1-2. Kɛkɔnge kenanghemaka winá w’anto olongolakawɔ batisimo, ko kɛkɔnge k’oyɛ ladjɛ nshishima?

 ƆMBƐNAKÁ anto wakɔpa ndongola batisimo? Wɛ okaka eshikikelo kelekɔ lawɔ má djoyi djɛwɔ winá w’okadjimolawɔ lá weepó epe w’opolakawɔ lá ntondo k’iwɔ ndongola batisimo. Kokanela osasa wɔ ase nkfumbo yɛwɔ la tolongo tɔwɔ yokaka. Winá w’oposawɔ má washi, ongokake waapomela ankasa la ɔngɛnake osasa lá dongi djɛwɔ. Mbengo inkfumɔ, nunu dj’anto wangotapolake djina djɛ djonyi djɛsɔ, iwɔ ndalambolaká te Ndjambe edjinge ndongolaka batisimo djɛ nkoma Ewakɛ wɛ Yehova Ndjambe.

² Iya otepelaso mo lá nkambo djɛko? Ntsha ongokanelake djɛ ndongola batisimo, ewa ente olekɔ onto wɔ djonyi efula ladjikɛnde ‘ohona Yehova.’ (Yee. 14:1, 2) Djamba djɛnɛ, ndendanaka la wɛ ayale oyɛ nde olangala kana ekokolo. Koko edjinge iso waamboshiyɛka ndongola batisimo ladjɛ nkembɛ nkano djɛso djɛ nkindjɛ nkambela Yehova lotshinda lotshinda. Djɛkondeke nyontshɔ toshishime esanga donga ntshato djeleka djonyi djetotshinda djɛ nkambela Yehova.

3. Lamo enkambi wɛ Yehova ɔkɔpakawɔ nsɔsɔlɔ la akambo wa wɔlɔ? (Yeembo 119:128, 163)

³ Yehova ndɔmbaka enkambi wɛnde djɛ ‘nkɔpa nsɔsɔlɔ.’ (Zak. 8:19) Yeso akembɛka ambeki wande djɛ nkilika akambo wa wɔlɔ. (Mat. 5:6) Kɛsɔ nsakisolaka ente iso ladjɛ ndjala la mposɛ k’efula kɛ nangha kɛnɛ kelekɔ sii, wɔlɔ, la piyɔ lá wiso wa Ndjambe. Ɔngɔkɔpake nsɔsɔlɔ edjinge akambo wa wɔlɔ? Tolekɔ l’eshikikelo ente wɛ nkɔpaka. Wɛ ntonaka ongolo la akambo ankfumɔ wa nyɛtshi la wa lopango. (Wala Yeembo 119:128, 163.) Ongolo alekɔ djekeka mɔtshi djɛ Satana, owandji w’andja wanɛ. (Dj. 8:44; 12:31) Okoma ɔmɔtshi wolekɔ la Satana nde ndjila djiina dj’ekina djɛ Yehova Ndjambe mbindo. Satana  ambotshanghanyɛ akambo w’engolo lá nkambo djɛ Ndjambe kɛso ntateyɛ ngo má ɔtɔmbɔkwɛlɔ welá Ɛdɛna. Nde ɛnyɛka djɛ Yehova alekɔ kanga lolemba, edjinge Owandji wɔ nyɛtshi wopekalaka anto kɛnɛ kelekɔ wɔlɔ. (Ewa. 3:1, 4, 5) Engolo wɛ Satana otepelande lá nkambo djɛ Yehova wetaakindjɛ ntshita tokanyi edjinge eloko w’anto. Ntsha onto ambotona ‘nkɔpa nsɔsɔlɔ,’ Satana nkoka ndootshinda djɛ nangha wepo w’akambo ankfumɔ wapalekɔ wɔlɔ la ndjala la nanghedji djɛpɔlɔ.—Ɔrɔ. 1:25-31.

