1. Mposɛ kɛkɔnge kelekɔ́ l’ambotshi lá nkambo djɛ wana wawɔ?

 AMBOTSHI, iso ndjewaka ente nyolekɔ la mposɛ k’efula kɛ nkotshɛ́ wana wanyo dj’iwɔ ndjewa la nkɔpa Yehova. Koko Ndjambe apɛnamaka. Iya wopo wɔkɔnge w’okokanyo nkotshɛ́ wana wanyo dj’iwɔ ndɔwɛna etengo Onto wɔ nsɔsɔlɔ edjinge ndasukanyɛ lande?—Dja. 4:8.

2. Wopo wɔkɔnge ambotshi okokawɔ ndakanyɛ wana wawɔ wekeka wa Yehova?

² Yopo imɔtshi yɛ djonyi yɛ nkotshɛ́ wana djɛ ndasukanyɛ la Yehova nde, ndaawekɛ Bible. (2 Ti. 3:14-17) Koko, Bible ntolakanyɛka yopo inkina yɛ dangala okokawɔ ndjeka akambo walendana la Yehova. Onkanda wɔ Woongo ntepelaka nkambo djɛ papa kɛmɔtshi kevungolaki wɔna wɔnde dj’ipa nyimɛ yimba má wekeka wa Yehova wɛnama má etongelo. (Woo. 3:19-21) Tongoshishima topo tɔmɔtshi tɔ ambotshi okokawɔ nkamba l’etongelo dj’iwɔ ndakanyɛ wana wawɔ wekeka wa Yehova.

3. Okotshɔ wɔkɔnge ambotshi oyɛwɔ ladjɛ mpɛyɛ wana wawɔ?

³ Bible ntepelaka ante ‘wekeka wa Ndjambe wapɛnama nyɛnamaka papoo má etongelo k’andja, ladjikɛnde wɛnama má nkete djetongamisá.’ (Ɔrɔ. 1:20) Ambotshi, ape l’ehamo nyɔngɔkɔpake mpetshɛ winá lá bandja esanga la wana wanyo. Nyokambake la mbamba kɛsɔ djɛ nyo nkotshɛ́ wana wanyo dj’iwɔ nyɛna djokanelo djelekɔ́ l’antenyɛ ‘nkete djetongamisá’ la wekeka wa wɔlɔ lombombe wa Yehova. Djɛkondeke, nyontshɔ tokolenda olakanyelo  wɔ ambotshi okokawɔ mba má ndjɔmbɔmba kɛ Yeso lá nkambo djɛsɔ.

4. Wopo wɔkɔnge Yeso ndakambe l’etongelo djɛ ndakanyɛ ambeki wande? (Luka 12:24, 27-30)

⁴ Tolende wopo wɔ Yeso ndakambe l’etongelo djɛ ndakanyɛ. Lá mbamba kɛmɔtshi, nde alɔmbaka ambeki wande dj’iwɔ nshishima nkaanka la ansoso. (Wala Luka 12:24, 27-30.) Yeso akokaka nkamba la anyama inkina kana etamba enkina, koko nde asɔnaka ngo tofulu la ansoso, nkete djɛ ambeki wande iyalekaka ndjewa wɔlɔ. Mbala imɔtshi ambeki wakokaka nyɛna nkaanka wafumbɔfumbɔ t’olongo edjinge ansoso wamɔngha l’okonda. Kokanela wopo wɔ Yeso ndatshumaka nkete djɛsɔ ɛwɔ winá wɔ ndatepelaka. Ya ndananghe nge m’ɔkɔngɔ wɔ numola nkete djɛsɔ? Nde alakanyɛka ambeki wande olakanyelo wɔ djonyi efula lá kɛnɛ kelendana la lokapo edjinge oloko wɔlɔ wɔ Papa kɛwɔ kel’olongo ante: Yehova angolesɛ la angɔlɔtshɛ enkambi wɛnde wɛ nkɔmano etengo onanghelande nkaanka l’ansoso wa l’okonda.

