkamba elemo wɛsɔ winá wɔsɔ, yala la eshikikelo ente, Yehova, kanga lotolongola angɔkɔpake anto ankfumɔ wolongolande lá kande. Edjinge nde mbakelaka onto onkfumɔ wɔ l’anteyi kɛwɔ. (1 Pɛ. 5:7) Enkambi wɛ Ndjambe enkfumɔ wangowake eleelo wɛ nyuma, ɛlɔndjɛlɔ la elamelo k’oyɛwɔ la djonyi.

14. Ndjɔmbɔmba kenkina kɛkɔnge kɛnyɛ́ ente Yehova apalekɔ l’isɔnɔdji lá wopo wolongolande anto lá mvulu kɛnde?

 ¹⁴ Ndjɔmbɔmba k’enkina kɛnyɛ ente Yehova apalekɔ la isɔnɔdji lá wopo wolongolande anto lá mvulu kɛnde nde, nde angonanghake djɛ anto ankfumɔ welá looko ndjala l’akoka wa mba Bible. Ntondo ntondo, Afunelo w’ekina iyafunama ngo l’etepela esato wɛnɛ: Hebero, Arameyɛ, la Grɛkɛ. Anto wakoka mbala Bible l’etepela esato wɛ ntondo wɛsɔ walekɔ la djokanelo djɛ wɔlɔ la Yehova ndeka anto ankina wapakoke mbala lá etepela wɛsɔ? Lako, ape nghɔsɔ.—Mat. 11:25.

15. Kɛkɔnge kɛnyɛ́ ente Yehova apalekɔ l’isɔnɔdji? (Lenda edjinge ntshango.)

¹⁵ Ngandji kɛ Yehova leso kepalendana la nkalasa kɛso kana la akoka waso wa ndjewa etepela. L’edjena kɛ nde mpɛyɛ djaana djɛnde ngo le anto wambingela ankalasa yɛ nkekete toko, Yehova angɔpɛyɛke onto onkfumɔ welá looko djaana djɛnde, ayale ingelaka ankalasa yɛ nkekete kana lako. Bible, Otepela wɔnde w’ofunamisá má wolo wɔ nyuma k’ekina, wombokadjimolama lá etepela ndekana kinunu; djɛko ndeke, anto wa l’andja w’otondo wakoka mba wapɔ má elakanyelo wɛnde la ndjeka wopo w’okokawɔ nkoma tolongo tɔnde.—2 Ti. 3:​16, 17.

KINDJƐ NDJALA ONTO ‘WAWOLAMA’ ME JEHOVA

16. Lá nkilika Elemo 10:​34, 35, wopo wɔkɔnge w’okokaso ndjala anto wawolama me Yehova?

¹⁶ Alekɔ mpeyi k’ipa wɔsɔdjɔmba kɛ Yehova ntolongola lá mvulu kɛnde kɛ djingingi. Nde alekɔ onto wɔ wɔlɔ efula, wolekɔ́ la ngandji k’efula ole woleka ndongola anto. Lá djiko djɛ lasɔ, nde apalekɔ la isɔnɔdji, angolongolake onto onkfumɔ wɔ l’anteyi kɛso ayale idjena y’oyɛso, nkfumbo, nkalasa, loposo, ikɔlɛ, ɛnɔnyi wɛso, mpame kana omoto. Koko, Yehova olongolande ngo anto walɛmɛyɛ ɛlɛmbɛ wɛnde.—Wala Elemo 10:​34, 35.

17. Lampe isɔngɛna alako wakoka ntokotshɛ́ djɛ nkidjɛ ndjala lá mvulu kɛ Yehova?

¹⁷ Ete ngo Yeembo 15:1 otepelande, Davidɛ opolaka weepó wɛnɛ: ‘Ee Yehova, okoka ndongolama lá mvulu kɛko kɛ mpɛma na? Okoka ndjintasɛ lá onkókó wɔko w’ekina na?’ Ondjombe atshindamaka má nyuma k’ekina djɛ nkadjimola weepó wɛnɛ. Lá djamba djeyaye tongotepela akambo amɔtshi w’oyɛso ladjɛ nangha djɛ nkindjɛ ndjawolama me Yehova.