4. Wopo wɔkɔnge Yehova ndɛnyɛ ante alekɔ ‘Ndjambe kɛ nsɔsɔlɔ’? (Lenda edjinge ntshango.)

⁴ Yehova alekɔ ‘Ndjambe kɛ nsɔsɔlɔ,’ edjinge nde ndakanyɛka anto w’ɔkɔpa akambo wa nsɔsɔlɔ. (Yee. 31:5) Má nangha nghɔsɔ, nde ndaakotshɛká dj’iwɔ ntshungɔ m’engolo wɛ Satana. Yehova ndakanyɛka enkambi wɛnde dj’iwɔ ntepela nsɔsɔlɔ la dj’iwɔ ndjala anto wa sii. Kɛsɔ ndaakotshɛka dj’iwɔ ndɔsama l’odjito edjinge ndjala la vu djel’eteyi k’oloko. (Woo. 13:5, 6) Nde akonanghelaka edjinge wɛ nghɔsɔ winá wɔ ngekaka Bible? Wɛ ekaka ente mboka yɛ Yehova ingoyalake wɔlɔ le anto ankfumɔ edjinge le wɛ nghɔmɛlɛ. (Yee. 77:13) Djɛkondeke, wɛ nkɔpaka nangha kɛnɛ kɛ Ndjambe otepelande ante kelekɔ wɔlɔ. (Mat. 6:33) Djɛkondeke oyɛ la mposɛ kɛ nkotshɛ́ anto ankina dj’iwɔ ndjewa nsɔsɔlɔ, la nyɛnyɛ ente kɛnɛ kɛ Satana otepelande lá nkambo djɛ Ndjambe kɛso Yehova, kelekɔ ongolo. Okokɛ nangha nkambo djɛsɔ ngete mo?

5. Wopo wɔkɔnge wokokɛ nsuka nsɔsɔlɔ la akambo wa wɔlɔ?

⁵ Wɛ nkoka nsɔna yopo yɛ lowiko yetepela ente: “Lambotona engolo wɛ Satana, edjinge loseela nsɔsɔlɔ. Lemi nkɔpaka Yehova Nkfumi kɛmi, edjinge nkɔpaka nangha kɛnɛ k’otepelande ante kelekɔ́ wɔlɔ.” Okokɛ nangha nghɔsɔ ngete mo? Má ndalambola nghɔmɛlɛ te Yehova lá lɔlɔmbɔ, ko masɔ ndongola batisimo djɛ nyɛnyɛ lá ntshandjawala ente omboyalambola tende. Ntsha wɛ nkɔpaka nsɔsɔlɔ edjinge akambo wa wɔlɔ kɛsɔ kengokotshinda djɛ ndɔsa nkano djɛ ndongola batisimo.

6. Lá nkilika Yeembo 45:4 donga djɛkɔnge dj’oyɛso ladjɛ nkɔpa Yeso Kristo?

⁶ Ladjikɛnge ɔkɔpakɛ Yeso Kristo? Kolenda ndonga mɔtshi lá Yeembo 45:4. (Wala.) Yeso nkɔpaka nsɔsɔlɔ, okitshakitshɛ l’akambo wa wɔlɔ. Ntsha wɛ nkɔpaka nsɔsɔlɔ l’akambo wa wɔlɔ, mbɔ ape l’ehamo wɛ nkɔpaka edjinge Yeso Kristo. Kokanela wopo wɔ Yeso ndaseela  nsɔsɔlɔ l’akambo wa wɔlɔ l’oloko wolo onkfumɔ. (Dj. 18:37) Ya wopo wɔkɔnge Yeso ndɛnyɛ okitshakitshɛ?

7. Kɛkɔnge kekosasangɛ lá kɛnɛ kelendana l’okitshakitshɛ wɔ Yeso?

⁷ Yeso asukaka okitshakitshɛ má ndjɔmbɔmba kɛnde. Ndjɔmbɔmba, nde apɛyɛki lomo lonkumɔ ngo le Papa kɛnde, koko ape le nde nyɔmɛlɛ. (Mar. 10:17, 18; Dj. 5:19) Oyawokɛ ngetemo lá kɛnɛ kelendana l’okitshakitshɛ wɔ nghɔsɔ? Ape nkambo djɛsɔ nkotshindaka djɛ wɛ nkɔpa la nkilika Wɔna Ndjambe? Ee oyɛwɔ ngo nghɔsɔ. Lamo Yeso oyɛnde l’okitshakitshɛ? Ladjikɛnde nde nkɔpaka la ndjokolaka ndjɔmbɔmba kɛ Papa kɛnde, kanga lolekɔ l’okitshakitshɛ. (Yee. 18:35; Heb. 1:3) Opasepamá te Yeso kanga lokolaki wekeka wa Yehova lá lɛdji lɔ djɔ?