5. Nkete djɛkɔnge mɔtshi djɛ Ndjambe ndatonge djɛ ambotshi okokawɔ nkamba la djɛkɔ djɛ ndakanyɛ wana wawɔ wekeka wa Yehova?

⁵ Ambotshi, wopo wɔkɔnge wokokanyo ndjokola Yeso winá wolakanyɛnyo wana wanyo? Nyo nkoka nyɛnyɛ wana wanyo ekete kɛmɔtshi kɛ Yehova ndatonge kolekanyo nkɔpa, ndjɔmbɔmba nyama kana otamba wolekakɛ nkɔpa. Winá w’ashimelɛ nghɔsɔ, wɛ ladjɛ ndaashimela kɛnɛ kɛ ekete kɛkɔ okolakanyɛwɔ lá nkambo djɛ Yehova. Masɔ, wɛ nkoka ndjopola wɔnako nyama kana otamba wolekande nkɔpa. Ntsha wɛ ndoshimela wekeka amɔtshi wa Yehova wokokande nyɛna má ekete kɛmɔtshi kolekande nkɔpa, nde nkoka nkekameyɛ la nkɔmɛ nkfumɔ.

6. Olakanyelo wɔkɔnge wokokaso mba má ndjɔmbɔmba kɛ nyɔ kɛ Christopher?

⁶ Ambotshi ladjɛ ndɔsa winá efula djɛ nangha ehonelo lá nkambo djɛ nyama kana otamba ɔmɔtshi lá ntondo k’iwɔ ndosawola la wana wawɔ kɛnɛ k’otolakanyɛwɔ lá nkambo djɛ Yehova? Ape ngo nghɔsɔ. Yeso atapɛyɛ nsakiso y’etale lá kɛnɛ kelendana la wopo wɔ nkaanka ɔlɛwɔ kana kɛnɛ kenanghema djɛ ansoso mfula. Kaanga ntsha wana wako wangɔkɔpake ndjewa akambo efula walendana la etongelo, koko lá winá ɛmɔtshi ndawɛnyɛ ikakambo imɔtshi yɛ wɔdju kana ndaawopolá yopopo imɔtshi nkoka ndaakotshɛ́ dj’iwɔ nsipisoyɛ olakanyelo wɔkɔpɛ ndaapɛyɛ. Kolenda kɛnɛ kɛ wɔnanyɔ ɔmɔtshi w’etawɔ Christopher ovungɔnde m’ɔlɛngɛ wɔnde ante: “Nyɔ kɛmi apɛyɛki ngo tokanyi tɔ totenyi djɛ ntokotshɛ́ dj’iso ntɔnɔla lá nkete djɛ Ndjambe ndatonge djetodjingi. Ndjɔmbɔmba, winá wɔ sakomaka entshupa la enkókó, nde atepelaki ante: ‘Nyokolenda wopo wɔ enkókó wɛnɛ oyɛwɔ tɔsɔdji edjinge wɔlɔ! Ape wetokamoyɛ lá nkambo djɛ Yehova?’ Kana winá wɔ sakomaka entshupa la ndjale, nde atepelaki ante: ‘Nyokolenda anyɛnghu wanɛ wopo woyɛwɔ la nkfulu! Ape watɛnyɛ ente Ndjambe alekɔ la nkfulu efula?’” Christopher ante: “Tokanyi tɔ totenyi koko tolekɔ ntshina tɔsɔ, tatotshindaki djɛ ntɔnɔla efula.”

7. Wopo wɔkɔnge wokokɛ nkfumba wana wako djɛ ntɔnɔlaka l’etongelo?

⁷ Winá wɔ wana wako yotafule, wɛ nkoka ndaakfumba dj’iwɔ ntɔnɔlaka l’etongelo edjinge ndjeka wekeka wa Yehova. Wɛ nkoka numola kaanga ekete kɛmɔ kɛ Ndjambe ndatonge edjinge ndjopola wɔnako ente: “Ekete kɛnɛ okolakanyewɔ nge lá nkambo djɛ Yehova. Okoka nkamɔ má ndjoka kɛnɛ kɛ wɔnako ndongotepela.—Mat. 21:16.