8. Lamo oyɛso l’osasa wɔ Yeso ndjala Nkfumi kɛso?

⁸ Iso nkɔpaka Yeso etengo Nkfumi kɛso ladjikɛnde nde alekɔ Ndɔndji keleka wɔlɔ. Yehova nyɔmɛlɛ ankfumbaka Wɔnande edjinge ɔsɔnaka djɛ nde ndjala owandji. (Iza. 50:4, 5) Kokanela lonkina ngandji k’efula kɛ Yeso ndatɛnyɛ. (Dj. 13:1) Ladjikɛnde Yeso alekɔ Nkfumi kɛko, nde ɛdje djɛ wɛ ndɔɔkɔpa. Nde apakisolaka ante anto wɔkɔpá nsɔsɔlɔ, ntepela ente wanɛ wetande ante tolongo tɔnde, ndɔwɛnyɛka ngandji kɛwɔ má nɛmɛyɛ ɛlɛmbɛ wɛnde. (Dj. 14:15; 15:14, 15) Ndjala ilongo yɛ Wɔna Yehova, alekɔ nsɔsɔlɔ mpeyi k’ekekete!

9. Wopo wɔkɔnge batisimo dj’Akristo ɔfɛnawɔ la djɛ Kristo?

⁹ Ɔlɛmbɛ ɔmɔtshi wɔ Yeso nde ambeki wande ndongola batisimo. (Mat. 28:19, 20) Nde nyɔmɛlɛ apɛyɛka ndjɔmbɔmba lá nkambo djɛsɔ. Lá lɛdji lɔmɔtshi, batisimo djɛnde tshikitana la djɛ ambeki wande. (Lenda ipapango: “ Wopo wɔ batisimo djɛ Yeso otshikitanawɔ la djɛ ambeki wande.”) Koko lá lɛdji lonkina, batisimo djɛwɔ djɛfɛna. Má ndongola batisimo, Yeso ɛnyɛka lá wiso w’anto ankfumɔ ante nde nkɔpaka nangha ɛkɔpa kɛ Papa kɛnde. (Heb. 10:7) Wopo wɔk’ɔmɔ ndeke, ambeki wa Kristo ndongolaka batisimo djɛ nyɛnyɛ lá ntshandjawala ente wamboyalambola te Yehova Ndjambe. Winá wɔsɔ nkambo djeleká djonyi lá lowiko lɔwɔ nde, nangha ɛkɔpa kɛ Yehova Ndjambe koko ape kɛwɔ yɔmɛlɛ. Má nangha nghɔsɔ iwɔ nkilikaka Ndjɔmbɔmba kɛ Nkfumi kɛwɔ.

10. Lamo ngandji k’okɛ Yeso oyɛwɔ ladjɛ nkotshinda djɛ wɛ ndongola batisimo?

¹⁰ Wɛ ndjawolaka ente Yeso alekɔ ɛtɔyi kɛ Wɔna Yehova Ndjambe edjinge Nkfumi kɛ ndasɔnɛ djɛ ntɔlɔndjɛ. Wɛ ndjewaka ente Yeso alekɔ onto w’okitshakitshɛ w’okola Papa kɛnde lá lɛdji lɔ djɔ. Wɛ ekaka ente nde alesɛka anto wayalaki la ndjala, akembɛka waambɔlɛmba, edjinge asadjɛka ase elando. (Mat. 14:14-21) Wɛ nyɛnaka wopo wɔlɔndjɛnde otshumano lɔɔko kɛnɛ. (Mat. 23:10) Edjinge wɛ ndjewaka ente l’etsho weyaye, nde angotonanghela akambo wa wɔlɔ efula etengo oyɛnde Nkfumi k’Onkfumi wɔ Ndjambe. Okokɛ nyɛnyɛ ente wɛ ndɔɔkɔpaka ngete mo? Má nkilika ndjɔmbɔmba kɛnde. (Dj. 14:21) Wɛ nkoka ntateyɛ nangha nkambo djɛsɔ má ndalambola te Yehova la má ndongola batisimo.