8. Mbamba kɛkɔnge ambotshi w’ase Isariyɛlɛ yawaka winá wɔ yahetaka lá amboka?

⁸ Yehova ashimelaka ambotshi w’ase Isariyɛlɛ djɛ ndakanyɛka wana wawɔ ɛlɛmbɛ wɛ Yehova winá w’iyotakɛndɛ ‘lá mboka.’ (Mvu. 11:19) Ladjikɛnde etayimbo wase Isariyɛlɛ wahetaki l’ekonda, wepo w’anyama, tofulu, edjinge ansoso  watshikitanyi wakokaki nyɛnama. Winá wɔ ankfumbo y’ase Isariyɛlɛ iyahetaka l’amboka yɛsɔ, ambotshi wawaki mbamba kɛ nsepa ikanyi yɛ wana wawɔ tá etongelo kɛ Yehova. Ambotshi nyo nkoka ndjala la mbamba yɛ nghɔsɔ yɛ nkamba l’etongelo djɛ ndakanyɛ wana wanyo. Tokoshishima wopo wɔ ambotshi amɔtshi iyananghe nkambo djɛsɔ.

9. Olakanyelo wɔkɔnge wokokɛ mba má ndjɔmbɔmba kɛ Punitha la Katya?

⁹ Nyɔ kɛmɔtshi ketawɔ Punitha, kanga l’intasɛ lá ngando kɛmɔtshi k’ekekete kelá Inde, ntepelaka ante: “Winá wotshɔkaso towembola nkfumbo kɛso lá mbandja, iso ndɔsaka lɔkɛndɔ lɔsɔ etengo mbamba kɛ nkotshɛ́ wana waso dj’iwɔ ndjeka akambo walendana l’etongelo kɛ wɔlɔ lombombe kɛ Yehova. Langɛnake ente wana wami wangosipisoyɛke etongelo wɔlɔ efula l’eteyi ndeka winá woyɛwɔ l’angando yembolola nkfu l’anto edjinge l’etuka.” Ambotshi, nyewe ente wana wanyo wapavungɛki lotshinda winá w’iyahetshɛ́ esanga la nyo lá ndjena djɛ wɔlɔ djɛ nghɔsɔ. Katya, nkaana kɛmɔtshi kemá Moldovie, ntepelaka ante: “Akambo wa mɔlɛngɛ wɔmi wa mopanvungɛ nde winá wɔ satshu isa ambotshi wami tá mbandja y’ekonda. Ndekɔ la djedjɛ efula tewɔ lá wopo wɔ yandakanyɛ ngo mɔlɛngɛ wɔmi djɛ nyemalaka ndambo, edjinge nkɔmɛ nkete djɛ Yehova ndatonge djɛ lemi nyɛna wekeka wande l’eteyi.”

10. Kɛkɔnge kɛ ambotshi okokawɔ nangha ntsha wapalekɔ l’akoka wa ntshɔ tá ambandja y’ekonda? (Lenda ipapango: “ Okotshɔ te ambotshi.”)

¹⁰ Iya okokɛ nangha nge ntsha opalekɔ l’akoka wa ntshɔ tá mbandja y’enkonda? Amol, kanga lowika edjinge nde lá Inde ntepelaka ante: “L’edjena koyalami, ambotshi nkambaka olemo winá efula, edjinge ntshɔ lɔkɛndɔ tá mbandja y’ekonda ndɔmbaka mfalanga efula. Koko, wɛ nkoka nyɛna nkete djɛ Yehova ndatonge edjinge ntɔnɔla l’eteyi ntsha wɛ ntshɔ tá parkɛ kɛmɔtshi kana winá woyɛ lá ntɛpɛ kɛ mvulu k’etajɛ.” Ntsha nsɔsɔlɔ wɛ nshishima la nkɔmɛ nkfumɔ, okoka ndjisola nkete djɛ Ndjambe  ndatonge entshupa la mvulu kɛko dj’okokɛ nyɛnyɛ wana wako. (Yee. 104:24) Okoka nyɛna tofulu, tolalamba, etamba edjinge nkete nkina efula. Karina, kanga l’intasɛ l’Allemagne ntepelaka ante: “Nyɔ kɛmi nkɔpaka ansoso efula, djɛkondeke winá wɔ mayalaka oseka, nde anyɛnyɛki wepo w’ansoso watshikitanyi winá enkfumɔ wɛ maheetaka lande.” Ambotshi, nyo nkoka lonkina nkamba la efula k’avideo edjinge enkanda wɛso wetepela nkambo djɛ etongelo wa olonghanyelo wɔ Yehova ndaposɛ djɛ ndakanyɛ wana wanyo. Ee ayale lampe owikɛ, wɛ nkoka nkotshɛ́ wana wako djɛ nshishima etongelo kɛ Ndjambe. Winá wɔsɔ, nyontshɔke toshishime wekeka wa Yehova amɔtshi wokokɛ ndakanyɛ wana wako.

11. Wopo wɔkɔnge ambotshi okokawɔ nkotshɛ́ wana wawɔ djɛ nyɛna ngandji kɛ Yehova?

¹¹ Djɛ nkotshɛ́ wana wako dj’iwɔ nyɛna ngandji kɛ Yehova, wɛ nkoka ndaawɛnyɛ wopo wɔ anyama efula onanghelakawɔ wana wawɔ akambo la ngandji. (Mat. 23:37) Wɛ nkoka lonkina mpika nghɔmɔ ɛnsɔsɔ la wepo wɛ nkete djetshikitanyi djɛ wɔlɔ lombombe djetongamisá dj’osasangakaso la djɛkɔ. Karina, kanga sotepelaki má djiko, ntepelaka ante: “Winá wɔ nsaheetaka, mama ankembɛki djɛ nyemalaka ndambo djɛ ndenda wopo wɔ nsoso la nsoso otshikitanawɔ l’ansoso ankina edjinge wopo wɔ ɔwɔngi wɔwɔ ɔtɛnyɛwɔ ngandji kɛ Yehova. Ɛnɔnyi efula m’ɔkɔngɔ, nkindjɛ ndenda ansoso la nkɔmɛ nkfumɔ edjinge wopo wotshikitanawɔ lá akulɛrɛ. Nangha nghɔsɔ nkotshɛ́ka lemi dj’ipa mvungɛ ente Yehova ntɔkɔpa lombombe.”

12. Wopo wɔkɔnge ambotshi okokawɔ nkotshɛ́ wana wawɔ dj’iwɔ nyɛna balo djɛ Ndjambe? (Yeembo 139:14) (Lenda edjinge ntshango.)

¹² Kotshɛ́ wana wako wɛnyi balo djɛ Ndjambe. Yehova alekɔ la balo dj’efula ntoleka. (Ɔrɔ. 11:33) Ndjɔmbɔmba, wɛ nkoka ndakanyɛ wɔnako wopo wɔ washi ohandakawɔ t’olongo djɛ ntokfumba awonde edjinge m’ɔkɔngɔ wopo wɔ awonde wakɔ ɔkfɛyɛwɔ washi ipa l’okakasano tá ndjena djetshikitanyi. (Djɔ. 38:36, 37) Wɛ nkoka ndɔwɛnyɛ lonkina wopo wɔ demba djɛso ndananghemá lá yopo yɛ nkamɔ. (Wala Yeembo 139:14.) Kolenda wopo wɔ papa kɛmɔtshi k’etawɔ Vladimir ndananghe nkambo djɛsɔ. Nde ntepelaka ante: “Lofu lɔmɔtshi, wɔnaso wɔ mpame akfɔka má nkalo ko ahotalaka. M’ɔkɔngɔ w’etsho emangha, mpota kɛnde kɛkɔnɔka. Lemi isa wadjɛmi toopakisolaka ente Yehova atongaka demba djɛso la  nkoka djɛ ndalɔngɔsɔla nyɔmɛlɛ. Toshimelaka ente tɔtɛnaka nkambo djɛ nghɔsɔ lá nkete djɛ wana w’anto onanghawɔ. Ndjɔmbɔmba, otuka woyalɔngɔsɔlaka nyɔmɛlɛ m’ɔkɔngɔ wɔ nangha aksida. Nkambo djɛsɔ djekotshɛka wɔnaso djɛ nsipisoyɛ balo djelekɔ́ la Yehova.”