11. Elonga kɛkɔnge k’okokɛ ntepela ente kelekɔ́ elonga keleká djonyi ketotshinda djɛ ndongola batisimo, ko lamo otepelɛ nghɔsɔ?

¹¹ Elonga kɛkɔnge keleká djonyi kekoka nkotshinda djɛ ndongola batisimo? Yeso atisolaka ɔlɛmbɛ wɔ Ndjambe woleká ekekete, má ntepela ante: ‘Wɛ ladjɛ nkɔpa Yehova Ndjamba kɛko l’oloko wɔko onkfumi, l’anima wako ankfumɔ, la yimba yɛko inkfumɔ, edjinge la wolo wɔko onkfumɔ.’ (Mar. 12:30) Etepela wɛsɔ nyɛnyɛka lá lɛdji lɔkɔnge lɔkɔpɛ Ndjambe?

12. Ladjikɛnge ɔkɔpakɛ Yehova? (Lenda edjinge ntshango.)

¹² Donga djetotshinda djɛ nkɔpa Yehova dekɔ efula. Ndjɔmbɔmba, osipisoyɛka ente nde alekɔ  ‘ikɔkɔ yɛ lowiko’ edjinge ‘epapɛyɛ enkfumɔ wɛ wɔlɔ la wɛ djɔ ndjɛka mende.’ (Yee. 36:9; Dja. 1:17) Nkete nkfumɔ djɛ wɔlɔ efula dj’okotshɛ́ ndjɛka me Ndjambe kɛso kɛ lokapo efula, edjinge kɛ ngandji.

13. Lamo oshinga wɔ mbendo oyɛwɔ opapɛyɛ wɔ wɔlɔ efula?

¹³ Oshinga wɔ bendo wolekɔ opapɛyɛ woleka wɔlɔ wɔ Yehova ndatɔpɛyɛ. Ladjikɛnge okokaso ntepela nghɔsɔ? Kokanela djokanelo djelekɔ́ l’antenyɛ Yehova nya Wɔnande. Yeso atepelaka ante: ‘Papa nkɔpaka lemi’ edjinge ‘lemi nkɔpaka Papa.’ (Dj. 10:17; 14:31) Djokanelo djelekɔ́ l’anteyi kɛwɔ djefulaka l’ilá kɛ miliyara y’ɛnɔnyi yɛ yawikaka esanga. (Woo. 8:22, 23, 30) Kokanela efula kɛ yɛnyi kɛ Ndjambe ndakoke ndjoka winá wɔ ndawola djɛ Wɔnande nyɛna ndjolo edjinge mvɔ. Yehova nkɔpaka anto, ndjila edjinge wɛ, lá lɛdji l’efula djɛkondeke ndawola mpɛyɛ Wɔnande wɔ ngandji etengo olambo djɛ nkɔpɛyɛ wɛ nya anto ankina mbamba kɛ mbika lotshinda lotshinda. (Dj. 3:16; Nga. 2:20) Lako elonga kekoka ntotshinda djɛ nkɔpa Ndjambe keleka elonga kɛsɔ ekekete.

14. Okoma wɔkɔnge woleká wɔlɔ lá lowiko wokokɛ ndawilela?

¹⁴ Ngandji kɛko te Yehova kefulaka winá wɔ ngeke akambo efula walendana lande. Lá nsɔsɔlɔ wɛ nkɔpaka ndasukanyɛ lande winá wɔsɔ edjinge lotshinda lotshinda. Ee, wɛ nkoka nangha nkambo djɛsɔ. La ngandji k’enkfumɔ nde kokembɛka djɛ wɛ nsasangɛ oloko wɔnde.  (Woo. 23:15, 16) Wɛ nkoka nangha nkambo djɛsɔ ape má etepela toko koko edjinge má nanghedji. Yopo yowikɛ lowiko lɔko nyɛnyɛka djɛ wɛ nkɔpaka Yehova nsɔsɔlɔ. (1 Dj. 5:3) Ɔsɔ ndeke okoma woleká wɔlɔ lá lowiko wokokɛ ndawilela.

15. Wopo wɔkɔnge wokokɛ nyɛnyɛ ngandji k’okɛ Yehova?

¹⁵ Wopo wɔkɔnge wokokɛ nyɛnyɛ ngandji kɛko te Yehova? Ntondo ntondo, má nangha lɔlɔmbɔ lotshikitanyi djɛ ndalambola nghɔmɛlɛ te Ndjambe ngo kɛmɔ kɛ nsɔsɔlɔ. (Yee. 40:8) Masɔ, ɔnghɛnyɛ lá wiso w’anto ankfumɔ ente omboyalambola te Ndjambe má ndongola batisimo. Etengo sɛnaki má djiko lá djamba djɛnɛ, batisimo alekɔ nkambo dj’osasa edjinge djeleka djonyi lá lowiko lɔko. Ombotateyɛ lowiko lɔ bango ape lá nkambo djɛko nghɔmɛlɛ, koko djɛ Yehova. (Ɔrɔ. 14:8; 1 Pɛ. 4:1, 2) Ɔsɔ alekɔ nkano dj’ekekete edjinge djɛ djonyi efula. Koko djengokokotshɛ djɛ wɛ ndjala la lowiko loleka wɔlɔ. Lá wopo wɔkɔnge?

16. Etengo Yeembo 41:12 otepelawɔ, wopo wɔkɔnge Yehova ndongofuta wanɛ woolambola lowiko lɔwɔ djɛ ndokambela?

¹⁶ Yehova alekɔ Onto woleká lokapo. Ayale kɛkɔnge k’ɔpɛyɛ, ewa ente nde angɔkɔpɛyɛka winá enkfumɔ nkete efula ndeka k’enkfumɔ k’ɔpɛyɛ. (Mar. 10:29, 30) Nde angɔkɔpɛyɛ lowiko loleká wɔlɔ, l’osasa, kaanga má winá wɔsɔ l’andja wapɔlɔ wanɛ. Edjinge ɔsɔ oyɛwɔ ngo ewangelo. Lowiko lowanga má batisimo djɛko lopangoyala l’ekomo. Wɛ ladjɛ nkindjɛ nkambela Papa kɛko lotshinda lotshinda. Ngandji kelekɔ́ l’antenyɛ wɛ la Papa kɛko kengotalekaka ngo mfula. Edjinge lá nsɔsɔlɔ ongowikaka l’ilá k’enkfumɔ k’oyɛnde la lowiko, ntepela ente lotshinda lotshinda.—Wala Yeembo 41:12.

17. Kɛkɔnge k’okokɛ mpɛyɛ Yehova kɛ ndotawaka ntondo?

¹⁷ Winá wɔsɛ nkano djɛ ndalambola la djɛ ndongola batisimo, wɛ mbaka mpeyi kɛ mpɛyɛ Papa kɛko ekete keleka ntshina efula. Nde akɔpɛyɛka nkete nkfumɔ djɛ wɔlɔ, winá enkfumɔ w’osasa wɛ ngotawaká ntondo. Wɛ, I’onkoko wɔkɔ okoka mpɛyɛ Kanga olongo la looko ekete kɛmɔtshi kɛ ndotawaká ntondo, ntepela ente olemo wɔko wɔ l’ɛkɔpa la wɔ nkɔmano. (Djɔ. 1:8; 41:11; Woo. 27:11) Ɔsɔngo yopo yeleká wɔlɔ yokokɛ nkamba la lowiko lɔko? Ape l’ehamo,  ngandji kɛko te Yehova ndeke elonga keleká wɔlɔ kekoka nkotshinda djɛ wɛ ndongola batisimo.