13. Wopo wɔkɔnge ambotshi okokawɔ nkotshɛ́ wana wawɔ dj’iwɔ nyɛna nkfulu kɛ Ndjambe? (Izaya 40:26)

¹³ Yehova ntoshimelaka dj’iso mbadjɛ wiso waso t’olongo edjinge ntɔnɔla lá wopo wɔ nkfulu kɛnde kɛ nkamɔ olamande tɔɔtɔ. (Wala Izaya 40:26.) Wɛ nkoka nkembɛ wana wako djɛ ndendaka t’olongo edjinge ntɔnɔlaka lá kɛnɛ kɛnawɔ. Tingting, nkaana kɛmɔtshi kemá Taïwan apavungɛka akambo amɔtshi wananghemisá m’ɔlɛngɛ wɔnde, nde ntepelaka ante: “Lofu lɔmɔtshi, nyɔ kɛmi antɔlaka tá mbandja kɛmɔtshi kepalekɔ la kura dj’iso ntolenda wopo wɔ tɔɔtɔ ɔpɛtawɔ l’olongo. L’etsho wɛsɔ, lokaki wɔma ente mpangotshikala la nkɔmano te Yehova ladjikɛnde winami welá nkalasa watshindaki djɛ lemi ntona nɛmɛyɛ Yehova. Nyɔ kɛmi ankembɛka djɛ lemi ntɔnɔla lá nkfulu kɛ Yehova ndakambe la kɛkɔ djɛ ntonga tɔɔtɔ tonkfumɔ tɔsɔ edjinge djɛ lemi mvungɔka ente Nde nkoka nkamba la nkfulu kɛkɔ djɛ nkotshɛ́ lemi djɛ mpikama lá ntondo k’ohemba onkfumɔ. M’ɔkɔngɔ wɔ lemi nshishima etongelo la nkɔmɛ nkfumɔ lá lɔkɛndɔ lɔsɔ, ntshindamaka djɛ lemi ndjeka djɛ ndjewa Yehova wɔlɔwɔlɔ, edjinge nkano djɛmi djɛ ndokambela djekembaka.”

14. Wopo wɔkɔnge ambotshi okokawɔ nkamba la etongelo djɛ nyɛnyɛ wana wawɔ ambɔ Yehova alekɔ Ndjambe k’osasa?

¹⁴ Etongelo kɛ Yehova nyɛnyɛka ente nde alekɔ Ndjambe k’osasa edjinge nde nkɔpaka iso ndjala l’osasa. Ase siansɛ wɛnaka ambɔ anyama efula ntombaka, ayale kaanga tofulu la nse. (Djɔ. 40:20) Wana wako wangɔlake edjinge iwɔ winá wɛnawɔ nyama kɛmɔtshi atomba? Mbala imɔtshi iwɔ wɛnaka mbushi akilika ɔkɔdji, kana wana wa mvɔ watomba esanga. Mbala kenkina kɛngɔngɛna wana wako wɔla wina wolendawɔ nyama kɛmɔtshi atomba, tovungɛke ndaashimela ente tokambela Ndjambe k’osasa!—1 Ti. 1:11.

15. Kɛkɔnge kekoka nkotshɛ́ ambotshi djɛ ndjewa kɛnɛ kelekɔ́ l’eloko wɛ wana wawɔ? (Woongo 20:5) (Lenda edjinge ntshango.)