18. Weepó wɛkɔnge w’okokɛ ndawopola?

¹⁸ Ngongokadjimola ngete mo lá wopo wɔnɛ: Ongolongola batisimo? Ngo wɛ nghɔmɛlɛ ndeke lokoka mpɛyɛ nsakiso lá wopo wɔsɔ. Koko angoyala wɔlɔ ntsha wɛ ndawopola nghɔmɛlɛ ente: Okongami nge?’ (Ele. 8:36) Tovungɛke donga ntshato dj’isoshishimaki. Kɛ ntondo, wɛ nkɔpaka nsɔsɔlɔ la akambo wa wɔlɔ. Yawopola ente: ‘Lemi nkɔpaka nyɛna lofu lɔ onto onkfumɔ ndongotepela nsɔsɔlɔ edjinge nangha kɛnɛ kelekɔ́ wɔlɔ?’ K’epe, wɛ nkɔpaka Yeso Kristo. Yawopola ente: ‘Lemi nkɔpaka wɔna Ndjambe ndjala Nkfumi kɛmi edjinge lemi nkɔpaka nkilika ndjɔmbɔmba kɛnde? Elonga k’asato keleká djonyi nde, wɛ nkɔpaka Yehova. Yawopolá ente: ‘Lemi nkɔpaka nsasangɛ oloko wɔ Yehova má ndokambela etengo Ndjambe kɛmi?’ Ntsha ekadjimwelo wɛko lá weepó wɛsɔ oyɛwɔ nde ee, iya lamo ngopalongola batisimo? Okongɛ nge?—Ele. 16:33.

19. Lamo ngopakoke nkakanda djɛ ndongola batisimo? Pɛyɛ ndjɔmbɔmba. (Djɔanɛ 4:34)

¹⁹ Ntsha okakanda djɛ ndongola batisimo, tɔnɔla lá ndjɔmbɔmba kɛmɔtshi kɛ Yeso ndakambe la kɛkɔ. (Wala Djɔanɛ 4:34.) Tokote ente Yeso ɛdjɛka nangha ɛkɔpa kɛ Papa kɛnde la nkete djɛ ndɛ. Ladjikɛnge? Ladjikɛnde nkete djɛ ndɛ ndjalaka wɔlɔ leso. Yeso ndjewaka ante kenkfumɔ kɛ Yehova ɔtɔlɔmbande djɛ nangha ndjalaka ngo lá wɔlɔ wɔso. Yehova apakɔpɛ iso nangha nkambo mɔtshi djekoka ntonanghela nyɛtshi. L’anteyi kɛ akambo wa Yehova ɔkɔpande wɛ nangha, ndongola batisimo alekɔ l’eteyi? Ee. (Ele. 2:38) Djɛkondeke wɛ nkoka ndjala l’eshikikelo ente ongowa wapɔ má nɛmɛyɛ ɔlɛmbɛ wɔ ndongola batisimo. Ntsha opakakanda djɛ ndɛ nkete djɛ wɔlɔ nkfumɔ, lamo okakandɛ djɛ ndongola batisimo?

20. Kɛkɔnge kɛ songoshishima lá djamba djeyaye?

²⁰ Okongɛ nge? Anto efula nkoka nkadjimola lá woopó wɔsɔ ambɔ, “ntalɔngɔswama.” Nkambo djɛ nsɔsɔlɔ nde, nkano djɛ ndalambola te Yehova la djɛ ndɔsa batisimo alekɔ nkano djeleka djonyi dj’onto oyɛnde ladjɛ ndɔsa lá lowiko. Djɛkondeke ndɔmbamaka ndɔsa winá djɛ ntɔnɔla la nkɔmɛ nkfumɔ, edjinge ndjila welo djɛ nkotshɛ kɛnɛ kɛlɔmbama djɛ ndolongola batisimo. Iya ntsha olekɔ nsɔsɔlɔ la mposɛ kɛ nangha nkambo djɛsɔ, kɛkɔnge k’okokɛ nangha winá wɔsɔ djɛ ndalɔngɔsɔlá? Tongoshishima okadjimwelo wɔ woopó wɔsɔ lá djamba djeyaye.