¹⁵ Lá mbamba imɔtshi, ambotshi nkoka nyɛna  ambɔ alekɔ itondo y’okakasano djɛ wana wawɔ ndaashimela ekakasano wapomana lawɔ. Ntsha edjinge wɛ opomana l’okasano wɔsɔ, mbɔ koko ngo wɛ ndjewa tokanyi tɔ wana wako. (Wala Woongo 20:5.) Ambotshi amɔtshi wangɛnake ambɔ alekɔ wɔdju nangha nkambo djɛsɔ winá wɔ yotalende etongelo esanga la wana wawɔ. Lamo? Elonga kɛmɔtshi nde lá winá wɛ nghɔsɔ lako akambo efula wakoka ndjɛkɔla ikanyi yɛ wana la y’ambotshi. Papa kɛmɔtshi ketawɔ Masahiko ntepelaka elonga kenkina ante: “Winá woheetaso esanga la wana waso, wohandaso lá djiko dj’enkókó, kana woheetaso l’emamo wɛ ndjale, iwɔ ndjokaka wɔlɔ efula. Djɛkondeke angoyalake wɔdju lewɔ djɛ ntoshimela akambo walekɔ́ l’eloko wɛwɔ.” Katya, kanga sotepelaki má djiko ntepelaka ante: “Mbala efula, m’ɔkɔngɔ wɔ nkalasa, nyɔ kɛmi atshɔki la lemi tá parkɛ kɛmɔtshi. Lá winá wɛ wɔlɔ wɛ nghɔsɔ, loshimelaki akambo wapomanisa la lemi lá nkalasa edjinge akambo wankiyanyɛ.”

16. Wopo wɔkɔnge ankfumbo okokawɔ nkamba la etongelo kɛ Yehova dj’iwɔ ndawoka wɔlɔ edjinge nsasanga?

¹⁶ Winá wɔ ase nkfumbo kɛmɔ osasangawɔ la nkete djɛ Yehova ndatonge, iwɔ ndawokaka wɔlɔ edjinge nsasangaka esanga. Nkambo djɛsɔ ndaakotshɛ́ka djɛ ngandji k’okanawɔ ndeka mfula. Bible ntepelaka ante ‘winá wɔ ndjɔla’ la ‘winá wɔ mina’ wolekɔ. (Los. 3:1, 4, nɔtɛ.) Yehova atongaka djena djɛ wɔlɔ efula dj’okokaso nanghaka akambo wɔkɔpaso l’eteyi. Ankfumbo efula nkɔpaka mpetshɛ́ winá esanga lá jardɛ djɛ wɔlɔ efula, l’okonda, l’enkókó kana l’emamo wɛ ndjale. Wana amɔtshi nkɔpaka ndotalota edjinge ntomba lá parkɛ, djɛ ndenda anyama, kana ndjɔka djɔkɔ lá ndjalé, kana l’ɛkɛdji. Tolekɔ nsɔsɔlɔ la mbamba efula yɛ nsasanga la nkete djɛ Yehova ndatonge winá woyɛso esanga lá asɛkɛlɔ!

17. Ladjikɛnge ambotshi oyɛwɔ ladjɛ nkotshɛ́ wana wawɔ djɛ nsasanga l’etongelo kɛ Ndjambe?

¹⁷ L’andja wa bango wa Ndjambe, ambotshi la wana wawɔ wangosasanga la etongelo kɛ Yehova lá yopo yetananghemáká ntondo. L’eleko kɛsɔ, topangoyala kaanga l’elonga kɛmɔ kɛ ndjoka anyama wɔma kana anyama ntoká wɔma. (Iza. 11:6-9) Tongosasangaka la nkete djɛ Yehova ndatonge lotshinda lotshinda. (Yee. 22:26) Koko ambotshi, nyotakongake ngo tii tombokoma l’andja wa bango ko nyo ndowanga nkotshɛ́ wana wanyo dj’iwɔ nsasanga l’etongelo. Winá wokambanyo l’etongelo djɛ ndakanyɛ wana wanyo akambo walendana la Yehova, mbala imɔtshi wangoyala ikanyi imɔ la Nkfumi Davidɛ kanga lotepelisá ante: ‘Ee Yehova, lako elemo wɛlama l’elemo wɛko.’—Yee. 86:8.